Translate

الأحد، 10 أغسطس 2008

إمتحان

السلام عليكم

بعتزر للمرة الألف عن الغيبة والأنقطاع والتقصير في زيارة الاخوة والأخوات الكرام
بس ربنا اللي يعلم ظروف الشغل عاملة ازاي.....والاجازات بقت شئ نادر أوي....القادة بيحز في نفسهم انهم يوافقوا علي الاجازة....زي ما يكونوا بيقطعوها من لحمهم
المهم المواضيع كتيرة اوي ومش عارف اتكلم في ايه والا ايه
بس مع التعريج السريع علي المدونات الصديقة لقيت ماشاء الله الناس مغطيين الاحداث الجارية بمواضيع محترمة
وهحاول اندمج معاهم شوية بفكرة قديمة.....الموضوع الناهرده هيبقي علي شكل إمتحان....أسئلة وإجابتها
يارب الفكرة توصلكم انا عاو اقول ايه....نبدأ علي بركة الله

السؤال الأول :


بم تفسر (علي الا تزيد الاجابة عن سطرين فقط عشان الناس متزهأش) :


1-خروج ممدوح إسماعيل من قضية العبارة زي الشعرة من العجينة ؟

عشان احنا رجالة ووقفنا وقفة رجالة - زي الوقفة اللي وقفناها مع وزير الزراعة الأسبق يوسف والي كدا في قضية المبيدات المسرطنة....انا مش شايف اي غرابة في اللي حصل..ِشئ طبيعي ومتوقع..في حد كان نفسه في حاجة تانية؟




2- صحة المقولة اللي بتقول عدوك عدو دينك (يعني النصاري) عشان محدش يستهبل ويقول اليهود والمجوس والهندوس ويطنشهم ؟

والله دي عن تجربة شخصية بقي ....عاوز تتفرج علي كرههم ليك ولدينك إظهرشعائر دينك...يعني اتكلم في الدين ديماً وهما موجودين



(موضوع اختنا الفاضلة مجداوية ثري جداً....ياريت تتفضلوا وتقرأوه هنـــــــــــــــــــــــــــــــــــا )


3- إنتشار الأفلام القذرة التي تظهر المجتمع المصري وكأنه ملهي ليلي كبير (كباريه يعني)


وهذا لإستجلاب السائحين الخليجين (الغنم بتوع البترول) عشان لما يتفرجوا علينا واحنا عريانين يجوا عندنا يفرفشوا وعن طريقها نشجع (السياحة) وتزود الدخل القومي ونسد العجز اللي ظهر نتيجة زيادة الملاليم اللي زادت علي المرتبات - فكر إقتصادي بحت


السؤال الثاني:

في ضوء قانون المرور الجديد وما تفعله الحكومة المصرية دائماً في محاولة لقصقصة ريش الشعب المصري...وبالرغم من هذا استفادت فئة كبيرة جدا (من معدومي الدخل) من قانون المرور الجديد وطلعت سبوبة حلوة ......اشرح بالتفصيل مغزي (حلوة مغزي ديه) الجملة السابقة ؟


لأن لو حضراتكم وقفتوا في اي إشارة هتلاقوا شباب زي الورد بيبيعوا المثلث بتاع التنبيه....شوفوا بقي مصانع البلاستيك اللي تحت السلم فكرت تستفيد ازاي من عمل المثلث دا بتكلفة رخيصة...وشغلت مناديب لتسويق المثلث دا في الاشارات والمواقف بأسعار رمزية....شوفتوا بقي قانون المرور الجديد فتح كام بيت وشغل كام شاب...ولسا بقي لما شنطة الأسعافات الأولية تنزل بمواصفتها....العقول المصرية هتعمل ايه ....واهو كل اللي راكبين عربيات ناس اغنية ومعاهم فلوس.......فيها ايه لما ينفعوا الغلابة اللي مش معاهم عربيات....واهو بدل الموضة بتاعت بيع الفل في الأشارات.....نغيرها ونخليها مثلثلت وشنطة الأسعافات الاولية .....إن قانون المرور الجديد ينطبق عليه مقولة : مصائب قوم عند قوم فوائد




