Translate

الأحد، 15 يوليو، 2007

ويارتني ما عرفت اكتب تاني

السلام عليكم ورحمة الله وبركاته
في الاول وقبل كل شئ احب اشكر كل الناس اللي سألوا عليا
بجد اللي كان مزعلني في الحكاية هو بعدي عنكم
جزاكم الله خيرا جميعا
نيجي بقي ونتكلم زي زمان
عارفين انا مكنتش عارف اكتب ليه...القلم منكسرش ولا حجة...ولا مدونتي كانت زعلانة مني
طلع بقي ان اللي كان بيخليني اكتب هو
إني اتجول في الحياة الملكية بكل ما فيها من فواجع (والملكية هي
شئ بعيد عن الجيش)
يعني الكلام يتلخص في المثل الجميل
اللي بيقول: كان في جره وطلع لبره
لأول مرة اعرف إن أنا في رحمة ونعمة بقالي 3 شهور
أصحي بدري...أنام بدري ...أكل في مواعيد...محافظ علي لايقتي
يوم منظم جدا بصرف النظر بقي عن التعب والبهدلة والاصطباحة اللي زي الطين بوش الصول مصطفي
...ما علينا
بس لما نزلت الاجازة اللي كنت بحلم بيها وبتمناها والراحة والاكل والخروج والانتخة
عرفت حجات كتيرة كانت غايبة عني وظهرت
أولها إني كنت عايش في حاجة كدا زي النقاء الفكري
معرفش حاجة عن اللي بتحصل خارج سور الكلية....بمعني أقرب مفيش موضوع يستفز الواحد ويخليه يمسك ورقة وقلم ويكتب...
ودا اللي حصلي لما رجعت...فتحت الصفحة وأدور علي حاجة أكتبها...مفيش
أصلي مكنتش هنا...ومعرفش حاجة
طب دا انا كنت زمان مش برحم ونازل زن ورغي في الفاضي والمليان
دلوقتي بقيت أبيض...دي بقي حاجة وحشة والا حلوة؟؟
اعتقد بعد اللي شفته انها حاجة حلوة مش وحشة
الاجازة طويلة...ولازم بقي كدا أخرج وأشوف الدنيا
أهو حتة بقي أشوف الدنيا ديه حط أيدك عليها يا محترم ومتشلهاش.
هي ديه اللي كانت تايهة مني ومفتاح السر
نزلت يا خويا أشوف الناس والدنيا
والبداية كانت بأفراح صحابي وبعض المعارف...ربنا يزيد ويبارك...ماشاء الله أفراح كتيرة
مع أني مش بحب أروح أفراح وبقف بعيد عن الدوشة وال(مسخرة) معلش أستحملوا الفاظي الناهرده
قبل ماندخل في الموضوع عاوز اقولكم حاجة او افكركم بيها
يا جماعة أنا مش واحد بيتصيد الاخطاء للناس وبيجي يتكلم فيها
أقسم بالله انا لست كذلك ابدا
ربنا اللي يعلم اني بعد اللي شفته دا واللي سمعته بقيت عاوز أعمل اي حاجة
وعاوز الناس كلها تتكلم والمصايب اللي بتحصل ديه لازم ليها من وقفة
ولازم احنا نتناقش فيها ونتكلم فيها هنا...
امال انا متنيل وعامل البلوج دا ليه؟؟
اكيد مش عشان اعيط وانا مسافر واقضيها سلامات ...لا...
عاوزين نبقي موضوعيين شوية والوقت اللي علي النت دا مهما كان يزود عندنا حاجة...
مش وقت بينقص من عمرنا وخلاص وهنتسأل عنه يوم الحساب
.
.
هنتكلم بقي عن ليلة العمر او الفرح
يعني ايه ليلة العمر ؟؟
يعني البنت تتخلي عن حيائها وعن تدينها ومبادئها وعن حجبها...وعن الادب....وعن ملابسها كمان
ايه الداخلة الغريبة ديه يا ابو حميد؟؟
دا اغلب ما رأيته
