Translate

الخميس، 10 أبريل 2008

مش كدا والا ايه؟؟

السلام عليكم
معلش انا سخن ومن غير سلامات وتحيات هدخل في الموضوع علي طول
قرات خبر من حوالي يومين (تااااني جرايد) استنوا بس عليا...الخبر بيقول في ما معناه إن الحكومة المصرية تبعث رسالة الي الحكومة الانجليزية تستفسر فيها عن ما حدث لشنودة في زيارته الاخيرة لأنجلترا لإفتتاح كنيسة مش عارف فين
طيب هو ايه بقي اللي حصل وتفاصيل الخبر؟
اللي حصل إن أمن المطار أصر علي تفتيش شنودة شخصيا وعبوره من البوابة الالكترونية ودا الأمر اللي عمل مشاكل وسبب إحراج ليهم هناك
وطبعاً السلطات المصرية أخدت موقف سريع واتحركت حفاظاً علي كرامة رجل الدين المسيحي
ماشي...دا موضوع في حد ذاته مسببلناش مشاكل
يعني ميلفتش النظر وميهمناش
انا مش بعترض علي اللي حصل....لا يا جماعة...أحنا كمسلمين مأمورين بحسن المعاملة والأخلاق الحميدة مدام في نطاق الشرع
والأولي رجال الدين
يعني لا يصح أبداً إني أروح أشتم قسيس أو شماسة في الشارع
دا ضد تعاليم ديننا
الناس ديه ليها علينا حق الذمة .....
والمعالمة الحسنة والاخلاق الحميدة مع كل الناس عموماً
يقول الرسول صلي الله عليه وسلم
إنما بعثت لأتمم مكارم الاخلاق
ويمكن رسالة السيد المسيح عيسي عليه السلام كانت بتركز علي المعاملات والاخلاق...
ولأن ديننا الكريم الكامل أتي بصلاح كل جوانب الحياة من الاخلاق والمعاملات والاحكام والحدود والتشريعات
فلله الحمد رب السموات والارض علي نعمة الاسلام وكفي بها نعمة
طيب ايه بقي المقصد من وراء الرغي اللي فات دا
المقصد بقي اننا عاوزين نعمل مقارنة ما بين معاملة رجال الدين المسلمين وغيرهم عندنا في مصر
وهل لو احد المشايخ تعرض لأي اذي في خارج مصر او حتي داخل مصر رد الفعل بيكون ازاي
طبعا يولع بجاز
دا ارهابي
يتسجن...ويعتقلوه
مثلا لو رجل دين مسيحي هيعمل لقاء في التلفزيون (زي البيت بيتك) تلاقي اعلانات قبله بأسبوع
واهتمام اعلامي واجتماعي مباااااااااااالغ فيه
طيب هو انتوا بتعملوا كدا ليه؟؟
ماشيخنا تولعوا فيهم وقساوسهم تقدسوهم
يبقوا انتوا علي اي ملة بقي؟؟
الاسبوع اللي فات فتحت مدونة للأسف كنت متابع ليها من فترة
كنت هكتب اسم المدونة بس مسحته عشان ميبقاش الامر شخصي
وعشان مبقاش بهاجم مدونة بعينها...
بس ولله الحمد مبعرفش اسكت عن حاجة مش عجباني
قرات موضوع في المدونة ديه بيهاجم المنتقبات والملتحيين
علي زعم من صاحبة المدونة إن واحدة منتقبة قعدت جنبها وقعدت تنتقد تصرافاتها بطريقة منفرة
خلينا نقول ان المنتقبة ديه تصرفت غلط
معني كدا بقي إن كل المنتقبات وحشين ويتفتح بوست مخصوص للنهش في لحمهم
وطبعاً لازم احود علي الملتحيين معايا بالمرة....
الملتحيين دوله اللي لحيتهم طويلة ومنعكشة وعنيهم حمرا وبيزعقوا علي طول وبيقولوا للناس يا كفرة
ايوة...اللي بيجوا في افلام عادل أمام كدا بالضبط
برضو للمرة التانية انا مش بهاجم حد معين...لا دا موضوع علي سبيل المثال وقع تحت ايدي
يعني في مصايب سودا في مدونات تانية كتيرة
ومدام التدوين حرية...فمن حقهم التعبير ومن حقنا الدفاع
والسؤال دلوقتي
هو الراجل اللي رسم الرسومات المسيئة ديه مش زي زيهم كدا؟؟
هو بيستهزء وهو مش عارف واحنا بنستهزء واحنا عارفين
يبقي هو معذور بقي يا جماعة....والا انتوا ايه رأيكم؟؟
سؤال تاني
هل يجروء (القذر) عادل أمام انه يستهزء بقسيس ويطلع نصاب وحرامي او ارهابي
ها...يعملها؟؟
والا القساوسة ليهم قداستهم والمشايخ ديه ناس افاقة فيها العبر اللي في الدنيا كلها
وانتي يا صاحبة المدونة عندك الجرائة لحاجة زي كدا
طبعا انا واثق انك متقدريش غير انك تشتمي في الهدي النبوي بس
ولو تقدري علي المواجهة افتحي التعليقات عشان كل واحد يقول رأيه بصراحة
بدل ما تفلتريها وتتخدي اللي علي هواكي
يبقي نيجي نعيط ونقول (الا رسول الله) ونحط شعارات المقاطعة دي اللي عاوزه واقفه
واللي بيعمل كدا كذاب وممثل كبير
ازاي بتحبه وبتتريق علي لحيته
إزاي بتحبه وبتتريق علي كلامه
ازاي بتحبه وبتتريق علي أوامره ونواهييه
يبقي لما كلب يستهزء بشعائر الدين عندنا منزعلش
هو كلب رومي
اما الكلاب البلدي اللي مليا الشوارع عندنا شغالة ليل ونهار بكاااااامل طاقتها
الموضوع دا مفهوش دبوس...عشان هو في الاساس دبوس
بس ياريت يشك بقي الناس عديمة الاحساس
قبل ما انسي
عاوز اختم الموضوع بقول الله عز وجل
وَلَن تَرْضَى عَنكَ الْيَهُودُ وَلاَ النَّصَارَى حَتَّى تَتَّبِعَ مِلَّتَهُمْ قُلْ إِنَّ هُدَى اللّهِ هُوَ الْهُدَى وَلَئِنِ اتَّبَعْتَ أَهْوَاءهُم بَعْدَ الَّذِي جَاءكَ مِنَ الْعِلْمِ مَا لَكَ مِنَ اللّهِ مِن وَلِيٍّ وَلاَ نَصِيرٍ
وربنا يهدي