السؤال الثالث


في الأوانة اخيرة ارتبط ظهور اي خراب علي الشعب المصري باسم المدعو أحمدعز بتاع الحديد....في رأيك الشخصي وبعد ظهور قانون المرور الجديد ....هل انت شامم ريحة الراجل دا فيه؟؟


طبعاً....هو مش فيه قانون نزل بينص علي إعدام السيارات اللي قبل سنة معينة وإستبدالها بسيارات جديدة (خاص بالأجرة)...أهو عز بقي هياخد السيارات القديمة ديه كصفقات حديد خرده....وانتم عارفين الباقي


السؤال الرابع......ذو صلة وثيقة بالسؤال الثالث

تفتكر في حد ورا عز ...يعني في أيد بتحركه .....والا هو الراجل دا طيب وغلبان وربنا سترها معاه والتراب بيتحول في ايده

مش هجاوب علي السؤال ده ......عشان في تلميح سخيف انا مش هقبله ......يا ساتر عليكم....مش سايبين حد في

شعب شقي اوي






السؤال الخامس (يستحسن يكون معاك منديل عشان تجاوب علي السؤال دا وانت بتبكي من الحسرة والذل والإهانة)


ما المقصود بكلاً من :


الشعب المصري


هو شعب مغلوب علي امره اقصي أمانيه السفر للعمل في الخليج او الهجرة الي اوروبا (للعمل أيضاً) وليس

وفي كلا الأحوال بيموت غرقان ....غرق بطريقة شرعية (مع ممدوح إسماعيل) وغرق بطريقة غير شرعية (عن طريق الهجرة الغير شرعية)


الشعب العربي


شعب يجترمجداً ماضياً حينا...يتغني بمجد صلاح الدين ومحمد الفاتح وعبد الرحمن الداخل وطارق بين زياد....ينظم أبيات الشعر الحماسية....وينتج الحلم العربي والضمير العربي ..... ثم يسافر البعض منهم لقضاء عطلته في اي بلد اوروبي ....يشرب الخمر ويجالس العاهرات ويقامر بأمواله





العالم الأسلامي


تحققت فيه نبؤة الرسول صلي الله عليه وسلم ....فهم غثاء كغثاء السيل.....لا يحركون ساكنا




لم تنتهي الأسئلة,,,,,,,,ما دام حالنا كما هو....سننتقل من إمتحان الي إمتحان
إمتحان لا يكرم فيه المرء....بل يذل ويهان.....ويهان
الدبوووووووووووووووووووووس
لايتبقي الا القليل علي الشهر الكريم
الدبوس دا بشك بيه نفسي قبل ما اشك بيه اي حد
لو مجهزناش نفسنا من دلوقتي لأستقبال الشهر الكريم هنضيع منننا الكتير
ياريت نقلل من الخروج ومن النت ومن اي حاجة تلهوا عن زكر الله
نحط لنفسنا كدا جدول نمشي عليها نظبط بيه نفسنا.....محدش يقول هبدأ علي رمضان
إستحالة هتعرف تستمر....متستناش رمضان عشان تبدأ تلتزم......ادخل رمضان وانت مسخن من قبلها
حتي لا تصاب بشد عضلي......ويندرج تحت جملة شد عضلي بقي المسلسلات والافلام والكاميرا الخفية والبرامج الجميلة بتاعت التلفزيون المصري الرائع اللي بيتفنن انه يضيع رمضان علي المسلمين
عاوزين كمان نشك بالدبوس دا الناس الجميلة رواد الخيب (الخيم ) الرمضانية ورمضان منها برئ
ورحلات السحور الجماعي...رحلات الفسوق الجماعي طبعاً.....مهازل وانحلال لا يرضاه الله عز وجل في خير الايام
معلش الدبوس متأخر وكان لازم يبقي من شهر فات ...بس ممكن نلحق نفسنا دلوقتي
نزود ورد القرآن الكريم ....ورد قيام الليل....نزود من ايام الصيام....نزود من الصدقة
نبطل بقي بعد عن ربنا ونرجع تاني....
اللهم بلغنا رمضان
الله بارك لنا في شعبان وبلغنا رمضان
اللهم بلغنا رمضان ووفقنا لصيام نهاره ولقيام ليله وتقبل منها ولا تجعلنا فيه ممن خاب وخسر
لو لم يقدر لنا الله اللقاء قبل رمضان استودعكم الله الي ما بعد رمضان إن قدر الله لنا البقاء
إقرأوا هذا الموضوع كتبته بخصوص التدوين في رمضان عسي الله ان ينتفع به الأخوة والأخوات الكرام


هناك 24 تعليقًا:

ابو اعصار يقول...

