Translate

الأربعاء، 1 ديسمبر 2010

مصلحتي يا مصلحتي

السلام عليكم ورحمة الله وبركاته

كيف حالكم يا شباب ...والله واحشني كتير كتير كتير

معلش...انا عارف اني غيابي كان طويل اوي الفترة اللي فاتت بس فعلاً انزلقت في مستودع المسؤليات والاستعداد للتخلي عن الحرية تحت مسمي الزواج

حلوة اوي انزلقت ديه....

نسبنا بقي من المسائل الشخصية اللي مش مهمة للسادة الزوار ونرجع تاني نفضفض ونتكلم زي زمان

فاكرين زمان....ياااااااااااااااااه...تصدقوا انا مش فاكر....مش مهم اهو النسيان دا نعمة برضو من نعم ربنا علي العباد

بصراحة اللي استفزني الايام اللي فاتت ديه واكيد استفز ناس كتير انها تكتب عنه هو موضوع الانتخابات

الحمد لله انا ربنا رزقني بشغل مش بشوف فيه غير الصحراء والبحر واصدقائي هناك العقارب والثعابين والطريشة...بس ولله الحمد بحب مجال عملي جدا ويكفي انه مجال فريد من نوعه ...وهو توليد الكهرباء بواسطة طاقة الرياح عن طريق مزارع الرايح اللي موجودة في منطقة الزعفرانة

الحمد لله علي نعمه التي لا تعد ولا تحصي....

المهم بقي نرجع لموضوعنا وهو الانتخابات
الدورة اللي فاتت سمعنا شعارات الاخوان وتلهفنا عشان ننجح الناس ديه وسمعنا شعارات الاصلاح والتغيير والكلام اللي يبث في نفوس المتشائمين الامل

وحصل والاخوان نجحوا علي الرغم من نصائح بعض العقلاء اللي قالوا الحكاية محصلة بعضها وهي عبارة عن كعكة يتنازع عليها اصحاب المصالح من الحزب الحاكم والاحزاب المعارضة فريح رجليك ومترحش في حته

نجح الاخوان نجاح ساحق علي الرغم من تزوير الحكومة زي ما حصل في لجنة ابراهيم الفقي ونجح رغم انوف الجميع وحتي انف القضاء نفسه (يعني التزوير مش بيفرق اوي)

بس ايه اللي اتغير لما المعارضة والاخوان كان ليهم الايدي العليا في الانتخابات.....حد شاف اي تغيير خلال السنين اللي فاتت؟؟

نسبة البطالة فعلا قلت؟؟ اسعار السلع انخفضت؟؟؟ زادت المرتبات وانخفضت الضرائب؟؟؟ التغيير والاصلاح اخبارهم ايه؟؟

محصلش حاجة....فشلوا بمعني الكلمة...عارفين ليه؟؟؟ لأن الهدف كان سياسي مكنش ديني

طبعاً الاخوان اخدوا فرصة عمرهم الفترة اللي فاتت لإستمالة قلوب الغلابة من المصريين المطحونين...وللأسف ضيعوا الفرصة..أو ضاعت منهم الفرصة

هتلاقي طبعاً كلام مختلف منهم وهيحسسوك انهم عملوا اللي متعملش عشان مصلحة الناس

بس للأسف الناس بقي عندها وعي وفهمت الحكاية...والدليل علي كدا اللي حصل الدورة ديه

كان في تزوير وكان في فساد...بس من غير التزوير والفساد كان الحزب الحاكم هو اللي هيكسب برضو

ودا اللي حصل في دوائر مدينتي الجميلة مدينة الاسماعيلية

الدورة اللي فاتتت نجح مرشحين الاخوان وسقط كل مرشحين الوطني وكتبنا لافتات تقول اهلا بك في المحافظة التي لم ينجح فيها مرشحين الوطني

فاز المرشح صبري خلف الله بإكتساح ضد مرشح الوطني محمود عثمان ابن المعلم عثمان احمد عثمان

علي الرغم من حب الناس لأبناء عثمان لإجابيتهم وخدمتهم مصالح اهل بلدتهم حتي دون التواجد علي كرسي البرلمان القذر

نفس السيناريو حدث في هذا العام بين الاخواني وابن عثمان واكتسح ابن عثمان الانتخبات بتفوق زاد عن 96% رشحه ليكون زعيم للأغلبية بعد عن حصل مرشح الاخوان علي اصوات اقاربه ومعارفه فقط ومازال يتغني بالتزوير في الانتخابات علي الرغم من ان الجميع قد تعاهد علي ترشيح محمود عثمان وعدم ترشيح مرشح الاخوان..ودا كان نبض الشارع الاسمعلاوي وأراء الناس كلها (يعني بصراحة من غير تزوير)

اخفق الاخواني واتهم الانتخبات بالتزوير ولكنها نتيجة طبيعية ومنتظرة ...

