Translate

الأربعاء، 22 أغسطس 2007

كوكتيل



السلام عليكم ورحمة الله وبركاته


مدرستي


من أجمل ايام حياتي كانت فترة الثانوية العامة...عديت جنب المدرسة الناهرده وافتكرت الايام ديه...وضحكت علي مواقف جميلة...

يا ريت الزمن كان وقف عندها وممشيش

هبقي مؤدب

اوعدكم المرة اللي جاية إن لو حد شتمني هروح أتأسفله وهبوس ايدي شعر ودقن اني اتشتمت

عشان ابقي مؤدب ومبقاش همجي ..وهبطل ردح

مفروس
امبارح كملت 4 شهور بالتمام والكمال في الجيش واترقيت ومرتبي زاد 3 جنيه...يعني واد كسيب والفلوس بتجري في ايده...وممكن دلوقتي افكر اني اتجوز وأفتح بيت...أو افتح علبة سلمون

خبر سعيد
الصول مصطفي اتنقل وراح سرية تاينة (الله يكون في عونهم)....يا بركة دعاء الوالدين

مفيش احساس

واحد صاحبي قرفان ومخنوق اوي وعاوز يسيب البلد ويمشي عشان خدمة شبكات الموبيل بقت زي الزفت

امال لو دخل الجيش و اتحرم من ابسط حقوقه الضرورية كإنسان ومدخلش الحمام لمدة يومين هيعمل ايه؟؟

معلش بكره اكيد احسن
طيب هو بكره دا هيجي امته؟؟؟

----------------------------------------------------
حوار
فلان خطب الاسبوع اللي فات
بجد والله....ربنا يباركله يارب
والله شئ جميل لما الواحد يحس ان صحابه عقلوا كدا وفكروا في الاستقرار
اه طبعاً....
طيب واحنا ...مش المفروض نعمل كدا؟
نعمل ايه يعني؟؟
نبدا بقي نفكر في الخطوبة والزواج...وكدا يعني
طيب فكر هو حد ماسكك
طيب ما انا بفكر اهوه...وانت فكرت؟؟
انت شكل عندك فراغ عاطفي ومخك بدء يفوت
وانت شكلك عديم العاطفة والشمس لحست دماغك
الصول يصرخ بأعلي صوته
اقف ثاااااابت يا طالب يا منحل انت وهو وبطل كلام يا عديم الانضباط
الاتنين بأعلي صوتهم
تماااااااااام يا فندم

صفة غريبة اوي وجديدة...(عديم العاطفة)...مش مشكلة مش هتفرق معايا كتير

----------------------------------------

صورة






وكمان صورة






------------------------------------------------

النهاية


أري الدنيا لمن هي في يديه ...عذابً كل ما كثرت لديه

تهين المكرمين لها بصغر... وتكرم كل من هانت عليه

جميلة اوي...تحب تسمعها؟؟


هنــــــــــــــــــــــــــــــــــا


----------------------------------------------


هناك 42 تعليقًا:

Bossy يقول...

السلام عليكم

حمدلله علي السلامه
والف مبروك علي الترقيه بجد فرحتلك
علشان الصول مصطفي ربنا بعده عنك
الصورغريبه اوي انت جايبهم من الجيش ولا ايه
النهاية
كيف يفرح بالدنيا من يومه يهدم شهره وشهره يهدم سنته وسنته تهدم عمره
؟
كيف يفرح من يقوده عمره الي اجله وتقوده حياته الي موته

Ma 3lina يقول...

3 جنيه بحالهم

لولوللىىىىىىىىىى

طيب هما 3 بس مفيش كسور كام قرش كده و لا ايه؟؟

عديم العاطفة و عديم الانضباط كمان لا لازم تتعاج

و الف مبروك على نقل الصول مصطفى

ما علينا يقول...