اسئلة مؤلمة بس الي المني ان اقصى اماني الشعب المصري اننا نسافر بره عشان نشتغل بينما بعض الاخوة العرب بيسافروا عشان الحرام

رينـــــــــــا يقول...

السلام عليكم
ازيك يا محمد مع انى زعلانه انك مبتسألش
بس ماشى ياسيدى التمس لاخيك سبعين الف عذرا يارب تكون بخير وكل سنه وانت طيب
ولف مبروك الخطوبه مع انها متأخرة اوى ربنا يتمم لكم على خير يارب ويوافق ابيها على العقد ان شاء الله وتفرحنا قريب


بالنسبه لبوست

السؤال الاول معلش يا محمد انا ليا رأى مختلف شويه مع انى معترضه تماما على قرار البرأة الا ان فعلا الراجل المفروض فى ميه الف واحد بيشتغل تحتيه مسئول عن العبارات وسلامتها مش معقول فعلا هينزل هو بنفسه يلف على العبارات يشوف ايه اللى بايظ وايه اللى مش بايظ وكلامى دا مش معناه انى بنفى تماما المسئوليه عنه هو متحمل جزء من المسئوليه انه مش بيختار ناس صح تشتغل عنده وناس تهتم وتخاف على مصالح الناس بس فى نفس الوقت مش المفروض هو بس اللى يتعاقب فى ميه الف واحد تحت ايده كان المفروض يكون ليهم نصيب من الاتهامات اللى اتوجهتله


بالنسبه للسؤال التانى
بردوا لاسف يمكن اختلف معاك انا مقتنعه بالايه الكريمه
لكم دينكم ولى دين ...زى ما فى نصارى بيكرهوا المسلمين جدا فى مسلمين بيكرهوا النصارى جدا ...احنا بدام تعاملتنا معاهم بره الجدال فى الدين ومحدش اتجرأ قدامى على دينى فانا تعاملى معاه على انه انسان وبس ..دا رأى


السؤال الثالث
انا معاك جدا فيه مش هجادل فى دا :) شوفت انا مرنه ازاى

بالنسبه لقانون المرور
مصلحه الناس لقت شغل ..ودا دليل ان احنا كشعب ممكن باقل امكانيات يعمل حاجات احسن من الصينى


بالنسبه لحديد عز
اه على فكرة انا مقتنعه ان الراجل دا سبب فى خراب الاقتصاد المصرى اصلا


بالنسبه للتعريفات انت قمت بالواجب وزيادة :)

كل سنه وانت طيب يا فندم

Empress appy يقول...

10 على عشره صح كده

اه يا محمد لو نلاقى اجابه صح فى حياتنا ونبطل سلبيه انا عن نفسى مش عارفه ازاى بس هو كده

موضوع النصارى
او علاقتنا بيهم انا دايما بقول عليها نار تحت الرماد
حمد لله على السلامه وكل سنه وانت طيب

مؤمنه يقول...

