Translate

الأربعاء، 26 مارس 2008

انت فكرني هندي؟؟

السلام عليكم


ازيكم وحشتوني....معلش يا جماعة أنا بغيب كتير بس والله مش بأيدي

وعارف إني مقصر معاكم...بس أنتم عارفين الظروف بقي

إن شاء الله هنتظم معاكم في المواضيع الفترة اللي جاية

يعني يوم الثلاثاء هيبقي لعائلة الفسافيس

...ويوم الخميس هيبقي للمدونة الاصلية كفاية موضوعين في الاسبوع عشان نعرف نركز مع الناس التانية



المهم بقي وانا راجع اسماعيلية أمبارح حصل موقف في البولمان عاوز اتكلم معاكم فيه

ونشوف أد ايه أحنا بنتقدم علي شعوب العالم....

انا بركب من موقف الماظة في القاهرة...بركب أتوبيس شرق الدلتا

الشركة المحترمة المنضبطة اللي ماشية زي الساعة

أوم أيه بقي اللي حصل

كنت حاجز علي معاد الساعة 4....طبعا الأتوبيس جه في المعاد بالضبط...جه الساعة 4 ونص

ودا يعتبر إنجاز غير مسبوق إن الاتوبيس يتأخر نص ساعة بس عن معاده

معلش أصله بيطلع من الترجمان ويعدي علي التجنيد ..المشاور طويل ومحدش عارف ظروف الطريق جوا مصر المحروسة بتبقي عاملة أزاي

طلعت الاتوبيس وقعدت علي الكرسي بتاعي اللي عليه رقمي والحمد لله لقيته فاضي

ماشي...إيه الغريب بقي اللي حصل ومخليك راكب فوق ودنا وعمال ترغي يا أبو صابر...

الناس مش فاضية

أستنوا بس..أنا جيلكم أهوه....لقيت واحد ملامحه هندية واقف محتاس في ممر الاتوبيس وعمال يروح ويجي زي السنجاب اللي محبوس في قفص مصدي

مركزتش معاه وانشغلت بنفسي

الهندي طلع أدام وماسك التزكرة في أيده ومن غير أي كلمه مد أيده بالتزكرة للسواق

السواق أخد التزكرة و بص فيها وبكل ثقافة وأدب قاله

your seat number is 25

الهندي أخد التزكرة وقعد يبص علي الأرقام اللي كانت مكتوبة بالعربي علي الكراسي زي التزكرة بالضبط....وبمساعدة الركاب وصل للكرسي بتاعه

والمفجأة بقي (هي بالنسبة لينا في مصر مش مفجأة) كان الكرسي مشغول...عليه راجل محترم هو وزوجته

الهندي رجع احتاس تاني وراح للسواق يشاورله زي بتوع الصم والبكم

السواق قام معاه لاقي الكرسي بتاع الهندي عليه اتنين ركاب (صاحب السواق وزوجته) السواق قاله

i am so sorry this is my friend and his wife....

i can find another place for you,, come with me

الهندي راح معاه وهو مغلوب علي أمره ومن غير أي كلمه

السواق بص يمين وشمال ملقاش كرسي فاضي غير الكرسي اللي جنبه

كرسي الكمسري أو المضيف وقاله

this is a very nice place

قال هندي بقي ومش فاهم...أضحك عليه

بس الهندي مطلعش أهبل وقعد...رفض ونزل يشتكي

السواق طلعه ...وصمم أنه يقعد في مكانه اللي حجز عليه

ومهتمش بمجاملة السواق لصاحبه اللي ركّبوا وقّعدوا هو وزوجته في مكان مش بتاعهم ومعاد مش بتاعهم اساساً

بس شهامة الشعب المصري الجميل لعبت دورها وقام متطوع من الركاب بإخلاء مقعده وجلس بجوار السواق علي الكرسي الذي رفضه الهندي

وقعد الراجل اللي راكب بدون وجه حق هو وزوجته علي كرسي هذا الشاب الشهم


شوفوا بقي المواقف اللي طلعت من الموضوع دا عشان نعرف إن المنظومة منحلة من الاساس
ازاي واحد يطلع يركب في مكان مش مكانه مع إن الاتوبيس كامل العدد

إزاي تجبر واحد حاجز ودافع فلوس (مهما كانت جنسيته) يقعد في مكان مش مكانه ومكان غير لائق

إزاي تشتم فيه وتقول عليه نطع وجلف عشان اتمسك بحقه (هو نطع وجلف اي نعم بس لسبب تاني)

إزاي تخلي الهندي...يقول علينا متخلفين.....

