Translate

الخميس، 3 أبريل 2008

زحمة وتوهان ولخبطة

السلام عليكم

الدنيا زحمة اوي
لا...مش قصدي بالناس وبس
لا....دي زحمة بالاحداث والمشاكل والمواضيع الكتيرة اوي
ولو جينا اتكلمنا علي كل مشكلة لوحدها مش هتكفينا مدونة واحدة
بس الحمد لله ربنا رزقنا بأساليب كتير لمعالجة المشاكل ديه ومناقشتها
وتعالوا نشوف المشاكل ديه بتتناقش عندنا ازاي هناخد بعض الوسائل مش كلها...يعني مش علي سبيل الحصر
ونبدأ بحاجة جميلة اوي اسمها الصحافة
الجرايد يعني
الجرايد عندنا تنقسم الي 3 اقسام يا جماعة
جرايد حكومية (يا سيدي) ...وجرايد معارضة (يا رايق) ...وروز آل يوسف (لوحدها نوع فريد) ايوة هما دوله اقسام الصحافة في مصر
الجرايد الحكومية بتبيضلك الدنيا وتحسسك إنك اهبل وبريالة...تلاقي الدنيا فيها وردية اوي...والمشاكل كلها هتتحل او بتتحل او اتحلت خلاص
وفيها كلمات كتيرة اوي متكررة
زي كلمة إستجابة
يعني إستجابة من طلب المواطنين...او من شكوي المواطنين قام الوزير الفلاني علي الفور بدراسة الموقف و...,و.....
وزي كلمة لا مساس (عيب...مترحوش لبعيد) ...زي لا مساس بأسعار السلع الفلانية
ولا مساس بالدعم....ولا مساس بكذا وكذا وكيت وكيت
يعني تصريحات ولا اجمل ولا أروع بثقة جميلة خالص ومفيش مشاكل والبلبل غني علي ورق الفله
----------------
تيجي بقي تفتح جريدة معرضة تحس إنك عايش في سواد ملوش نهاية
وإن مصر عبارة عن معتقل نازي كبير والناس جعانة وعطشانة وعريانة
والحضري هربان ومش راجع وانسوا يا شعب انكم هتشوفوا رغيف العيش تاني
تحس انك مسروق ومنهوب ومتقطع ومُتحرش بيك (مبني للمجهول ) زلازل وبراكين وسحب سودا
وحرمية هربانة بفلوس البلد بره وحين ميسرة وهي فوضي والناس بقيت محصورة في نطاقين
نطاق الخبل الجنسي بكل انواعه المستحدثة والمألوفه....ونطاق البحث عن رغيف العيش والجوع والعطش
يا نهااااااااار
ايه دا يا جماعة.....لا مش كدا خالص
احنا في ظروف معيشة صعبة وكل حاجة...بس لسا القنبلة النووية موقعتش علي رسنا
الحياة مش بالسواد بتاع الدستور او المصري اليوم
مش لازم نقعد ننوح كدا ونديها نكد .....
--------------
نشوف بقي النوع الفريد من الصحافة والصحفيين
روز آل يوسف
شوفوا بقي انا مش هتكلم كتير بس هقول لكل صحفي فيها وكل إنسان ليه دخل في إصدار هذه المجلة أو حتي بيشتريها وبينفع القائمين عليها
هقوله انت من القوم اللي في بيت الشعر دا

قوماً إذت ضرب النعال وجوههم صرخ النعال بأي ذنب اضرب

بس كدا مش هحرق كتير
---------------
وانصحكم توفروا فلوس الجرنان وفي وقت فراغكم ابقوا حلوا سودوكو
--------------------
كدا احنا تناولنا اساليب مناقشة المصايب

نيجي بقي لبعض من اساليب حل المشاكل
ومنها اسلوب التظاهر والاعتصام...ودا اللي هيتنفذ إن شاء الله يوم الاحد اللي جاي في مصر كلها بسبب الغلاء وإرتفاع الاسعار
والله يا جماعة انا عن نفسي معرفش الكلام دا صح والا غلط
يعني مليش رأي في الموضوع دا بس اتمني ان يكون فيه فايدة من اللي هيحصل
وبدعي ربنا إن الموضوع يمشي في نطاق امني كويس وميكونش فيه اي مشاكل
لأن الامر لو كبر التحكم فيه هيبقي صعب شوية....ومش هيبقي سلمي خالص
والخوف من بعض الناس إن الحماس يخدهم ويسخنوا ويحدث مالا يحمد عقباه
وناس غلابة تتبهدل....ويبقي موت وخرب ديار زي ما بيقولوا
ربنا يسترها ويعدي الامر علي خير
------------------

