Translate

الجمعة، 20 فبراير 2009

مشهد

السلام عليكم


أول امبارح يا جماعة وبدون مناسبة كدا نزلت وخرجت...أه والله....نزلت وخرجت....

واحد صاحبي من زمااااان فات عليا وشدني ونزلني معاه بالعافية...


طيب فيها ايه ديه...طب ما الناس الطبيعية كلها بتخرج وتتمشي وتشوف الدنيا....


استنوا بس....انتم بتقولوا الناس الطبيعية....لالالالا مش قصدي...متروحوش لبعيد الله يكرمكم...


انا قصدي يعني الناس اللي ظروفها طبيعية بتخلص شغلها او دراستها وبتلاقي وقت فراغ ترفه فيه عن نفسها...


إنما انا بنزل اجازتي عشان انعم بقدر من النوم والراحة والاكل واستعد لخوض اسبوع جديد من العمل دون إنقطاع....عشان كدا بنزل اجازتي اقفل تلفوني واحبس نفسي واستمتع بنعيم الدنيا من الأكل والنوم ودفئ القدمين تحت غطاء ناعم مع كوب من الشاي الساخن ومع شاطر ومشطور وبينهما طازج...


يا سلام...اهو انا كدا ببقي اسعد واحد في الدنيا ...وهو دا اللي بلف وادور حوليه وواجع دماغكم فيه من الصبح عشان اوصله...السعادة وراحة الباااااااال


اوم ايه بقي لما نزلت (غصب عني) مع احد اصدقائي الاناتيخ ....وقررنا نروح نقعد في مكان علي البحر


كنا حوالي الساعة 10 بالليل الجو كان برد شوية...وخصوصاً علي البحر بقي بيكون ابرد بس ممتع وجميل اوي


واحنا راكنين علي جنب جت عربة كارو حديثة


وحديثة عشان منبعدش عن الموضوع دي ليها حكاية....وهي ان المحافظة قررت سحب عربات الكارو من البلد واستبدال اصاحبها بعربات حديثة الصنع تسحبها دراجة بخارية بدل من الحيوان المشهور اللي طلع عين اهله في جر العربات في الحقب التاريخية الماضية


هي حاجة شبيه بالتوك توك.....بس ليها صندوق ورا لحمل الاغراض


وانا في رأيي المتواضع ان الحكاية ديه وراها سببين


الاول : هو ارتفاع اسعار (الحمير) وتهديدها بالإنقراض بعد انتشار محلات بيع الكفتة والكباب


والثاني : هو صفقة مع رجل الاعمال الجميل خالص احمد عز....لأن استبدال الخشب بالحديد يصب في مصلحة الرجل الفلاذي اللي خرب بيت الناس


ماااااااااا علينا....دي كانت قصة العربات الكارو الجديدة اللي اضافت لمسة حضارية الي بلدي الجميلة


كان فيها ايه بقي الكارو المودرن اللي وجعت دماغكم بيها


كان فيها واحدة ست ومعاها عيلين او تلاتة...مركزتش بصراحة....وكان جوزها وأبو عيالها سايق العربية


عشان نتخيل الموقف كدا ..رب الاسرة حاطط اسرته الصغيرة ورا في الصندوق وسايق بيهم بيفسحهم


بصوا يا جماعة المنطقة ديه كان فيها سيارات من احدث الموديلات....وعمنا دا بكل ثقة دخل ما بين الناس وركن ونزل الاولاد

وضرب ايده في جيبه طلع كام قرطاس لب وترمس ووزعهم علي اسرته الصغيرة

تعالوا يا جماعة شوفوا الفرحة و الرضي اللي في عين الاسرة الصغيرة ....

الطفل الصغير ميعرفش يمثل أبداً....وبرضو ميعرفش يحقد او يطمع....اقل حاجة تفرحه وبيبان عليه

اي نعم الجو كان برد والعيال كانوا كمشانين...ولما يروحوا ويناموا هيصحوا الصبح عاملين حجات مش تمام وامهم هينهد حيلها في الغسيل

بس وقتهم اللي قضوا مع ابوهم وامهم والحب اللي هما فيه بالدنيا كلها

ناس كتيرة اوي تتمني تعيش ولو لحظة سعادة وحب زي الاسرة الصغيرة اللي إمكانيتها محدودة جداً ولا تملك من حياة الرفاهية الا ثمن قرطاس لب وترمس


سبحان الله....عبرة وعظة لناس كتيرة اوي...السعادة والرضي بتتحقق بأبسط الاشياء....علي الرغم من ان الدنيا فيها وسائل كتيرة اوي لإشباع الرغبات من حياة الرفاهية بس برضو البساطة تكسب بجدارة


ناس عندها فلوس لو ولعت فيها النار مش هتخلص....بس حياتهم كلها عبارة عن جحيم

وناس زي الاسرة الجميلة اللي بنتكلم عليها....ممكن يكون عندهم مشاكل ...بس عرفوا يسرقوا وقت جميل مع بعضهم بكل الحب اللي في الدنيا كلها



الدبوس بتاع زمااااااااااان


بلدي وإن جارت عليا عزيزة....أهلي وإن ضنوا عليا كرام



يارب تكون وصلت







هناك 14 تعليقًا:

خمسة فضفضة يقول...