السلام عليكم ورحمة الله وبركاته
هجاوب على الامتحان بس بشرط ضمان سلامة التصحيح وعدم اللعب فى التنسيق وبعد المداوله نستعن بالله
اولا
1-خروج ممدوح إسماعيل من قضية العبارة زي الشعرة من العجينة ؟
رأى دى كان شئ متوقع بعد ما سمحوا له بالسفر وبعد ان طالت مدة المحاكمه وبعد ان لم ياخذ كل اهالى الضحايا التعويضات كامله
شئ متوقع وممهد له من البدايه
ثانيا
2- صحة المقولة اللي بتقول عدوك عدو دينك (يعني النصاري) عشان محدش يستهبل ويقول اليهود والمجوس والهندوس ويطنشهم ؟
مش كل النصارى على فكره بدليل زياة عدد المسلمين فى اوربا بين حين واخر رغم الاضطهادات التى يتعرضون لها
منهم ومنهمفهم اقرب لنا من اليهود كما ذكر القران
الثالث
3- إنتشار الأفلام القذرة التي تظهر المجتمع المصري وكأنه ملهي ليلي كبير (كباريه يعني)
طبعا منهم لله وحسبى الله ونعم الوكيل وتيجى تكلمهم يقولك الفن رساله ورسالتنا نوعى الناس هقول ايه لا تعليق
رابعا
في ضوء قانون المرور الجديد وما تفعله الحكومة المصرية دائماً في محاولة لقصقصة ريش الشعب المصري...وبالرغم من هذا استفادت فئة كبيرة جدا (من معدومي الدخل) من قانون المرور الجديد وطلعت سبوبة حلوة ......اشرح بالتفصيل مغزي (حلوة مغزي ديه) الجملة السابقة ؟
رب ضرة نافعه
شوف سبحان الله برده الارزاق لازم تتوزع وبتوع العربيات يشربوا باءه

خامسا
في الأوانة اخيرة ارتبط ظهور اي خراب علي الشعب المصري باسم المدعو أحمدعز بتاع الحديد....في رأيك الشخصي وبعد ظهور قانون المرور الجديد ....هل انت شامم ريحة الراجل دا فيه؟؟
ايه دى لو زى ما انت بتقول دى يبقى مصيبه يعنى هتتكرر مهزلة الاسلحه الفاسده ونلاقى عربيات فاسده
ربنا يستر

سادسا

تفتكر في حد ورا عز ...يعني في أيد بتحركه .....والا هو الراجل دا طيب وغلبان وربنا سترها معاه والتراب بيتحول في ايده
فى حد وراه والله انا مش بمشى وراه كتير عشان اعرف بس بلاقيه دايما بيروح الحزب الوطنى يبقى اكيد ودى كافى اوى ومش هجاوب على السؤال دى عشان نسيب الناس فى حالها

سابعا
ما المقصود بكلاً من :


الشعب المصري
دى غلبـــــــــــــــــــان

الشعب العربي
هو فعلا عايش على الماضى وفى الحاضر الى بيهدم كل ذكرى للماضى

العالم الأسلامي
اتمنى له النصر هو الغالب فى النهايه لكن الوضع الحالى فى اشد الخزى والعار

الدبوووووووووووووووووووووس
اتمنى من الله ان يبلغنا رمضان ويعيننا عليه
وفى النهايه ارجو ان اكون وفقت ولو حتى ادخل كلية الطب
دومت بخير اخى الفاضل
والسلام عليكم ورحمة الله وبركاته

عاشــــــ النقاب ـقــــة"نونو" يقول...

السلام عليكم
والله مش عارفة اجاوب على ايه ولا ايه
حسبي الله ونعم الوكيل في الظلمة
موضوع النصارى بحكم اخطلاتنا بيهم ولله الحمد امارس حدود ديني معهم حتى اني ارتدي نقابي ولو امام النساء
ولابد التعامل يكون بما يرضي الله ورسوله
ومغلف بحذر لا يضير
فلن يرضوا عنا طبعا مهما عملنا
بالنسبة لاقتصاديات البلد وارتفاع الاسعار في كل شيء وقانون المرور والعبارة
عاوزة بس حضرتك تاخد بالك من حاجة مهمة جدا
التقاء النفوذ والمال
وزير النقل مين وعز مين وبتاع العبارة منصبه ايه
وووو
طبعا خلاص البلد بتتاكل وهما بيخربوها طبعا
اما شعبنا المصري الجدعان اللي يلعبوا بالبيضة والحجر خلاص باعوا البيضة وقعدوا يشحتوا على الحجر
اما عن شعوبنا العربية فدول رجالة ووقفوا وقفة رجالة والحمد لله خرج من بينهم هيفا وتامر وارحمنا يارب
الشيوخ الافاضل فيه منهم من نحسبه على خير والبعض الاخر بيكتفي بالوعظ وعيطونا في الادعية والواحد خلاص بجد زهق مفيش حل يعني؟؟؟
ففروا الى الله
هو دة اللي بعمله وربنا يعينا يارب
الدبوس بقى
اللهم بلغنا رمضان وربنا يبارك فيك يارب
تحياتي

بنت الصالحين يقول...

