Translate

الخميس، 21 يونيو 2007

يوميات نصاب-3


السلام عليكم

ازيكم يا جماعة ....وحشتوني كلكم

من زمااااااااااان اوي قبل ما اروح الجهادية كنا عملنا حلقات وسلاسل

طبعا انتم نسيتوا

من غير طول كلام كان سلسلة ليها هدف معين

السلسلة الاولي كان اسمها ضد التيار وكنا بنتكلم فيها عن موضة المدونات القذرة بكل انواعها وطبعاً اختلفنا كتير مع الناس في طريقة عرض المواضيع بس الحمد لله اتفقنا كلنا علي رفضنا لهذه الانواع من المدونات

والحمد لله الناس فكرت في حجات كتيرة جدا وواجهت الموضوع دا بإيجابية اكتر واسلوب احسن

وبرضوا كنا اتكلمنا في سلسلة اسمها هو في ايه....للأسف في ناس افتكرت اني بنتقد فيها الشعب المصري واسلوبه ...بس الهدف كان غير كدا خالص يا جماعة

وإن شاء الله في القريب هنكمل سلسلة هو في ايه بمواضيع جديدة ونتعرض لسلبية جديدة في المجتمع...هنعترف بيها كلنا ونحاول اننا علي الاقل نشيلها مننا

وكانت اخر السلاسل هي يوميات نصاب

وديه كانت حاجة ساخرة بتتكلم عن اهم مشكلة احما كشباب عايشين فيها

مشكلة البطالة والبحث عن عمل

اخترعنا شخصية زي شخصية المستثمر الصغير بتنصح الشباب بعمل مشاريع نصب ظريفة

ممكن نضحك عليها....و للأسف الافكار ديه مقتبسة من الواقع...بس بتكون علي كبير

ممكن يكون بطلها شخص..او مجموعة اشخاص..او شركة....او حزب....او وزارة...او حكومة...او بلد بحلها

ممكن تكون في مصر...وممكن كمان تكون في اي بلد

المهم انها موجودة بالفعل...مش بنفس السيناريو والحوار

بس نفس الفكرة

معلش طولت عليكم...بس يمكن الناس تكون نسيت اللي كان بيتكتب زمان وانشغلنا بسالمات علي بعض

بس بعد تجربة الجيش اللي لسا في اولها اتنبهت لحجات كتير اوي...واتعلمت اكمل اي حاجة بدأتها ...وبإذن الله لازم تنتهي

واخترت الناهرده اني اكتب حلقة جديدة من حلقات يوميات نصاب....


تعالوا مع بعض نشوف فكرة الناهرده ايه....ونشوف مهارة الشعب المصري في سد الثغرات


--------------------------
سيادتك هتعمل جمعية خيرية.....انا عارف انك هتستغرب....وهتقولي انك محتاج فلوس مش محتاج تعمل جمعيات خيرية ولا الكلام الفاضي دا
بس اسمعني للاخر...أنت هتنظم جمعية خيرية بينك وبين نفسك وهتخططلها كويس اوي وتعرف الحجات ديه تتكلم فيها ازاي...

عشان فكرة الناهرده هتعتمد علي مظهر حضرتك وطريقتك في الاقناع
سيادتك هتختار اسم للجمعية....

سميها اي اسم وليكن مثلا(( جمعية اصدقاء الفيل)) يعني اي حاجة من الكلام دا انت وشطارتك بقي

في اختيار الاسم اللي يشد الناس ويخليهم يعيطوا
هتطلع علي اي مطبعة وتخليه يعملك 3 دفاتر من بتوع التزاكر ديه...

اكيد كلكم عارفينها...وتخليه يعملك الدفاتر كل دفتر بلون مختلف.....

زي التزاكر بتاعت الاستاد كدا كل درجة بلون محتلف....

وهتخليه يكتبلك علي التزاكر ديه اسم الجمعية ويحطلك عليها ارقام كتير كدا (قال يعني ان الجمعية متسجلة ومشهرة رسميا)
وسيادتك هتكتب رقم تليفون جوز خالتك اللي انت بتكرهه علي التزاكر ديه عشان كل ما بتروح عنده بيطردك
بعد يا سيدي ما تخلص مشوار المطبعة هتطلع سيادتك علي المصالح الحكومية ....