هو يا جماعة القلم بيرفع في الافراح وعلي الشواطئ ...يعني ربنا عز وجل مش بيحاسب الناس في الافراح وعلي البلاجات؟؟
والا الملائكة بتقول خلوا الناس تفرح وبلاش تكتبوا عليها سيئات؟؟؟
أصل لازم حد يفهمني
واحدة محترمة مؤدبة الناس كلها بتضرب بيها المثل في الاحترام..
تيجي يوم فرحها حاجة تانية خالص
إن صح التعبير ومحدش يزعل مني بتبقي رقاصة
معلش يا محمد ...انت كدا دخلت في الغلط
لو سمحت التزم بالادب عيب كدا
لا مش عيب
انا برضو اللي التزم بالادب؟؟
جتجوا نيلة وانتوا تعرفوا ايه عن الادب يا شوية بلاليص (انا بتخيل اللي بيعارضني وموافقين علي المهازل اللي بتحصل)...اما كلمة بلاليص فهي شتيمة من النوع الميري التي لا يعاقب عليها القانون..
.عشان بس نعرف اللي لينا واللي علينا وخلينا في موضوعنا
واحدة تخلت عن كل حيائها ومعظم ملابسها وعاملة زي عروسة المولد
ونازلة رقص بكل ما تملك من قوة ومهارة ( والسؤال...هما بيتعلموا الرقص دا كله فين؟؟؟)... والثور اللي اتجوزها او خطيبها واقف يسقف ويرقص هو كمان
...ماشاء الله...متفقين
وكأن المعازيم كلهم محارم...يعني كلهم اخوتها في الرضاعة
....وكأن صحابه مسموح ليهم انهم يشوفوا عروسته وهي في كامل تألقها
ومفيش مانع أن أي حد يجي يرقص شوية معاها
...اهو من نفسه...مش ليلة العمر
وتتساقط أقنعة الحياء من علي وجوه الجميع
ومش بس كدا...دا في دليل ابدي علي هذه الفاجعة
الا وهو شريط الفيديو والمصور الماهر الذي لا يترك اي شئ الا وسجله في حافظة شريطه
ويتعمل من الشريط 48100 نسخة عشان الاهل والصحاب وبرنامج البيت بيتك
وعشان اللي ميشتري يتفرج
ودي قصة واقعية حدثت في احد حفلات الخطوبة ...بقول الخطووووووووبة
...يصيح الارجوز او الميك مان بتاع اللاختراع اللعين المسمي بالدي جي علي الجميع بالصمت
..ويهدد انه لن يكمل حفلته الا بعد ان يقبّل العريس شلبي العروسة شفيقة
فتسمرت في مكاني وتخيلت أبو العروسة وأخواتها اللي عاملين زي مواسير الصرف الصحي الضخمة انهم سوف يهرولون ويضربون الميك مان علي وقاحته
...فهي حفلة خطوبة ....كيف للعريس ان يقبل ابنتهم؟
دا حتي لو كتب كتاب فين الحياء بس؟؟
...دا الدم هيبقفي للركب يا جدعان...والحمد لله المسخرة هتنتهي
والدي جي هيتكسر وإذا بالاهل (اهل العروسة طبعا ) يقومون كرجل واحد
....علي صيحة رجل واحد
قائلين بأعلي أصواتهم:
بوسها....بوسها....بوسها
ويتعالي صراخ كل المدعوين قالئلين
....بوسها ...بوسها ...بوسها
وتدمع عيون الجميع للموقف المؤثر
والواد يبوس...قشطة...مدام العيلة ايزي يبقي بوس يا عزيزي
طبعا انا مشيت لحسن ينادي علي المعازيم واحد واحد ويحلف انه مش هيكمل الحفلة غير لما كل الناس تبوس
و قلت اروح ابوس ايد امي وابويا علي انهم جبولي احمد اخويا اللي دخلني الجيش وبعدني عن الكلام دا