امتحان صعببببببببببب اوي
بالنسبه للعباره انا مش هتكلم لاني تعبت وتعبت جدا بالذات التدوينه القبل الموجوده فبجد مش هقدر ادخل في الموضوع ده تاني

واحنا اللي جبناه لنفسنا

وعلي اريك كنا عملنا ايه يعني في اللي قبله واللي قبله

طيب مش انت شايف الناس كلها مخنوقه

اديهم بس مهله اسبوعين هتلاقي العمليه نامت تاني

حاجه تقرف


:::::::::::::

اما موضوع النصاري فاانا معاك فيه

اما راي اختي مؤمنه ان النصاري اقرب لنا من اليهود بنص القران

فده صح بس لازم نفرق

بين مين اقرب لنا من مين وبين هما بيحبوانا وبيحبوا ديننا ومتقبليننا ولا لا


::::::::::::::

بشعر بالخزي والله لما هو موجود الان في التليفزيونات والافلام ومايحدث بهدف دعوي الفن

شاطرييييييييييين احنا اوي في فن العري

ولا نعرف شيئا في اي شئ في دنيانا
وانا لله وانا اليه راجعون


بس الموضوع ده فكرني بحاجه اهم

ليه العرب مش بيحسوا ببعض

ليه بيحبوا ياكلو لحم بعض

امتي نرجع تاني امه واحده يهب مصري لستر اخته الجزائريه
والفلسطيني لستر اخته العراقيه


متي؟؟؟!!!!!!!!!!!!


:::::::::::
اللهم تقبل منك صالح الاعمال ورزقك الاخلاص في الاقوال والافعال وبلغنا واياك رمضان

ToOoKa يقول...

السلام عليكم ورحمة الله وبركاته
ربنا يبلغنا كلنا رمضان ويعيننا على عبادتة فيه

كل سنه وانت طيب اخى العزيز

انا موافقه معاك تقريبا فى كل الاجبات ماعدا بتاع الافلام الوحشه بتاعت اليومين دول

م عتقدش انو دا السبب لانو المصريين اللى حيشوفو الفيلم دا عددهم اكتر بكتير من الخلجيين
ثانيا:اكيد بردو الخليج فيها ناس وحشه يعنى هما مش مستنين يروحو مصر علشان يشوفو حجات وحشه

انا اعتقد انو الافلام دى علشان تبوظنا احنا

علشان نتعود على المشاهد الوحشه والحجات الحرام وتكون بنسبه لنا عادى

عاوزين يبوظو شباب مصر لانو خير جنود لله

الحمد لله انا مابحبش السينما اساسا ولا بدخلها

بس دا حتى كفايه اسماء الافلام
ربنا يكرهنا فى كل شىء يغضبو

يلا ربنا يعينك على الشغل لو ما تعبتش وانا شاب تتعب امتى بس
ربنا يعينك ويسعدك دنيا واخره انت ومن تحب

أختك توكا

مجداوية يقول...

السلام عليكم

أولا أشكرك جدا تنويهك عن التدوينة وانى كنت بشكل غير مباشر جزء من الأسئلة الرائعة دى واللى فاجئنى انك قريتها !!

