Translate

الأحد، 8 مارس 2009

موضوع للنقاش

السلام عليكم ورحمة الله وبركاته


ايوة يا ابو صابر يا جامد الحياة بقت مزهزه معاك وبقيت بتزل اجازات والدنيا بقي لونها بمبي

زمان كان الحصول علي وقت فراغ اصعب من تداول العملات المعدنية الجديدة من فئة الجنيه والنصف جنيه

الحمد لله....ضاقت فلما استحكمت حلقاتها فرجت...وكنت اظنها لن تفرج

ومدام الواحد استريح شوية من الضغط اللي كان عليه وفضي شوية هيبدأ بقي يفوق للتدوين وأهله وناسه

حبيبي اللي واحشني كتير(بجزززززز علي سناني).....وعلي رأي المثل اللي بيقول :


إذا كنت بعيد عن التدوين ومشغول .....بكره هتفضي وتفوق يا مذهول


يا سلام عليا...بقول حكم ومواعظ


الناهرده يا جماعة هنركب مع بعض آلة الزمن...وهنرجع للماضي البعيييييييد ...هنرجع للألفية اللي فاتت ونروح لحاجة قديمة اوي كان اسمها مدارس.....


زمااااااااان ايام المدارس....والمدارس يا اخواني هي جمع كلمة مدرسة....واللفظ دا كان متداول في الحقب التاريخية القديمة ....وكان بيطلق علي مبني كبير نسبياً يجمع طالبي العالم من سن 6 سنوات الي سن 17 سنة تقريباً طوال ايام الاسبوع من الساعة السابعة والنصف صباحاً وحتي الثانية ظهراً عدا يوم الجمعة اللي بيعتبر راحة


وكانت المدارس مقسمة الي مراحل....منها المراحل الابتدائية والمراحل الاعدادية والمرحلة الثانوية....وكان في حاجة جميلة اوي في المدارس اللي بكلمكوا عنها....كان كل مدرسة ليها لبس معين (يوني فورم) وكان فيها طابور الصباح والاذاعة المدرسية وتحية العلم


بعد تحية العلم الطلاب بيطلعوا حاجة اسمها الفصول الدراسية....ودي عبارة عن غرف كانت بتتسع في بعض الاوقات الي 10 أضعاف سعتها الرسمية...يعني ممكن الفصل يكون بيتسع ل 30 تلميذ ويوصل عدد التلاميذ فيه ل 300 تلميذ....ايوة يا جماعة...اصل المدارس اللي بقولكم عليها ديه كانت حاجة مهمة اوي في حياة المصريين قديماً


وكان اليوم الدارسي متقسم لحصص دراسية والحصة ديه بيتدرس فيها المواد المختلفة اللي التلاميذ بيمتحنوا فيها ...وكان في شخصية اسمها المدرس او الاستاذ اللي تحورت وتطورت وبقي اسمه (مستر)....وانثي هذه الشخصية كان اسمها أبلة وفي العصر الحديث بقي اسمها (ميس)...والاستاذ والابلة كانوا بيستخدموا وسائل تعذيب كتيرة ومتنوعة زي حاجة اسمها خرزانة وحاجة اسمها فلكة ...وكان التلاميذ بيخافوا منهم اوي وبيعملوا الواجبات بتاعتهم .....وكان فيه بقي شخصية بشعة اوي اسمها الناظر....والناظر دا راجل اصلع وبكرش ولابس نظارة كعب كوباية وشنبه منعكش وسناه صفرا ومكسره وماسك في ايده سلك كهربا 5 مم بيلوش بيه يمين وشمال...وياسلام بقي لما تخدلك منه لسعه الصبح بدري كدا ايام البرد علي طرطيف صوابعك


كنت تمشي في الشارع الصبح كل يوم تلاقي الاب او الام ماسك ابنه من قفاه وبيجر فيه عشان يوديه المدرسة اللي بقولكم عليها...والابن يعيط وبيبقي كاره نفسه ومش عاوز يروح المدرسة


يعني يا جماعة كانت كلمة مدرسة كلمة يكرهها كل ما هو دون سن ال 15


كان اجمل ايام الاسبوع هو يوم الخميس...كان ليه فرحة كبيرة اوي وكل الناس كانوا بيحبوه....كانوا بيخرجوا بالليل...وبيلعبوا كورة ويسهروا ويتفسحوا.....وكان يوم الجمعة بالليل تسمع العياط والنحيب والصراخ اللي كان بيطلع من حناجر الصغار للإستعداد لبدأ الاسبوع الدراسي تاني يوم الصبح


