زحمة وتوهان ولخبطة

السلام عليكم

الدنيا زحمة اوي

لا...مش قصدي بالناس وبس

لا....دي زحمة بالاحداث والمشاكل والمواضيع الكتيرة اوي

ولو جينا اتكلمنا علي كل مشكلة لوحدها مش هتكفينا مدونة واحدة

بس الحمد لله ربنا رزقنا بأساليب كتير لمعالجة المشاكل ديه ومناقشتها

وتعالوا نشوف المشاكل ديه بتتناقش عندنا ازاي هناخد بعض الوسائل مش كلها...يعني مش علي سبيل الحصر

ونبدأ بحاجة جميلة اوي اسمها الصحافة

الجرايد يعني

الجرايد عندنا تنقسم الي 3 اقسام يا جماعة

جرايد حكومية (يا سيدي) ...وجرايد معارضة (يا رايق) ...وروز آل يوسف (لوحدها نوع فريد) ايوة هما دوله اقسام الصحافة في مصر

الجرايد الحكومية بتبيضلك الدنيا وتحسسك إنك اهبل وبريالة...تلاقي الدنيا فيها وردية اوي...والمشاكل كلها هتتحل او بتتحل او اتحلت خلاص

وفيها كلمات كتيرة اوي متكررة

زي كلمة إستجابة

يعني إستجابة من طلب المواطنين...او من شكوي المواطنين قام الوزير الفلاني علي الفور بدراسة الموقف و...,و.....

وزي كلمة لا مساس (عيب...مترحوش لبعيد) ...زي لا مساس بأسعار السلع الفلانية

ولا مساس بالدعم....ولا مساس بكذا وكذا وكيت وكيت

يعني تصريحات ولا اجمل ولا أروع بثقة جميلة خالص ومفيش مشاكل والبلبل غني علي ورق الفله

----------------

تيجي بقي تفتح جريدة معرضة تحس إنك عايش في سواد ملوش نهاية

وإن مصر عبارة عن معتقل نازي كبير والناس جعانة وعطشانة وعريانة

والحضري هربان ومش راجع وانسوا يا شعب انكم هتشوفوا رغيف العيش تاني

تحس انك مسروق ومنهوب ومتقطع ومُتحرش بيك (مبني للمجهول ) زلازل وبراكين وسحب سودا

وحرمية هربانة بفلوس البلد بره وحين ميسرة وهي فوضي والناس بقيت محصورة في نطاقين

نطاق الخبل الجنسي بكل انواعه المستحدثة والمألوفه....ونطاق البحث عن رغيف العيش والجوع والعطش

يا نهااااااااار

ايه دا يا جماعة.....لا مش كدا خالص

احنا في ظروف معيشة صعبة وكل حاجة...بس لسا القنبلة النووية موقعتش علي رسنا

الحياة مش بالسواد بتاع الدستور او المصري اليوم

مش لازم نقعد ننوح كدا ونديها نكد .....

--------------

نشوف بقي النوع الفريد من الصحافة والصحفيين

روز آل يوسف
شوفوا بقي انا مش هتكلم كتير بس هقول لكل صحفي فيها وكل إنسان ليه دخل في إصدار هذه المجلة أو حتي بيشتريها وبينفع القائمين عليها

هقوله انت من القوم اللي في بيت الشعر دا

قوماً إذت ضرب النعال وجوههم صرخ النعال بأي ذنب اضرب

بس كدا مش هحرق كتير

---------------

وانصحكم توفروا فلوس الجرنان وفي وقت فراغكم ابقوا حلوا سودوكو

--------------------

كدا احنا تناولنا اساليب مناقشة المصايب

نيجي بقي لبعض من اساليب حل المشاكل
ومنها اسلوب التظاهر والاعتصام...ودا اللي هيتنفذ إن شاء الله يوم الاحد اللي جاي في مصر كلها بسبب الغلاء وإرتفاع الاسعار

والله يا جماعة انا عن نفسي معرفش الكلام دا صح والا غلط

يعني مليش رأي في الموضوع دا بس اتمني ان يكون فيه فايدة من اللي هيحصل

وبدعي ربنا إن الموضوع يمشي في نطاق امني كويس وميكونش فيه اي مشاكل

لأن الامر لو كبر التحكم فيه هيبقي صعب شوية....ومش هيبقي سلمي خالص

والخوف من بعض الناس إن الحماس يخدهم ويسخنوا ويحدث مالا يحمد عقباه

وناس غلابة تتبهدل....ويبقي موت وخرب ديار زي ما بيقولوا

ربنا يسترها ويعدي الامر علي خير

------------------

وقبل ما انهي الموضوع هتكلم عن اسلوب لذيذ في حل المشاكل اللي بتوجهنا

واللي بتواجه الشباب بوجه خاص

اسلوب المفكر الاسلامي العبقري جمال البنا

ها...نكمل والا بلاش

بلاش احسن

بس عاوز اقولكم إن البانجو اللي الراجل ده بيشربه اكيد مغشوش

من متابعة الراجل دا في كلامه وحواراته لقيت في صله وثيقة اوي بينه وبين المبولة قلباً وقالباً

------------------------

حل الزحمة ديه معروف وسهل وبسيط....بس الغباء مستحكم

والجحود والعناد بقي طبع فيناخلاص...نستحمل بقي

إن الله لا يغير ما بقوم حتي يغيروا ما بأنفسهم

-------------------------------------------

الدبوس

مش اي حد يشتم في الحكومة يبقي بطل قومي ومناضل وشهيد

ومش اي حد ساكت ومش بيشترك في الصياح والهتاف يبقي خاين وعميل وتبع الحكومة او جبان وخايف

السياسة لعبة قذرة....في ناس كتير مش بتحب تلعبها او توسخ لسانها بالكلام فيها

ماشي...الحكومة وحشة وكل حاجة

بس مش هواجه دا بالاسلوب بتاعك

عشان مفيش حاجة اسمها الغاية تبرر الوسيلة

احنا بيحكمنا دين غير قابل للتجزئه....والدين مش حتة قماشة نغير فيها ...مرة نخففها ومرة نتقلها حسب الجو

عشان احط ايدي في ايد مش عارف مين ونطلع ننهتف مع بعض عشان احنا ابناء وطن واحد...لا....دا كلام مش سليم

مش بينفعوا حد والله....وأول ما هيعضوا هيعضوا فيك

وارقام الموبيلات اللي اتغيرت وبقت 011 و010 تشهد باللي انا بقوله

الدبوس علي المتغطي يا جماعة

ويتفهم بقي زي ما يتفهم

وربنا يهدي