وقبل ما انهي الموضوع هتكلم عن اسلوب لذيذ في حل المشاكل اللي بتوجهنا
واللي بتواجه الشباب بوجه خاص
اسلوب المفكر الاسلامي العبقري جمال البنا
ها...نكمل والا بلاش
بلاش احسن
بس عاوز اقولكم إن البانجو اللي الراجل ده بيشربه اكيد مغشوش
من متابعة الراجل دا في كلامه وحواراته لقيت في صله وثيقة اوي بينه وبين المبولة قلباً وقالباً
------------------------

حل الزحمة ديه معروف وسهل وبسيط....بس الغباء مستحكم
والجحود والعناد بقي طبع فيناخلاص...نستحمل بقي
إن الله لا يغير ما بقوم حتي يغيروا ما بأنفسهم
-------------------------------------------

الدبوس
مش اي حد يشتم في الحكومة يبقي بطل قومي ومناضل وشهيد
ومش اي حد ساكت ومش بيشترك في الصياح والهتاف يبقي خاين وعميل وتبع الحكومة او جبان وخايف
السياسة لعبة قذرة....في ناس كتير مش بتحب تلعبها او توسخ لسانها بالكلام فيها
ماشي...الحكومة وحشة وكل حاجة
بس مش هواجه دا بالاسلوب بتاعك
عشان مفيش حاجة اسمها الغاية تبرر الوسيلة
احنا بيحكمنا دين غير قابل للتجزئه....والدين مش حتة قماشة نغير فيها ...مرة نخففها ومرة نتقلها حسب الجو
عشان احط ايدي في ايد مش عارف مين ونطلع ننهتف مع بعض عشان احنا ابناء وطن واحد...لا....دا كلام مش سليم
مش بينفعوا حد والله....وأول ما هيعضوا هيعضوا فيك
وارقام الموبيلات اللي اتغيرت وبقت 011 و010 تشهد باللي انا بقوله

الدبوس علي المتغطي يا جماعة
ويتفهم بقي زي ما يتفهم
وربنا يهدي

هناك 33 تعليقًا:

آفاق الحرية يقول...

السياسة فغلا لعبة قذرة
كلها مصالح ومساومات
ربنا يسترها معانا من السياسة ده
ههههههههه

عاشقه الفردوس يقول...

طيب اقول ايه

تدوينه روعه

انا كمان بقول كده
جرانين سودا ومنيله بنيله
جرانين تخليلك الدنيا وردي

وجرايد عايزة الحرق

ربنا يرحمنا برحمته

دبوسك يوجع اوي

ربنا يرحمنا برحمته

عصفور المدينة يقول...

معاك يا فندم والله في كل اللي قلته

أنا بطل قومي

مجداوية يقول...

انت فاكرنا هنود ولا ايه هههههه طبعا الدبوس مفهوم مش قصدك انك عندك خطين عاملين وحدة خطية واحد بتاع جارك مينا والتانى بتاعك يا محمد صح ؟؟؟,,
بالنسبة لجرايد البلد كل نوع له زباينه وفيه ناس بتقراهم التلاتة يعنى على كل لون يا باتسته وفيه ناس مش بتقرا جرايد خالص ده يدل على ان الناس نفسها متقسمة زى جرايد البلد مش برضووووو

عالمى ازرق يقول...

اكتشفت ان النهارده انك متفائل قوى وانت بتقول ان عندنا صحافه

ربما فى سب الحكومه بالذات بقينا نتعامل بمبدأ ياتبقي معانا يامع الناس التانين

عجبنى الدبوس .. جايز لانه المره دى بيشك

mohand يقول...

عندك حق في اللي قولته


علي فكره الاضراب يوم الاحد مش السبت


وانا زي الاستاذ عصفور بطل قومي

خمسة فضفضة يقول...

السلام عليكم ورحمة الله وبركاته

بص يا محمد انا قريت كل حاجه ومستمخيه اوي من الكلام
بس والله مش شايفه قدامي فاهقوم انام ساعتين قبل ما انزل وبعدين ابقي اعلق علي رواقه

سلام بقي

noureleslam يقول...