وهتلبس الطقم الكلاسيك بتاع الافراح وهتشتري علبة جيل عشان تسرح شعرك.

...وهتكون عامل كرنيه كدا شكله حلو وعليه صورتك وأنت لابس الكرفات ومعلقه بدبوس ذهبي علي القميص..

وهيكون مكتوب عليه اسم جوز خالتك اللي انت بتكره...

يعني هتكون من الاخر شب محترم وشيك ونظيف ومنتحل اسم جوز خالتك

.....وهتبدأ تتكلم مع المواظفين اللي في المصالح الحكومية وتقولهم أحنا جماعة خيرية عشان كذا وكذا وكذا

...وركز علي الستات ملكش دعوة بالرجالة عشان الستات قلبها رهيف وبتعيط بسرعة...

وتبدأ تلم التبرعات وكل واحد يتبرع تبدأ تكتبله وصل ...(قال يعني انك ما بتخدش حاجة في جيبك وكل حاجة بتتسجل عن طريق الوصلات)..
اي حاجة حد هيتبرع بيها تخدها وأنت مبتسم....

وسعتها الناس هتستريحلك اوي وهتحبك وهتلم قرشين حلوين
في ناس مؤذية وبتحفر كتير ورا الموضيع ديه...

هتلاقيه ماسك الوصل دا وعمال يجيبه يمين وشمال وهيلفت نظره رقم التلفون اللي عليه...

هيتصل بالرقم وجوز خالتك هيرد عليه

وطبعا انت عارف إن جوز خالتك بيخانق في دبان وشه وهيعمل مشكله مع الراجل الرخم اللي اتصل

وهيشتموا بعض والراجل الرخم هيقوله يا نصاب يا حرامي

وسعتها يبقي انت خلصت تارك من الاتنين...جوز خالتك والراجل الرخم اللي كان بيشك فيك وتعيش انت حياتك بالقرشين بتوع تبرعات الناس ذوي القلوب الرحيمة

ولو ضميرك فاق ونأح عليك ابقي اتبرع بجزء منهم لمستشفي 57357 او طلع منهم 10 جنيه رحمة ونور علي روح ام جوز خالتك اللي ماتت مخنوقة بالسكينة ....وبكدا مش هتحس بالذنب

والمرة اللي جاية هرجعلك بفكرة حلوة عشان لما القرشين اللي معاك يخلصوا تعرف تظبط نفسك

-------------------------------

الخميس، 7 يونيو 2007

السلام عليكم ورحمة الله وبركاته
والله زمان يا شباب
رجعنا تاني نكتب ونفضفض ...رجعت تاني اعمل اي حاجة بدون اوامر
رجعت تاني لأحلي ناس عرفتهم
الموضوع المرة ديه طويل شوية....معلش بقي استحملوني
انا مكتبتش بقالي 45 يوم وعاوز اقول حجات كتير اوي
وبرضو بالنسبة للموضوع هيكون مقسوم لنصفين
النصف الاول هيبقي كلمة شكر وعرفان لكل الناس اللي افتكرتني في غيابي
واللي عملوا اللي مكنتش متوقعه
وكان علي رأسهم الدكتورة الجميلة جيهان اللي كانت بدخل يومياً المدونة تفتحها وتسيب ردها كأني موجود فيها
عاوز أقولكم حاجة عجيبة جدًا
الناس اللي هنا كانت بتحسب معاد الرجوع باليوم وعرفوه...اقسملكم بالله انا معرفت اني نازل يوم الاربع الا يوم الجمعة اللي قبلها
فترة المستجدين في اي كلية عسكرية بتكون علي الاقل 45 يوم
يعني الدفعة اللي قبلينا علي سبيل المثال قضوا 58 يوم
الكلية الحربية السنادي قضوهم 120 يوم
وكانت حسبتنا كلها علي اننا نازلين يوم الاتنين اللي موافق 11\6 يعني مكنش حد فينا يتوقع ابدا يوم الاربع ...وانا لوعرفت الحسبة بتاعتكم كنت هضحك عليكم عشان كان في حكم المستحيل اننا ننزل يوم اربع...لازم ننزل يوم اتنين ونرجع يوم جمعة عشان الاجازة تبقي 5 ايام
بس سبحان الله نزلت يوم ما انتم توقعتم
اما بالنسبة للردود الجميلة انا مش هعرف اعلق كل رد لسببين
الاول اني محتاج 3 ايام عشان ارد علي الناس اللي كانت في منتهي الجمال
ثانيا مفيش اي كلمة هتوفي ايدا اللي عملوه وانا غايب
بس لازم اشكر كل واحد بأسمه واهتمامه بيا في غيابي ودخوله والسؤال عني
استأذنكم في اني
أبدأ اول رد للأخت جيهان وهو هيكون علي اخر كومنت ليها
--------------------------------
اختي الفاضلة جيهان
كما اخبرتك سلفا اني لن استطيع ان اوفي جزء ولو قليل من اهتمامك وسؤالك عني في غيابي
فقد بعثت ردودك الدم في عروق مدونة هجرها صاحبها رغم عنه....وتركها دون ان يدري ان هناك من يحبها مثله
ما كتبتيه من يوميات في مدونتي واهتمامك وحرصك علي زيارتها يوميا لن توفيه كلمة شكر
يكفيني ويسعدني حبك لمدونتي واستمرار تواجدك وردودك
علي الرغم من إنشغالك وغربتك خارج الوطن...فلم تغفلي ابدا تواجدك في مدونتي
ابدا اختي الكريمة لم تكتبي حرفا اغضبني او ضايقني
فأنا اعتز بكل حرف دقته اناملك في مدونة زادت قيمتها عندي بمشاركتك ومشاركتك اخواني
لكي من ارق تحية...واتمني ان يهون الله عليكي الغربة ويرزقك بما يسعدك فيها....