يااااااااااااااااااه.....الدنيا زمان كان فيها حجات غريبة اوي


دلوقتي بقي الوضع اتغير يا جماعة...التهريج بتاع زمان دا خلص....الحجات اللي اسمها مدارس ديه اتقفلت...معدش حد بيروحها طبعاً...والناس استبدلتها بالدروس الخصوصية ...وبقت المباني (المدارس قديماً) استراحات للمدرسين عشان يناموا فيها بالنهار...عشان الناس ديه شغالة دروس طول الليل وعاوزة تستريح بالنهار....وبقيت تمشي الصبح في الشارع استحالة تقع عينك علي حد لابس (يوني فورم) مدرسة...او حد ماسك شنطة فيها كتب....وبقي الاسبوع كله اجازة ....


وتطورت العلاقة بين المدرس والطالب وبقي الطالب بيضرب المدرس والمدرس بيقتل الطالب وبيتحرش بيه وحجات ومحتجات


طيب اللي احنا في دا مجمله ايه؟؟


مجمله كلمة واحدة.....مهزلة ....والله العظيم مهزلة يا جماعة


ماشي كان زمان التعليم في سلبيات كتيرة....بس دلوقتي التعليم في حالة إنهيار


ليه مخطط العملية التعليمية عندنا هنا في مصر فاشل قديماً وحديثاً...


ليه ميكنش عندنا اسلوب وسطي يحفظ للطالب كرامته وفي نفس الوقت يجبره علي احترام التعليم والتعلم


ممكن يا جماعة المدرسة يرجع ليها احترامها بتاع زمان وفي نفس الوقت الطالب يحبها ؟؟؟


والا احنا بالفعل في إتجاه خصخصة التعليم...واللي معاه فلوس هيتعلم وهيدخل الكلية اللي هو عاوزها....دا بعد إنتشار الجامعات الخاصة ومش مهم بقي انه يحترم النظام او حتي يخاف منه...اصل وقتها هيسود مبدأ (بفلوسي ياكلاب)


واللي مش معاه فلوس يتعلم صانعة عشان يعرف ياكل منها....حتي ولو هو احسن من الراجل اللي معاه فلوس


في إنتظار ردودكم وردود افعالكم وملاحظاتكم في هذا الامر يا شباب ....


الدبوووووووووووووووووووس


والله العظيم الدبوس دا ليا قبل ما يكون لأي حد


عاوزين نبقي ايجابيين يا جماعة....بقالنا كتير بنكتب وبننقد وبنهاجم وبنساند وبنأيد


بس مفيش تغيير...عاوزين نتفق إننا نغير ويبقي لينا فعالية....


مش بتكلم في موضوع معين او حالة بعينها....لا...انا بتكلم علي وجه العموم....ممكن يكون كلامي مبهم


بس الموضوع اللي جاي ممكن يوضح فيه انا عاوز اقول ايه


------------------


الموضوع اللي جاي إن شاء الله هحتفل بيه بعيد ميلاد مدونتي الثاني


وهتكلم فيه عن التدوين بشكل عام ...وعن حجات كتيرة مرت بيا في مجتمع التدوين خلال سنتين


يارب يكون اللي فات حجة لنا لا حجة علينا


استودعكم الله

هناك 20 تعليقًا:

هــو..مش ..نـو يقول...

اول الناس المجدع ...هوهو
وعلشان ما تفتكرش أن هوهو منافق
انت عايز عقول معاها تناكف...
سيبك من الديابه و الرقص معاها
ناقش فشكول...وفرشاوي...
في تدوينات بالقنابل امتلأت سماها
والغاوي ...يدور ويلف ع القهاوي!!!

salma mohamed يقول...

اهلا بيك في عالم التدوين من تاني,
كلامك ضخكني بجد,
تعرف التعليم فعلا اتخصص خلاص,وفعلا مدرسة اعدادية عندنا حكومية في مدينتي اشتراها واحد وبقت بفلوس,
طبعا اقل من الخاصة,بس دي علشان لسه في البداية,
والجامعات بقت خلاص كل واحد جيب اي مجموع ومعاه فلوس بيدخل طب وهندسه,
وهيبقى دكاترة ومهندسين البلد حمير,
للاسف البلد عاوزه تتنسف وتتعاد من اول وجديد.

wanna b a bride يقول...

