Translate

الخميس، 7 يونيو 2007

السلام عليكم ورحمة الله وبركاته
والله زمان يا شباب
رجعنا تاني نكتب ونفضفض ...رجعت تاني اعمل اي حاجة بدون اوامر
رجعت تاني لأحلي ناس عرفتهم
الموضوع المرة ديه طويل شوية....معلش بقي استحملوني
انا مكتبتش بقالي 45 يوم وعاوز اقول حجات كتير اوي
وبرضو بالنسبة للموضوع هيكون مقسوم لنصفين
النصف الاول هيبقي كلمة شكر وعرفان لكل الناس اللي افتكرتني في غيابي
واللي عملوا اللي مكنتش متوقعه
وكان علي رأسهم الدكتورة الجميلة جيهان اللي كانت بدخل يومياً المدونة تفتحها وتسيب ردها كأني موجود فيها
عاوز أقولكم حاجة عجيبة جدًا
الناس اللي هنا كانت بتحسب معاد الرجوع باليوم وعرفوه...اقسملكم بالله انا معرفت اني نازل يوم الاربع الا يوم الجمعة اللي قبلها
فترة المستجدين في اي كلية عسكرية بتكون علي الاقل 45 يوم
يعني الدفعة اللي قبلينا علي سبيل المثال قضوا 58 يوم
الكلية الحربية السنادي قضوهم 120 يوم
وكانت حسبتنا كلها علي اننا نازلين يوم الاتنين اللي موافق 11\6 يعني مكنش حد فينا يتوقع ابدا يوم الاربع ...وانا لوعرفت الحسبة بتاعتكم كنت هضحك عليكم عشان كان في حكم المستحيل اننا ننزل يوم اربع...لازم ننزل يوم اتنين ونرجع يوم جمعة عشان الاجازة تبقي 5 ايام
بس سبحان الله نزلت يوم ما انتم توقعتم
اما بالنسبة للردود الجميلة انا مش هعرف اعلق كل رد لسببين
الاول اني محتاج 3 ايام عشان ارد علي الناس اللي كانت في منتهي الجمال
ثانيا مفيش اي كلمة هتوفي ايدا اللي عملوه وانا غايب
بس لازم اشكر كل واحد بأسمه واهتمامه بيا في غيابي ودخوله والسؤال عني
استأذنكم في اني
أبدأ اول رد للأخت جيهان وهو هيكون علي اخر كومنت ليها
--------------------------------
اختي الفاضلة جيهان
كما اخبرتك سلفا اني لن استطيع ان اوفي جزء ولو قليل من اهتمامك وسؤالك عني في غيابي
فقد بعثت ردودك الدم في عروق مدونة هجرها صاحبها رغم عنه....وتركها دون ان يدري ان هناك من يحبها مثله
ما كتبتيه من يوميات في مدونتي واهتمامك وحرصك علي زيارتها يوميا لن توفيه كلمة شكر
يكفيني ويسعدني حبك لمدونتي واستمرار تواجدك وردودك
علي الرغم من إنشغالك وغربتك خارج الوطن...فلم تغفلي ابدا تواجدك في مدونتي
ابدا اختي الكريمة لم تكتبي حرفا اغضبني او ضايقني
فأنا اعتز بكل حرف دقته اناملك في مدونة زادت قيمتها عندي بمشاركتك ومشاركتك اخواني
لكي من ارق تحية...واتمني ان يهون الله عليكي الغربة ويرزقك بما يسعدك فيها....

----------------------------------------------------
وبترتيب تردد الناس ودوام سؤالهم عني نبدأ بالاخت الجميلة العروسة
رينا او نوثينج
علي فكرة انا عرفت من ردودك انك انتي نوثينج
الحمد لله لسا فيا مخ وبفكر
ربنا يهون عليكي الغربية ويسعدك في حياتك
ردودك جميلة جدا وسؤالك
الدائم عني ودمك الخفيف
كان بيفرحني اوي..بس اللي زعلني هو احساسك بالاكتئاب وزعلك
لما اكتب النص التاني من الموضوع انتي وجهينة هتنسوا يعني ايه اكتئاب وزعل
ربنا يجازيكي خير ويباركلك ويتمملك بخير يا عروستنا
----------------------------------------------------------
ونيجي بقي للدماغ الكبيرة اوي والتهييس....صرصارة
انا هناديكي بأسمك وهخلي الناس تعرفه يا سارة
بجد يعني
احلامك وكلامك كانوا زي السكر
انا كمان كنت بحلم كدا بيوم الرجوع وبتخيله
وشكرا يا ستي علي مشاركتك ليا الاحساس بالحر
بس الحر هناك بقي نوع تاني خالص
جزاكي الله خيرا يا سارة وربنا يكرمك يارب ويسعدك في حياتك
--------------------------------------------------------
واحدة من الناس
الحمد لله اني كنتي بتيجي تأكلي الذئاب الصغيرة ومهتمة بيهم في غيابي
كدا امشي المرة ديه وانا مطمن
اسعدني جدا اختي الكريمة دوام السؤال عني واستمرار ترددك علي مدونتي في غيابلي وكأني موجود
وانتي عارفة مدي تقديري ليكي
دمتي في خير وجزاكي الله خيرا علي شعورك الجميل ومشاركتك الغالية اوي عندي
--------------------------------------------------------
الاخت الجميلة محض روح
كلامك وردرودك وترددك علي المدونة في غيابي وسؤالك عني ما هو الا وسام جميل علي صدري يا محض روح
وشهادتك ليا ولكتباتي دا شئ يشرفني
انا يا اختي الفاضلة اسمي محمد صابر
وتشرفت جدا جدا بكل حرف كتبيه عندي
جزاكي الله خيرا ودمتي في خير إن شاء الله
---------------------------------------------------------
BinO
جزاكي الله خيرا اخي الكريم علي كلامك الجميل...وفرحني جداااااااا انك اسمعلاوي
واخبار الاسماعيلي الحلوة
والاخبار التانية اللي مش حلوة بتاعت المفتي وممرضات ليبيا
):
بس للأسف مش هعرف اشوف ماتش الحرس بتاع يوم الجمعة
ربنا يكرمك ويجازيك خير اخي الكريم واتمني دوام تواجدك وشرف ليا ترددك وسؤالك عني في غيابي

