Translate

الثلاثاء، 18 نوفمبر، 2008

عيش لطخ تموت مستور

السلام عليكم ورحمة الله وبركاته
كيف الحال يا اخواني واخواتي الكرام
يا تري لسا فاكرني......يا تري لسا موجودين
هكذا حال الدنيا في تغيير مستمر...مش مهم...انا برضو مقصر مع اخواني هنا ومش بدخل علي المدونات كتير
المهم بقي انا جاي اقولكم اني توصلت لشئ جميل اوي وعاوزكم كلكم تستفيدوا منه زي ما انا استفدت كدا
هو مبدئ ازاي نعيش في مصر في الايام اللي جاية
الا وهو...
عيش لطخ تموت مستور
هضربلكم مثل كدا عن اللي بيحصل في البلد اليومين دوله وهثبتلكم ان تفكيري ونظريتي صحيحة 100%
سمعت خير اللهم اجعله خير ان البلد هتتقسم علينا كلنا....
كل واحد وصل سنه 21 سنة هيهبر هبره من البلد
حتي لو انت صاحب اعلي شهادات....أو من سائقي المكروباصات ..أو من مسلكي لا مؤخذه البلعات
هتاخد حصتك ونصيبك من بلدك (مش عارف ليه جه علي بالي دلوقتي المثل اللي بيقول البقرة لما بتقع بتكتر ساكاكينها)
طبعاً انا من اصحاب الامية الأقتصادية ولا فخر....
يعني معلوماتي عن الأسهم والبورصة والأزمات الاقتصادية زي معلومات اي واحد من حضراتكم عن انواع البكتريا اللي بتعيش في أمعاء طائر الرخ الاسطوري.....
ومش عاوز حد يفهمني ايه اللي هيحصل بالضبط والحكومة الواعية بتفكر في ايه...خليني كدا مع الزحمة ...مش لازم ابقي ضيف من ضيوف الفضائيات ويبقي عندي وعي اقتصادي
بس بلا ادني شك انه خزوق محترم هيطلع من نفوخنا...
لأن الحكومة عندنا العدو الأول والأخير ليها هو المواطن المصري.....
طيب هتفرق حاجة انك تفهم المخطط اللي بيتعمل ضدك...انت اكيد عارف انه ضدك...بس هتقدر تغيير حاجة؟؟
اه هنقدر طبعاً نغير...هنعمل مدونة نندد ونشجب وندين ونقول لا لتقسيم مصر
وممكن كمان نلم شوية مدونين حلوين ونشتري 10 متر قماش من مصروفنا أو نوفر ونجيب ملابسنا الداخلية القديمة ونعمل لافتات ونكتب عليها لا لبيع مصر......
ونجمع شباب روشين علي الفيس بوك ونعمل جروب كول اوي عشان خاطر مصر بلدنا متروحش من ادينا...
قشطة علينا يا رجالة
انا مش بهمش من دور المدونات وحركات الشباب اللي علي الانترنت
إطلاقاً...لأنهم ملهمش لزمة من الأساس
التهميش دا لحد ليه دور بسيط او كلمة وصوت مش مسموع
انما شباب الانترنت لا ليه كلمة ولا صوت...فلا يستحق كلمة التهميش لأني شايفها كبيرة عليه وممكن تخلي ليه قيمة
أمال انت فاتح المدونة ديه ليه ؟؟
(سبق وقلت قبل كدا اني فاتحها غلاسة ومحدش ليه دعوة بقي....ام عبدو بتاعت السمك عندها إميل ادرس وويب سايت وهتفتح مدونة....اشمعنا انا يعني....وبعدين انا سمعت ان الحكومة هتعمل مدونة لكل مواطن مع مشروع رغيف الخبز )
طيب ايه رأيك بقي في الاحزاب والحركات السياسية والتيارات والمسميات
اكيد ليها دور في إصلاح البلد....
أه هو فين الدور دا؟؟؟
عشان بس اعرفكم ان نظريتي هي اللي صح في الاخر
عشان متنسوهاش (عيش لطخ تموت مستور)
الحكومة المصرية عندنا يا جماعة بسم الله ماشاء الله عليهم
شوية عربجية...والله مع الاعتزار للعربجية عشان اتحطوا في تشبيه قذر
من أول رئيس الوزراء طويل الساقين لغاية وزير الزراعة اللي بيسعي جاهداً لزيادة محصول المكرونة ومعجون الاسنان علي حساب القمح والأرز والذرة
انت كمواطن كان ليك أي دور في اختيار شوية الحناطير ديه؟؟؟
طيب في نواب مجلس الشعب من الناس ديه.....الكراسي اللي قاعدين عليها ديه بأصوات الغلابة (الحمد الله انا مش غلبان ومش بصوت لحد) بيعملوا علي الكراسي ديه ايه لما بيروحوا المجلس؟؟
ايه التغييرات اللي بتحصل بسببهم وبقراراتهم
ولا حاجة.....القافلة ما زالت تسير....خليني مؤدب ومش هقول الكلاب تعوي
يبقي لما تعيش لطخ بمزاجك احسن والا لما هما اللي يستلطخوك؟؟؟
اكيد لما تعيش لطخ بمزاجك دا احسن بكتير اوي
واتحدي اي حد من أصحاب الشعارات الحماسية انه يطلع يقولي ان محدش مستلطخه
---------------------------------------------------------
ملحوظة
الموضوع السابق ليس دعوة لليأس أو الأحباط أو الاستسلام إنما هو نظرة تهكمية علي حالنا الذي يسوء يوماً بعد يوماً
إن الله لا يغير ما بقوماً حتي يغيروا ما بانفسهم
يعني إبدأ بنفسك
وإلا كيف يستقيم الظل والعود أعوج؟؟
الدبوووووووووووووووووووس
مفيش دبوس الناهرده .....ومن غير ليه

