Translate

الجمعة، 21 نوفمبر 2008

شخصيات قذرة - 1

السلام عليكم ورحمة الله وبركاته


في الموضوع اللي قبل اللي فات وعدتكم اني هعمل سلسلة وهسميها شخصيات قذرة

طبعاً في إخوة وأخوات اعترضوا علي الجزء دا من الموضوع و انا بحترم وجهة نظرهم جدا يا جماعة

بس للأسف الفئة اللي انا هتكلم عنها مينفعش تتقابل برد فعل غير اللي انا هقوله او هتكلم فيه
يعني دي ناس زي ما شبهتم بانهم إذا ضرب النعال وجوههم صرخ النعال بأي ذنب اضرب

معلش اللي بيستاء ويمضعض من كلامي وتشبيهاتي يستحملني شوية...ويكمل الموضوع للأخر...


هنبدأ رحلتنا في التعرف علي اول ضيوفنا من الشخصيات القذرة الناهرده

وبقدملكم بكل مفخرة السيد وزير الاوقاف كأول ضيف في صالون الشخصيات القذرة الناهدره ....نرجوا من سيادتكم ارتداء كمامات الأنف... وتحضير كيس بلاستيك (لزوم الترجيع) وأي برشام لعلاج الأسهال...عشان مع ضيفنا العزيز حجات كتيرة اوي هتحصل

فاكرين الفلطعيس بتاع زمان...ايوة الله ينور عليكم...الناس القديمة اللي معدتش بتيجي عندي وخاصمتني كانت عارفة الفلطعيس دا ايه....اتكلمنا فيه عن فكرة وزير الاوقاف الهمام في حرمان المؤذنين من رفع الاذان واستبدالهم بتسجيلات صوتية عن طريق ما يسمي بتوحيد الاذان

دا إن دل علي شئ يدل علي جهل هذا الرجل بأبسط امور الدين...وهو الاذان ...والحكمة من رفع الاذان

انتم عارفين يا جماعة ان الأذان لا ينقطع من علي وجه الارض في كل دقيقة....زير الاوقاف بقي عاوز يحافظ علي المظهر الحضاري

دي كانت احدي افكاره الفذة


تعالوا بقي نتكلم في اخر نوادر شخصيتنا النهارده الا وهو:

إصدار كتاب جديد بعنوان: "النقاب عادة وليس عبادة"

مش بس كدا ....لا....دا اعتبر النقاب "حاجزا عن التواصل بين الناس" ، وقال: إن "ذلك الحاجز أصبح ينتشر وبسرعة بين النساء... (مصيبة...مش كدا؟؟)


ورفض في الكتاب محاولات تفسير النقاب على أنه علامة على التدين ، وقال: إن ذلك "أمر مغلوط لا بد من توعية الناس به" ، وشدد على أن النقاب لا صلة له بالحرية الشخصية وإنما هو "ضد الطبيعة البشرية وضد مصلحة الوطن ، بل إنه إساءة بالغة للدين وتشويه لتعاليمه" (يعني اللي هتلبس النقاب بتخون الوطن...وبتشوه الدين)


دي قشور من اللي قاله ضليع عصره وأوانه زقزوق افندي بلّ الندي طرطوره في إحدي زقزوقياته المستفزة


بصوا يا جماعة....النقاب فرض او سنة دي بتاعت العلماء المسلمين....علماء السلمين.....تالت مرة علماء المسلمين

زقزوق مش من العلماء طبعاً....دا واحد موظف في الحكومة مزحلق شعره بالجيل


تعالوا نسأله شوية أسئله كدا بخصوص الكتاب اللي عمله دا


انت ايه اللي مزعل اهلك من النقاب؟؟

ليه وصفته بانه تخلف ورجعية ؟؟

علي اي اساس قلت انه عادة ومش عبادة؟؟

طيب ممكن توضح اكتر ازاي المنتقبة بتخون بلدها؟؟ دا حتي النقاب لونه اسود ودا لون من الوان علم مصر الثالثة