السلام عليكم ورحمة الله وبركاته

الف حمدا لله على سلامتك يا محمد

احلى ايام واجمل مواقف
هي فترة الثانوي
يللا
ايام وعدت


اهو دا الادب اللي ما فضلهوش على العلم


3 جنيه بحالهم
اعرف لك ركة استثمارية
تستثمر الفائض الريب دافيها
لانهم ما يكفووش تفتح بيهم علبة سلمون


دي بركة دعا المدونين والمدونات
انت عملت حملة على الراجل


بلاش حقد الراجل
قرفان من شبكات الموبايل

وفي ناس ما تعرفش شبكات مياه الشرب لسه
ولا شبكات الصرف الصحي


انت ما تعرفش
ان سلعة العاطفة
اتضح انها مسمومة
وكل الانتاج اتسحب من السوق


سلام يا محمد
وشكرا على الكوكتيل الجميل دا

عصفور المدينة يقول...

طالب؟ هو انت داخل ظابط كمان
ربنا يعينك جيشك حلبة لسة
أعانك الله ودائما كنت وانا في الجيش أدعو اللهم فك أسري
وأدعو لك أن يفك الله أسرك

عصفور المدينة يقول...

طالب؟ هو انت داخل ظابط كمان
ربنا يعينك جيشك حلبة لسة
أعانك الله ودائما كنت وانا في الجيش أدعو اللهم فك أسري
وأدعو لك أن يفك الله أسرك

مؤمنه يقول...

السلام عليكم ورحمة الله وبركاته
الاول حمد لله ع السلام
وفرحنالك بجد بالترقيه وهجرة الصول مصطفى
ادام الله لك دوما التوفيق
والسلام عليكم ورحمة الله وبركاته

البنت الشلبية يقول...

سلام عليكم
ازيك عامل ايه واخبارك ايه
ربنا يوفقك وتخلص الجيش على خير

مبروك على المهية ههههههههههه

هاني جابر يقول...

شارك معنا وانضم الينا في لجنة الدفاع عن سجناء الرأي وحقوق الإنسان
شارك معنا بارسال حدث وتفاصيله لكي نفضح الظالمين ونفضح مهازلهم
انضم إلينا في يالا نفضحهم
www.dahayaa.com

Unknown يقول...

السلام عليكم

حمد لله علي سلامتك
معلش هنعمل ايه بس في الجيش بتاعنا؟
يخللي شوية ناس زي دول يتحكموا فيكوا معلش هما فاهمين انهم كدة بيعملوكو رجالة ومش عارفين انهم بيربولكوا العقد
ماغاظنيش بقا في الكلام ده كله الا بتاع الموبايلات ده
فايق ورايق صحيح

ياللا معلش ربنا يهونها عليكوا وهو ماعندوش حد يقولك عديم العاطفة دي
:))
أنت بس مأجل المواضيع لحد ماتخلص من اللي أنت فيه مش كدة ولا ايه؟
:))

تحياتي وربنا معاكو

شمعة أمـــــل يقول...

حمد لله على السلامه
مبروك على المهية
ومليون مبروك على هجرة الصول مصطقى
وربنا عديلك الجيش على خير

ma 3lina يقول...

الحمد لله إن الصول مصطفى اتنقل .. ألف ألف مبارك .. وعقبالك كده لما تتنقل لبيتك وتخلص فترة عقوبـ .. قصدي جيشك

كان عندي صول في السرية .. كنت بدعي كل يوم إنه ينزل أجازة أو يتنقل أو يحصل له أي كارثة .. عشان كده وقفت عند الخبر دا بالذات ..

;)

صاحبك معاه حق المفروض الواحد يفكر في الجواز .. عن إذنك بقا حروح افكر عند

سكتم بكتم

الراقـــص مع الذئـــــاب يقول...

