Translate

الاثنين، 17 مارس، 2008

زي الناهرده....أول شمعة

السلام عليكم ورحمة الله وبركاته



زي الناهرده من سنة بالتمام والكمال ابو صابر قام وقعد وانتني واتفرد وفتح مدونة علي البلوج سبوت

طيب ليه الاذي دا بقي؟؟
مش عارف والله بس هي جت كدا بقي

بصراحة مكنتش عامل المدونة للتفاعل مع الناس خالص

كنت عاوزها كدا بعيد عن الدنيا والناس
هناك...خلف التلال...تحت ضوء القمر مع اصدقائي اللي نسيتهم من زمان ومعدتش بجيب سيرتهم بسببكم انتم


انتم شغلتوني عنهم

ودخلت تاني الدنيا البشرية بكل ما فيها من مشاكل وشد وجذب

اتكلمنا في حجات كتيرة اوي...

في كلام كان بيزعل الناس مننا

بس الحمد لله مكنتش لأهداف شخصية

كانت مواضيع لازم تتناقش بشدة وبحدة....وربنا اللي يعلم النية كانت ايه

ربنا يرزقنا الاخلاص في القول والعمل




طبعا كان أول تعليق في مدونتي للأستاذة نادية طه (حورية)...




بدأ معايا في نفس الفترة ناس في رحلة التدوين

في نفس الاسبوع تقريبا كان مهند وخمسة فضفضة وبعدينا بشوية كانوا

The Road To Nowhere

وبعدين رينا استقلت بمدونة لوحدها
وقبلنا بشوية كانت جهينة دوي الصمت و شيماء همسات دافئة و عالمي ازرق




وبشوية كتار بس مش اوي كانت سارة وبلاعة الحكومة




والاستاذ عصفور المدينة اللي كلنا بنعتبره الاستاذ والمعلم لينا في عالم التدوين كان صاحب بصمة في كل المدونات




وبيكون شرف لصاحب المدونة تعليقه فيها




وناس كتيرة اوي محترمة عرفتها بعدين

زي
رفقة عمر
أنور(حكاوي)
مجداوية
مني- احاسيس
مؤمنة

وطبعا رجالة اسماعيلية





يااااااااااااه ناس كتيرة اوي
انا عارف اني نسيت ناس كتيرة تانية

محدش يزعل مني بالله عليك

واللي هفتكره هضيفه عندي عشان الموضوع دا وثائقي برضو
ناس عاشت معايا مواقف كتيرة ...كأني اخوهم

غبت ورجعت وسفرت ومشيت...ولسا برضو مع بعض والسؤال دائم بلا إنقطاع

فرحوا معايا...يوم ما فرحت...وقلقوا عليا يوم ما بعدت

يااااااااااااااااا

بجد مواقف وأيام وزكريات دلوقتي جميلة

عاوز أقول للناس ديه كلها جزاكم الله خيرا

اه..قٌبل ما انسي ...بمناسبة مرور سنة علي إنشاء المدونة هضيف بعد إذنكم مدونة تانية جديدة
انا عارف إني زودتها...وهينطبق عليا المثل اللي بيقول سكتناله دخل بحماره
المدونة هتبقي عبارة عن يوميات خفيفة لأسرة مصرية
خلوا بالكم هي مش حكاوي وخلاص
دي هتبقي كدا زي أسلوب



دس السم في العسل



يعني عاوزين نقول من وراها حاجة كدا....من غير لت وعجن...تعالوا ندخل ونشوف عائلة الفسافيس ديه عاوزة ايه وهما مين اساسا



اتفضلوا اتقضلوا...دوسوا علي الصورة




-------------------------------------------------
زي ما اتعودنا في اخر كل موضوع


لالالا..المرة ديه مش دبوس


هو رجاء زطلب صغير للاخوة والاخوات المدونين

وممكن نقول عليه دبوس تدويني شوية

بقي في يا جماعة عدد كبير اوي من المدونات

ماشاء الله حاجة جميلة

بس مع عدد المدونات الكتيرة مش مش بنلحق نتابع كل المواضيع

ياريت نقلل من عدد المواضيع المضافة في الاسبوع

عاوزين نعرف نتابع....

