Translate

الاثنين، 30 يونيو، 2008

الأسماعيلية

السلام عليكم


كيف حالكم يا شباب....وحشتوني والله
بس ظروف الشغل والبعد عن المعشوقة الجميلة


بلدي




مع حر الصيف والخنقة اللي احنا فيها موضوعنا الناهرده هيبقي خفيف خفيف يعني

ومن غير دبابيس.....خلينا ناخد أجازة صوغيورة ونروح اسماعيلية مع بعض

أيوة انا عازمكم في موضوع الناهرده علي زيارة حببتي الجميلة...اسماعيلية

اتقضلوا معانا.......


-------------------------------





أحب في البداية طبعاً إني أبدأ الموضوع بصورة المسجد دا ..مسجد أبو بكر الصديق....من أكبر المساجد اللي في منطقة القناة...إنشاء شركة المقاولون العرب....المهندس الكبير عثمان أحمد عثمان رحمه الله...ودا كان آخر عمل ليه قبل وفاته....هو طبعاً زي ما انتم عارفين اسمعلاوي الأصل...وشيعت جنازته من هذا المسجد رحم الله المعلم وجزاه خير الجزاء علي كل ما قدمه لمحافظته وحبه الشديد لها

-------------

هنبتدي الحكاية من زمان اوي....من غير زهق وكتر كلام تعالوا نرجع لأكتر من 140 سنة....


دي كانت حفلة إفتتاح القنا ة فى 16/11/1869 و بدأ العمل في شقها فى 25/4/1859 ....يعني أكتر من 10 سنين ذل وسخرة.....كان اسمها قرية التمساح ...ودا عشان هي بتطل علي بحيرة هادية اسمها بحيرة التمساح....ومحدش يقولي عشان فيها تماسيح....هي البحيرة اسمها كدا وخلاص....الناس اللي كانت بتشتغل في حفر القناة كان أغلبهم من الصعيد......عشان كدا معظم السكان الأصليين للبلد صعيدة في الاصل....وانا واحد منهم طبعاً...

بالنسبة للصورة بقي.....

عبارة عن 3 منصات خضراء مكسوة بالحرير خصصت الكبرى للملوك و الأمراء و الثانية لليمين لرجال الدين الإسلامى و منهم الشيخ مصطفى العروسى و الشيخ إبراهيم السقا و الثالثة للناس التانية و جلس بالمنصة الكبرى الخديوى إسماعيل و مسيو دى لسبس و الإمبراطورة أوجينى إمبراطورة فرنسا وفرنسو جوزيف إمبراطور النمسا و ملك المجر و ولى عهد بروسيا وضيوف كتير تانية

مش هنحكي في تفاصيل الحفلة كتير عشان الملل

وبعدها تم إطلاق اسم اسماعيلية علي المحافظة نسبة للخديوي إسماعيل

-------------------

اللي بعده....





تبع الحفلة برضو ...يعني القناة أيام زماااااااااان

------------------------------


اللي بعده....




صور أبيض وأسود مش ألوان....وهسبها بدون تعليق....معلش كان لازم أحطها....لأن دا جزء مهم أوي في حياة البلد ديه وأهلها....عشان الناس تعرف أحنا بنحبها أوي كدا ليه....هي بتاعت مصر كلها.....بس يمكن أهل القناة يحسوا بيها أوي عشان التهجير والبعد عن الموطن والشحططة في مصر كلها







البد فاضية وكئيبة...والحزن مغطيها



--------------------------------------------

ودي برضو صور ابيض وأسود.....بس علي النقيض طبعاً
فرحة مصر كلها....وفرحة خاصة بينا احنا









-----------------------------


اللي بعده..

دي صور لبعد معالم إسماعيلية







مبني الأرشاد...ويعتبر العقل المدير لقناة السويس...وهو بيطل علي بحيرة التمساح اللي بتخترقها قناة السويس


---------------


اللي بعده...