---------------------------------------------------------
عالمي ازرق
جزاكي الله خيرا علي كلامك الجميل ومجاملتك الرقيقة
وبدون اي تعجب منك الجيش اللي انتي تخيلتيه في المدينة الفاضلة هو بالضبط اللي انا فيه
ومن غير اي كلمة زيادة او مناقشة
عشان المناقشة هتجر تفاصيل...والتفاصيل هتجر حكاوي...واحنا اتفقنا ان النظام هناك يعتبر من الاسرار العسكرية ومش هنتكلم فيه
اما بخصوص العواصف الترابية اللي كانت موجودة فحدث ولا حرج
انا شفت ايام ما يعلم بيها غير ربنا في ايام الحر والعواصف الترابية
بس الحمد لله....احنا رجالة ومصر لسا بخير
مرة تانية ربنا يكرمك ويجازيكي خير علي دوام السؤال عني يا عالمي ازرق
-------------------------------------------------------------
tearwhispers
ربنا يكرمك ويجازيكي خير علي تواجدك وسؤالك الدام
وربنا يكون في عونك في الامتحنات ويعديها علي خير إن شاء الله
علي فكرة ردوك كلها جميلة واهتماك وسؤالك عني في غيابي وترددك علي المدونة دي حاجة كبيرة اوي عندي
ربنا يجازيكي خير وإن شاء الله يبقي لينا فرصة تانية ونشترك مع بعض في مواضيع اكتر وازورك اكتير في مدونتك الجميلة
دمتي في خير اختي الكيرمة
-------------------------------------------------------------
دكتور خالد
ربنا يجازيك خير يا خالد علي سؤالك واهتمامك
وانا ولله الحمد احتسبت النية في وجودي في الجيش علي الاعداد للجهاد وانتي اكون قادر علي تحمل المشاق ....والاقتضاء بالصحتبة رضوان الله عليهم
لعن الله من سبهم علي صفحات الجرائد وشل ايديهم
جزاكي الله خيرا علي الدعاء
بس انا مكنتش في دهشور
دهشور مركز تدريب للجنود
وبينزلوا اجازة بعد فترة اقل مننا
انا كنت في كلية ضباط الاحتياط في فايد
والاجازة فيها بتبقي بعد فترة طويلة شوية والنظام مختلف جدا
----------------------------------------------------------------------
مهند حبيب قلبي
كنت بجد ليك عندي وحشة خاصة....ربنا يكرمك ويجازيك خير يارب
ويوفقك في شغلك الجديد
علي فكرة وانا بتصفح الردود زعلت اوي اني ملقتش اسمك
بس لما لقيته فرحت اوي يا هنود
انا عارف انك مشغول اوي ...ربنا يكون في عونك
إن شاء الله اعرف اكلمك الناهرده لو ربنا اراد
دمت في خير اخي الكريم وجزاك الله خيرا علي السؤال عني في غيابي وتواجدك في مدونتي
------------------------------------------------------------------------
بوسي
بجد كلامك جميل جدا
وزكر قول سيدنا عمر رضي الله عنه وأرضاه
وهي دي فعلا التجربة اللي انا استفتدها من الجيش
والنظر الي نصف الكوب الممتلئ
جزاكي الله خيرا علي ترددك وزيارتك للمدونة في غيابي
-------------------------------------------------------------------------
الدكتورة خمسة فضفضة
معلش بقي الجيش علينا حق
والحمد لله ان اخوكي ملوش جيش
نفد بجلده
هههههه
علي فكرة اخدت معايا صن بلوك
بس الحمد لله معملش اي حاجة
وامي لما شفتني معرفتنيش .....
الشمس اللي هناك مفيش حاجة تعرف توقفها
حاجة كدا مركزة وطبيعية
جزاكي الله خيرا علي سؤالك ودخولك المدونة وترددك عليها في غيابي
دمتي في خير يا دكتورتنا
--------------------------------------------------------------------
الكاتبة الرقيقة جدا حورية
جزاكي الله خيرا علي زيارتك الكريمة في غيابي
وادام الله عليكي الصحة والعافية
واسعدني جدا سؤالك عني في غيابي
وإن شاء الله ارجع اتابع كتاباتك المتميزة الجميلة
دمتي في خيرا
--------------------------------------------------------------------
اختي نان
جزاكي الله خيرا علي شعورك الجميل
وزيارتك الغالية في غيابي
دمتي في خير وصحة وسلامة
اسعدني جدا مرورك وتعليقك الرقيق
--------------------------------
اخي الجميل الرقيق يامن
لا اجد اي كلمة توفي شعوري الجميل وشكري لكلامك الجميل
اكرمك الله يا اخي
كلامك وزيارتك في غيابي شئ اعتز به
ورقتك ومشاعرك الجميلة اجمل ما فيها
دمت في خير يا اخي الكريم وجزاك الله خيرا
----------------------------------
خالد
جزاك الله خيرا اخي الكريم خالد علي مرورك وسؤالك عني في غيابي
ودمت في خير وصحة وسلامة
------------------------------------
سمسم
ربنا يكرمك يارب وهبقي اسلملك يا سيدي علي عبود
جزاك الله خيرا علي زيارتك ليا في غيابي
------------------------------------------
اخي الجميل شارم
جزاك الله خيرا علي مرورك الكريم
وزيرتك في غيابي اسعدني جدا
------------------------------------------
r.r
اختي الكريمة جزاكي الله خيرا علي مرورك وتواجدك في مدونتي في غيابي
والحمد لله ان ربنا اكرم اخوكي وخلص جيشه علي خير
اسعدني جدا مرورك الكريم
دمتي في خير
------------------------------------------
meroooo
اسعدني جدا مرورك الكريم وسؤالك عني
واسعدني وشرفني اضافة مدونتي في مفضلتك اختي الكريمة
دمتي في خير وصحة وسلامة
-----------------------------
mesh2dra
جزاكي الله خيرا علي مرورك الكريم ومشاركتك في المودنة في غيابي
اسعدني جدا تواجدك ايتها الاخت الكريمة
وكلامتك الرقيقة
-----------------------------------------
مانجر
محمد العدودي
Esmeralda
مادو
ihapoof
جزاكم الله خيرا علي تشريفكم ليا وأول زيارة لمدونتي في غيابي
وكلامكم الجميل اوي اللي اعتبره وسام شرف علي صدري
ihapoof تمام يا فندم
(:
-----------------------------------------


تحية وشكر لكل من فتح المدونة في غيابي حتي وإن لم يكتب فيها حرف

تحية وشكر الي من تزكرني في غيابي

جزاكم الله خيرا اخواني واخواتي وأسأل الله ان يوفقني واستطيع ان ارد ولو جزء بسيط من هذا الجميل الذي طوق رقبتي

والله الذي لا اله الا هو لن تستطيع الكلمات ان اتصف شعوري

ولكني اثق انه سوف يصل اليكم

انتهي الجزء الاول

-----------------------------------------------------------------------------------

اما النص التاني من الموضع فهكلمكم فيه عن تجربة غيرت من حجات كتير اوي فيا

وغيرت من افكار كتيرة جدا وخلفيات غلط كانت مترسبة عندي

ومترسبة عندكم انتم كمان

طبعا احتراما للعسكرية وتقليدها وحفاظا علي اسرارها مش هقول تفصايل اي حاجة جوا الوحدة العسكرية او الكلية

صدق رسول الله صلي الله عليه وسلم حين سمانا خير جنود الارض

نعم نحن خير جنود الارض

وانا اقولها بكل عزة علي الرغم من ما لاقيته من صعوبات وشدة قد لا يتحملها بشر...وما سببه التجنيد ليا من ضياع فرص العمل في الحياة المدنية وتاخري في العمل وصعوبة الحصول عليه بعد انتهاء مدة تجنيدي

اقولها بكل ثقة

اني افخر بإنتمائي للقوات المسلحة المصرية

قد لاقيت ويلات ومررت بمواقف لن امر بها في الحياة المدنية ابدا

و قد تعاملت مع اشخاص قد لا يتصفوا بالادمية وقد نظلم الحيونات إذا شبهناهم بها

ولكني خرجت في فترة قليلة جدا بفوائد عظيمة

ولله الحمد قد انار الله بصيرتنا ونظرنا الي الجوانب المضيئة في هذه الحياة الشاقة جدا

ان صح القول فإن القوات المسلحة بالفعل هي مصنع الرجال

قد ترسبت عندنا مفايهم خاطئة بضعف الجيش واستكانته والعيش في فترة رخاء

وبث البعض روح الانهزامية وعدم قدرتنا علي خوض اي معركة في ظل التقدم العكسري الرهيب للدول المتقدمة ودولة العدو

ويتهم اخرون الجيش بان امريكا تتحكم فيه

وبكل صدق وثقة اقول لكم لا تستمعوا الي من يريد هدم معنويتنا

هذه هي حرب العدو الخفية

فهو لا يقدر ابدا علي الحرب النظيفة...فعندنا اسود ضارية تختفي تحت هيئات بشرية

إذا اشتمت رائحة العدون برزت انيابها ومخالبها لتنغرس في قلوب العدو وتخرجه من بين ضلوعه وتمزقه اربا

فليفخر المصري بجيشه ورجاله

ليست خطبة او مقال نصي

بل هي تجربة عشتها في فترة قليلة

داخل منظومة مرتبة ورجال لا تعرف المستحيل

تعلمت هناك كيف اشارك صديقي تعبه...اشخاص من جميع محافظات مصر...مؤهلات مختلفة..طباع مختلفة...اصبحوا كفرد واحد

تعلمت قيمة الوقت وان لكل دقيقة ثمنها....وكيف انظم يومي

تعلمت وعرفت حلاوة الراحة بعد قضاء ما عليا من مهمات

تعلمت حلاوة النوم بعد التعب

تعلمت حلاوة الشبع بعد الجوع...والارتواء بعد العطش

تمنيت ان اكون من جيل 73 الذين هم الان قاداتي ومعلميني

علمني الجيش ايضاً كيف انكب علي قدم امي وابي واقبلها

وعلمني ان احمد الله علي ما انا فيه من نعيم ورغد العيش

علمني ان ارضي بالقليل ....

