Translate

الجمعة، 31 أغسطس 2007

رسالة للست عبير

السلام عليكم
ازيكم يا شباب...كل سنة وانتم طيبين...كلها ايام قليلة ويقبل علينا شهر الرحمات
اللهم بلغنا رمضان وبارك لنا في شعبان
رجاء من الاخوة والاخوات شحن بطارايات الهمم والاستعداد الجيد لأستقبال الشهر الكريم....وياريت كلنا نبعد عن النت بحلوه وبمره ونكرس الوقت ونسخره للطاعة بعيدا عن اي شئ قد يؤثر علي الاستفادة بكل دقيقة من دقائق هذا الشهر الكريم
أسأل الله الكريم أن يرزقنا النية الصالحة والعمل المقبول إن شاء الله
نبدأ بقي موضوعنا
الناهرده الصبح طبعاً الواحد قايم مفتح عينه براحته...أجازة بقي
والحاجة بتصحي فيا بقالها ساعة....يا ابني قوم تعبتني...وطبعا أنا مكسل ومش عاوز أفتح عنيا...بس أول ما جابت سيرة الفطار
تسللت هذه الكلمة الي اذني ومنها الي تلافيف المخ باحثة عن مكان مفتاح الحواس الخمسة وبسرعة البرق ضغطت كلمة الافطار علي المفتاح وبدأت شاشات العرض في العمل...
وأضاءت شاشاة عرض البصر صورة للأكل اللذيذ وبعدها شاشاة حاسة الشم تعرض الروائح الذكية...ثم السمع ثم التذوق ثم اللمس و انطلق جرس الانذار ليوقظ كل خلية من خلايا جسدي الكسول
وانتفضت من علي سريري مسرعاً الي الحمام ابغي دشا سريعا
وانا أمني نفسي بما لذ وطاب من أصناف الطعام الجميل (هشوفه فين تاني )...وبدأت في تناول الافطار
وبجانبي كوباً ساخنا من الشاي واخر بارداً من اللبن (شوفوا العز)...ولكني شعرت بأن هناك شيئاً ينقصني...(شايفين الطمع)...ولم أدري ما هذا الشئ الا مع صوت بائع الجرائد وهو يصيح بأعلي صوته معلناً عن جرائده الطازجة في الصباح وكأنه علم اني محتاج للجريدة بجانب الشاي والافطار حتي تكتمل صورة الانتخة
وجبت الجرنان اللي مبفحتهوش غير عشان اخبار الرياضة اللي بتحرق دمي عشان كلها بتبقي متحيزة للأهلي...عشان كدا بطلت اقرأ اي حاجة في الجرنان ...بس إحساس انه يكون جنبي هو دا المطلوب
المهم لفت نظري في الجريدة خبر بيقول:
عبير صبري تتخلي عن حجابها من أجل أكل العيش
اللي ملفت في الخبر انه مكتوب بالخط العريض كدا وكأن اللي كتبه شمتان أو فرحان أو عاوز يقول ان مصر كسبت يا رجالة
يعني علي ما أعتقد اننا لو كسبنا المغرب اللي معقدانا الخبر مش هيتكتب بالطريقة ديه
من قبلها كنت سمعت من حوارات الناس انهم زعلانين عشان عبير صبري شالت حتة القماشة اللي كانت ربطاها علي رسها
طيب تعالوا كدا نرجع لفترة قليلة من الزمن وهي بداية إتجاه عبير صبري للحجاب..
كان في حوار مع محاور رزل اوي شبه ابو جلمبوا ديما بيحب يعمل حوارات مع الممثلات والمطربات اللي بيقلعوا هدومهم عشان يفرح بيهم...وبرضو بيجيب الناس اللي لبسوا الحجاب عشان يضحك الناس عليهم...طبعاً الغلط بيبقي من اللي بيستجيب لدعوة الفسل دا ويجي يعمل معاه حوار
حكوا لي إن عبير صبري قد وصفت الحجاب الشرعي لهذا الارجوز وحوارته بثقة وعزيمة وإيمانيات عالية..
بسم الله ماشاء الله....يهدي من يشاء الي صراط مستقيم