هناك 36 تعليقًا:

مهندس مصري بيحب مصر يقول...

يا سيدي ما هي بتتخانق مع كل اللي ما يتفقش معاها في رأيها و إتخانقت معايا و مع غيري قبل كده
هو يا تقول آميين وراها يا تبقى من الناس التانيين اللي هما الناس الوحشين
و بعد كده تزعم الدفاع عن الإسلام
و هو في رأيها الإسلام المعتدل المهذب غير السياسي و لا المظهري
ربنا يهديها هي و كل من على شاكلتها

رفقة عمر يقول...

عارف انت قدرت توصلنى لنفس درجه الغضب اللى انت فيها
انت كاتب الموضوع باخلاص قوى ومن القلب قوى
عارف دايما الانسان البعيد عن ربنا بيحب يشوف كل مساوئ الملتزمين ومش عارفين انهم بشر ممكن يغلط
كل دة علشان يثبت انه هو صح ومش مهم المظهر المهم الجوهر
وللاسف لو صلح الجوهر لصلح المظهر
هاقولك كلمه واحده واعرض عن الجاهلين
كويس انى مش عارفه انت تقصد مين بكلامك

آفاق الحرية يقول...

السلام عليكم
والله انا متفق مع حضرتك جدا
ويمكن كنت نشرت برده نفس الموضوع قبل ذلك وهذا هو الرابط
http://afaqalhoria.blogspot.com/
تحياتي

mohand يقول...

ممكن اعرف هي مين يا صاحبي


بعد اذنك يعني

la3lahakhier يقول...