وفي نفس الوقت انا بلاحظ ناس كتيرة بتقرأ اول سطرين وآخر سطرين من المواضيع ويكتبوا تعليقهم

بيبقي واضح اوي من تعليقه إنه مقرأش الموضوع

ياريت نعمل حساب الحجات ديه حتي لا يفقد التدوين رونقه وهدفه

وجزاكم الله خيرا

هناك 31 تعليقًا:

رينـــــــــــا يقول...

السلام عليكم
ليه الشرف انى اكوووووووون اووووووووول تعليق بلا فخر
بحجز بس

رينـــــــــــا يقول...

اولا كل سنه وانت طيب يا محمد
ومن نجاح لنجاح
ومن حسنات لحسنات ان شاء الله
نحسب كلامك كله خير ونحتسب نيتك كلها خير ان شاء الله
والف مليووووووون نبروك البلوج الجديد
شكله جامد جدا
بس والله سامحنى مقدرتش اقرا مشغوله جداااااااااا
مسافرة بعد بكرة العمرة عقبالك ودخلت اجرى بس اهنىء وابارك

والله المعرفه كانت كلها خير وليها ذكريات جميله جدا معايا
يارب تدوم فى الخير يارب ان شاء الله

الف مبروك وكل سنه وانت طيب
وعقبال مليون سنه فى التدوين
ولما ارجع بئا ان شاء الله اقولك رأى فى المدونه الجديدة

فى امان الله ومتنسانيش من دعواتك

د/اجدع بنوته يقول...

اخص عليكى ياريناااا

خدتى اول وتانى

طبعا لسه مقرتش انا

بس قولت الحق التالت

بدل مطلع م الترتيب خالص

هابى بيررررررررث داى مدونه اجمد راقص مع الذئاب

خمسة فضفضة يقول...

السلام عليكم ورحمة الله وبركاته

كل سنة وانت طيب يا ابوصابر وعقبال مليون سنة تدوين
ويارب يجعل كل اللي بتكتبه في ميزان حسناتك
والله انت من الناس اللي بعتز بصداقتهم واللي التدوين عرفني عليهم يارب يديم المعروف والصداقه بينا

الف مبروك علي البلوج الجديد هاروح هناك اهه اشوف ايه الاخبار ان شاء الله هايكون من احلي البلوجات ويارب يجعلها فاتحة خير عليك وعقبال ما نمشي في فرحك قريب باذن الله

عالمى ازرق يقول...

كل سنه وانت طيب ودايما بتدون وتدخل مدونتك فى عالم الاثريات بعد 907 سنه
ويارب دايما كده تمتعنا بمواضيعك الجميله


ملحوظه
يعنى دخلت ولا لقيت جاتوه ولا حاجه ساقعه .. اكيد فى الطريق مش كده ؟؟

الفاتح الجعفري يقول...

طيب ياسيدي
ربنا يجعل هذا العام في ميزان حسناتك ويجعل كلامك حجة لك بأذن الله,ويرضي عنك
حظي وحش متابعتكش الا في الاخر بس كنت كتير بااشوف تعليقاتك واتابعها بس ملحوقه ان شاء الله
وفعلا المفروض المدون يسيب موضوعه شويه علشان الناس تلحق تتابع,لان عدد المدونات كتير جدا
وجزاكم الله كل خير

عصفور المدينة يقول...

كل عام وأنت بخير أخي الحبيب وجزاك الله خيرا على الإطراء وأحب أن أقول أن الأخوة والأخوات يفرحون بتعليقي لسبب بسيط جدا أنهم يعرفون أنني لا أعلق إلا إذا قرأت المقال بتمعن

وأحب أن أضيف أنني أعجبت جدا بالجو الأسري الذي وجدته في بداية اندماجي مع المدونين خمسة فضفضة ومهند والراقص مع الذئاب وجهينة وصرصارة ورينا وآخرين

عاشقه الفردوس يقول...