بوسي
وعليكم السلام ورحمة الله وبركاته
الله يسلمك ويبارك فيكي
الحمد لله هم وانزاح بتاع الصول مصطفي
معلش بقي صور شدتني حبيت افرجكم عليها

كلماتك جميلة
جزاكي الله خيرا علي زيارتك وتعليقك الجميل

------------------------------

دكتورة ماعلينا
لسا هعرف الشهر اللي جاي يا دكتورة المبلغ بالضبط
بس هما 3 جنيه حلوين اوي..احنا هنطمع بقي والا ايه؟
تفتكري ان عديم العاطفة ديه عاوزة علاج؟؟؟

شرفني جدا تواجدك يا دوك
دمتي في خير إن شاء الله

-------------------------------
الاخت عموما ما علينا
وعليكم السلام ورحمة الله وبركاته
الله يسلمك ويبارك فيكي

دليني علي المشروع الاستثماري دا وانا من ايدك ديه لأيدك ديه
بس انتي نسيتي اني ملك الافكار في المواضيع ديه والا ايه؟؟
ارجعي للأرشيف وشوفي الافكار

جزاكي الله خيرا علي زيارتك الجميلة وتشريفك مدونتي

الراقـــص مع الذئـــــاب يقول...

عصفور المدينة

شفت بقي التكديرة...دخلت ضابط...علي ما اعتقد مش هتكدر في حياتي كلها اد اللي انا فيه دا
الحمد لله علي كل شئ ....
ايام وبتعدي بحلوها ومرها
جزاك الله خيرا علي كلامك الجميل وزيارتك
---------------------------------
مؤمنة
وعليكم السلام ورحمة الله وبركاته
الله يسلمك ويبارك فيكي
جزاكي الله خيرا علي زيارتك المشرفة يا مؤمنة

---------------------------------
البنت الشلبية
وعليكم السلام ورحمة الله وبركاته
انا الحمد لله تمام وزي البومب
ربنا يكرمك ويبارك فيكي
اسعتدني زيارتك يا اختي الكريمة ودمتي في خير إن شاء الله

الراقـــص مع الذئـــــاب يقول...

fanan fa2eer
وعليكم السلام ورحمة الله وبركاته
والله يا دكتورة خلاص احنا اتعودنا علي اللي بيحصل دا وبقت الحكاية مش فارقة كتير معانا
اما بقي حتة تغيير الشخصية سواء للأحسن او للأسوء فدي احنا منعرفش نحكم عليها...يمكن اللي حولينا يقدروا يقولوا كدا
واكيد انتي واحدة من الناس تقدري تقولي ان في تغيير حصل والا لا


بس انا عن نفسي مش ملاحظ بصراحة غير اني بقيت عصبي اكتر من الاول

اما عديم العاطفة ديه بقي فصفة جديدة ومميزة اوي وزي ما قلت اول مرة اسمعها
بيني وبينك انا فرحان بيها (:

اهو تغيير وخلاص

شرفتني زيارتك اوي يا دوك واسعدني جدا تعليقك

دمتي في خير إن شاء الله

----------------------------------
شمعة امل
الله يسلمك ويبارك فيكي
ربنا يجازيكي خير علي كلامك الجميل والتهنئة الحلوة
اسعدني جدا مرورك يا شمعة
--------------------------------

الباشمهندس ما علينا

3 ماعلينا بألقاب مختلفة...حرام عليكوا يا جدعان

الله يبارك فيك...إن شاء الله هخلص اول فترة من فترات العقوبة في شهر يناير اللي جاي...هانت خلاص

والله يا باشمهندس في صولات كويسة ومحترمة وبني ادمين...واحنا بنحبهم ...بيعاملونا زي ولادهم بالضبط...ودولة الكبار في السن ...اما بقي معظم العريفة اللي لسا عيال بيبقوا كلاب سعرانة
المشكلة انه عارف انه هيقف ادامي ويديني التحية بعد 5 شهور...
في دفعة من الدفعات بعد حفل التخرج مسكوا واحد فيهم وربطوه وكمموه وحطوه في الدولاب وقفلوا عليه...شفت بقي وصل الامر انهم يتهانوا لدرجة ايه

ربنا يهدي

جزاك الله خيرا علي المرور الجميل

mohand يقول...

