Translate

السبت، 3 أبريل 2010

تخاريف وخلاص

السلام عليكم ورحمة الله وبركاته

ازيكم يا شباب...كيف احوالكم يا اهل التدوين المتين...اهل الصراخ والنواح والانين...والخلق حولكم لسان حالهم إذن من طين والاخري من عجين .
يا سلام عليك يا واد يا ابو صابر انت يا عترة يا فللي يا رايق المزاج يا فاهم انت ان التدوين دا اونطة وملوش لزمة
طب انت بتدون ليه؟؟ (اهو من باب اني احشر نفسي في اللي مليش فيه وعلي رأي المثل اللي بيقول اكفي القدرة علي فمها يحتار عدوك فيك)
في بداية الموضوع بهني الشعب المصري كليله علي سلامة الكبير وعودته بالسلامة الي ارض الوطن سالماً غانماً
معلش متأخرة شوية يا ريس بس والله ظروف الشغل والغربة عشان اعرف اوفر الجروش عشان اتجوز البنية الغلبانة اللي تعبتها معايا
اعذرني يا ابو علاء مش بأيدي ...
سلامة مرارتك الفين سلامة...عنيا بتبكي عليها بندامة
ولو لسا فاضلة عندي المرارة...كانت هتفدي مرارة الزعامة
يا ابو شفة نازلة بشفطورة طالعه..وحواجب بترسم احلي علامة
غيابك علينا ..بكي عنينا..ورجعوك لبيتك كان احلي ابتسامة
في احضان شنودة وبطرس ومينا...رميت انت نفسك بكل استكانة
بندرك وفيت...وبنيت الكنيسة...اول ما قمت يا سيدي بالسلامة

