Translate

الأربعاء، 12 ديسمبر 2007

كلمات من ذهب -1

السلام عليكم ورحمة الله وبركاته

كيف حالكم اخواني واخواتي الكرام
بعتزر للجميع مرة تانية عن غيابي الطويل وبشكر كل الناس الي سألوا عليا سواء في المدونة أو علي الميل
جزاكم الله خيرا جميعاً
نرجع تاني زي زمان (هو مش زمان اوي يعني) وندردش مع بعض
والله وحشتني الدردشة معاكم
من فترة كان في ندوة عندنا في كلية ضباط الاحتياط مع أحد أبطال حرب اكتوبر والبطل دا قال جملة علقت معايا أوي
الراحة لا تصنع القادة

وعاوز أقول حاجة بسيطة بس لازم نزكرها مدام جبنا سيرة اكتوبر وبعدين نرجع نكمل كلمنا عن الجملة اللي سبب فتح هذا الموضوع
في إتجاه ظهر في السنين الاخيرة وفي هذه الايام لتهميش حرب اكتوبر
أو بمعني أصح لتشويه التاريخ
زي ما بيحصل ديماً معانا
نقرأ التاريخ من كتب الأعداء ونصدقه.....وننسي التاريخ بتعنا
أقلام قذرة مأجورة بتحاول إنها تشوه الحرب اللي كسرت أنف اليهود وأمريكا وكل دولة معادية
الحرب اللي راح فيها حجات كتيرة غالية عشان حجات أغلي ترجع
مش شعارات ولا خطب رنانة
لما تقعد مع أحد القادة اللي كانوا في وسط الحرب ديه وتسمع كلامهم وتعرف حكيات زي الخيال هتحب الناس دي أوي...وهتحب الحرب ديه أوي
ومش هتبطل تتكلم عنها
سيبك من الافلام والمسلسلات والحوارات ديه
أقعد مع ناس شافت بعنيها معجزات من الله عز وجل في حرب كانت بتترج فيها الأرض بكلمة الله اكبر
لا والله...أبدا لم تكن حرب اكتوبر كذبة كما قال أحد الكتاب الماجورين
حرب أكتوبر أكتر حاجة حقيقية في حيتنا....ليك إنك تعتز بيها أوي وتفخر بيها طول حياتك وتعلنها لأولادك وولاد ولادك
في الدراسة الأكادمية عندنا في الكلية مفيش محاضر يدخل في أي مادة غير لازم يتكلم إحنا في اكتوبر عملنا ايه
وازي كان التمهيد للحرب...وازاي قدرنا نقنع كل العالم بحاجة ونعمل عكسها...وإزاي استخدمنا اقل الامكانيات المتاحة في مواجهة اكبر واحدث الامكانيات
وفوق كل دا رحمة وكرم الله عز وجل بينا ثم رجولة الناس اللي كانت شايلة السلاح...اللي كانت بتتسابق علي الشهادة....لغاية ما رفعوا راسنا لفوق اوي.....
نحسبهم علي خيرا جميعا إذا كانوا احياء وشهداء إذا توفاهم الله عز وجل
معلش.....والله كنت عاوز اكتب كتير اوي عن اللي سمعتو من القادة الابطال واحكلكم علي حجات جميلة اوي هما حكوها ...بس عشان مطولش عليكم هندخل في الموضوع

الراحة لا تصنع القادة

خرجت هذه الكلمات زي ما قلتلكم من قائد بطل
بس تعالوا نشوف معانيها ونطبقها علي حيتنا كلها....مش لازم تكون جملة في العسكرية
مفيش إنسان في حيتنا معندوش مشاكل
اقعد مع أي حد في الدنيا هتلاقيه بيشتكي....وبعد ما يشتكي يقول الحمد لله انا صابر وراضي باللي كتبه ربنا
يعني يقعد ينوح ويعيط ومش ناقص غير إنه ينام ويرفص في الارض ويصرخ وفي الاخر يقول إنه صابر علي اللي هو فيه وجامد أوي ومش بيهمه اي حاجة.....طبعاً عدم مصداقية وقول غير الفعل