هو البوست حلو اوى

بس هيا فين الصحافه اللى فى مصر

كلها صحف صفراء سواء حكومى او معارضه

كل يوم بنجيب الأهرام بقعد أفر فيه

شمال ويمين عشان الاقى حاجه مفيده

تبرد نارى مفيش كله اعلانات وضحك على الدقون .... ولا جديد

واحسن حاجه انى احل السودوكو فعلا

WhatEver?!!! يقول...

صحافة......جرايد؟؟؟؟
هو الكلام دة لسه مش اتلغى

اعتقد الصحافة دلوقتى يعنى مدونات

تعبير عن الراى بصراحة
وبرضو بنتابع الاحداث وبنقول رائينا فيها
والله يلغوا الجرايد ارحم

وعندك حق والله السياية لعبة قذرة
المفرض بعد كدة ندعى ربنا "اللهم اكفنا شر السياسة والسياسيين"

مدونة رائعة

تحياتى

WhatEver?!!! يقول...

كانت اختى مرة بتحكى عن موقف حصل فى الكلية

الدكتور مرة بيال طالبه وبيقولها
انتوا بتجيبوا الجرايد ليه؟

كان ردها تلقائى جدا:علشان ناكل عليه سمك!!!!!!!!

ده اخر عهدى بالجرايد

مهندس مصري يقول...

ياه
دا انت كل الكلام اللي ما كنتش لاقيه لقيته و لقيت عيلته كلها
:) ههههههههه
معلش أصل جاي هنا من تعليقك عند دكتورة خمسة فضفضة
مش عارف اعلق على ايه و لا ايه في كلامك يا هندسة

love يقول...

بجد ياأفندم أنت رجل والرجال قليلون؟؟؟
إيه الفصاحة دى..
أكثر الله من أمثالكم

خمسة فضفضة يقول...

السلام عليكم ورحمة الله وبركاته

جتلك تاني اهه زي ما وعدت
شوف يا سيدي بالنسبه للصحافه الحكوميه فادي ايدك منهاوالقبر مش بقرأ فيها الا العناوين وصفحة الوفياة بتاع الاهرام واحل الكلمات المتقاطعه ودمتم

روزاليوسف بقي مابشتريهاش من اصله عشان انا ماعنديش الا مراره واحده بس

اما الاسبوع والدستور وصوت الامه والحاجات دي فالما بقراها باحس ان القايمه هاتقوم بكره الصبح وباكتئب وارمي الجرنال
وفي الآخر قررت ان اقاطع كل الجرايد حفاظا علي الصحه العامه ونظافة البيئه

الاضراب اعتقد انه مش هاينجح ولا حتي 1في الميه ، تخيل راكبه توكتك انهارده الراجل بيقولي هو يوم الاحد خلاص بقي اجازه رسمي ، يعني اصلا الناس مش عارفه انه اضراب ولا حاجه فاكرينه يوم عطله وخلاص
وحتي اللي عارفين مش هايقدروا يعملوا حاجه ، في تدوينه عند استاذ احمد شوقير بتعبر عن وجهة نظري جدا ياريت تقراها

الدبوس :
انا يا عم غيرت من 012 ل 011 ، يبقي مش انا الحمد لله
:-)


سلام بقي وكفاية رغي كده

monaliza يقول...

عجبنى اوى رايك فى روزاليوسف وفى جمال البنا
ورأيى الشخصى في الصحافة انها كاذبة ونادرا ماتصدق
بالتوفيق دائما

t3ban يقول...

كلا يغني علي هواه
طب انت عرضت انواع الجرايد
و أساليبها
بس فين حل المشكلة
انا اسدق ايه
كان زمان الي يجي في التلفزيون
ولا يطلع في الجرنان
خلاص حقيقة حقيقة
يعني لو طلع منتت اني مت
بابا حياخد فيا العذاء
مش حيستني
ولا حيسدقني
ودلوقتي العكس تمام
رأيك المفروض ناخد الخبر منينّ!

appy يقول...