ثانيا الأسئلة سهلة جدا وكلها من المقرر ومن كتاب الوزارة كمان احنا عايزين اسئلة صعبة تعجيزية زى مثلا
هل السبب فى الشيزوفرانيا والازدواجية التى يعانى منها الشعب المصرى خاصة والعالم العربى عامة سببها نانسى عجرم ولا هيفاء وهبى ولا ظاهرة التحصر والانحباس الحرارى مع ذكر العلاقة بين الانحباس الحرارى وبين نانسى وهيفا ؟؟

حاجة زى كده

المصيبة الكبرى يا أخى الكريم اننا كلنا عارفين الأجوبة وعارفين الحلول وعارفين الصح وعارفين الغلط وعارفين ان الغلط بيودى النار وبتكون نتيجته وحشه وكخه علينا وان الصح بيودى الجنة وبتكون نتيجته حلوة وسكر علينا ومع ذلك مصرين اصرار غير عادى على اختيار كل ما يضرنا دنيا ودين لييييييييييه ؟؟؟ هو ده السؤال اللى حيجننى ليه بنعمل كده !!!!

مجداوية يقول...

اسمحلى أخى الكريم أوجه كلمة للأخت الكريمة رينا

تعرفى طبعا اختى الكريمة حديث رسول الله كلكم راع وكلكم مسئول عن رعيته

مسئولية ممدوح اسماعيل مسئولية كاملة لأنه راع ومسئول عن رعيته تخيلى نفسك صاحبة مشروع أو حتى صاحبة مجموعة عبارات هل كنت ستعتمدى على الادارة اللى تحت يدك دون أن تتفقدى بنفسك ما يفعلون وتتأكدى أن كل يعمل بجد وأن مالك موضوع فى يد أمينة !!!! بالطبع لو لم تفعلى هذا ستكونين مخطئة فى حق نفسك ومالك وتكونى غير جديرة بأن تصبحى سيدة أعمال عالمية كما هو الحال معه فمن غير المعقول ولا المنطقى أبدا أن نتصور أن رجل فى مثل وضعه لا يعلم كل صغيرة وكبيرة وموافق على كل ما يتم فى ممتلكاته ,واذا كنا يا سيدتى عندما ندفع أجرة لسيدة تنظف منزلنا نتحقق من أدائها عملها ونقيم اذا كانت تستحقه أم لا هذا مثال ساذج أضربه لأبين لك أنه ملياردير وكلما زادت الملايين زاد الحرص فى انفاقها ولا تهون الا على الفقير كما يقولون
فهو يعلم
وموافق
ومسئول
وقاتل ل 1034
ولن يفلت من عقاب الله

فاسمحى لى أن اختلف معك فى تقسيم التهمة على ماهو دونه فهم بالطبع متهمون ومشاركون فى الجريمة البشعة
لكنه الراعى والمسئول

ولا حول ولا قوة الا بالله

ثانيا
أنت اعزك الله بالاسلام وأعزنا الله بلاسلام فلا تضعى المسلمين فى مقارنة مع من مع من يعبدون غير الله فأسباب كرهنا أو المسافة القلبية بيننا وبينهم ليست لأسباب شخصية بل لانهم يعبدون غير الله فالحب فى الله والكره فى الله والآية الكريمة التى تستشهدين بها أولها قل يا أيها الكافرون ومع ذلك فالاسلام هو من يحثنا على حسن معاملتهم طالما لم يعتدوا علينا وليس لسبب آخر


أرجو أن تتقبلى مداخلتى بصدر رحب فالاختلاف فى الرأى لا يفسد للود قضية
أتمنى ذلك

رينـــــــــــا يقول...

السلام عليكم
ازيك يا محمد اخبارك ايه يارب يابنى تكون بخير وتطمنا عليك ان شاء الله