سؤال للشباب الذي الورد اللي بيطلعلهم شنبات تحت مناخيرهم
شعورك ايه لما الانسانة اللي المفروض انها هتشيل امانة بيتك وتربية اولاد وهتغرس فيهم قيم واخلاق بتعمل كدا
انت احساسك ايه وهي في الوضع دا؟؟؟
هل انت فرحان ومبسوط وفخور بين صحابك واهلك وجيرانك والمجمتع والناس؟
إن كنت كذلك فأبشر...قد فزت معنا بالقرن الذهبي وخلعنا عليك لقب خروووووووووف كبيييييير
والا هتفكر الف مرة وهتتخيل نفسك كدا وانت واقف جنبها والدم هيجري في عروقك وهتغير زي الرجالة وهتقول ...لا...الانسانة ديه متنفعنيش انا عاوز واحدة محترمة ..متدينة...تعرف تصون بيتي وتربي اولادي

والمصيبة ان اول شرط للبنت او للولد في مواصقات شرك حياته انه يكون متدين
......

دا حصل معايا شخصياً عند تقدمي لخطوبة بنت رشحتها الي خالتي الغالية بعد ان ُأعجِبت خالتي بكلام البنت وامنياتها في إيجاد شاب متدين
دا إن انا قلت عن نفسي اني متدين
وضحكت علي نفسي وضحكت عليكم عشان محدش ياخد فيا مقلب ويصدق خالتي
البنت عاوزة شاب متدين
ماشاء الله ربنا يكرمها يارب....بس انا ليا شروط
عارفين شروطها ايه؟؟
مش هتلبس نقاب ولا حتي إسدال وهتخرج بكامل زينتها وكمان مش عاوزة فرح إسلامي ومش بيعجبها اللحية ولا الثوب الابيض القصير وطبعاً مفيش مانع من سماع الاغاني والمصيف يكون في شرم الشيخ...
بس تصدقوا نسيت أسالها في موضوع المايوه البيكيني....عاوزاه لونه ايه؟؟؟؟؟؟؟
والاسم ....عاوزة شاب عنده دين...يمكن يكون قصدها عنده تين؟؟
في تين برشومي وفي تين شوكي...هي اكيد كانت تقصد احد النوعين
........................
ماعلينا نرجع لموضوع الافراح والليالي الملاح

طب الحل ايه يا جماعة؟
ليه منفرحش زي ما ربنا امرنا ونتبع سنة الرسول صلي الله عليه وسلم
يا جماعة في حاجة اسمها افراح اسلامية جميلة جدا
وفيها فرحة جميلة
النساء والبنات بيكونوا مع بعض ويفرحوا بدون اي مشاكل...في حدود طبعاً
والرجال يكونوا مع بعض وبرضو يفرحوا في حدود
ويكون في احترام ووقار وادب..
العقد بيكون في اي مسجد والفرح بيكون برضو في اي صالة مخصصة للغرض دا
انا حضرت افرح كتير في قعات افرح كبيرة (عشان محدش يقول العريس بخيل او مش لاقي ياكل) والقاعات فيها جزء مخصص للنساء والبنات
هي ديه الافراح اللي انا اعرفها....مش الملاهي اليليلة .....
ايه الفرق بين الافراح اياها والملاهي الليلية؟
اهو شوية ناس سكرانة بترقص (المعازيم) وراقصة في الوسط (العروسة) وطبال (العريس) والا في خلاف وحد مش موافق؟؟

واحد هيطلع يقولي لو مش عاجبك الافراح التانية مترحش...
انت مالك...كل واحد حر يعمل اللي هو عاوزه....وانت مدام بتقول ان دا غلط بتتفرج عليه ليه.....؟؟
هقولك والله انا لو اعرف ان الموضوع كدا مكنتش فكرت اني اروح ...
دا انا عمري ما دخلت كابريهات في حياتي حتي ايام ما كنت بايظ
مش مهم انا قلت الكلمتين اللي عندي ومش مشكلة ان دم اي حد يتحرق..
.وكلها ايام وهرجع المعتقل تاني وابعد عن القرف دا
وحمد الله علي السلامة يا ابو حميد نورت بيتك ومطرحك والمدونة بتاعتك
وميهمكش من الناس اللي هتطلع تشتم فيك ..هتكون يعني ارذل من الحر والشمس والصول مصطفي؟؟

انتظروا الموضوع القادم......بعنوان
توب علينا يارب من الصيف وبلاويه واللي بيجرا فيه
....
حاجة تقرف

هناك 35 تعليقًا:

فاروتا المصرى يقول...

الحمد لله اول واحد يعلق العبد لله
تروح وتيجى بالسلامه يا ريس

الجيش للجدعان

اه حكايه الافراح دى زادت عن حدها
حاليا عندنا فى البلد موضوع النقطه- الفلوس زاد عن حده خالص
كل يوم نسمع عن فرح فلان جمع 200 الف
فرح جمع 100 الف
وتمناين الف وخمسين الف ؟؟
نقطه نقوط

وربنا يستر
مالها الافراح الاسلاميه
اغانى وفرح وكل فى طاعه ربنا
تحياتى
وتبقى عدى علينا

Bossy يقول...

السلام عليكم

والله كنت هبقي اول تعليق
يلا خير

اولا حمدلله علي سلامتك يا محمد
فرحت جدا علشان رجعت
واتكلمت من تاني
كلامك جميل جدا ومتفقه معاك
بس مدام احنا هنعيش مع كل الحاجات الغلط دي
وللاسف بنفشل في اننا نصلحها
يبقي طنش تعيش

وحمدلله علي السلامه
ومستنين الموضوع الجديد

ihapoof يقول...

حمد الله على السلامه يا حج ..
"الصول مصطفى!!!"
إنت س 14 ... أهلاَ
مبروك عالأجازه HAVE ANICE TIME

خمسة فضفضة يقول...

السلام عليكم ورحمة الله وبركاته

حمد الله علي السلامه والحمد لله ان رجعت فيالقرار اللي ماكانش له اي لازمه ده خالص

ربنا يخليلك قلمك ومدونتك وجمهورك العريض من القراء وانا اولهم


بالنسبة لموضوع الافراح والله مش لاقيه كلام يتقال بعد اللي انت قلته ده ومش عارفه اعلق علي الكلام بايه فكل اللي كان ممكن اقوله انت خلاص فلته
فامش هاقول الا ربنا يهدي الجميع

سلام

الراقص مع الذئاب يقول...