طيب اعلق من فين واروح فين
طيب جرايد مش بحبها خالص ومليش طوله بال ليها غير مقتطفات وفى النهايه بقارن الواقع بالكلام وعقل بيحكم

اممممم السوياسه معرفش كل واحد له منظور خاص بيه فيها انما مش بالشتيمه والحركات
جمال البنا مليش فيه هههههههههه
ازمه المواصلات دى السواقه فن وذوق واخلاق ومش عارفه ايه

الدبوس اعدم اسرائيل اذا كنت فهمته هههههههههههههههههه والحدق يفهم

محمد عبد الغفار يقول...

الغرض مرض

nonoymm يقول...

جرايد؟؟!!!
ما بحبش اجيب في سيرة حد مش موجود
بتاع زيرو عشرة و11 بقى هما اللي استفادوا
اهو احسن من اللي بياخد فلوسنا ويحاربنا بيها بس مؤثرة فيه
اما عن الدبوس فساكتفي ب عااااااا عا
اصله شكني اوي
تحياتي لحضرتك

المستنصر بالله يقول...

انا مقاطع الجرايد ولا معارضه ولا حكوميه
دول بيشتغلونا
وبيتعاملونا معانا على اساس اننا متخلفين
وبيحطولنا السم فى العسل

Ma 3lina يقول...

عجبنى اوى تعليقك على روزاليوسف بجد المجلة دى متفرده ههههههههه

بتلاقى فيها موضوعات متلقيهاش فى اى حتى تانية متميزين اوى اوى يعنى

تدوينة جامدة :))

Doba يقول...

انا حاسة انى راكبة مرجيحة
حبة تيجى يمين وحبة تيجى شمال

بس سيبك انت
انا عاملة دماغ وانا بتمرجح
واهو هما اللى بيزقو وبراحتهم لغاية منفسهم يتقطع

والحدق يفهم
وربك يمهل ولا يهمل

سلام يا صديقى
يا ابو الفسافس يا غالى

هبة

Salwa يقول...

معاك حق والله في كل اللي قلته

تدوينه جميله بجد

دمت بكل خير

حنان شلبي يقول...

مرحبا مو عارفة شو اقلك بس بصراحة انا وحدة ما بتحمل النكد الي بيسير وبصراحة اكبر اخبار بطلت اسمع علشان الضغط , انت عارف.....

وبالتالي الجرايد اكيد حتكون انيل عنا وعندك يا مدح بالحكومة والقيادة وجناب القائد ورعاياه يا اخبار نكد وهم ميتلم
فاخدتها من قصيرها وبطلت الجرايد وحبقى انسان جديد وهيييييييييييييييييييييييييه


هههههه وتحياتي الك
وبلاش كلام في السياسة اصلو بيجيب برررررد

رفقة عمر يقول...

انا من يوم بابا ما توفى رحمه الله عليه كان هو اللى بيجيب لينا الجرايد
دلوقتى باتعرف على الاخبار من القاهره اليوم
او من المدونات

الفاتح الجعفري يقول...

اخي الحبيب
ربنا يحفظك
بص انا هقولك حاجه عن الصحافه
الصحف القوميه وظيفتها انها مع الحكومه وبتدافع عنها وده سبب وجودها
والصحف المعارضه كذلك سبب وجودها انها تعارض وعلشان كده هي موجوده وده كله اختلاف للرؤي
وروزاليوسف زي ماانت قولت كوم زباله لوحده
المهم ان انا احاسب الصحف علي مصداقيتها وكفائتها المهنية وده برده للعلم مش موجود في الاتنين
--------
نيجي بقي للاضراب انا معاك وادينا شوفنا اللي حصل ,هو للاسف من الاول كان يبدوا انه عمل حماسي ومش منظم ,كان ممكن يتعمل بطريقه احسن بكتير بس كالعاده اجدنا الصراخ فقط ولكنه في حد ذاته بدايه رائعه ان الناس بدات تعترض وتحاول تغير من اوضاعها وعسي الله ان يفرج عنا
-------
اما الدبوس فكالعادة رائع
نفعك الله ونفع بك
جزاكم الله خير

الراقص مع الذئاب يقول...

السلام عليكم

آفاق الحرية
ربنا يسترها علينا من اللي متتسماش
جزاك الله خيراً علي مرورك الكريم

--------------
عاشقة الفردوس

جزاك الله خيرا علي إطرءك يا عاشقة الفردوس
هو فعلا كل الجرايد عاوزة الحرق
ربنا يرحمنا برحمته

دمتي في خير
--------------

استاذي عصفور المدينة

وانا كمان بطل قومي

الراقص مع الذئاب يقول...