الاخت المجداويه انا سعيدة باهتمامك وردك عليا والاختلاف لا يفسد للود قضيه نهائيا

بالنسبه لكلام حضرتك عن ممدوح اسماعيل انا ليا وجهه نظر مختلفه بس زى ما قلت قبل كدا انى مش بنفى عنه تماما المسئوليه لكنى شايفه انه متحمل جزء منها مش كلها دا واحد صاحب شركات ورجل اعمال عنده ميه الف حاجة وحضرتك فكرى فيها كدا
انتى لو عندك شركه كبيرة وبتعينى فيها ناس ايه اللى حضرتك بتقومي بيه
بتعملى انترفيهوات للناس دى وتشوفى سيفاهتهم وهل يصلحوا للعمل فى مجالهم والا لا
لكن مبتشوفيش ضمايرهم فيها ايه وهل هيحافظوا على ارواح الناس والا هيهملوا فيها
خلينا واقعين حتى المثال اللى حضرتك ضربتيه عن الخادمه اللى بتيجى تنضفلك البيت انتى بتتكلمى عن فرد واحد انتى قادرة تراقبيه طول الوقت وشايفه بيتصرف ازاى وبتقدرى تتحكمى فيها
مش افراد كتير ومسئوليات ضخمه المفروض انك المسئول الوحيد عنها
وبالنسبه ان حضرتك بتقولى ان عدم المراقبه متخليكيش جديرة انك تكونى سيدة اعمال عالميه ..حضرتك بتتكلمى عن رجل اعمال فى مصر مش فى اوربا والا دوله متقدمه وممدوح اسماعيل مش المثال الوحيد اللى موجود عندنا بيقول ان اهم حاجة عنده فلوسه وشغله وبس وكل حاجة تانيه مش مهم واعتقد ان لو كان المفروض زى ما حضرتك بتقولى ان دا بيخلى اى حد جدير انه يكون رجل اعمال مكنش حد فى مصر بئا رجل اعمال اتمنى تكونى فهمتى وجهه نظرى
لو هو معندوش ضمير كل اللى مسئولين معاه معندهمش ضمير
مش معنى كدا اننا نمسك فيه هو نسيب باقى الناس ونقول لا هو بس اللى يكون مسئول قدامنا
لا هما كمان مسئولين وهما كمان كان لازم يتحاسبوا لانهم بيتقاضوا اجر على عملهم والمفروض ياخدوا بالهم منه زى رب العمل بالظبط لانه امانه يارب تكونى فهمتينى او قدرت اوصلك وجهه نظرى


بالنسبه بئا لموضوع النصارى انا مسوتش بينا وبينهم خالص انا كل اللى قلته ردا على كلام محمد هما بيكرهونا اوى وانا رديت قولت ان فى المسلمين كمان بيكرهوهم اوىلمجرد انهم مش بيتبعوا دينا وانا مقتنعه تمام بالايه اللى بتقول
" لا إكراه في الدين قد تبين الرشد من الغي فمن يكفر بالطاغوت ويؤمن بالله فقد استمسك بالعروة الوثقى لا انفصام لها والله سميع عليم "
انا مقتنعه تمام ان كل متبع لديانه من الديانات مقتنع تماما انه الحق وان الاخرين كافرين والا مكنش اتبع دينه
وانا كنت اقصد بردى على محمد ردا على انك تحبى او تكرهى مجرد انسان
احنا مطالبين فى دينا اننا نعاملهم بالحسنه والا نظلمهم والانتعدى على حقوقهم فى عبادتهم الا لو اعلنوا الحرب ودا بيبقى ليها حاله تانيه
احنا مطالبين نعاملهم كبنادمين وبس
بدام هما مجوش على دينى فى حاجة ومحاولش يأذونى فيه خلاص
وانا بتكلم على فكرة على عموم النصارى ومش امثال عدلى ابادير
دا قصدى تماما

حضرتك تقولى كل اللى نفسك فيه انا مش بضايق خالص بالعكس نقاشنا دا اكيد بنستفيد بيه
سعيدة بمعرفتك:

Empress appy يقول...

ابو صابر انت فين كل سنه وانت طيب

مؤمنه يقول...

السلام عليكم ورحمة الله وبركاته
ايه يا بشمهندس انت بتكتب الموضوع وتروح فين


عل المانع خير


وكل عام وانت الى الله اقرب وفى طاعته ادوم
ورمضان كريم عليك وعلينا
والسلام عليكم ورحمة الله وبركاته

د/اجدع بنوته يقول...

حظابط بصراحه

امتحانك واجابتك داميه ..

لا حول ولاقوة الا بالله

فكرتنا ليه بس

مااحنا ناسين او متناسين

المهم ان احنا عايشين

كل رمضان وانت بخير وصحه وسلامه

جزاك الله خيرا

yamen يقول...