السلام عليكم

فاروتا المصري
الله يسلمك ....جزاك الله خيرا علي كلامك الجميل

اما بخصوص النقطة ديه فبصراحة متعرتضش ليها لغاية دلوقتي
بس حضرتك زكرت ارقام غريبة اوي في موضوع النقطة ديه
دات كدا بقي لو الواحد عاوز يعمل مشروع حلو يتجوز ويلم النقطة


فعلا...ملها الافراح الاسلامية

اسعدني جدا مرورك الكريم استاذي الفاضل

الراقص مع الذئاب يقول...

وعليكم السلام يا بوسي
الله يسلمك وجزاكي الله خيرا علي كلماتك الرقيقة
لا يا بوسي ...لأ لو طنشنا الوضع هيستفحل ويزيد ومش هيبقي في حل والموضوع هيتفرض اكبر

علي الاقل نقول احنا رافضين الوضع دا
احنا مسلمين وعرب...

دمتي في خير واسعدني جدا مرورك وسؤالك

الراقص مع الذئاب يقول...

الاخ الجميل ايهاب
الله يسلمك
الصول مصطفي اتنقل وراح س 9 للأسف
حسبي الله ونعم الوكيل
انا في س 9 مع الصول ماهر والصول اسلام
دا بقي جه عكنن علينا
اسعدني جدا مرورك الكريم...واسمح لي ان اتشرف بإضافتك في مدونتي
هو انت صحيح دفعة كام؟؟؟
اكيد 130
صح؟

الراقص مع الذئاب يقول...

وعليكم السلام ورحمة الله وبركاته
دكتورتنا خمسة فضفضة

والله يا دكتورة دا مكنش قرار...انا فعلا مكنتش لاقي اكتب حاجة ....قلت اسكت لفترة لا يعلمها الا الله
بس مكنتش فاكر انها هتبقي قليلة..وللأسف اللي رجعني حاجة مستفزة
وما خفي كان اعظم
دي في موضوع كبير اوي لازم كلنا نتكلم فيه ونقف فيه....وعاوزك معانا يا دكتورة
وربنا يهدي الجميع
سلام

رفقه عمر يقول...

اولا حمد لله على سلامتك فرحت بعودتك جدا
وفعلا احيانا بتكون الوحدة عبادة وخصوصا بعيدا عن الفتن اللى حوالينا
علشان كدة انت خرجت صافى الذهن ومش عرفت تكتب حاجه
بس بجد موضوعك دة فى الصميم ربنا يكرمك
عارف برضه زى ما البنت بتقول انا عايزة واحد متتدين وفى الاخر تلاقيها توافق على واحد بعيد عن الدين تماما برضه الشباب المتدين متناقض مع نفسه بيبحث عن بنت هو اللى يهديها شوفت التناقض
مشكلتنا اننا بنقول حاجه وبنعمل حاجه تنيه خالص
وانا معاك فى موضوع ازاى العريس واهل العروسه سيبنها كدة مستباحه لكل الناس لا وكمن بتكون محجبه ووقت زفافها تكشف كل جسدها وتبقى عامله زى هايفه وهبى بالظبط
على فكرة انا قبل ما ربنا يعرفنى طريق الهدايه كنت باحسب دة العادى ودة العرف وكنت لو ارتبطت كنت هاعمل كدة بس الحمد لله انى لم ارتبط وقتها علشان لا اقع فى هذا الفخ
الحمد لله الذى هدنا لهذا وما كنا لنهتدى لولا ان هدانا الله

إنـســانـة يقول...

حمد الله ع السلامة يا اخى

الافراح بقا دى موااااال كبيييير وفى رأيي ان مالهاش لازمة اصلا
لو فساد وكدة فطبعا لأ
بس لو إسلامية فبردو يبقى لأ
مش عشان الإسلامية وحشة ولا حاجة
بس عشان انا رافضة فكرة الفرح اصلا

فيها ايه لما العريس والعروسة يكتبوا الكتاب ويتزفوا ويروحوا يتعشوا برا لوحدهم ولا حاجة
وبعد كدة يرجعوا البيت من غير صداع ولا وجع دماغ وقلبة مزاج

وفيها ايه لما يوفروا فلوس الفرح ويروحوا يعملوا بيها عمرة ولاحاجة

معتقدش ان كان فى افراح ايام سيدنا محمد عليه الصلاة والسلام ولا حتى مايسمى بالفرح الإسلامى

الفرحة ياجماعة فى القلب وفى اختيار الزوج الصالح والزوجة الصالحة والرضا وهدو السر والمودة والرحمة والحب اللى بينهم .. وان ربنا يباركلهم فى حياتهم سوا ويبعد عنهم الشيطان
مش فى التنطيط والبعزأة اللى مالهوش لزمة .. إسمحلى حتى لو كان فرح إسلامى

اساسا الظروف الإقتصادية تاعبة الناس كلها .. افراح ايه وبتاع ايه بس
:D

حمد الله ع السلامة كمان مرة

سلام عليكم

سكتم بكتم يقول...