السلام عليكم ورحمة الله وبركاته

حمد الله علي السلامه يا محمد واحشنا كلامك الجميل من زمان

اخبارك ايه يارب بخير

انت فياخر البوست جبت الخلاصه ، السعاده بيقابلها كلمة واحده بس هي الرضا اللي يرضي بحاله وباللي ربنا قسمهوله اكيد هايبقي مبسوط

دا طبعا من غير تواكل بمعني انه يعمل كل اللي عليه في الاول عشان يحقق كل اللي بيتمناه ويسعي بجد واجتهاد وبعدين يرضي باللي ربنا قدرهوله


ربنا يسعد الجميع

اللهم رضني بما قسمت لي وعافني فيما أبقيت حتى لاأحب تعجيل ماأخرت ولاتأجيل ماقدمت

سلام

بنت الصالحين يقول...

جدتي كانت تقولي
الفقير بيتعب والغني بيتعب
بس الفقير اما بيتعب ربنا بيسبب شفاه في اسبرينه
اما الغني اما بيتعب بيكون سبب ضفاه عملية جراحية

اقولها مش فاهمة

تقولي
كل واحد له رزق وكل واحد بيعيش علي قد اللي ربنا قاسمهوله
والسعادة يابنتي عمرها ماكانت بالفلوس
السعادة بالقناعه وعزة النفس


رحمك الله جدتي

واهي الخروجة جابت نتيجة اهي:)

salma mohamed يقول...

من كتر الغياب,وكل ماابص في المدونات اللي انا ضيفاها في مفضلة مدونتي,الاقي ان اخر موضوع حضرتك كتبته تقريبا من شهر,
فبقالي فترة مش ببص,
وافاجئ وانا في مدونة تانية ان اخر موضوع ليك كان من اسبوع؟!!
اه انا بحلقت وقولت العيب في مدونتي,
رجعلتها لقيت فعلا الموضوع من اسبوع,
قولت احس عليا ولسه واخده بالي,معلش بقى اهو اللي حصل,
المهم انا قرات البوست واتاثرت بيه,
فعلا القناعة كنز لا يفنى,والطمع مش بيجيب الا الطمع,
والسعادة عمرها ماكانت في المال,
المال عمره ما يشتري حب وترابط,
بل معنى الاصح عمره ما يشتري السعادة,
ربنا يرزقنا الرضا بما قسم لنا.

غير معرف يقول...

كان فى مره حد قالنا على قصة انه كان فى واحد غنى وفى مكان ما كان يسير بسيارته الفخمة فى منطقة سكنية فقيرة فسمع شخص يقول ياريتنى زيه فاوقف السيارة ونزل منها وقال له ياريتنى كنت انا زيك انا معى اموال كثيرة ولكن ليس مع الصحة والسعادة
فسبحان الله السعادة بين ايدى الجميع ليست احتكارا على الاغنياء ولا الفقراء ولكن كلاهما لا ينعم بالرضى بل ينعم بالتطلع للغير والسخط على النفس

Empress appy يقول...

اولا حمد لله على سلامتك يا ابو صابر
ثانيا فيه كتير بيرضوا بحاجات قليله وبيخلقوا السعاده بس الدنيا مبتسبهومش فى السعاده ضغوط الحياه بقت اقوى يا محمد بكتير

مجداوية يقول...

السلام عليكم
انت كتبت التدوينة دي إمتى !! انا جيت كذا مرة ملقتش حاجة ,,الزمن عندي بقى فيه ثغرات مش عارفة بتروح فين
ما علينااااااااا
جميل جدا المشهد اللي انت شفته وصحيح كما قالوا لنا في الأساطير القناعة كنز لا يفنى ,,وده المفروض بالفعل يكون ,,لكن ومش عايزة أبوظ عليك الذكرى الجميلة للمشهد لكن عندي تساؤل ياترى الأولاد الصغيرين اللي لسه مفتحوش عنيهم حيفضلوا على الرضا والقناعة دي ؟ ,,والله أنا بأتمنى نرجع زى زمان أيام الرضا بقليله والسعادة في اللمة والدفا وشوربة العدس
والسوداني اللى بقشرة اللي بنار الفرن لسه
هيييييييييييييي جلبت علينا المواجع يا بني

الدبوس واضح جدا أكيد انت موجهه لحد بعينه ؟ مش في عينه لأ بعينه أى بنفسه أى بشخصه أى خصووووووووصي ومش حنقولولك مين هو عشان متقولش إننا حشريين لا سمح الله
:)

كل عام وأنت وأسرتك الكريمة بخير بمناسبة المولد النبوي الشريف

وصلى الله على محمد صلى الله عليه وسلم

صلوا عليه وسلموا تسليما

بس خلاص ... يقول...