علمني واهم ما علمني ان لا اسخط علي شئ

علمني وعلمني وعلمني

كل هذا في فترة قليلة جدا لا تتعدي الشهرين

قد منّ الله عليا وتم الحاقي بالقوات الجوية في توزيع القوات

وهذا يعتبر شئ جيد جدا بالنسبة لي إن شاء الله وخبرة في مجال عملي بعد تخرجي من الكلية وعملي بالقوات الجوية

لا اخفي عليكم اننا نقول عكس كل ما كتبته الان فيما بيننا...ولكني علي تمام الثقة بأن هذا هو شعورنا وما بداخلينا جميعاً

يقول الجميع ان الذي افلت من الجيش قد فاز
وانا اقولها عن تجربة
الفائز هو من دخل الجيش بنية خالصة لله عز وجل ان يكون جندياً في رباط الي يوم القيامة ويدخل في زمرة خير جنود الارض كما سمانا رسول الله صلي الله عليه وسلم
احبتي في الله ......لا أدري ما هو واقع كلامي علي نفوسكم
فأنا نفسي لم اكن اتوقع يوما ان اكتب مثل ما اكتب الأن عن الجيش
ولكن هذه هي الحياة
وهذه هي نصيحتي لكم
تعلموا من الصعاب التي تمر عليكم
فكل محنة في طيها منحة من الله عز وجل
قد آلمني جدا شعور بعضكم بالحزن والاكتئاب بسبب الغبة او غيرها من المواقف الصعبة التي قد تمر علينا
لا والله...لن تكون اليحاة سهلة ويسيرة ابدا لأحد ولن تأتي الرياح بما تشتهي السفن في كل الاحوال
ولكن الفطن هو من يطوع كل محنة ليستخرج منها المنحة
اتزكر اني قد كتبت موضوع من قبل عن الابتسامة واثرها في النفوس
لم يكن موضوع حشوا فارغ او مجرد كلام علي صفحات النت
قد نصحني نفسي وطبقت هذا الامر في كل مواقف حياتي
فلم اجد موقف صعبا عالجته بالتبسم الا وقد تحول الي العكس تمام
وقد فعلنا هذا واتفقنا عليه انا وجميع اصدقائي في الجيش
لدرجة ان صف الضابط (الصول) قد تعجب مننا وقال انا بالحرف
انا عمري ما شفت مستجدين بيضحكوا ومتفائلين بالشكل دا في الوقت اللي المفروض تعيطوا فيه وتكتئبوا
وفعلا الاثر كان جميل جدا وكل حاجة صعبة بقينا بنعديها بالضحك والهزار
اخي واختي...رجاء مني اليكم...كونوا كالنخيل ناظرين دوما الي السماء لا تنحني ابدا ظهوركم
ابدا لن يغير الحزن شيئا...ولن يأتي الاكتئاب بالسعادة والراحة
وتزكروا مرة اخري....ان في كل محنة منحة
وكما قال صلي الله عليه وسلم ما اخطأك ما كان ليصيبك...وما اصابك ما كان ليخطاك
قد قدر الله لك شئ ورزقا...فنم وقم وانت مطمئن بتوكلك علي الله عز وجل واطمئن بأن قدرك بين يدي رحمن رحيم
ويكيفك سعادة انك مازلت تزكر الله عز وجل وتسجد جبهتك الي الله عز وجل
اللهم صلي وسلم وبارك علي سيدنا محمد صلي الله عليه وسلم
اعتزر علي طول الموضوع
ولكني اشتقت الي الكتابة كثيرا وما زال عندي الكثير لأكتبه ولكن اخاف عليكم من الملل
احبتي في الله دمتم في خير...ولا تنسوا اخاكم من صالح دعائكم
السلام عليكم ورحمة الله وبركاته

هناك 51 تعليقًا:

šσяšαяαα يقول...

هيييييييييييييييييييييييييه

وانا اول واااااحده هتكتب تعليييق

استنى بقى اروح اقرا اللى كتبته وارجع اعلق تانى:D

بس محبتش اضيع فرصة انى واحده تعلق

وااااااااااااااااااااااو

دانا هسجلها فى التاريخ

وإلى لقاء كمان شوية

mohand يقول...

السلام عليكم
قولتلك قبل كده ان الجيش مصنع للرجال
وبقولهالك تاني

بس يا محمد انت راجل بالفعل
من غير جيش ولا حاجه

محمد انا شرحتلك وجهه نظري في موضوع عدم كتابتي تعليقات
صدقني انا لما بدخل اعلق عند حد ومش بلاقي رد بالكتير بعدها باسبوع بحزن قوي
كنت هحس بغيابك
انا كنت بدخل ابص علي المدونة والتعليقات وكانها عادي مش في غيابك

تحياتي يا محمد
اخوك مهند

رينـــــــــــا يقول...

اخيرااااااااااااااااااااااااا
حمد الله السلامه
كان كلامك والله مفتقداه جدااااااااااا
بص حقرا وارجع كنت فاكرة نفسى اول واحده
عااااااااااااااااااااااااااا
سارة سبقتنى
بس مش هفوت فرصه انى تانى واحده
سلام مؤقت

mohand يقول...

السلام عليكم
يا عم انا اون لاين دلوقتي
انت فين يا حج

šσяšαяαα يقول...

هع هع هع هع هع هع هع هع

محلس بقى المرادى يارينا والمرة الجاية انا برضو اللى هعلق الاول:PP

وهقسم تعليقى على جزئين زى البوست بتاعك

اولا يافندم هو انا اطول تنادينى بإسمى.. انما ايه الكلام اللى بتقوله دا ياراجل بقى انا بهيس لا سمح الله

دانا كلى عقل ورزانة.. مش كدا واللا اييييييييه

ونعود بعد الفاصل

gohayna يقول...

اولا الكلام مختلف تمام يا محمد

حتي اسلوبك مختلف كمان

اسلوب فيه عقل ونضوج زاد مع الوقت

بجد كلامك فتح نفسي

الي انت كاتبه انا كنت عارفاه بس محتاجه حد يأكدهولي

او بالمعني الاصح كل مصر محتاجه تقرئه
علشان الضعف والاستكانه والذل والهوان الي حسيين بيه يخف شويه

عرف الضعف واحساس الامتهان وفقدان الكرامه وسط الشعوب

عارف لما تحس ان ابناء لادك مجرد اشباه لرجال تري ملامحه بس ملهمش لا طعم ولا لون ولا ريحه

عارف لما يكون كل هم الرجل انه يتصيد فريسته من المرأه او انه بحط جل في شعره

او يلبس بطلون لو ويست
او يقلد معرفش مين

بزعل اوي لما الاقي الاصناف دي بتقابلني

بزعل اكتر اني مش بحس فيهم بروح مصر ولا بشم فيه ريحه رجاله مصر الي كان علي حق رجاله

كلام دا اعاد ليا الامل من جديد
وبجد اثلج صدري
وطمني انه لسه فيه رجاله محترمه نقدر نعتمد عليهم
وبلدنا لسه بخير

ربنا يكرمك ويجازيك الف خير

محمد
انا مش عارفه اقولك ايه علي الكلام ال انت كاتبه
بس بجد انا معملتش حاجه صدقني
انا بعزك وبحترمك وبجد كنت مفتقداك وعدت عليا اوقات بجد كان كلامك هيفرق معايا كتيير

بجد اخجلتني يا محمد ومش عارفه ارد والله

كل الي عاوزه اقوله اني سعيده بوجودك
وانك رجعت علشان تنور مدونتك تاني
ربنا ميحرمناش منك ابدا

خد بالك من نفسك ودايما طمني عليك يا محمد
ربنا معاك يارب يوفقك ويهدي ليك في طريقك اولاد الحلال
ويحبب فيك كل الناس

امين يارب العالمين

تحياتي يا اخي العزيز من اعماق قلبي

mohand يقول...

السلام عليكم
دا كمان جيجي اون لاين وقافله الماسنجر
هو الكل قافل الماسنجر لايه النهارده
اليوم العالمي ولا ايه ؟

رينـــــــــــا يقول...