وتلاقي مثلاً مشكلته انه مش عارف يغير عربيته...أو الموبيل بتاعه بيسقط شبكه...مشكلة هايفة كدا من المشاكل اللي تجبلك الحصبة أو شلل الاطفال من الغيظ وانت بتسمعها

تلاقي معظم الشباب اللي عندنا بينعي حظه ويفضل يشتم في البلد وفي الحكومة وفي رئيس الورزاء ويشتم كمان في السد العالي
هو السد العالي ذنبه ايه؟؟انا مش فاهم
حياته كلها سخط في سخط...مش عجابة أي حاجة...ينزل الصبح..إذا كان بيشتغل في أي مكان حلو والا وحش واياً كان مرتبه تلاقي سيناريو واحد
يرجع يقعد علي القهوة....مبسم حجر الشيشة التفاح بين شفتيه...وأي مشروب ساخن في الشتاء او مثلج في الصيف
وشغال نفس الكلام بتاع كل يوم

بالعامية كدا والبلدي بتاع العشوائيات والمناطق الشعبية بنقول عليه مأنتخ
هيعيش وهيموت كدا...هايف...مش هيمشي خطوة لأقدام
عارفين ليه؟
عشان هو مش تعبان ومش عاوز يتعب
مش عاوز يفكر انه يرتقي بنفسه ووقته اللي بيضيعه دا في حجات كتيرة ممكن يعملها ترفع من قدره في المجتمع
ممكن يفشل مرة واتنين وعشرة...بس الفشل دا من وجهة نظرنا الضيقة بنعتبره فشل
مع ان أي فشل بيمر به الانسان بيبقي جواه نجاه مستتر...نجاح خفي هو مش واخد باله منه
نجاح الخبرة والتجربة
في جملة شهيرة بتردد امامنا علي طول
كلمة يكفيني شرف المحاولة
مجرد انك تحاول بس دا شرف
لو قرات في سيرة الزعماء والقادة وتعرفوا بدايتهم هتلاقوهم تعبوا أوي وفشلوا كتير عشان ينجحوا في الاخر
طيب تعالوا نرجع للأصل بتعنا ونشوف قدوتنا كلنا...رسول الله صلي الله عليه وسلم
من بداية طفولته كان بيمر بأقسي الظروف واشدها تعب ومرارة...عشان يقود خير الامم...واكبرها
وازي صبر وواجه اللي حصل لغاية ما وصل الدين لينا
اللهم صلي وسلم وبارك علي اشرف الخلق اجمعين
شوفوا قدوتكم اتعلم القيادة ازاي ..دي امثلة جعلها الله عز وجل في خير البشر عشان نتعلم...مش قصص في كتب السيرة
تعالوا شوفوا الصحابة كلهم حياتهم كانت ازاي
عشان كدا هما عرفوا يكونوا قادة امم من بعد ما كانوا رعاة غنم في خلال عقود قليلة من الزمن
كان ينقصهم الاسلام اللي يرتب التجهيزات اللي طبيعتهم وبيئتهم جهزتهم بيها
احنا جلنا الاسلام علي طبق من ذهب...وصلنا علي اجساد هؤلاء الرجال...
متعبناش عشانه ابدا
تلاقي الناس مستخسرة إنها تصوم النهار أو تقوم الليل في ايام العمل الصالح أحب اللي الله فيها

تلاقي كسل وتخاذل وسلبية غريبة ....وكلام من غير فعل

يا جماعة الراحة لا تصنع القادة ابدا

لازم تندمج في الحياة وصعوبتها...ومتزعلش من أي موقف صعب تتعرضله مهما كان

في ناس ممكن تكون بتمر بأزمات ومشاكل صعبة بجد...بس أقسملكم بالله بيخرجوا منها أقوي من الأول

عضمهم بسنشف وبيتخربشوا .....بيبقوا ناس يُعتمد عليها بمعني الكلمة

أوعي تزعل أو تسخط من أي صعوبة في حياتك

الناصح اللي يعرف يطلع منها الفايدة ليه.....ويتعلم من أي موقف هو فيه

ويمكن دي من الفوايد اللي اتعلمنها في الجيش..حياة قاسية بكل ما تحتويه الكلمة من معاني...قد لا يتحملها بشر