ايه هي الادلة الشرعية لصدق قولك...وهل انت مفوض للفتوي ؟؟

هل انت اغزر علم من ابن باز وابن العثيمين رحمهما الله؟؟

هل تجرأت في مرة انك تنتقد يسرا وعادل أمام؟؟

هل تجرأت في مرة انك تكتب كتاب تحارب فيه التبرج والسفور؟؟

ما هي مكانة المايوه البكيني وقدره في تقدم ورقي الأمم؟؟

هل يجوز للمرأة المسلمة لبس المايوه البكيني علي الشواطئ وفي القري السياحية (فقط) ؟؟

هل النقاب يسبب الأذي لأحد؟؟...هل بيساعد علي تعاطي المخدرات؟؟؟ هل يساعد علي انتشار الرذيلة وإثارة الشباب وظهور ظاهرة التحرش؟؟

ســــــــــــــــــؤال اخير....هو انت عاوز تشوف وشهم ليه.....؟؟

انت المفروض انك راجل....والرجال (الرجالة وخدلي بالك انت ) مأمورون بغض البصر ...والنساء كمان


قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ * وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاء بُعُولَتِهِنَّ أَوْ أَبْنَائِهِنَّ أَوْ أَبْنَاء بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُوْلِي الْإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاء وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِن زِينَتِهِنَّ وَتُوبُوا إِلَى اللَّهِ جَمِيعًا أَيُّهَا الْمُؤْمِنُونَ لَعَلَّكُمْ تُفْلِحُونَ


دا كلام ربنا يا زقزوق....وخدلي بالك انت ...كلام ربنا...انا بتكلم عن غض البصر ومش هتكلم عن تفسير الآية عشان دا شئ خلص من زمان وأهل العلم حسموا هذا الأمر وخلاص....يعني احنا مش منتظرين شيخ الأسلام حمدي زقزوق يجي بقي يخترع دين جديد

دين مودرن كدا نقصقص ونلزق فيه زي ما احنا عاوزين....نأيفه يعني


حسبنا الله ونعم الوكيل


وأنتي يا اختي المنتقبة....(المنتقبة بجد مش زي اللي اتكلمنا عليهم في دبوس من الدبابيس) لا تبالي بكلامهم...حتي لو اصابكي الأذي اصبري واحتسبي.....


ارجو اني مكنش جرحت شعور بعض الاخوة والأخوات اللي كانوا رافضين فكرة الموضوع

بس للأسف لازم نواجه الموضوع بالطريقة ديه....دي حرب علي الاسلام


جــــــــــزاكم الله خيـــرا


الدبووووووووووووس

دا لينا احنا كشباب مصري الشهامة بتجري في دمه

مش عيب خالص انك تكون راكب احد المواصلات وتقوم وتقعد حد أكبر منك أو حد تعبان أو حتي بنت....بتبقي حاجة وحشة اوي لما نشوف واحد كبير راكب في اي مواصلة وشباب زي الورد قاعدين وشايفين الراجل متبهدل او الست متبهدلة وهما مش في دماغهم حاجة

وصلت لدرجة ان في واحد كبير قال لشاب لو سمحت يا ابني قوم وقعدني مكانك عشان انا مش قادر اقف

لا يا جماعة....متوصلش لكدا...قبل ما يفكر يقولها أكون انا قمت وقعدته

وفيها أيه لما شاب يقوم ويقعد بنت (لوجه الله مش عشان يجر معاها كلام) انتوا عارفين الزحمة بتبقي عاملة ازي وميصحش ابدا نسيب اختنا تقف في وسط زحمة ومكان ضيق ...في ناس مش بتتقي ربنا وبتستغل المواقف ديه استغلال سيئ....سيب يا سيدي اللي يتكلم يتكلم ...واللي يقول عليك بترسم او بتمثل الشهامة...خلي أجرك عند ربك مش عند الناس...

ياريت الشهامة اللي بجد ترجع تاني في المواقف ديه يا جماعة عشان الوضع بقي سيئ اوي ....ومان كان المصري مشهور بالشهامة والجدعنة...والا دي كمان انقرضت وبقت صفة مذمومة؟؟


ودمتم في خير




هناك 21 تعليقًا:

shaimaa samir يقول...

الاخ الفاضل

كثيرون هم من يبيعون الدين بالدنيا
وسيسال عن منصبه هذا

اعتراض صغير
_بزعل اوى من النقد الذى يصحبه اهانة زى انت مال اهلك_
لا ليه بس كدة
نقول نقدناواعترضنا باخلاقيتنا الطبيعية جدا

ده راى

واسال الله الثبات للجميع

تحياتى لك

الراقـــص مع الذئـــــاب يقول...

