Translate

الخميس، 28 فبراير، 2008

دبابيس

السلام عليكم
شوية دبابيس كدا علي الماشي
الدبوس الاول
الحجاب
مش حتة قماش تغطي الشعر وبس....لا ....الحجاب هو ستر جسد المراءة بالكامل وعدم إظهار مافتنها
إنما اغطي شعري واكشف مش عارف ايه يبقي مسموش حجاب
اسمه مسخرة
والنقاب برضو....مش معناه إني اغطي وشي وادلع....عشان الدلع مع النقاب مينفش....
الاخوات الفضليات اللي بيلبسوا نقاب ويدلعوا ياريت يعملوا حاجة من الاتنين
يبطلوا دلع ويحترموا النقاب...او يخلعوا النقاب ويدلعوا براحتهم...وبرضوا هيبقوا بيحترموا النقاب
عاوزين تعرفوا الدلع دا عامل إزاي؟؟؟
بلاش....مش لازم نوضح...اكيد كلنا عارفين
ياريت ناخد بالنا من الحجات ديه عشان بقت كتير اوي وواضحة اليومين دوله
ربنا يهدي
الدبوس التاني
الدي جي أو ال dj
افرحوا براحتكم وأرقصوا وهيسوا زي ما انتم عاوزين
بس في الاماكن المخصصة لذلك زي النوادي وقاعات الافراح
إنما بقي في الشوارع دي عاوزة وقفة
الناس من حقها تفرح...وانا من حقي انام واستريح
جزار فاتح جديد ...جايب دي جي
طهور سيد ابن ام علي....جابت دي جي
فرح الجيران اللي جنبنا...جايبين دي جي
عم مغوري الله يرحمه توفي....اهله جايبين دي جي
بقي شئ فظيع اوي ولا يطاق....ربنا يهدي
الدبوس التالت
رنات الموبيلات
حقك تحط اغنية وتخليها رنة لموبيلك...حرية شخصية....انت اللي هتتحاسب مش انا
حقك تحط فيلم ولا مسلسل والا اي عفريت ازرق وتخليها رنة لموبيلك
بس اللي مش من حقط بقي إنك تدخل بيه المسجد و (تنسي ) تقفله
والله يا جماعة المنظر كان وحش اوي لما كنّا في وسط الصلاة والسيدة صباح طلعت من موبيل احد المحترمين تغني قائلة بصوتها الجهوري : علشااااااانه أدوب انا
طيب انا هتدبر ازاي في تلاوة الامام وهجيب خشوع منين وصباح بتدوب في حب اسمه ايه دا؟؟
الامام نفسه هيقرأ ازاي ....
لو انت راجل بتنسي تقفل تليفونك قبل الصلاة يبقي يا ريت تغير رنة التلفون
بلاش تخليها تلاوة قرآنية عشان فيها كلام
خليها رنة عادية خالص...زي رنة تلفون البيت....محدش هيقول عليك جاهل او رجعي او متخلف
بالعكس...دا انت هتبقي راجل محترم ومهذب
ولو نسيت تقفل تلفونك في اي وقت مش هتبقي محرج من الرنة بتاعته
وربنا يهدي
الدبوس الرابع
الكوسة
اللي هي الواسطة يعني والمحسوبية
بجد حاجة مقرفة اوي ...وبتحتقر اللي بيعملها او اللي بيسعي اليها
وخلوا بالكم....الرشوة تبع الكوسة برضو
في رشوة بالفلوس...وفي رشوة بالهدايا
وفي رشوة بإسطوانات افلام إباحية...
وحدثت بالفعل
مش هقول التفصيل عشان مش مهم تعرفوها
بس إجمالا الرشوة او الواسطة حاجة حقيرة ومقززة
ياريت كلنا نبعد عنها ونتوكل علي الله في جميع امورنا
واكيد الراجل(القائد) بتاع الرشوة بالافلام الاباحية هيعيش طول عمره حقير
ربنا يهدي