----------------------------------------------------
وبترتيب تردد الناس ودوام سؤالهم عني نبدأ بالاخت الجميلة العروسة
رينا او نوثينج
علي فكرة انا عرفت من ردودك انك انتي نوثينج
الحمد لله لسا فيا مخ وبفكر
ربنا يهون عليكي الغربية ويسعدك في حياتك
ردودك جميلة جدا وسؤالك
الدائم عني ودمك الخفيف
كان بيفرحني اوي..بس اللي زعلني هو احساسك بالاكتئاب وزعلك
لما اكتب النص التاني من الموضوع انتي وجهينة هتنسوا يعني ايه اكتئاب وزعل
ربنا يجازيكي خير ويباركلك ويتمملك بخير يا عروستنا
----------------------------------------------------------
ونيجي بقي للدماغ الكبيرة اوي والتهييس....صرصارة
انا هناديكي بأسمك وهخلي الناس تعرفه يا سارة
بجد يعني
احلامك وكلامك كانوا زي السكر
انا كمان كنت بحلم كدا بيوم الرجوع وبتخيله
وشكرا يا ستي علي مشاركتك ليا الاحساس بالحر
بس الحر هناك بقي نوع تاني خالص
جزاكي الله خيرا يا سارة وربنا يكرمك يارب ويسعدك في حياتك
--------------------------------------------------------
واحدة من الناس
الحمد لله اني كنتي بتيجي تأكلي الذئاب الصغيرة ومهتمة بيهم في غيابي
كدا امشي المرة ديه وانا مطمن
اسعدني جدا اختي الكريمة دوام السؤال عني واستمرار ترددك علي مدونتي في غيابلي وكأني موجود
وانتي عارفة مدي تقديري ليكي
دمتي في خير وجزاكي الله خيرا علي شعورك الجميل ومشاركتك الغالية اوي عندي
--------------------------------------------------------
الاخت الجميلة محض روح
كلامك وردرودك وترددك علي المدونة في غيابي وسؤالك عني ما هو الا وسام جميل علي صدري يا محض روح
وشهادتك ليا ولكتباتي دا شئ يشرفني
انا يا اختي الفاضلة اسمي محمد صابر
وتشرفت جدا جدا بكل حرف كتبيه عندي
جزاكي الله خيرا ودمتي في خير إن شاء الله
---------------------------------------------------------
BinO
جزاكي الله خيرا اخي الكريم علي كلامك الجميل...وفرحني جداااااااا انك اسمعلاوي
واخبار الاسماعيلي الحلوة
والاخبار التانية اللي مش حلوة بتاعت المفتي وممرضات ليبيا
):
بس للأسف مش هعرف اشوف ماتش الحرس بتاع يوم الجمعة
ربنا يكرمك ويجازيك خير اخي الكريم واتمني دوام تواجدك وشرف ليا ترددك وسؤالك عني في غيابي