عودا حميدا
اولا كل سنه وانت طيب بمناسبه المولد النبوى الكريم صلوات ربى وسلامه عليه
جميل جدا الاحساس بالدفا والامان ... هو ده الشعور اللى كانت حاسه بيه الاسره فى روايتك وده اللى خلاهم مايشعروش ببرودة الجو لان الدفا خارج من جواهم
الله عى لمة العيله وبساطة الحياه
اشياء جميله افتقدناها
بعد ان اصبح كل ماحولنا حديد القلوب الوجوه ...الخ حتى حيوانات الجر تحولت الى حديد
الله يعزهم بقا هنعمل ايه
بس خلاص دمت ودامت دبابيسك

Unknown يقول...

يعني ايه سعاده دي؟

ماتفتكرنيش غني
ههههههههههههههه

ToOoKa يقول...

السلام عليكم ورحمة الله وبركاته
ياااه والله زمان
انت عامل ايه ؟
ان شاء الله بصحه وسعاده

الله على الاسره الجميله دى السعاده عمرها ما كانت فى الفلوس

يمكن الفلوس بتسهل حجات كتير وهى من زين الدنيا بس مش مصدر السعاده

السعاده فى رضى الرب وطاعته سعتها حتهون اى حاجه لانو الواحد حيكون عارف انو ربنا حيعوضو خير لو مش فى الدنيا فبرحمتو فى الاخره وسعتها حتيجى راحة البال

اهم حاجه تكون مستوره
انا اسفه على تقصيرى الفتره اللى فاتت :(
ربنا يجعلنا من السعداء فى الدنيا والاخره

الراقـــص مع الذئـــــاب يقول...

معقوووووووولة....توكا
كدا برضو يا توكا
ايه يا بنتي اللي انتي عملتيه دا
طب المدونة ذنبها ايه بس عشان تحذفيها؟؟؟

مستنينك يا توكا في عالم التدوين مرة تانية

الراقـــص مع الذئـــــاب يقول...

دكتورتنا الكبيرة
وعليكم السلام ورحمة الله وبركاته
انا الحمد لله بخير...انتي اللس مش بتسألي يا دكتورة
جزاك الله خيرا علي ردك الجميل وزيارتك الغالية

----------
الاخت الفاضلة عشاقة الفردوس
رحم الله جدتك
انا بقي فهمت جدتك رحمها الله
شرحها للسعادة بسيط وجميل
السعادة بالقناعة وعزة النفس

جزاك الله خيرا علي زيارتك الجميلة

-----------
الاخت سلمي
انا بعتزر عن تقصيري في الكتابة والمرور علي المدونات الصديقة بس إن شاء الله الفترة اللي جاية ابقي متابع ومتواجد مع كل الاخوة المدونين بالمشاركة والزيارات
اسعدتني جدا زيارتك الغالية
دمتي في خير اختي الكريمة

الراقـــص مع الذئـــــاب يقول...

الاخت الفاضلة
hend...hanady
فسبحان الله السعادة بين ايدى الجميع ليست احتكارا على الاغنياء ولا الفقراء ولكن كلاهما لا ينعم بالرضى بل ينعم بالتطلع للغير والسخط على النفس

جزاك الله خيرا علي تعليقك الغالي
اوجزتي في قولك وانجزني

دمتي في خير اختي الكريمة
---------------
الاخت الفاضلة آبي
الله يسلمك ويبارك فيكي
الساعدة في اني اواجه ضغوط الحياة بالرضا يا آبي
بقولك قرطاس لب وقرطاس ترمس بس
مش دا في حد ذاته سعادته؟؟
والا ايه؟؟

--------------

الراقـــص مع الذئـــــاب يقول...

الاستاذة ماجدة
وعليكم السلام ورحمة الله وبركاته
اما بالنسبة للأطفال الصغيرين يا استاذة ماجدة قانا متأكد انهم مدام بيكلوا حلال وأبوهم وامهم بيربوهم علي الحب والبساطة والرضا اكيد هيكبروا علي القناعة
مش اي فقير ساخط علي حاله او بينعي حظه
ناس كايرة جدا هايشة في الرضا ومش بتبص للي في ايد غيرها

اما بخصوص الدبوس فهو للدنيا كلها وليس لحد بعينه يا أستاذتي الفاضلة
مين مش بيحب بلده ولا بيحب اهله وناسه؟؟
كل عام وانتي بخير وصحة وسعادة وسلامة وأمن وامان إن شاء الله
وصلي الله علي سيدنا محمد وعلي آله وصحبه وسلم

الراقـــص مع الذئـــــاب يقول...

بس خلاص
كل سنة وانتي بخير وصحة وسعادة وأمن وأمان
اعجبني جدا تعليقك يا اختي الكريمة
وحسيت فعلاً انك فهمتي اوي اوي اوي انا عاوز اقول ايه
جزاك الله خيرا علي زيارتك وتعليقك الجميل

----------------------
انا إنسان
سعادة يا اخي الكريم دي حاجة غريبة اوي
بتيجي في لحظة وتروح في لحظة
بس انت وشطارتك بقي في انك تعرف تجبها
وبعدين هو لازم يبقي السعيد مش غني؟؟

اسعدني جدا مرورك الكريم اخي الكريم