ارحل غير مأسوف عليك

آلآنَ وَقَدْ عَصَيْتَ قَبْلُ وَكُنتَ مِنَ الْمُفْسِدِينَ
الان يا طاغية فهمت الرسالة....
ارحل غير مأسوف عليك ودع الشعب يتنفس الحرية والكرامة ....
سلمت ايديكم يا مصريين وتبت ايادي النظام القبيح

مصلحتي يا مصلحتي

السلام عليكم ورحمة الله وبركاته

كيف حالكم يا شباب ...والله واحشني كتير كتير كتير

معلش...انا عارف اني غيابي كان طويل اوي الفترة اللي فاتت بس فعلاً انزلقت في مستودع المسؤليات والاستعداد للتخلي عن الحرية تحت مسمي الزواج

حلوة اوي انزلقت ديه....

نسبنا بقي من المسائل الشخصية اللي مش مهمة للسادة الزوار ونرجع تاني نفضفض ونتكلم زي زمان

فاكرين زمان....ياااااااااااااااااه...تصدقوا انا مش فاكر....مش مهم اهو النسيان دا نعمة برضو من نعم ربنا علي العباد

بصراحة اللي استفزني الايام اللي فاتت ديه واكيد استفز ناس كتير انها تكتب عنه هو موضوع الانتخابات

الحمد لله انا ربنا رزقني بشغل مش بشوف فيه غير الصحراء والبحر واصدقائي هناك العقارب والثعابين والطريشة...بس ولله الحمد بحب مجال عملي جدا ويكفي انه مجال فريد من نوعه ...وهو توليد الكهرباء بواسطة طاقة الرياح عن طريق مزارع الرايح اللي موجودة في منطقة الزعفرانة

الحمد لله علي نعمه التي لا تعد ولا تحصي....

المهم بقي نرجع لموضوعنا وهو الانتخابات

الدورة اللي فاتت سمعنا شعارات الاخوان وتلهفنا عشان ننجح الناس ديه وسمعنا شعارات الاصلاح والتغيير والكلام اللي يبث في نفوس المتشائمين الامل

وحصل والاخوان نجحوا علي الرغم من نصائح بعض العقلاء اللي قالوا الحكاية محصلة بعضها وهي عبارة عن كعكة يتنازع عليها اصحاب المصالح من الحزب الحاكم والاحزاب المعارضة فريح رجليك ومترحش في حته

نجح الاخوان نجاح ساحق علي الرغم من تزوير الحكومة زي ما حصل في لجنة ابراهيم الفقي ونجح رغم انوف الجميع وحتي انف القضاء نفسه (يعني التزوير مش بيفرق اوي)

بس ايه اللي اتغير لما المعارضة والاخوان كان ليهم الايدي العليا في الانتخابات.....حد شاف اي تغيير خلال السنين اللي فاتت؟؟

نسبة البطالة فعلا قلت؟؟ اسعار السلع انخفضت؟؟؟ زادت المرتبات وانخفضت الضرائب؟؟؟ التغيير والاصلاح اخبارهم ايه؟؟

محصلش حاجة....فشلوا بمعني الكلمة...عارفين ليه؟؟؟ لأن الهدف كان سياسي مكنش ديني

طبعاً الاخوان اخدوا فرصة عمرهم الفترة اللي فاتت لإستمالة قلوب الغلابة من المصريين المطحونين...وللأسف ضيعوا الفرصة..أو ضاعت منهم الفرصة

هتلاقي طبعاً كلام مختلف منهم وهيحسسوك انهم عملوا اللي متعملش عشان مصلحة الناس

بس للأسف الناس بقي عندها وعي وفهمت الحكاية...والدليل علي كدا اللي حصل الدورة ديه

كان في تزوير وكان في فساد...بس من غير التزوير والفساد كان الحزب الحاكم هو اللي هيكسب برضو

ودا اللي حصل في دوائر مدينتي الجميلة مدينة الاسماعيلية

الدورة اللي فاتتت نجح مرشحين الاخوان وسقط كل مرشحين الوطني وكتبنا لافتات تقول اهلا بك في المحافظة التي لم ينجح فيها مرشحين الوطني

فاز المرشح صبري خلف الله بإكتساح ضد مرشح الوطني محمود عثمان ابن المعلم عثمان احمد عثمان

علي الرغم من حب الناس لأبناء عثمان لإجابيتهم وخدمتهم مصالح اهل بلدتهم حتي دون التواجد علي كرسي البرلمان القذر

نفس السيناريو حدث في هذا العام بين الاخواني وابن عثمان واكتسح ابن عثمان الانتخبات بتفوق زاد عن 96% رشحه ليكون زعيم للأغلبية بعد عن حصل مرشح الاخوان علي اصوات اقاربه ومعارفه فقط ومازال يتغني بالتزوير في الانتخابات علي الرغم من ان الجميع قد تعاهد علي ترشيح محمود عثمان وعدم ترشيح مرشح الاخوان..ودا كان نبض الشارع الاسمعلاوي وأراء الناس كلها (يعني بصراحة من غير تزوير)

اخفق الاخواني واتهم الانتخبات بالتزوير ولكنها نتيجة طبيعية ومنتظرة ...