---------------------------------------------------------
عالمي ازرق
جزاكي الله خيرا علي كلامك الجميل ومجاملتك الرقيقة
وبدون اي تعجب منك الجيش اللي انتي تخيلتيه في المدينة الفاضلة هو بالضبط اللي انا فيه
ومن غير اي كلمة زيادة او مناقشة
عشان المناقشة هتجر تفاصيل...والتفاصيل هتجر حكاوي...واحنا اتفقنا ان النظام هناك يعتبر من الاسرار العسكرية ومش هنتكلم فيه
اما بخصوص العواصف الترابية اللي كانت موجودة فحدث ولا حرج
انا شفت ايام ما يعلم بيها غير ربنا في ايام الحر والعواصف الترابية
بس الحمد لله....احنا رجالة ومصر لسا بخير
مرة تانية ربنا يكرمك ويجازيكي خير علي دوام السؤال عني يا عالمي ازرق
-------------------------------------------------------------
tearwhispers
ربنا يكرمك ويجازيكي خير علي تواجدك وسؤالك الدام
وربنا يكون في عونك في الامتحنات ويعديها علي خير إن شاء الله
علي فكرة ردوك كلها جميلة واهتماك وسؤالك عني في غيابي وترددك علي المدونة دي حاجة كبيرة اوي عندي
ربنا يجازيكي خير وإن شاء الله يبقي لينا فرصة تانية ونشترك مع بعض في مواضيع اكتر وازورك اكتير في مدونتك الجميلة
دمتي في خير اختي الكيرمة
-------------------------------------------------------------
دكتور خالد
ربنا يجازيك خير يا خالد علي سؤالك واهتمامك
وانا ولله الحمد احتسبت النية في وجودي في الجيش علي الاعداد للجهاد وانتي اكون قادر علي تحمل المشاق ....والاقتضاء بالصحتبة رضوان الله عليهم
لعن الله من سبهم علي صفحات الجرائد وشل ايديهم
جزاكي الله خيرا علي الدعاء
بس انا مكنتش في دهشور
دهشور مركز تدريب للجنود
وبينزلوا اجازة بعد فترة اقل مننا
انا كنت في كلية ضباط الاحتياط في فايد
والاجازة فيها بتبقي بعد فترة طويلة شوية والنظام مختلف جدا
----------------------------------------------------------------------
مهند حبيب قلبي
كنت بجد ليك عندي وحشة خاصة....ربنا يكرمك ويجازيك خير يارب
ويوفقك في شغلك الجديد
علي فكرة وانا بتصفح الردود زعلت اوي اني ملقتش اسمك
بس لما لقيته فرحت اوي يا هنود
انا عارف انك مشغول اوي ...ربنا يكون في عونك
إن شاء الله اعرف اكلمك الناهرده لو ربنا اراد
دمت في خير اخي الكريم وجزاك الله خيرا علي السؤال عني في غيابي وتواجدك في مدونتي
------------------------------------------------------------------------
بوسي
بجد كلامك جميل جدا
وزكر قول سيدنا عمر رضي الله عنه وأرضاه
وهي دي فعلا التجربة اللي انا استفتدها من الجيش
والنظر الي نصف الكوب الممتلئ
جزاكي الله خيرا علي ترددك وزيارتك للمدونة في غيابي
-------------------------------------------------------------------------
الدكتورة خمسة فضفضة
معلش بقي الجيش علينا حق
والحمد لله ان اخوكي ملوش جيش
نفد بجلده
هههههه
علي فكرة اخدت معايا صن بلوك
بس الحمد لله معملش اي حاجة
وامي لما شفتني معرفتنيش .....
الشمس اللي هناك مفيش حاجة تعرف توقفها
حاجة كدا مركزة وطبيعية
جزاكي الله خيرا علي سؤالك ودخولك المدونة وترددك عليها في غيابي
دمتي في خير يا دكتورتنا
--------------------------------------------------------------------
الكاتبة الرقيقة جدا حورية
جزاكي الله خيرا علي زيارتك الكريمة في غيابي
وادام الله عليكي الصحة والعافية
واسعدني جدا سؤالك عني في غيابي
وإن شاء الله ارجع اتابع كتاباتك المتميزة الجميلة
دمتي في خيرا
--------------------------------------------------------------------
اختي نان
جزاكي الله خيرا علي شعورك الجميل
وزيارتك الغالية في غيابي
دمتي في خير وصحة وسلامة
اسعدني جدا مرورك وتعليقك الرقيق
--------------------------------
اخي الجميل الرقيق يامن
لا اجد اي كلمة توفي شعوري الجميل وشكري لكلامك الجميل
اكرمك الله يا اخي
كلامك وزيارتك في غيابي شئ اعتز به
ورقتك ومشاعرك الجميلة اجمل ما فيها
دمت في خير يا اخي الكريم وجزاك الله خيرا
----------------------------------
خالد
جزاك الله خيرا اخي الكريم خالد علي مرورك وسؤالك عني في غيابي
ودمت في خير وصحة وسلامة
------------------------------------
سمسم
ربنا يكرمك يارب وهبقي اسلملك يا سيدي علي عبود
جزاك الله خيرا علي زيارتك ليا في غيابي
------------------------------------------
اخي الجميل شارم
جزاك الله خيرا علي مرورك الكريم
وزيرتك في غيابي اسعدني جدا
------------------------------------------
r.r
اختي الكريمة جزاكي الله خيرا علي مرورك وتواجدك في مدونتي في غيابي
والحمد لله ان ربنا اكرم اخوكي وخلص جيشه علي خير
اسعدني جدا مرورك الكريم
دمتي في خير
------------------------------------------
meroooo
اسعدني جدا مرورك الكريم وسؤالك عني
واسعدني وشرفني اضافة مدونتي في مفضلتك اختي الكريمة
دمتي في خير وصحة وسلامة
-----------------------------
mesh2dra
جزاكي الله خيرا علي مرورك الكريم ومشاركتك في المودنة في غيابي
اسعدني جدا تواجدك ايتها الاخت الكريمة
وكلامتك الرقيقة
-----------------------------------------
مانجر
محمد العدودي
Esmeralda
مادو
ihapoof
جزاكم الله خيرا علي تشريفكم ليا وأول زيارة لمدونتي في غيابي
وكلامكم الجميل اوي اللي اعتبره وسام شرف علي صدري
ihapoof تمام يا فندم
(:
-----------------------------------------