السلام عليكم

حمدلله علي السلامه

ورجوع احمد

ومبروك ال 3 جنيه
سلفني تلاته جنيه
هههههههههههه

وسيب يا عم اللي يشتم يشتم

اصل اسلوبنا بيخلي اي حد يغلط فينا

علي اعتبار اننا اي حد معدي بنمسك في لياقة قميصه

بس تصدق انك عندك البتاع اللي قالك عليه صاحبك ده

روحت للدكتور تكشف ولا لا؟

رفقة عمر يقول...

انا كمان ايام المدرسه كانت من اسعد ايام حياتى
على فكرة الصورة الاولى صعبه قوى عملها ازاى دى
ربنا يرزقك بالزوجه الصالحه اللهم امين يارب العالمين

قطوف يقول...

عمى وعم عيالى
الله يكون فى عونك وتخلص الايام دى بدري مش عاوزين 3 جنيه دول وخلص عشان تيجى تشتغل معايا ولو قابلت بتاع شبكات الموبايل ده تانى ...........ماشى بس بجد مدونه جامده

أحمد سلامــة يقول...

حلو اوي الكوكتيل ده
دماغ فعلا
اولا مبروك التلاته جنيه
اخيرا ميرسي عالاغنية
واللي في النص بقى تهيس لا يرد عليه الا بتهييس مثله
وانا بهيس وانا ساكت بيني وبينك
-----------
هوا انت بجد اتمنيت وقوف الزمان عند ثانوي
اصلي اتمنيت وقوفه قبلها بزمن
قول للزمان وقف يا اسطى
:)
سلام

Radwa يقول...


الله بوست جمييييل اوى اوى ومهضوم كتير


معلش بكره اكيد احسن
طيب هو بكره دا هيجي امته؟؟؟
ودى بقى اجمل حاجه

عالمى ازرق يقول...

ياااااااااااه
هو انا غبت كل ده
وارجع الاقيك زدت 3 جنيه بحالهم
يلا بقي محدش هيعرف يتكلم معاك بعد كده
بس ايه اخبار الحر فى الجيش
من المتوقع والمؤكد ان مفيش مروحه
اذا كان بيوصلكوا كهربا فى الاساس يعنى
ترجع بالسلامه ان شاء الله

dr.Roufy يقول...

كوكتيل جميل
ومدونة أجمل
ويارب بقى شبكات المحمول دي تتعدل
مش معقول كدا..
الواحد بيفكر يهاجر..كنكا
:)

ftataljanna يقول...

انا سعيدة بمدونة حضرتك اوى مدونة جميلة

جزاك الله بها خيرا

قريت كتير من مواضيعك بس لسه ما خلصتهاش

متشكرة اوى على زيارة حضرتك لمدونتى

ftataljanna يقول...

اما عن البوست بقى

فالثانوية كانت اسوأ ايام حياتى ممكن من اسوأها مش لازم اسواها يعني

بس كانت بعيد عنك زى الزفت

كانت اختك علمى وما اقلكش بقى على الضغط والحالة النفسية اللى كنت فيها

الحمد لله عدت على خير

واما عن التلاته جنية فربنا يعينك على حالك :)

واما عن الزواج فلما تقابل بنت الحلال هاتلاقيك بتقول

بابا عايز اتجوز يا بابا :D

كده يعني

ربنا يرزقك بالزوجة الصالحة يا رب اللهم امين بس يا ترى انت هاتكون زوج صالح لان لو عايز خديجة لازم تكون محمد

مع حفظ الفروق يعني

sara يقول...

بحب الاسلوب دا في الكلام عموما

بحس انه كلام مش مترتب وتلقائي وبيطلع من القلب علي طول

بوست اكتر من جميل يا محمد

تحياتي

همسات دافئه يقول...

محمد جيت متأخر معلش وملحقتكش برضه:(
ما شاء الله الصول مصطفى مشى دا ياعينى احنا أسبوع دعينا عليه طفش عشان تعرف قيمتنا بس:)))
أى حد مضايقك قلنا عليه بس وشوف هايحصله ايه
لذيذ قوى البوست ترجع بالسلامه يارب ومتقلش عديم العاطفه تانى احنا ياأخى محلتناش غيرها:)
سلام ياغالى

خمسة فضفضة يقول...