مجداوية
لا احنا مش هنود ولا حاجة
يا رتنا هنود
صح يا مجدوية...انا قصدي قريب من كدا

جزاك الله خيرا علي مرورك الكريم

------------
عالمي ازرق

هو انا متفائل؟؟؟
وانا بقي مش معاهم ولا مع الناس التنيين

جزاك الله خيرا علي مرورك يا اختي الكريمة

-------------
مهند باشا

مشكور علي التصحيح يا هنود

وانا كمان معاكم بطل قومي

والا انت ايه رأيك؟؟

الراقص مع الذئاب يقول...

دكتورة خمسة فضفضة
وعليكم السلام ورحمة الله وبركاته

زي ما قلتي
كلمات متقاطعة ووفيات
وسعات كمان الوفيات بتكون اونطة

بس الجرايد ليها لزمة برضو في موضوع السفرة

جزاك الله خيرا علي المرور يا دكترة

----------------------
نور الاسلام
تعبير جميل
كلها صحف صفراء فعلا
ومفيش فايدة غير في السودوكو

جزاك الله خيرا علي المرور
واسعدتني زيارتك الجميلة

-----------------------
WhatEver?!!!

لسا متلغاش علي فكرة
لسا فيه بواقي منه للأسف
لما بخصوص المدونات فطلعت للأسف اسوء من الصحافة يا اختي الكريمة
يمكن الجرايد بناكل عليها سمك فعلا
اما المدونات فمينفعش ناكل عليها سمك
ربنا يهدي
اسعدني جدا مرورك لأول مرة واتمني تكرار الزيارة

الراقص مع الذئاب يقول...

مهندس مصري

الكلام بقي كتير اوي يا باشمهندس
ولو الواحد قعد عشان يكتب اللي جواه مش هتكفيه مدونة واحدة
ربنا ينجينا

جزاك الله خيرا علي المرور الجميل

-------------
love

الرجال كثيرون والحمد لله
وإن شاء الله ربنا يكتر من الرجال
الرجال اللي علي حق...وخدلي بالك

اتعستني زيارتك البغيضة

-------------
monaliza

روز ال يوسف لا يختلف عليها اثنان يا اختي الكريمة
وبرضو جمال البنا

جزاك الله خيرا علي مرورك الكريم

الراقص مع الذئاب يقول...

انور او...تعبان

اما حل المشكلة فهو اللي احنا بندور عليه يا عم انور يا تعبان
احنا بندور علي الحقيقة فين
من غير رتوش ومن غير سواد

انا بناقش علي فكرة الموضوع...يعني مش بدور علي المصداقية
عشان مش هللاقيها

لو لقيتها ابقي قولي يا عم انور
سلام

------------
آبي

السوياسة مين؟؟
انتي خلتيني ارجع اقرأ البوست تاني
آآآآآه...قصدك بتوع روز آل يوسف
دوله قوم سوء فعلا
مفيش حاجة اسمها منظور خاص في الدين يا آبي
دا دين....مش تين

اما بالنسبة للدبوس فكويس انك معرفتيش انا اقصد ايه
وسيبك انتي

اسعدني مرورك الكريم

--------------
محمد عبد الغفار

يعني ايه؟؟؟

الراقص مع الذئاب يقول...

عاشقة النقاب
هي فعلا مش موجودة خالص عشان نجيب سيرتها
طبعاً احسن بكتير من الخنزير اللي اسمه سويرس
بس انا قصدي حاجة تانية خالص

وتحياتي لكي يا اختي الكريمة
جزاك الله خيرا علي المرور

------------
المستنصر بالله
فعلا هما بيشتغلونا
وبيحطوا لينا السم...في السم

جزاك الله خيرا علي مرورك الجميل
واسعدني تواجدك لأول مرة في مدونتي الصغيرة

-----------
دكتورة ماعلينا
ايه الغيبة الطويلة ديه يا دكتورة

هي فعلا مجلة روز آل يوسف حاجة خاصة كدا لوحدها
ربنا يهديهم بقي...أو يخدهم

جزاك الله خيرا علي مرورك الكريم

nonoymm يقول...

طب قصدك ايه بقى قول والله لانت قايل هستنى تقول

واحد وبيتكلم يقول...

شاركني الصراخ http://kalamser.blogspot.com