تخيل بقي لما يكون واحد بيعبد بقره او عمود نور او كوتش عربية يقول علينا احنا متخلفين..

هو اكيد قالها في سره طبعاً


بس في بقي حاجة تاني ممكن نلاقيها في الموضوع دا

حاجة موجودة في الشعب المصري ومش موجودة عند غيره

الشهامة والجدعنة ممكن نكون ركبنا الغلط من فوقنا لتحتنا...ونتيجة الغلط دا بنقع في مواقف صعبة كتيرة اوي...بس بطبعنا المواقف ديه بتتحل

سبحان الله

تركيبة عجيبة من الصفات

وعلي فكرة...احنا مش هنتغير أبدا....لا في الحلو....ولا في الوحش

اتعودنا خلاص
طيب انت مصدعنا ليه.....؟؟؟اهو كلام والسلام...حبيت ارغي


وعلي رأي المثل

اكفي القدرة علي فمها...يحتار عدوك فيك


-------------------------------



دبوس الناهرده


طبعا كلنا عرفنا اسعار الذهب وصلت لأيه دلوقتي

الدبوس دا للأخوات المقبلات علي الزواج

ياريت تبقوا كويسين كدا وترحموا الشباب اللي كل ذنبه انه عاوز يتجوز ويعف نفسه

بلاش الطمع والعنطظة الفارغة....

لما تطلبي شبكة ب20 وب 30 وب 50 الف جنيه دا عيب

ميصحش...في الاخر انتي اللي خسرانة عشان مش هتلاقي حد معاه الكلام دا....اه..في ناس معاهم

بس السواد الاعظم بيكح تراب

قولي لبابا ولماما ارحموا الناس شوية....محدش هياكل وشكم عشان بنتكم مجلهاش شبكة ب 50 الف جنيه

الناس مش هتقول دوله باعوا بنتهم....بلاش ادوس اكتر من كدا في الكلام عشان هيبقي فيه تجريح والحوار هيبقي شديد اللهجة
بس عاوزكم تدخلوا عند مهند وتشوفوا الموضوع دا






انا عارف إن في معارضة من الناس لهذا الامر....وبيقولوا إن بناتهم مش رخيصة عشان (يترموا) ببلاش

معاهم حق طبعاً..

بس ياريت بعد كدا متجوش تعيطوا وتقولوا بنتنا فاتهم سن الجواز...وترضوا بأي حد..وبأي حاجة...وبنتكم تتبهدل
ربنا يهدي

الاثنين، 17 مارس 2008

زي الناهرده....أول شمعة

السلام عليكم ورحمة الله وبركاته



زي الناهرده من سنة بالتمام والكمال ابو صابر قام وقعد وانتني واتفرد وفتح مدونة علي البلوج سبوت

طيب ليه الاذي دا بقي؟؟
مش عارف والله بس هي جت كدا بقي

بصراحة مكنتش عامل المدونة للتفاعل مع الناس خالص

كنت عاوزها كدا بعيد عن الدنيا والناس
هناك...خلف التلال...تحت ضوء القمر مع اصدقائي اللي نسيتهم من زمان ومعدتش بجيب سيرتهم بسببكم انتم


انتم شغلتوني عنهم

ودخلت تاني الدنيا البشرية بكل ما فيها من مشاكل وشد وجذب

اتكلمنا في حجات كتيرة اوي...

في كلام كان بيزعل الناس مننا

بس الحمد لله مكنتش لأهداف شخصية

كانت مواضيع لازم تتناقش بشدة وبحدة....وربنا اللي يعلم النية كانت ايه

ربنا يرزقنا الاخلاص في القول والعمل




طبعا كان أول تعليق في مدونتي للأستاذة نادية طه (حورية)...




