Translate

الأحد، 22 أبريل، 2007

الرحيل



السلام عليكم ورحمة الله وبركاته

دلوقتي هاخد شنطتي وانزل اسلم نفسي لكلية الضباط الاحتياط في مدينة فايد
مش قادر اوصفلكم انا بكتب السطور ديه وانا حالتي النفسية ايه
اول مرة اشعر بالحالة ديه...مع اني من وانا عندي 18 سنة وانا متغرب عن البيت بسبب الكلية
وإن جاز التعبير فأنا اتمرمط في الغربة ...
بس المرة ديه بقي احساس بالعدم....مش عارف انا رايح فين وهعمل ايه
كل الناس اللي اعرفهم راحوا هناك رجعوا غير ما كنت اعرفهم خالص
معرفش ايه اللي بيحصل....بس اكيد في تغيير بيحصل....اللهم اجعله للأحسن وليس للأسوء

هسيب حياتي كلها وامشي
هسيب اهلي واخواتي
هسيب اوضتي وجهاز الكمبيوتر بتاعي....هسيب مكتبي وكتبي واجندتي
هسيب المسجد اللي بفتح شباك اوضتي عليه
هسيب الاذان والصف الاول ودروس شيخي
هسيب عم يونس الشيخ الكبير اللي كان كل يوم يسألني انت مين عشان نظره ضعيف
هسيب اخواني في المسجد اللي ديما كانوا عونا لي علي طاعة الله
هسيب صحابي وغلاستهم وخناقتهم وهزرهم وخفة دمهم ومقالبهم البايخة

هسيب اجمل منظر بعد صلاة الفجر بساعة وقت شروق الشمس واليوم لسا بيبدأ
المنظر اللي في الصورة ديه



هسيب البحر والقعدة عند مبني الارشاد بعد العصر في صيف او شتاء
في المكان دا



-------------------------------------------------



هسيب مدونتي اللي كأني فاتحها من 25 سنة عدد سنين عمري مع انها مكملتش شهرين

هسيب ناس معرفهاش ولا عمري شفتهم بس اتعلقت بيهم أوي

ويكفي اللي عملوه كلهم عشان واحد ميعرفوش هيسبهم فترة ويرجع

أي حد ممكن يغيب فترة ويرجع وممكن ميرجعش...عادي...محدش بيشغل دماغة....هيتنسي وهيجي غيره

بس أنتم بقي اثبتم غير كدا خالص


مهما قلت مش هقدر اعبر عن شكري لكل الناس اللي كانت في منتهي الجمال

انا عارف ان الموضوع مش كبير أوي ويمكن في ناس اخدها بهزار وأنا أولهم طبعا...بس لما تلاقي اهتمام بالشكل دا من ناس علاقتك بيهم مجرد كلام علي صفحات نت بيبقي احساس جميل اوي.....احساس جميل انك تلاقي حد معاك وبيشاركك افراحك واحزانك ومشاكلك وضحكك وهزارك وبيتاخنق معاك وبيشكر فيك وبيشتم فيك...وزعلان عشان هتغيب عنه ويقولك كلام مسمعتهوش من اقرب الصحاب ليك


احساس جميل لما تلاقي دا كله ممزوج في بعضه
يمكن مش بقالي معاكم غير حوالي شهر
يعني منعرفش بعض المعرفة اللي تخلينا نحكم علي بعض بالجوانب الصحيحة
ممكن أوي إني أطلع أسوء بكتير جداً مما تتخيلوا....ليه لا؟؟
وممكن كمان ناس فيكم أنا كنت بنتقص من قدرهم يطلعوا أحسن مني الف مرة
مش موضوع اتكتب في مدونة يقدر يعكس شخصية بني آدم....
بس برغم كل دا انا اتعلقت بيكم وحبيت تواجدي معاكم
حتي علي الرغم من الخلفات اللي كانت بتحصل بينا
ممكن أكون ضايقت ناس فيكم كتير أوي....وكلامي زعلهم ...بس ربنا اللي يعلم إني كنت بكتب عشان أواجه حاجة معينة أو أقف أدام حاجة غلط....
بس أكيد الناس اللي عارضوني مش أعدائي.....أي مسلم علي وجه الارض أنا بحبه في الله...ولو كرهت في حاجة هبقي بكره معصيته أو الغلط اللي بيعمله


وأنا نفس النظام مش عاوز حد فيكم يكره فيا غير الغلط....


كل مدونة دخلتها كتبت فيها كلمة بقت زي بيتي...وصاحبها أخويا أو أختي
عارفين لما كنت بلاقي حد فيهم زعلان أنا كمان كنت بزعل...ببقي عاوز أضحكه وأخفف عنه ...وكنت بتضايق جدا لما الاقي فيها موضوع مزعلني او حاجة انا مبحبهاش...كأنها مدونتي ...ممكن متصدقوش الكلام دا
بس اللي عاوز يعرفني صح يقرأ هذه الابيات من الشعر للشاعر القروي
بحبها أوي وبحاول أكونها في كل وقت وكل مكان


اذا أنتكث الحــبال فحبل ودي *** شديد الفتل يجتذب القلوبا
أعدت به المراس الصعب سهلا *** وصيرت البعيد به قريبا
ولي إن هاجت الأحقاد قلــب *** كقلب الطفل يغتفر الذنوبا

أود الخير للدنيا جمـيـــعا *** وإن إك بين أهليها غريبا


إذا ما نعمة وافت لغيري *** شكرت كأن لي فيها نصيبا

تفــيض جوانحي بالحب حتى *** اظن الناس كلهم الحبيبا

الكلام دا بقوله لكل اخواني واخواتي المدونين
مش هزكر اسامي عشان ماشاء الله خلال فترة صغيرة جدا كسبت ناس كتيرة جدا وجميلة جدا
ممكن مكنش اعرف حتي اساميهم ايه
بس أعرف أقلامهم شكلها ايه ولونها ايه
في ناس منهم أخدت عليهم وكأني اعرفهم من زمان...وناس كنت بحب أوي اتكلم معاهم وارغي كتير في الرد عليهم...وناس كنت بضحك من تعليقاتهم أوي...حتي ولو كانوا بيهاجموني
حجات كتيرة وأمثلة كتيرة اوي







يا تري لما أرجع تاني واكتب هتفتكروني؟؟؟


يا تري حد هيدخل المدونة وانا مش موجود ...والا هتسيبوا قفلها يصدي


عموما انا حاسس اني بودعكم زي ما بودع امي وابويا واخواتي اللي الدموع في عنيهم


.
.
.
.
.


