Translate

الأحد، 22 أبريل 2007

الرحيل



السلام عليكم ورحمة الله وبركاته

دلوقتي هاخد شنطتي وانزل اسلم نفسي لكلية الضباط الاحتياط في مدينة فايد
مش قادر اوصفلكم انا بكتب السطور ديه وانا حالتي النفسية ايه
اول مرة اشعر بالحالة ديه...مع اني من وانا عندي 18 سنة وانا متغرب عن البيت بسبب الكلية
وإن جاز التعبير فأنا اتمرمط في الغربة ...
بس المرة ديه بقي احساس بالعدم....مش عارف انا رايح فين وهعمل ايه
كل الناس اللي اعرفهم راحوا هناك رجعوا غير ما كنت اعرفهم خالص
معرفش ايه اللي بيحصل....بس اكيد في تغيير بيحصل....اللهم اجعله للأحسن وليس للأسوء

هسيب حياتي كلها وامشي
هسيب اهلي واخواتي
هسيب اوضتي وجهاز الكمبيوتر بتاعي....هسيب مكتبي وكتبي واجندتي
هسيب المسجد اللي بفتح شباك اوضتي عليه
هسيب الاذان والصف الاول ودروس شيخي
هسيب عم يونس الشيخ الكبير اللي كان كل يوم يسألني انت مين عشان نظره ضعيف
هسيب اخواني في المسجد اللي ديما كانوا عونا لي علي طاعة الله
هسيب صحابي وغلاستهم وخناقتهم وهزرهم وخفة دمهم ومقالبهم البايخة

هسيب اجمل منظر بعد صلاة الفجر بساعة وقت شروق الشمس واليوم لسا بيبدأ
المنظر اللي في الصورة ديه



هسيب البحر والقعدة عند مبني الارشاد بعد العصر في صيف او شتاء
في المكان دا



-------------------------------------------------



هسيب مدونتي اللي كأني فاتحها من 25 سنة عدد سنين عمري مع انها مكملتش شهرين

هسيب ناس معرفهاش ولا عمري شفتهم بس اتعلقت بيهم أوي

ويكفي اللي عملوه كلهم عشان واحد ميعرفوش هيسبهم فترة ويرجع

أي حد ممكن يغيب فترة ويرجع وممكن ميرجعش...عادي...محدش بيشغل دماغة....هيتنسي وهيجي غيره

بس أنتم بقي اثبتم غير كدا خالص


مهما قلت مش هقدر اعبر عن شكري لكل الناس اللي كانت في منتهي الجمال

انا عارف ان الموضوع مش كبير أوي ويمكن في ناس اخدها بهزار وأنا أولهم طبعا...بس لما تلاقي اهتمام بالشكل دا من ناس علاقتك بيهم مجرد كلام علي صفحات نت بيبقي احساس جميل اوي.....احساس جميل انك تلاقي حد معاك وبيشاركك افراحك واحزانك ومشاكلك وضحكك وهزارك وبيتاخنق معاك وبيشكر فيك وبيشتم فيك...وزعلان عشان هتغيب عنه ويقولك كلام مسمعتهوش من اقرب الصحاب ليك


احساس جميل لما تلاقي دا كله ممزوج في بعضه
يمكن مش بقالي معاكم غير حوالي شهر
يعني منعرفش بعض المعرفة اللي تخلينا نحكم علي بعض بالجوانب الصحيحة
ممكن أوي إني أطلع أسوء بكتير جداً مما تتخيلوا....ليه لا؟؟
وممكن كمان ناس فيكم أنا كنت بنتقص من قدرهم يطلعوا أحسن مني الف مرة
مش موضوع اتكتب في مدونة يقدر يعكس شخصية بني آدم....
بس برغم كل دا انا اتعلقت بيكم وحبيت تواجدي معاكم
حتي علي الرغم من الخلفات اللي كانت بتحصل بينا
ممكن أكون ضايقت ناس فيكم كتير أوي....وكلامي زعلهم ...بس ربنا اللي يعلم إني كنت بكتب عشان أواجه حاجة معينة أو أقف أدام حاجة غلط....
بس أكيد الناس اللي عارضوني مش أعدائي.....أي مسلم علي وجه الارض أنا بحبه في الله...ولو كرهت في حاجة هبقي بكره معصيته أو الغلط اللي بيعمله


وأنا نفس النظام مش عاوز حد فيكم يكره فيا غير الغلط....