بدأ معايا في نفس الفترة ناس في رحلة التدوين

في نفس الاسبوع تقريبا كان مهند وخمسة فضفضة وبعدينا بشوية كانوا

The Road To Nowhere

وبعدين رينا استقلت بمدونة لوحدها
وقبلنا بشوية كانت جهينة دوي الصمت و شيماء همسات دافئة و عالمي ازرق




وبشوية كتار بس مش اوي كانت سارة وبلاعة الحكومة




والاستاذ عصفور المدينة اللي كلنا بنعتبره الاستاذ والمعلم لينا في عالم التدوين كان صاحب بصمة في كل المدونات




وبيكون شرف لصاحب المدونة تعليقه فيها




وناس كتيرة اوي محترمة عرفتها بعدين

زي
رفقة عمر
أنور(حكاوي)
مجداوية
مني- احاسيس
مؤمنة

وطبعا رجالة اسماعيلية





يااااااااااااه ناس كتيرة اوي
انا عارف اني نسيت ناس كتيرة تانية

محدش يزعل مني بالله عليك

واللي هفتكره هضيفه عندي عشان الموضوع دا وثائقي برضو
ناس عاشت معايا مواقف كتيرة ...كأني اخوهم

غبت ورجعت وسفرت ومشيت...ولسا برضو مع بعض والسؤال دائم بلا إنقطاع

فرحوا معايا...يوم ما فرحت...وقلقوا عليا يوم ما بعدت

يااااااااااااااااا

بجد مواقف وأيام وزكريات دلوقتي جميلة

عاوز أقول للناس ديه كلها جزاكم الله خيرا

اه..قٌبل ما انسي ...بمناسبة مرور سنة علي إنشاء المدونة هضيف بعد إذنكم مدونة تانية جديدة
انا عارف إني زودتها...وهينطبق عليا المثل اللي بيقول سكتناله دخل بحماره
المدونة هتبقي عبارة عن يوميات خفيفة لأسرة مصرية
خلوا بالكم هي مش حكاوي وخلاص
دي هتبقي كدا زي أسلوب



دس السم في العسل



يعني عاوزين نقول من وراها حاجة كدا....من غير لت وعجن...تعالوا ندخل ونشوف عائلة الفسافيس ديه عاوزة ايه وهما مين اساسا



اتفضلوا اتقضلوا...دوسوا علي الصورة




-------------------------------------------------
زي ما اتعودنا في اخر كل موضوع


لالالا..المرة ديه مش دبوس


هو رجاء زطلب صغير للاخوة والاخوات المدونين

وممكن نقول عليه دبوس تدويني شوية

بقي في يا جماعة عدد كبير اوي من المدونات

ماشاء الله حاجة جميلة

بس مع عدد المدونات الكتيرة مش مش بنلحق نتابع كل المواضيع

ياريت نقلل من عدد المواضيع المضافة في الاسبوع

عاوزين نعرف نتابع....

وفي نفس الوقت انا بلاحظ ناس كتيرة بتقرأ اول سطرين وآخر سطرين من المواضيع ويكتبوا تعليقهم

بيبقي واضح اوي من تعليقه إنه مقرأش الموضوع

ياريت نعمل حساب الحجات ديه حتي لا يفقد التدوين رونقه وهدفه

وجزاكم الله خيرا

الخميس، 13 مارس 2008

السعادة


السلام عليكم

كيف الحال يا شباب....يارب تكونوا ديماً في خير وسعادة



حبيت ادردش معاكم كدا في موضوع احنا محتاجينه كلنا
موضوع السعادة.....بقت صعبة اوي اليومين دوله.....
معاكم حق والله....هو بقي في ايه يفرح في حيتنا
المسلمين اللي بيتقطعوا في غزة وفي كل حتة في العالم
والا رغيف العيش اللي بقي الحصول عليه اصعب من الحصول علي الفيل الاحمر اللي بيطير تحت المية
والا ارتفاع تمن الزيت والسكر والسمنة والحديد.....طن الحديد بقي مش عارف بكام؟؟ اسهل اننا نزرع سبانخ ونعصرها ونطلع منها الحديد
والا مشكلة الحضري وفضيحة الاهلي اللي بقت علي كل لسان (علي رأي ابو منص)
يعني مشاكل كتيرة لو قعدنا نعدها مش هتخلص