والله حاجة جميلة...والناس فرحت أوي بالموضوع...ماشي حاجة جميلة وشئ مفرح
جت الست عبير صبري رويدا رويدا وبدأت التنازل عن الحجاب الشرعي حتة حتة....استربتيس يعني
والله يا جماعة انا لا بتابع تلفزيون ولا برامج حوارية ولا أي حاجة...الكلام دا بسمعه من الناس ..يعني انا مشفتش بعنيا بصراحة أي حاجة
اللي سمعتوا انها بدأت في العودة الي الميك أب...ثم نزعت الطرحة الطويلة واستبدلتها بربطة الخدامين وفي النهاية قررت أن الدين في القلب وليس في الظاهر
العلم في الراس مش في الكراس يعني
وكل هذا من أجل أكل العيش...وإن محدش ليه دعوة بحياتها الشخصية تعمل اللي هي تعمله
ماشي...محدش فعلا ليه دعوة بحياتك يا ست عبير
بس عاوز أقولك حاجة
أكل العيش هو اللي رجعك فعلا للكلام دا؟؟
طيب إنتي لما ربنا أراد بيكي الخير ورحتي مجالس العلم معرفتيش أن فلوس الفن والتمثيل دي حرام؟؟
ومسمعتيش قول الله عز وجل في كتابه الكريم( ومن يتق الله يجعل له مخرجاً ويرزقه من حيث لا يحتسب )
وهل أكل العيش مش موجود غير في التمثيل بس يا أستاذة عبير
يا ست عبير
هل كل الناس اللي تحجبت واحتشمت ماتت من الجوع؟؟
جاوبي علي أسألتي بالله عليكي
طبعاً حجة ضعيفة أوي يا جماعة وأكيد معندهاش أي إجابة لأي سؤال من الأسئلة ديه
بس تعالوا بقي نشوف إيه اللي حصل للست عبير وبوجه عام نطبقه علي نفسنا
هنتخيل إن في قلب كل إنسان مسلم قنديل للأيمان...هذا القنديل يتوهج بنور الايمان عند إضاءته وشحن بطارياته بالطاعة وزكر الله
أضاء هذا القنديل بقوة في قلب عبير صبري عند بداية التزامها وإتجاهها الي الله عز وجل
ولكن خبأ نور القنديل في البعد عن الله رويدا رويدا...وبدأت تتنازل وتضعف مع ضعف هذا النور...حتي إنطفأ المصباح وعادت كما كانت
الكلام دا محصلش للإنسانة ديه وبس..
لا دا حصل لناس كتيرة جدا سواء مشاهير او غيره
تلاقي شاب التزم مرة واحدة وإتجه الي الله عز وجل ...وبعد فترة يبدأ في التخاذل والتراجع
تلاقي فلانة لبست الحجاب أو النقاب..وبعد فترة برضو تبدأ في التراجع مرة تانية
لهذا كانت دعوة رسول الله صلي الله عليه وسلم
اللهم يا مقلب القلوب ثبت قلبي علي دينك
أنا مش بهاجم عبير صبري أو غيرها...إحنا عاوزين نعرف ايه اللي حصل والغلط فين؟؟
معقولة بعد مذاق حلاوة الايمان نرجع تاني لمرارة الخذلان
معقولة بعد العفة والطهر أرجع تاني للرذيلة والفواحش
انرد علي اعقابنا بعد إذ هدانا الله
لازم يا جماعة نجدد الايمان ديماً في قلوبنا ونتابع ضوء القنديل
إذا بدأ في الضعف نلحقه ونشحنه....الكلام دا في وقت خطير اوي ووقت مهم اوي
رمضان مقبل علي الابواب
بالله عليكم محدش يضيع فيه دقيقة ونستعد من دلوقتي
لازم نستعد عشان منجيش اول يومين تلاتة حلوين اوي وبعد كدا نقعد جنب الفوازير والمسلسلات
اما بخصوص الست عبير فعاوز اقولكم حاجة
إن شاء الله هترجع تاني للحجاب....ولو اراد الله وقدر لنا البقاء هفكركم بكدا
اللهم يا مقلب القلوب ثبت قلبي علي دينك