السلام عليكم
عدنااااااااااااااا
وطلعت التالته عااااااااااااااا
ماشى يامهند
المهم
بجد زى ما قالت جهينه
حاسه بنضح ماشاء الله وتغير فى الاسلوب
الحمد لله ان طلع لسه فى رجاله
انا كنت بقول الرجاله ماتوا فى 73:P
لا والله بجد كلامك فرحنى وطمنى وحسيت شويه بالامان
ان فى الحمد لله اسود بتحمينا على حد تعبيرك
والحمد لله ان الجيش مفقدناش فى الامل هو كمان
لان كان ممكن اضايق اوى او اموت بحسرتى

اهم ما فى الموضوع ان الحمد لله انت سعيد
وراضى
واستفدت
واتعرفت على ناس تانيه
وسعيد معاهم

والله فعلا وعسى ان تكرهوا شىء وهو خير لكم
وعسى ان تحبوا شيئا هو شر لكم
والله يعلم وانتم لا تعلمون

سعيدة اوى اوى بكلامك
وربنا يعلم انا اد ايه كنت مفتقده كلامك
كل ما يأذن الاذان افتكرك
وافتكر كلامك على المؤذنين
انت سبت بصمه يامحمد
واللى بيعمل شىء لله والله بيلقيه
وربنا لما بيحب عبد بيحبب خلقه فيه
قول الحمد لله

الله يبارك فيك :D:D:D:D
وعقبالك بئا انت كمان
شد حيلك كدا

ربنا يهون عليك الايام الجايه يـــــــــــــــــارب

وانا مش هقولك طبعا تعالى خد التاج لان مفيش وقت لكدا
ربنا معاك يارب والاجازة الجايه مش هسمحلك متاخدش هديتى:(

الف مليون حمد الله على السلامه للمرة التانيه
وربنا ما يحرمناش من كلامك ولا وجودك فى مدونتك

فى حفظ الله دايما
تقبل تحياتى يا اخى وفعلا انت أخى فى الله

šσяšαяαα يقول...

كلااااااكيت تاااالت مرة

وابدأ تعليقى بالآية الكريمة:

"وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ "

بجد يامحمد كلامك غير فيا كتير اوى عن نظرتى للجيش..بفكر كدا اشد الرحال للجيش اهو بدل قعدتى دى لاشغلة ولامشغله

اقولك.. اجى احيى معاكو العلم واقول النشيه الوطنى

وبجد تانى البوست بتاعك جاى فى وقته
انا من كتر البؤس والكآبة كنت هروح فيها

شكله كدا والله اعلم زعلى بيترسب جوايا لحد مايطلع عليا فى الاخر ويجيب اجلى:D

ربنا يكرمك دايما ياسيادتة اللوز ومايحرمناش من كلامك اللى بيهون علينا كتير

انما قولى صحيح انا مش مستوعبة حكاية الطيران دى

يعنى انت كدا هتتثبت فى السلاح الجوى وهتكون دى وظيفتك خلاص؟

واللا مؤقتا فى فترة الجيش بس؟

ومتأخذنيش يعنى فى جهلى وتطفلى دا

بس عاوزين نطمن عليك.. مش انت بقى سندنا ورافع راسنا فى الجيش المصرى

تمااااام يااااافندم

رغينا وصدعنا دماغك يافندم زى ماأمرتنا بالظبط:D

تحياتى ياأخى العزيز ودمت بألف خير

ماتغيبش علينااااا

šσяšαяαα يقول...

بسم الله ماشاء الله

انا كل ماكتب تعليق واجى اكتب اللى بعده الاقي اللى فرق بين تعليقاتى وعمل بينهم جدار عازل

واللا انا اللى باخد وقت فى الكتابة

بقلك ايه انا عارفه انى غلسه اوى النهاردة

بس بجد مش عاوزة ابطل اكتب عندك لحد ماقفل الكمبيوتر

وعموما ربنا معاك ويحميك ويصرف عنك كل سوء وترجعلنا سالم غانم يامحمد ياراقص مع الذئاب:D

سلااااااام

خمسة فضفضة يقول...

السلام عليكم ورحمة الله وبركاته

كلام جميل اوي ، باين فيه الشوق والحنين لمدونتك الجميله ، شكلك كده كل البوستات اللي كنت عاوز تكتبها في ال 45يوم اللي فاتوا كتبتهم في البوست ده

مش عارفه اقولك ايه علي شكرك لينا واحد واحد بالاسم بجد كلك ذوق يا محمد ، بس احنا ما نستاهلش كل الكلام الجميل اوي ده ، لان ده واجب علينا
وبجد وحشتنا ووحشتنا تدويناتك الجميله

انا كمان زي مهند كده كنت باخش اقرا الكلام اللي بتكتبه دكتورة جيهان واخرج من غير تعليق لاني ماكنتش عاوزه احس انك غايب عن مدونتك
-----------------------------

اما كلامك عن الجيش فده مش جديد عليا لاني اعرفه من زمان اوي ، كان ليا خال آخر العنقود وكان مدلع اوي اوي ، فكانت جدتي ربنا يديها الصحه دايما تقوله بكره تدخل الجيش و تتعلم ازاي تبقي راجل ، وكانت حالفه انها لما خيلاني الاتنين ( اللي جم بعد 6 بنات ) يدخلوا الجيش هاتفرق شربات لانها بكده هاتحس انهم خلاص بقوا رجاله
-------------------------

بما انك دخلت القوات الجويه احنا كده لازم نقفلك تعظيم ونخلي بالنا منك اوي ، ما انت عارف ان الرؤساء في البلد دي بيبقوا من القوات الجويه ...هههههه
يلا شد حيلك احنا مستنين اهه بس اياك ساعتها تنسي صحابك وتقول يلا نفسي .....هههههههه


معلش بقي طولت شويه بس كان لازم المفروض ان الرد يكون علي اد البوست مش كده ولا ايه ....ههههه



تحياتي

gohayna يقول...

محمد

انا حبيت اسلم عليك قبل ما تمشي

تروح وترجع بالف سلامه
وتسلملي علي دخولك عندي يا محمد
والله كبيره اوي عندي
ربنا يخليك وميحرمنيش منك يا اخويا العزيز

خد بالك من نفسك ويارب تاخد اجازه اكبر من كدا شويه

اول ما ترجع امانه عليك تقولي
هستناك تطمني يا محمد
لا اله الا الله
محمد رسول الله

šσяšαяαα يقول...

السلااااام عليكم

امبارح كنا بنقولك حمدلله عالسلامة

والنهاردة بنقول تروح وتييجى بألف سلامة

بس ماتغيبش علينا المرادى بقى

هتقعد المرادى اد ايه؟؟

يارب مايكونو كتير زى المرة اللى فاتت

وتكون اجازة اطول من دى عشان تدخل وتكتب لنا تعليقاتك الجميلة اللى مفتقدينها بجد

وانا بقيت كويسة الحمدلله.. شكرا على سؤالك.. ربنا يجزيك كل خير

تحياتى ليك ودمت بألف خير

وربنا يحميك وترجعلنا بألف سلااااامة

رينـــــــــــا يقول...

السلام عليكم
والله يابنى ما لحقنا نشبع من وجودك وسطنا
ياله خير معلش
اهم حاجة انك الحمد لله مرتاح ومبسوط
يارب ان شاء الله الاجازة الجايه تطول

نورت مدونتى يامحمد والله وكنت سعيدة اوى لما شفتك عندى زدتها شرف يا اخى الكريم :)

تروح وترجع با ألف سلامه
ربنا يحفظك ويحميك ويوقفلك ولاد الحلال يارب ان شاء الله

فى حفظ الله دايما
لااله الا الله

رفقة عمر يقول...

تخيل من كلامك عن الجيش حسيت انى نفسى انا كمان انضم للجيش
تعرف انا ليا اخ دخل الجيش واخ تانى لم يدخل الجيش
سبحان الله اللى دخل الجيش شخصيته اقوى ومتحمل المسئوليه اكتر من اخى اللى اخد اعفى ودايما ماما تقوله ياريتك كنت دخلت الجيش كنت بقيت اقوى من كدة
الاجازة الجايه امتى ان شاء الله

Bossy يقول...