كل عام وانت ومدونتك بخير وفي طاعه

ادام الله عليك نعمه الصحه والعقل



ادعو الله ان تكون مدونتك حجه لك وليست عليك اللهم امين


حلو اوي المدونه التانيه دي

انا كده هطلع اوت انا كنت عايزة اعمل مدونه لحاجه زي كده بس حضرتك سباق بالخير بقي
:))))


وبالنسبه للتدوينات
حضرتك عندك حق

كل واحد وواحده فينا تعملها تدوينه كل اسبوع كده علشان كلنا نقدر نتابع وانا عن نفسي بعمل كده

بس جت مني مره واحده اوت
:)))

appy يقول...

كل سنه وانت منور الشمع كله فى حياتنا ومنورها بوجودك ونشوف عيله الفسافيس دى حسه انها هتبقى زى ونيس وعيلته كده

محمد عبد الغفار يقول...

ربنا يزيدك نجاح وفلاح عام بعد عام

همسات دافئه يقول...

محمد
ذئبى الغالى:)
كل سنه وبلوجك طيب وعقبال متطفى الشمعه التانيه واحنا معاك يارب
بجد أول تعليق ليك عندى له معزه (بشد الزين)كبيره اوى انت من الناس الى شجعتنى جامد واتخانفنا واتصالحنا وغيابك أثر فيا وروجوعك أسعدنى جدا
مواضيعك كلها كانت جامده وأكيد سايبه بصمه جوه كل واحد قراها
كل سنه وانت طيب والسنه ده تبقى اقوى ان شاء الله:)
شيماء

منى يقول...

كل سنه وانت طيب

mohand يقول...

السلام عليكم

كل سنه وانت طيب يا حبيب قلبي يا ابو صابر يا غالي

انا اول معلق في عائلة الفسافس عشان بعد سنه تفتكر كده

ان شاء الله يدينا ربنا طولت العمر باذن الله

احترمت فيك صراحتك وجرائتك وعدم خوفك من الاتهامات اللي تخنق

احترمت فيك وقوفك معايا في الصح والغلط
لما بكون صح بتقف جنبي لكا بكون غلط بتواجهني بغلطي

احترمت فيك انك رغم صغرك عني الا اني بحس انك اخ كبير مش صغير

احبك في الله

تحياتي

nonoymm يقول...

اولا شرف كبير لي ان حضرتك تجيب سيرة مدونتي اكرم الله انا اصغر من كدة بكتير بارك الله فيك
وكل عام وانت بخير ومدونتك بخير ويبارك في قلمك يارب
دمت بخير وسعادة يارب

la3lahakhier يقول...

كل سنة وحضرتك بخير دمت طيبا ومدونتك
تقبل مرورى
لعلها خير

ToOoKa يقول...

السلام عليكم ورحمة الله وبركاته
مش عارفه اقولك كل سنه وانت طيب ولا مبروك ولا كل عام وانت بخير

الصراحه المناسبات الحلوه كتيييير

بس عاوزه اقولك انو عيد مدونتك هو عيد لمدونتى لانو لولا مدونتك ما كنش حيكون فى مدونتى

شكرا لانك اول من علق عندى وعرفنى على أسرتى الحلوه دى

اتمنالك كل خير وسعاده فى الدارين
أختك توكا

anwer يقول...

السلام علي من اتبع الهدي
ديما بتبدع حجات كتيير
من دبابيس لفسافيس
بس أفكار ممتازة
كل سنة وانت طيب

محض روح يقول...

كل سنه والمدونه طيبه
:)
وانته طيب بوجودك

Smartphone يقول...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Smartphone, I hope you enjoy. The address is http://smartphone-brasil.blogspot.com. A hug.

ma_3alina يقول...

ما شاء الله .. عقبال مية سنة تدوين .. وعالم التدوين يفضل منور كده بكلامك وبمدوننتينك .. اتنين مدونة يعني
:)

مجداوية يقول...

ايه ده ايه ده
انا مجتش هنا من زمان ليه ؟؟؟!!! أقدم اعتذارى اخى الكريم بجد الوقت اللى بألف فيه على المدونات الجميلة مش بيكفى لكن عندى دى وعديها المرة دى أنا قولت بس أكتب اعتذار الأول وبعدين أدخل اشوف الفسفيس بتاعتك دبابيس وفسافيس ماشى ,,اتمنى لك عمرا تدوينيا مديدا وقولا سديدا وزوارا عديدا (عشان الوزن بس)
بعد اذنك اروح ازور الفسافيس

آفاق الحرية يقول...