أولا فيه إختراع لطيف جدا في بلاد الفرنجة إسمه
home schooling
ده إحنا كده كده بنعمله بس برضه بنروح المدرسة مش عارفة ليه؟..رأيي إنهم يفتحوه و اللي مش عايز يصحى بدري و يروح المدرسة و المدرسة تطلع عقدها عليه و تضربه و مش عارفة مين يتحرش بيه و المأساة دي كلها يقعد في بيتهم و يروح يمتحن آخر السنة و شكرا

ثانيا مبروك مقدما على عيد ميلاد المدونة التاني عقبال المتين إن شاء الله

ثالثا مبروك ع الأجازة :) شكلك عندك واسطة يا عم :))

رابعا و هو الأهم : متشكرة جدا عشان حكتلي حكاية الكتاب و العسكري (ينفع إسم فيلم على فكرة) :) و الله فرحت جدا جدا ..لو مافيهاش أيتها هز لبرستيجك في جيش مصر الصنديد أمانة تبلغ أخونا العسكري ده تحياتي

Vague يقول...

السلام عليكم

انت بتتكلم عن التعليم؟

يعنى هيا جت عالتعليم..

انا معاك طبعا ان التعليم اهم الحاجات..بس فى ناس مش لاقية تاكل..ومش لاقيه مكان تسكن فيه .. وناس شايفة ان الفساد ده هو اللى بيكسب دلوقتى

وفى وزير عارف انه مش هيتغير ..لان هو مافيش غير حزب واحد فى مصر اللى بيحكم ..ومافيش منافسين
وكدا كدا هيستمر فى مكانه يبقى يشتغل ليه؟

مجداوية يقول...

السلام عليكم
نقدر نقول عودا أحمدا للرجوع للتدوين بهذا الثقل والمواضيع الجادة وأيضا المتتالية ,ماشاء الله لا قوة إلا بالله ,,

بص حضرتك أنا اعمل في مدرسة لغات ,,الحمد لله لا أدرس للتلاميذ والا كنت الآن متهمة في قضية قتل أحدهم
:)
لا أنا بهزر لكن الجد أن حال التلاميذ سىء وحال المدرسين أسوأ فما نعاني منه سلسلة متصلة من سوء كل شىء ليس التعليم فقط العلاج لا بد أن يشمل المجتمع كله والعلاج ببساطة موجود ولكننا لا نأخذه فالعلاج هو تقوى الله والتعامل مع الله بأنه يرانا ولكن لا أحد يستحضر الله إلا من رحم ربي

المشكلة مشكلة ايمان ومعرفة حقيقة الايمان وتنفيذ أوامر الله وتجنب نواهيه
لأنك اذا تتبعت الأسباب التى أدت الى هذا الانهيار فستجد أن كل بحث يؤدي الى نفس النقطة وهى عدم خشية الله

الحل يبدأ من هذا الأمر فالأب والأم بالتأكيد سينجبان أولادا يتعلمون منهما تقوى الله ومنهم ستجد المجتمع أغلبه أصبح يعمل من خلال هذا المعتقد الأساسي للايمان ,,قد تحدث القوانين واللوائح الاجبارية نوعا من النظام لكن لن تخلق أخلاقا للناس فقد تحد كاميرات النراقبة مثلا من حوادث الغش أو السرقة لكن لن تنهيها إلا الأخلاق وتقوى الله

نحن في مدرستنا لاحظنا التدهور الرهيب السريع للآخلاق ونحاول أن نقوم سلوك الطلبة ولكن نجد بعض المشكلة في الأهل فهل نربي الأهل !!!؟؟ أو في الأصدقاء خارج المدرسة أو في النت
الأمر الآن كما يقولون اتسع الرتق على الراتق
بمعنى أن الأمر أكبر من أن نحله فلا بد أن يحدث أمرا ما يعيد الناس الى خشيتهم من الله فالاصلاح الفردي سيكون بطيئا ولا يتناسب مع سرعة تدهور كل الأمور
فالدعاء أن يخرجنا الله مما نحن فيه مع استمرار تغيير أنفسنا على المستوى الفردي أعتقد أنه هو الحل الوحيد المتاح

Empress appy يقول...