الآخت الكريمة شيماء سمير
جزاكي الله خيرا علي المرور الكريم

عاوز اوضحلك حاجة ...انا مقالتش انت مال اهلك
انا قلت ايه اللي مزعل اهلك من النقاب
ودي مفهاش اهانة خالص

وانا قلت في اول موضوعي واعتزرت عن الحدة في الكلام بتاعي وقلت يا ريت الناس تستحمل كلامي
انا لا تبع حزب ولا بتاع مظاهرات واعتصامات
انا بهاجم ناس بتهاجم الدين وبتستخف بشعائره وفروضه

احترم رأيك وأشكرك عليه

جزاكي الله خيرا علي مرورك الكريم

سلوى يقول...

رااااااااااااااااااااااااائع

الآذان فعلا لا ينقطع على الأرض

فكيف نجعله موحد لا أعرف بصراحه


والنقاب
أعتز جدا برأي الشيخ الشعراوى رحمه الله
النقاب لا مفروض ولا مرفوض
واحده عايزة تزيد من تدينها هي حره
لا أن ننعتها بأنها عدوة وطنها و...و...

الدبوس اللي في الآخر كمان رائع
ياريت الكل يعمل به

وفقك الله أخي ودمت بكل الخير

صفــــاء يقول...

شوف انا مش موافقه على النقاب لكن كمان مش معترضه عليه
دى حريه كل شخص فى أرتداء زيه
وفى ممارسه دينه بما يراة انسب له
وطبعا كلامك بالاسلوب دة يخلينى احترمك جدا ... لأنه اسلوب محترم ويخلينى حتى لو خالفتك نبقى متوافقين
لكن مفيش خلاف لأنى فعلا موافقه على أسلوبك

بالنسبه لموضوع المواصلات وانك تقف وتقعد الست
روح يا شيخ أللهى ربنا يوقعنى فيك لما اجى أركب مواصله

salma mohamed يقول...

السلام عليكم ورحمة الله وبركاته
اود شكرك على مرورك وتعليقك في مدونتي
رزقنا الله واياك ومن نحب الحج مرات ومرات
وبالنسبة لموضوعك ده,فبعد ما قريته بادعي ربنا يثبت المسلمين والمسلمات وينتقم من كل ظالم جبار اراد بالمسلمين شرا وان يجعل الله كيدهم في نحورهم
اما الدبوس ده فلازم الكل يشك نفسه بيه
وعلى راي الاخت صفاء
الهي ربنا يوقعنى فيك لما اجى أركب مواصله

مجداوية يقول...

السلام عليكم

أولا : دى مدونتك وانت حر ما لم تضر يعنى عايز تنتقد شخصيات بعينها حقك ولن أعترض على اللقب المصاحب لأنك نوهت اننا نستحمله فأنا تغاضيت عنه ولن أعلق عليه احتراما لك ولرغبتك فى هذا


ثانيا
الأذان
أرجو ألا يصدمك رأيى أنا مع أى حل يوقف هذا الصراخ والجعير والحشرجة واللغط والتداخل فى الأصوات فلا تفهم ما يقال وبأصوات غاية فى السوء

أيام الرسول كان بلال بصوته الندى يؤذن فتجد الكل منصت لجمال الصوت وروعة الكلمات
لكن أقسم لك أن هناك من يبدأ النداء وكأنه يعوى !!!! فهذا يسىء للأذان
أيام عثمان ابن عفان لاتساع الدولة كان هناك آذانان للجمعة لكى يؤهل البعيد للقدوم للمسجد
لكن مع وجود التكنولوجيا لماذا لا تستخدم فتسمع القاهرة كلها مثلا عبد الباسط أو المشارى أو مصطفى اسماعيل أو أى صوت ندى يجعلنا نقول الله ولا نتأفف ولا ننزعج فما بال من ليسوا على ديننا وهم يسمعون هذه الأصوات القبيحة الكريهه
ان جمال الصوت يشدك الى الاستماع لما يقول وقبحه ينفرك مما تسمع
فأنا معه فى هذا القرار أو أى قرار يحل هذه المعضلة