عزيزي الراقص مع الذئاب

كل سنة وانت طيب قبل كل شئ
رمضان مبارك عليك ان شاء الله


ثانيا الموضوع كبير طبعا ومش هاقدر اعلق عليه كله
انما في نقطة واحدة يهمني جدا اني اعلق عليها

وهي ما تتعلق بالسؤال الثاني

ومسالة النصاري
انا طبعا محترم تجربتك الشخصية اللي خلتك تقول كده
انما من غير الموضوعية برضه اننا نعمم التجربة الشخصية و نستخلص منها قواعد
لانها مهما كان تجربة محدودة بافراد ومواقف معينة لا يصح تعميمها

وثانيا لان اللي انت قلته برضه لايتفق مع ما يمكنني ان افهمه من النص القراني الذي يقول

"لتجدن اشد الناس عداوة للذين امنو اليهود والذين اشركوا ولتجدن اقربهم مودة للذين امنوا الذين قالوا انا نصاري ذلك بان منهم قسيسين ورهبانا وانهم لا يستكبرون"

تحياتي لنشاطك يا عزيزي

أمـ الله ـة يقول...

أنا قلت أعدي علي أخواني قبل رمضان أهنيهم بقدوم الشهر الفضيل تقبل الله منا ومنكم وأنا إن شاء الله هانفذ الوصايا العشر دا أنا بفكر أني الغي الاشتراك لما بعد رمضان

ToOoKa يقول...

السلام عليكم ورحمة الله وبركاته

كل سنة وانت طيب وبخير

ربنا يبلغنا رمضان
ويعينا على عبادته على أحسن وجه
ويتفبلو منا اجمعين

أختك توكا

جنّي يقول...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

بنت سيناء.. يقول...

هو شعب مغلوب علي امره اقصي أمانيه السفر للعمل في الخليج او الهجرة الي اوروبا (للعمل أيضاً)
صحيح انت ذكرت كل شئ وبتوضيح الاجابة..شاطر والله
الله يكرمك ويبلغك الشهر وهدخل حالا اشوف البوست

بنت سيناء.. يقول...

ما شا الله عليك اسلوبك قلريب من الشباب عشان كدة بيدخل القلب..صحيح والله كلامك يار بننفذ وان كنت لا امانع ان اكتب بوست فى الشهر بس ما الحق التعليقات واكتشاف المدونات كما ذكرت..الله يباركلك فى عمرك ويبلغك الشهر

مجداوية يقول...

السلام عليكم
كل عام وأنت بألف خير
رمضان كريم

اللهم اجعلنا من عتقائك
اللهم آميــــــــــــــــن

Empress appy يقول...

كل سنه وانت طيب يا ابو صابر

غير معرف يقول...

اولا كل سنة وانت طيب وربنا يتقبل منا ومنكم صالح الاعمال

ثانيا انا مؤمنة جدا بمقولة صلاح الراعى من صلاح الرعية وكما قال رسولنا الكريم كن كما شئت فانك كما تدين تدان
وده المقصود به ان الخراب اللى فى البلد ده مش من فراغ يعنى بالرغم من انك تلاقى واحد واقع عليه الظلم وطالعه عينه الا انه بيحابى لواحد قريبه ويتوسط له فى شغل وحاجات من دى يعنى كل واحد بيظلم اللى تحته يبقى ليه الحق انه يتظلم ثانيا قالوا افرعون اش فرعنك قال ملقتش حد يلمنى واحنا من فترة طويلة استكنا وخدعنا للخوف فى كل تصرفتنا وامشى جنب الحيط يحتار عدوك فيك وغيره وطاطى وخليها تعدى وغيره الخلاصة اننا نستاهل اللى احنا فيه مدام اخدنا خوفنا على الحياة المسجونين فيها والى بنسميها بطريقتنا حياة عن خوفنا عن ديننا

جنّي يقول...

السلام عليكم


تقبال الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

مجداوية يقول...

السلام عليكم
كل عام وأنت بألف خير أخى الكريم
تقبل الله منكم الصيام والقيام وصالح الأعمال وعيد سعيد ان شاء الله