Translate

الأربعاء، 2 يناير 2008

معادن الناس

السلام عليكم ورحمة الله وبركاته

عام جديد علي عملنا شهيد...أسأل الله ان يرزقنا الي الخير في كل يوم وحين

ازيكم يا شباب....يارب تكونوا كلكم في خير حال



بيقولوا عندنا في المثل
تعرف فلان؟؟

ايوة أعرفه...

طب عاشرته؟؟
لا معاشرتهوش

تبقي متعرفهوش


المثل دا في كثير من الصح يا شباب

ويقصد عدم الحكم علي أي شخص بدون معرفته أو التعامل معاه
كتير أوي تلاقينا بنكره فلان عشان الظاهر منه انه وحش

بس الوحش دا ممكن يكون حلو


زي مثلا واحد في حاله ومش بيكلم حد
تلاقي الناس تقول عليه دا رزل ورخم وتنك


وهو ممكن يكون خجول ومهذب ولو اتعاملت معاه تلاقيه شخصية جميلة جداً

وقيس علي كدا امثلة كتيرة اوي

وهحكلكم عن شخص عندنا في الكلية كان سبب كلامي في الموضوع دا

هو رئيس الاركان برتبة عقيد
اشتهر بين الطلبة في الكلية بأسامي كتيرة اوي زي الغول وهولاكو

كان شديد جداً معانا ومكنش بيسيب أو يفوت حاجة لحد

والجزا كان عنده سهل لدرجة لا توصف

يعني من الاخر كان اللي يشوفه ماشي في حتة يحاول يختفي من ادامه بأي طريقة-بدون مبالغة-لأنه مش هيرحمه لو مسكه

دا الجانب السئ أو الوحش اللي كنا بنشوفوه من الراجل دا
طبعا أي حد هيكرهه وهيشتم فيه

مع مرور الزمن في الكلية بدانا نشوف حجات تانية في شخصيته

شفنا فيه القائد الناجح بمعني الكلمة

ايوة هو كان شديد وصارم وصوته يزلزل أجمد واحد فينا


بس كان معاه ترمومتر بيقيس بيه معنويتنا

حاجة غريبة جداً..يكون شادد علينا ومبهدلنا ويعرف يطلع مننا الشغل اللي هو عاوزه في التدريب

اي حد تاني لو مسك مكانه عمره ما بيعرف يعمل زيه


ووصل في نهاية الامر إنه كسب احترام الجميع...


كان اخر يوم ليه في الكلية امبارح للأسف....وفي نهاية التدريب والاستعداد لنزول الاجازة وإنصراف القادة كلهم نزل الراجل دا من علي المنصة ورايح الأستراحة بتاعته لوحده


والله يا جماعة المنظر كان لازم يتسجل

واحد خلص مهمته ورسالته وعمل اللي عليه وماشي بشموخ الجبل معتز بنفسه وراضي عن شغله وتعبه

زي كدا نهاية الافلام لما تلاقي البطل ماشي لوحده رافع راسه

توجهت ليه عشان اسلم عليه واودعه...عملتها تلقائياً وحسيت ان الراجل دا كان صح

بعد عبارات السلام والتحية

قالي يا إبني انا كنت بشتغل لوجه الله.....وكنت بشد عليكم وببقي قاسي....بس مكنتش منافق في شغلي...لأن دا شغلي...

عشان كدا ربنا كان بيبارك في فلوسي ومبارك في عيالي...


مش مهم انال رضي القادة بتوعي بإني اعمل الغلط...المهم اني اعمل الصح
كان ممكن ابقي زي قادة كتير مريحين دماغهم ...بس انا راضي عن شغلي وعملي مدام صح

لما رجعت حكيت لصحابي قلولي انهم كان فعلا نفسهم يودعوه قبل ما يمشي لأنهم اكتشفوا إن الراجل دا صعب اننا نصادفه تاني....علمنا يعني ايه كلمة قائد...ولما نخرج بره في الحياة العملية في الجيش أو في المدنية نعرف ازاي ننجح المنظومة اللي هتبقي تحت ادينا
رسم لوحة عجيبة اوي ممزوجة بالقسوة والشدة والود والحب وعزة النفس

يمكن دي اقل كلمة شكر اقدر اقدمها ليه في نهاية فترة خدمته ونهاية تدريبي وإعدادي العسكري

تحية للعقيد احمد صايم
يمكن يكون كلامي عن شخص محدش يعرفه ميهمش ناس كتير...بس انا بتكلم عن نموذج ممكن نقابله كتير اوي في حيتنا
ممكن يكون النموذج دا هو مدرسك في المدرسة...دكتور عندك في الكلية...ممكن يكون ابوك
سعات كتيرة بنسخط وبنزعل من تصرفات الناس اللي ليها حق علينا
بس يمكن لما الواحد بيكبر شوية ويسترجع مواقف حصلت في الفترات ديه الصورة بتختلف تماماً عن الوقت اللي كان فيه في الفترة اللي فاتت


وللأسف العكس برضو بيحصل كتير

تلاقي اشخاص معادنها رخيصة ...بس تختفي وراء كلمات معسولة..أو مظهر براق

وبننخدع فيها وبنعطيها قدر ومكانة غير جديرة بيها
ودا عشان مبقاش عندنا حكمة في الحكم علي الناس
ونشيل علي رقبتنا ونمجد احقر الناس....وناس كتير اوي تستاهل التكريم بننساها

تموت الأسد في الغابات جوعا......ولحم الضأن تأكله الكلاب


وعبد قد ينام علي حرير......وذو نسب مفارشه التراب


-----------------------------------------



ولله الحمد من بداية 1/1/2008 تم التصديق علي ترقية دفعتنا ...الدفعة 132 احتياط لرتبة ملازم مجند تحت الاختبار

وفي إنتظار حفلة التخرج في النصف الثاني من هذا الشهر






ببارك لكل صحابي اللي كانوا معايا واللي شفنا مع بعض أيام صعبة كتيرة اوي وحياة قاسية

طبعاً اغلبنا مكنش حاطط في الحسبان الوضع اللي احنا فيه وناس كتيرة انا منهم كنا نتمني إننا نكمل حيتنا بره ومندخلش الجيش....بس شاء الله عز وجل إننا نخوض التجربة ديه ونطلع منها بمكاسب مكناش نتوقعها
ويكفي روح الحب والإخاء اللي نشأت ما بينا في فترة صغيرة

ناس من كل حتة في مصر....عشنا مع بعض كأننا شخص واحد

بتمنالهم التوفيق في أماكنهم الجديدة واتمني إن علاقتنا متنقطعش بعد الكلية
وجزاكم الله خيرا