أما النقاب فلا أعرف من أين جاءته الجرأة والتأكيد بأنه عادة من أين عرف ؟؟؟ هل رجع بالزمن الى عصر الرسول الكريم ؟؟؟
الاختلاف حدث لتضارب الروايات وهذا ضعيف وهذا صحيح وهذا يؤكد وهذا يفند فالأمر متروك لمن ترغب فى زيادة طاعتها لله وكما قلت لماذا لا يكتب كتابا يهاجم فيه التوب ليس على شواطىء العراة فى الغردقة وشرم وطابا !!!!!!!!!! او ان البكينى عادة وسوبر
الدين عندنا للأسف مسيس فلا تتعجب اذا كانت سيدة مصر الأولى غير محجبة فكويس جدا انه مقلش الحجاب عادة !!!!!!


الدبوس مش كفاية نوعية الشباب المطنش المأنتخ اللى مش عايز يقوم لبنت عشان هى زيها زيه عايز حقنه مش دبوس حقنة نخوة ونقل دم لأنهم معندهمش دم
بس دبوس مشكوك صح جدا
تسلم ايدك

رئيس التحرير يقول...

السلام عليكم ورحمه الله وبركاته
ممكن تكون حضرتك عرفت ان ابو الزقازيق
زقزوق افندي متزوج من يهوديه المانيه جابها معاه لما كان مسافر..
تعرف يعني ايه زقزوق؟
لوعرفت راح اجيب لك قطه تجري وراه..

Empress appy يقول...

محمد
اقول ومتضربش ها
هقول
بص انا مع توحيد الاذان بصوت كويس واحد يا محمد ودنى وجعتنى من اللى بسمعه مبقاش فيه روحانيه خالص
اما عن موضوع النقاب
يا سيدى خلى البلد تمشى ببدل الرقص عادى يعنى
والله بجد انا مليش فيه بس كلامه صدمنى لانهم بيطالبوا بالحريات يبقى اولى يعنى
سورى فى اللفظ كل واحد يحط الشوز بتاعه فى بقه ويسكت ويسيب اللى يختار حاجه يختارها
واذا كان عن الحاجات اللى بيستخدم فيها النقاب غلط
فالعيب مش فى النقاب العيب فى القزورات اللى بتدارى فيه
غير كده ما قولنا يعملوا شرطه نسائيه عادى تشوف المنقبه
فى الشارع او فى اى مكان علشان ميبقاش فيها احراج
ما يعملوا احكام رادعه على اللى بتعمل كده او اللى بيعمل كده
طيب قوى مش زمان كانوا بيتغطوا بالكوفيه
ممنعوش لبسها ليه
الحراميه والمتسللين
مش بيحطوا كوفيه على دماغتهم يبقى كان حرمها الحج فته ده
والله يا محمد حال البلد فعلا واللى فيها بقى قرف ربنا يهدينا يا رب

ملحوسه علشان محدش يدخل يقولى كلمه متعجبنيش
اه انا ضد كبت الحريات اللى تختار النقاب ربنا يزيدها صح او غلط هى حرة
حجاب برضه هى حرة ماشيه ناكشه شعرها هى حره
انما محجبه ولابسه ملزق ولا بتفكه وقت ما تطلع بره بيتهم
دى مش موافقه عليها مش علشان حاجه علشان هى كده تعبانه نفسيا فدى هدعى لها ربنا يشفى وتكون بالشجاعه اللى تقدر تواجهه بيها نفسها واللى قهرها ووتحدد هى ايه
سلام بقى يا ح الظابط

موناليزا يقول...

فكرة البوست والدبوس تحترم جدا
بالتوفيق دائما

šσяšαяαα يقول...

لااااااااااا كله الا الفلطعيس ياباش ظابط ازاى قدرت تقولها معقولة احنا ننسى فلطعيسووو لا لا لا زعلتنى

بس فين باقى الاجزاء ياللا ورينا الهمة

والناس دى مش بتييجى غير بضرب الشاكوش وربنا يعينك على دبابيسك

وحتى لو كلامك فيه حدة بس يعنى الواحد لو مابعبعش فى مدونته هايبعبع فيييين


ياللا نلقاك قريبا على خير فى بوست جديد

سلااااااااام

سلوى يقول...