انا لست ضد او مع لأنها في النهاية كما اسلفت وقلت : كعكة يتنافس عليها الاحزاب ولا عزاء للمصري المطحون

وعلي العلم اني لم اذهب الي الانتخبات ولن اذهب ابداً ما دمت حياً لأنها لعبة قذرة لا تغني ولا تسمن من جوع

وتأتي الفتاوي الاخوانية لتتهم من يعطي صوته للوطني بأنه آثم ويتحمل اوزار كالجبال ...وأن الصوت امانة امانة امانة يا ولدي

اتلهوا علي عينكوا واسكتوا.....وبطلوا فتاوي الانتخبات ديه واعملوا مشاريع مفيدة زي زمان (بس متكنش علي سبيل الدعايات الانتخابية)

اخيرا عاوز اقول يا جماعة انا لست مع الوطني او ضد الاخوان....فلم اجد فارق بين الاثنين الا في المسمي فقط

انا مع مصلحتي ومصلحة المطحونين الذين اقصي طموحهم هو الحصول علي رغيف العيش

الدبووووووووووووووووووووووس

الايجابية تبقي احلي لو كانت فعل ...مش كلام....بس كدا (علي وجه العموم وليست خاصة بالموضوع )

اعتزار

السلام عليكم

بعتزر للأخوة والاخوات علي طول الغياب وسوف يكون لنا لقاء بإذن الله في القريب العاجل

وجزاكم الله خيرا يا اهل التدوين المتين

تخاريف وخلاص

السلام عليكم ورحمة الله وبركاته

ازيكم يا شباب...كيف احوالكم يا اهل التدوين المتين...اهل الصراخ والنواح والانين...والخلق حولكم لسان حالهم إذن من طين والاخري من عجين .

يا سلام عليك يا واد يا ابو صابر انت يا عترة يا فللي يا رايق المزاج يا فاهم انت ان التدوين دا اونطة وملوش لزمة

طب انت بتدون ليه؟؟ (اهو من باب اني احشر نفسي في اللي مليش فيه وعلي رأي المثل اللي بيقول اكفي القدرة علي فمها يحتار عدوك فيك)

في بداية الموضوع بهني الشعب المصري كليله علي سلامة الكبير وعودته بالسلامة الي ارض الوطن سالماً غانماً

معلش متأخرة شوية يا ريس بس والله ظروف الشغل والغربة عشان اعرف اوفر الجروش عشان اتجوز البنية الغلبانة اللي تعبتها معايا

اعذرني يا ابو علاء مش بأيدي ...

سلامة مرارتك الفين سلامة...عنيا بتبكي عليها بندامة

ولو لسا فاضلة عندي المرارة...كانت هتفدي مرارة الزعامة

يا ابو شفة نازلة بشفطورة طالعه..وحواجب بترسم احلي علامة

غيابك علينا ..بكي عنينا..ورجعوك لبيتك كان احلي ابتسامة

في احضان شنودة وبطرس ومينا...رميت انت نفسك بكل استكانة

بندرك وفيت...وبنيت الكنيسة...اول ما قمت يا سيدي بالسلامة

ودي كانت ابسط كلمات حبيت احييك بيها في بداية الموضوع

نسبنا بقي من شوية الاونطة اللي فوق ونتكلم بجد

كالعادة انا واحد بجيب وجع الدماغ لنفسي....يعني تلاقيني قاعد كدا هادي وكويس واروح مرة واحدة معكنن علي نفسي

ومن ابسط اساليب العكننة قرائة جريدة حكومية ....او قراءة جريدة معارضة

فجئة علي حين غرة وانا بشرب كوب من النسكافية لقيت جنبي جريدة اخبار اليوم....ايدي اتمدت عليها عشان اقرئها في حركة لاإرادية قبيحة كما يفعل الطفل الصغير عند الاشارة الي مكان وضع فضلاته حتي تسطيع امه ان تنظفها من علي السجادة بعد الاستمتاع بصراخها بسبب تلويثه السجادة الغالية ...

فالطفل لن يكف عن تلويث السجادة بفضلاته...وانا ايضاً لن استطيع ان اكف عن قرائة الجرائد

المهم ...لقيت الجريدة الموقرة صاحبة الجلالة تنشر زيارة وزير الصحة المحترم زيارة مفاجئة الي احدي المستشفيات

دا علي طريقة وزير التعليم الجديد نجل وزير الداخلية السابق زكي بدر ...والذي ورث من ابوه السفالة وقلة الادب

بس ليا وقفة بسيطة في موضوع زيارة وزير التعليم وقراراته الجريئة حتي نعطي كل ذي حقاً حقه .