انا لست ضد او مع لأنها في النهاية كما اسلفت وقلت : كعكة يتنافس عليها الاحزاب ولا عزاء للمصري المطحون

وعلي العلم اني لم اذهب الي الانتخبات ولن اذهب ابداً ما دمت حياً لأنها لعبة قذرة لا تغني ولا تسمن من جوع

وتأتي الفتاوي الاخوانية لتتهم من يعطي صوته للوطني بأنه آثم ويتحمل اوزار كالجبال ...وأن الصوت امانة امانة امانة يا ولدي

اتلهوا علي عينكوا واسكتوا.....وبطلوا فتاوي الانتخبات ديه واعملوا مشاريع مفيدة زي زمان (بس متكنش علي سبيل الدعايات الانتخابية)

اخيرا عاوز اقول يا جماعة انا لست مع الوطني او ضد الاخوان....فلم اجد فارق بين الاثنين الا في المسمي فقط

انا مع مصلحتي ومصلحة المطحونين الذين اقصي طموحهم هو الحصول علي رغيف العيش

الدبووووووووووووووووووووووس

الايجابية تبقي احلي لو كانت فعل ...مش كلام....بس كدا (علي وجه العموم وليست خاصة بالموضوع )

اعتزار

السلام عليكم
بعتزر للأخوة والاخوات علي طول الغياب وسوف يكون لنا لقاء بإذن الله في القريب العاجل
وجزاكم الله خيرا يا اهل التدوين المتين

السبت، 3 أبريل 2010

تخاريف وخلاص

السلام عليكم ورحمة الله وبركاته

ازيكم يا شباب...كيف احوالكم يا اهل التدوين المتين...اهل الصراخ والنواح والانين...والخلق حولكم لسان حالهم إذن من طين والاخري من عجين .
يا سلام عليك يا واد يا ابو صابر انت يا عترة يا فللي يا رايق المزاج يا فاهم انت ان التدوين دا اونطة وملوش لزمة
طب انت بتدون ليه؟؟ (اهو من باب اني احشر نفسي في اللي مليش فيه وعلي رأي المثل اللي بيقول اكفي القدرة علي فمها يحتار عدوك فيك)
في بداية الموضوع بهني الشعب المصري كليله علي سلامة الكبير وعودته بالسلامة الي ارض الوطن سالماً غانماً
معلش متأخرة شوية يا ريس بس والله ظروف الشغل والغربة عشان اعرف اوفر الجروش عشان اتجوز البنية الغلبانة اللي تعبتها معايا
اعذرني يا ابو علاء مش بأيدي ...
سلامة مرارتك الفين سلامة...عنيا بتبكي عليها بندامة
ولو لسا فاضلة عندي المرارة...كانت هتفدي مرارة الزعامة
يا ابو شفة نازلة بشفطورة طالعه..وحواجب بترسم احلي علامة
غيابك علينا ..بكي عنينا..ورجعوك لبيتك كان احلي ابتسامة
في احضان شنودة وبطرس ومينا...رميت انت نفسك بكل استكانة
بندرك وفيت...وبنيت الكنيسة...اول ما قمت يا سيدي بالسلامة