بس من الفرحة عشان هيرتاحوا مني ومن الدوشة اللي بعملها...اصلي كثير الهزار والدعابة


سبحان الله مش عارف ابقي جد خالص حتي في النكد والزعل....لازم اهزر




انا هنزل بقي عشان اتاخرت والناس اللي رايح معاهم منتظرين ومش عاوز اعكنن عليهم




استودعكم الله

احبكم في الله

الجمعة، 20 أبريل، 2007

الفلطعيس

السلام عليكم ورحمة الله وبركاته
يا جماعة انا قعدت فترة كبيرة اوي افكر في عمل شئ يخدم مصر بلدنا
فكرت في اختراع جميل جدا هيريح الناس كلها
والسبب في تفكيري واللي ساعدني علي كدا كلام وقرارت وزيري الاوقاف والثقافة
ايوة الاتنين اصحاب الافكار الفذة الفظيعة
الاتنين اللي مصر كسبتهم ويعتبروا نبراس مضئ يضئ حياتنا
ولكن للأسف...هناك بعض الناس يظنون فيهم الظنون
ويتهمنوهم بإتهمات بشعة
بس هما زي النخل...راسهم مرفوعة لفوق...يتحدفوا بالجزم يوقعوا بلح
المهم لو قعدنا كتير نثني عليهم ونشكر فيهم مش هنوفيهم حقهم
بس فكرة الاختراع بتاعي جتلي من الاختراع الجميل بتاع وزير الاوقاف بعمل اذان موحد لمدينة القاهرة
ومحاولة تعميم الفكرة علي محافظات مصر كلها
وانا اضم صوتي لصوت وزير الاوقاف واطالب بضرب جميع المؤذنين بالنار في ميدان عام
عشان بيأذنوا وهما حافيين وصوتهم وحش اوي...ياي ...نشاز
بس وزير الاوقاف بقي كان كريم اوي وقال ان هو مش هيضربهم بالنار...وبرضو انا بعيب عليه انه حصر التقدم في الاذان بس
احنا المفروض نطبق الكلام دا علي كل حيتنا ...احنا متقدمين...بلاش تخلف بقي
وهو دا بقي موضوع الاختراع بتاعي
الاختراع بتاعي يا جماعة اسمه الفلطعيس
هو ايه بقي الفلطعيس دا؟؟؟
الفلطعيس يا شباب عشان نجيبه هنضحي بالغالي والرخيص
الفلطعيس هيغنيك عن شك الابر والداببيس
الفلطعيس غيره مفيس
الفلطعيس هيعمل كل حاجة في حيتنا
هنبرمجه انه يؤذن ويبقي امام ويصلي بالناس
وكمان هيخطب الجمعة والعيد
وكمان ممكن الناس متجيش تصلي وهو يصلي بدلهم......دا التقدم يا شوية متخلفين يا رعاع
ايتها الاخت المسلمة...اخلعني نقابك والخيمة اللي انتي لابساها...وحتة القماشة اللي اسمها حجاب
وفري الفلوس وامشي بالبكيني....الفلطعيس هيتحجب بدل منك وكمان هيلبس النقاب والحجاب والاسدال
الفلطعيس ايها الشاب يغنيك عن تعب الصحيان عشان تصلي الفجر....وهطلق لحيته بدل منك
وانت ياراجل يا عجوز....مش هتتعب وانت رايح المسجد كل يوم عشان الفلطعيس هيروح مكانك
الفلطعيس هيصوم رمضان وهيصلي التراويح
وهنبعته يحج كمان....عشان برضة نخفف الضغط علي السعودية والناس اللي بتموت في الزحام
هيرمي الجمارات وهيطوف السبع اشواط في دقيقة وهتلاقيه اول واحد واقف علي عرفة
وكمان ممكن نصدر الفلطعيس للدول الصديقة لو حبوا يشتروه
ودا يعتبر مصدر كبير للدخل القومي
علي فكرة يا جماعة...مصر كلها ممكن يكفيها فلطعيس واحد
كل مواطن مسلم يروح يدخل بيناته والرقم القومي في الفلطعيس العمومي او اي مركز فرعي للفلطعيس و حسب المحافظة هنعمل شبكة متصلة بالفلطعيس الاساسي ومن مراكز التجميع ندخل عليه بينات المواطنين ويخدوا شهادة تفيد بتعهد وزارة الاوقاف والثقافة علي انهم سجلوا في الفلطعيس ورفع من عليهم التكليف ومش هيمرسوا اي نوع من انواع العبادة
وانا اهدي هذا الاختراع بكل تواضع الي وزيري الثقافة والاوقاف
لأني عارف ان قلبهم رهيف ومش بيطيقوا يشوفوا النقاب ولا يسمعوا الاذان
وبقترح اننا نستغل المساجد في تنشيط السياحة ونعملها معارض للوح الفنية بتاعت وزير الثقافة او مخزن لعلب الجيل بتاعت وزير الاوقاف اللي ديما بيحطه علي شعره
اصل يا جماعة خلاص
الفلطعيس هيعمل كل حاجة
احنا في زمن التقدم.....والتين بيقول حجات حلوة ...وهتخشوا الجنة هتخشوها
امال مين يعني اللي هيخشها؟؟؟
بصوا يا جماعة اللي هيخش النار ابو جهل وابو لهب والكفار بتوع فيلم فجر الاسلام
الباقي هيخشوا الجنة....متسمعوش كلام الناس اللي بتعقدكم
معا من اجل تقدم بلدنا....سارع بتسجيل اسمك في اوائل المشتركين في الفلطعيس حتي تفوز ب2 مليون حسنة مجانا هدية لأوائل المشتركين
وسوف يقدم الفلطعيس مفاجأت اخري في رمضان وفي مواسم الحج
---------------------------
هو دا اللي ناقص....ليه لا؟؟؟
انتم بتضحكوا ومستغربين؟؟؟
عاوزين يخلوا الاذان الكتروني؟؟؟
ويحرم المؤذن من اجر الاذان
حسبي الله ونعم الوكيل....تخيلوا ان في ناس ممكن تموت لو حاجة زي كدا حصلت
تخيلوا مؤذن الحرم المكي وهو بيتحرم من الاذان
تخيلوا مؤذن اي زاوية صغيرة وهو بيتحرم من الاذان
لو حد جرب الاذان وحس بمتعته وحلاوته وهو بيعمل كدا إبتغاء مرضات الله هيحس بالحسرة ديه
قبل كدا قالوا علي النقاب انه تخلف ورجعية وهاجموه ....ياريتهم يهاجموا البيكيني بنفس شراسة مهاجمتهم للنقاب
ولكن صبرا يا اختنا...صبرا تلوذ ببحره كل الصعب
فوالله انت عزيزة وغالية عند اخوانك...فدويسي بقدميك الطاهرة علي رقابهم النجسة ولا تستمعي لنعيق الحاسدين من الكلاب
انا مش لاقي كلام اقوله غير بيتين شعر للناس ديه
أسألك بربك يا خيبان..هل تجرأ يوما ان تهزء بلباس الكهنة والرهبان
أسلك بربك يا خيبان.. هل تجرأ يوماً ات تخرس اجراس كنيسة مهجورة يسكنها الجرذان
أحبتي في الله.....الاسلام يحارب من الداخل والخارج
وأنتم جنود الاسلام
دافعوا عن دينكم والله معكم
وحسبنا الله ونعم الوكيل

