Translate

الأربعاء، 1 ديسمبر 2010

مصلحتي يا مصلحتي

السلام عليكم ورحمة الله وبركاته

كيف حالكم يا شباب ...والله واحشني كتير كتير كتير

معلش...انا عارف اني غيابي كان طويل اوي الفترة اللي فاتت بس فعلاً انزلقت في مستودع المسؤليات والاستعداد للتخلي عن الحرية تحت مسمي الزواج

حلوة اوي انزلقت ديه....

نسبنا بقي من المسائل الشخصية اللي مش مهمة للسادة الزوار ونرجع تاني نفضفض ونتكلم زي زمان

فاكرين زمان....ياااااااااااااااااه...تصدقوا انا مش فاكر....مش مهم اهو النسيان دا نعمة برضو من نعم ربنا علي العباد

بصراحة اللي استفزني الايام اللي فاتت ديه واكيد استفز ناس كتير انها تكتب عنه هو موضوع الانتخابات

الحمد لله انا ربنا رزقني بشغل مش بشوف فيه غير الصحراء والبحر واصدقائي هناك العقارب والثعابين والطريشة...بس ولله الحمد بحب مجال عملي جدا ويكفي انه مجال فريد من نوعه ...وهو توليد الكهرباء بواسطة طاقة الرياح عن طريق مزارع الرايح اللي موجودة في منطقة الزعفرانة

الحمد لله علي نعمه التي لا تعد ولا تحصي....

المهم بقي نرجع لموضوعنا وهو الانتخابات
الدورة اللي فاتت سمعنا شعارات الاخوان وتلهفنا عشان ننجح الناس ديه وسمعنا شعارات الاصلاح والتغيير والكلام اللي يبث في نفوس المتشائمين الامل

وحصل والاخوان نجحوا علي الرغم من نصائح بعض العقلاء اللي قالوا الحكاية محصلة بعضها وهي عبارة عن كعكة يتنازع عليها اصحاب المصالح من الحزب الحاكم والاحزاب المعارضة فريح رجليك ومترحش في حته

نجح الاخوان نجاح ساحق علي الرغم من تزوير الحكومة زي ما حصل في لجنة ابراهيم الفقي ونجح رغم انوف الجميع وحتي انف القضاء نفسه (يعني التزوير مش بيفرق اوي)

بس ايه اللي اتغير لما المعارضة والاخوان كان ليهم الايدي العليا في الانتخابات.....حد شاف اي تغيير خلال السنين اللي فاتت؟؟

نسبة البطالة فعلا قلت؟؟ اسعار السلع انخفضت؟؟؟ زادت المرتبات وانخفضت الضرائب؟؟؟ التغيير والاصلاح اخبارهم ايه؟؟

محصلش حاجة....فشلوا بمعني الكلمة...عارفين ليه؟؟؟ لأن الهدف كان سياسي مكنش ديني

طبعاً الاخوان اخدوا فرصة عمرهم الفترة اللي فاتت لإستمالة قلوب الغلابة من المصريين المطحونين...وللأسف ضيعوا الفرصة..أو ضاعت منهم الفرصة

هتلاقي طبعاً كلام مختلف منهم وهيحسسوك انهم عملوا اللي متعملش عشان مصلحة الناس

بس للأسف الناس بقي عندها وعي وفهمت الحكاية...والدليل علي كدا اللي حصل الدورة ديه

كان في تزوير وكان في فساد...بس من غير التزوير والفساد كان الحزب الحاكم هو اللي هيكسب برضو

ودا اللي حصل في دوائر مدينتي الجميلة مدينة الاسماعيلية

الدورة اللي فاتتت نجح مرشحين الاخوان وسقط كل مرشحين الوطني وكتبنا لافتات تقول اهلا بك في المحافظة التي لم ينجح فيها مرشحين الوطني

فاز المرشح صبري خلف الله بإكتساح ضد مرشح الوطني محمود عثمان ابن المعلم عثمان احمد عثمان

علي الرغم من حب الناس لأبناء عثمان لإجابيتهم وخدمتهم مصالح اهل بلدتهم حتي دون التواجد علي كرسي البرلمان القذر

نفس السيناريو حدث في هذا العام بين الاخواني وابن عثمان واكتسح ابن عثمان الانتخبات بتفوق زاد عن 96% رشحه ليكون زعيم للأغلبية بعد عن حصل مرشح الاخوان علي اصوات اقاربه ومعارفه فقط ومازال يتغني بالتزوير في الانتخابات علي الرغم من ان الجميع قد تعاهد علي ترشيح محمود عثمان وعدم ترشيح مرشح الاخوان..ودا كان نبض الشارع الاسمعلاوي وأراء الناس كلها (يعني بصراحة من غير تزوير)

اخفق الاخواني واتهم الانتخبات بالتزوير ولكنها نتيجة طبيعية ومنتظرة ...