هناك 34 تعليقًا:

WiLdBiRd يقول...

هاقولك المشكلة فين

المشكلة فى الصحبة

اه والله

محتاج دايما جنبك صحبة الخير

وانت فى بداية الطريق وعلى طوله

قبلها كانت ميرنا المهندس

لبست الحجاب وهى على شفا الموت

وقلعته تانى

وعن كلامها

انها لما لبست الحجاب لقت جنبها صحبة صالحة بتصحيها وقت الفجر وتاخد بايدها

ومع الوقت الموضوع هدى

وبقى عادى
مش بقوا يكلموها زى الاول

هو انتى لابسة الحجاب علشانهم

وبعدين احنا اللى المفروض نقرب من الملتزمين

وندور عليهم ونمسك فى اى حد بياخد بايدنا

عبير صبرى ده اللى حصلها

بعدت واحدة واحدة اختفى النور

ومالقتش اللى يساعدها على شحن البطارية

وكانت بتستهلك ده كله فى قعدتها مع هالة سرحان ومن بعدها ايناس الدغيدى

ودول يضيعوا بلد

بس برضه مش العيب عليهم لوحدهم

رفقة عمر يقول...

طبعا زمن ايناس الدغيدى واقبال بركه فى منتهى السعادة ان فى وحدة دخلت فى حزبهم حزب الشيطان
وبعدين النفاق والعياذ بالله من النفاق دة اخرته اللى يلزم رياءا لازم تكون دى النهايه
اسال الله لنا جميعا التثبيت
ونعوذ بالله من سؤ المنقلب
اللهم امين
يا مقلب القلوب ثبت قلبى على دينك

خمسة فضفضة يقول...

السلام عليكم ورحمة الله وبركاته


اللهم ارنا الحق حقا وارزقنا اتباعه
وارنا الباطل باطل واجنبنا اتباعه


كل سنة وانت طيب يا باشمهندس

mohand يقول...

السلام عليكم

كل سنه وانت طيب يا جميل

وحمدلله علي السلامه

بالنسبه لموضوع عبير صبري فهو يخصها طبعا زي ما قالت

بس انت لو كنت شوفت حلقة من حلقات ست ستات
كنت اتاكدت انها هتقلعه

واحتمال تقلع ما بعد الحجاب
زي زمان كده فيلم الكافير مع الفنان الموهوب قوي قوي خالص مالص طارق علام


الله المستعان

تحياتي لك

عروس البحر يقول...

اولا تحياتي لك لان المدونة جميلة موت
و ثانيا بمناسبة عبير صبري انها معندهاش مخ بجد و اللي المتحجبين يعني كخة و لا ايه؟؟؟؟؟
طب حنان ترك اديها عايشة و مبسوطة و بتمثل و مفيش اذمة بس مابقاش في ضمير
عارف ليه؟؟؟؟؟؟؟؟؟
عشان الفلوس بيمحي الضمير
يعني بمعني اصح
الفلوس زي الجومة بتمسح الضمير و القيم
و الاخلاق وووو
تحياتي

sahr يقول...

البوست جميل
وبالنسبة لعبير صبري بجد مش عارفه اقول ايه
ربنا يهدي

البنت الشلبية يقول...

ازيك الاول واخبارك ايه
الموضوع ده قلقنى على فكرة اوى
وده عشان انا شخصييا شوفت واحدة قريبتى كنت بقنعها بالحجاب قالتلى ماهم بيلبسوه ويقلعوه
هيا لسه فى الجامعة وصغيرة وبتشوف حواليها نماذج غير مشجعة
اقولها ملكيش دعوى بيهم الاقيها مذبذبة
ما علينا..المهم ان لو الخبر ده حقيقى يبقى فعلا عالم الفن والتمثيل ده عالم سورى فى الكلمة زبالة وده لان اكتر الى اتحجبو رجعوا تانى وفى قليل الى رجعو للحجاب تانى
والاخبار دى بتزعلنى اوى من اول ما سمعت خبر بسمة وهبة وخلعها الحجاب وبعدها اهو عبير صبرى
المهم انى لما كنت بشوفهم كانو ملتزمين اوى وبيشجعو الناس بمظهرهم على الالتزام ده اول ما لبسو الحجاب قصدى
ربنا يستر على الباقى
احنا فى دنيا فتن
ربنا يرحمنا
وشكرا ليك

مهبول ومهبوله يقول...

كل سنه وانت طيب
مليووووووووون مبروك ياخويه ان شالله
وعبقالك كده السنه الجايه وتكبر وتدور كمان وكمان

مهبول اخوك كده

BinO يقول...

فئة البين بين المنتشرة جداً شئ عادي
ربنا يهدينا ويثبتنا أجمعين
الخوف من الفئة الضالة المضلةاللي همها أتباع الشهوات
ديه هي المصيبة

قطوف يقول...