كل مدونة دخلتها كتبت فيها كلمة بقت زي بيتي...وصاحبها أخويا أو أختي
عارفين لما كنت بلاقي حد فيهم زعلان أنا كمان كنت بزعل...ببقي عاوز أضحكه وأخفف عنه ...وكنت بتضايق جدا لما الاقي فيها موضوع مزعلني او حاجة انا مبحبهاش...كأنها مدونتي ...ممكن متصدقوش الكلام دا
بس اللي عاوز يعرفني صح يقرأ هذه الابيات من الشعر للشاعر القروي
بحبها أوي وبحاول أكونها في كل وقت وكل مكان


اذا أنتكث الحــبال فحبل ودي *** شديد الفتل يجتذب القلوبا
أعدت به المراس الصعب سهلا *** وصيرت البعيد به قريبا
ولي إن هاجت الأحقاد قلــب *** كقلب الطفل يغتفر الذنوبا

أود الخير للدنيا جمـيـــعا *** وإن إك بين أهليها غريبا


إذا ما نعمة وافت لغيري *** شكرت كأن لي فيها نصيبا

تفــيض جوانحي بالحب حتى *** اظن الناس كلهم الحبيبا

الكلام دا بقوله لكل اخواني واخواتي المدونين
مش هزكر اسامي عشان ماشاء الله خلال فترة صغيرة جدا كسبت ناس كتيرة جدا وجميلة جدا
ممكن مكنش اعرف حتي اساميهم ايه
بس أعرف أقلامهم شكلها ايه ولونها ايه
في ناس منهم أخدت عليهم وكأني اعرفهم من زمان...وناس كنت بحب أوي اتكلم معاهم وارغي كتير في الرد عليهم...وناس كنت بضحك من تعليقاتهم أوي...حتي ولو كانوا بيهاجموني
حجات كتيرة وأمثلة كتيرة اوي







يا تري لما أرجع تاني واكتب هتفتكروني؟؟؟


يا تري حد هيدخل المدونة وانا مش موجود ...والا هتسيبوا قفلها يصدي


عموما انا حاسس اني بودعكم زي ما بودع امي وابويا واخواتي اللي الدموع في عنيهم


.
.
.
.
.


بس من الفرحة عشان هيرتاحوا مني ومن الدوشة اللي بعملها...اصلي كثير الهزار والدعابة


سبحان الله مش عارف ابقي جد خالص حتي في النكد والزعل....لازم اهزر




انا هنزل بقي عشان اتاخرت والناس اللي رايح معاهم منتظرين ومش عاوز اعكنن عليهم




استودعكم الله

احبكم في الله

هناك 115 تعليقًا:

gohayna يقول...

طبعا انا بكتب الكلام دا وانت مش موجود

بس بجد ومن غبر هزار انا مش عارفه انا بعيط ليه دلوقتي

غصب عني دموعي نزلت وانا بقرء الكلام دا

حلرام عليك والله يا محمد

صحيح انا معرفكش ولا عمري شوفتك بس اتعلقت بيك وبكلامك ومدونتك
وهزارك وكل حاجه

شفت فيك صوره للاخ الي بفتقده في حياتي

والصديق الي اتكلم معاه وانا مش خايفه منه

شفت فيك خفه دم مش مبتزله

وعقلانيه رجل عنده اكتر من 25 سنه

شفت فيك انسان غيور علي دينه وبيتكلم من قلبه

شفت فيك قوه راي وصلابه وقدره علي الاقناع من غير ما تجرح حد

بجد انت اكتر من انسان

وبجد انا مش عارفه ابطل عياط

ومش عارفه السبب ايه

انا هقوم اصلي الظهر وادعيلك ربنا يرجعك بالسلامه

واكيد هتلاقيني عندك كل يوم في المدونه

هكتب ومش مهم حد يرد عليا

المهم اني احس اني موجوده ولو لثواني في عالمك
في حاجه انت بتمتلكها

تروح وترجع بالف سلامه يا اخي العزيز جدا علي قلبي

سلام مؤقتا

Bossy يقول...