الجمعة، 15 فبراير، 2008

حمرا...وكبييييييييييييرة

السلام عليكم

الفضي والاجازة عاملين شغلهم معايا...يارب دمها نعمة عليا
خلاص....كلها 24 ساعة و اروح مكان جديد...أدعولي يا جماعة
المهم بقي وانا في الانتخة ديه قررت اشتغل صحفي ومراسل ومحقق...
يعني بقي عندي مدونة ونازل الشارع اندمج مع الناس واجيب مواضيع وابقي شاطر وحلو ونشيط....
حد عارف بكره فيه ايه....يمكن الباشمهندسة مني الشاذلي تتصل بيا وتستضفني عندها في البرنامج زي غادة برايد كدا...
والبس بقي بدلة وكرافت وأغيظ الواد حسين صاحبي
المهم أخدت الموبيل أبو كاميرا بتاع أختي...لحسن حد يفتكره بتاعي ويطمع فيا....انا موبيلي عتيق وبيشتغل بالجاز...امي جبتهولي هدية عيد الابن من 4 سنين......ايوة عيد الابن...اشمعني يعني الابن اللي مش هيبقي ليه عيد
وعملت نصابية صغيرة جوا البيت طلعت منها بتمن 5 لتر بنزين وتمن كوباية الشاي اللي مبيتشربش علي القهوة الحقيرة اللي بيتجمعوا عليها صحابي...وانا مبحبش اقعد عليها...
لازوم الصحافة بقي القعدة علي القهوة يا جماعة شغل علي مية بيضا
البداية إن العربية مدرتش و اخدتها شعلقة في المواصلات
لالالالا....محدش يقولي عشان فلوس البنزين حرام....كل مرة كانت بتدور ...وبنفس البنزين
هو بس كل حاجة ليها سبب علمي.....
وصلت للمقر او المكنة زي ما بنسميها
واستعديت إني التقط بعض الصور لمحلات الهدايا ...أو للهدايا اللي كانت ماشية علي رجليها في الشوارع
صورة...اتنين..الموبيل فصل شحن....سبب علمي...الشحن خلص...فيها حاجة ديه
وطبعا مفيش صورة طلعت واضحة
لا يا جماعة محدش يروح لبيعد ويقول إن ابو صابر نازل يصور الحبيبة اللي ماشيين مع بعض في الشوارع
مش اخلاقي ولا طبعي ولله الحمد ....وبعدين هصورهم ليه....هما موجودين في كل حتة وبغزارة
لدرجة إنك ممكن تلاقيهم في مدخل بيتك وانت راجع بالليل
اقسم بالله ليست دعابة وحدثت بالفعل مع احد اصدقائي ...لقاههم في مدخل بيته
المهم مش هو دا موضوعنا
موضوعنا هينقسم ل3 اجزاء
الجزء الاول حمرا وكبيرة
الجزء الثاني حمرا...وكتـــــــــــــــــــــــــــيرة
الجزء التالت حمرا...وفظـــــــيعة
.
.
.
نبدأ بحمرا وكبيرة...
هي ايه يا ابو حميد اللي حمرا وكبيرة
دي هدايا عيد الحب.....امال انتوا كنتوا فاكرين ايه؟؟؟
لالالا...هي هدايا عيد الحب
تلاقي بسم الله ماشاء الله عيل طوله 20 سم شايل هدية مش مبينه معالمه بالمرة
وتلاقي بنوتة لذيذة امورة شبه عروسة المولد شايلة برضو حاجة حمرا وكبيرة
والورود بقي...مش هقولكم.....اللون الاحمر بغزارة....وكلها حجات حمرا وكبيرة
طيب هي العلب والوفافات الحمرا ديه جواها ايه؟؟؟؟
علامة إستفهام
طيب هي العيال ديه بتجيب الفلوس ديه منين؟؟؟
الله اعلم
لدرجة اني فكرت اعمل مشروع كويس اوي
افتح محل لونه احمر والبس بدلة حمرا ونظارة حمرا وابيع حجات حمرا وكبيرة
اكيد هكسب دهب...من اللي شفته امبارح
ادينا عرفنا ايه هي الحاجة الحمرا الكبييييييرة
ندخل علي اللي بعده
حاجة حمرا وكتــــــــــــــــــيرة