هناك 11 تعليقًا:

مهندس مصري يقول...

و عليكم السلام و رحمة الله و بركاته
كل ده و مش دعوة لليأس
حرام عليك يا شيخ
ده جرعة إحباط مركزة
:(
ابقى بص عندي في المدونة

خمسة فضفضة يقول...

السلام عليكم ورحمة الله وبركاته

حمد الله علي السلامه يا باشمهندس محمد والله وحشانا موضوعاتك

حصلي موقف من كام يوم جيت فيه علي بالي انت ومهند علي طول واتمنيت انكم تكونوا موجودين وبتدونوا بانتظام


بالنسبة للبوست هي فعلا مش دعوة لليأس لان اليأس اصلا موجود ومش محتاج ان حد يدعونا لنكون ياسين

اما عن المدونات والنت فاختلف معاك لا فعلا المدونات والفيس بوك ليها دور وبتأثر وواجعه راس الحكومه وجيبالها صداع نصفي ولولا كده ما كانش كل التديق والتخنيق اللي عليهم دلوقت من الحكومه

بس هو تأثير بسيط لان مش معقول هيبقي ظاهر وسط كل عواصف الفساد وهو لوحده اللي واقف فوشها وماحدش بيساعد ولعلمك ماحدش بيتكلم ويدافع عن البلد دي من غير انتظار مكاسب زي المدونين

وبص لاي حزب ولا حركه معارضه من بتوع اليومين دول شوف اطماعهم و سعيهم ورا المصالح الشخصيه عملت فيهم ايه

سلام

بس خلاص ... يقول...

الراقص مع الذئاب.... مرحبا بك سعدت جدا بزيارتك وقد كنت فقدت الامل فى هذه الزيارة

عايز تبقا راقص مع الذئاب وتكون مجهول
والتحذير من كلامك فى من انا (إني احذركم....إن للذئاب مخالب وأنياب ...لا تخيفها النار...ولا يوقفها غلق الابواب...كن علي حذر وأنت تتعامل معنا) صح الكلام
مرحبا بك ..تحياتى

بس خلاص ... يقول...