تروح وترجع لاهلك ولمدونتك ولينا بالف سلامة
وقدر الله وما شاء فعل
دلوقتي جا علي بالي كلام لسيدنا عمر بن الخطاب رضي الله عنه حين قال
ما من بلاء يصيبني الا اري فيه اربع نعم
النعمة الاولي : ان البلاء في دنياي ولم يقع في ديني
النعمة الثانية : ان البلاء لم يقع اكبر مما وقع
النعمة الثالثة : ان الله عزو جل صبرني عليه فاحتملته
النعمة الرابعة : ان الله سبحانه وتعالي ادخر لي ثواب الصبر عليه
ان شاء الله هتصبر علي الجيش وان شاء الله ربنا هيجزيك خير
اوعي تنسانا اما ترجع ان شاء الله بالسلامه
استودعك الله

عالمى ازرق يقول...

السلام عليكم ورحمه الله وبركاته
بيكون صعب احساسك وانت بتفارق كل حاجه حبيتها خاصه وانت رايح لمكان مش عارف هيكون ايه
بس ان شاء الله يكون خير وربنا ييسرهولك
ويمكن فعلا الشهرين وقت قليل بس اكتسبنا فيهم عقليه لها جوانبها المشرقه مثلك
وبعدين انت فاكر المدونه دى بتاعتك لوحدك دى خلاص بقيت ملكيه مشتركه وهتدخل فى ميراث كل واحد فينا
كلماتك بيملأها التاثر قوى
و لا نملك جميعا الا ان ندعو لك اللهم يسر لك امرك واعانك الله عما انت فيه وربنا يرجعك بالسلامه افضل مماكنت بأذن الله

Nothing To Lose يقول...

بص بئا الله يسامحك بجد
انا عماله اقرا الكلام واعيط كأن اخويا هو الى مسافر فعلا
اخويا شقيقى
انت والله اخويا اوى ربنا يعلم
ربنا يرجعك لينا بالسلامه
وان شاء الله والله هدعيلك كل يوم

حرام عليك والله انا عماله اعيط
متغيبش عليــــــــــنا
حفتقد بوستاتك اوى والله
ربنا يحمـــــيك يارب
ويكفيك كل شر من اى حد
ومتنسناش :(

Dr.khaled يقول...

إنا لله وانا اليه راجعون
يا اخي في الحقيقة المقال بتاعك ده
مع اغنية بو خاطر...مبحر
عاملين شغل
ان شاء الله
تعود بالسلامة
وانا زعلان جدا انهم اخدوك ضابط احتياط
يللا ربنا يعديها لك على خير
ووالله حزنت لك يا اخي
لكن يللا..
الجيش للذئاب
اقصد للرجال

بعد اذنك عشان انزل اجيب 100 قلة :)

سبحان الله
طب انت عارف انك راجع
انما الصحابة لما خرجوا من مكة
كانوا رايحين مكان ميعرفوهوش وكمان ميعرفوش هيرجعوا تاني ولا لا..وميعرفوش هيموتوا في الطريق ولا هيعيشوا

الصحابة دول تعبوا جدا جدا
لعنة الله على من سبهم
لعنة الله على الجريدة اللي سبت ابي هريرة
لعنة الله عليهم
نسأل الله ان لم يرد لهم هداية...ان يسود وجوههم يوم تبيض وجوه وتسود وجوه
يللا ما علينا
تروح وترجع بالسلامة يا استاذ
وغفر الله ذنبك

حوريه يقول...

ليه بس الكلام اللى يزعل ده ؟
يارب ترجع بالسلامه ان شاء الله
و تكون بخير و احسن من الاول
رغم انى لم ارك الا انى اعتبرك اخى بجد و سافتقدك كثيرا
و الى اللقاء
ناديه

sara يقول...

اخي الراقص

بجد بجد وجعتلي قلبي بالكلمتين دول اللي اكيد خارجين من قلبك لأنهم دخلو قلبي علي طول

كان نفسي اكون في حفلة الوداع اللي صورصارة عملتها ..بس للأسف مقدرتش
تروح وترجع لنا بألف سلامه ..وبجد بجد هاتوحشنا جدا ..وفي حفظ الله

gohayna يقول...