دين ايه ؟
ايه دخل الحكومة المصرية فى الدين ؟
وانت تفتكر انه لو ماكنتش عاملة الف حساب لرضا امريكا عليها كانت اهتمت بيهم هما كمان؟
لا طبعا

منى يقول...

على فكره انا معتقدش ان الحكومه بتهتم بيهم عشان الدين
لاء
اكيد لاسباب سياسيه
يعنى مثلا عشان تاكد للامريكان والغرب عموما ان مفيش اضطهاد للاقليات
وانهم اهم حتى من الاغلبيه
ده بالنسبه للحكومه واحنا رمينا طوبتها من زمان
اما اللى يزعل صحيح
موضوع الاخت دى
من غير ما تقول اسمها عرفتها
حتى ماحاولتش اروح مدونتها اتاكد لانى حذفتها من عندى من زمان
كنت الاول بزعل منها دلوقتى بتصعب عليه والله
ربنا يهديها ويهدينا

تحياتى

Unknown يقول...

أنا معاك طبعا في كل اللي قولته ان التعميم ده هو مشكلة مجتمعنا

بس بلاش نشتم الناس دي نقول ربنا يهديه أحسن مش كدة ولا ايه؟

خمسة فضفضة يقول...

السلام عليكم ورحمة الله وبركاته

شوف يا محمد يا ابني انا قلتها من زمان وانا باجاوب علي تاج الصباغ
المسيحيين لما بيحصلهم حاجه بيلاقوا اللي يقف لهم اما المسلمين يا ابني يا ضنايا مالهمش ديه

حسبنا الله ونعم الوكيل

اما اختنا المدونه اللي بتتكلم عليها دي فامش عارفه اقول ايه بصراحه هي خبتط اوي في المنتقبات والملتحين والمشكله انها بتعمم الكلام ، اي واحد عارف كويس اوي ان كل فئه فيها الكويس والوحش الصالح والطالح ومش معني ان واحد مش كويس من وجهة نظرك يبقي الكل كده

بصراحه مش بحب ادخل مع حد في مناقشات عارفه ان اخرتها مافيش اي فايده فابتبع مبدأ السكوت من دهب

سلام

مجداوية يقول...

أخى الكريم
الجكومة تهادن المسيحيين وتريد أن تثبت لهم وتثبت لأمريكا أنها دولة متحضرة ولا تفرق بين المسلم والمسيحى ولهذا اهتمت ولكنها تفرق بين المسلم والمسلم وهنا العجب ,,لكن هل كل شىء معدول عشان نقول ده مايل ليه !!! كل أمورنا مايلة أخى الكريم وقبلنا الدنية فى ديننا وأصبحنا ننفى عننا تهمة الاسلام وكانه تهمة وحاشا أن يكون تهمة فهو نعمة وكفى بها نعمة ,والصالح والطالح بين المنقبات وغير المنقبات ولكن للآسف هناك من يتستر تحت النقاب ووراء اللحية ولكن هل هذا يجعلنا نعمم بالطبع لأ فأنا لى صديقة من أحسن الناس انتقبت زهدا فى الدنيا وتقربا وطاعة فهل هذه تتساوى بمن تغش وهى منتقبة مثلا ؟؟ الجواب بديهى وهناك أيضا من غير المحجبات وأخلاقهن لا غبار عليها لكن ينقصها فقط الحجاب فهل نتهمها بسوء الأخلاق ؟بالطبع لأ هذه المعايير تحتاج الى عقلية ناضجة ومتفتحة ولديها بصيرة لكى تدرك ولا تعمم فلا تحسب أن كل من يدون هنا يملكها فهناك من ملاحظاتى لبعض المدونات
من يتخذها وسيلة للزواج أو للسخرية أو للسب أو حتى مدفوعون لغرض سياسى او دينى وفيهم نابشى المدونات الذين يطوفون على المدونات ولا يعلقون أو تعلقن لكى يستقوا الأفكار والعبارات ليكتبوا بها ومستواهم الفكرى لا يتعدى حامل الشهادة الابتدائية فلا تلقى بالا لمن لا يفهم , دنيا المدونات نموذج مصغر أيضا للدنيا الكبيرة تجد فيها من كل لون ونوع وتجد فيها صاحب الفكر والجاهل فقل للجاهلون سلاما قال تعالى : واذا خاطبهم الجاهلون قالوا سلاما,صدق الله العظيم