دي بقي جماهير مصر العظيمة الوفية الجميلة اللي كانت مالية الشوارع يوم الاحد اللي فات
ولاد وبنات ورجالة واطفال كلهم برضو لابسين احمر وطراطير حمرا
مشاء الله
انا بشجع كورة برضو وبحبها اوي ....بس مش كدا
عشان سببين...الاول اني اسمعلاوي وبكره اللون الاحمر (طبعاً فاهمين) والسبب التاني ان الحال موصلش بيا إني البس احمر وانزل الشارع ارقص وابقي اهطل وبريالة
اه فرحت واتنطط لما مصر كسبت...بس خلاص ...المولد انفض
ومبروك لمصر وعملوها الرجالة
.
.
عرفنا ايه هي الحاجة الحمرا الكتـــــــــــــيرة
.
.
.
.
.
نيجي للحاجة الحمرا الفظيعة
لون الدم
دم الناس اللي في غزة...يااااااااه يا ابو صابر....انت هتقلبها غمّ ليه
طول عمرهم في دم وحروب...خلينا نفرح ببلدنا شوية
بلاش دم اهل فلسطين ....تعالوا جوا بلدنا...نفرح ببلدنا
دم الناس الغلابة
امبارح واحد صاحبي في وسط الهيصة والمسخرة بيقولي شايف حال البلد عامل ازاي
الناس مفرفشة وهايصة وعايشين..قلتله ما هو بيان اهوه
قالي امبارح واحد قتل التاني في فرن عيش عشان كانوا بيتخنقوا علي الادوار
الناس بتصحي الفجر تروح تقف علي افران العيش عشان يجيبوا عيش......
مش لحمة....لا...عيش
طبعا واحد فيهم اخد مكان التاني....مستعجل عشان يأكل عياله
عيالة جعانة....التاني مسك فيه...برضو عيالة جعانة...واحد فيهم قتل التاني
قتله عشان يأكل عياله عيش
يرضي مين دا يا مسلمين
يرضي مين شباب وبنات البلد بيحتفلوا بعيد ميلاد قسيس والناس بتموت بعض علي رغيف العيش
يرضي مين يا مسلمين الناس ترقص في الشوارع عشان المنتخب كسب وناس مش لاقية تمن الدوا
يرضي مين يا مسلمين قولولي يرضي مين
يرضي مين كلاب الخليج يعملوا حفلات تكريم للمنتخب ويلموا مطربين الوطن العربي ويدفعوا ملايين
والناس بتاكل في بعض
يرضي مين اب يعمل نفسه انه مش بيحب البيض ويجيبه لعيالة بعددهم ويحرم نفسه منه....وهو نفسه فيه
عشان يوفر تمن بيضة....بيوفر تمن بيضة
دي قصة واقعية اتحكت ادامي
البلد كافئة لاعيبة المنتخب بكام
واللعيبة ديه اساساً عندها فلوس اد ايه
وكلاب الاعمال ...قصدي رجال الاعمال اتبرعوا بهدايا اد ايه عشان خاطر لاعيبة المنتخب
لالالا...مش فلوس رجال الاعمال جبوها منين
عز الحرامي جاب فلوسه منين
من دم الناس الغلابة
ربع الفلوس ديه كانت تنيم ناس كتيرة جدا شبعانة
دا حقهم مش هيتجبوا عليهم
إذا كان الوضع هيبقي بالشكل دا...يحرق المنتخب بجاز وسخ
هي ديه مصر؟؟؟
مصر بقي لونها أحمر خلاص
مزيج بشع من الاوان الحمرا بكل درجتها
لو رسمنها صورة هتبقي بالشكل دا
بركة دم كبيرة اوي مليا الارض...عليها ناس بترقص ورافعين علم مصر....وناس تانية بتمارس الفاحشة وملفوفين برضو بعلم مصر...بحيبوا بعض في عيد الحب
ودم الغلابة اللي في الارض مغرقهم ....
زي كدا افلام آكلي لحوم البشر
لا حول ولا قوة الا بالله
معلش ....انا كتبت الموضوع وانا حاسس بكلامة لأني امبارح كنت راجع ما يعلم بيا غير ربنا
محدش يزعل لو ضايقه لفظ او جملة اويزعل من عصبيتي في الحوار
بس ملقتش مكان افضفض فيه واصرخ زي هنا
يمكن النار اللي جوايا تبرد شوية
جزاكم الله خيرا