السلام عليكم
انا سعيد جدا ان في اول زيارة لي يوجد مناسبة جميلة زي ده
علي العموم ياعم كل سنة ومدونتك بخير ان شاء الله
وان شاء الله مش هتكون اخر زيارة
تحياتي

الراقص مع الذئاب يقول...

رينا
وعليكم السلام ورحمة الله وبركاته
كل سنة وانتي بخير وسلامة إن شاء الله
وجزاكي الله خيراً علي التهنئة وعلي المرور الجميل
وربنا يتقبل منك العمرة يارب
بس متكونيش نسيتينا من الدعاء
تروحي وترجعي بالسلامة إن شاء الله يا رينا

-----------------
دكتورة سمسمة
جزاكي الله خيرا علي مرورك الجميل
وربنا يبارك فيكي يا سمسمة

-----------------
دكتورة خمسة فضفضة
وعليكم السلام ورحمة الله وبركاته
كل سنة وانتي طيبة يا دكتورة
ربنا يتقبل منك الدعاء ويجعل كل ما نكتبه حجة لنا لا علينا إن شاء الله
وانتي كمان يا دكتورة من الناس اللي اعتز بمعرفتهم في عالم التدوين
اخت كبري والله يعلم ذلك
بس هي الدعوة اللي في الاخر ديه اجباري؟؟
عموماً شكلها قريب فعلا...دعواتك

الراقص مع الذئاب يقول...

عالمي ازرق
كل سنة وانتي بخير وصحة وسلامة
بس 907 كتير اوي يا اختي الكريمة
هبقي عجوز اوي

معلش بقي الجاتوه والحاجة الساقعة هناخرهم شوية
بس اكيد جايين إن شاء الله

---------------------------
الفاتح الجعفري
ربنا يجازيك خيرا يا اخي الكريم علي دعاءك...وربنا يتقبل منك إن شاء الله
انا ليا الشرف بتواجدك الكريم في مدونتي الصغيرة

جزانا الله وأياك خير الجزاء

--------------------------
الاستاذ الجميل والحبيب الي قلوب الجميع الاستاذ محمد الشهير بعصفور المدينة
حقك علينا استاذنا الكريم إن نعطيك حقك ...فمنزلتك عندنا كبيرة
فأنت الاستاذ المعلم لنا
جزاك الله خيرا علي تواجدك وتعليقاتك
ومن قبل علي موضوعاتك التعليمية والمتنوعة

الراقص مع الذئاب يقول...

عاشقة الفردوس
وكل عام وانتي بخير وطاعة لله عز وجل
جزاكي الله خيرا علي دعواتك الجميلة
اللهم تقبل منا ومنكي صالح الاعمال
ويارب تعجبك اكتر المدونة التانية
والرسالة اللي جواها توصل لكل الناس إن شاء الله
------------------
آبي
جزاكي الله خيرا علي مرورك الكريم يا آبي
وإن شاء الله تعجبك المدونة التانية
وتكوني ضيفة دائمة

------------------
الاستاذ محمد عبد الغفار
جزاك الله خيرا علي مرورك الجميل
وعلي دعائك الجميل

الراقص مع الذئاب يقول...

شيماء وهمساتها الدافئة
كل سنة وانتي بخير وصحة وطاعة لله عز وجل
ربنا يكرمك ويجازيكي خير
انتي كان ليكي مناقشات ومواضيع جميلة اجبرت الجميع علي إحترام مدونتك
اتمني لك التوفيق دوما يا شيماء
-------------------------
مني

كل سنة وانتي طيبة
جزاكي الله خيرا علي المرور والتهنئة

-----------------------
مهند باشا حبيب قلبي
وعليكم السلام ورحمة الله وبركاته
كل سنة وانت بخير وصحة وسلامة وطاعة لله عز وجل
ربنا يكرمك ويجازيك خير علي كلامك الجميل يا مهند
ومتنساش انننا كنا ايد واحدة مع بعض يا هنود
واتشتمنا من ناس كتير واحنا مع بعض
عشان كدا انت ليك عندي معزة خاصة
وانت عارف كدا

احبك الله الذي احببتني فيه
وجزاك الله خيرا

الراقص مع الذئاب يقول...