يانهار أبيض فرح واحد يعمل فيك كدة

عايز ترجع الجيش

أمال لو رحت شرم الشيخ ولا الغردقة حتقول أية

يمكن ساعتها تطوع في الجيش بقيت عمرك

طبعا عندك حق في كل اللي قلته.بس المشكلة أن كتيير من الناس بتتعامل مع نفسها ومع ربنا بذمتين
يعني الدين في الصلاة والصوم بس لكن في الفرح أن الله جميل يحب الجمال وربنا غفور رحيم وساعة وساعة ياعم الحج متكلكعهاش

تروح وترجع بالسلامة

mohand يقول...

السلام عليكم
هههههههههههههههههههههههههههههههههههههههههههههههههههههههههههه
البوست ضحكني قووووووووووووووووووووووي
بالذات في التلميحات والتصريحات كمان

بوسها بوسها بوسها
اكيد طبعا النور كان مطفي
انا شوفت كده كتير قوي
يالا ربنا يهدينا ويهديهم

انا مع انسانه
فيها ايه لو مفيش فرح
انا فكرت ان ميكونش في فرح العائله والحمد لله بهدلوني لما عرضت وجهه النظر دي
مع اني لسه متكلمتش علي حد اصلا
يعني دا بعد عمرا طويل
بس اللي قررته ان يكون الزفاف بعد صلاة الجمعه اللي هنكتب كتب الكتاب في الجامع ونحتفل بفرح افترنون حلو كده
من غير اي حاجه
اكل ومشروبات ومبروك الله يهنيكم
وشكرا

تحياتي يا اخي
ومبروك العوده
ونتمني الاستمرار

إنـســانـة يقول...

معلش حوضح حاجة للأستاذ مهند

إقنااااع الأهل
معضة المعضلات اللى فى الدنيا وربنا يستر
بس اعتقد والله اعلم انى قدرت اقنعهم إلى حد ما .. وبقول اعتقد لانى لسة على باب الله بردو

المهم إتبعت سياسة الزن مع الإقناع
من اول ماجتلى الفكرة كنت فى اعدادى تقريبا قولتها لماما وبصيتلى بإعجاب جامد كدة وسكتت
بعدها كل حين وآخر كدة اقعد اقنع وابرهن و و و

إلى ان اتخرجت من الكلية وماما خلاص بقت عارفة دماغى .. مرة كنا قاعدين وجه كتب كتاب فى مشيخة الازهر
لسة حتفتح بوقى واقولها شايفة يا ماما اهوه انا عايزة اعمل فرحـ.. لاقيتها بتقاطعنى وبتقولى فى حزززززززم .. وخدوا بالكوا من حزم دى اوى


خلاص يا ياسمين .. حعملهولك كدة

هههههههههههه

زهقتها ع الآخر يعنى

وربنا يكرمك ويفرح الجميع اللهم امين

اسفة ع التطويل

سلام عليكم

mohand يقول...

السلام عليكم
مش عارف اوصلك بالايميل ومش معايا رقمك المصيبة


mr: 28.5 اللغة العربية (1)

mr: 30 اللغة العربية (2)

mr: فرنسي 49
mr: رياضه 50
mr: اقتصاد 50
mr: كيمياء 50
mr: ابيلوجي 49.5
mr: المجموع 405
mr: مستوي 10

دي النتيجة

mohand يقول...

24 اللغة الأجنبية الأولى (1)

25 اللغة الأجنبية الأولى (2)


ودا الباقي
عايز الحلاوة بقي

mohand يقول...

الف الف الف مبروك
والحمد لله
ويباركلكم فيها ان شاء الله

رينـــــــــــا يقول...