عرفت بقا انه كان عندى حق لما قلت لك انك شخصية ناقدةو ساخرة ولاذعة ....

اتأكدت من ده لما قريت البوست ده

اقولك ربنا يسترها

ما علينا يقول...

السلام عليكم ورحمة الله وبركاته

اهلا بالاخ الغالى العزيز

حمدا لله على السلامة

صراحة يا محمد كنت دايما عارفة ان المبدأ عيش ندل تموت مستور

اهو مش بعيد باردوا وانا معاك فيه بالاوي

تعيش ندل وبارد ولطخ ومانتخ

اصل كدا كدا حتى لو مش هتستلطخ او تعمل لطخ
او تعمل مش واخد بالك

غصب عنك هيستلطخوك

وعلى راي المثل

ان جالك الاستلطاخ خليه بجميلة

عارف

شغلى نموذج مصغر من اللي انت قلته

جالى مدير لا يفقه شيء
عايزك بس توافقه على طول الخط ويفرغ عليك مركبات النقص

ماعلينا من كل دا

طالع عين اهلى شغل
لمدة سنتين واللي باخده شد وجذب كل يوم
لا هو بيسكت ولا انا باحاول انال عطف سعادته

الناس مانتخة على قفا اهلي
وغير كدا هم اللي بيتحفزوا وياخدوا كل حاجة وانا باعمل الشغل كله

والمساءلة كلها على
لحد ما نفسيتى تعبت
من كتر ما اعترضت ونددت وشجبت
واتخانقت

وفي الاخر
بلطجت
يعنى عملت اللي انيل من الاستلطاخ
بعت القضية

ما انا كدا كدا باخد على قفايا
باشتغل وغيري بياخد مجهودى

ومهما اطالب بحقوقي واعترض واشجب
مفيش فايدة لا حياة لمن تنادى

المدير كلمته سارية وهو شايف صالح العمل

زي الحكومة تمام
هى ادرى بمصلحة البلد

وعلى راي الغزالى
صاحب المدونة

الواطى واطى من غير ما يطاطى
والباشا باشا اصيل ياخواتى



سلام يا باشا


سيبك انت
انت منور


جيت ارسل التعليق لقيت النت فاصل

عملت باك ومنتظرة النت يشتغل


بس ياترى

نصيب كل واحد هيبقى كام في البلد دي

يكفى الواحد يشترك اشتراك نت واحد ميجا


اقولك هادخل على التليفون
مش خسارة فيك ايها الراقص

kochia يقول...

الا هو يعني ايه لطخ دي تحديدا ؟؟؟؟

shaimaa samir يقول...

نقد ساخر

فحسب

صح!!!!


لكن اكيد فى امل واى رؤية للاصلاح
حتى لواصلاح الست بتاعة السمك
::)

تحياتى لك

بس خلاص ... يقول...

ماعلينا .... مدير ايه ده اللى انتى بتتكلمى عنه ..خساره فيه انك تجيبى سيرته اصلا ..ده جه كده صدفه مع الكراكيب فى العفش وانشاء الله فى او ل حملة تطهير هيتأنتخ ..والكبير كبير ..انتى مش عارفه قيمة نفسك ولا ايه ياجامده هو شغلك ده يبقى حاجة من غيرك ولا ايه ماتخلينا ساكتين .. على فكرة فى حاجة حلوة جايه فى الشسكه هتعجبك ..ماتجرجرينيش فى الكلام اكتر من كده ..زاسكت يالسانى الحيطان لها ودان

الاخ الراقص مع الذئاب اسفة لان تعليقى مش فى الموضوع بس زى ماتقول كده دردشة انا وماعلينا لانى قابلتها عندك صدفه
تحيلتى ليك وليها

الراقـــص مع الذئـــــاب يقول...