الخميس، 19 أبريل، 2007

دعوة


السلام عليكم ورحمة الله وبركاته

لا استطيع ان اجد كلمة شكر مناسبة لأخي الكريم مهند

فمهما قلت في حقه فلن اوفيه حقه

ومعه اختنا الغالية صرصارة

فقد تطوعوا بلفتة جميلة إن دلت علي شئ تدل علي صدق الاخوة والاحترام المتبادل


وانا ادعوكم الي الانضمام الينا من خلال مدونة اخوانا مهند في هذا الرابط




معذرة لم استطيع كتابة بوست يليق بالموضوع لأرهاقي الشديد جدا

سامحوني

الاثنين، 16 أبريل، 2007

تاج ...بجد تاج

السلام عليكم ورحمة الله وبركاته
التاج دا جالي من الدكتورة الغالية اوي علينا الدكتورة خمسة فضفضة
وطبعا لازم بكل هدوء وثقة وثبات اجاوب عليه واقولها جزاكي الله خيرا
لالالا...ان مش متضياق منك ولا حاجة...بس انا عاوز عنوان الصيدلية بس وكل واحد هياخد حقه
علي فكرة نفس التاج تقريبا كان مبعوتلي من سمسم بس انا مشفتهوش غير الناهرده
يعني الحمد لله ضربت عصفورين بحجر واحد
section 1
last beverage?
شاي

ِlast phone call
حسين صاحبي كنت بسأله عن اسم مرهم مهم قوي بنحتاجه في الجيش ومش هقول هو مرهم ايه عشان محدش يضحك عليا

last instant message ?
الدكتور خالد

last cd played
سلوك المسلم في الجيش لفضيلة للشيخ محمد حسان حفظه الله

last time u cried ?
لما عرفت اني دخلت الجيش....بس مكنش بالدموع كان بالدم

last text message ?
مش فاكر بصراحة

Section 2
- Have You Eversdated someone twice?
انا مش كدا خالص

hv u evers been cheated on
?ليه ...هو ابويا خلف جلدة حنفيه

kissed someone & regretted it?
لا...البيت دا طاهر...وهيفضل طول عمره طاهر

lost some one special?
مبتفرقش معايا..اللي راح هيجي احسن منه مهما كانت اهميته

been depressd ?
طول عمري

been drunk and threw up?
لا حول ولا قوة الا بالله...ولله الحمد منّ الله عليا ولم اقرب هذه الكبيرة....بس لو اعتبرنا ان عصير القصب درانك فدا حصل وفي الشارع وامة لااله الا الله بتتفرج عليا
Section 3
- List 3 Favorite Colors-
الازرق والاصفر والبرتقالي...عشان الدراويش
بس دلوقتي بقي الاحمر والابيض والاسود والنسر عشان مصر

Section 4
- This month have you-

Made a new friend?
الحمد لله ناس زي العثل وعلي فكرة من البلوجرية

Fallen out of love?
وشي أحمر...أيوة طبعا...حبيت الجيش

Laughed until you cried?
العكس

Met someone who changed your life?
محدش يقدر اساسا

Found out who your true friends were?
ملقتش الشهر دا او غيره...كلهم كويسين بس مفهمش الخل الوفي

Is there something you want to tell someone?
واقوله ليه...مش عاوز اقول حاجة لحد

Would you kiss anyone on your top friends?
لو كانت النية يعني انه سلام الصحاب فدا شئ عادي وبيحصل وبيتكرر...اما لو النية السيئة فالحمد لله مش بصاحب شواذ

How many people on your top friends do you know in real life?
كتير

How many kids do you want to have?
خمس بنات ووالدين يعني المجموع 9

Do you have any pets ?
هأكلهم منين....؟؟
Do you wanna change your name
?اجمل اسم في الدنيا اغيره....لا طبعااااااااا

What did you do for your last birthday?
هو كان امته؟؟؟

What time did you wake up today?
معرفش بصراحة انا بقوم واصحي في اي وقت ولو قلنا بدري يبقي الساعة 2 في نص الليل

What were you doing at midnight last night?
كنت بتعشي عشان مش هشوف الاكل تاني

Name something you CANNOT wait for?
الجيش

Last time you saw your father?
نايم جوه اهوه

What is one thing you wish you could change about your life?
اليخت الموف اللي في بحيرة البجع

What are you listening to right now?
اختي بتزن في وداني ..يعني سامع زن اختي

Have you ever talked to Tom?
توم مين؟؟
لو التوم اللي بيخلي ريحة البق وحشة يبقي لا ...مبحبش اتكلم معاه

Have you ever talked about someone behind their back?
مش كتير وبعد ما بتكلم اقول ...احنا ملناش دعوة وبلاش الغيبة....دع الملك للمالك....بس فعلا بكره الغيبة اوي

What’s the last piece of clothing you borrowed from anyone?
جزمة إسلام الكلاسيك وبقلها عندي سنتين...طب كويس انكم فكرتوني عشان كنت ناسي اوي الواد هيقول عليا ايه...عشان كدا مش عاوز يرجعلي البربطوس اللي استلفه مني الشهر اللي فات...بيخلص حقه بقي
Who’s getting on your nerves right now?
الواد اللي بيبيع غزل البنات ويجي تحت الشباك يزمر وانا نايم عشان احمد اخويا ينزل يشتري منه...ايوة هو علي بالي دلوقتي

Most visited webpage?
اسماعيلي اون لاين والبلوجر

Coke or Pepsi ?
سفن اب

Mac or PC?
بسم الله الرحمن الرحيم
الاجابة زمبابواي
وبعد هذه الاعترافات امرر هذا التاج لكل من:
ضكتور خالد
جهينة- دوي الصمت
عالمها ازرق
وكفاية كدا عشان واللي عاوز التاج يخده
نجي مني مهند وصرصارة عشان اخدوا التاج معايا

ضد التيار _الجزء الرابع

مدونون ملحدون وعلمانيون
بعد بحث ليس بالقليل هممت أن أكتب موضوع في أمر هؤلاء الأقزام الشواذ
ولكني وجدت في نهاية الأمر أن هذه المدونات أحقر من أن أضيع وقتي في كتابة موضوع في أمرها وأضيع وقتكم في قرأءة هذا الموضوع
يقول الله عز وجل

الجمعة، 13 أبريل، 2007

شكر واجب



السلام عليكم

البوست دا يا جماعة اقل كلمة شكر ممكن اقولها لأختنا الجميلة صاحبة مدونة

تخاريف صرصارة

كانت لفتة جميلة جدا منها إنها تعمل بوست وداع مخصوص ليا عشان هروح الجهادية

مهما قلت مش هقدر اعبر عن امتناني لها ولكل الاخوة والاخوات اللي عرفتهم عن طريق التدوين