تحياتى وتقديرى أخى الكريم ودبوسك هذه المرة بالفعل فى الموضوع نفسه بارك الله يد وتسلم ايدك التقيلة دى لأن موضوعك مش زى شكة الدبوس فى بساطتها دى شكه بتعلم

عاشــــــ النقاب ـقــــة"نونو" يقول...

السلام عليكم اخي محمد
بص للاسف الشديد انا سمعت ان فيه بعثات من الازهر اتمنعت لسبب زي دة وكانوا بيقولوا انهم كانوا بيفتشوا حتى العمة تتفك ويتم تفتيشه بطريقة مهينة لكن انا سمعت دة امتى بقى سمعته مع موضوع شنودةواللي برضه مرفوض لانه برضه مصري وعلم من اعلام مصر
طيب موضوع المشايخ دة يعني افتكرتوه لما البابا اتعمل فيه كدة دة اسمه كلام
للاسف بعد اللي الواحد شافه على المدونات والاحقاد اللي مليانة بيها القلوب دي الواحد مش قادر يعيب على اللي اسائوا ومنهم الدانماركي زي حضرتك ما قلت
المدونة اللي حضرتك ااشارت اليها دي
دي ما اعرفش الظاهر مريضة نفسية او عندها عقدة معينة في حياتها من المنتقبين او الملتحين واعتقد بنسبة كبيرة جدا ان الموقف اللي حكته من المنتقبة دة مش حقيقي والله اعلم لاكتر من سبب اولهم ان المنتقبات دلوقتي اصلا بتخاف حتى توجه اي كلمةلابنها في الشارع وانا منهم لان بتلاقي هوب اتحطت تحت الميكرسكوب والكل ساب اللي في ايده وبص يشوف الارهابية دي بتقول ايه
لحسن تكون هتفجر ابنها ولا حاجة يلحقوه
المشكلة ان المنتقبين والملتحين فئة زي اي فئة فيها الكويس والوحش
هي بقى عممت واخدت العاطل في الباطل
لأ وايه ودخلت نفسها في حيطة كمان
بتنادي ان اللي ما تلتزمش تسيبه دة بدل ما تنصحها او تنصحه بانها تثريه وتعمل بيه وتعدل من نفس المنتقبة او الملتحي انما بتدعوهم للتخلي عن المظهر الديني دة
وبعدين تدخل على مدون انا عارفاه كويس دا وبتقول فاتح مدونته لتكفير هذا وذاك كمان بتتبلى على الراجل طيب انتي عارفة ايه عنه هو ولا المدون اللي بيتكلم عنه دة بينهم كتير مش اللي مكتوب ادامك وبس ما تدخليش في اللي ما تعرفيهوش لان فيه خفي ما تعرفيهوش يا امي
لكن ازاي بقى يدخلوا الانصار وتلاقيهم كل يغني على ليلاه
وتلاقي غيرها برضه منتهج نفس نهجها
وتلاقي فلان يقولك المتعصبين والمتشددين وهو نفسه في عرض الموضوع متشدد ومتعصب
وربنا يرحمنا من المرضى النفسيين بقى
متالق كالعادة ربنا يبارك فيك
تحية من قلبي

روح شرقيه يقول...