السلام عليكم ورحمة الله وبركاته

حمد الله علي السلامه يا باشمهندس ومع الف سلامه تروح وتيجي بالف خير

حلو اوي الكوكتيل ده ، طيب مافيش ايس كريم كمان لزوم الحر...هههههه

عموما الف مبروك يا سيدي علي الترقيه ونقل الصول مصطفي وعقبال ما ربنا يفك اسرك

-----------

متشكره اوي علي الكلام الجميل اللي قلته عني ربنا ما يحرمنيش منك


تحياتي

أميرة محمد محمد محمد يقول...

مدونتك دمها خفيف جدا بجد ضحكتني قوي وبالذات موضوع ال3جنيه واعتقد انك فعلا دلوقتى بقيت كسيب وتقدر تتجوز بس خللى بالك لحد يطمع في فلوسك ولا حاجه يعنى ركز عشان متتجوزش واحده عينها علي ال3جنيه.ومبروك علي رحيل الصول مصطفي بس برضه ابقي ادعي للى ربنا ابتلاهم بيه.ايام المدرسه بالفعل كانت اجمل ايام فعلا لما بفتكرها ببقي هابكي لان عمرها ما هترجع تاني.انا كنت متابعه مدونتك من فتره بس دي اول مره اعلق عندك.مدونه جميله وربنا يفك اسرك وتخرج من المعتقل قصدي الجيش وربنا يكرمك وتلاقي زوجه صالحه باذن الله

رينـــــــــــا يقول...

السلام عليكم
مبروك نقل الصول مصطفى دا اهم حاج اكيد بالنسبه ليك
وكمااااااان 3 جنيه دا يعد انجاز وتتطور الف مبروك

كوكتيل حلو اوى

أبوسويلم يقول...

ربنا يكون فى عونك يا دفعة
عامة الجيش للرجالة
انا عارف ان كلامى ده مالوش لازمة زلا هيأثر
فين الرجولة لما تفعد يومين ما تدخلش حمام ولا لما حتة صول ما يعرفش الالف من كوز الدرة يكدرك ولا يعملك اورنيك ذنب
لكن ارجع واقول كله علشان مصر يا ابو حميد
سيبها على الله وان شاء الله تخلص جيش وتحل مشكلة الفراغ العاطفى وتبقى تمام
ما تنساش مصر امانة فى ايديك يا بطل
سلام

غير معرف يقول...

عقبال ما تخلص الجيش وتستريح بس يا حرام ساعتها مش هتقبض التلاته جنيه الزيادة ومش هتعرف تتجوز هههههههه

Doba يقول...

يا خسااااااااااارة بقى الصول مصطفى اتنقل - هفرح فيك انا ازاى دلوقتى

يا خببببببببببببر
زعلتنى جدا

ثم بما انك بقيت من الأثرياء بزيادة ال 3 جنيه الجداد لازم تعزمنا كلنا على كابتشينو

يا أهالى البلوجات الكرام
طم ططم طم طم

أسمعوا وأعوووووووووووو
لقد قمنا بنشر الفصل الجديد - للقصة المجنونة والجوهرة المدفونة - كشف المستور - وعلى الحاضر أنه يعلم الغايب بحضور المدونة لقراءة القصة وكتابة التعليق - وعلى كل زاير انه ميدخلشى الا برجله اليمين ويجيبلى حاجة حلوة قوى فى ايديه

يا اهالى البلوجات الكرام
مستنياكم كلكم

تعالوووو زوروووووونا
باى باى
دوبه

عتاب يقول...

هاى يا محمد مرسيه اوى على الكلام الظريف اللى سيبتهولى و انا سعيده جدا بيه و اتمنة حقيقى نكون اصدقاء
صحيح انت بتكره الاهلى و شكلك كدى من الكلام من اسماعليه
بس انا دارستى هناك و البلد دى عشت فيها بجد ايام جميله جدا
مدونتك حلوه اوى و عجبتنى كتير و اتمنى انه يبقى بينا فعلا تواصل
و شد حيلك بقى فى جيشك
سلام

الراقـــص مع الذئـــــاب يقول...