تقلبي مني فائق الشكر والاحترام اختي الكريمة ودمتي في خير


وجزاك الله خير

الثلاثاء، 10 أبريل، 2007

يوميات نصاب-2

السلام عليكم
ازيكم يا حلوين
معايا الناهرده فكرة هتظبط بيها امورك وتطلع منها بلقمة عيش حلوة تكفيك اليومين اللي جايين
انتم عارفين الحكاية بقت صعبة اوي بعد
انفلونزا الطيور...(قال يعني احنا بنكلها)......والحصبة الالمانية (اخدتها وانا صغير)....والمشاوير اللي مش جايبة همها
ندخل في الموضوع عشان انتم عارفين ان وقتي ضيق اوي ومصالحي كتير
فكرة الناهرده مقسومة نصين...نص إن دور...ونص اوت دور
بالنسبة للإن دور
انت محتاج 500 جنيه راس مال
ولا مؤخذه500 جنيه؟؟؟.....كتير اوي
.....معلش انا قلتلك اني مش هسيبك وهظبتك...بال 500 جنيه دوله هيبقي معاك حوالي 1000 جنيه....
لا يا خفيف مش هنولد الفلوس ولا حاجة
الفلوس بتجيب فلوس
بس هتتصرف ازاي في راس المال........؟؟
الست والدتك معاها حتتين صيغة عيناهم لغدر الدنيا......طبعا انت أولي من الدنيا بيهم....
لالالا مترحش بعيد ...مش هتسرقهم ولا حاجة
أنت هتروح لوالدت في ساعة عصاري وهي بتشرب الشاي
بس المهم والد حضرتك ميكنش موجود .....
وهتقعد جنبها وهتحط أيدك علي خدك وترسم العكننة علي وشك
....مش هيليق عليها الكلام دا وهتطنش....
متيأسش...أدخل عليها بكل الطرق لغاية ما هي تسألك وتقولك مالك يا واد ايه اللي قالب وشك كدا
...قلها مفيش وخش اوضتك واقفل عليك الباب.....
طبعا انتم عارفين طبع الامهات....مش هتصبر وهتخبط عليك.....
هتتقل انت....بس مش اوي عشان متمشيش وتسيبك...
المهم بعد ما تسألك وتلح عليك وعاطفة الحنان الاموية تصحي تاني بعد ما ماتت بعد ما حضرتك اتخرجت من الكلية ومش لاقي شغل ....
هتقولها انك زهقت وحاسس بالفشل وانك مكسوف من نفسك...
فلان وفلان ابوهم اشترلهم عقد وسفرهم بره ...وفلان ابوه شغله في مصنع من بتوعه ....
وفلان خاله شغله في شركة من شركاته.....
وصوتك يعلي وتقول انا فاشل وتبدأ في الانهيار( طبعا دي عاوزه مجهود منك بقي في طريقة الانهيار...انا عارف ان حضرتك معندكش دم وتنح بس لازم تدرب نفسك عشان اكل العيش)....ودمعتين وانت بتخبي وشك بين اديك
وتبص في عنيها وانت عينك حمرا ومليانه دموع وتفجر بقي القنبله
قلها انا هسيب البيت وهمشي ومش هرجع ابدا ومش هتشوفوا وشي تاني
رد فعل والدتك في الحالة ديه هيبقي حاجة من الاتنين
الاول: المركب اللي تودي......ومتبقاش تقطع الجوبات.....( احتمال متستبعدش.....بس وقتها خليك علي جنب وابقي ابعتلي عشان حالتك مستعصية وعاوزة ترتيب تاني).....
الرد التاني: يا ضناياي يا أبني.......وهتنفجر في العياط ....
هو دا طلبنا... وبكدا انت بدات اول خطوة في المشروع بتعنا
هتخدك في حضنها وهتعيط....قلها 500 جنيه بس
.....هيخرجوني من ورطتي....هتسكت شوية وتزق راسك بعيد عن حضنها
وهتسألك في شك وفي فزع....500 جنيه....هتعمل بيهم ايه إن شاء الله....
بطريقة عرض شيقه قلها انك هتعمل مشروع مع واحد صاحبك ابوه غني اوي وهو هيدفع الفلوس كلها بس مش ناقص علي المشروع غير 500 جنيه...
مشروع ايه دا... هتسألك بشك برضو...
قلها اي حاجة بقي ...اللي يجي علي بالك وقتها بس يكون مشروع منطقي يعني
المهم هتقوم وهتسيبك وهتقولك وهي رايحة علي باب الاوضه وانا اجبلك المبلغ دا منين.....وهتسيبك وتخرج...
انت هتسكت خالص ومش هتفتح بقك......انت كدا عملت اللي عليك بس ناقص حاجة صغيرة اوي......
هتقفل علي نفسك اوضتك اليومين اللي جايين ومش هترد لما ينادو عليك ساعة الاكل( طبعا دا اصعب شئ في الموضوع عشان حضرتك طفس )....بس استحمل وابقي قوم كل بالليل ومحدش اخد باله....
الست الوالدة قلبها هيتقطع عليك....(دا ان كان قلبها لسا فيه شوية حنية من ناحيتك).....وهتدخل عليك الاوضة وهي بتقولك عيب يا ابني متوجعش قلبي معاك......
انت متغطي ومش بترد.....
هتقولك طيب انا اتصرفت من خالتك في خمسين جنيه....
تخدهم وتدبر بيهم امورك لغاية ما ربنا يفرجها( انت عارف ان الست الوالدة نايمة علي خميرة حلوة ومعاها فلوس ومش محتاجة لخالتك).....مش هترد وهتبدا في العياط....
هتبدأ تساومك وتفاصل معاك فترة وممكن ايام بس في الاخر هتديك الفلوس..............
معلش مشوار الفلوس كبير اوي وحكايته طويلة
بس عشان دا راس مال والمشروع بتاعنا المرة ديه كبير شوية ومحتاج الفلوس ديه
خلاص جبت ال500 جنيه وبقي في جيبك.....خلص مشوار الإن دور
