حبيبي اللي واحشني كتير(بجزززززز علي سناني).....وعلي رأي المثل اللي بيقول :
إذا كنت بعيد عن التدوين ومشغول .....بكره هتفضي وتفوق يا مذهول
الناهرده يا جماعة هنركب مع بعض آلة الزمن...وهنرجع للماضي البعيييييييد ...هنرجع للألفية اللي فاتت ونروح لحاجة قديمة اوي كان اسمها مدارس.....
زمااااااااان ايام المدارس....والمدارس يا اخواني هي جمع كلمة مدرسة....واللفظ دا كان متداول في الحقب التاريخية القديمة ....وكان بيطلق علي مبني كبير نسبياً يجمع طالبي العالم من سن 6 سنوات الي سن 17 سنة تقريباً طوال ايام الاسبوع من الساعة السابعة والنصف صباحاً وحتي الثانية ظهراً عدا يوم الجمعة اللي بيعتبر راحة
وكانت المدارس مقسمة الي مراحل....منها المراحل الابتدائية والمراحل الاعدادية والمرحلة الثانوية....وكان في حاجة جميلة اوي في المدارس اللي بكلمكوا عنها....كان كل مدرسة ليها لبس معين (يوني فورم) وكان فيها طابور الصباح والاذاعة المدرسية وتحية العلم
بعد تحية العلم الطلاب بيطلعوا حاجة اسمها الفصول الدراسية....ودي عبارة عن غرف كانت بتتسع في بعض الاوقات الي 10 أضعاف سعتها الرسمية...يعني ممكن الفصل يكون بيتسع ل 30 تلميذ ويوصل عدد التلاميذ فيه ل 300 تلميذ....ايوة يا جماعة...اصل المدارس اللي بقولكم عليها ديه كانت حاجة مهمة اوي في حياة المصريين قديماً
وكان اليوم الدارسي متقسم لحصص دراسية والحصة ديه بيتدرس فيها المواد المختلفة اللي التلاميذ بيمتحنوا فيها ...وكان في شخصية اسمها المدرس او الاستاذ اللي تحورت وتطورت وبقي اسمه (مستر)....وانثي هذه الشخصية كان اسمها أبلة وفي العصر الحديث بقي اسمها (ميس)...والاستاذ والابلة كانوا بيستخدموا وسائل تعذيب كتيرة ومتنوعة زي حاجة اسمها خرزانة وحاجة اسمها فلكة ...وكان التلاميذ بيخافوا منهم اوي وبيعملوا الواجبات بتاعتهم .....وكان فيه بقي شخصية بشعة اوي اسمها الناظر....والناظر دا راجل اصلع وبكرش ولابس نظارة كعب كوباية وشنبه منعكش وسناه صفرا ومكسره وماسك في ايده سلك كهربا 5 مم بيلوش بيه يمين وشمال...وياسلام بقي لما تخدلك منه لسعه الصبح بدري كدا ايام البرد علي طرطيف صوابعك
كنت تمشي في الشارع الصبح كل يوم تلاقي الاب او الام ماسك ابنه من قفاه وبيجر فيه عشان يوديه المدرسة اللي بقولكم عليها...والابن يعيط وبيبقي كاره نفسه ومش عاوز يروح المدرسة
يعني يا جماعة كانت كلمة مدرسة كلمة يكرهها كل ما هو دون سن ال 15
كان اجمل ايام الاسبوع هو يوم الخميس...كان ليه فرحة كبيرة اوي وكل الناس كانوا بيحبوه....كانوا بيخرجوا بالليل...وبيلعبوا كورة ويسهروا ويتفسحوا.....وكان يوم الجمعة بالليل تسمع العياط والنحيب والصراخ اللي كان بيطلع من حناجر الصغار للإستعداد لبدأ الاسبوع الدراسي تاني يوم الصبح
يااااااااااااااااااه.....الدنيا زمان كان فيها حجات غريبة اوي
دلوقتي بقي الوضع اتغير يا جماعة...التهريج بتاع زمان دا خلص....الحجات اللي اسمها مدارس ديه اتقفلت...معدش حد بيروحها طبعاً...والناس استبدلتها بالدروس الخصوصية ...وبقت المباني (المدارس قديماً) استراحات للمدرسين عشان يناموا فيها بالنهار...عشان الناس ديه شغالة دروس طول الليل وعاوزة تستريح بالنهار....وبقيت تمشي الصبح في الشارع استحالة تقع عينك علي حد لابس (يوني فورم) مدرسة...او حد ماسك شنطة فيها كتب....وبقي الاسبوع كله اجازة ....
وتطورت العلاقة بين المدرس والطالب وبقي الطالب بيضرب المدرس والمدرس بيقتل الطالب وبيتحرش بيه وحجات ومحتجات
طيب اللي احنا في دا مجمله ايه؟؟
مجمله كلمة واحدة.....مهزلة ....والله العظيم مهزلة يا جماعة
ماشي كان زمان التعليم في سلبيات كتيرة....بس دلوقتي التعليم في حالة إنهيار
ليه مخطط العملية التعليمية عندنا هنا في مصر فاشل قديماً وحديثاً...
ليه ميكنش عندنا اسلوب وسطي يحفظ للطالب كرامته وفي نفس الوقت يجبره علي احترام التعليم والتعلم
ممكن يا جماعة المدرسة يرجع ليها احترامها بتاع زمان وفي نفس الوقت الطالب يحبها ؟؟؟
والا احنا بالفعل في إتجاه خصخصة التعليم...واللي معاه فلوس هيتعلم وهيدخل الكلية اللي هو عاوزها....دا بعد إنتشار الجامعات الخاصة ومش مهم بقي انه يحترم النظام او حتي يخاف منه...اصل وقتها هيسود مبدأ (بفلوسي ياكلاب)
واللي مش معاه فلوس يتعلم صانعة عشان يعرف ياكل منها....حتي ولو هو احسن من الراجل اللي معاه فلوس
في إنتظار ردودكم وردود افعالكم وملاحظاتكم في هذا الامر يا شباب ....
الدبوووووووووووووووووووس
والله العظيم الدبوس دا ليا قبل ما يكون لأي حد
عاوزين نبقي ايجابيين يا جماعة....بقالنا كتير بنكتب وبننقد وبنهاجم وبنساند وبنأيد
بس مفيش تغيير...عاوزين نتفق إننا نغير ويبقي لينا فعالية....
مش بتكلم في موضوع معين او حالة بعينها....لا...انا بتكلم علي وجه العموم....ممكن يكون كلامي مبهم
بس الموضوع اللي جاي ممكن يوضح فيه انا عاوز اقول ايه
------------------
الموضوع اللي جاي إن شاء الله هحتفل بيه بعيد ميلاد مدونتي الثاني
وهتكلم فيه عن التدوين بشكل عام ...وعن حجات كتيرة مرت بيا في مجتمع التدوين خلال سنتين
يارب يكون اللي فات حجة لنا لا حجة علينا
استودعكم الله