تحية وشكر لكل من فتح المدونة في غيابي حتي وإن لم يكتب فيها حرف

تحية وشكر الي من تزكرني في غيابي

جزاكم الله خيرا اخواني واخواتي وأسأل الله ان يوفقني واستطيع ان ارد ولو جزء بسيط من هذا الجميل الذي طوق رقبتي

والله الذي لا اله الا هو لن تستطيع الكلمات ان اتصف شعوري

ولكني اثق انه سوف يصل اليكم

انتهي الجزء الاول

-----------------------------------------------------------------------------------

اما النص التاني من الموضع فهكلمكم فيه عن تجربة غيرت من حجات كتير اوي فيا

وغيرت من افكار كتيرة جدا وخلفيات غلط كانت مترسبة عندي

ومترسبة عندكم انتم كمان

طبعا احتراما للعسكرية وتقليدها وحفاظا علي اسرارها مش هقول تفصايل اي حاجة جوا الوحدة العسكرية او الكلية

صدق رسول الله صلي الله عليه وسلم حين سمانا خير جنود الارض

نعم نحن خير جنود الارض

وانا اقولها بكل عزة علي الرغم من ما لاقيته من صعوبات وشدة قد لا يتحملها بشر...وما سببه التجنيد ليا من ضياع فرص العمل في الحياة المدنية وتاخري في العمل وصعوبة الحصول عليه بعد انتهاء مدة تجنيدي

اقولها بكل ثقة

اني افخر بإنتمائي للقوات المسلحة المصرية

قد لاقيت ويلات ومررت بمواقف لن امر بها في الحياة المدنية ابدا

و قد تعاملت مع اشخاص قد لا يتصفوا بالادمية وقد نظلم الحيونات إذا شبهناهم بها

ولكني خرجت في فترة قليلة جدا بفوائد عظيمة

ولله الحمد قد انار الله بصيرتنا ونظرنا الي الجوانب المضيئة في هذه الحياة الشاقة جدا