التعليم خلاص انا اتنقشت فى مجلس مش عارفه ايه كده من كام يوم فيه وتعبت بصراحه ومفيش احسن من التعليم الخاص حاليا بجد فى ظل التدهور بتاع الحكومى
العمل الاجابى بقى يا ريت حضرتك تطلع على ده علشان انا طلعت روحى من مناخيرى
دى وثيقه قعدنا نعملها شهر ونص ونترجمها
ادخل اتفرج على التوقيعات علشان تعرف ان المدونين فنجريه بق وبس
http://appyplant.blogspot.com/2009/02/blog-post_24.html
البوست عندى وهتلاقى فيه اللينكات بتاعت الوثيقه

Doba يقول...

الانهيار التعليمى بقى حاجة صعبة قوى
وعلشان تغير وتطالب ان الدنيا ترجع زى زمان يبقى احنا محتاجين ندمر حمامنا القديم

اقصد نغير النظام التعليمى والمناهج بأكملها لنواكب التغيرات العالمية ونستفيد حاجة قيمة من اللى بنتعلمه وبيتعلمه اولادنا

بقالى كتير قوى مزورتكش
كالعادة متألق

تحياتى
هبة

Unknown يقول...

السلام عليكم ورحمة
الله تعالى وبركاته
معاك فى كتير من اللى قلته
عن المدارس زمان ودلوقتى وخصوصا
(النحيب والعويل )بتاع يوم الجمعة
بليل :( بس انا كان بقى كوتيمى ومن
غير نفس طبعا لانى كنت لا اجرؤ على هذا
امام اهلنا.
طيب نغير اللى حاصل دلوقتى ونرجع بالزمان وبالاحترام للمدارس ازاى؟
الحقيقة مش عارفة ممكن نبدأ منين ؟
ازاى اخلى عيل يذاكر لاجل ما يبقى مهندس ولا مدرس ولا حتى محاسب وهو
بيسمع عن لعيبة الكورة والى بياخدوه
فى المكافآت والتكريم والصور وخلافه!
او بيلاقى (أم حلاوتهم الشغالة )بتقبض فى ساعتين او تلاتة بالكتير ما يقبضه(ممكن عمه خريج الجامعة )فى شهر ..صح؟

shaimaa samir يقول...

الدبوس رائع

الموضوع

نريد حلا!!

الانهيار فى كل شىء


عود احمد

غير معرف يقول...

إلى مدوني مصر الأحرار
السيد الفاضل صاحب مدونة /الرقص مع الذئاب

تحية طيبة وبعد

شباب مصر الأوفياء
أمل الحرية وبناة المستقبل
ندعوكم للمشاركة معنا في
التحالف الوطني ضد التزوير
تحالف يضم كافة القوى الوطنية الموجودة على الساحة المصرية
نهدف إلى فضح وتوثيق كافة أشكال التزوير التي تتم في الانتخابات المصرية
نهدف لنشر الوعي الانتخابي وثقافة المشاركة و مبدءا المساواة والحرية
ندعوكم للمشاركة معنا بالإدلاء بشهادتكم و أرائكم حول تزوير الانتخابات وما هو منشور
ندعوا كل صاحب كلمة حرة للتعبير معنا عن رأيه في هذا الداء وطرح صور للدواء
ندعوا كل شريف حر يستطيع مساعدتنا للمشاركة معنا بما لدية من إمكانيات ومواهب ووقت
و نرجوا منكم المساهمة معنا في نشر إعلانات الموقع والجروب والقناة على مدوناتكم الشخصية في سبيل نشر الحق والعدل ومن باب المشاركة في التوعية والتوثيق لحقيقة هذا النظام المزور لإرادة الشعب
نرجوا ممن يضع الإعلان لدية إبلاغنا عبر أيميل الموقع لوضع أسم موقعة او مدونتة ضمن قائمة المواقع الصديقة لدينا
شاكرين لكم حسن تعاونكم معنا

موقعنا www.sgelalmozwreen.com سجل المزورين

لتحميل إعلانات الموقع هنا
http://sgelalmozwreen.com/images/e3lan-1.gif
أو
http://sgelalmozwreen.com/images/e3lan-2.gif
أو
http://sgelalmozwreen.com/images/e3lan-3.gif