السلااااااام عليكم
دا قلم يابنى والا صاروخ ههههههههههههههه
شكلك سنيته كويس:P

بص يا بشمهندس محمد
انا معاك ان اللى بيحصل دا حرام وغير مبرر وايضا مش من الشهامه ولا الرجوله
بس يا محمد تفتكر ان الاسلوب فى توصيل ما تريد بيفرق مع الناس والا لا؟؟
يعنى انا شايفه مع احترامى الشديد ليك انك بالغت شويه فى الوصف والتهكم حتى لو بنى ادمين بتغلط
كلنا كنا بنغلط وبنقول الحمد لله الذى عفانا وهدانا
وكان ممكن نكون كدا لولا فضل الله علينا

وبعدين الناس عايزة اللى ياخد با ايدها بهدوء ونقول دا حرام وغلط
لكن تخيل واحد ملوش فى البزرميط دخل لقانا بنعمل كدا
اول حاجة هيقولها هو الدين بيخنق كدا؟؟
لا ياعم مش عايز

دا فكر الشباب الحالى بواقعيه شديدة وللاسف اسلوب الشدة والتهكم مش بينفع معاهم خالص

وبعدين يا محمد انا روحت مكان شايفه من وجهه نظرى انه فيه معصيه انسحب بهدوء وفى الحاجات دى بتبان من اول الزفه اساسا دا ان مكنتش انا عارف انا الناس اللى رايح ليهم فكرهم عامل ازاى


ادع إلى سبيل ربك بالحكمة والموعظة
الحسنة وجادلهم بالتي هي أحسن

تقبل احترامى الشديد
اختك رينا :)

LOVE يقول...

أستاذ:الراقص مع الذئاب
ليه الفتونه دى والكلام إللى يثبت أنه لا مجال لتقبل ألآخر؟؟
فى تعليق لك على مدونة ما صببت جام غضبك على صاحبة المدونه،بذنب أنها تنتمى إلى فريق المثليين...هذا حقها وكما أنت تحب الشاى وتستعذبه هناك من بفضل القهوه ويرشفها
لاتكن فى وضع من يحجر على ألآخرين فلقد خلقنا وكل يعمل على شاكلته،وتذكر أن الله قد يرزقك بطفل تكون له إتجاهات مثليه،فماذا أنت صانع فى هذا المقام؟؟؟
سعدت صباحآ وأزعم أنك هادىء النفس وستجيب بمزيج من الهدوء والسكينه وحاول أن تكون مداخلتك سلسه ورقيقه
شكرآ

Ma-3lina يقول...

تخيلت أبو العروسة وأخواتها اللي عاملين زي مواسير الصرف الصحي الضخمة انهم سوف يهرولون ويضربون الميك مان علي وقاحته


هههههههههههه

شكلك متدمر من الفرح اياه او تقريبا كتبت الموضوع و انت هناك

بتفق مع رينا ان الموضوع يتاخد بالهداوة علشان الناس تفهم و تتقبل وجهة النظر الاخرى

بس عامة موضوع حلو جداا

تحياتى ليك و للصول

Doba يقول...

أتمنى من كل قلبى أن يتحقق كلامك وتصبح كل الأفراح مع شرع الله وسنه رسوله

تحياتى -- هبة

LOVE يقول...

الراقص مع الذئاب
أولآ حمد الله على سلامتك وسلامة محبينك ومريديك
ياأخى الواحد بيفرح لما يشوف شباب بالتدين ده والإسلاميه ألأصوليه دى:أفراح ماجنه..لابد أن نهدمها..بنت ما تتنقبش كما جاء أنه فريضه إسلاميه؟؟بقى معقول فى القرن21ولسه ماحدش تنقب ؟؟الناس دى عايشه إزاى..همه ميعرفوش إن المرأه الغير منقبه ستغلق يوم القيامه من شعرها إللى كان باين للناس بتستعرضه؟؟
إيه المسخره إللى إنت شفتها دى يابوحميد!!بنت حد يبوسها فى ليلة خطوبتها..دى جــــــــــى؟؟ونسمع أصوات منكره زى عمرو ذئاب،أو مصطفى كلاب؟؟صدقنى أنا لو كنت فى مكانك أو فى موقفك كنت رحت للبيه الظابط النوبتجى وأحرر محضر بالواقعه دى ..قلة أدب
ده حته الشيخ الشعراوى قالها بالفم المليان..الحجاب والنقاب مكرمة لك ياإمرأه والطريق لدخولك الجنه
بافرح لما أسمع شاب زى الورد زيك كده وهوه بيغير على بنات الناس،لازم نقول للأخوان المسلمين فى مجلس الشعب إن إللى ماتتنقبش تكون خارجه على المله وتكون من الكافرات
أحييك من كل قلبى على غيرتك على ألإسلام وإنشاء الله نتقابل فى الجنه التى سيكون فيها الولدان،والبنات الحور،وأهلها من المجاهدين ...مجاهدين فين ؟إستنى لما أسأل وأقولك
سلام يابو حميد...ده أنتوا غلابه أوى ومخكم تاعبكم أوى
ياعالم صحصحوا إحنا فى زمن العولمه..يعنى تفتيح المخ علشان الرب ياخد بإيدكم وتبطلوا شرب لبن النوق،والتبرك ببول الرسول،وتجيزوا رضاع الكبير..وتستمعوا لشاشه تأخذكم للجنه..طيب ولو ماسمعنهاش؟؟هل هندخل النار؟؟أرجوك إجابه بس تكون إجابه مهذبه بدون سباب ..بدون كلام لايقال إلا فى الخرابات المهجوره،يعنى رد مهذب لأنى عارف إنك مهذب ومايعجبك الحال المايل
باى باى

LOVE يقول...