بقت الدنيا دمها تقيل اوي....والناس مفتقدة حتة السعادة
عارفين ليه الناس مش لاقية السعادة؟؟
عشان هما بيدوروا عليها في مكان غلط
ايه الفوازير ديه يا عم انت؟؟؟
ايوة محدش هيلاقي السعادة لو دور عليها بالطريقة التقاليدية بتعتنا
هوضحلكم اكتر
ايه هو احسن وأأمن مكان المجرم ممكن يستخبي فيه من الشرطة؟؟؟
ايوة صح...قسم الشرطة نفسه
يبقي الشرطة هتموت نفسها وهي بدور علي فلان ده وهو مستخبي عندها ومش هيخطر ببالها ابدا انها تدور جواها

السعادة يا اخواني جوانا احنا...((((كمسلمين))))....ربنا رزقنا بالسعادة وزرعها جوانا...بس للأسف احنا بندور عليها في حتت تانية


بندور عليها في ماتش كورة...في فيلم...في خروج وفسح....في فلوس ...في سفر ...في تغيير عربية موديل السنة...في موبيل تمنه 3000 جنيه

طيب هو لو انا عندي الحجات ديه كلها وبعمل الكلام دا كله هبقي سعيد؟؟؟

لا طبعاً...والدليل علي كدا الناس بتاعت سويسرا اللي بينتحروا إنتحار جماعي

ادينا قربنا شوية...خلينا نقرب كمان ونقول حاجة جميلة اوي

هنقول إن السعادة زي الجمال
والجمال نسبي....يعني مفيش حاجة اسمها فلان جميل ومفيش حاجة اسمها فلان وحش - بنتكلم علي الشكل
تلاقي واحدة لا مؤخذه شبه الصندل و في شباب مموتين نفسهم عليها وبيعيطوا من حبهم ليها
اللي بيحبها دا شايفها جميلة في نظره....مع ان في ناس تانية شايفين إنها مش حلوة

اهو السعادة زي كدا بالضبط....ممكن تكون سعيد بحجات ناس تانية غيرك يستغربوا انك سعيد بالحجات ديه ازاي
وهما عندهم كل اساليب السعادة (الدنيوية) مش حاسين بيها
والسؤال ..... امتة بتكون سعيد او تحس بالسعادة
الاجابة كلمة واحدة بس......

عارفين ايه هي الكلمة ديه؟؟؟

الرضي..... السعادة في الرضي
نشرح ونوضح
احنا ليه ديما بنحب الرسول صلي الله عليه وسلم شفوي؟؟
ايوة بنحبه شفوي...يعني بنقول إننا بنحب النبي صلي الله عليه وسلم بللسان وليس بالفعل
ولما حد يقولنا حاجة من سنة النبي .....نقول اصل مش لازم نعملها عشان هي سنة
وكأن السنة ديه حاجة مكتوبة في الكتب بس و من حقنا إننا منعملهاش
وتيجي تكلم واحد في امر من اوامر الله عز وجل ورسوله تلاقيه اتنحنح كدا وعدل نفسه ويقول اصل الموضوع دا سنة مش فرض
اهو الرسول اللي بتدعي حبه حط في ايدك مفتاح السعادة الابدية
يقول الرسول صلي الله عليه وسلم
ارضي بما قسمه الله لك تكن اغني الناس
والله الذي رفع السموات بغير عمد السعادة والغني في الرضي بما قسمه الله لعبده
طيب والرضي دا هيجي منينن؟؟
الرضي دا هيجي لما تغتنم من الكنوز التي لا تعد ولا تحصي....وسعتها هتحس بالسعادة