الثلاثاء، 12 فبراير، 2008

تاجين

السلام عليكم
عشان نخلص الديون اللي علينا كدا ونبقي في السليم هنجاوب علي التاجين اللي اتبعتوا من اجدع بنوتة
الاجابات هتبقي...حادة ...وقاطعة...وسريعة
اللي دخل الجيش هو اللي يعرف يعني ايه حادة وقاطعة وسريعة
نبدأ علي بركة الله
الاول
-----
هل توافق على حذف خانة الديانة من البطاقة الشخصية ؟
لا طبعاً...امال هتجوز ازاي

.ما رأيك فى المثليين ؟ هل هى حرية شخصية ؟
هل توافق على الإعتراف بالمثليين ؟ هل لديك أصدقاء من المثليين ؟
ادخلوا هنا وهتعرفوا رأيي بصراحة في كل حاجة
جاتهم القرف

هل تعتقد بوجود إضطهاد للمسيحين فى مصر ؟
إسألوهم إن كانوا ينطقون
من هو الشخص الذى تختارة لرئاسة مصر ؟
زكي جمعة

أذا قمت بتأسيس حزب سياسى
من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟
سيد مدبولي
ابراهيم عبد المنعم
كمال السيد جابر
محمود عطا ابو المكارم
.
.
.
هما مين دولة؟؟؟

هل توافق على مشاركة كل من : الإخوان المسلمين - الأقباط فى الحكم ؟
لا طبــــــــــــعاً
ومن غير ليه
فى رأيك الشخصى .. ما هى أفضل مدونة على بلوجر قمت بزيارتها ؟
كل مدونة بدخلها وبكتب فيها رد اشكر صاحبها
لأن جمال المدونات بيبقي نسبي...يعني كل مدونة جميلة في إتجاه معين مينفعش يبقي في مقارنة بينهم

هل توافقين على الزواج من رجل مطلق ؟
بسم الله الرحمن الرحيم
الاسم محمد
النوع ذكر
أيهما تفضل كزوجة .. امرأة عاملة ، أم ربة منزل ؟
الاتنين
اذا تزوجت وأنجبت ولدين وبنتين .. أى الأسماء تحب أن تسمى ؟
ولدين................ وبنتين؟؟؟ يعني 5 عيال؟؟؟
الله يعطينا العافية

هل تعتقد أن توريث الحكم فى مصر . . سيتم فعلا أم لا ؟
لا يعلم الغيب الا الله

.فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟
نو كومنت
----------------
الثاني
دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟
الطريشة
كنت تفضل الدخول مستقل او تتبع حزب معين ؟؟؟؟
اعملي حزب في السريع وادخل بيه...بس يكون مرحرح شوية كدا عشان التسلخات
اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
هو دا هيبقي بمزاجي يعني؟؟
يعني هما هيسبوني اختار ؟؟
ايه اول حاجه هتعملها لنفسك ولاسرتك ؟؟؟؟؟
اول حاجة هعملها نفسي هخصخص قناة السويس عشان اصطاد فيها براحتي من غير تصريح
اما بالنسبة لأسرتي فهجبلهم سندوتشان كفتة