انا لست ضد او مع لأنها في النهاية كما اسلفت وقلت : كعكة يتنافس عليها الاحزاب ولا عزاء للمصري المطحون

وعلي العلم اني لم اذهب الي الانتخبات ولن اذهب ابداً ما دمت حياً لأنها لعبة قذرة لا تغني ولا تسمن من جوع

وتأتي الفتاوي الاخوانية لتتهم من يعطي صوته للوطني بأنه آثم ويتحمل اوزار كالجبال ...وأن الصوت امانة امانة امانة يا ولدي

اتلهوا علي عينكوا واسكتوا.....وبطلوا فتاوي الانتخبات ديه واعملوا مشاريع مفيدة زي زمان (بس متكنش علي سبيل الدعايات الانتخابية)

اخيرا عاوز اقول يا جماعة انا لست مع الوطني او ضد الاخوان....فلم اجد فارق بين الاثنين الا في المسمي فقط

انا مع مصلحتي ومصلحة المطحونين الذين اقصي طموحهم هو الحصول علي رغيف العيش

الدبووووووووووووووووووووووس

الايجابية تبقي احلي لو كانت فعل ...مش كلام....بس كدا (علي وجه العموم وليست خاصة بالموضوع )

هناك 5 تعليقات:

ما علينا يقول...

السلام عليكم ورحمة الله وبركاته

ازيك يا محمد جميل جدا أن نطمئن عليك
يارب دايما تكون في احسن حال

وزواج مبارك ان شاء الله معلش بقى مضطرين نقول مبارك
وربنا يرزقك السعادة دايما يارب

==========

يمكن نسبة كبيرة من كلاك صح
لكن اعتقد انه ليس من الانصاف ان نضع الاخوان والوطنى في كفة واحدة

او على الاقل الاساس لكل منهم

لان محدش ينكر ان منهج الاخوان كاساس ليس هو ما وصل به افراد الجماعة الحاليين

المشكلة مشكلة افراد والافراء واسلوب تطبيقهم هو دايما اللي بيبوظ الدنيا


لكن في النهاية نتفق ان الحكاية ما بقتش دين لكنها هدف السيطرة على الحكم


وان كنت لا اعيب عليهم كحزب ايا كان اتجاهه ان يكون دا هدفهم دا حق سياسي
لان معاهم الوضع اعتقد هيبقى احسن الوحشين

لكن اعيب عليهم كما اسبقت انت ادعاءهم ان الهدف هو اعلاء كلمة الدين
لان دا ممكن جدا تحقيقه على مستوى المجتمع
بدون الحاجة للحكم لو هم ركزوا جهودهم على المجتمع وافراده





حمدا لله على العودة يا محمد
ايها الراقص مع الذئاب

وكل سنة وانت بخير والامة الاسلامية كلها بخير

مجداوية يقول...

السلام عليكم

عوداً أحمداً ومع ألف سلامة
:)
طالما ندهتك النداهة وسوف تتأهل يبقى مع السلامة من دلوقتِ أو حنلاقيك كتير على النت
:)
بجد بقى أسأل الله أن يقر عينك بما ترضى ويجعلها زوجة صالحة وأم صالحة وتكون لك خير متاع الدنيا, اللهم آمين

أنا مش معاك
التزوير هذه المرة ميخرش المية الإنتخابات اللي فاتت كانوا بيجربوا يفتحوا ثغرة الديقراطية على حسب الأوامر وكانت قبل حماس وأحداث غزة وكل الكعبلة دي المرة دي ولا خرم إبرة , يعني انتخابات نزيهة 100% مفيهاش معارضة من أى نوع

الإخوان في المجلس جابولهم صداع وده انجاز برضه
:)
تبقى واهم لو افتكرت إن الإخوان يعرفوا يصلحوا حاجة غصب عن الحكومة , هم بيسبوهم يتشالوا ويتحطوا ولا في دماغهم ولما الصداع بيزيد يحبسوا القيادات بتاعتهم عشان يسكتوهم شوية وهكذا
لكن أعتقد بعد غلق هذه الثغرة المفروض الإخوان وكل المعارضة والشعب يبطلوا أدوار الكومبارس وياخدوا أدوار بطولة مطلقة ,, مُطْلَقَه مش مطّلّقة, الشر برة وبعيد
يابشمهندس إنت متكتف ومعاك 80مليون مصري متكتفين زيك , الكماشة عايزة الريس عبد الواحد وعلي , عشان خاطر انجي ترفع راسها تاني !

بنت الصالحين يقول...

عوداً حميداً ياباشمهندس ومبارك الخطوبة وربي يتمملك على خير وييسر أمورك


محدش نزل الانتخابات دي علفكرة وفعلا كلها محصلة بعضها

ذو النون المصري يقول...

اهلا بك
اعتقد ان الامر كله كما يلي
الحكومة تصنع الام الناس
و الاحزاب و الاخوان يتاجرون بها
لكن لا احد مع الناس فعلا

عاشــــــ النقاب ـقــــة"نونو" يقول...

يااااااااااااااااااااه
السلام عليكم ورحمة الله
كل عام وحضرتك بخير وربنا يوفقك ويتمم لك بخير يارب
انا كمان صوتي امانة وما بانتخبش ومش هنتخب الا لما احس انه هيروح للناس الصح ومتفقة معاك في كل حرف وموافقاه جدااا
مسميات فقط والهدف سياسي المطحون اخر حاجة
ما تتاخرش علينا كتير
تحياتي