الرسول عليه افضل الصلوات والتسليم
امرنا ان نحسن معامله النصارى
وهو بشخصه الكريم كان بار بهم وايضا باليهود واكبر دليل على ذلك
اكرامه لجاره اليهودى وسؤاله عنه بعد انقطاعه عن الاذى الذى كان يسببه لرسولنا الكريم لكننى متفقه معاك كليتنا ان هناك تفرقه فيما يقال وما يحدث للمسلمين ولكن رب العزه مطلع على ما يحدث للاسلام فى كل مكان بالارض ولكن اعود واقول اننا نحن من سمحنا لكل ذلك ان يحدث لان هناك الكثيرين لم يتأثروا ولم يبالو بما يحدث للمسلمين بكل مكان
والاعلام ايضا بالكامل
كان فى دعم هؤلاء ولكن وجب علينا نحن ان نتعامل بما امرنا به رب العزه وان تكون تعاملاتنا بديننا العظيم الاسلام وان نحى سنه رسولنا الكريم
ونجعل من لا يعرفون الاسلام
يتعرفون اليه
هذا واجبنا نحن
اما كل ما يحدث من الاخرين وما يتعرض له الاسلام والمسلمين فسوف ينتهى باذن الله لان هذا دين الله وهذا رسول الله
وهذا هو الاسلام ونحن جمعيا سفراء فى ارض الله لهذا الدين
ادعوا الله ان يعيننا جمعيا فى مصابنا بهذا الزمان وان ينصر الاسلام والمسلمين فى ارضه
اوافقك الراى اخى الكريم فى كل كلمه قلتها ولكن اتمنى ان تكون ممن يدعون لدين الله ولرسول الله
وان يوفقنا الله جميعا
تحياتى
بوست رائع
وفقك الله

Empress appy يقول...

طيب اهدى ومتزوقش بس
هو عادل امام مضايقك بص يا عمنا اولا موقف المسيح مليش فيه بعيد عنك متعصبه شويه للاسلام وبعيد عنك مش بحبهم ومش بتعامل معاهم اصلا لما بعرف انه مسيحى حساسيه بتمسكنى والله بجد
مش بهزر هو انا كده مع انى فى البيت عادى يعنى ولا هما بيقولوا حبى ولا اكرهى بس هو كده يمكن اتقرصت منهم كتير
موضوع لو شيخ حصل ليه اكيد ممكن يحصل كده
اقولك على حاجه احنا اللى ادينا الغرب فكرة وحشه عننا وبما انهم فيهم مسيحين ويهود وحركات فبعتقدوا ان الدين الاسلامى هو الغريب عنهم والدكتور سعاد صالح حبيبه قلبى ربنا يكرمها امبارح كانت بتتكلم عن الموضوع ده وبتقول احنا المفروض نعلم الغرب بابسط حاجه يعنى مثلا طباعه احاديث مترجمه فى طوابع او على السوفونير اللى بيأخدوها من مصر وده كان حل منها
انما عادل امام لما عمل الفيلم هو مش اتريق يا ابو صابر على الملتحين ولا حاجه انما هو وضح الارهاب وبعدين الارهاب اللى كان حاصل فى مصر فى التسعينات مش كان اللى بيعمله جماعت مش عارفه مين كده وكانوا بيربوا دقنهم بس فى راى مش علشان سنه ولا دين ده علشان يداروا وراه بس ومحدش يعرفهم
فاهدى كده شويه يا قمر.انا حسه بيك
نيجى للموضوع التانى براحه بس مش قولنا كل واحد بيصنف حسب هواه واحنا مش من حقنا نحجر على الناس بص يا محمد فيه مثل بيقولك تعرف فلان يقولك اه عاشرته يقولك لا طيب يبقى متعرفهوش
عموما انا اساسا ضد التعميم فيه ناس كويسه وفيه ناس بتأخد حاجات ستار لحاجات تانيه وانت عارف وانت نفسك كتبت دبوس عن بعض اللى بيتميعوا وهما لابسين خمار او نقاب على ما اعتقد
وعلى فكرة انا حصلى مواقف كتير من كده منهم فى الجيم بس الحمد لله هديت الست وقولت لها بس عاوزة نتكلم تتكلمى بالراحه مش عاوزة يبقى اسكتى ومش هتمشى كلامك علينا لانها بصراحه جايبه شريط قرآن نقولها يا سيتى مينفعش ده فيه قرآن لازم ننصت ليه حرام احنا بنلعب وبعدين والله كنا جايبين محطه راديو يعنى مش شريط راسها والف سيف انها تحط الشريط وننصت ليه طيب يا حاجه مينفعش معانا اخوة مسيحين تقولك لا بس فى الاخر نقلتها مجموعه تانيه ههههههههههههه ودى كانت منقبه وفيه ناس بجد كويسه قوى وتقعد تتفاهم معاك وتناقشك صح ولا ايه اه على فكرة علشان عرافك الجيم ده حريمى بس مش مكس علشان دماغك
بس انا زعلانه منك فى حاجه تانيه يا محمد انا شوفت الرد بتاعك اللى كتبته بس متنشرش زعلت منك قوىىىىىىى لانك مش انت اللى تعمل كده ولا تقول كده حتى لو هجومك على واحده تانيه مش صاحبه المدونه
انا بقولك كده من عشمى فيك وانت عارف انا بحترمك ازاى ومش عاوزاك تضايق