طبع زمانك دلوقتي بتقول انا ايه الي جابني هنا

وعايز اروح

اجمد امال

السجن للرجاله


قصدي الجيش للرجاله

يارب تكون اتوفقت في اول يوم وتكون مرتاح

عارفه ان مفيش راحه بعيد عن بيتك واهلك وغرفتك وسريرك بس هنعمل ايه؟

مش كنت طلعت بنت كان هيبقي احسن

مكنتش هتروح الجيش


المهم الي بكتبه دا هسميه

يوميات جهينه في غياب الرقص مع الذئاب

انت سبت المدونه ووصتني علها

العب بقي اكتب انا حره

ومتخفش مش هبوظ حاجه

يارب تكون مرتاح ونمت كمان

معادنا بكره في اليوميات

تصبح علي خير

همسات دافئه يقول...

تصدق انت متستاهلش ولا كلمه عشان الى عملته فيه ده بأه انا اجى اطل عليك تعمل فيي كده؟؟؟
ياريت بايدى اشد منك الشنطه واقوم احبسك فى القوضه واقفل عليك
رغم انى بصراحه أفشت منك اكتر من مره بس بأيت باستنى كل حاجه بتكتبها
محمد هافتقدك بجد أستودعك الله الذى لا تضيع ودائعه

gohayna يقول...

اليوم التاني

يارب تكون كويس
وتكون اكلت عدل

الاهما بيأكلوكو ايه هناك

انا اخر حاجه سمعتها العدس اجباري

هنعرف لما ترجع



تلاقيك دلوقتي يا عني نايم زي الكتاكيت من بعد العشا

تستاهل علشان تعرف النعمه الي كنت فيها

انا اهه جيت اسقي الورد

وهانك فضلك 45 يوم الا يوم

هجي اشقر علي المدونه بكره

سلام

خمسة فضفضة يقول...

السلام عليكم ورحمة الله وبركاته

ايه دا يا محمد

والله يابني الدمعه كانت هاتفر من عيني ،
كده حرام عليك اللي انت عملته فيناده ،وكمان اغنيه حزينه وجو كآبه
انا جايه اقرأ الفلطعيس الاقي الموضوع ده كده في وشي

اخويا ما لوش جيش وما عشتش احساس ان واحد يفارقنا كده ويروح الجيش بس انت عيشتهوني ، ربنا يصبر مامتك لحد ما ترجع لها بالسلامه ان شاء الله


ما تقلقش ان شاء الله هاتروح وتيجي بالسلامه و ترجع تلاقثنا كلنا في انتظارك
وماتخفش علي القفل انا هاعدي كل يوم ازيته علشان مايصديش ..هههه

والله هاتوحشنا مواضيعك اللي زي العسل
ربنا يرجعك قريب بالف سلامه ،


اوعي تكون نسيت الصن بلوك ....ههههه

سلام

yamen يقول...

يه ياعم ده هاعيط والله العظيم

اكتر حاجة مابحبهاش هي لحظة الفراق دي ويمكن دي اللحظة الوحيدة اللي باعيط فيها في حياتي

عمري ماعيطت الا وانا بافارق ناس باحبهم

انا عارف انك مش هاتقرا الكلام ده الا بعد فترة الله اعلم بيها

لكن بجد تروح وترجع بالسلامة ان شاء الله

وماتقلقش علي المدونة

احنا هانبقي نفتحها كل كام يوم وننضفهالك وننفض التراب اللي عليها

ترجع بالسلامة يا ايها الراقص مع الذئاب

و اللي متهيالي مش هايبقي مجرد اسم وانت في الجيش

مستنيينك..بس يارب لما ترجع تلاقينا احنا زي مااحنا

الله اعلم باللي جاي

gohayna يقول...

اليوم التالت يا سيدي


طبعا تلاقيك هتفرقع من الغيظ

اكيد الله يكون في عونك


المهم انهارده متش الاهلي مع برشلونه

ويمكن يخلوك تتفرج عله في الجيش

يعني خمسه تفاريح

طبعا انت من فريق الدراويش

ميهمكش

يارب تعرف تتفرج

ومعلش شجعم لغايه ما يكسبوا

يارب تكون بخير

تحياتي

محض روح يقول...