عمى وعم عيالى
والله ان احبك فى الله مبسوط من غيرتك على الدين وعموما هى كانت بتيجى مع هاله سرحان يعنى لازم تخلع الحجاب من زمان



وبعدين متعرفش انا فرحت ازاى ام عرفت ان انت زملكاوى العباقره لازم يكون كده يلا سلام مستنى زيارتك

رينـــــــــــا يقول...

السلام عليكم
والله يامحمد مش عاره اقولك ايه غير جزاك الله الف خير يارب
انا مش متابعه البلوجات زى الاول
وتقريبا مش بعلق الا نادر
بس البوست بتاعك يجبر اى حد على التعليق
المشكله فعلا فى الصحبه يا محمد
هى اللى بتخلى قلبك دايما مشبع والفولت عالى اوى بالله
يا اما العكس ودايما فى النقصان
اللهم ثبت قلوبنا على دينك
بوست اكثر من رائع

Ma 3lina يقول...

هيا من ساعة برنامج ست الستات ده و المواضيع الغريبة اللى بيستعرضوها مع اراء اغرب

قلت البنت دى خلاص خطوة بخطوة و هترجع عن الحجاب

يالا ربنا يهديها و يهديهم و يهدينا جميعا

سؤال رخم هوا الفطار طلع ايه مقلتش يعنى اصلى جعت الحقيقة ما انت صحيت كل مراكز الحواس اللة كنت منيماها

عالمى ازرق يقول...

من فتره برضو سمعت عن بسمه وهبه انها خلعت الحجاب
اللى بندهشله الناس اللى بتخلع الحجاب بعد فتره طويله
عموما اللى بيقدم على حاجه لله بيلاقى فيها عقبات علشان ربنا يختبر قوه ايمانه ومدى تمسكه بيها
وانا متفقه معاك ان ده طبعا مش سبب
ربنا يهدى الجميع
حمدلله على سلامتك
وكل سنه وانت طيب

مؤمنه يقول...

السلام عليكم ورحمة الله وبركاته
قال الله عز وجل فى كتابه الكريم فى سورة أل عمران ( كيف يهدى الله قوما كفروا بعد ايمانهم وشهدوا أن الرسول حق وجاءهم البينات والله لا يهدى القوم الظالمين) صق الله العظيم
فى سورةالنساء قال الله عز وجل ان الذين أمنوا ثم كفروا ثم أمنوا ثم كفروا ثم ازدادوا كفرا لم يكن الله ليغفر لهم ولا ليهديهم سبيلا) صدقالله العظيم
لاأقصد بكلامى هذا أى هجوم لا أقصد بكلامى هذا تكفير رحمة الله ومغفرته
ان الله غفور رحيم رحمته وسعت كل شئ وأعوذ بالله من ذلك كما أنه أيضا جبار وشديد العقاب
اللهم لا تجعل عليها من الكافرين ديارا
وربنا يهدى وكلامى دى مش مخصص لحد على وجه العموم
والسلام عليكم ورحمة الله وبركاته

mesh2dra يقول...

السلام عليكم

عندك حق
وزى ما عالمي ازرق بتقول
خير مثال بسمة وهبه
واللي يشوف برامجها مكنش ييجي في دماغه اصلا ان ممكن يحصل ده
سبحان الله
يهدي من يشاء وله في ذلك حكم

*
*
ليك تاجين عندى
لو عاوز
تعالى خدهم

سلاماتي

semsem يقول...

قال رسول الله صلى الله عليه وسلم

'يأتي زمن علي أمتي القابض فيه علي دينه كالقابض علي جمرة من نار'.. هكذا وصف رسولنا الكريم (صلي الله عليه وسلم) زمنا توجه فيه السهام والطعنات للإسلام وتنتشر فيه الفتن ويختبر فيه إيمان المسلم

اللهم ارزقنا الثبات

ربنا ولا تزغ قلوبنا بعد اذ هديتنا وهب لنا من لدنك رحمه انك انت الوهاب

عصفور المدينة يقول...

مشكلة هؤلاء يا أخي انهم لهم قناة مفتوحة مع أهل الفن
وأنت تعلم أن ال...تود لو أن كل الناس ........
وحط مكان النقط أي حاجة
وحتى حط مكان النقط الطائعة المخبتة كما

والذين نجحوا في الاستمرار هم الذين قطعوا قنوات الاتصا مع ماكري الليل والنهار

الراقـــص مع الذئـــــاب يقول...