استعد بقي للشغل
-----------------------------
مشوار الاوت دور والشغل التقيل بقي
سمير صاحبك خالته عندها شقه في مكان نظيف اوي...
اصلها ماشاء الله مسافرة هي وجوزها الكويت وبتيجي في شهرين الصيف......
سمير معاه المفتاح بتاع الشقة وبيروح هناك عشان يتفرج علي الدوري الاوروبي في الدش....الدوري الاوروبي بس هتتفق مع سمير انكم تستغلوا شقة خالتوا وتعملوها زي مكتب ...
طبعا بعد ما سمير هياخد منك 100 جنيه عربون وتوعده بقرشين بعد ما الحكاية تخلص
هتظبتوا الشقة وتهيئوها علي انها مكتب
مع الاخذ في الاعتبار انكم هترجعوا كل حاجة مكنها بعد ما المشروع يخلص
باقي معاك 400 جنيه...هتروح اي مطبعة تطبع فيها 500 استمارة( ابليكشن) بعد ما تكون كتبتها علي الكمبيوتر....
يعني هتكتب فيها شوية بينات زي الاستمارات بتاعت التقديم علي وظيفة خالية
المشوار دا هيكلفك حوالي 100 جنيه....كدا اتبقي معاك حوالي 300 جنيه خلي بالك من الحساب
هتطلع علي جريدة الجمهورية وتعمل اعلان عن احتياج احد شركات القطاع الخاص لشباب حديثي التخرج من الجنسين
مؤهل عالي او متوسط او يستطيع القراءة والكتابة
ولا يشترط التقدير
ويشترط إجادة اللغة العربية حتي ولو كانت مكسرة....
والاولوية لسرعة التقدم....
المترتبات حد ادني 500 جنيه......وتوفر الشركة سكن مناسب للمغتربين عن المحافظة
وتوفر الشركة اربع وجبات اكل يوميا
وتكتب عنوان شقة خالة سمير ورقم التلفون بتاعها
وتسمي الشركة اي اسم....
سميها مثلا (المنجلاوي)..حلو المنجلاوي
المشاور بتاع الاعلان دا هيكلفك حوالي 200 جنيه.....كدا اتبقي معاك 100 جنيه.......هتروح لسيد ابن عمتك
اللي مش لاقي شغل ومتخرج بقاله 8 سنين وقاعد علي القهوة
وهتقولوا انك عاوزه في مشوار لمدة اسبوع وهتيدله فيه 50 جنيه....والشاي والقهوة عليك
طبعا هيرفض
انت بعد شوية محاولات هتقنعه انه ياخد 80 جنيه ويجي يعمل اللي هتفهمه عليه
وابقي اوعده انك بعد اسبوع هتيدلوا زيهم.....
سيد هيجي يلببس الطقم الكلاسيك وهيكون طبعا مستحمي ومسرح شعره
...هيجي يقعد علي المكتب اللي في الشقة اللي احنا سمينها شركة المنجلاوي من الساعة 8 الصبح
طبعا جموع الشباب المتقدمين علي العمل هتبدا في التدفق
....سيد ..هيرحب بيهم بكل ود واحترام وهيقلهم اتفضلوا املوا الاستمارة....
بس الاستمارة تمنها 3 جنيه...طبعا سعرها رخيص والناس هتدفع من غير تعب
....سيد هياخد منهم الاستمارة (الابليكيشن)بنفس الابتسامة
وهيقلهم علي معاد المقبلة الشخصية( الانتر فيو) اللي هيكون في الاسبوع اللي بعده
لغاية ما ال500 استمارة يخلصوا
خلينا متشائمين ونقول ان الاستمارات هتخلص علي اخر الاسبوع .....
اول ما اخراستمار تتباع هتروح تلم الحصلية بعد ما تراضي سيد اللي عينه هتزوغ علي الفلوس
ويبدا يساومك ويعلي صوته ...انت هتفهمه ان الفكرة كلها بتاعت سمير
وان الشقة بتاعته وانك مطلعتش منها غير بحاجة بسيطه وتمشيه
...سمير هو كان هيطمع...هتفهمه ان الفكرة كلها بتاعت سيد
وان سيد عمل كل حاجة وهتيدله قرشين وتمشيه
بعد ما تقفلوا الشقة وترجعوها زي ما كانت وتنظفوها
كدا هيبقي مع حضرتك بعد ما تقفل بق اللي حوليك حوالي 1250 جنيه......هتروح للست والدتك وانت راسم الذل والكسوف علي وشك وهتقولها ان المشروع خسر وانك مطلتش من فلوسك غير 150 جنيه
....طبعا هتدب بالصوت وهتلم عليك الجيران.....
تخرج انت كل يوم وتتأخر وتيجي بلليل وشعرك منعكش وهدومك مبهدلة وتديها 100 جنيه بعد اسبوع وتعمل نفسك انك تعبان وداخل تنام وتقولها علي اخر الشهر اكون جمعتلك فلوسك كلها .....
ست الحبايب هتحس انك انت رحت تشتغل شغلانة مش ولا بد عشان تجمعلها فلوسها.
هتصعب عليها وتستعوض ربنا في بقيت فلوسها............
وتخدك في حضنها وهتعيط
انت مشاورك كله خلص ومعاك صافي ارباح الف جنيه...............مبروك عليه يا
اكسلنس.....عيش حياتك بقي ولما يخلصوا ابقي تعالي قلي
-------------------------------------------------
-------------
ايه رأيكم في الواقع المرير اللي احنا عايشينه....شايفين البطالة ممكن تعمل ايه......والله حكاية الاستمارات ديه بتحصل بس علي كبير......سرقة مصرح بيها....يروح الشاب الغلبان وبيدفع تمن الاستمارة اللي بتكون غالية وهو متاكد انه مش هيشتغل....بس اهو امل يتعلق فيه
معلش يا جماعة انا عارف ان الافكار كلها فاسدة.....قصدي اننا بنعرض المصايب اللي بتحصل عندنا بس بأسلوب مختلف شوية