ان صح القول فإن القوات المسلحة بالفعل هي مصنع الرجال

قد ترسبت عندنا مفايهم خاطئة بضعف الجيش واستكانته والعيش في فترة رخاء

وبث البعض روح الانهزامية وعدم قدرتنا علي خوض اي معركة في ظل التقدم العكسري الرهيب للدول المتقدمة ودولة العدو

ويتهم اخرون الجيش بان امريكا تتحكم فيه

وبكل صدق وثقة اقول لكم لا تستمعوا الي من يريد هدم معنويتنا

هذه هي حرب العدو الخفية

فهو لا يقدر ابدا علي الحرب النظيفة...فعندنا اسود ضارية تختفي تحت هيئات بشرية

إذا اشتمت رائحة العدون برزت انيابها ومخالبها لتنغرس في قلوب العدو وتخرجه من بين ضلوعه وتمزقه اربا

فليفخر المصري بجيشه ورجاله

ليست خطبة او مقال نصي

بل هي تجربة عشتها في فترة قليلة

داخل منظومة مرتبة ورجال لا تعرف المستحيل

تعلمت هناك كيف اشارك صديقي تعبه...اشخاص من جميع محافظات مصر...مؤهلات مختلفة..طباع مختلفة...اصبحوا كفرد واحد

تعلمت قيمة الوقت وان لكل دقيقة ثمنها....وكيف انظم يومي

تعلمت وعرفت حلاوة الراحة بعد قضاء ما عليا من مهمات

تعلمت حلاوة النوم بعد التعب

تعلمت حلاوة الشبع بعد الجوع...والارتواء بعد العطش

تمنيت ان اكون من جيل 73 الذين هم الان قاداتي ومعلميني

علمني الجيش ايضاً كيف انكب علي قدم امي وابي واقبلها

وعلمني ان احمد الله علي ما انا فيه من نعيم ورغد العيش

علمني ان ارضي بالقليل ....

علمني واهم ما علمني ان لا اسخط علي شئ

علمني وعلمني وعلمني

كل هذا في فترة قليلة جدا لا تتعدي الشهرين

قد منّ الله عليا وتم الحاقي بالقوات الجوية في توزيع القوات

وهذا يعتبر شئ جيد جدا بالنسبة لي إن شاء الله وخبرة في مجال عملي بعد تخرجي من الكلية وعملي بالقوات الجوية

لا اخفي عليكم اننا نقول عكس كل ما كتبته الان فيما بيننا...ولكني علي تمام الثقة بأن هذا هو شعورنا وما بداخلينا جميعاً