الكلام دا كان في البداية...دلوقتي ولله الحمد بقت نفس الظروف القاسية بتمر علينا بكل بساطة ومن غير أي مشاكل....في فترة قليلة جدا اتعلمنا ازاي نواجه ونعدي...وازي منرجعش لورا

مش في الجيش بس الكلام دا

لو ليك زميل او صديق او حد تعرفه مر بأي فترة صعبة في حياته وقدر يتحملها من غير انهزامية أو ضعف هتعرف معني الكلام دا

بجد مش عارف أوضح معني الجملة اكتر من كدا

بس لو قعدنا نفكر فيها هنخرج بحجات كتيرة أوي وتتغير نظرتنا للحياة تماماً

ياريت الجملة ديه تأثر فيكم زي ما أثرت فيا

وإن شاء الله دي هتبقي سلسلة مواضيع جديدة تحت هذا العنوان

كلمات من ذهب

اعتزر للجميع عن طول الموضوع وكل عام وانتم بخير ورزقكم الله العمل الصالح في هذه الايام المباركة

الله اكبر الله اكبر الله اكبر....لا اله الا الله والله اكبر...الله اكبر ولله الحمد


هناك 20 تعليقًا:

عصفور المدينة يقول...

ما أروع ما جلبت من خبرة
جزاك الله خيرا

إنـســـانـة يقول...

بجد جزاك الله خيرا وجعل الله هذه الكلمات المفيدة فى ميزان حسناتك يارب

يمكن ربنا خلانى اقرا الكلمات دى وانا فى اقصى مستويات الخنقة والضيق .. الحمد لله على كل حال واللهم اهدنا لاقرب من هذا رشدا

جزاك الله خيرا اخي الكريم ونفع الله بك

عاشقه الفردوس يقول...

جزاك الله خيرا
الحمد لله ان اول تعليق ليا فى مدونه حضرتك تكون على موضوع رائع زى ده

فعلا والله
الناس مش عارفه قيمه النعم للى عندها
اه طبعا مش كله
لان فيه ناس
زى مابيقولو شايفين الويل

بس فعلا دى جمله من ذهب
دمت ودام قلمك

موجة يقول...

تصدق عندك حق
فهذا الكلام كلام جميل القي باثاره فيا شخصيا
بس هو القائد ده اسمه ايه و كان في سلاح ايه
خالص تحياتي

Mohamed A. Ghaffar يقول...

الراحه لا تصنع اى شئ

رفقة عمر يقول...

حمدا لله على سلامتك
بجد مفتقدينى كلماتك ونظرك للامور اللى بتوضح لنا حاجات كتير غايبه عنا جزاك الله كل خير وربنا يبارك لك فى روحك الطيبه اللهم امين
معلش ليك تاج عندى والاجابه اجباريه

رفقة عمر يقول...

نسيت ااقولك كل سنه وانت بلف خير
واعاد الله عليك هذه الايام بالخير واليمن والبركات
ورزقك لله حج وزياره بيته الحرام اللهم امين

mohand يقول...

السلام عليكم

كل عام وانت بالصحة والسلامه والخير اللهم امين


وانا متفق معاك في كل كلمة قولتها


تحياتي

ToOoKa يقول...

السلام عليكم
اولا ياسيدى ماتزعلش من النكته لانى انا اصلا شرقاويه يعنى انا والصعايده ولاد عم وماكنش قصدى غير انو نبطل نكشر

اما بالنسبه لحرب اكتوبر فبابا كان بيحارب فيها وكل ما يحكلنا على الحرب بسرع وبكون مستمتعه بحديثو اوى
وقولتلو فى يوم انى كنت اتمنى انى اعيش فى الفتره دى لانو كان عندنا فيها كرامه

اللى مدايقنى اوى انو حرب اكتوبر دى كانت نصر لينا وكانت راسنا فوق فوق اوى ايه اللى حصل فى الفترة القصيره اوى دى علشان نتغير 180 درجه
ودلوقتى راسنا بقت فى سابع ارض ومافيش لا كرامه ولا حتى احترام لدمائنا