مهند باشا
وعليكم السلام ورحمة الله وبركاته
احمد مين اللي رجع ورجع من فين؟؟؟
الله يبارك فيك يا حبيبي...3 جنيه يحلوا ازمات كتير يا هنود
الفلوس بقت كتير اوي بس النفس اللي تصرف بقي يا معلم

اما بخصوص اسلوبنا او اعتراض بعض الناس ...انا قلتلك قبل كدا مدام انت صح يبقي سد ودانك واكتب وميهمكش...امال احنا فاتحين ليه يا مهند؟؟
المهم جزاك الله خيرا علي ردك الجميل

--------------------------------

رفقة عمر
ربنا يجازيكي خير يا رفقة
الصورة الاولي عملها ازاي معرفش
بس المهم انه عملها وخلاص
ناس متعرفش المستحيل

جزاكي الله خيرا علي الدعوة وعلي الزيارة الجميلة

------------------------------
سي السيد
عمنا اللي رافع رسنا فوق وواخدلنا حقنا
بس بلاش سلطانة..خلينا سي السيد من غير ما يكون في سلطانة

جزاك الله خيرا علي الزيارة الجميلة يا كبير

الراقـــص مع الذئـــــاب يقول...

احمد سلامة
الله يبارك فيك يا ابو حميد
اللي في النص مش تهييس ولا حاجة يا ابو حميد
دي حقائق وجمل تخفي في طيتها كلام كتير اوي
بس الاختصار بيبقي لازم في الكلام دا...احسن كتير من انك تهيس وانت ساكت

انا فعلا اتمنيت الزمن يقف عند ثانوي...عشان محلتيش ايام حلوة غيره
بس للأسف ...الزمن مش هيقف ابدا
شرفتني زيارتك الجميل يا ابو حميد ودمت في خير إن شاء الله

-----------------------------------

سندريلا
جزاكي الله خيرا علي وصفك للبوست بإنه مهضوم

احنا في بلد كلها مهضومين...مهضومين حقوقهم

اسعتدني جدا زيارتك الجميلة وأرجو تكرارها
دمتي في خير

--------------------------------

عالمها ازرق
ايه دا؟؟؟؟
معقولة
انا مش مصدق عنيا
عالمها ازرق رجعت تكتب وترد علي المواضيع من تاني
يااااااااااه
المدونة من زمان وحشها اسمك
شوفتي بقي الغيبة الطويلة غيرت حجات كتيرة اد ايه
منهم ال 3 جنيه
علي فكرة ال3 جنيه دولة غيروني كتير وبقيت مسرف اوي ومبعزق ويمكن افرتك في اليوم الواحد مش اقل من ربع جنيه مخروم

اما بقي الحر والشمس والكلام دا قبقي بالنسبة لينا شئ طبيعي واتعودنا عليه...والشمس لو يوم غابت بنروح ندور عليها

علي فكرة احنا في عندنا مراوح والمابني بتاعت السكن بتاعنا علي اعلي مستوي وكل المنشآت في الكلية علي طراز حديث جدا
دي كلية عسكرية ليها ميزانية ضخمة من القوات المسلحة
الصعوبة في فترات التدريب بس لما وسائل الايواء والنظافة لازم تكون مريحة عشان في رقابة مشددة جدا من القيادات علي الكلام دا

جزاكي الله خيرا علي المرور والسؤال
وحمد الله علي السلامة

الراقـــص مع الذئـــــاب يقول...

dr.Roufy
جزاكي الله خيرا علي كلامك الجميل
إن شاء الله شبكات الموبيل تتصلح والناس تعيش في امان وسلاب ويشربوا رز بلبن قبل ما يناموا