WiLdBiRd
طبعا دي اهم حاجة
الصحبة ديما هي اللي بتشد للخير او الشر
الصاحب ساحب زي ما بيقولوا
اما بالنسبة للدغيدي وهالة سرحان فدوله اقبح من إنننا نتكلم عنهم

جزاكي الله خيرا علي المرور الكريم

----------------------------------
رفقة
ربنا ينتقم من كل من هم علي شاكلة هؤلاء الاشخاص
اللهم إنا نسألك الاخلاص في القول والعمل

يا مقلب القلوب ثبت قلبى على دينك
جزاكي الله خيرا علي تعليقك يا رفقة

----------------------------------
دكتورة خمسة فضفضة
وعليكم السلام ورحمة الله وبركاته
اللهم آمين يارب العالمين

كل سنة وانتي طيبة يا دكتورة والسنة اللي جاية تكوني في احسن حال واكثر قربا وطاعة لله عز وجل

الراقـــص مع الذئـــــاب يقول...


هنود حبيبي

وعليكم السلام ورحمة الله وبركاته
وانت طيب يا عسل
الله يسلمك ويبارك فيك

انا الحمد لله مشفتش ست الستات واول مرة اسمع عنها

ربنا يعافينا ويثبتنا يارب

جزاك الله خيرا يا مهند وربنا يبارك فيك
----------------------------------
بنت لذيذة
اولا اسعدني جدا رأيك في مدونتي ودا شرف كبير ليا
ثانيا تعليقك ورأيك عجبوني اوي
فعلا الفلوس زي الجومة بتمحي كل حاجة...واول حاجة بتمحيها هو السؤال عن مصدرها حرام والا حلال

دمتي في خير واتمني تكرار زيارتك

-----------------------------------
sahr
جزاكي الله خيرا علي زيارتك ورأيك في البوست
وربنا يهدي الجميع

الراقـــص مع الذئـــــاب يقول...


البنت الشلبية
انا الحمد لله تمام وزي البومب
بالنسبة بقي لقريبتك اللي بتقول ان في ناس بتلبسة وبتقلعه تاني فدا مش مبرر ليها انا متلبسوش...حجة ضعيفة
ربنا يهديها ويهدينا

اما بخصوص عالم الفن فهو عالم العفن وليس الفن
وفعلا مجتمع زبالة والادلة كتيرة اوي
بس للأسف شببنا اخدهم قدوة

معلش في السؤال يا اختي الكريمة
هما مين بسمة وهبة دوله...والله اول مرة اسمع عنهم

دمتي في خير اختي الكريمة
--------------------------------
مهبول ومهبولة
كل سنة وانت طيب
والله يبارك فيك
يارب يا خويا يارب
طبعا انا واثق انك حتي مقرأتش عنوان البوست ...مش مشكلة
المهم انك شرفتيني

---------------------------------
واخييراااااااااا بينووووووووو
فينك يا عم ...بتتقل علينا ليه بس...شكل العروسة خطفتك مننا
ربنا يباركلكم ويرزقك الذرية الصالحة
ربنا يهدي الجميع ويثبتنا
متحرمنيش من زياراتك يا عريس

الراقـــص مع الذئـــــاب يقول...


سي السيد
انت اللي عم الكل يا باشا

احبك الله الذي احببتنا فيه

ربنا ينتقم من هالة سرحان ومن اللي زيها دعاة الفساد


علي فكرة انا مش زملكاوي يا باشا
انا اسمعلاوي

بس برضو الزمالك حببنا
سلام يا كبير

-----------------------------------
رينا
وعليكم السلام ورحمة الله وبركاته
يا الف مرحبة بالطير المهاجر
جزانا الله وإياكي خير الجزاء يا رينا

فعلا هي الصحبة يا رينا واكتر من اخ اتكلم في موضوع الصحبة دا

ربنا يرزقنا الصحبة الصالحة...اللهم ثبت قلوبنا علي دينك

جزاكي الله خيرا يا عروستنا علي مرورك الكريم

ابقي طمنينا عليكي ديما

---------------------------------

دكتورة ما علينا
ايه بقي حكاية ست الستات دا...انا عاوزكم تفهموني عشان الموضوع دا اتكرر من اكتر من واحد
انا مش متابع حاجة ومبعرفش اي حاجة عن الاخبار ولا البرامج..
ربنا يهدي الجميع