حنان شلبي يقول...

صراحة موضوعك حلو وهادف والحمد لله بيناقش العوج الي فينا والي احنا عاملين مش شايفينو

اصلا احنا هيك دايما بنوقف مع الظالم وبنتطهد المظلوم
متل مبد
اضرب المربوط يخاف السايب , مبهدلين شيوخنا والحمدلله طاردين نصهم برة وطنهم بحجة الارهاب والي هية بالآخر بتطلع لعدم تلبية امر الحاكم والي دايما بتكون مخالفة للدين والشرع ولمصلحة خاصة او هدف رخيص

يعني الغلط بحكامنا وحط الف خط تحت كلمة حكامنا لانهم همة اولي الامر وللاسف

وتحياتي الك ولقلمك الهادف

مدونة الغلبـان يقول...

عندك حق فى كل اللى قولتوا
ولا حول ولا قوة إلا بالله

رينـــــــــــا يقول...

السلام عليكم
ربنا يهدينا ويهديها يارب
اهم حاجة بس احنا مش نثبتلهم وجهه نظرهم فينا اننا همجين ومش بنعرف نتحاور بالعقل والمنطق
حتى لو هما مش بيدونا فرصه بردوا منخلهمش يجرونا لحاجات مش من دينا ولا اخلاقنا

ToOoKa يقول...

السلام عليكم ورحمة الله وبركاته
أزيك يا ابو صابر وأزى صابر؟

عامل دوشه اليومين دول عمال كل شوية تشكنا بدبوس

ربنا يخليك لينا وتشكنا كمان وكمان

انا عارفه انى مقصره جدا بس انا دايما بدخل وأقرأ كل حاجه اول بأول بس يمكن ما بسبش تعليق ودا والله لأسباب مقنعة وظروف ربنا يعديها على خير

والله ليك وحشة

اما بالنسبة للموضوع
فللأسف مافيش حد بقه بيحترم شيوخنا يعنى للأسف دلوقتى اللى بيتعملهم الواجب ويتشالو على الراس هما الحرمية والراقصات و..... المجتمع

ودى من علامات الساعة
ربنا يسترها معانا
لما احنا نحترم شيوخنا الأول سعتها الناس حتحترمنا
لانو فاقد الشىء لا يعطيه
أزاى بقه نزعل لما حد ما يحترمناش

اما بالنسبة للمدونة اللى بتتكلم عليها
فكل واحد وليه رأيو يمكن فى رأيي انها غلطت لما عممت انو كل المنتقبات وحشيين
دا رأى تانى والله اعلم ايه فيهم اللى صح

بس بلاش تتعصب لما تلاقى حد مختلف معاك لانو ربنا خلقنا مش زى بعض
انت من حققك انك تقول رأيك بردو
بكل بساطة وهدوء قولو يمكن من كتر موضوعيتك وهدوئك تخليها هى كمان تغير رأيها او تشوف حاجه كانت غايبه عنها

انا بقول كده لانى حسيتك متعصب شويه
هو الصراحه اللى يعصب الاهانه اللى وصلنالها

يلا ربنا يعينا لما يحب ويرضى
يلا خلى بالك على نفسك
أختك توكا

Vague يقول...