اولاً انا بكره الراجل دا ومش بطيقه من ايام ما كان رئيس لجامعة عين شمس لموقفه من النقاب وموقفه من حجات كتير

وعموماً هو دخل هيئة التدريس بدون وجه حق(كوسة يعني) ...يعني تاريخه ملوث من الاساس

بس عجبني في موضوع الكبسة (مش ام لحمة ورز) علي المدرسة بتاعت حلوان

كان حال المدارس متردي لدرجة لا توصف كما هو الحال في جميع مدراس مصر بدون اي استثناء...والمشهد اللي كان في المدرسة بتاعت الزيارة ابلغ دليل علي كدا

ودي نقطة تتحسب للوزير الجديد علي الرغم من عيوبه وسلاطة لسانة ....

نعدي موضوع وزير التعليم ونستني عليه شوية ونشوف نتيجة الشدة المستحقة اللي بدأ بيها مزاولة اعماله ونروح لننوس عين امه وزير الصحة....

الوزير الفافي الامور خالص اللي عمل زيارة مفاجئة لأحد المستشفيات الحكومية

بصوا بقي يا جماعة زيارة عن زيارة تفرق بصراحة يعني.....تحس كدا ان زيارة وزير الصحة تمثلية اعلامية ساذجة خالص وتضحكك...لسان حاله بيقول وانا كمان مهتم بعملي بعمل كبسات

لأن اي حد بكل بساطة عارف حال المستشفيات الحكومية عامل ازاي...وعارف التعامل الغير آدمي من هيئة الاطباء والتمريض والامن وصولاً بعمال النظافة والجنيني والحرس اللي علي ابواب المستشفيات والسادة المرضي الزملاء

وما خفي كان اعظم من حالات الاهمال وإنعدام الضمير من الاطباء في طريقة علاج المرضي (من مصادر حبيبة الي قلبي موثوق منها اوي)

يعني الله يكرمك يا سعادة الوزير بلاش كلام فارغ وخليك في كوزك لما نعوزك

حكومة بايظة ووزراء متخلفين بكل ما تحتويه الكلمة من معاني

وعلي رأسهم طويل التيلة الظريف اللطيف

معلش يا جماعة اهو حبيت افضفض معاكم كدا مع إني عارف ان محدش بقي بيسمع

الدبووووووووووووووووس بتاع زمان

ينفع تقول لواحد نصراني وحد الله وهو يرد عليك ويقولك لا اله الا الله؟؟؟

طبعاً مينفعش عشان عقيدته هي عدم التوحيد

اهو اللي مينفعش كمان انك تقولوا كل سنة وانت طيب بمناسبة عيد القيامة المجيد

عشان انت عقيدتك كمسلم تنفي زعمهم الباطل بأن لله ولد وقد صلب وبعث بعد صلبه والاحتفال بذلك

بدون بقي ادلة وفتاوي بعدم جواز تهنئة غير المسلمين بأعيادهم عشان محدش يناقش في موضوع محسوم

وجزاكم الله خيراً

الف ليلة وليلة مطينة بطين

السلام عليكم ورحمة الله وبركاته

بعد ان اعتزلت التدوين واتجهت كغالبية الشعب المصري الي مبدأ " إني سأجعل أذن من طين والاخري من عجين"

سمعت حوار قوي ومتين

بين شهرزاد المفحومة والشعب المسكين ....

إذا قالت شهرزاد المكبوتة مخاطبة الشعب في اسود حدوته :

بلغني ايها الشعب الحزين....اللي اتكب عليه الجوع والذل طول السنين

ان شهريار قد فقد عقله بعد ان كبر سنه وتعدي حاجز ال التسعين

واصبحت دفة السفينة في ايده مهزوزة.....واصبحت البلد الشابة الجميلة كأمرأة عجوزة

فقد قرر شهريار الحكيم...ترك الدفة لولي العهد اللئيم

فعد العدة لذلك بإطلاق المنادي ليطوف البلاد بالطبلة العجيبة

باحثاً عن موظفين متعفنين وولاد ستين في سبعين...ليعمل كل منهم كخادم وفي وأمين

فكان اول المتقدمين.....طويل الساقين مقوس المنكبين الظريف اللطيف النظيف

وجاء بعده إنسان الغاب طويل الناب حفيد الشبشب وأبن القبقاب الوزير ابن بطرس الغالي عند كل حقير

ثم حرك المنادي انفه فشم رائحة نتنة تنبعث من شخص قصير....فسأله ما اسمك قال : انا عز المكير

فربط المنادي جميع المتقدمين في ذيل حماره وصار بهم الي الي سيده في داره

وبدأت تظهر معالم شلة الانس....الذين اجتمعوا علي جثث الشعب للهو والرقص

وهنا انتهت الليلة الاولي من ليالي الحاكم السفاح ...وادرك شهرزاد الصباح فسكتت عن الصويت والنواح

ملحوظة : كل ما جاء في اعلاه ليس له علاقة بالواقع من قريب او بعيد...وما جاء من اسماء فهي من وحي خيال الكاتب ومن يدعي غير ذلك فسوف يعرض نفسه لحجات مش تمام

لا تحسبوه شراً لكم...

