حمد الله علي سلامتي

السلام عليكم

ازيكم يا جماعة ...والله وحشتوني جداً

الأول عاوز أشكر الناس الجميلة اللي سألت عليا في غيابي وأفتكرتني

وبعتزرلهم عن إنقطاعي الفترة اللي فاتت

انا عارف إن الهدنة طولت....بس مكنش في نيتي إنها تطول كدا

ويمكن كانت تتحول من هدنة لإنقطاع عن التدوين بالكامل بس صعبت عليا المدونة والناس الجميلة

الشهرين اللي فاتوا حصلت شوية حجات كدا جت ورا بعضها وتصادف إنها اجتمعت في وقت واحد

أولها طبعا خبر سعيد انا بعتزر للناس إني مأعلنتهوش

وهو إني اتخبطت في دماغي وخطبت إحداهن....هي أحد بنات العائلة الكريمة اللي في القاهرة

بس مكنتش اعرفها قبل كدا....هي الحمد لله بنت كويسة بس بتشجع الأهلي

وإن شاء الله كلكم مدعويين في العقد اللي بحاول جاهداً إنه يبقي في شهور الصيف اللي جاية

واحد اسباب إختفائي هو عطل جهازي القبيح

وعدم الرغبة في إصالحه

تصدقوا يا جماعة إن الحاجة اللي هي أمي اخدت الجهاز عشان تصلحوا هي بنفسها وانا مش موجود؟؟

اصلي كنت منفض...بنزل أجازة وبخلص اللي ورايا ومش فاضي بصراحة اصلح حاجة

وبيني وبينكم اكتشفت ان الحياة بدون جهاز الحاسوب جميلة جدا

وإن الدنيا مش هتقف ولا حاجة من غير الجهاز اللعين ده

بتكلم علي الجانب الترفيهي فيه مش إستخدامه في مجال العمل طبعاً

وبرضوا أحد الاسباب المهمة هو إنشغالي بنقلي الي وحدتي الاساسية في الجيش

اللي هخدم فيها بقيت فترة تجنيدي الاحتياطية

وهو مكان في القاهرة يتبع مطار الماظة

وإن شاء الله هترقي ملازم أول يوم الاحد اللي جاي...يوم 1/6 /2008

وبكدا هيبقي بقيلي 14 شهر بالتمام والكمال

يارب يخلصوا علي خير

استنوا شوية بحضر لموضوع جديد....كلمتين بقي محشورين في زوري من ساعة لما رجعت امبارح وانا نفسي اقولهم

وحشتوني اوي ووحشتني المدونة

الي اللقاء,,,,,,