اما بخصوص الفطار فكان فطار لذيذ اوي...فكرتنيني بالغدا بتاع الناهرده
تسلم ايد الحاجة ماما

شوفي يا دكتورة اي اكل بعيد عن الجيش بيبقي جميل....مش معني كدا إن اكل الكلية العسكرية وحش....دا لازم يبقي مظبوط جدا ومحسوب اد ايه القيمة والوحدات الغذائية اللي فيه علي اد التدريب..بس الروتين هو اللي وحش..يعني التغيير هو اللي بيخلي اي اكل تاني جميل

شرفتيني يا دوك...والمرة اللي جاية هبقي اعمل حسابك في الفطار

الراقـــص مع الذئـــــاب يقول...


عالمي ازرق

ازيك يا اختي الكريمة...وحشني تعليقاتك الجميلة

مين بسمة وهبة...برضو اتكررو في اكتر من رد
شوفي يا عالمي ازرق
مش مهم هي لابسة الحجاب من امته
المهم حال قلبها مع الله عز وجل

وزي ما انتي قلتي...لازم هيبقي فيه اختبار من الله عز وجل لقوة الايمان والتمسك بالتدين

الله يسلمك ويبارك فيكي وكل سنة وانتي طيبة

---------------------------------
الاخت الكريمة مؤمنة
وعليكم السلام ورحمة الله وبركاته
جزاكي الله خيرا علي تعليقك وتنويهك

رب لا تجعل علي الارض من الكافرين ديارا

دمتي في خير اختي الكريمة
وعليكم السلام ورحمة الله وبركاته

----------------------------------
mesh2dra
وعليكم السلام ورحمة الله وبركاته
بروض بسمة وهبة؟
لا...انا لازم اعرف قصتهم ايه
اسعدتني جدا زيارتك الجميلة
وإن شاء الله تاجك في الحفظ والصون
ومن عاداتي إني بجمع التاجات وانزلها كلها مرة واحدة

دمتي في خير
-----------------------------------
semsem
اللهم صلي وسلم وبارك علي رسولنا ونبينا محمد صلي الله عليه وسلم
اللهم ارزقنا الثبات ورد كيد الخائنين

جزاكي الله خيرا اختي الكريمة علي المرور الكيرم ودمتي في خير


الراقـــص مع الذئـــــاب يقول...

الاستاذ الكريم
عصفور المدينة
فعلا يا استاذي الفاضل
دا ابلغ تعبير وحسن تفسير للي حصل
وجود قناة مفتحة مع اهل العفن

الشيخ محمد حسين يعقوب حفظه الله شبه الموضوع دا بحاجة جميلة اوي
قال متسبش اي جزء من معصيتك القديمة عشان متفكركش باللي فات وتجيبك وترجعك تاني
كان في درس حوار مع عاصي علي ما اعتقد


وفعلا الزانية تود لو ان كل نساء اللارض زواني
والطائعة المخبتة تود لو ان كل نساء الارض مثلها

اسعدني جدا تعليقك وتفسيرك يا استاذ الفاضل
دمت في خير وكل عام وانت بخير

همسات دافئه يقول...

احم احم
عادتى ولا هاشتريها
دايما أجى بعد ما تسافر وتلم الكراسى والليله تخلص :)))
أولا ان هذا الدين متين فأوغل فيه برفق
مينفعش حد يقرر يعمل كل حاجه صح بعد ما كان بيعمل كله غلط طبعا مش ببرر الى هى بتعمله بس الموضوع مش سهل والعيش برئ ده بس تلكيكه عشان مقدرتش
ربنا يهدينا ويهديها ويثبتنا جميعا يارب
جزاء الله خيرا
ابقى اقرا التاج بتاعى لما تيجى أصلى جبت فيه سيرتك:)
سلام:)

أميرة محمد محمد محمد يقول...

طبعا الحق اتمتعلك يومين قبل ماترجع للمعتقل اسفه قصدي الجيش مش عارفه ليه بحس انه شبهه

اما عن موضوع عبير صبري فبصراحه ماسمعتش عن الموضوع فمقدرش اتكلم فيه بغير علم

ولكن عامة اي انسان بيتراجع عن ثابت من ثوابت دينه فليس لنا الا ان ندعو له بالهدايه والتثبيت لان الموضوع ده كارثه من ينقلب علي عقبيه ويبتعد عن الدين ده انسان مسكين لايستحق الا الرثاء

والي المزيد من حفلاتك المتميزه

ما علينا يقول...