ياعمي هو انا ماينفعش ادخل عندك وانبسط ابدا

بخصوص اللي حصل للبابا شنودة.. فهي حاجة ضايقتني انا كمان.. لانه مصري برضه
ولكن انت معاك حق


خد المدونة دي كمان بتتربص بغلط المسلمين
http://wa7edzah2an.blogspot.com/
انا قاطعتها ... لكن في ناس غلبانة بتوافقه في الرأي

د/اجدع بنوته يقول...

معاك ف كل حرف كتبته ف البوست

م اول البدايه مرورا باخر كلمه ف النهايه

وتغيب وترجعلنا بالسلامه

خد بالك م نفسك ومتطولش الغيبه

رفقة عمر يقول...

انا بجد زعلت من بوست الانقطاع دة
بس لو حاسس ان دة افضل ليكى اتمنى ان الفترة مش تتطول
ربنا ييسر لك كل امورك اللهم امين يارب العالمين

عاشــــــ النقاب ـقــــة"نونو" يقول...

تروح وتيجي بالف سلامة وسعادة بس ما تتغيبش كتير لحسن نزعل
فيي حفظ الله وامنه

مجداوية يقول...

الراقص مع الذئاب واللاعب مع الأسد

حتسيب الفسافيس لمين ؟؟؟؟؟

وهدنة ليه ؟؟؟؟

وليه الناس الكويسة بتنسحب كده ؟؟؟؟

؟؟؟؟؟؟؟
؟؟؟؟؟

ها

mostafa rayan يقول...

احنا اللي ادينالهم الفرصة لكدا لما اتهونا في اموردينا ولما اتصرفنا غلط باسم الدين
تحياتي لك

مؤمنه يقول...

السلام عليكم ورحمة الله وبركاته
انا علقت هنا عشان حضرتك تشوف التعليق
وان شاء الله الغيبه ما تطولش
والسلام عليكم ورحمة الله وبركاته

أنثى الخيـــــال يقول...

طرحك رائع
ومدونتك مميزة بجد يسعدني زيارتك لمدونتي
تحياتي

مجداوية يقول...

السلام عليكم

وحشتنا دبابيسك يا اخى الكريم يا رب تكون بخير وترجع بالسلامة
تحياتى وتقديرى

مجداوية يقول...

على فكرة ممكن تشارك فى حملة التوقيعات اللى على مدونة قولا سديدا لنصرة رسول الله لو عايز عنوانها أنا حطاه على مدونتى ولو كنت واخد هدنة مننا مفتكرش الموضوع ده يدخل ضمن نطاق الهدنة لأنه رسول الله

منى يقول...

الغيبه طالت يا فندم

mohand يقول...

ارجع يا محمد احسنلك

انت حر


ارجو المرور علي اخر موضوعاتي في مدونة الباحث عن الحقيقة باسم استفتاء عن الافتاء يهمني رايك
تحياتي

مجداوية يقول...

السلام عليكم
يعنى حتى بعد المنحة الفظيعة دى برضه لسه واخد هدنه !!!!
انهارده عيد ميلاد الريس طيب طل ابعتله تهنئة أو (دبوس )يفرقع بيه البلالين البالونات يعنى

بس افتكر اننا جينالك كام مرة وردتنا خائبين

بس برضه حاجى تانى ولا يهمنى

اتعلمنا التناحة منننننننن .........تفتكر من مييييين ؟؟؟؟؟ كل اضراب وهو طيب

عاشــــــ النقاب ـقــــة"نونو" يقول...

دبابيسك فييييييييييييييييين ارجع عااااااااااااااااااااا

منى يقول...

الهدنه لسه مخلصتش؟؟؟

مجداوية يقول...

السلام عليكم
هااااااااااااا لسه مأنش الاوان
يا ترى انت فيييييييين يامرزووووووووووق

Empress appy يقول...

محمد انا بعت لك ميل كده كتير قوىىىىىىىىىى تعالى بقى

بيتنا القديم يقول...

"حاسس اني بجري بقالي فترة وعاوز اخد نفسي شوية........"

مش كفاية غياب بقا وترجع..!!


الذئاب في شوق اليك..!!

(:

Empress appy يقول...

ابو صابر طمنا عليك

منى يقول...

دى مش هدنه
بس برضه مش عارفه اسميها ايه