اسعدتني جدا زيارتك واتمني تكرارها يا دكتورة

-----------------------------------

الاخت فتاة الجنة
مجرد بس تواجدك في مدونتي دا شئ يسعدني اختي الكريمة
وما يسعدني اكتر هو متابعتك للمدونة ومواضيعها
اتمني لكي التوفيق اختي الكريمة
وبخصوص الثناوي برضو اخوكي كان علمي...وايمنا كان في حاجة اسمها مجموعة شاملة ...يعني باخد علمي علوم وعلمي رياضة مع بعض...بس كان فيها حاجة جميلة جدا
كان فيها صحاب قلوبهم لونها بيضا من جوا...بيحبوا بعض اوي...مكنوش بيفترقوا عن بعض في كل وقت...كانت هزار وكانت ضحك وتنكيت وجري وشقاوة...
ايام جميلة مش هتتعوض ابدا

اتمني ان ايامك كلها تبقي جميلة يا اختي الكريمة

جزاكي الله خيرا علي مرورك الكريم

---------------------------------
نان
اخيييييرا افتكرتينا
ايه يا عم الغيبة الطويلة ديه...مفيش حتي سؤال
ماشي...المهم انك نورتينا يا نان

فعلا يا نان الكلام صادق جدا ومن القلب

جزاكي الله خيرا علي زيارتك الجميلة...وإن شاء الله متغبيش علينا

الراقـــص مع الذئـــــاب يقول...

واحدة من الناس
معلش...انا لحقتك المرة ديه
فعلا بداعوي الناس ووقفهم جنبي في محنتي
الصول مصطفي مشي ولله الحمد واتحلت ازمتي

الله يكرمكم ويبارك فيكم يا اهل التدوين..عاوز كدا دعوة حلوة علي...والا بلاش...لحسن حد يعرفوا يروح يقوله...خلينا في الصغيرين احسن

جزاكي الله خيرا يا شيماء علي زيراتك الجميلة



----------------------------------
دكتورتنا الكبيرة
خمسة فضفضة
وعليكم السلام ورحمة الله وبركاته
الله يسلمك ويبارك فيكي

الحر اليومين دوله يتعبي في ازايز ويتخزن للشتا

في ايس كريم وفي كل حاجة...بس انتي ابقي زورينا علي طول

الله يبارك فيكي علي التهنئة الجميلة علي الترقية وعلي نقل الصول مصطفي

دمتي في خير يا دكتورتنا

--------------------------------
امير محمد محمد محمد
تكعيب يعني

اسعدني جدا زيارتك للمدونة وكلامك الجميل فيها
الله يبارك فيكي علي التهاني وجزاكي الله خيرا علي الدعاوي الجميلة
اتمني دوام ترددك علي المدونة وتشريفك لها يا اختي الكريمة
دمتي في خير

الراقـــص مع الذئـــــاب يقول...

رينا عروسة المدونين
وعليكم السلام ورحمة الله وبركاته
الله يبالرك فيكي يا رينا
فعلا نقل مصطفي كانت اهم حاجة بالنسبالي عشان كان حططني في دماغة وكان ناويلي علي نية مش تمام...وانا كنت ناوي اربطه في الدولاب واقفل عليه يوم التخرج...يعني كان في تطورات كبيرة هتحصل بس ربنا سترها

اما بخصوص التلاتة جنيه فبلاش تسيحي عندك عشان الناس بتاعت الخليج مططمعش فينا

شرفتينا يا عروسة وإن شاء الله نسمع عنك كل خير...وابقي ديما طمنينا عليكي

دمتي في خير إن شاء الله
--------------------------------
ابو سويلم
للأسف انا مش دفعة
كان نفسي ابقي دفعة بس ربنا ارد ان يبقي لقبي دلوقتي طالب مقاتل

كلامك جميل يا ابو سويلم
بس الصف اللي بيكدرني مأمور انه يعمل كدا...ولما قعدنا مع بعض وعرفناه اكتر فهمنا ان العسكرية لازم تتعلم كدا اهوه
وكلمة حق تتقال الصف الكبير اللي معانا راجل محترم وبيخاف علينا جدا وميحبش حد يتأذي وديما بيشيل الجزاءات اللي بنخدها من بره...يمكن الصف الصغيرين اللي زي مصطفي هما اللي عاوزين ضرب النار...قلة خبرة وغيرة داخليه وحقد
ربنا ينتقم منهم بقي ويخلص الناس منهم