ربنا يجيبك بالسلامه
وهترجع احسن
ان شاء الله

رغم اني معرفش حتى اسمك ايه
بس انته انسان تستاهل كل خير وده الى
حسيته من الي بتكتبه

ربنا معاك
ونشوفك على خير

khaled يقول...

اكيد هانفتكرك لما ترجع و ان شاء الله ترجع فى اجازات الخميس و الجمعة
بالسلامة ان شا الله

tearwhispers يقول...

اكيد وقت كتبابتى للكلام ده انت بقالك حوالى 3 ايام فى الجيش
اتمنى تكون بخير
ترجع لاهلك و لمدونتك و لينا بالف سلامة
اصعب حاجة فعلا احساس الغربة
انت بتقول انه اسوأكمان من سفرك للكلية يعنى حاجة فظيعة
انا ببقى هموت و انا سايبه البيت و مسافرة للكلية
ربنا بجد يكون فى عونك
اول متنزل اجازة ابقى طمنا عليك
و متخافش على المدونة مش هنسيب قفلها يصدى هنطمن عليها دايما

همسات دافئه يقول...

احم احم
وبعدين....هاعد أخبط كتير كده ومحدش هايفتح برده؟
طيب انا هامشى ...انا ماشيه... انا
مشيت خلاص
بس لعلمك بأه المره الى جايه هاجيب معايا البوليس وهاكسر القفل وهاقتحم المدونه وألخبطلك البوستات وأبعتر اللينكات وهاخلى كل كلمه فى المدونه أد كده
وكمان مبتجيش بالتهديد ماشى أما أشوفك بس

gohayna يقول...

اليوم الرابع

علشان تعرف انا بيطمر فيا العيش والمانجو

انا صحيح حاطه عيني علي مزرعه المانجو الي عندوكو

بس دا ميمنعش اني بدخل علشان ليك واحشه والله

المدونه من غيرك مضلمه

اكيد عرفت فضيحه الاهلي امبارح

اربع اجوان نظيفه مقابل لاشي

يلا عارفاك انت ملكش غير في الدراويش

اجدع والله
يلا اشوفك بكره ان شاء الله وهانت اجمد امال

سلام

šσяšαяαα يقول...

السلام عليكم
ايه دا بقى اللى عملته فينا دا
انا داخله اقللك حرام عليك العياط اللى عماله اعيطه دا..نظرى هايخس اكتر ماهو خاسس
وادخل الاقى كل البشر معيطين برضو

انا كنت ناوية اتخانق عشان شكلك كدا كنت بتدعى من قلبك ربنا يشمت فينا الاعادى..اكيد عاجبك دلوقت الاربعه اللى رنوا فى الشبكه

واللا كمان كنت نارد ندر لو اتغلبنا تفرق على زمايلك فى الجيش مانجه

طيب يامحمد لما ترجع بس انا دلوقت بعيط ومش فايقالك لما ترجع هتخانق بروقان

gohayna يقول...

اليوم الخامس علي التوالي
وبنجاح منقطع النظير

خلاص فاضلك يا سيدي 40 يوم بالتمام والكمال
يعني فات 5 ايام

هانت يا معلم

اهي ايام وهتعدي

انا يا سيدي كدا فاضلي اسبوعين وامشي من مصر خالص

وبجد انا بدات ادايق

ربنا معاك ومعانا

سلام يا محمد

بيتنا القديم يقول...

هتوحشنا يا مان

سلملنا علي عبود

لو كنت علي الحدود

تحياتي

ويجعلوعاااااااااااااااااااااااااامر

عالمى ازرق يقول...

مساج الخير
انا سقيت الزرع وفتحت الشبابيك
بس كسرتلك كوبايه بقي معلش
جهينه
تسافرى وترجعى بالسلامه ان شاء الله

gohayna يقول...