ايه المشروع اللى ناوى تعمله لاهل دايرتك ؟؟؟؟دون ذكر اسم الدائره ان اردت

بلاي إستيشن

قدمت سؤال للحكومه ايه هو السؤال ؟؟؟؟؟
صفوت الشريف بيشتغل ايه بالضبط؟؟


استجواب لوزير ؟؟؟ وليه؟؟؟
هستجوب كل الوزراء
بس تفتكروا هيبقي منه فايدة؟؟
هل انت مع الخصخصه ؟؟؟؟؟؟
لو رحتوا شفتوا مكاتب العمل اللي في مديريات القوي العاملة هتكرهوا الكلمة ديه اوي

هل انت مع قطع العلاقه مع اسرائيل ؟؟؟؟؟
لا طبعاً
لازم تبقي في علاقات مع إسرائيل...بس لازم العلاقات ديه تبقي منيلة بستين نيلة وزي الطين

هل تؤيد الحرب على العراق ؟؟؟؟؟؟؟؟
هو حضرتك مين بالضبط؟؟؟
.هل تؤيد مرور الامريكان فى القناه ؟؟؟؟؟؟
طبعاً يمروا...بس بشرط...نرمي عليهم نابلم من فوق كوبري السلام

.بتمرر التاج ده لمين ؟؟؟؟؟؟؟؟
علي ما اعتقد إن كل الناس اخدته
بس تقريبا بتوع اسماعيلية مخدهوش
يبقي يروح لأهل اسماعيلية

الأحد، 10 فبراير، 2008

تدوينة خاااااااصة جداً


السلام عليكم

زي ما قلتلكم يا جماعة إن الموضوع دا هيبقي جزء بسيط أوي من رد الجميل لكل إخواني وأخواتي في عالم التدوين
ويمكن لتقارب فترة دخولنا عالم التدوين ممكن نقول إن كلنا بدأنا مع بعض ..
في ناس بدأت قبلنا بشهور قليلة وناس بدأت تدوين بعدنا برضو بشهور قليلة
بس في الغالب هنلاقي إن عمرنا التدويني متقارب
حلوة عمرنا التدويني ديه
تصدقوا بقي طلع ليها معني كبير أوي وانا بفكر فيها دلوقتي؟؟
تخيلوا إن ممكن واحد يعتبر حياته وتدويناته عمر تاني خالص وحياة تانية خالص
أصدقاء وأخوات وبرضو أعداء موجودين معاك في عالم التدوين
دا حتي الشوااااااااااذ بقي ليهم حتة من الكعكة زي ما بيقولوا.....بس حتة حمضانة وريحتها وحشة
نرررررررررجع تااااااااااااني لموضوعنا...علي رأي الشاعرة الجميلة ايمان بكري
فاكرين يوم 22/4/ 2007
اللي يفتكر التاريخ دا أول ناس عرفتهم عن طريق التدوين
انا خايف انسي حد فيهم عشان كدا مش هقولهم
بس دا اليوم اللي كنات رايح فيه كلية الضباط الاحتياط تفاصيله كلها موجودة في موضوع اتكتب بنفس تاريخ اليوم....المهم
لقيت إحساس جميل أوي من ناس جميلة أوي
كأن اخوهم هو اللي ماشي وسايبهم
ومخبيش عليكم انا قلت في نفسي لما ارجع مش هلاقي حد فاكرني...بالمنطق كدا شهر ونص قافل المدونة ...الناس هتزهق وهتمشي
بس لما رجعت لقيت المفجأة الجميلة...
لقيت ناس مدونة يوميتها عندي في الردود وبيحسبولي هرجع امته
تخيلوا بقي في ناس ممكون تقابلوهم اجمل من كدا؟؟
والناس ديه فضلت معايا طول الفترة اللي فاتت كلها بالسؤال والتشجيع والشد من أزري
لدرجة إني كنت بنزل الأجازة اللي كانت غالية أوي...أول حاجة كنت بعملها إني أفتح البلوجر....
ويمكن بيكون شغلي الشاغل أول ما أرجع من الأجازة هو البلوجر
عاوز اقول للناس كلها اللي بتشرفني وتعطيني قدر اكبر مما استحقه بدخولها مدونتي كلمة شكر وعرفان
كل اخ او اخت انا مدين ليه بحجات كتيرة اوي
سعات كتيرة مبعرفش ادخل كل المدونات اللي اعرفها لضيق وقتي وربنا اللي يعلم
وسعات أقرأ ومبعلقش علي المواضيع....انا عاوز اقول للناس ديه انا متأسف والامر دا بيبقي خارج عن إرادتي

يا جماعة انا بتشرف اني ادخل مدوناتكم واتصفحها...انتم كلكم ناس جميلة اوي والله...