السلام عليكم ورحمة الله وبركاته

طبعاً موضوع الساعة دلوقتي هو موضوع شيخ المنصر المدعوا طنطاوي

زاده الله قبحاً وانزل قدره بين الخلائق

ويكفيه انا يعيش الان في سوء خاتمة...نسأل الله ان يغفر لنا ويرزقنا حسن الخاتمه

انا بس عاوز اضيف تعليق بعض من (احباءه) سيئ به اوكيه كما احب ان اسميه علي طريقة الشيح وجدي غنيم

احباءه قالوا الآتي :

"كان لافتا مسارعة عدد من نشطاء حقوق الإنسان" الأقباط" إلى تأييد قرار شيخ الأزهر بعزمه منع ارتداء النقاب داخل المعاهد الأزهرية، واعتبروه" بطلا" ليبراليا يجب أن يحتذي به من جانب "المتشددين" بالمؤسسة الدينية، على حد تعبيرهم.

وعلق نجيب جبرائيل مستشار الكنيسة ورئيس منظمة الاتحاد المصري لحقوق الإنسان،

قائلا: آن الأوان أن يحتذي كثير من علماء الأزهر بالعالم الجليل محمد سيد طنطاوي على اجتهاده في صحيح الدين، وأضاف: هكذا تعودنا على جرأة شيخ الأزهر وإظهاره الحقائق، مشددا على أن حق الإنسان في أن يرى من يكلمه ويدرس له داخل المؤسسة التعليمية.

في حين قال ممدوح نخلة رئيس مركز الكلمة لحقوق الإنسان: ليس لدينا كلام في الناحية الدينية أكثر مما قاله العالم الجليل شيخ الأزهر، وضرب مثلا بتركيا وهي دولة إسلامية قال إنه النقاب لا ينتشر فيها ومعظم الدول العربية نفس الشيء ما عدا مصر والسعودية، حيث تنتشر "عادة النقاب"، مضيفا: نحن مع حرية الشخص دون أن يضر بالآخرين وأن المرأة ليست عبارة عن جسد.

من جهته، قال هاني الجزيري رئيس مركز المليون لحقوق الإنسان إن حق الإنسان فيما يفعله هي حقيقة ونحن معه كمنظمات حقوقية فيما لا يضر أحد، وإن النقاب داخل المؤسسة التعليمية له مشاكل كثيرة ونسمع كثيرا عن حوادث باسم النقاب، وأكد أن قرار شيخ الأزهر له مغذى ومعنى وهو السير في طريق الدولة المدنية، بالإضافة إلى كونه قرارا صادر من أعلى مؤسسة دينية.

دوله الناس اللي بتحب البطل بتاعنا الناهرده ,,,

انا مش عاوز اتكلم ولا اعلق علي اي حاجة....لأني بجد فرحت ان موقف زي دا حصل

فرحت انه ذل نفسه بنفسه....والبنت طالبة الاعدادي العفيفة ما زادها هذا الي عفة وطهارة وعلو شأنها بين المسلمين هي ووالديها غفر الله لهم جميعاً وثبتهم...علي الرغم من التهديدات اللي هما عايشين فيها من قبل الكلاب العاوية كما تعلمون

كل اللي عاوز اقوله ان ابلغ رد ممكن يتقال في عالم التدوين كان من الاستاذة ماجدة المعدواي جزاها الله خيراً

علي فكرة ...اول مدونة افتحها بعد الموضوع دا عشان اشوف رد فعل المدونين كانت مدونة الاستاذة ماجدة المعداوي

وبجد ردت رد علي طنطاوي لا يستطيع ان يقوم به اعتي الرجال واشدهم صلابة وقوة.

ردت بالفعل لا بالقول كما تعودنا علي صفحات المدونات..... ورزقها الله نعمة النقاب حتي تنضم الي زمرة الدرر والجواهر السوداء

ودا كان من الاسباب اللي فرحتي في موقف حبيب النصاري خاذل المسلمين....

الدبووووووووووووووووووووس

بكره تقعد جنب فاروق حسني يا طنطاوي ونقولك زي ما قولناله في الدبوس اللي فات....