يقول الجميع ان الذي افلت من الجيش قد فاز
وانا اقولها عن تجربة
الفائز هو من دخل الجيش بنية خالصة لله عز وجل ان يكون جندياً في رباط الي يوم القيامة ويدخل في زمرة خير جنود الارض كما سمانا رسول الله صلي الله عليه وسلم
احبتي في الله ......لا أدري ما هو واقع كلامي علي نفوسكم
فأنا نفسي لم اكن اتوقع يوما ان اكتب مثل ما اكتب الأن عن الجيش
ولكن هذه هي الحياة
وهذه هي نصيحتي لكم
تعلموا من الصعاب التي تمر عليكم
فكل محنة في طيها منحة من الله عز وجل
قد آلمني جدا شعور بعضكم بالحزن والاكتئاب بسبب الغبة او غيرها من المواقف الصعبة التي قد تمر علينا
لا والله...لن تكون اليحاة سهلة ويسيرة ابدا لأحد ولن تأتي الرياح بما تشتهي السفن في كل الاحوال
ولكن الفطن هو من يطوع كل محنة ليستخرج منها المنحة
اتزكر اني قد كتبت موضوع من قبل عن الابتسامة واثرها في النفوس
لم يكن موضوع حشوا فارغ او مجرد كلام علي صفحات النت
قد نصحني نفسي وطبقت هذا الامر في كل مواقف حياتي
فلم اجد موقف صعبا عالجته بالتبسم الا وقد تحول الي العكس تمام
وقد فعلنا هذا واتفقنا عليه انا وجميع اصدقائي في الجيش
لدرجة ان صف الضابط (الصول) قد تعجب مننا وقال انا بالحرف
انا عمري ما شفت مستجدين بيضحكوا ومتفائلين بالشكل دا في الوقت اللي المفروض تعيطوا فيه وتكتئبوا
وفعلا الاثر كان جميل جدا وكل حاجة صعبة بقينا بنعديها بالضحك والهزار
اخي واختي...رجاء مني اليكم...كونوا كالنخيل ناظرين دوما الي السماء لا تنحني ابدا ظهوركم
ابدا لن يغير الحزن شيئا...ولن يأتي الاكتئاب بالسعادة والراحة
وتزكروا مرة اخري....ان في كل محنة منحة
وكما قال صلي الله عليه وسلم ما اخطأك ما كان ليصيبك...وما اصابك ما كان ليخطاك
قد قدر الله لك شئ ورزقا...فنم وقم وانت مطمئن بتوكلك علي الله عز وجل واطمئن بأن قدرك بين يدي رحمن رحيم
ويكيفك سعادة انك مازلت تزكر الله عز وجل وتسجد جبهتك الي الله عز وجل
اللهم صلي وسلم وبارك علي سيدنا محمد صلي الله عليه وسلم
اعتزر علي طول الموضوع
ولكني اشتقت الي الكتابة كثيرا وما زال عندي الكثير لأكتبه ولكن اخاف عليكم من الملل
احبتي في الله دمتم في خير...ولا تنسوا اخاكم من صالح دعائكم
السلام عليكم ورحمة الله وبركاته

الأربعاء، 6 يونيو 2007

راجع لفوطي وبشكيري...هنام في اوضتي علي سريري

السلام عليكم ورحمة الله وبركاته
من 7 سعات تقريبا عدت الي المنزل سالما ولله الحمد
قبل اي شئ مش عارف اقول اي كلمة شكر لكم الردود والناس اللي دخلت في فترة غيابي
من غير ما اغفل اي حد فيهم وطبعا اختي جهينة اكرمها الله ليها عندي رد خاص عشان اللي كانت بتعملوا في المدونة
علي فكرة يا جماعة انا اخدت حقن تطعيم ضد التيتنوس والتيفؤد والدكاترة عارفين الحقن ديه بتعمل ايه
بس فرحة رجوعي سالما الي البيب بعد 46 يوم بالتمام والكمال كبيرة
46 يوم اتعلمت فيهم اكتر من اللي اتعلمتوا في سنين عمري كلها
طبعا مش هقدر احكي تفاصيل لسببين
الاول سبب امني بحت.....ويعتبر تسريب معلومات عن نظام كلية عسكرية فيها محاكمة عسكرية واعدام
والتاني لأني لو حكيت اللي حصلي محدش هيصدقني...لأني لو كان حد حكاهولي قبل ما ادخل مكنتش هصدق طبعا
المهم انا انا رجعت اجازة قصيرة مدتها 72 ساعة خلص منها 24 ساعة...مع اني راجع من 7 سعات
ازي بقي....معرفش

انا مقرأتش كل الردود اللي اتبعتت...دي ليها قاعدة كبيرة اوي ...عشان كدا قررت اني هقلب صحابي ومش خارج معاهم وهقعد معاكم...بس افوق من الدوخة اللي انا فيها واعرف اقف علي رجلي تاني

امي عمالة تزغط فيها من ساعة ما جيت وانا مش عاوز انام عشان مضيعش فرصة الاكل الملكي

بجد بجد بجد اقسملكم بالله انا كنت مشتاقلكم جدا هناك وكنت بفتكركم اول ما كانوا بيسمحولنا اننا نفكر

انا بعتزر للجميع اني مش هقدر ادخل مدوناتهم كلها لضيق الوقت جدا
والله نفسي بس الوقت قليل اوي وغالي اوي
انتم متعرفوش الدقيقة في الملكية بعيد عن الميري عاملة ازي
اعزروني يا شباب
عاوز اطمن عليكم كلكم

هسيبكم دلوقتي وهرجعلكم تاني إن شاء الله