السلام عليكم ورحمة الله وبركاته

شوف بقى يا محمد
طبعا الحمد لله فطرت واتغديت
ارغي بقى واصدع دماغك

الست عبير لما لبست الحجاب من البداية خالص
زي النهاية
حجاب لا يمت للحجاب باي صلة

كل الموضوع ان الفنانة جاءها عرض زواج ممتاز ماديا بشرط اعتزال التمثيل وارتداء الحجاب

لكن لي عليك عتاب
ليه بتوصف حجابها الدخيل على معنى الحجاب

بانه ربطة الخدامين
الخادمات فيهم اكيد ملتزمات جدا جدا
لانهم بشر ومهنتهم لا تنتقص منهم
فبلاش نربط بينهم وبين شيء منتشر ومسيء

غير كدا
موضوع الاشخاص اللي فجأة تجدهم
ما شاء الله التزام وتمسك بالدين
ورويدا رويدا يبداوا
يتخلوا ويتنازلوا

دا له اسباب كتير
اولها انهم مش بيبعدوا بانفسهم عن مواطن ومغريات المعصية
وعدم الابتعاد عن الصحبة السيئة
غير كدا

انهم لا يترفقوا بانفسهم

الرسول عليه الصلاة والسلام
امر بالترفق في التوغل في الدين
لانه دين متين
الاصلاح
يحتاج الى اصلاح وتهذيب للنفس والداخل مع تهذيب المظهر والخارج

يعني مش اروح البس الحجاب وخلاص
لازم احجب نفسي وروحي كمان
واجاهد نفسي قدر امكاني


واذا كانت هي او غيرها
خلعوا الحجاب
والناس بتبص لهم
وبيقولوا ادي اللي بيلبسوا الحجاب
بيرجعوا يقلعوه

فمعروف
ان مفيش انسان حجة على الدين
الدين حجة على الجميع

ايوا
فطرت فطار تمام
ونازل بموضوع جامد

طيب لازمته ايه
البوقين بتوع كره الاهلي

عموما
ولا يهمك
ربك كريم

ربنا يخليلك الحاجة يا رب
وتسعد قلبهل وتكون لها نعم الابن

وكل سنة وانت واسرتك والمسلمين جميعا بخير
وربنا يرزقنا رحمة ومغفرة رمضان
والعتق من النار

الراقـــص مع الذئـــــاب يقول...

واحدة من الناس
المهم ان اي موضوع يتشرف بوضع اسمك فيه يا شيماء
جيتي متاخرة جيتي بدري بقي مش مهم

فعلا إن هذا الدين متين

ربنا يرزقنا الثبات يارب

جزاكي الله خيرا علي كلامك وزيارتك يا شيماء

--------------------------------
اميرة محمد محمد محمد

فعلا هو زي المعتقل...بس يمكن هناك في ايجابيات وحجات لصالحي كتير والحمد لله استفدت واتعلمت كتير اوي من كل ساعة عدت عليا هناك

ربنا يثبتنا ويهدي جميع المسلمين الي ما يحبه ويرضاه

---------------------------------
ماعلينا
وعليكم السلام ورحمة الله وبركاته
علي فكرة الفطار دا كان يوم الجمعة اللي فاتت ...عشان بس نعرف اللي لينا واللي علينا
وانا مش كل جمعة هفطر بقي..الناس هتجيب منين
ارغي يا ستي براحتك خااااااالص
مفيش عندي ضرايب علي الكلام

بالنسبة لعبير بقي
انا اللي كنت اعرفوا عنها إها كانت ممثلة بايعة القضية وبتعمل اي حاجة...ومرة واحدة سمعت برضو انها التزمت ولبست الحجاب
فرحت وقلت خير..اهو الفساد يقل شوية
انا مشفتش حاجة ولا اعرف حاجة لأني زي ما قلت مش بتابع الشيطان الرجيم اللي اسمه تلفزيون

اما بقي بخصوص الزواج وان كان مشروط عليها تلبس الحجاب فدي حاجة بينها وبين ربنا
يعني ربنا يعلم النوايا
ولو كانت نيتها فعلا كدا يبقي هي اللي خسرانة