اليوم السادس يا محمد


مش عرفه اقولك ايه

بس انا لما بزهق واحب اكلم روحي باجي هنا

البيت عاملين مناحه علشان مسافره

والعيال اصحابي ضغطين عليا علشان اقعد

بس بيني وبينك انا مبسوطه

علشان مكنتش عارفه قد ايه هما بيحبوني

والله العيال طلعو بيحبوني

المهم

انت يارب تبقي بخير وبصحه
وتأقلمت مع الواضع

انا عارفه انك هتسد في اي مكان هتروحه

ربنا معاك يا سيدي

سلام

The Manager يقول...

تروح وتيجى بالسلامة

انا طبعا معرفكش كويس قوى زى بقية الناس

لكن واضح انك شخصية ممتازة

الجيش بيصنع الرجال

ياريت الشعب المصرى كله يدخله يا عم

إن شاء الله يكون التغيير للأحسن والأفضل

ونسمع عنك كل خير

-_- يقول...

ربنا معاك يا اخي

اجمد

ده انت راقص مع الذئاب

gohayna يقول...

اليوم السابع

بقالك دلوقتي سبع ايام

يعني بطل بصحيح

سمعاك عمال تزعق وتقول خرجوني من هنا

بس انا قولتلهم بكره يتعود

انت عارف متقدرش تخالف قوانين السجن

قصدي الجيش


وسمعت انهم هيأكلوكو
بكره لحمه

ابسط يا عم علشان تعرف ليك ناس جامده في البلد

انا موصيه عليك

وربنا يسترها معاك ان شاء الله

بجد والله ليك وحشه

سلام

همسات دافئه يقول...

انا جيت من غير ما اجيب البوليس ولا حاجه يالا عملت برده بأصلى :)
المهم أكلتلك الذئاب الضغنتوته الى انت مربيهم فى البلكونه وسبحان الله نفسهم كانت مفتوحه ولا كان مقصر فيهم حاجه اطمن كله تمام:)

Bossy يقول...

السلام عليكم
طبعا المدونة مش موجوده بس بجد يا بختك والله ربنا كرمك باخوات زي العسل بسالوا عليك علطول والمونه نضيفه زي الفل المكان مش ناقصه حاجه غير طبعا وجودك ارجع لاني حاسه ان في يوم هدخل الاقي الذئاب هجمت علينا بيتهم بقي واحنا اللي وافدين
بس بجد اللي ميعرفش يعني ايه اخوه وصداقه حقيقه وميعرفش يعني ايه وفاء يدخل هنا
ربنا يوفقك في المكان اللي انت فيه وان شاء الله ترجع بالسلامه
سلالالالالالالالالالالام

Nothing To Lose يقول...

السلام عليكم
عااااااااااااااااااااا
انا كل ماجى ادخل اكتئب واخرج
لازم يعنى الانشاد دا
عاااااااااااااااااااااااااا

يارب تكون بخـــــــــير

انا والله والله بدخل يوم بس مش برضى اكتب بقرأ المدونه وامشى

دا لو قدرت اقعد
بجد سيبت فراغ يامحمد
مستنيييييييييييييناك

يارب بئا تنزل اجازةوطل علينا

tearwhispers يقول...

بجد المدونة مضلمة من غيرك
على الرغم من اننا منعرفش بعض تقريبا بس بجد ليك وحشة
انا مش عارفه هما بيدوا اجازات بعد قد ايه فى الجيش بس يا رب تاخد اجازة بقى
و عموما ربنا معاك و اتمنى ان الجيش ميكونش وحش قوى مع انى اشك فى ده
ترجع لمدونتك بالسلامة يا رب

محض روح يقول...

ألت اجي اسلم عليك
يارب تكون بخير
:)

gohayna يقول...

اليوم التامن


النهارده انا عملت حاجه هدخل بيها التاريخ

قدمت استقالتي من الوزاره


رميتهالهوم في وشهم

صحيح مرمتهاش اوي يعني

بس قدمتها خلاص

وخلصت منهم

والحمد لله انا مبسوطه دلوقتي علشان مش شغاله عند الحكومه

انا حره


عقبالك لما تبقي انت كمان حر يا محمد


سلام يا سيدي

gohayna يقول...