ودي كانت ابسط كلمات حبيت احييك بيها في بداية الموضوع

نسبنا بقي من شوية الاونطة اللي فوق ونتكلم بجد
كالعادة انا واحد بجيب وجع الدماغ لنفسي....يعني تلاقيني قاعد كدا هادي وكويس واروح مرة واحدة معكنن علي نفسي
ومن ابسط اساليب العكننة قرائة جريدة حكومية ....او قراءة جريدة معارضة
فجئة علي حين غرة وانا بشرب كوب من النسكافية لقيت جنبي جريدة اخبار اليوم....ايدي اتمدت عليها عشان اقرئها في حركة لاإرادية قبيحة كما يفعل الطفل الصغير عند الاشارة الي مكان وضع فضلاته حتي تسطيع امه ان تنظفها من علي السجادة بعد الاستمتاع بصراخها بسبب تلويثه السجادة الغالية ...
فالطفل لن يكف عن تلويث السجادة بفضلاته...وانا ايضاً لن استطيع ان اكف عن قرائة الجرائد
المهم ...لقيت الجريدة الموقرة صاحبة الجلالة تنشر زيارة وزير الصحة المحترم زيارة مفاجئة الي احدي المستشفيات
دا علي طريقة وزير التعليم الجديد نجل وزير الداخلية السابق زكي بدر ...والذي ورث من ابوه السفالة وقلة الادب
بس ليا وقفة بسيطة في موضوع زيارة وزير التعليم وقراراته الجريئة حتي نعطي كل ذي حقاً حقه .
اولاً انا بكره الراجل دا ومش بطيقه من ايام ما كان رئيس لجامعة عين شمس لموقفه من النقاب وموقفه من حجات كتير
وعموماً هو دخل هيئة التدريس بدون وجه حق(كوسة يعني) ...يعني تاريخه ملوث من الاساس
بس عجبني في موضوع الكبسة (مش ام لحمة ورز) علي المدرسة بتاعت حلوان
كان حال المدارس متردي لدرجة لا توصف كما هو الحال في جميع مدراس مصر بدون اي استثناء...والمشهد اللي كان في المدرسة بتاعت الزيارة ابلغ دليل علي كدا
ودي نقطة تتحسب للوزير الجديد علي الرغم من عيوبه وسلاطة لسانة ....
نعدي موضوع وزير التعليم ونستني عليه شوية ونشوف نتيجة الشدة المستحقة اللي بدأ بيها مزاولة اعماله ونروح لننوس عين امه وزير الصحة....
الوزير الفافي الامور خالص اللي عمل زيارة مفاجئة لأحد المستشفيات الحكومية
بصوا بقي يا جماعة زيارة عن زيارة تفرق بصراحة يعني.....تحس كدا ان زيارة وزير الصحة تمثلية اعلامية ساذجة خالص وتضحكك...لسان حاله بيقول وانا كمان مهتم بعملي بعمل كبسات
لأن اي حد بكل بساطة عارف حال المستشفيات الحكومية عامل ازاي...وعارف التعامل الغير آدمي من هيئة الاطباء والتمريض والامن وصولاً بعمال النظافة والجنيني والحرس اللي علي ابواب المستشفيات والسادة المرضي الزملاء
وما خفي كان اعظم من حالات الاهمال وإنعدام الضمير من الاطباء في طريقة علاج المرضي (من مصادر حبيبة الي قلبي موثوق منها اوي)
يعني الله يكرمك يا سعادة الوزير بلاش كلام فارغ وخليك في كوزك لما نعوزك
حكومة بايظة ووزراء متخلفين بكل ما تحتويه الكلمة من معاني
وعلي رأسهم طويل التيلة الظريف اللطيف
معلش يا جماعة اهو حبيت افضفض معاكم كدا مع إني عارف ان محدش بقي بيسمع
الدبووووووووووووووووس بتاع زمان
ينفع تقول لواحد نصراني وحد الله وهو يرد عليك ويقولك لا اله الا الله؟؟؟
طبعاً مينفعش عشان عقيدته هي عدم التوحيد
اهو اللي مينفعش كمان انك تقولوا كل سنة وانت طيب بمناسبة عيد القيامة المجيد
عشان انت عقيدتك كمسلم تنفي زعمهم الباطل بأن لله ولد وقد صلب وبعث بعد صلبه والاحتفال بذلك
بدون بقي ادلة وفتاوي بعدم جواز تهنئة غير المسلمين بأعيادهم عشان محدش يناقش في موضوع محسوم
وجزاكم الله خيراً

الثلاثاء، 5 يناير 2010

الف ليلة وليلة مطينة بطين

السلام عليكم ورحمة الله وبركاته



بعد ان اعتزلت التدوين واتجهت كغالبية الشعب المصري الي مبدأ " إني سأجعل أذن من طين والاخري من عجين"



سمعت حوار قوي ومتين



بين شهرزاد المفحومة والشعب المسكين ....



إذا قالت شهرزاد المكبوتة مخاطبة الشعب في اسود حدوته :



بلغني ايها الشعب الحزين....اللي اتكب عليه الجوع والذل طول السنين



ان شهريار قد فقد عقله بعد ان كبر سنه وتعدي حاجز ال التسعين



واصبحت دفة السفينة في ايده مهزوزة.....واصبحت البلد الشابة الجميلة كأمرأة عجوزة



فقد قرر شهريار الحكيم...ترك الدفة لولي العهد اللئيم



فعد العدة لذلك بإطلاق المنادي ليطوف البلاد بالطبلة العجيبة



باحثاً عن موظفين متعفنين وولاد ستين في سبعين...ليعمل كل منهم كخادم وفي وأمين



فكان اول المتقدمين.....طويل الساقين مقوس المنكبين الظريف اللطيف النظيف



وجاء بعده إنسان الغاب طويل الناب حفيد الشبشب وأبن القبقاب الوزير ابن بطرس الغالي عند كل حقير



ثم حرك المنادي انفه فشم رائحة نتنة تنبعث من شخص قصير....فسأله ما اسمك قال : انا عز المكير



فربط المنادي جميع المتقدمين في ذيل حماره وصار بهم الي الي سيده في داره



وبدأت تظهر معالم شلة الانس....الذين اجتمعوا علي جثث الشعب للهو والرقص



وهنا انتهت الليلة الاولي من ليالي الحاكم السفاح ...وادرك شهرزاد الصباح فسكتت عن الصويت والنواح







ملحوظة : كل ما جاء في اعلاه ليس له علاقة بالواقع من قريب او بعيد...وما جاء من اسماء فهي من وحي خيال الكاتب ومن يدعي غير ذلك فسوف يعرض نفسه لحجات مش تمام