ودي كانت ابسط كلمات حبيت احييك بيها في بداية الموضوع

نسبنا بقي من شوية الاونطة اللي فوق ونتكلم بجد
كالعادة انا واحد بجيب وجع الدماغ لنفسي....يعني تلاقيني قاعد كدا هادي وكويس واروح مرة واحدة معكنن علي نفسي
ومن ابسط اساليب العكننة قرائة جريدة حكومية ....او قراءة جريدة معارضة
فجئة علي حين غرة وانا بشرب كوب من النسكافية لقيت جنبي جريدة اخبار اليوم....ايدي اتمدت عليها عشان اقرئها في حركة لاإرادية قبيحة كما يفعل الطفل الصغير عند الاشارة الي مكان وضع فضلاته حتي تسطيع امه ان تنظفها من علي السجادة بعد الاستمتاع بصراخها بسبب تلويثه السجادة الغالية ...
فالطفل لن يكف عن تلويث السجادة بفضلاته...وانا ايضاً لن استطيع ان اكف عن قرائة الجرائد
المهم ...لقيت الجريدة الموقرة صاحبة الجلالة تنشر زيارة وزير الصحة المحترم زيارة مفاجئة الي احدي المستشفيات
دا علي طريقة وزير التعليم الجديد نجل وزير الداخلية السابق زكي بدر ...والذي ورث من ابوه السفالة وقلة الادب
بس ليا وقفة بسيطة في موضوع زيارة وزير التعليم وقراراته الجريئة حتي نعطي كل ذي حقاً حقه .
اولاً انا بكره الراجل دا ومش بطيقه من ايام ما كان رئيس لجامعة عين شمس لموقفه من النقاب وموقفه من حجات كتير
وعموماً هو دخل هيئة التدريس بدون وجه حق(كوسة يعني) ...يعني تاريخه ملوث من الاساس
بس عجبني في موضوع الكبسة (مش ام لحمة ورز) علي المدرسة بتاعت حلوان
كان حال المدارس متردي لدرجة لا توصف كما هو الحال في جميع مدراس مصر بدون اي استثناء...والمشهد اللي كان في المدرسة بتاعت الزيارة ابلغ دليل علي كدا
ودي نقطة تتحسب للوزير الجديد علي الرغم من عيوبه وسلاطة لسانة ....
نعدي موضوع وزير التعليم ونستني عليه شوية ونشوف نتيجة الشدة المستحقة اللي بدأ بيها مزاولة اعماله ونروح لننوس عين امه وزير الصحة....
الوزير الفافي الامور خالص اللي عمل زيارة مفاجئة لأحد المستشفيات الحكومية
بصوا بقي يا جماعة زيارة عن زيارة تفرق بصراحة يعني.....تحس كدا ان زيارة وزير الصحة تمثلية اعلامية ساذجة خالص وتضحكك...لسان حاله بيقول وانا كمان مهتم بعملي بعمل كبسات
لأن اي حد بكل بساطة عارف حال المستشفيات الحكومية عامل ازاي...وعارف التعامل الغير آدمي من هيئة الاطباء والتمريض والامن وصولاً بعمال النظافة والجنيني والحرس اللي علي ابواب المستشفيات والسادة المرضي الزملاء
وما خفي كان اعظم من حالات الاهمال وإنعدام الضمير من الاطباء في طريقة علاج المرضي (من مصادر حبيبة الي قلبي موثوق منها اوي)
يعني الله يكرمك يا سعادة الوزير بلاش كلام فارغ وخليك في كوزك لما نعوزك
حكومة بايظة ووزراء متخلفين بكل ما تحتويه الكلمة من معاني
وعلي رأسهم طويل التيلة الظريف اللطيف
معلش يا جماعة اهو حبيت افضفض معاكم كدا مع إني عارف ان محدش بقي بيسمع
الدبووووووووووووووووس بتاع زمان
ينفع تقول لواحد نصراني وحد الله وهو يرد عليك ويقولك لا اله الا الله؟؟؟
طبعاً مينفعش عشان عقيدته هي عدم التوحيد
اهو اللي مينفعش كمان انك تقولوا كل سنة وانت طيب بمناسبة عيد القيامة المجيد
عشان انت عقيدتك كمسلم تنفي زعمهم الباطل بأن لله ولد وقد صلب وبعث بعد صلبه والاحتفال بذلك
بدون بقي ادلة وفتاوي بعدم جواز تهنئة غير المسلمين بأعيادهم عشان محدش يناقش في موضوع محسوم
وجزاكم الله خيراً

هناك 10 تعليقات:

مجداوية يقول...

السلام عليكم

هي وصلتك ؟

حتقولي هي إيه ؟

أقولك هي إننا بنكلم نفسينا ومحدش سامعنا

وإن الصمت من ذهب لكن عدم اغلاق الباب تماما بيخلي الواحد ينفث عن مكنوناته ( حلوة مكنوناته دي )
:)
وأديني أهه سمعتك وجيت وربنا يتقبل منا فما باليد حيلة

الدبوس لك حق فيه مليون في المائة لأن هذا ضد العقيدة ولكن لا يمنع أن نعاملهم بكل البر والقسط كما أمرنا الله

أما وزير التعليم فأنت قلت بالظبط ما كنت أنوي أن أكتبه اليوم يعني حضرتك أخدت الكلام من على الكي بورد بتاعي
:)
لكن طالما نويته يبقى حاكتبه برضه
أما وزير الصحة المعتلة فهو يذكرني بالأطفال تماما يحب يعمل الحاجة ويتباهى بيها وفاضل يقول مش أنا شاطر يا أبلة
والمايل لما يعدل المايلة حيحصلها ايييييييه ؟
أو بمعنى آخر الحول لما يعدل المايلة يحصل اييييييييييه ؟

أيون بالظبط بيميلها على الناحية التانية
والمثل البلدي بيقول ديل الكلب ميتعدلش ولو علقوا فيه قالب
رغم إنهم بقالهم 30 سنة بيقولوا إنهم بيعلقوا القالب

وسلامي الحار للمصدر الموثوق منه واللي بتحوشله الجرشينات والطيبون للطيبات إن شاء الله

بيتنا القديم يقول...