الراقص مع الذئاب
ياريت نبطل عصبيه وعلى رأى ألأستاذ الكبير أبو إسلام عبد الله رئيس قناة ألأمــــه الفضائيه نستخدم ثقافة الحـــــــوار:يعنى ثقافة ألأختلاف،وبعدين لو بفرض أنى مثلى جنسى ماذا يضيرك ياأستاذ أو يا حضرة الظابط؟؟المثلى فى حاله و(السوى)فى حاله،والا سيادتكم وظفوك رئيس عموم الكون؟؟
خليك كوووول وماتتعصبش يمكن لما نتحاور يكون فيه خير لنا ولسيادتك
على فكره أعرفك بنفسى :
جورج وأعتقد لما قريت ألأسم ضغط سعادتك إرتفع ل250/10
الذى يخاطبك إسمه الحقيقى ليس جورج ده إسم شهره بين أصدقائى ،على فكرة أنا دكتور ..حظى السىء إنى دكتور كان نفسى أكون مهندس ..الوقت تقول لو كان ده مهندس كنت قدمت إستقاله من النقابه علشان أنا محبش يكون معايا راجل زى ده
معلهش الدنيا فيها بلاوى وإعتبرنا بلوه من ضمن البلاوى أو مصيبه وحطت على دماغ سعادتك!!ا
ياأخونا العزيز لا تكون مخاطبة الناس بهذا اللون من الشتائم وألأسلوب الغير محترم وأنا أحس أنك راجل مجدع ومحترم..وألا رأى سيادتك إيه؟؟
تمنياتى بالتوفيق

الراقص مع الذئاب يقول...

الله يسلمك يا رفقة
جزاكي الله خيرا علي كلامك الجميل
فعلا شباب كتير بيكونوا متناقضين وبيختار عكس مواصفاته
ربنا يهدي شباب المسلمين جميعا ويرزقنا وإياهم العفة والصلاح

جزاكي الله خيرا مرة تانية علي زيارتك الجميلة يا رفقة

الراقص مع الذئاب يقول...

إنسانة
الله سلمك ويبارك فيكي اختي الكريمة
بس الافراح موجودة في الشريعة ...
الوليمة والبناء
احنا لازم نفرح والعروسة لازم تتزين لزوجها وزوجها يتزين لها
بس لازم الفرحة تبقي في حدود ما اقرره الشرع
ووقتها هتبقي جميلة ومن غير اي مشاكل

اما بخصوص الظروف الاقتصادية فالفرح الاسلامي والحمد لله حلها
جزاكي الله خيرا علي مرورك الكريم واتمني دوام تواجدك وزيارتك
دمتي في خير إن شاء الله

الراقص مع الذئاب يقول...

سكتم بكتم
لا يا عم اسماعيلية جميلة ومش عاوزين شرم ولا الغردقة
الحمد لله احنا في نعمة

جزاك الله خيرا علي مرورك الكريم وتشريفك

الراقص مع الذئاب يقول...

مهند باشا
وعليكم السلام ورحمة الله وبركاته
علي فكرة يا جماعة مهند جبلي نتيجة اختي امبارح من علي النت بعد ما دخت عشان اجبها
واخدلوا دعوتين حلوين

وايه حكاية بعد عمر طويل؟؟؟
محدش يصدقه يا جماعة...مهند كلها 18 سنة بس وهنجوزوا...بس محدش يتكلم
حبيبي يا هنود

اما بقي إقناع الاهل يا يا سمين...فدا شئ طبيعي انه يبقي صعب...بس مدام الموضوع صح يبقي متخفيش توكلي علي الله

الراقص مع الذئاب يقول...

رينا
وعليكم السلام

انا اتتفق معاكي في الاختلاف في طريقة الاسلوب
بس زي ما قلتلك قبل كدا
مش ديما اسلوب اللين بينفع
ولازم يبقي في هزة
اسلوب اللين والابتسامة شغال بقاله كتير ...والنتيجة إن الحكاية زادت سوء والمهازل كترت والفجر بقي علني

نغير بقي كدا ونفوق الناس
مش مشكلة يقولوا عليا اللي يقلوه
المهم يعرفوا إن وضعهم مشين وخلاص

اما بقي بخصوص الانسحاب ففعلا انا انسحبت من المكان...وقلتلك اني اساسا مدخلتهوش...ولو كمان قلتلك إن كل اللي حصل دا كان بالسمع مش بالنظر...يعني المهازل انا سمعتها عشان كنت واقف بره
وانسحبت فعلا...بس مش بهدوء...ما انتي عرفاااااااااني