السلام عليكم ورحمه الله

لا بقي يا بشمهندس قليله جدا الاجازه
يوم واحد بس كده ان شاء الله تروح وترجع بالسلامه
وتنور المدونه من تاني
بس بجد يا جماعه محمد اتغير حتي اسلوبه اتغير
اتغيرت اووي يا محمد بس برده اللي متاكده منه ان الجيش صعب ربنا يهون عليك الايام دي وترجع لاهلك بالسلامه وتعمل حسابك علي اجازه طويله
وشكرا جدا علي مرورك عندي رغم ضيق الوقت بالنسبه ليك
ونشوفك علي خير

BinO يقول...

السلام عليكم ورحمة الله وبركاته
أيه يابني الجمودية ديه
أنا قرأت الموضوع كله رغم عدم صبر علي المواضيع الطويله
ده لأني كنت عايز أقرأ كلماتك بعد الجيش
أخي العزيز
أحب أقولك أنك أثرت فيا جداً بالكلمات
حتي أني كنت بأبتسم كثيراً وأنا بقرأ
صاحبي ألأنتيم دخل الجيش
وقدر المولي عز وجل أنه يدخل ظابط
ولكن حالته كانت مختلفة كثيراً بعد ال 45 يوم الأولي عن حالتك
أنا ممكن أقول أنك بصيت لنص الكباية المليان وعرفت تتعامل معاه كويس جداً
كلامك عن الجيش وما بث داخلك بيدل علي كده , وربنا يثبتك

بس واضح أن أهم حاجة أتعلمتها في الجيش هي الصبر عشان تكتب موضوع طويييييييييييييييييل كده
وكمان عايز تعلمنا الصبر
يخي هع هع هع
أن شاء الله نتقابل قريباً
وربنا يحفظك ويسدد خطاك

sakayar يقول...

حمدلله ع السلاااامة ... مصر أمانة ف ايديك يا ديييييفيد ههههههه
الحمد لله انا اتفرجت ع الجييييش ده فيديو بس ... بلا أوامر بلا نوااااهي

لما تييجي رااجع ابقى اديييينا طلقتين في الهوا ع البلوج ... وسيبلنا حاجة نقراها على اما ترجع تاني

farfasha يقول...

انا عامله فكره جديده ويارب تعجبك
ياريت تقولى رايك فيها وماتنساش تشارك باى ذكرى عاوزها
استفتح بيك يعنى
تحياتى

نهى جمال يقول...

بوست جميل ومشجع

بس مين قال إن الجيش مش تحت إيد الأمريكان

عموما أنا مبسوطة بحماسك لشيء كنت غير متقبلة

ده في حد ذاته قوة لحب ما لا نرغب فقد نجد فيه بعض المزايا

أكيد كل شيء بنمر بيه في حياتنا ليه هدف ربنا وضعه بين ايدينا علشان نتعلم منه

حياتنا كلها دروس المهم ان احنا نقدر نستوعبها

شكرا لكَ

بزست محفز في وسط الخنقة

رينـــــــــــا يقول...

السلام عليكم
ازيك يامحمد
انا دلواقتى والله الحمد لله مطمنه عليك
ربنا يقويك يارب
ويرجعك كدا باسلامه
عايزينك بئا المرة الجايه
تقعد شويه كمان
ربنا معاك

همسات دافئه يقول...

لاءااااااااااا محمد استنى... حد يشد معايا ياجماعه هوه ماله بأه قوى كده ليه
انت مشيت بجد خلاص ..ايه النداله ده انت بتستنى لما أكون مش موجوده وتيجى وتمشى من غير حتى ما أقولك حمدالله على السلامه
شايف ياذئبوب شاهد ياذبأبأ انت وذئبيبو اتفضلوا خدولى حقى منه :((((((

المهم ان انت كويس ومبسوط الحمد لله وبعدين بتشكرنى انى بدخل المدونه يافندم دا أنا يحصلى الشرف أنا بس كنت كل ما أدخل ألاقى الرحيل الرحيل الرحيل خوفت على نفسى يجينى اكتئاب مبكر وأنا لسه فى عز شبابى فقلبت فى المدونه كلها وقريت الحاجات الى فاتتنى
ترجع بالسلامه ان شاء الله والمره الى جايه هاتلاقينى موجوده
سلام ياذئبى العزيز:)))

šσяšαяαα يقول...

السلاااااام عليكمممم

اهلااااااا سيادتة اللوز ازى الحال؟؟

النهاردة الجو مشمس ولطيف جدا اوى خالص..ربنا يديمها عليناااا

المرادى الواحد مبسوط لانك طمنتنا عليك فى الاجازة الصغنتوته دى

بس زعلانة برضو لانى معرفش انت هتييجى امتى تانى

ايييه الغلاسة دى

طيب اول مرة وكنا عارفين هتييجى امتى

انا محبش كدا.. انت مش فى الجيش واللا اييه يعنى لازم كل حاجة تكون محددة ودقيقة

المرادى سماح بس المرة الجاية نعرف المدة بالظبط

هنعلمكو لحد امتى انا مش عارفه

وسلاااااام بقى

Great wishes يقول...

الف حمد الله على السلامه و الرجوع الحلو ده .. و المدونه نورت تانى و ربنا يباركلك فى حب الناس .. و هنتابعك بقى كل أخر اسبوع باذن الله

حقوق الضباط الإحتياط يقول...

السلام عليكم
ازيك يا حضرة الضابط, للاسف انا متابع مش قديم للمدونة بتاعتك لان فيه شخص متابع لها بعتها لى وقالى انك معايا فى الكلية, ايوة انا معاك بس الدفعه 131 اللى خانقاكم شوية بس معلش استحملونا بقى كام يوم ونتخرج ونسيبكم..اتمنى اتعرف عليك فى الكلية ان شاء الله, انا ايهاب لطفى س 8,لو مقدرناش نتعرف هنا ياريت اشوفك فى الكلية ومتطنش ابدا,اسلوبك فعلا محترم وناضج وبجد انت من الناس اللى هتاخد كل ايجابيات الحياة الميرى
مش عارف اقولك ايه بس اكيد ان شاء الله لنا حوار ونقاش كبيرهناك وخاصه فى فتره الاعمال الادارية او فى راحه عرض الاشتباك بتاعك :)
__________
كلامى موجه لكل اصدقاء الراقص مع الذئاب
صديقكم اكيد بخير ان شاء الله, كانوا انهاردة عاملين بروفه لحفلة التخرج بتاعتنا اكثر من رائعه واكيد هيتكافئوا, وهما الحمد لله ماشين كويس ورجاله ومستحملين
انتظروه يوم الاربعاء الجاى ييجى لكم ( اظن دى معلومه حصرية)
ويارب ميزعلش انى قلت لكم بس لانى شايف حبكم له حبيت اطمنكم
وياريت يا دانسر نتواصل دائما
إيهاب د 131 ك3 س8

gohayna يقول...

ايهاب

ربنا يكرمك يا ايهاب بجد

ربنا يكرمك

يعني انت المفروض تكون موجود النهارده يا محمد

ليلتك مش طالعلها اي قمر خالص

انت فين حضرتك بقي


وبعدين ايهاب خانق ولا حاجه قولي وراك رجاله

معلش ياايهاب اصل محمد عزيز علينا كلنا والله وربنا يعلم بقي

انا بهدي النفوس علشان تبقو اصحاب اكيد فاهمني


محمد لو رجعت يا حج

لو سمحت قول

بلاش الكسل بتاع القوات المسلحه دا

مستنياك يا محمد

تحياتي

عالمى ازرق يقول...

شكرا على كلامك
وبجد كلنا كمان كنا مفتقدين مواضيعك الجديده وكتابتك
الا ان عودتك فعلا لها مذاق مختلف .. فيها نضج واضح بالرغم ان الفتره قصيره


تعلمت وعرفت حلاوة الراحة بعد قضاء ما عليا من مهمات

تعلمت حلاوة النوم بعد التعب

عجبتنى قوى جملتك وقفنى تعبيراها .. يمكن لاننا بتعدى علينا حاجات كتير وبنعمل حاجات كتير بحكم الروتين والعاده
الحمدلله انك مبسوط بالجيش وربنا يرجعك بالسلامه بأذن الله
مع انك مقولتش الاجازه الجايه كمان قد ايه

حقوق الضباط الإحتياط يقول...

gohayna
معلش لو هزعلكم بس هقول توضيح وهو انى قلت انه نازل الاربعاء الجاى باذن الله مش الاربعاء ( انهاردة) لان لازم بعد فتره المستجدين يقعد اسبوعين ورا بعض,دى تتبع فتره الاعداد يعنى
بس فعلا من غير ما اعرف الراجل المحترم ده شخصيا ااكد تانى انه بخير باذن الله لان موقف دفعته حاليا بقى كويس
انتظروه هو وذئابه يوم 20/6
وللعلم بقى هو عارف انكم لو فكرتوا تأذونى هروح اضايقه لكم بقى :):) وبالتالى كل معجبيه وذئابه مفروض يتوددوا ليا ولو بكانز بيبسى مش كوكاكولا ( اكيد دانسر فاهم قصدى)

BinO يقول...