وكله عشان خاطر مصر

اسعدتني جدا زيارتك الجميلة
دمت في خير اخي الكريم

--------------------------------
هند
يسمع منك ربنا
فعلا ال 3 جنيه هيأثروا جامد اوي
ربنا يسترها ونعرف نعوضهم

اسعدتني جدا زيارتك الجميلة
دمتي في خير اختي الكريمة

الراقـــص مع الذئـــــاب يقول...

ام يوسف
كدا برضو...عاوزة تفرحي فيا؟؟
دا انا غلباااااااان
لو عرفتي مصطفي دا عامل ازي وتخيلتي كدا يوسف إن شاء الله لما يكبر ويدخل الجيش ضابط او يدخل الكلية الحربية ويقع تحت ايد واحد زي مصطفي
بلالالالالاش
بلاااااااااااااااااش
الرحمة...قلب الام

والا اقوالك...خليه يطلع راجل ناشف كدا وميبقاش مدلع

احنا داخلين علي حرب ومحتاجين رجالة...إن شاء الله ربنا يجعل النصر
علي ايد شباب ورجال المسلمين

وبعدين هو ايه الكبشتينوا دا؟؟
شوفي انتي قوليلي هو فين وانا اعزمكم فيه كلكم يا جماعة...بس يكون مكان حلو...علي فكرة انا ليا واحد صاحبي بيروح الكبشتينو دا علي طول...وبيشكر فيه وبيقول الناس هناك كلهم كويسين يعني

ملكمش انتم دعوة انا الفلوس معايا بقت زي الرز بعد ما المرتب زاد والحمد لله

دمتي في خير يا ام يسوف وجزاكي الله خيرا علي زيارتك الجميلة

-------------------------------
عتاب
احنا فعلا كلنا هنا اخوات وأصدقاء يا
عتاب
وانتي شرفتيني هنا
واتمني انك تشتركي معانا علي طول
واكيد طبعا انا من اسماعيلية
ومدام انتي من بورسعيد يبقي اكيد كنتي
في صيدلة اسماعيلية
اسماعيلية جميلة وبورسعيد برضو جميلة وانا ليا فيها زكريات جميلة برضو
دمتي في خير اختي الكريمة

M A K I يقول...

الراقص مع الذئاب عجبتنى جدا لقطات حياتك اللى عرضتها بطريقة جذابة و معقدة ف نفس الوقت
حسستنى انى بتفرج على مشاهد متصلة منفصلة فى فيلم الحياة...

بيتنا القديم يقول...

الراقص مع الذئاب
................
شد حيلك يا برنس الجهادية للجدعان

ولازم وحتماً نطرد الانجليز من مصر

والقصر يوافق علي تعيين محمد سعد باشا

مفتش تموين وترقية محمد هنيدي باشا الي

مفتش النظارة

بالحق
هو حضرة الصول مصطفي اللي اتنقل سرية تانية يبق شقيق الصول سميح اللي كره عبود في الجيش
ملحوظة النهاردة كنت في الهايكستب لإتمام صفقة إعفائي من الخدمة العسكرية لأني اتممت الواحد والثلاثين عاماً وقد دفعت نظير ذلك مبلغ الفي جنيه مصري
ابسط يا عم خلي الجيش يهيص ومرتبك يزيد
ويجعلوعاااااااااااااااااااااامر

خيرالدين يقول...

هو انت اللى مضايقك عديم الانضباط
ولا عديم العاطفه


حتى فتح علبة السلمون بقى موضوع صعب
لان الفتاحه اكيد مش موجوده

فاتنى الكثير بتأخرى على زيارة مدونتك

WiLdBiRd يقول...

ياه كل ده حصل

:)

ربنا معاكم