الاثنين، 9 أبريل، 2007

يوميات نصاب

السلام عليكم

تعالوا نبتكر شخصية نصاب ونشوف النصاب دا ممكن يفكر في ايه عشان يجيب فلوس
انا قصدي من وراها اننا نطلع بعبرة او نصيحة....بس عشان احنا مش بنتقبل النصيحة زي الناس لازم نخدها بشكل مختلف (زي ما اخونا خالد قال بالهجايص) وهو دا بقي الجديد ...عشان مطولش عليكم هو عبارة عن شخصية بتفكر تحل مشاكل الشباب بأساليب مختلفة شوية....ومن اهمها مشكلة البطالة اللي هنتكلم عليها في معظم المواضيع
ونتوكل علي الله ونبدأ

لو حضرتك محتاج فلوس ايه هي الطرق اللي ممكن تستخدمها عشان تاخد الفلوس اللي أنت محتجها
طبعا لازم حضرتك تفتح مخك شوية وتركز...
تعالي معايا كدا نتكلم بصوت واطي عشان محدش يسمع
اولا نفترض إن المبلغ اللي إنت عاوزه هو 100 جنيه...
وانت مفيش في جيبك غير 20 جنيه
لو ليك اخت في كلية أو بتشتغل هتروح تقولها إن في واحد صحبك بيروح يجيب حجات من ليبيا
بس هو معندهوش راس مال فبياخد فلوس من الناس وبيرجعهلها الطاق طاقين..
يعني لو دفعتي 10 جنيه تخديها 20اختك مبتثقش فيك
...لازم تدخل عليها الدخلة الصح
يعني قولها الراجل دا بيجيب بضاعة رخيصة أوي من ليبيا وبيبعهاهنا غالية
وكل الناس بتستناها عشان تخدها منه...
لو سألتك عن نوع البضاعة اوعي تقولها حاجة من اللي البنات والستات بيحتجوها
..يعني مكيجات أو حلل طبيخ أو أكسسوارات حريمي ..
قولها مثلا بيستورد تفتزانيا وسلكوكو...وأبقي فهمها إنها اعشاب طبيعية...أو أخترع اي حاجة...
بس خد بالك عشان متقولكش هاتلي منها...
و اتفق مع كام واحد من صحابك يتصلوا بيك في البيت ويكلموك علي صاحبك دا اللي بيروح ليبيا وعلي صوتك اوي وانت بتتكلم معاهم
المهم عرفت تاخد منها اي مبلغ بس خليها عشرة جنيه....
وبعد اسبوع رجعلها المبلغ دا عشرين جنيه
طبعا اختك هتطير من الفرحة وهتروح تقول لزميلها وصحبتها كلهم...
أنت عارفين طبع البنات...هتجيلك صاحبتها الانتيم وتقولك أنا عاوزة ادخل بنفر أنا كمان...
خد منها عشرة جنيه ورجعلها عشرين بعد اسبوع..
خلي بالك أنت كان معاك عشرين جنيه في الاول خالص....
كدا انت بقيت علي الحديدة..
بس كسبت ثقة اختك وأصحبها اللي مبيتبلش في بقهم فولة
هيجيلك بعد 3 ايام صحابها كلهم ...حاول حضرتك إنك تجمع منهم 200 جنيه ..
هتسألني ليه الطمع؟؟
هقولك بعدين انا خليتك ليه تجمع 200 جنيه
كدا انت معاك المبلغ اللي أنت عاوزة هتقضي بي مصلحتك ...وهيفضل معاك 100 جنيه..خليهم علي جنب دلوقتي وهقولك هتعمل بيهم ايه..
طيب والناس اللي أنا اخدت فلوسهم هيسكوتوا؟؟؟انت بقي هتكون اختفيت شهر لغاية ما هما يستوي...وتقولهم إن كنت في اسكندرية بتعزي في صاحبك بتاع ليبيا...اصل عمل حدثة وهو جاي من ليبيا ومات
وهو اساسا من اسكندرية وترسم كلي وشك الحزن
طيب وفلوسنا ؟؟؟؟؟ دي الصرخة اللي هتطلع منهم كلهم....
وقتها بقي لازم تعمل اللي هقولك عليه
قولهم يا جماعة فلوسكم عندي ...
أنا كان معايا قرشين كنت محوشهم عشان اعمل بيهم عملية البواسير (عشان تبقي مؤثرة)..ممكن لو انت بتتكسف تقول عملية الغضروف...بس التعاطف معاك هيكون اكبر في الحالة الاولي...
بس حقكم لازم يوصلكم
وهات ال100 جنيه التانية اللي انت سألتني عليها وتوزعها عليهم...
هيهدو حبة...ديما وجه كلامك لأوحش بنت قاعدة من الضحايا..حاول انك تكلمها هية وتبصلها هية...
عينك علي طول عليها
حسس البنت ديه إنها البنت الوحيدة اللي قاعدة....
ويا ريت لو تعرف تكلمها في التلفون وتقولها ان انت كنت خايف لصورتك تتلوث ادمها....
وتكون مشغل جنبك أغنية عبد الحليم بتاعت تخونوه وعمرو ما خنكم......
وديما كلم اختك عليها هية....البنت يا عيني ممكن تسلفك الفلوس وتسد اصحبها...وفي اسوء الحالات هتتكسف إنها تطالبك بفلوسها....وهتلاقيها نطة في البيت عندكم كل يوم....كل يوم كلمتين حلويين لغاية ما تنسي خالص
ويا سلام لو كانوا اتنين او تلاتة وحشين..يبقي كدا انت والدتك دعايالك..........
والباقي هينسي مع الزمن او اختك تسدهم عشان الفضايح
وهقولك المرة اللي جاية علي فكرة تانية لو دي منفعتش
-------------------------------
ايه رأيكم في التخطيط وكيفية سد الثغرات اللي ممكن يواجها بطل القصة
علي فكرة اللي خلاني افكر اني انقل المواضوع دا من مدونتي القديمة موضوع( بيفكر بالصيني )في مدونة صرصارة
ايوة هي المدونة اسمها صرصارة انا مليش دعوة
بس ملخصة هو الغزو الصناعي الصيني لمصر وليه احنا منبقاش زيهم مع اننا بنفكر احسن منهم
بس كتير مننا بيفكروا غلط
لكم تحايتي

الخميس، 5 أبريل، 2007

يوم اليتيم

دمعة بنت يتيمة
شوفت في يوم اليتيم بنوتة حلوة أحولها شتدني

من الف طفل وطفلة دمعة عينها خطفتني

وبسرعة رحت عليها بعد ما لهفتي ليها أخدتني

سألتها: ليه الزعل يا جميل...بصت عليا وبدمعة حزن جوبتني


قلتلي مليش ماما من شرور الدنيا تخبيني

وقبل ما أنام وأنعس للحدودة تحكيلي

وفي ليل وبرد الشتا رمش عينها يدفيني

وفين بابا لما أغيب عن عينه يناديني

أنا عايشة وحيدة....ودمع اليتم علي خدودي بيكوني


قلتلها كل الناس الناهرده لفرحتك جايين

ليكي الف بابا وماما كل يوم زايرين

للهدايا وللعب أهم كمان جيبين

تعالي أفرحي وغني مع اخواتك الحلوين


قلتلي كنوز الدنيا ما تعوضني حضن حنان

ولا هدايا ولعب تعرف تجبلي أمان

انا نفسي اعيش بكرامة...وعزة الانسان

مش عاوزة عطف وشفقة ومعاملة الحيوان


نزل كلمها علي ضهري كرابج بيجلدني

ومنظر دمع عيونها في الليالي معذبني

وهانت في عيني الدنيا وجه ضميري يحاسبني

صرختها رنة في ودني....انت ليه بعيد وسايبني

انت ليه بعيد وسيابني


كتبت الكلام دا من 4 سنين...يعني من اول يوم يتيم....القصة تقريباً حصلت بنفس التفاصيل معايا بس من غير الحوار...كنت لأول مرة أعرف سكة زيارة الملاجئ....وقعت عنيا علي مشرفة شايلة طفلة عنيها مليانة دموع..سرحت معاها...ورجعت كتبت الكلام دا...يعني تخيلت الحوار اللي لو البنت هتعرف تتلكم مش هتقول غيره...بس يمكن دمعة في عين طفلة يتيمة ممكن تقول كلام كتير جدا مش لازم يتكتب في شعر او زجل او قصيدة عشان الناس تفهمه

احنا فعلا مقصرين في الاحسان الي اليتيم....ممكن ميكنش محتاج منك تبرع وفلوس....محتاجك تحط ايدك علي رأسه وتمسح عليها....