وبخصوص رابطة الخادمين والله يا اختي الكريمة انا معرفش في لبس البنات....بس اسمع الناس بيقولوا علي الحجاب دا رابطة الخدامين ...ولا اقصد ان امتهن احد او اسخر من أحد...معاذ الله
انا اختي بتلبس ملحفة أو إسدال...وامي كذلك...فكل اللي بشوفو ادامي في البيت من لبس البنات ملحفة سوداء وجونتي وشربات وكله اسود في اسود
اما الحجات التانية والموضة انا معرفوش ولله الحمد
وبقول زي ما الناس بتقول عليه مش اكتر

وإن كان وصلك فكرة غلط او اني اقصد تلميح خفي او مجازي فالله شهيد علي اني لم اقصد ولا اقصد ذلك...

وكلامك كله طبعا علقنا عليه وكلنا متفقين عليه من حيث عدم ترك النفس في مكان المعصية ووجود اي تابع او رابط لمعصية قديمة حتي لا تقوي مرة ثانية

وجزاكي الله خيرا علي فكرتك عن الحجاب وعجبني جدا حتة تحجيب النفس الاول

كل يوم بكتشف في اخواني وأخواتي من المدونين حجات جميلة وبتعلم منهم معاني جميلة
وبحمد الله عز وجل إن في شباب كتير تفكيرهم جميل وقلوبهم منيرة امثالك يا ما علينا
انا متأكد ان الكلام اللي انتي بتقوليه
دا بيتطبق فعلا عملي منك ومن كل الناس اللي دخلت وقالت رأيها في الموضوع

اما بخصوص الاهلي بقي فأنا مجبتش سيرته ولا قات في حاجة لسا
احنا داخلين علي رمضان...وربنا كبير وقادر ينتقم من المفتري والظالم

جزاكي الله خيرا علي شوية الدعاوي اللي في الاخر ديه
وكل سنة وانتي طيبة انتي وكل من قال لا اله الا الله محمد رسول الله علي وجه الارض

شمعة أمـــــل يقول...

الحمد لله الذى عفانا
ربنا يهديهم
بجد شئ محزن ان بعد ما نىلاقى ناس بتعمل شئ جميل يخدم الدين
يرجعوا فجاه ويعملوا عكس ده
لان الفنانين غسر باقى الناس
بعض الشباب بيخدوهم قدوه
وهى بكده مش بس شالت ذنبها لوحدها
لا دى ممكن كمان تكون شالت ذنب ناس تانيه هتقلدها
يا مثبت القلوب ثبت قلبى على دينك

تحياتى ليك

ما علينا يقول...

جزاك الله كل الخير على الوصايا
يا محمد

حقيقي والله وبدون مبالغة
انها وصايا غالية جدا جدا

وان شاء الله انا كانت نيتي مجاهدة نفسي
لتطبيقها

لان رمضان عزيز جدا

وكنز لابد الاستفاده بكل ثانية فيه

جزاك الله خيرا اخي
ووفقكك دائما لما فيه الخير ان شاء الله

عصفور المدينة يقول...

جزاك الله خيرا على البوست الجديد الخاص بنصائح رمضان

رفقة عمر يقول...

قافل التعليقات على البوست الجميل الخاص بوصايا التدوين
وانا كنت عايزة ااقولك كل سنه وانت طيب ورمضان كريم
تقبل الله منك فيه صالح الاعمال اللهم امين

šσяšαяαα يقول...

أسأل الله لكم فى شهر رمضان حسنات تتكاثر وذنوب تتناثر وهموم تتطاير وأن يجعل بسمتكم سعادة وصمتكم عبادة وخاتمتكم شهادة ورزقكم فى زيادة..أدعو الله أن يتقبل منا و منكم الصيام و القيام وصالح الأعمال
:::::::::::
مدوخنا معاك عشان نكتب الكلمتين دول
ياللا ماعلينا وكل سنة وانت بألف خير

mohand يقول...

السلام عليكم

كل عام وانتم بخير وإعاد الله عليكم الشهر الكريم بالخير واليمن والبركات

وجعل ايامكم كلها اعياد وافراح اللهم أمين

تحياتي

ما علينا يقول...

كل سنة وانت طيب
يا اخ محمد

انت وجميع من تحب
والمسلمين جميعا

كل سنة والجميع بالف خير

عيد سعيد ان شاء الله