وربنا اللي يعلم قدركم عندي اد ايه

مهما قلت ومهما عملت لن اوفي جزء صغير مما تستحقونونه

جزاكم الله خيرا...........




------------



ملحوظة
هذا الجزء وثائقي يحتوي علي بعض الصور...وسوف يتم تحديثة يومياً إن شاء الله حسب وصول الصور من المصادر المختلفة
\\\\\\\\\\\\\\\\\\\\\\\\\\\\\\\\\\\\\\\\

امبارح كانت حفلة التخرج بتعتنا
عدي تقريباً 9 شهور ونص وانا هناك...
مش هقدر اقول عليها إنها كانت ايام وحشة...ولا ايام حلوة
المهم إنها عدت وخلاص
وكان آخر ما فيها هي الدموع
عارفين دموع ايه يا جماعة؟؟؟
لالالا...مش دموع الفرحة.....دموع الفراق

الموضوع طلع صعب أوي وأصعب مما كنا نتخيل
ناس من كل حتة في مصر بيشاركوك كل حاجة في نفس الوقت
كانت عنينا بتغمض في نفس الوقت...وبنصحي في نفس الوقت...بنرفع المعلقة وناكل في نفس الوقت
هناك كل حاجة بتبقي في وقت معين ...
يعني النوم والصحيان بيبقوا بوقت...والاكل برضو بوقت
والله يا جماعة حتي الحمام كان بالوقت لو مش هتصدقون
ييعني بناكل ونشرب وننام ون......في وقت واحد
ولصعوبة الفترة اللي أحنا دخلنا فيها....فترة الصيف والحر....حصل بينا حاجة جميلة اوي
زي ما يكون حر الصيف دوبنا كلنا وطلع مننا شخص واحد فيه كل الصفات الحلوة
كان اللي يقع مننا او يتعب كلنا بنحس بيه ونتعب معاه
مش لاقي اي كلمة أوصف بيها اللي كان هناك
انا كتبت موضوع اسمه هكذا الدنيا

كنت زعلان فيه من جفاء الاصدقاء وعدم السؤال والاهتمام ببعض

لا ياجماعة....في صداقة وفيه أخوة في الله جميلة أوي
الموضوع دا انا بعتزر عنه وبقول ان في حجات كتيرة أوي مش مظبوطة
ـــــــــــــــــــــــــــــــــــــــــــــــــ

دي بعض الصور ليا وللناس الجميلة اللي عشت معاهم اجمل ايام حياتي بلا مبالغة

يمكن اول مرة حد يشوف صوري علي البلوجر ....بس الموضوع دا مش للبلوجرية فقط....دا لأصحابي وأخواتي في الكلية


______________________

قبل ما ادخل الجيش بشهر كنت عامل كدا


--------------------


بعد الجيش بشهر ايام الزيارات ....كنت عامل كدا...تاني واحد من اليمين



شايفين الشمس بتعمل ايه



----------------


يوم الحفلة بقي





من اقصي اليمين


محمد عواد - فتحي الوكيل(الانتوخ)- مدحت -ابو صابر-ايمن-احمد الشاعر



وفي الاسفل ايهاب (الفتي الاسواني اللذيذ) من اقرب الشخصيات الي قلبي

---------------




برضو من اقصي اليمين


عاطف (المهذب)-ابو صابر-احمد عمار-ايهاب

احمد الشاذلي-محمود ابو الفتوح (رقيب اول السرية) اخف دم وقوات جوية زيي
-------------------
محمد حنفي (انسان يندر تواجده في هذا الزمان)-مدحت-سيد (احبه في الله)-ابو صابر-ايهاب
ايمن
-------------------