دا الحيوان يا جماعة بيحس بالحنان...فما بالك بإرق مخلوق في الدنيا....بطفل...وطفل ضعيف جدا....طفل يتيم

مش هقدر اوصفلكم....لازم تروحوا وتشوفوا وتحسوا....وتعرفوا تمسكوا دموعكم....لو هتعرفوا


صلي الله علي سيدنا محمد صلي الله عليه وسلم الرحمة المهداه....فقد ذاق مرارة اليتم....لذلك اوصي بالاحسان الي اليتيم ....بل ورغب في كفالة اليتيم حين قال صلي الله عليه وسلم

أنا وكافل اليتيم فى الجنة هكذا ... وأشار بإصبعيه السبابة والوسطى





الاثنين، 2 أبريل، 2007

هو كدا_1

السلام عليكم
ازيكم يا شباب....بعد النقاش الجامد بتاع اخر حلقات ضد التيار والصوت العالي والناس اللي قطعت شعر بعض هناخد هدنة وهنوقف الحلقات شوية...يعني الحلقة الرابعة هنصبر عليها شوية لغاية ما الناس تنسي شوية...ونبدا في سلسلة جديدة
ياااااادي النيلة....سلسلة تانية....اه سلسلة تاية بالعند فيكم...
..بس المرة ديه مش هيبقي فيها خبط راس في الحيطة ولا شرب من البحر والترعة
المرة ديه هنتكلم بكل بساطة ونعمل دراسة وتصنيف....برضو تصنيف تااااااااااااااااااااااااني
اسمعوني بس ...المرة ديه هيبقي تصنيف للشعب المصري الجميل...اللي انا وانت منه....مش هيبقي بغرض الانتقاص ولا حاجة وحشة ...اعزكم الله...بس فعلا الشخصية المصرية غريبة جدا ولو فضلت تدرس فيها طول عمرك هتشوف البدع...ممكن انا وانت نبقي من التصنيفات ديه...او فينا الطبع دا....لا دا مش ممكن دا اكيد احنا كدا وبنعمل الكلام دا
عشان مطولش عليكوا نبدأ اول حلقة من هو كدا
طيب هو انا سميتها هو كدا ليه....والله معرفش...اللي جه علي دماغي بقي وانا مبحبش اغير حاجة كتبتها
.
.
.
.
اول طبع فينا كمصريين هنتكلم عنه هو اننا شعب خالف تعرف
يعني تقوله شرّق يغرّب...تقوله شمال يروح يمين
حاجة كدا زي العند ....وتلاقيه عارف ان اللي بيعمله دا غلط وهيوصله لسكة مش حلوة
بس هو كدا بقي....ميتكيفش ولا باله يرتاح ولا عنيه تغمض الا لما يخالف الاوامر والتعليمات
تكون ماشي علي طريق سريع ومكتوب النقل الثقيل يلزم اليمين...تلاقيه متنح وماشي علي الشمال
يافطة تانية مكتوب فيها احذر السرعة مراقبة بالردار...تلاقيه داس بنزين وجاب 200 وعربيته اخرها 120
تلاقي يافطة تالتة مكتوب احذر امامك مدرسة...تلاقي السواق بيجري ور العيال الصغيرة عشان يخبطهم...ولو معرفش ممكن يستناهم تاني يوم جنب بيتهم عشان لما يطلعوا يخبطهم
شئ غريب...وعجيب
موظف في الحكومة بيته لازق في الشغل...يعني ممكن يغسل وشه في البوفيه...تلاقيه يجي الشغل اخر واحد ومتاخر ويمشي اول واحد
التاني المدير بتاعه يطلب منه شغل معين ..تلاقيه يتفنن في انه ميعملهوش او يعطله....بيحس بمتعة غريبة وهو بيعكنن علي المدير...حتي لو هياخد جزا...بس هو كدا
طالب متفوق ومحترم وملتزم ايام الكلية....يستني اول ما الدكتور يدخل المحاضرة يدخل بعده عشان عارف ان الكلام دا بيعصب الدكتور....ويا سلام لو دكتور لسانة طويل...تلاقي صحبنا دا مستمتع بالتهزئ....وطبعا في الاخر كل دا بيجي علي دماغ الغلابة اللي الدكتور
المفتري بيفش غله فيهم...ليه يا محترم مبتدخلش قبله وتريحه عشان مخه صغير...يقولك هو كدا بقي
طالب ثانوي جميل ومؤدب ومزرر رزار القميص اللي فوق ولابس كرافت جميلة وجزمته سودا ومتلمعة وتلاقيه داخل وخارج المدرسة ناطط من فوق السور....مع ان الباب بيكون مفتوح...
بس هو بقي مش بيحس بذاته الا لما يعيش ايام الدراسة ناطط من فوق السور ذهابا وايابا....والشخص الغريب هو اللي كان بيدخل من باب المدرسة....الكلام دا انا كنت عايش فيه بس مكنتش بلبس كارفات ومكنتش بزرر زرار القميص اللي فوق اذا كنت لبست قميص اساس...كنا بنروح بلبس مخالف من باب العند برضو...طب ليه يا ابني...هو كدا
الست المتجوزة الكبيرة العاقلة.....متعرفش تعدي ساعة من غير ما تعمل عكس اللي بيطلبوا منها جوزها....هو كدا...زي ما يكونوا متوصيين علي انهم يمشوا خلف خلاف
وبرضو الراجل المتزوج بيعمل كدا مع زوجته....عشان كدا بتلاقي الحياة الزوجية بتكون ممتعة وجميلة....بس هو كدا
وياسلام لو راكب مع سواق تاكسي مزاجه تمام التمام وتقوله علي يمينك لو سمحت يا ريس....تلاقيه حدفك في اخر الدنيا...مع ان كان في مكان يركن فيه وينزلك بكل راحة...يس متعرفش بقي هو بيستهبل والا عامل نفسه اطرش وتيجي تقوله يا عم حرام عليك انا بقالي ساعة بقولك علي يمينك يقولك ...هو كدا يا أستاذ ويروح شاتم في الحكومة وفي الموظفين بتوع المعشات وفي منتخب مصر ويختمها بملعون ابوها شغلانة تقرف وزباين هم
ولو انت بقي من اللي ربنا فتح عليهم من الرأس ماليين اللي معاهم عربيات وماشي في شارع زحمة....والله انهيار عصبي...تلاقي واحد كاسر عليك بكل تناحة ورذالة ...مش كدا وبس...ويشتمك كمان...ولو الجو صيف وانت فاتح الازاز بتلاقي الدنيا مطرت عليك من بق الراجل اللي بيتكلم...مع انه هو اللي مخالف....بيستمتع انه يخالف ويستمتع انه يشتمك ويمطر عليك
الامثلة كتيرة جدا علي فكرة
لو قعدنا نقول فيها مش هنخلص
بس هو كدا....احنا شعب خالف تعرف......والصورة بتتكلم
والا انتم ايه رأيكم؟؟؟؟؟؟؟؟؟؟