صور لبعض المنازل اللي متصممه علي الطراز الفرنسي واليوناني القديم...ودي في الأحياء القديمة في اسماعيلية...زي حي الافرنج كدا


--------------------



اللي بعده......


دا أسمه تمثال النصر
التمثال دا حكايته غريبة أوي
اللي صممه فنان ومهندس ديكور أسمعلاوي أسمه عبده هاشم...عارفين صمممه بأيه؟؟
صمممه بشظايا دانات المدافع والدببات...وكمان الطائرات اللي كانت بتقع ايام 73..كانت الحجات ديه في الشوراع زي الطوب من كترها
الراجل دا جمعها ولحمها مع بعضها وطلع تمثالين غاية في الروعة
وفي تمثال تاني متصمم بشظايا حرب 67 أسمه الصمود ومتصمم بنفس الفكرة بس وضع التمثال مختلف


-----------------



اللي بعده...



صورة لأحد معدات هيئة قناة السويس والمسؤلة عن تطهير وخدمة القناة والاشراف علي مرور السفن




------------------

اللي بعده....





كورنيش الاسماعيلية
------------------------

اللي بعده...



و أهم ما يميز الاسماعيلية الجميلة
اللون الاخضر







-----------------



اللي بعده..



في ناس تعرف عننا إننا بحب الكورة اوي
وبنحب فريقنا اوي
لالالا...هما غلطانين...احنا بش بنحب الكورة وبس



احنا مجااااااااااااااانيييييييييين كووووووووووووووورة



ومجانييييييييييييييييييييين بحب الدراويش...اجمل واحسن فريق



وكمان بنحب ولدنا اوي ....ومش هنسبهم بالساهل.....رغم أنف الاعداء (.؟؟؟؟؟؟؟.)
(تم حذف كلمة الأهلي من بين القوسين ووضع مكانها علامات الاستفهام حتي لا تحدث بغضاء ومشاحنات)






ابن الاسماعيلية البار احسن لاعب في افريقيا...حسني عبد ربه

----------------------------



معلش يا جماعة طولت عليكم....ومعرفتش اجيب صور اكتر من كدا....بس هي أجمل من الصور بكتير أوي....ويارب كلكم تيجوا عشان تشوفوا بنفسكم



---------------------------------------------------------


الصور معظمها متجمعة من اكتر من موقع من مواقع الاسماعيلية ...والحقوق محفوظة ليهم طبعاً

هناك 18 تعليقًا:

ٍSOU يقول...

تعرف فيها ملامح كتيرة من السويس و خاصة حى الافرنج ..عندنا فيلل العاملين فى الهيئة على نفس الطراز اعتقد انها من ايام الاحتلال ...مش عارفة
بس الكورنيش بتاعكم طلع احلى من بتاعنا عاااااااا .زماليش دعوة انا عايزة زى دة :))

مـــــــــــــي يقول...

من زمان و أنا بجد نفسى أعمل موضوع عن الاسماعيلية اللي فعلا زي ما بيسموها باريس الصغرى و ده لأنها فعلا نظيفة و هادية و كمان ناسها مش لأني منهم بشكر بس لأنهم فعلا ناس عترة و مجدع و بيعشقوا ترابها..


موضوع هاااااااااااااااااااايل و الصور تحفة و بجد أنا فخورة ان أنا اسماعلاوية..


شكرا على الموضوع الرائع

عاشقه الفردوس يقول...

ايه الجمال ده

الله اكبر

ياربي راااااائعه

فعلا في مناطق في بلدنا روووووعه بس محدش بيشوف ولا اي حاجه


جميله اوي اوي بجد

ربنا يخليلنا بلادنا ويارب نشوف فلسطين كده بعيد عنها الاحتلال ونفس الحكايه العراق وكل البلاد المسلمه




انا كنت بقولك ان فيه حاجه في دماغي بخطط ليها عن موضوع اولاد الشوارع

بس مش لاقيه ايميل ليك علشان ابعتلك عليها الفكره

ده ايميل التدويني انا مش بدخل عليه ممكن تبعتلي ايميل بايميلك علشان ابعتلك عليه الفكره ويارب تعجبك
soghantota47@yahoo.com

جزاك الله خيرا

مجداوية يقول...