انا مع من بكت عينايا بحق وأنا أودعه....فكان له معزة خاصة في قلبي

الفتي احمد عمار....بكلوريوس هندسة قسم سيارات....من محافظة بني سويف

--------------

من اقصي اليمين هنااااك

عبد الله -محمد النحاس (صديقي الانتيخ )-احمد عبد الرحيم (كركر)-حازم (المؤدب)-سامي (الاساوني)- تامر (اللي كنت زعلان معاه)- ابو صابر- ابو زيد

من تحت

وائل(الواد الجدع)-ايمن-محمد فرح (كتكوت ضعيف الجناح) وبس

--------------------

مع قائد السرية النقيب بيومي وجيه الدين

قائد خفيف الدم ...هو ضخم اوي بس جدع اوي

وشاطر اوي....كان الاول علي دفعته في الكلية الحربية الدفعة 94

واللي واقف معانا دا انا معرفهوش

----------------

مع الطالب عصام (المحترم والمهذب جدا جدا جدا ) من الدفعة المستجدة اللي بتستلم مننا الكلية ...الدفعة 133

ربنا يكرمهم ويوفقهم إن شاء الله ويخلصوا علي خير

وفي إنتظار وصول صور جديدة

السبت، 9 فبراير، 2008

ولله الحمد..تمت علي خير

السلام عليكم



الحمد لله.....خلصت علي خير واتخرجنا

والتفاصيل بعد قليل

الجمعة، 1 فبراير، 2008

اهو كلام والسلام

السلام عليكم


كيف حالكم يا إخواني وأخواتي في الله؟؟

والله والواحد نفسه مسدودة من اللي بقي بيحصل وقرفان من كل حاجة

الآف الأسر والأطفال مشردين في عز البرد في غزة....إختراق المعبر...نقص المواد الغذائية وإستغلال الناس والجشع بتاع التجار

ومن الجانب الأخر ترويج دولارات مزيفة من قبل بعض الفلسطنيين من ذوي النفوس الضعيفة اللي دخلوا في وسط الناس وفي الزحمة

محدش بقي عارف حاجة....

ليس بأيدينا إلا الدعاء لأخواننا ....شعب كتب عليه التشرد من سنة 48...حسبنا الله ونعم الوكيل


دخلت اكثر من مدونة ولقيت الموضوع متناول من قبل إخوة كتير بوجهات نظر كتيرة أوي منها ما أتحفظ عليه ومنها ما أوافقه....يعني كلامي مش هيودي ولا هيجيب....أصل الكلام بقي كتير أوي .....والمواضيع بقت علي قفا من يشيل.....

اللهم إنا نسألك نصر من عندك تشفي به صدور قوم مؤمنين


---------------------------

كلمة ورد غطاها


النت قاطع.....

ماشي...وايه يعني

الحياة تصاب بالشلل...

ينهار ابيض...ما الناس حلويين اهم وكويسين أبويا قاعد بيشرب شاي وبيتفرج علي الماتش وأمي بتحل الكلمات المتقاطعة....مفيش جديد يعني

البحث عن حلول سريعة لإستعادة جزء من السرعة.....

فيهم الخير والله....الناس ديه بتتعب أوي

إستعادة كفائة النت بنسبة تتجاوز ال 80%.........

علي يددددددددددددي

بعض الشركات تستخدم الطرق القديمة و التقليدية لحل مشكلة إنقطاع النت....

من فات قديمه تااااااااه

تعويض مستخدمي الانترنت عن شهر بسبب الاعطال.....