بس اللى انا عارفاه كويس اوى انو اكيد احنا السبب واحنا اللى سعينا وراء الغنا الزائف عن طريق تحويل مصانع السلاح والمعدات الثقيله والسيارات الى مصانع شيبسى ومياه غازيه
احنا اللى ضيعنا نفسنا بس لسه فيه امل لو كل واحد حط الجمله الحلوه اوى دى فى دماغو

وانا موافقه على كلامك انو الواحد لازم يطلع من المشكله وهو كسبان
انا حصلتلى ظروف قاسيه جدا وانا عندى 17 سنه والظروف دى استمرت لسنه كامله
والحمد لله وبفضلو طلعت منها كسبانه كتيـــــر وغيرت طريقة تفكيرى فى الحياة

يارب يوفقنا اجمعين ونحط الجمله دى فى دمغنا وننفذها مش كلام والسلام

ToOoka

hend...hanady يقول...

احنا ريحنا دماغنا وعدونا تعب نفسه وبيتعبها باستمرار وكل اللى طالع علينا ربك يسهلها ونسكت واخرتها نقول معاهدات السلام وغيره يبقى عليه العوض فينا لو فضلنا بالتكبيرة بتاعتنا دى

المهم
كل سنة وانت طيب وعيد اضحى مبارك

ŞoŖśậŖấầ يقول...

السلااااااام عليكمممم

انا كنت هتخانق معاك اساسا عشان اولا اعتذارك اللى كل شوية تكتبه دا على انك بتطول فى التدوينة
والله انا بجد استمتعت جداااا وانا بقرأ الكلام دا
كنت ناوية اقتحم التعليقات وازعق بقى واقلك ماكتبتش تانى ليه

بس الحمدلله شكلك كنت سامعنى وقلت من نفسك انك هتكتب اجزاء تانية

انا مستنيه باقى الحديث الشيق جداااا والمفيد جداااا واللى زعلت انه خلص جداااا

بس بقلك طالما الكلام دا من ذهب استنى لما الجرام يغلى شوية وابقى نزل البوست الجاى:))

بس مين صحيح دا اللى يقدر يقول حرف غلط عن الحرب
وريهولى كدا وانا هخلليكو تعرفوه مقامه بالنيابه عنى:)))

تحياتى ليك اخى الكريم
وماتغيبش علينا

مؤمنه يقول...

السلام عليكم ورحمة الله وبركاته
هذا البوست شوقنا الى البوستات القادمه وفقك الله
بعهذا البوست اثلجت صدورنا تجاه مواضيع كثيره مرت علينا نعلم ان الامل فى الله لا ينقطع ابدا
ولكن اشعرنا ذلك البوست باه من الممكن ان ينشق فى الحجر الصم ماء
جزاك الله كل خير

كنت قد دعوت حضرتك فى البوست الماضى لمشاركتنا فى مناقشة بوست ولماذا قالوا
والان اكرر الدعوه
راى حضرتك هيضيف لنا اكيد
والسلام عليكم ورحمة الله وبركاته

ma_3alina يقول...

كل عام وأنت بخير
من صفات المسلم انه يأخذ الحكمة من أي وعاء خرجت وهو مبارك أينما كان .. اسأل الله عز وجل ان يجعل ايام خدمتك العسكرية تكتب في ميزان حسناتك رباط في سبيل الله وتكون فائدة لأمتك فيما بعد ..

البنت الشلبية يقول...

مستغربة اوى انط ظابط وبالاخلاق المحترمة والكويسة دى
يمكن عشان خدنا فكرة ان كل حد بيشتغل فى الاجهزة الحكومية الامنية لازم تكون اخلاقه زى ال.... بالذات فى الشغل

========
كل سنة وانت بالف خير و باحسن حال وربنا يبارك فيك ويكرمك

عالمى ازرق يقول...

كل سنه وانت طيب
وعيد سعيد عليك وعلى الاسره كلها
وعلى الامه الاسلاميه جميعا

ولى عوده اخرى

الراقص مع الذئاب يقول...