مهندس مصري

هو احنا عندنا في مصر حاجة حقيقية غير الإحباط

انا اجي ابص عندك اهوه


-----------------------------
خمسة فضفضة

وعليكم السلام ورحمة الله وبركاته

الله يسلمك يا دكتورة ويبارك فيكي
انا موجود اهوه وإن شاء الله مهند كمان يرجع تاني

أما بالنسبة للمدونات وتأثيرها فأنا اتمني والله ان يكون ليها تأثير غير ((الفضفضة)) يا خمسة فضفضة

اما بخصوص الاحزاب فدي ناس لا تملك الا الكلام فقط وزي ما انتي قلتي....مصالح شخصية

جزاك الله خيرا يا دكتورتنا علي مرورك الجميل اللي وحشنا من زماااان

-------------------------
بس خلاص

انا بعتزر والله عن ضيق الوقت يا اختي الكريمة وقدمت الاعتزار دا في بداية الموضوع وعن تقصيري في المرور علي المدونات الصديقة
اولا انا تشرفت جداً بتواجدك وزيارتك الجميلة وكلامك الاجمل عن مدونتي اللي هيخليني اصدق نفسي بجد
والتحذير دا مقصود بيه ناس معينة هما عارفين نفسهم
ومكنش قصدي خااااالص انه يوصلك كدا
جزاكي الله خيرا علي زيارتك الجميلة واتمني تكرارها

الراقـــص مع الذئـــــاب يقول...

مااااااااااااا علينا

وعليكم السلام ورحمة الله وبركاته

ايه النور دا كله
والله تواجدك في المدونة حاجة جميلة اوي يا ماعلينا
إن شاء الله متغبش بقي تاني وترجعي زي زمان كدا

بخصوص شغلك واللي بيحصلك فيه فأنا بقي هقولك علي حاجة
انا طبعاً في الجيش...شغلي بالأوامر...وبيتطلب مني حجات فوق طاقتي بمراحل ولازم اسلمها وانجزها في وقتها
لدرجة اني مش بنام عشان اخلص الشغل اللي ورايا ...في النهاية مش بلاقي غير التوبيخ من المدير ....المدير المباشر بتاعي لواء طيار اركان حرب....وظيفته انه يزعق للناس
ويقطع فيهم...والمشكلة انه فاهم اوي اوي اوي...يعني الشغل لازم يبقي صح
هو الحمد لله مش بتاع جزاءات...بس الضغط النفسي الرهيب اكبر من الجزا
مع ان في ناس تانية نايمة ومأنتخة ومش بتشتغل بتعريفه...هي القاعدة عندنا في مصر كدا

اشتغل كتير تغلط كتير تتجازا
متشتغلش خالص ...متغلطش...تتكافئ

سيبك انتي

الواحد يعامل ضميره وخلاص
ويحتسب عند ربنا
ربنا يكرمك ديماً تنورينا كدا علي طول

سلام
------------------------------
كوشيا
لطخ ديه يعني سيس او بهلفان عشان اكون واضح...

اسعدني جدا مرورك....وسؤالك

------------------------------

شيماء سمير

ايوة هي ( فحسب ) ديه

انا الامل موجود طبعاً
هو احنا حلتنا غير الامل

دا حتي ام عبده بتاعت السمك عندها اما انها تعمل دون لود للسمك من علي النت بدل ما تتعب في صيده

اهو املنا مش هيتحقق الا لما ام عبده تحقق املها هي كمان

وتحيااااااااتي لكي

عاشــــــ النقاب ـقــــة"نونو" يقول...

السلام عليكم ورحمة الله
كل عام وحضرتك بخير
الحمدلله مفيش دبوس لكن التدوينة قنبلة
وللاسف الشديد واقع مرير
تسلم يديك
تحياتي