لما نشوف


سبحان الله.....ومن العلم ما قتل

-----------------------------------------


الفراغ بقي واللي بيجري فيه


فتحي ومحمد ويوسف ووائل وايهاب.....قاعدين بيحكوا مع بعض عشان مش وراهم حاجة في كلية الضباط الاحتياط

أصل الجو برد والرايح والأمطار والعواصف جت فايدة وراحة وأنتخة للناس

الكلام كان عن الخطوبة والجواز

فتحي شاب محترم يملك من العمر 28 سنة من مدينة( المنزلة) اللي تبع محافظة الدقهلية خريج هندسة

إتقدم لبنت ناس طيبين ومحترمين وكتب كتابه ومستني الدخلة

طيب وبعد الجيش يا باشمهندس فتحي هتعمل ايه؟؟

رد بحيرة وقال مش عارف....بس ربنا ييسر إن شاء الله والاقي شغل

وائل (اللي من حلوان) سأله بواقعية طيب لو ملقتش شغل هتعمل ايه؟؟

يرد فتحي ويقول والله الناس محترمين ومتمسكين بيا ومعايا للأخر ودا اللي مشيلني الهم ومحسسني بالمسؤلية

يوسف (اللي من طنطا) يعترض علي سؤال وائل ويقوله أهم حاجة الشخص اللي متقدم ...الراجل دا محترم والا لا...مش مهم بقي بيشتغل ايه....أهم حاجة أخلاقه ودينه وأصله الطيب

أكيد هيشتغل إن شاء الله ...

للعلم كل الناس اللي قاعدة خريجين هندسة

يرد ايهاب (اللي من اسكندرية) لالالا يا جماعة لازم الاخذ بالاسباب...الشغل مهم ...ايه اللي يضمن انه يشتغل بعد الجيش....انا من رأيي انه يلاقي شغل الاول وبعدين يتجوز....طبعاً ايهاب بيتكلم علي المبدئ مش علي فتحي....يعني كلامه بصفه عااااامة

وانت يا ابو صابر (اللي من اسماعيلية) ايه رأيك في الكلام دا...؟

يرد ابو صابر ويحكي عن موضوع حدث بالفعل معاه وفشل موضوع خطوبته لبنت كويسة بسبب ان لسا مشتغلش في شغلانة ثابته ومش عارف مصيره بعد الجيش....

مع العلم بتوافر الامكانيات المادية ووجود شقة محترمة بفضل الله

يرد يوسف بسرعة:

عشان انت اخترت غلط...ودخلت البيت الغلط

ايهاب يعلي صوته ويقول:

لا....هو مدخلش البيت الغلط....من حق أي أسرة إنهم يخافوا علي مستقبل بنتهم ....ودا يا جماعة أسمه الاخذ بالأسباب

وتفرق الموضوع ما بين معارض للأرتباط الرسمي في هذه الفترة وما بين الموافق


ودي مشكلة ناس كتيرة أوي وشباب كتير.....المانع ممكن يكون الجيش...او إنه بيشتغل في شغلانة مش ثابته ممكن يسبها في أي وقت

طيب الحل ايه؟؟؟

نقعد ونستني لغاية لما نلاقي شغلانة ترضي الناس.....؟؟

والا في ناس ممكن تجوز بناتها لشخص محدود الامكانيات المادية لمجرد إنه علي خلق ومحترم

وهل لو أهل البنت عندهم خيار بين واحد جهاز ماديا ومعندهمش ثقة في أخلاقة وما بين واحد مش جاهز ماديا بس واثقين في اخلاقه

يا تري هيختاروا مين؟؟


يقول رسول الله صلي الله عليه وسلم

( إذا أتاكم من ترضون دينه وخلقه فأنكحوه )


بس بيني وبينكم....الحياة من غير مسؤلية جميلة ....



----------------------------------------------


انتظروني الاسبوع اللي جاي يوم السبت 9/2/2008

حفل التخرج

اخيييييييييييييراً

وبما انكم كنتم معايا لحظة بلحظة من يوم 22/4/2007

من يوم الرحيل

هيكون موضوع شكر ليكم كلكم


ادعولي بقي إن اليوم يعدي علي خير .....اشوفكم بعد يوم 9/2