اممممممممممم..
حيرتني ابدأ منين...؟!
طب بص يا سيدي بقا...
لازم تعرف انه من يوم مااتولاها الريس وهو بيحاول يخرج بينا من عنق الزجاجة والغريب ان احنا ماخدناش في حسبان اي خطة خمسية او عشرية أو حتى ألفية ان فتحة الزجاجة متبرشمة بغطا الكازوزة ولا يوجد في خزينة الدولة فتاحة..!
يعني احنا روحنا في هذوها الكازوزة ومش فاضل غير ان حد يجي يرجها عشان تفرقع في وش الجميع...
وسلامتك يا ريس..!

shaimaa samir يقول...

ومن الهم
ما يضحك

ومن الالم
ما يجعل الانسان يكركر _ضحكا _لغاية لما يدمع

:((((

ما علينا يقول...

حارمنا ليه من تخاريفك بس

ازيك انت يا متغرب

والله أنا رأيي ان زيارة الوزير دا ولا دا مش لوجه الله ومش بغرض الاصلاح ابدا
الاصلاح مش بالشكل دا

اللى يخليهم وصلوا لمنصب وزير في حكومة عمونا ما يقولش ابدا انهم بتوع اصلاح

بالذمة هو اللى عمله وزير التعليم دا هيصلح حاجة
ما يصلح بقى من الاساس ويطهر الوزارة بجد
دى عالم بتسرح بينا ومش عارفة تاعبين نفسهم ليه الناس اصلا سارحة مع نفسها ومش فارق معاهم حاجة


والدبوس اوافقك 100% انا كمان
مفيش حاجة اسمها نهنى غير المسلم باى مناسبة عنده
والا كدا نبقى بنشاركهم معتقداتهم البغيضة اللى هى اساسا شرك بالله

يللا ماعلينا

بقولك صحيح
لو محتاج مرارة استبن قولى بقوا بيوزعوا مرارات بلاستيك الايام دى



ما تحرمناش بقى من تخاريفك دى
لسه في ناس بتسمع اهو وبتطق من جنابها


ربنا يحفظك من كل سوء

أمـ الله ـة يقول...

السلام عليكم ورحمة الله وبركاته
ياعم خرف براحتك مش احسن مطق ولا يجرى لحضرتك حاجة اتكلم واكتب يمكن يوم كلامك يتنفذ ويكون حقيقة
كل اللي بيحصل في وقتنا الحالي فترة من فترات الاضمحلال وهتعدي بكل ما فيها وبرغم كل ما نعانيه من ألم ونشعر أن هذه الالام لن تنتهى فبصدق الدعاء وقوة الرجاء ومحاولة إصلاح أنفسنا أولا سنصل يوما إلى ما نتمنه ونسعى لتحقيقه
ووقتها فقط سيتغير الحال ويصبح أفضل
تقبل تحياتي

t3ban يقول...

و انت من اهل الخير

-_- يقول...

قل له اي كلمة طيبة بنية الاحسان الى قبط مصر و لا تقلها بنية الايمان بالعقيدة

غير معرف يقول...

مقدرش اقول غير ربنا يهدى الحال للكل ويصلح حال البلد


انت طولت الغيبة بقالك كام شهر ياريت ميكونش السبب ازمة فى الجرشينات ولا تكون اتزوجت وكلت علينا حتتين الجاتوه والحاجة الساقعة

بنت الصالحين يقول...

استغفر الله العظيم

ليه كدا بس ع الصبح : ))


ياترى ايه سر الغيبة ؟

ربي يصلح حالك وأحوالنا جميعا

الراقـــص مع الذئـــــاب يقول...

السلام عليكم
بعتزر للأخوة والاخوات علي طول الغياب وبوعدكم إن شاء الله بالتواصل