هذا ما تعلمته من منظومة القوات المسلحة

السلام عليكم ورحمة الله وبركاته

اليوم ولله الحمد انتهت رسمياً فترة تجنيدي في القوات المسلحة كضابط احتياط

وبنظرية النظر الي نصف الكوب الممتلئ فقط تعلمت كثيراً واضافت هذه الفترة القاسية الي قدراتي العمليه والبدنية والعقلية والنفسية سنوات وخبرات اضعاف ما قد اجده بالخارج

لم اندم قط علي ضياع هذه السنوات بيعيداً كل البعد عن مجال دراستي ومجال عملي في الهندسة الكهربية وضعف الحصول علي فرصة العمل ...ولكن الله عز وجل لا يظلم أحداً وتكفل برزق ما خلق....فعلي الله توكلنا

واليكم خلاصة سنوات من العمل في منظومة في ظاهرها النجاح وقد يتخللها الفساد في اجزاء من داخلها....ولكنها لا تسقط ابداً

ملحوظة....قد لا يوافقني الكثير من الاخوة في بعض النقاط....ولكن عند التجارب العملية سيجد ان ما كتبته هو الصحيح

* قمة النجاح ان تقتنع بانك انجح إنسان في الدنيا حتي لو كنت غارق في الفشل

* الجمال والنجاح والمكسب والخسارة....وكذلك الفشل...اشياء نسبية

* كلما ارتفع صوت حنجرتك واحمرت عينيك وكشرت عن انيابك كلما ازدت نجاح في عملك واكتسبت مهارات القائد...هذا فقط في بلدنا مصر (عشان احنا شعب يخاف وميختشيش)

* في العمل فقط....لا تعترف بخطأك إذا واجهك به من هو اصغر منك....ولا تواجه من هو اكبر منك بأخطائه...

* انجح الاعمال واكثرها انتظاماً ودقة وانضابط هي الاعمال التي (لا) يخطوها النساء (مع الاعتزار للأخوات)

* إذا كنت من الاشخاص الذين وهبوا انفسهم للعمل وكنت اكثرهم اخلاص وتفاني وانضباط وعاتبك مديرك أو قائدك علي (تقصيرك) في عملك واهمالك اعترف بما يراه مديرك ....فهو دائماً علي صواب....لاتتعجب...فثمرة هذا الامر سوف تحصدها بعد فترة .

* الشخص الناجح في عمله هو من يحبه رؤسائه.....وييخافه مرؤسيه....او يكرهوه

* لماذا الرئيس الناجح في عمله دائماً يكره مرؤسيه؟؟ ببساطة لأنه يجبرهم علي العمل....علي العمل فقط....

* ان تتناسي اخطاء مرؤسيك بعد محاسبتهم وان تتزكر دائماً اخطاء رؤساءك دون التلويح بها امامهم...هذا ايضاً من اسرار النجاح في عملك

* لا تظهر لرئيسك في العمل انك شخص مجتهد....فهو يعرف ذلك...وانت ايضاً تعرف من المجتهد تحت قيادتك

* لا تجعل من فلان قدوة لزملائه في العمل (عشان انت بتستخف دمه) ....تكفي عبارة تشجيع بسيطة واجتهد ان يعقبها الف عبارة توبيخ بعد ان تتصيد له خطأ تافه...فهو يتقاضي راتب واجر علي ذلك العمل ....فإن وافق علي التنازل عن جزء من راتبه من اجل سماع كلمات الاعحاب والشكر فلا بأس

* القائد الذي يحب النفاق هو قائد ضعيف....لن يستمر كثيراً....فلا تكلف نفسك كثيراً في التودد اليه.

* لا تطمع في المنصب الاعلي....فهذا بداية سقوطك....ما يناسبك سوف يأتيك.

* اعترف بفضل قائدك عليك حتي بعد ابتعاده عن المنصب...وإن كان قاسي في معاملته لك....فانت غداً ذلك الرجل

* خارج حدود ودائرة العمل اظهر بشخصيتك البسيطة الودودة....فمثلاً اذا حادثك احد علي الهاتف في العمل اظهر له .الحزم والجدية والصوت المرتفع في الحديث....وإذا حادثت نفس الشخص في امر شخصي مثل تهنئة فكن ودود وبسيط ومجامل ورقيق....هذا ليس ازدواجاً في الشخصية...بل هو فصل الامور عن بعضها البعض

* كن ملم بكل كبيرة وصغيرة في العمل ولا تترك شيئاً دون السؤال عنه

* اجعل توقيعك عزيزاً جداً ولا يحصل عليه احد بسهوله

* همش كل من هم دونك....فلا يخرج قرار دون الرجوع اليك.....إنها المركزية...فانت احق بها من غيرك ما دمت انت القائد...هذا لا يتعارض مع الشوري....فانت تأخذ بأراء الجميع والرأي الذي تراه صحيح يخرج عن طريقك انت