أعتقد انك أجازة بكرة ولا أيه
ربنا يكرمك

حقوق الضباط الإحتياط يقول...

ان شاء الله ايوة انا اجازة بكرة ولحد الجمعه الساعه 5.30
لو احتجتوا تبلغوا محمد اى شىء انا تحت امركم واكيد ده شىء هيبسطه جدا جدا وخاصه انه مش متوقع
هحتاج بس اعرف اسمه بالكامل وياريت رقم سريته , وده اكيد اخوه يعرفه

محض روح يقول...

حمدالله على السلامه معلش جيت متأخره
مبسوطه بجد من كلامك
واول مره اسمع من زمااااااان حد بيشكر في الجيش كده

اتغيرت يامحمد حسه الفتره ديه ضفتلك كتير
ربنا يكرمك يارب
ويعديهالك على خير

اجزتك النهرده
حمدالله على السلامه للرجوع التاني

gohayna يقول...

مساء الخير يا محمد

مساء الخير يا ايهاب

طبعا الف شكر علي انك وضحت ان محمد مش نازل امبارح

كانت وقعته هتكون بيضاء اللون والله


وبعدين انت بتههدنا ولا ايه

انت متعرفش ان محمد وارا رجاله هنا يكله الزلظ اكل والله

المهم والله يخليك بلغه سلامي كتير جدا قول جهينه او جيهان بتسلم عليك وبتقولك ربنا معاك يا محمد
واوان المنجو جه

ومستنيه الشحنه بقي
سلملي عليه كتيييير جدا

ربنا معاك ومعاهم كلهم

ربنا يوفقكم يارب

انتوا بجد حاجه تفرح بصحيح

تحياتي
تروح وترجع بالسلامه
تحياتي

حقوق الضباط الإحتياط يقول...

مساء الخير جيهان
والله انا فضولى كبر قوى وعايز اتعرف علي محمد وابلغه سلامك, بس محتاج بس اعرف اسمه ثلاثى او رقم سريته وصدقينى المانجو فى المدن الساحليه كويس بس الاقى محمد قبل ما ينزل اجازة علشان يعمل حسابه
وبخصوص الرجاله اللى بتاكل زلط دى فانا دفعتى 1500 وحش ياكلوا بنى ادمين لو واحد فيهم بس اتهدد فبلاش احسن اجيبهم يكسروا لكم البلوجز كلها

همسات دافئه يقول...

ازيك يامحمد يارب تكون بخير وتنزل قريب ان شاء الله

استاذ ايهاب

حضرتك جاى للراجل فى غيابه وبتهدد زواره بال 1500وحش بتوعك وكمان هاتكسر البلوجز كلها ليه هى سايبه ولا كانت سايبه مفيش قانون مفيش جيوش مفيش شباب ذى الورد بكره ييجوا يدافعوا عنها
_________
ايه رأيك يامحمد كويس كده ولا أقول كمان...تلمذتك ياحضره الظابط ترجع بالسلامه يارب:)

غير معرف يقول...

وعليكم السلام ورحمه الله وبركاته

حمدا لله على سلامتك
وجميل اوى الكلام اللى حضرتك كاتبه
وجميل اوى المعانى والقيم اللى اتعلمتها
ترجع بالسلامة ان شاء الله

šσяšαяαα يقول...

ما هاااذاا الذى يحدث؟؟؟

انا قلت اجى استأكد انت جيت بالسلامة واللا لسا.. اه مانا ماضمنش تكون جيت وناوى متعديش تقولنا واللا حاجه..معلش يعنى بس ناخد احتياطتنا الامنية:))))

المهم يعنى بدل ماصدعلك دماغك كالعادة
لقيت كدا خير اللهم اجعله خير نبأ وصولك النهاردة

بس بجد مفاجأة جاااااامده جدااااا

خبر جلجلللل فى المدونة

اتمنى بس يكون مظبوط والاقيك منزل بوست انك رجعت بالسلامة

........

وصدفة جميلة كمان اننا نلاقى زميل يطمنا عليك ويفتن على معاد وصولك:))

بجد شكرا استاذ ايهاب وربنا يوفقكم وترفعو راية النصر عالية شامخة:))

وبخصوص الزلط والطوب احنا ناس مسالمة وبعدين دفعة محمد اللى هتعمل حفلة التخرج..ها

يعنى ناس اخر جدعنه اهه من غير تهديد ولا تكسير:)

sara يقول...

ربنا يزيدك عقل وايمان

تحياتي

gohayna يقول...

محمد انت هترجع النهارده ولا ايه يا حج بقي
ما تخلص ربنا يكرمك يارب

استاذ ايهاب عارف لو محمد مرجعش هنعمل فيك وفي 1500 الي بتهددنا بيهم ايه؟

كل خير والله

هنعزمكو علي اكله حلوه

انا بهرج والله

خد بالك من محمد

وانت يا محمد

اخلص وطمني عليك لما ترجع

تحياتي

حقوق الضباط الإحتياط يقول...

السلام عليكم ورحمه الله وبركاته
ازييييييكم جميعا والف حمدا لله على سلامتك يا دانسر بيك
يا جماعه تشرفت انى اتعرف على الراجل المحترم محمد بيك دانسر وللعلم الفارق بيننا فى المكان عشرين متر بسسسسسسسس ( تخيلوا بقى 20بس)
طبعا هحكى لكم بعد شوية انا عثرت عليه ازاى
وهو طبعا يحكى لكم احساسه بالموقف قبل ما اعرفه انا مين او بسال عليه ليه

اما بالنسبه للاخت واحدة من الناس فاحب ابلغك انى بعد ما تعرفت على محمد مقدرش اتكلم ولا افتح بقى حتى من غير قانون ولا جيوش حتى
ملحوظة : دا كلام هنا بس وهناك ابقى اتصرف معاه :)))
وانتى يا صرصارة طبعا مننكرش قيمة دفعه محمد دول الخير والبركة ومتخافيش يعنى بخصوص انى افتن عليه فى اى حاجة يعنى بخصوص المواعيد :)


اما انتى يا جهينه فانا منتظر الاكلللللللة وممكن اقسمها مع محمد وهو ياخد 2% مش مشكله يعنى
ومتخافيش دا فى عينى والله هناك وهو باذن الله نازل انهاردة لانى شفته لابس البدله اكيد, المشكله انى انا اللى مكنتش نازل

gohayna يقول...

حمدلله علي السلامه يا ايهاب

بس فين محمد

شكلك طمعت في الاكله

وبعدين جاي علي نفسك اوي كدا ليه

هتديله 2% لا كتير جدا بصراحه

؟
هو انت منين؟
هههههههههه
مزحه صغيره

المهم الحمد لله انك عرفت محمد والمسافه بينكوا عشرين متر بس
والله دا من حظه
انه يلاقي ناس محترمه واشخاص ربنا يكرمه بيهم زيك كدا

بس بقولك علي حاجه
محمد شكله خلع علي حته تانيه

معرفش مدخلش
وانت بتقول كان المفروض يكون موجود؟

انتو مطبخيناها سوا ولا ايه يا ايهاب

او يمكن يكون هيصيف اليومين الاجازه دول
وسايبنا نضرب اخماس في اسداس؟

ايه العباره بقي بالظبط

خليني حسنه النيه وهفرض انه نايم دلوقتي وبكره يدخل


اما انت يا ايهاب
فالف حمدلله علي سلامتك
وبجد ربنا يجازيك الف خير عشان بطمنا عليه

ربنا يحميكوا يارب

مستنيه اعرف الخبار ايه

لو دخلت يا محمد
خليك جدع وابقي قولي

سلام مؤقت

تحياتي لمحمد وايهاب

حقوق الضباط الإحتياط يقول...