اكيد طبعا الدعوة بالحكمة والموعظة الحسنة
وفي كمان امر بالمعروف ونهي عن المنكر
وهما جناحان طائر
ولا يمكن لطائر ان يطير بجناح واحد
جزاكي الله خيراعلي وجهة نظرك ورأيك الصح
ودمتي في خير اختي الكريمة

الراقص مع الذئاب يقول...

love

لو انت جامد كدا وحلو انشر الردود بتاعتي اللي مفهاش اي حاجة خارجة
بس بتدوس علي الجرح عندك

والله لا هي كلام خرابات ولا فيها حاجة مش صحيحة
وعمري مكتبت رد بإسم مجهول
انا مش محتاج استخبي ورا اي ستر عشان اتكلم

وبلاش تتكلم في الدين عشان انت نصراني وانا بتكلم عن افراح المسلمين
يعني شئ ميخصكش
وعشان انت برضو متنيل علي عينك ...يعني موضوع الافراح والجواز شئ ميخصكش برضو

علي فكرة انا ضغطي والحمد لله سليم ..احنا رجالة والجيش مفهوش حد كدا والا كدا...انت فاهمني طبعا
يعني صحتنا وطبيعتنا سليمة ولله الحمد

وانا متاكد ان ضغطك انت كمان سليم ومش بيعلي

وبلاش الكلمتين بتوع انت مجدع ومحترم وهتتفهم الوضع

العب غيرها يا جورج

حاجة تقرف

الراقص مع الذئاب يقول...

دكتورة ما علينا
اسعدني مرورك الكريم
واحترم وجهة نظرك ووجهة نظر رينا طبعا
منه لله اللي كان السبب وقلي تعالي نخرج ونروح الفرح الفلاني
والله كنت رايح اسلم وامشي

اسعدني جدا مرورك يا دكتورة
دمتي في خير

الراقص مع الذئاب يقول...

doba

وانا كمان بتمني كدا يا هبة..
اللهم ارزقنا والمسلمين العفة والفضيلة

اسعدني جدا تشريفك مدونتي يا اختي الكريمة
دمتي في خير إن شاء الله

BinO يقول...

أنت جامد جاداً
أن شاء الله في فحي لااااااااااااااااازم تيجي أن شاء الله
حيبقي في الأسماعيلية طبعاً ان شاء الرحمن
:)

Hadota .. حدوتة يقول...

انا عارفة ان تعليقى جاى متأخر شويه
بس مقدرتش امسك نفسى
انت عندك حق فى كل كلمة بتقولها
يالهوى على الافراح واللى بيجرى فيها
البنت من دول بنت الناس المحترمة تلاقيها فى الفرح لابسة عريان وبترقص مع الشباب ومش اى رقص ساعات بيرقصوا سلو يعنى هقول ايه بس؟؟؟
العريس يسلم عروسته لاحد قرتيبها الافاضل يرقص معاها سلو بمناسبة فرحها

تصور بعد ماحضرت احد الافراح اياها دى
العروسة بعدها تقول دا مكنش فرح دا كان اعتزال رقاصة هههههه

وضحكت بالشكل المستفز دا

الواحد كان بيروح مجاملة احيانا وواجب احيانا اخرى وكنت اسمع ابويا رحمة الله عليه يقول ايه المسخرة دى
الابهات اللى بتعمل كل معندهاش حياء

الموضوع جامد وفى الصميم احييك
المدونة كمان جامدة اوى

gohayna يقول...

انا مفدرتش امسك نفسي من الضحك يا محمد
انت بجد ملكش حل خالص وربنا
مش ممكن يا ابني


انا معاك في كل الي بتقوله
بس قليل الي بيفكر زيك كدا

الشباب دلوقتي مزعلش مني حاطت في دماغه صوره لفتتاه احلامه تكون في جمال نانسي وجسم هيفاء ورومانسيه اليسا وطول بسكال وكدا يعني

والبنات هبله بتجري ورار الموضه ودعوي اقلع من اجل التحرر والتقدم
كل ما تقلع اكتر تكسب اشباب اكتر

وربنا هبل يا ابني

وكلهم الطرفين في الخر عايزين ربنا يوفقهم في حياتهم

طب ازاي بس يا معلم فهمني

المهم بقي
موضوعك دا جامد موت بصراحه

وخساره اني شوفته متاخر

معلش حقك عليا يا محمد

تسلم ايدك يا مان

تحياتي

DARK يقول...
أزال المؤلف هذا التعليق.
DARK يقول...

sorry
i made it in the wrong place
plz forgive me
but the subject is really great