كل سنه وانت طيب وبخير وصحه وسلام أنت وكل من حولك

عيد سعيد إنشاء الله

مجداوية يقول...

السلام عليكم
كل عام وأنت وأسرتك الكريمة بألف خير وعيد سعيد ان شاء الله

نور الدين (محمد الجيزاوى) يقول...

السلام عليكم
هذه زيارتى الاولى لك وقد بهرنى ما رأيت من اراءك واسلوبك الرائع وقد مررت والله على معظم تدويناتك وهذا نادرا ما يحدث أن أطيل المكث بمدونة لأنى وجدت لديك واحة غناء بحق

..
أما عن موضوعك فبارك الله فيك ايها الكريم هذا الزحلوق كنت اعمل شخصيا مع ابنته فى محل عملى وكانت متبرجة والله ولا يدل ردائها على انها من اسرة لها ادنى معرفة بالدين

وليست تلك القضية فشخصه لا يهمنا فليذهب الى الجحيم
ولكن الكارثة انه متحدث باسم الدين الذى صار مطية لكل قرد

فالاذان شريعة فى حد ذاته له نظام خاص ابسطه حرمان المؤذنين من ذاك الاجر ناهيك عن انه تذكير للمسلمين ولو خضعنا لفكرته المريضة لحرمنا من الاذان لان التكنولوجيا لا تخلو من آفات ومعلش الجهاز عطلن وكلها اسبوعين ويتصلح وشيئا فشيئا يسلبونا حتى الصلاة
اما عنرأيه فىالنقاب فسيلقى الله واثمه فى عنقه وقد وجدت فى مدونة احدى اللقيطات وهى معروفة بعوائها على كل ما يمت للدين وجدتها قد عملت حفلا ورقصت عارية على سطورها فرحا بفتوى ذاك الضال
والنقاب ليس بفريضة حقا لكنه سنة معروفة فى زمن النبى وورثته الامة كابر عن كابر ولا يحرمه الا ضال مبتدع

والله اثلجت صدرى بموضوعك لأنى كنت انتويت ان اكتب فى نفس الموضوع
لكنك شملته ببحثك
...
والان استأذنك ايه الكريم ان اشير لموضوعك فى مدونتى حتى يزورك اكبر عدد ويستفيدون به
حفظك الله والى لقاءات كثيرة بأذن الله
وكل عام وانت بخير


تحياتى لك متواصلات
....
نور الدين محمود

BinO يقول...

السلام عليكم أخي الأسماعلاوي العزيز
ربنا يبارك لك رغم أني مختلف معاك في أستخدام الالفاظ
ـقبل الله منا ومنكم صالح العمل
وكل عام وانتم بخير

عالمى ازرق يقول...

كل سنة وانت طيب
عيد سعيد عليك وعلى كل الاسرة بأذن الله

اقصوصه يقول...

كل عام وانتم بخير

salma mohamed يقول...

السلام عليكم
كل عام وانت بخير
عسى ان يكون طول انقطاعك عن التدوين لامر خير باذن الله

نور الدين (محمد الجيزاوى) يقول...

السلام عليكم ايها الكريم الغالى
عفوا أخى فقد وضعت رابط مدونتك عندى فى اخر بوست نشرته قبلأن استاذنك
فأرجو أن تسمح لى بهذا
تحياتى لك
أخوك
..
نور الدين محمود

بس خلاص ... يقول...

السلام عليكم
وكل عام وانت بخير
ارجو ان تكون بخير ... وان لايطول انقطاعك عند دنيا التدوين
دمت لمحبيك بكل الخير

عاشــــــ النقاب ـقــــة"نونو" يقول...

السلام عليكم
برضه لة مش عارفة اقول ايه
غير اللي قلته وعملته في تدوينتي الاخيرة
قل موتوا بغيظكم
ونورالله لن يطفيء باذنه تعالى
الدبوس بقى بجد بقى الوضع بايخ وكتر جداااا الا من رحم ربي
نسال الله الصلاح لجميع الملمين
متتاخرش علينا
مدوناتك مهمة جدا

M A K I يقول...

أنا أتفق مع الأخت شيماءسمير من عدم لزوم التجريح و خاطبهم بالتى هى أحسن و عموما انت كلامك كالعادة في الصميم....تحياتى