عاشقة النقاب
الشرف ليا انا تواجدك وردودك عندي يا اختنا الكريمة
هذا قدرك والله ...بل لا استطيع ان اوفيه
كل عام وانتي بخير وربنا يبارك فيكي
ولا تنسينا من الدعاء

---------------
لعله خير
وكل عام وانتي بخير
اسعدني جدا مرورك الجميل
واتمني تكرار الزيارة

لعلها خير

---------------
توكا
وعليكم السلام ورحمة الله وبركاته
جزاكي الله خيرا علي كلامك الجميل
وبعدين انتي مندونة كويسة اوي يا توكا ومواضيعك كلها جميلة
وانتي اللي فرضتي نفسك في مجتمع التدوين
موضيعك وقلمك بس يا توكا مش حد تاني
ربنا يجازيكي خير واتمني لكي الصحة والسلامة والحياة في طاعة الله عز وجل

الراقص مع الذئاب يقول...

انور
وعلي من اتبع الهدي السلام
ياريت تغير هذه الصيغة في السلام
فكل من عندنا مسلمون موحدون وللله الحمد ولا يلقي هذا السلام الا علي جماعة اختلط فيهم المسلم مع غيره من الذين هم علي غير الملة
جزاك الله خيرا يا انور علي كلامك الجميل
وكل سنة وانت كمان بخير وفي طاعة لله عز وجل

----------------------
محض روح
اخيييييييييرا شرفتيني يا محض
ياريت تفكي العزلة شوية عشان نعرف نرد علي مواضيعك
جزاكي الله خيرا علي مرورك الكريم

----------------------
مهندس ماعلينا
جزاك الله خيرا علي مجاملتك الرقيقة يا هندسة

وديما منورنا ومشرفنا

الراقص مع الذئاب يقول...

مجداوية
جزاكي الله خيرا علي مرورك الكريم
وانا عارف ان الوقت في المرور علي المدونات والمواضيع كبير اوي
وهي ديه السلبية اللي بدات تظهر مع كثرة المواضيع
جزاكي الله خيرا علي كلامك يا مجداوية


-------------------------------

آفاق الحرية
وعليكم السلام ورحمة الله وبركاته
انا اسعد بزيارتك الجميلة لمدونتي الصغيرة
وكل سنة وانت بخير وطاعة لله إن شاء الله

وإن شاء الله تبقي مشرفني ديما بتواجدك الجميل في مدونتي الصغيرة

جزاك الله خيرا علي المرور

Vague يقول...

انا احب اشارك بس فالبوست ده
واحب اشكرك لانك حطتني في لوحة الشرف دي

مبروك

SEMSEMA يقول...

أخى العزيز الراقص مع الذئاب

آسفة جدااا على التأخير و الف شكر على تذكرك لى و تشريفى بأنى أول من ترك بصمة بمدونتك الوليدة ..

فى الحقيقة كانت البصمة منك لى فقد تركت مدونتك بداخلى انطباع جميل ظل باقيا حتى كتبت قصة سيزر و الأمواج الغاضبة التى سترى النور مطبوعة قريبا ان شاء الله ..

و بقيت أنت أخا عزيزا نقى النفس متميز الفكر و ستبقى كذلك دائما ان شاء الله

ألف مبروك أخى العزيز ..

اقدر اشارتك الذكية لازدياد عدد المدونات الذى تسبب فى صعوبة ملاحقتنا للفكر المتميز و الاخوة الاعزاء ..

أما بالنسبة لمن يقرؤن أول و آخر سطرين .. فهذا يحدث فعلا و لكنى أفضل المرور للسلام مع الاشارة اننى سأمر مرة ثانية للقراءة المتانية لان النقد مسئولية كبيرة و ممكن كلمة فى غير محلها تسبب الاحباط للكاتب أو العكس تشجعه على فكر غير سليم ..

دمت لنا صديقنا الجميل الرابض خلف التلال مع أصدقاء لا يعرفون الكذب و لا النفاق ..

باقة ورود برية أتركهاكاشراقة الربيع على تلالكم لتزداد جمالا مع ضوء القمر المكتمل ..

تحياتى

حورية من الأسكندرية

ناديه طه