السلام عليكم
أحسن ناس

بس الحلو ميكملش يقطع الكورة وسنينها

اقولك انا باكره الكورة لأنها بتفرق بين الناس بالتعصب وبتخليهم فى لحظة أعداء !!! بس اظاهر اسرائيل عامله لكم عمل سفلى ودفناة فى القناة عشان تشوفوا ان الأهلى هم الأعداء

اعتبر ده دبوس منى طالما مفيش دبوس المرة دى

بس البلد جميلة فعلا وحقك تفتخر بيها

Vague يقول...

حبيبي
بيتكلم عن حبيبتي

الظاهر ان الصور قديمة شوية قبل ما يوضبوا شارع محمد على اللي بقة تحفة

التمثال التاني بتاع الشاظايا في شارع محمد على .. ورا تمثال انور السادات بتاع نوبل
والاول ده عند مكتبة عبد الدايم

انا اما بشوف الصور دي بقول
انا نفسي اروح الاسماعيلية
انا هتجوز فيها ان شاء الله.. مقدرش اسيبها
وانت هتتجوز فين؟

قطــــوفها دانيــــــة يقول...

ما شاء الله فعلا جميلة اوى الاسماعيلية انا عمرى ما رحتها بصراحة بس مكنتش اتوقع ان فى بلد بالجمال ده (بعد اسكندرية طبعا هههههههه)
ومعلش بئا الاهلى حديد...
وطبعا كل ده ما يمنعش فى الاخر اننا كلنا بتجمعنا ارض واحدة مصرنا الحبيبة والتى وصى بها الرسول صلى الله عليه مسلم لانه له نسب منها ولانه ذكر ان فيها خير جند الارض صلى الله على الصادق الذى لا ينطق عن الهوى
وذكرها رب العزة فى القران اكتر من مرة وكانت مكان لجوء الانبياء
احنا فعلا فخورين اننا مصريين ...والاكتر من كده احنا فخورين اننا مسلمين
جزاك الله خيرا

مجداوية يقول...

السلام عليكم

أضحك الله سنك أخى الكريم

بدل الأهلى حطيت علامات استفهام على أساس ان الناس هنا تراكوه أو هنود ميعرفوش مين أعداءكم

بجد اضحكتنى كثيرا ربنا يسعد قلبك يا رب

أنا برازيلية أخى الكريم
آخر تشجيع للأهلى كان بعد اعتزال الخطيب واعتزلت مشاهدة الكرة المصرية للأبد وبأتفرج على بعض مباريات كأس العالم وبأشجع البرازيل ومصنع 36
ههههههههه

مين قالك انى زعلانة انك حاطط الأهلى بين قوسين بس أصل كلمة أعداء هى اللى صعبه قمت سيبت كلمة اعداء اللى عليها الكلام كله !!!! خليها أعدقاءنا
لكن طبعا شكرا على اهتمامك بالملحوظة اللى كانت أصلا مزاح,,بس ايه حكاية ان العمل اللى مدفون عايز قعدة ؟؟ هو فيه حكاية بجد ؟؟؟؟

خمسة فضفضة يقول...

السلام عليكم ورحمة الله وبركاته

ازيك يا باشمهندس ،اخبارك ايه

والله رجعتني لاحلي ذكريات ،الاسماعيليه طول عمرها جميله


بس بلاش ندخل في مسألة الكوره عشان مانزعلش من بعض
:)))))))))))))))


سلام

ToOoKa يقول...

السلام عليكم ورحمة الله وبركاته

تسلم ايدك يا ابو صابر

كنت عاوزه اعمل الموضوع دا بس انت سبقتنى

أكتر حاجه بحبها فى الاسماعيليه الهدوء و النظافه طبعا مقارنتا بمحافظات كتير والجناين وخصوصا فى الربيع

بس عارف
والله انا مصر بحبها كلها على بعضها

بس يمكن لانى عايشة فى الاسماعيليه فهى أكتر مكان بيوحشنى لما بغيب

أختك توكا

appy يقول...