لتحميل إعلانات قناة سجل المزورين على اليوتيوب
رابط القناة http://www.youtube.com/Sgelalmozwreen

الاعلانات
http://sgelalmozwreen.com/uploads/you tube.jpg
أو
http://sgelalmozwreen.com/images/1.gif
أو
http://sgelalmozwreen.com/images/1%5C%27%5C%27%20copy.gif
أو
ولتحميل إعلان جروب الفيس بوك
رابط الجروب http://www.facebook.com/group.php?gid=57329097688
الاعلانات
http://sgelalmozwreen.com/images/11%5C%27%5C%27.gif
والسلام عليكم ورحمة الله وبركاته
سجل المزورين

غير معرف يقول...

دى اولا واخيرا مشكلة تربية سواء للطلاب الذين يعتقدون ان المدرسين ملكهم او للمدرسين الذين يعتقدون ان الطلاب منفث جيد لكبتهم الحياتى واولا واخيرا تستر الادارة المدرسية على ما يحدث واخرها حادثة مدينة نصر والقاء ماء مغلى على احد الطلاب
اين التربية والرقابة المدرسية

ToOoKa يقول...

السلام عليكم ورحمة الله وبركاته
ازاى بقه دا التعليم فى مصر مافيش زى
والعالم كلو بيحاول ياخد مناهجنا علشان يعمل زياها امال

ااااااااااااااااه
امال ايه اللى رجعنا ورا كده
انا حاسه بالموضوع دا جدا وخصوصا فى كلية العلوم اللى مفروض بيطلع منها العلماء يعنى بيتقاس بيها مستوى البلد من ناحية البحث العلمى

اللى حتى المجتمع بيعتبرها مش من كليات القمه

اى اصلا حكايه كليات القمه
هو مش كلو تعليم بردو
ولا مش مفروض يكون فى كل المجالات علشان يكون فى بلد متقدمه اصلا

البلد دى مش حيتصلح حالها غير لما التعليم يتعدل من الاخر كده

ادعيلى بقه اخر شهرين واتخرج ان شاء الله
أختك توكا

مجداوية يقول...

السلام عليكم

أين أنت يا راقصا مع الذئاب ولاعبا مع الأسد ؟؟؟

لعل المانع خيرا

عالمى ازرق يقول...

كان اجمل ايام الاسبوع هو يوم الخميس...كان ليه فرحة كبيرة اوي وكل الناس كانوا بيحبوه

اليوم المفتوح على القناة الاولى والتانية والفيلم العربي والاجازة
يااااااااااااه
كنت ايام حلوة اوى بجد

بس تعرف تطور التعليم للمرحلة السيئة دى نتيجه طبيعيه لتطور امور كتير اوى اولها التربية فى البيت والاهتمام بالاطفال من الاساس

وبتفق معاك اوى فى اننا نكون ايجابين ولو فى حاجات صغيرة على الاقل منبقاش بنكتب وبس .. حتى لا نكون ممن يقولون مالايفعلون

دمت بكل خير

م/ الحسيني لزومي يقول...

61عاما علي النكبة
ونحن أقرب للعودة
والعودة حق لا عودة عنه
شارك في الحملة الالكترونية لإحياء الذكري ال 61 للنكبة ( عائدون)
ضع شعار الحملة علي مدونتك

حلم بيعافر يقول...

ياريت ياعم يتخصص
كده كده طافحين الدم

حقوق الضباط الإحتياط يقول...

محمد بيه
مش بكتب بس الا علشان اقولك ازيك
واحشنى يا دانسر
طمنى عليك وعلى اخبارك واحب اقولك هانت
شهر الخير (رمضان) هييجى بالخير وبالافراج باذن الله
سلام عليكم

بنت الصالحين يقول...

لن ازيد علي ماقلته

ماشاء الله كفيت ووفيت والحال واضح للكل


وانا لله وانا اليه راجعون


الغلط ع الاهل

الاهل هي الي تقدر تعمل موقف وتكون ايجابيه

المهم العلم مش الدرجات

الله المستعان

عودا حميدا

سلوى يقول...

كل سنه وحضرتك طيب
وبخير وصحه وسلام
أنت وكل الأسرة :)

مجداوية يقول...

السلام عليكم
كل عام وأنتم بخير , تقبل الله صيامكم وقيامكم , اللهم آمين