هتحس بالسعادة وانت ماشي في الشارع ورايح تصلي الفجر في جماعة وغيرك نايمين ومش حاسين - الصلاة علي وقتها
هتحس بالسعادة لما شفيافك تتقطع من العطش وانت صايم نافلة في يوم حر وتيجي ساعة المغرب تفطر علي ما رزقك الله - الصيام
هتحس بالسعادة لما تقف بين يدي الله عز وجل تصلي بالليل والناس برضو نايمة ومش حاسين بحاجة - قيام الليل

هتحس بالسعادة وانت بتقسم فلوسك وعامل حساب الفقير والسائل والمحروم فيها - الصدقة

هتحس بالسعادة لما تجيب هدية صغيرة لأبوك وأمك وتشوف الفرحة في عنيهم بالهدية حتي ولو كانت صغيرة - بر الوالدين

هتحس بالسعادة لما ترفع سماعة التلفون وتتصل بحد قريبك بعيد عليك وتقوله كلمتين حلوين - صلة الرحم

هتحس بالسعادة لما تمشي في الشارع تقارن حالك بحال من اهم اقل منك...ولا تبالي بمن هم اغني منك - التفكر والحكمة
هتحس بالسعادة وانت بتتعامل مع الناس بوجه طلق...سعيد مبتسم وكانك اغني واحد في الدنيا - حسن المعاملة
ياااااااااااااه ولسا كتير اوي
انا مش عاوز اقولكم جربوا يا جماعة....عشان لازم تعمل الحجات ديه بيقين مش علي سبيل التجربة
وقتها الدنيا كلها هتتصلح....

منين حال البلد هينصلح والمساجد تشتكي هجر المصلين??

مش بالمظاهرات والكلام الفارغ دا بتاع الاحزاب والحركات العبيطة اللي فاكرين نفسهم حاجة وهما ولا حاجة...جتهم نيلة...واللي هيكلم معنديش غير ابو صابع....
منين كلاب الغرب هيبطلوا الاساءة للأسلام ولرسول الله صلي الله عليه وسلم??
مش بالصور وحملات المقاطعة والتوقيعات يا جماعة
مقاطعة ايه اللي هتوقف الناس ديه
احنا ناس غلابة....لا بناكل زبدة ولا جبنة ولا البان مستوردة.....يعني احنا مقاطعين من الاساس
دا انا لما بشرب كوفي ميكس برمي الكيس علي باب الشقة عشان الجيران يعرفوا اني بشرب كوفي ميكس.....خلو بالكم كوفي ميكس غير كوفي عنان
مقاطعة مين ...وحدوا الله وصلوا علي النبي

بقي ملخص الكلام دا كله إن السعادة جوانا احنا وموجودة عندنا....ومفتحها برضو في ادينابالله عليكم استخدموا المفتاح ...وكفاية بقي اللي ضاع من عمرنا ولحنا في نكد وهمّ وغم ّ ومحصلناش اي حاجة غير الخسارةلسا في وقت للمكسب إن شاء الله
اللهم ارزقنا والمسلمين الرضي والسعادة في رضوانك وحب رسولك محمد صلي الله عليه وسلم
---------------------
دبوس

بناء علي إقتراح الاخت مجداوية هنعمل في نهاية كل موضوع دبوس صغيرودبوس المرة ديه هيبقي للأخوة المدخنين
مش هنتكلم علي اضرار السجاير لأن كلنا الحمد لله مثقفين وعارفينها....دا حتي شركة السجاير رسمتهلكم علي العلبة بطريقة بشعة اوي

معلش الصورة مش واضحة بس اللي عليها صورة رئة محروقة ومكتوب فوقيها :

احترس التدخين يدمر الصحة ويسبب الوفاة

واللي مكتوب تحت الصورة....سرطان الرئة بسبب التدخين

----------------


هنتكلم بس عن حقوقنا كأشخاص غلابة عاوزين يتنفسوا شوية هوا نظاف شوية

يا سيدي من حقك تشرب سجاير ....بس محبكتش بقي تنفخ في وشي دخان الزفت دا

علي فكرة أنا كنت مدخن بس ربنا تاب عليا ولله الحمد وبدعي لكل مدخن إن ربنا يتوب عليه
ياريت الجماعة اللي بيدخنوا يخدوا بالهم من الموضوع دا



ربنا يهدي