* أقوي ذاكرة هي زاكرة القلم....دّون كل ملحوظة تراها عينيك حتي ولو كانت بسيطة...وحاسب وناقش صاحبها

* دائماً هناك أفضل....فلا ترضي بما وصلت اليه من نجاح في منظومتك مهما كان النجاح

اخيراً احترت في هذه المعادلة التي عشتها في الواقع :

ان تكون قائد ناجح ويكرهك مرؤسيك افضل ام تكون قائد محبوبمن مرؤسيك وتفشل في تحقيق النجاح

قد يجتمع الفشل القائد مع كره مرؤسيه.....ولكن يستحيل ان يجتمع نجاح القائد مع حب مرؤسيه.....هذا ما عشته وتعلمته ورأيته رأي العين في فترة خدمتي كضابط في القوات المسلحة

الدبوووووووووووووس بتاع زمااااااااااااااااان

قوماً إذا ضرب النعال وجوههم صرخ النعال بأي ذنب اضرب

إهداء الي الفاشل: فاروق حسني,,,,

الي زوراي الكرم

السلام عليكم ورحمة الله وبركاته

الاخوة الكرام زوار مدونتي.....افتقدكم كثيراً لظروف كثيرة خارجة عن إرادتي

إن شاء الله سوف تكون عودتي قريبة الي مدونتي والي مدوناتكم الغالية

اشكر كل الاخوة الكرام الذين تزكروني بالسؤال عني في غيابي

الي اللقاء,,,

موضوع للنقاش

السلام عليكم ورحمة الله وبركاته

ايوة يا ابو صابر يا جامد الحياة بقت مزهزه معاك وبقيت بتزل اجازات والدنيا بقي لونها بمبي

زمان كان الحصول علي وقت فراغ اصعب من تداول العملات المعدنية الجديدة من فئة الجنيه والنصف جنيه

الحمد لله....ضاقت فلما استحكمت حلقاتها فرجت...وكنت اظنها لن تفرج

ومدام الواحد استريح شوية من الضغط اللي كان عليه وفضي شوية هيبدأ بقي يفوق للتدوين وأهله وناسه

حبيبي اللي واحشني كتير(بجزززززز علي سناني).....وعلي رأي المثل اللي بيقول :

إذا كنت بعيد عن التدوين ومشغول .....بكره هتفضي وتفوق يا مذهول

يا سلام عليا...بقول حكم ومواعظ

الناهرده يا جماعة هنركب مع بعض آلة الزمن...وهنرجع للماضي البعيييييييد ...هنرجع للألفية اللي فاتت ونروح لحاجة قديمة اوي كان اسمها مدارس.....

زمااااااااان ايام المدارس....والمدارس يا اخواني هي جمع كلمة مدرسة....واللفظ دا كان متداول في الحقب التاريخية القديمة ....وكان بيطلق علي مبني كبير نسبياً يجمع طالبي العالم من سن 6 سنوات الي سن 17 سنة تقريباً طوال ايام الاسبوع من الساعة السابعة والنصف صباحاً وحتي الثانية ظهراً عدا يوم الجمعة اللي بيعتبر راحة

وكانت المدارس مقسمة الي مراحل....منها المراحل الابتدائية والمراحل الاعدادية والمرحلة الثانوية....وكان في حاجة جميلة اوي في المدارس اللي بكلمكوا عنها....كان كل مدرسة ليها لبس معين (يوني فورم) وكان فيها طابور الصباح والاذاعة المدرسية وتحية العلم

بعد تحية العلم الطلاب بيطلعوا حاجة اسمها الفصول الدراسية....ودي عبارة عن غرف كانت بتتسع في بعض الاوقات الي 10 أضعاف سعتها الرسمية...يعني ممكن الفصل يكون بيتسع ل 30 تلميذ ويوصل عدد التلاميذ فيه ل 300 تلميذ....ايوة يا جماعة...اصل المدارس اللي بقولكم عليها ديه كانت حاجة مهمة اوي في حياة المصريين قديماً

وكان اليوم الدارسي متقسم لحصص دراسية والحصة ديه بيتدرس فيها المواد المختلفة اللي التلاميذ بيمتحنوا فيها ...وكان في شخصية اسمها المدرس او الاستاذ اللي تحورت وتطورت وبقي اسمه (مستر)....وانثي هذه الشخصية كان اسمها أبلة وفي العصر الحديث بقي اسمها (ميس)...والاستاذ والابلة كانوا بيستخدموا وسائل تعذيب كتيرة ومتنوعة زي حاجة اسمها خرزانة وحاجة اسمها فلكة ...وكان التلاميذ بيخافوا منهم اوي وبيعملوا الواجبات بتاعتهم .....وكان فيه بقي شخصية بشعة اوي اسمها الناظر....والناظر دا راجل اصلع وبكرش ولابس نظارة كعب كوباية وشنبه منعكش وسناه صفرا ومكسره وماسك في ايده سلك كهربا 5 مم بيلوش بيه يمين وشمال...وياسلام بقي لما تخدلك منه لسعه الصبح بدري كدا ايام البرد علي طرطيف صوابعك