الأحد، 1 أبريل، 2007

ضد التيار _الجزء الثالث

السلام عليكم

ازيكم يا شباب....
يارب تكونوا بخير
بناء علي رغبة الجماهير هنستمر في نقاش مواضيع ضد التيار
مع انها مش عاجبة ناس كتير
عادي ...مش مشكلة....مش مهم انها تعجبكم

....المهم نكمل بقي بقية التصنيفات بتعتنا ونقول كلمة الحق
نوع الناهرده من المدونات هو اشهرها واكترها...يمكن هو كان الهدف من التدوين من الاساس



المدونات السياسية
يا عيني علي الصبر
سياسية....كلمة تقيلة ليها وزنها
اللي بيتكلم فيها ويعرف ينطقها صح يبقي رجل عترة ومجدع صحيح

اه...عترة ومجدع...وبيبقي من المسأفين....(مثقفين يعني)...ويبقي افندي اد الدنيا

هما نوعين
النوع الاول مدونات ذات صوت معارضة واعي
ناس محترمين بيتكلوا صح....موزونين وتقال...بتدخل عندهم تستفيد وتتعلم
بتروح تقرأ وجهات نظر....حاجة كدا زي محاضرات
صوت معارضة بس مسموع وصحيح.....بيبص للغلط ويعلمك ازي تواجه وتتكلم صح....يخيلي عندك بعد نظر

وممكن يناقش الموضوع بسخرية وببساطة من غير اي اندفاع وهطل....علي فكرة في شباب كتير جدا بيعمل كدا........

ومن الامثلة الجميلة علي ذلك علي مش علي سبيل الحصر مدونة انا جعان...

يبقي يا جماعة عشان محدش يقول اني ضد المدونات السياسية ومناقشة اوضاع البلد....انا ضد المدونات القذرة التي تحذوا حذوا مدونة منال وعلاء....اللي فاكرين نفسهم وطنيين ....همات وطنيين بس من غير حرف النون

وهو دا بقي النوع التاني اللي هنتكلم عنه


النوع التاني بقي الجماعة بتوع



الهمبكة
الحنجورية .... فنجرية البق
اخ...جينا في ضرب النار...شكلك مش ناوي تجبها البر يا راقص مع الدياب

ايوة هما دولة اللي انا فاتح بسببهم الموضوع اساسا

فنجرية البق


تدخل المدونة كأنك ماشي في مظاهره.....صور ولافتات ولا للتوريث .....والاستقلال التام او الموت بالزكام...ونموت نموت وتحيا مصر
شوية شعارات كدا وكلام فاضي ميملاش الدماغ......بجد فعلا كلمة (لا) هتلاقيها كتير جدا
وتلاقي الكاتب او صاحب المدونة يا حبة عنيا حارق دمه وعمال يشتم في مبارك وجمال مبارك وعلاء مبارك وسوزان مبارك ويشتم في علي مبارك كمان بتاع التعليم ايام زمان
مناضل....يحسسك ان هو دا اللي هيحرر مصر وهيصلح المجتمع

قامت في دماغه يبقي ثورجي دخل رزع كلمتين في صفحة نت بقي سياسي وبطل ومناضل

ولا ممكن يكون متكيف ومسطول قال كلمتين في لحظة انبساط اتركبوا علي بعض بقوا هتاف وشعار

سخنت في دماغة راح جاب 5 متر قماش وكتب عليهم كلمتين حلوين

والناس مش لاقية متر تغطي بيه نفسها (احمد راتب في طيور الظلام) مع اني بكره القذر اللي اسمه عادل امام

وتعالي بقي اتفرج علي كم القذارة والاسفاف في كلامه

خلاص مدام بيتكلم في السياسة يبقي اترفع من عليه القلم....قال ايه يا خويا...بيطلع الكبت اللي جواه من الحكومة

يروح يمشي في مظاهرة ويشتم ويجعجع....ويتضرب بجزم عساكر الامن المركزي....ويسمي نفسه بطل قومي

هو البطولة مش بتتاخد غير بختم جزمة عكسري الامن المركزي علي قفاه؟؟؟

طيب قولوا عليا ان انا غلطان ومش فاهم حاجة

كم المظارهات والاعتصامات اللي اتعملت من ساعة انتفاضة المدونين الثورجية لغياة دلوقتي عملت ايه؟؟؟؟

كانت ايه الفيادة منها؟؟؟ الهطل اللي كان بيتعمل ولسا بيتعمل دا خدم المواطن الغلبان في ايه؟؟؟

عارفين اول ثمرة ليه ايه هي؟؟؟؟

تعديل الدستور بالشكل الجديد.....والغلابة اتخدوا في الرجلين

طبعا...لازم الدستور هيتعدل والبلد هتتمسك بأيد من حديد وزمن زكي بدر هيرجع تاني وامين الشرطة اللي ميسويش تمن قرطاس لب هيبقي ليه قيبمة وحصانة

وهتتطبق في البلد سياسة (هنيمكوا من المغرب يا كلاب)

مش عاوزين تعملوا انقلاب علي السلطة.....هما بقي هيربعوا اديهم ويتفرجوا عليكم....الطبيعي انهم يخلوكوا تبطلوا زن

والمملي جرام حرية اللي كنا بننزل نصلي بيه الفجر هيتشال

طبعا الناس ديه متعرفش يعني ايه صلاة فجر ولا كلمة صلاة موجودة في القاموس بتعهم من الاساس عشان كدا مش فارقة معاهم مساجد تتقفل مساجد تتهد مشايخ يتمنعوا من الخطابة...المهم انهم يبقوا مناضليين وخلاص


ربنا ينتقم منكم ياللي كنتم السبب



خلاصة الكلام انت يا ثورجي يا فنجري البق مش هتغير حاجة...انسي ...بتضحك علي نفسك...بالعكس...بسببك الوضع بقي اسوء من الاول
اخرتك خرطوم المطافي بتاع الامن المركزي

اقعد في بيتك وزاكر لو انت في كلية او في مدرسة او اشتغل وحوش عشان تعرف تشتغل وتتجوز وتفتح بيت وميبقاش عندك كبت وفراغ

خلف عيال علمهم التدين والانتماء....مش تعلمهم يسقطوا البناطيل

إن الله لا يغير ما بقوم حتي يغيروا ما بأنفسهم

دا ربنا اللي بيقول كدا مش انا
غير نفسك وصلحا واعدلها....الاصلاح مش هيجي علي ايد واحد اسمه علاء هو ومراته وحاطين صورهم وهما حاضنين بعض في الشارع ولابسين كت علي البلاج وبيشربوا خمرة في البار


مشكلتنا انا مفيش رجالة بتتكلم....كل اللي بيتكلموا زي علاء ومراته

حسبي الله ونعم الوكيل


يا جماعة اللي مش عاجبه الموضوع ....اتمني من كل قلبي
.
.
.
.
.
.
.
.
.
.
.
.
.
.
.
.
.
.
.
.
.
.

إنه يضرب دماغه في الحيطة