اهلين جهينه
الله يسلمك ويبارك فيكى
وشكل محمد فعلا باع البلوج او اجرها مفروش اهو يلم قرشين وهو مسافر فى الجيش ميقعدش كده على الحديدة
اظهر وبان يا دانسر بدل ما اتدبح انا
احلف لكم بالله انى متفق معاه اننا نتقابل انهاردة على النت بس ان شاء الله خير
وبعدين سيادتك مستخسره فيه 2%؟؟ لو كده يبقى مياكلش خالص احسسسسن
يالا اسيبكم على خير ومتخافيش هنتلاقيه فعلا نايم شوية

šσяšαяαα يقول...

ياهنايااااا يام السعدددد

انتو بتشتغلووونا واللا اييييييه ان شاء الله

لااااااا انتو ماشفتوش الوش التانى بتاع صرصارة(وحياتكو ولا انا كمان شفته:D)

وانا استنى استنى

واقول زمانه جاى يمكن المواصلات واللا الريس معدى

بس عموما زى ماجهينة قالت هنفترض حسن النية وامرنا لله

وانا على فكرة بحب موضوع الصدف دا اوييييي جداااااا مووووووووت

هنستنى منكم تقولو ماالذى حدث لما اتقابلتو

دى الدنيا صغيرة ياجدعاااااان بصحيييييح

مش هستنى كتير

فاضل شوية صغيرين وصبرى ينفذ

س ل ا م

حقوق الضباط الإحتياط يقول...

لااااااااااااا دى مش مشكلتى انا
هو اذا كان مش عايز يشوف وشك ( قصدى الوش التانى يعنى ::)) ) يبقى هو اللى ينضرب مش انا
والحكايه فى البوست الجاى

حقوق الضباط الإحتياط يقول...

اللى حصل بقى انى رحت وهتجنن واوصل للراجل ده سلامكم واتعرف عليه
وقمت ماشى والف وادور على ابره فى كوم قش ( ان جاز التعبير)
والحمد لله انا فيا عاده من ايام الجامعه انى اهرب من المحاضرات وربنا رزقنى
بنفس العاده فى الكلية العسكرية كمان, وبدأت رحلة البحث فقابلنى واحد صاحبى
وبيقولى رايح فين؟؟ قلت له عادى بدور على واحد كده وجاى على طول, قالى خدنى
معاك,فقلت له بلاش, قالى يا عم لأ انا جاى,, ها بقى صاحبك فى سرية كام؟؟
قلت له معرفش,, طيب كتيبه كام؟؟ معرفش,,طيب تخصصه ايه؟؟ معرفش,,
طيب شكله ايه؟؟معرفش,,طيب اسمه ايه؟؟معرفش بس مفروض محمد, فلكم ان تتخيلوا رد فعله
بس لانه صاحبى مقتلنيش وقالى بكل هدوووووووووووووووووووووووووء احنا هنعرفه ازاى يعنى؟
قلت له عادى هنسأل عن واحد اسمه الراقص مع الذئاب,, احم احم يعنى كان رد الفعل زى رد فعله
الاولانى بالضبطططط.
وتخيلوا الراجل اصر برضه انه ييجى معايا بعد اللى عملته فيه ده, ولفينا على قاعات الدراسه او المذاكرة يعنى
بتاعت دفعه محمد,,وادخل واثبت القاعه واسال يا جدعااااان حد له بلوج على النت؟؟ اشوف بقى كميه افواه
مفتوحه متبوعه بكلمه هه؟؟يعنى ايه بلوج دى؟ اقولهم دى مدونة يعنى,, هه! يعنى ايه مدونة؟؟اقوم يترفع
ضغطى وامشى.. ادخل قاعه تانيه اسال حد هنا اسمه الراقص مع الذئاب؟؟ هه! راقص ايه؟؟؟
وقاعه تشيلنى وقاعه تحطنى لحد ما رحت اخر قاااااااعه او قبل الاخيره تقريبا الاقى واحد يقولى انا ليا
صاحبى فى السرية التاسعه عنده واحدة, طيب اسمه ايه؟؟ الاخ مردش وخاف انى اعمل لصاحبه حاجة
واحلف له بالله انه شىء شخصى مش امنى, الاخ يخاف وميردش خالص ولا كانى موجود وبجد الخوف بان
على وشه لانه حس انه دبس صاحبه فى سجن ولا حاجة.
للعلم هو مكنش يقصد محمد بتاعنا اصلا
وجريييييت على السرية 9 وكل اصحابى فيها وحبايبى يعنى بطريقه ملهاش حل الا شخص واحد بسسسسس
وهو المسئول عن الدفعه الجديدة فى السرية 9,, المهم سالت لقيت واحد بيقولى ايوة انا, طيب اسمك ايه؟
قالى احمد فقلت له لا خلاص والتانى سالته اسمك ايه؟ قالى محمد, فقلت له مدونتك اسمها ايه؟ قالى الراقص
مع الذئاب,كنت هتشل او ييجى له نقطه (بفتح النون مش ضمها)ولسه هتكلم لقيت الاخ اللى مش كويس معايا
وصل ومش عاجبه انى بكلم حد من سريته بدون اذنه وطردنى شر طرده الحمد لله ومشيت فعلا ورجعت تانى
وبقيه الاحداث يحكيها محمد بقى لانه حضرها معايا ويبقى بس مينساش يقولنا احساسه ايه اول ما لقى واحد غريب
بيكلمه على المدونه بتاعته
ومعلششششششششششششش بقى لو طولت عليكم اصلى رغاى نص نص

الراقـــص مع الذئـــــاب يقول...

السلام عليكم ورحمة الله وبركاته
يا جماعة بجد بجد بجد انا في غاية الاسف اني لسا داخل علي النت
بس اقسملكم بالله دا كان غصب عني
الجهاز حصل فيه مشاكل وانا مش موجود ورجعت لقيت المفجأة وحاولت معاه طول اليوم امابرح لغياة الساعة واحدة
والله يا ايهاب منمت من قبل نوبة صحيان امبارح بساعة
يعني كنت صاحي من 4,30 لغاية الساعة واحدة ومن ساعة ما رجعت وانا بحاول اخلي البعيد (الجهاز) ينطق بس مش عارف....طبعا نمت من التعب وصحيت كملت المسيرة الناهرده والحمد لله نطق علي العصر ونزول الوندوز والحبشتكنات ديه بقي لسا خلاصانة دلوقتي
حتي انا دخلت اكتب رد مش موضوع عشان اعتزر للناس
والله يا جماعة محدش من صحابي يعرف اني نزلت اجازة ولا كلمت حد لغاية دلوقتي لو مش مصدقني بسبب الجهاز
المهعم وحشتوني جدا جدا جدا جدا
والرد اللي بعد دا هقولكم علي اجمل مفجأة حصلتلي في الكلية وطبعا البطل بتعها كان ايهاب
انتظروني بعد الفاصل

الراقـــص مع الذئـــــاب يقول...