كنت تمشي في الشارع الصبح كل يوم تلاقي الاب او الام ماسك ابنه من قفاه وبيجر فيه عشان يوديه المدرسة اللي بقولكم عليها...والابن يعيط وبيبقي كاره نفسه ومش عاوز يروح المدرسة

يعني يا جماعة كانت كلمة مدرسة كلمة يكرهها كل ما هو دون سن ال 15

كان اجمل ايام الاسبوع هو يوم الخميس...كان ليه فرحة كبيرة اوي وكل الناس كانوا بيحبوه....كانوا بيخرجوا بالليل...وبيلعبوا كورة ويسهروا ويتفسحوا.....وكان يوم الجمعة بالليل تسمع العياط والنحيب والصراخ اللي كان بيطلع من حناجر الصغار للإستعداد لبدأ الاسبوع الدراسي تاني يوم الصبح

يااااااااااااااااااه.....الدنيا زمان كان فيها حجات غريبة اوي

دلوقتي بقي الوضع اتغير يا جماعة...التهريج بتاع زمان دا خلص....الحجات اللي اسمها مدارس ديه اتقفلت...معدش حد بيروحها طبعاً...والناس استبدلتها بالدروس الخصوصية ...وبقت المباني (المدارس قديماً) استراحات للمدرسين عشان يناموا فيها بالنهار...عشان الناس ديه شغالة دروس طول الليل وعاوزة تستريح بالنهار....وبقيت تمشي الصبح في الشارع استحالة تقع عينك علي حد لابس (يوني فورم) مدرسة...او حد ماسك شنطة فيها كتب....وبقي الاسبوع كله اجازة ....

وتطورت العلاقة بين المدرس والطالب وبقي الطالب بيضرب المدرس والمدرس بيقتل الطالب وبيتحرش بيه وحجات ومحتجات

طيب اللي احنا في دا مجمله ايه؟؟

مجمله كلمة واحدة.....مهزلة ....والله العظيم مهزلة يا جماعة

ماشي كان زمان التعليم في سلبيات كتيرة....بس دلوقتي التعليم في حالة إنهيار

ليه مخطط العملية التعليمية عندنا هنا في مصر فاشل قديماً وحديثاً...

ليه ميكنش عندنا اسلوب وسطي يحفظ للطالب كرامته وفي نفس الوقت يجبره علي احترام التعليم والتعلم

ممكن يا جماعة المدرسة يرجع ليها احترامها بتاع زمان وفي نفس الوقت الطالب يحبها ؟؟؟

والا احنا بالفعل في إتجاه خصخصة التعليم...واللي معاه فلوس هيتعلم وهيدخل الكلية اللي هو عاوزها....دا بعد إنتشار الجامعات الخاصة ومش مهم بقي انه يحترم النظام او حتي يخاف منه...اصل وقتها هيسود مبدأ (بفلوسي ياكلاب)

واللي مش معاه فلوس يتعلم صانعة عشان يعرف ياكل منها....حتي ولو هو احسن من الراجل اللي معاه فلوس

في إنتظار ردودكم وردود افعالكم وملاحظاتكم في هذا الامر يا شباب ....

الدبوووووووووووووووووووس

والله العظيم الدبوس دا ليا قبل ما يكون لأي حد

عاوزين نبقي ايجابيين يا جماعة....بقالنا كتير بنكتب وبننقد وبنهاجم وبنساند وبنأيد

بس مفيش تغيير...عاوزين نتفق إننا نغير ويبقي لينا فعالية....

مش بتكلم في موضوع معين او حالة بعينها....لا...انا بتكلم علي وجه العموم....ممكن يكون كلامي مبهم

بس الموضوع اللي جاي ممكن يوضح فيه انا عاوز اقول ايه

------------------

الموضوع اللي جاي إن شاء الله هحتفل بيه بعيد ميلاد مدونتي الثاني

وهتكلم فيه عن التدوين بشكل عام ...وعن حجات كتيرة مرت بيا في مجتمع التدوين خلال سنتين

يارب يكون اللي فات حجة لنا لا حجة علينا

استودعكم الله

مشهد

السلام عليكم

أول امبارح يا جماعة وبدون مناسبة كدا نزلت وخرجت...أه والله....نزلت وخرجت....

واحد صاحبي من زمااااان فات عليا وشدني ونزلني معاه بالعافية...

طيب فيها ايه ديه...طب ما الناس الطبيعية كلها بتخرج وتتمشي وتشوف الدنيا....