السلام عليكم
الاستاذ الفاضل عصفور المدينة
جزانا الله واياك خير الجزاء

------------------------
إنسانة

فرج الله كربك وضيقك إن شاء الله
وتزكري...الضربة التي لم تقسم ظهرك تقويه

-----------------------------
جزانا الله وإياكي خير الجزاء

عاشقة الفردوس
جزانا الله واياك خيرا
تشرفت جدا بزيارتك الجميلة يا عشقة الفردوس
واتمني دوام تكرارها

الراقص مع الذئاب يقول...

السلام عليكم
موجة
جزاك الله خيرا علي مرورك الكريم
انا لا أتزكر اسم هذا القائد...ولكنه مستشار عسكري
جزاه الله خيرا


-------------
Mohamed A. Ghaffar

فعلا اخي الكريم الراحة لا تصنع اي شئ ...وإن صنعت فهي تصنع التخاذل

اسعدتني زيارتك الكريمة
-----------------------
الاخت الفاضلة رفقة
جزاك الله خيرا علي مرورك الجميل وكلماتك الرقيقة
إن شاء الله هجاوب علي التلج في اقرب فرصة

الراقص مع الذئاب يقول...

السلام عليكم
اخي الجميل مهند
كل عام وانت الي الله اقرب وفي طاعته ادوم
جزاك الله خيرا علي مرورك الكريم

-----------------------
توكا
بنت بلدي الاسمعلاوية
انا مش زعلان من انكتة ولا حاجة
وليكي انك تفخري بوالدك اللي شارك في حرب اكتوبر
إن شاء الله نسترد كرامتنا المفقودة بسواعد من ابناء هذه الامة

جزاكي الله خيرا علي مرورك الكريم

----------------
هنادي
كل سنة وانتي طيبة
بس خلي بالك يا هنادي
القرارات السياسية حاجة...والعسكرية حاجة تانية
الموضوع بيبقي ملعبك شوية
بس كل اللي عاوز اقوله إن احنا عندنا جيش قوي في اي وقت وفي كل مكان
جزاكي الله خيرا علي مرورك الكريم

الراقص مع الذئاب يقول...

وعليكم السلام ورحمة الله وبركاته يا سارة
كل سنة وانتي طيبة
ومعلش مش هعتذر تاني عشان بطول
بس انتي عارفة في ناس بتمل من المواضيع الطويلة
ردك جميل ورفع معنوياتي كالعادة
وإن شاء الله الموضوع الجديد جاهز وهطول فيه براحتي ..عشان ملقيش غير ردك انتي بس

دمتي في خير اختي الكريمة
---------------------
الاخت الفاضلة مؤمنة
وعليكم السلام ورحمة الله وبركاته
الامل دائما موجود
ونصر الله آت لا محال
اعزرني لأني مدخلتش موضوع ولماذا قالوا لضيق الوقت
بس الحمد لله اجازة العيد حلوة وفيها وقت اقدر استمتع بيه بكل اللمواضيع الجميلة
جزاكي الله خيرا وكل عام وانتي بخير
-------------------
باشمهندس ماعلينا
كل عام وانت بخير
جزاك الله خيرا علي كلامك الجميل
ودعائك الجميل
اللهم اجعل حياتنا كلها في سبيلك إن شاء الله

الراقص مع الذئاب يقول...

البنت الشلبية

اولا انا في الاصل مهندس يا اختي الكريمة
ثانيا خطأ كبير اوي إننا نحكم علي منظومة كاملة من خلال شخص او اتنين او حتي 100
ثالثاً الجيش بيختلف كتير عن الشرطة لأنه ملوش احتكاك كبير بالناس

والجيش بعيد عن السلبيات اللي فيه يعتبر من انجح المنظمات في البلد...من حيث الادارة والجدية
عشان كدا معظم المؤسسات الكبيرة والهيئات بيكون اللي مسكها قيادات الجيش لأكتر من سبب
ضمان الولاء
الجدية والالتزام في اغلب الاحيان
إتمام العمل في اي ظروف
اتمني من الله ان يصلح كل من هو في مثل هذه المناصب

وكل سنة وانتي طيبة وجزاكي الله خيرا علي مرورك الكريم

---------------------------------
عالمي ازرق
كل سنة وانتي طيبة
وعيد سعيد عليكي وعلي كل اسرتك وعلي الامة الاسلامية كلها
وانتظر عودتك إن شاء الله