علشان كل ده انا بمووووووووت فيها وبعشقها صحبتى عايشه عند الجامع
لااااااااا متفهمش غلط مش قدامه يعنى لما بقف فى البلكونه بشوفه الجامع ده عند الاستراحه بتاعت اللعيبه
بجد على الرغم انى مش منها بس عشقتها كل حاجه فيها واهم حاجه الخضرة والنظافه
والناس اللى بتقف من غير عسكرى وتحترم الاشارات

مؤمنه يقول...

السلام عليكم ورحمة الله وبركاته
تنويه
كتبت تعليق على الموضوع الى فات اكتر من مره بس ما اتنشرش مش عارفه العيب من ايه


الاسماعليه انا الحقيقه اسمع انها حلوه بس ما كونتش اعرف انها حلوه اوى كده
يا بختكوا بيها
جزاك الله كل خير على هذه الجوله السياحيه
والسلام عليكم ورحمة الله وبركاته

منى يقول...

اه فعلا جميله اسماعيليه
انا رحتها كتير
واجمل حاجه الاحساسس بالبراح والدنيا واسعه
يمكن عشان كنت بروح المناطق الجديده

اكيد كل واحد بيحب بلده
بس بحس بجد ان فى بلاد معينه اهلها مرتبطين بيها اوى
زى الاسماعيليه كده
تحياتى

sendrlla يقول...

لا بجد جميله واماكن حلوة جدا
...................
ربنا يخليك انك وريتنا حاجه حلوة فى مصر
........................
تحياتى
ورحلة سعيدة
سندريلا

Vague يقول...

في واجب ليك عندي







تعالى خده

ToOoKa يقول...

السلام عليكم ورحمة الله وبركاته
كنت داخله اسأل عليك
بس لما لقيتك حاطت الشعار بتاع اتباع الرسول فرحت اوى
وعرفت انك متابع

بجد شكرا اوى

ربنا يرزقنى واياكم اتباع سنة الرسول
أختك توكا

maryooom يقول...

بجد جميلة جداً جداً ونظيفه أووووي غير القاهره
تعرف انا لاحظت ان اوحش منطقه هيا القاهره والجيزة وياسلام لما رحت المنصورة كنت هاموت واسكن هناك من نضافتها لكن اسماعيليه طلعت انظف مش مشكله بقي حظنا كده الحمد لله

الراقص مع الذئاب يقول...

السلام عليكم
بشكر كل الناس الجميلة اللي عجبتهم اسماعيلية
ويارب تيجوا كلكم تزوروها وتتفرجوا علي الجمال والهدوء والسحر
لأن الحكاوي مش بتنفع
حتي أسألوا
آدم
وتوكا
ومي


أما بالنسبة لأختنا الكبيرة مجداوية فزي ما قلتلك الموضوع علي اساس المداعبة....وبعدين انا بقول الاهلي هو العدو....مش جماهيره
جماهيره حبيبنا طبعاً
وسيبك انتي يارب الاهلي يبقي اسوء فريق في مصر وفي الوطن العربي كله يا ستي...عشان متزعليش بس...محدش اخد منها حاجة
وعلي رأي الحج ابويا اللي بيفضل حارق دمه يعيني طول الماتش وفي الاخر يقولي مش عازوك تتعصب...محدش هيدينا حاجة لما يكسبوا ...و مش هنخسر حاجة لما يتغلبوا

Zanooba (Zeinab sab9n) يقول...

معلوومات جامدة أوي بالذات تمثال النصر و تمثال الصمود يعني حاجة عمرها ما جت على بالي ...و ماله الأهلي يعني خلينا متسامحين فين الوحدة الوطنية ؟!! :) مدونتك رائعو و مستنية جديدك إنشاء الله