السلام عليكم

نكمل بقي احسن مفجأة حصلتلي في الكلية
في اخر اليوم بعد المجهود الجبار والتعب العميق والتخطيط للهروب من وجبة العشاء لعمل إتصال هاتفي هام و للحصول علي دش ماء بالكوز قبل الازدحام والخناقات علي الحممات
وإذا بقديم (يعني واحد من الدفعة اللي قبلي...هو اسمه قديم وانا اسمي مستجد)...وإذا بهذا القديم يخترق الصفوف سائلا:
حد عنده مدونة علي النت يا شباب؟؟
وإذا بي اندفع بحماقة (كما اتهمني اصدقائي المخلصين) بقول ايوة انا عندي واحدة
مع العلم ان كل اصدقائي لا يعرف معني كلمة مدونة
ولكن كعادة الشعب المصري ينصح بما لا يعرف
ويأتي صديق معي في نفس السرية مجيبا بنعم ايضا ولكن بتردد
ويتراجع ...ويجذبني اصدقائي بفضول لمعرفة معني كلمة مدونة وببضع كلمات لخصت المدونة
وإذا بهذا القديم يتقدم نحوي سائلا؟
ما اسمك؟؟
قلت محمد
قال وما اسم مدونتك ؟
قلت الراقص مع الذئاب
ولكن لماذا تسأل ؟؟
قال تعالي معي خارج الصف
وإذا بمرافق السرية الذي هو من نفس دفعة السائل يعترض علي خروجي من الصف ويطلب من السائل (اللي هو القديم الذي يبحث عن المدونة) ويطالبه بالخروج من السرية ويمنعه من مرافقتي
ويطلب مني السائل ان انتظره بعد ان نملص (يعني نكت) من العشاء ...وهائنذا بدافع الفضول والشك اتخلص من السرية واقابل هذا السائل الذي قال لي:
إنت بقي محمد الراقص مع الذئاب
قلت له نعم
قال الناس بتاعت المدونة بتسلم كلها عليك وزكرهم بالاسم وكان علي رأسهم جهينة وسارة وبينو
وقلي انه وصل المدونة بالصدفة وانه لسا فاتح مدونة جديدة
متتخيلوش مدي الفرحة بقي اد ايه
والسؤال اللي سألتهوله انت عرفت توصلي إزااااااااااااي
وانت متعرفش غير اسم مدونتي واول اسم ليا بس
وطبعا هو دا اللي حكاه ايهاب في الكومنت اللي فات
واتمشينا مع بعض ورحنا عند التلفون وبنفوذه وعلاقته الجميلة خلاني احجز واتكلم في التلفون (التلفون عليه ضرب نار وزحمة اكتر من طابور العيش بتاع فرن بلدي في منطقة شعبية)
ورحنا مع بعض الكانتين وبجد خلال نص ساعة حسيت اني اعرف الراجل دا من 10 سنين
مش هحكيلكم اد ايه مهذب ومحترم وطبعه جميل
وزي ما قلتله هناك
انه اجمل هدية اخدتها في الجيش
وعلي الرغم من المشاكل اللي كنت ممكن تحصله اصر انه ميسبنيش غير لما اتكلم في التلفون مع ان الوقت كان ضيق جدا وصعب اوي اتكلم...وكمان وصلني لغاية العمارة اللي احنا الاتنين ساكنين فيها والحمد لله ساكنين في نفس الجناح بس انا في الرابع وهو في الارضي (يعني هو بيستحمي من غير كوز عشان عندهم ميه علي طول )....ومطمنش عليا غير لما دخلت عنبري

الكلام دا كان يوم الاتنين تقريبا
عارفين مشفتش ايهاب بعدها غير في يوم الاربع واحنا لابسين ومروحين
مع انه جنبي معظم اوقات اليوم
بس هو بقي يقولكم النظام هناك عامل ازي
عموما ايهاب إن شاء الله هيتخرج يوم 10 \7 وإن شاء الله الحفلة تبقي جميلة ...واحنا متوصيين بيهم
اوي...سامع يا ايهاب؟؟؟
وشغالين من نار عشان الحفلة تبقي اجمل ما يمكن
ربنا يوفقه ويوفق كل الناس ويعدي ايامهم علي خير

في اخر الكومنت بقول لأيهاب انا بجد هدية جميلة اوي بس يا خسارة ...مش هشوفك كتير....
بس المهم انننا هنفضل اخوات علي طول

معلش بقي طولت عليكم
اسيبكم بقي دلوقتي وعلي وعد بالعودة
سلام

šσяšαяαα يقول...

ايييييييييييييه المفاجأة الجميلة دى

ياسلاااااااام علياااا لما اقول هدخل والاقى محمد ان شاء الله وصل يبقى هدخل والاااااااقى محماااااااد وصللللللل

انا حالتى صعبه جدااا ياجماعة ماتأخذونيش:)))

بس انا مسخسخة مالضحك بجد عالمواقف اللى حصلت دى وزى ماقلت انا بعشققققققق الصدففففف والمواقف اللى بتحصل فيها

انا فرحااااانة اوى بجد..مش عارفه ليه:))

لا عارفة ليه

بيبقى احساس جميييل جدااا لما تقابل انسان بالصدفة وبشكل غير عادى وغير تقليدى وبعدها تتكون بينهم صداقة حتى لو زى مامحمد قال انهم مش هيكونو على اتصال كتير بعدها

بس بجد كفااااية الاحسااااس دا

والله احلى حاجه واغلى كنز فى الدنيا دى هو التعرف على ناس طيبين وحبهم فى الله

وشكرا ياايهاب على توصيلك السلاااام

كدا لما نطلب توصله جوزين انارب واللا حاجه هنضمن انك مش هتطمع فيهم:D

وربنا يوفقكم ياااارب وتكون حفلتك ياايهاب حفلة كدا ولا بتاع حفلات مارينا:D

وانت يامحمد عقباااالك يااااارب وتتعملك حفلة كدا ولا بتوع مارينا برضو:D

ياللا انا هروح بلاعتى بقى وان شاء الله الاقيك منورنى هناك.. وحمدلله على سلامة الكومبرورر:))

gohayna يقول...

اهلاااااااااااااااااااااااااا
يا حضرات الظبااااااااااااااااااااااط

سلام كبير جدا جدا جدا

ليكم انتوا الاتنين

حمدلله علي السلامه يا جماعه

ويارب اجازه سعيده ليك يا محمد

وتخرج رائع ليك يا ايهاب

بالتوفيق يارب

ومتنساش حلاوه التخرج حضرتك

والا انت الي هتتحملها يا محمد

بجد ربنا بيحبك يا محمد والله عشان عرفك بايهاب

واضح انه انسان اخلاقه عاليه ومحترم

يارب يديم بينكم المعروف علي طول يا رب

وبجد الي حصل بينكم والله شيء رائع جدا

حمدلله علي السلامه يا جماعه

نورت مدونتك يا محمد

وانت كمان يا ايهاب نورت مدونتك

وخلاص عفينا عنك

عشان خروج محمد

عارف لو مكنش خرج وظهر

كنااااااااااااااااا





عافينا برضه عنك

احنا نقدر برضه

الف مليون حمدلله علي السلامه يا حضرات الظباط الافاضل

تحياتي ليكم

gohayna يقول...

سااااااااااااااااره
سبقتيني يا سااااااااااااااااره

ماشي يا اهلاويه

اصبري عليا

حقوق الضباط الإحتياط يقول...

دانسر
الحمد لله يا باشا اننا اطمنا عليك وانك بخير, والف حمدا لله على سلامة المأسوف على شبابه كمبيوترك
والله كلامك جميل وكاسفنى وما عارف ارد اقول ايه غير بس شكرا على ذوقك ياباشا
وبخصوص الحفله فهى باذن الله هتبقى حلوة بيكم واهو يا سيدى تاخدوا لكم اجازة معتبره على حسنا بقى وحس حفلتنا, واذا كانت الحفله اخر عهدنا مع بعض فى الكليه فاكيد باذن الله هنتقابل بره

صرصارة
لا شكر على واجب يا ستى دا انا اكتر واحد كسبت من الموضوع ده
بالنسبه لموضوع الانارب ( زمان كان اسمها ارانب) فمتخافيش لانى مباكلهلاش اصلا فاناربك فى امان :)), فشوفى لى وجبه تانيه محترمه كده اطمع فيها
وحفلات مارينا ايييييه وكلام ايييييه احنا احسن من كده, عندنا زغاريط وتصقيف وحاجات عمرك ما بتشوفيها الا فى التليفزيون, فكرى كده وتعالى شوفيها احجز للبلوجرز كلهم تذاكر

جهينه
الله يسلمك يارب, وازيدينا من دعواتك كده على طول
وحلاوة تخرج ايه بس؟؟ دا انا اجيب لكم محل مخصوص للسيد دانسر ورفاقه
ويارب اشوفك واشوفكم كلكم فى المدونة بتاعتى اهو نلملم اوراقها بدل ما تضيع

ملحوظة : استعد يا دانسر السفر انهاررررررردة

حوريه يقول...

ايه المفجأة اللى تجنن دى ؟؟؟ مش ممكن
حمدا لله على السلامة منور و الله وحشتنا كتير ...
بس بصراحة فيه تغيير فى افكارك و اكتسبت ذكريات و خبرات جديده .. اكتب بقى
اتوقع ان نقرا لك حاجات خطيرة
اتمنى ان تشرف مدونتى بالزيارة يا قمر
حوريه