استنوا بس....انتم بتقولوا الناس الطبيعية....لالالالا مش قصدي...متروحوش لبعيد الله يكرمكم...

انا قصدي يعني الناس اللي ظروفها طبيعية بتخلص شغلها او دراستها وبتلاقي وقت فراغ ترفه فيه عن نفسها...

إنما انا بنزل اجازتي عشان انعم بقدر من النوم والراحة والاكل واستعد لخوض اسبوع جديد من العمل دون إنقطاع....عشان كدا بنزل اجازتي اقفل تلفوني واحبس نفسي واستمتع بنعيم الدنيا من الأكل والنوم ودفئ القدمين تحت غطاء ناعم مع كوب من الشاي الساخن ومع شاطر ومشطور وبينهما طازج...

يا سلام...اهو انا كدا ببقي اسعد واحد في الدنيا ...وهو دا اللي بلف وادور حوليه وواجع دماغكم فيه من الصبح عشان اوصله...السعادة وراحة الباااااااال

اوم ايه بقي لما نزلت (غصب عني) مع احد اصدقائي الاناتيخ ....وقررنا نروح نقعد في مكان علي البحر

كنا حوالي الساعة 10 بالليل الجو كان برد شوية...وخصوصاً علي البحر بقي بيكون ابرد بس ممتع وجميل اوي

واحنا راكنين علي جنب جت عربة كارو حديثة

وحديثة عشان منبعدش عن الموضوع دي ليها حكاية....وهي ان المحافظة قررت سحب عربات الكارو من البلد واستبدال اصاحبها بعربات حديثة الصنع تسحبها دراجة بخارية بدل من الحيوان المشهور اللي طلع عين اهله في جر العربات في الحقب التاريخية الماضية

هي حاجة شبيه بالتوك توك.....بس ليها صندوق ورا لحمل الاغراض

وانا في رأيي المتواضع ان الحكاية ديه وراها سببين

الاول : هو ارتفاع اسعار (الحمير) وتهديدها بالإنقراض بعد انتشار محلات بيع الكفتة والكباب

والثاني : هو صفقة مع رجل الاعمال الجميل خالص احمد عز....لأن استبدال الخشب بالحديد يصب في مصلحة الرجل الفلاذي اللي خرب بيت الناس

ماااااااااا علينا....دي كانت قصة العربات الكارو الجديدة اللي اضافت لمسة حضارية الي بلدي الجميلة

كان فيها ايه بقي الكارو المودرن اللي وجعت دماغكم بيها

كان فيها واحدة ست ومعاها عيلين او تلاتة...مركزتش بصراحة....وكان جوزها وأبو عيالها سايق العربية

عشان نتخيل الموقف كدا ..رب الاسرة حاطط اسرته الصغيرة ورا في الصندوق وسايق بيهم بيفسحهم

بصوا يا جماعة المنطقة ديه كان فيها سيارات من احدث الموديلات....وعمنا دا بكل ثقة دخل ما بين الناس وركن ونزل الاولاد

وضرب ايده في جيبه طلع كام قرطاس لب وترمس ووزعهم علي اسرته الصغيرة

تعالوا يا جماعة شوفوا الفرحة و الرضي اللي في عين الاسرة الصغيرة ....

الطفل الصغير ميعرفش يمثل أبداً....وبرضو ميعرفش يحقد او يطمع....اقل حاجة تفرحه وبيبان عليه

اي نعم الجو كان برد والعيال كانوا كمشانين...ولما يروحوا ويناموا هيصحوا الصبح عاملين حجات مش تمام وامهم هينهد حيلها في الغسيل

بس وقتهم اللي قضوا مع ابوهم وامهم والحب اللي هما فيه بالدنيا كلها

ناس كتيرة اوي تتمني تعيش ولو لحظة سعادة وحب زي الاسرة الصغيرة اللي إمكانيتها محدودة جداً ولا تملك من حياة الرفاهية الا ثمن قرطاس لب وترمس

سبحان الله....عبرة وعظة لناس كتيرة اوي...السعادة والرضي بتتحقق بأبسط الاشياء....علي الرغم من ان الدنيا فيها وسائل كتيرة اوي لإشباع الرغبات من حياة الرفاهية بس برضو البساطة تكسب بجدارة

ناس عندها فلوس لو ولعت فيها النار مش هتخلص....بس حياتهم كلها عبارة عن جحيم

وناس زي الاسرة الجميلة اللي بنتكلم عليها....ممكن يكون عندهم مشاكل ...بس عرفوا يسرقوا وقت جميل مع بعضهم بكل الحب اللي في الدنيا كلها

الدبوس بتاع زمااااااااااان

بلدي وإن جارت عليا عزيزة....أهلي وإن ضنوا عليا كرام

يارب تكون وصلت