اليوم التاسع

معلش انا فعلا مقدرتش ادخل امبارح

كانوا مطلعين عيني في الوزاره علشان الاستقاله

عارف لما يكون اتنين موظفين تعباني في ايدهم كل حاجه وبيعاندوا في بعض
وانت تكون ضايع في النص بينهم؟

عارف تبقي نفسك تعمل ايه فيهم

عارف لما تتمالك اعصابك وتضحك في وشهم علشان يخلصوك وانت من جواك بتغلي؟

عارف ايه الي بيحصل


؟؟؟
الانفجار

ودا الي هيحصل لو رحت الخميس وملقتش ورقي خلص

تقريبا هتشوف الي هيحصل في نشره تسعه

ربنا يستر يا اخي العزيز

وبعدين انت بقالك كتير اوي كدا

انت مش ناوي ترجع بقي ولا ايه؟

سلام

gohayna يقول...

اليوم العاشر

طبعا انا كتبت بوست جديد
وكان نفسي تكون موجود علشان تعلق

بس مش مهم لما ترجع هستني تعليقك

سلام

Nothing To Lose يقول...

السلام عليكم
ازيك يا محمد
ايه اخبارك واخبار الجيش
والطوابير الصبح
ربنا يعدى الايام دى على خير
انا قلت بس اسلم عليك
ياله بئا يابنى
مش كفايه كدا شد حيلك
احنا مستنينك
على فكرة انا سيبتلك تاج لحد ما تيجى :D :D

šσяšαяαα يقول...

السلاااااام عليكم
كيف الحال دلوقت يابطل؟؟

انا طلع عينى اليومين اللى فاتو.. كنت بستعد بقى لحفلة التقاعد.. قصدى التخرج.. كان يوم بصراحه

انا كتبتله بوست مخصوص.. ماهو مش لازم يعنى اكتم فرستى واسكت


ياللا بقى تعالى وصدع دماغك بالرغى بتاعى:)))

محمد العدوي يقول...

يا عم أنا اللي أول مرة اجي هنا كنت هعيط .

هسيب وهسيب وهسيب .
هو كله ضرب مفيش شتيمة ..


ترجع لكل دا بالسلامة . أمال لو رايح الحرب كنت هتعمل ايه ..

غير معرف يقول...

السلام عليكم

ترجع بالسلامة
إن شاء الله

وكلها ايام وبتنقضى
بس حاول تعيشها عادى
كده كده انت فيها
يبقى خليك عادى وإيزى يا عزيزى

ومتخافش مش حننسي مدونتك

ترجع بالسلامة إن شاء الله

سلاماتى

gohayna يقول...

اليوم الحادي عشر


الي هو كان امبارح

معلش والله علشان الروتر بتاعي كان بايظ

معرفتش ادخل

هكتبلك دلو قتي في اليوم بتاع النهارده ايه الي حصل

استني

gohayna يقول...

اليوم الثاني عشر

النهارده يا محمد بجد الي ليه قلب كان يتفرج عليا ويضحك وانا في الكشف الطبي

مصيبه والله

كان عندي معاد في مستشفي دمشق التخصصي علشان فحوصات السفر

وفعلا رحت في المعاد الساعه 9
واتبسط جدا لما لقيت نفسي اول واحد دلخله المستشفي ومفيش غير 5 موجودين بعدي

قالولو اطلعي بالاسنسير الدور الخامس

وطلعت يامعلم

زيارتني ما طلعت

مصر كلها موجوده في الدور الخامس

وكلهم رجاله

عرف انت لما تبقي راجل وتدخل بالغلط حمام الحريم

بتحس بأيه

وهما بتشوف بيبصولك ازاي

انا حسيت بكدا بجد والله
كأني دخلت الجيش بالغلط

تقريبا مكنش فيه انثي تانيه غيري انا ودكتوره التحاليل

والداده ام عبده

وحمدت ربنا بيني وبينك علي وجودهم

بس ايه دا وبيقولوا ازمه رجاله والستات اكتر
يجو يشوفوا المستشفي والعدد الرهيب دا

بجد انا لسه مخضوضه لغايه دلوقتي

بس الميزه اني خلصت اول واحده

علشان كنت بستهبل واطلع علي اول الطابور

مش ست بقي

وسمعت تعليقات للركب والله

وحمدت ربنا اني خلصت وروحت سليمه الحمد لله

ودي كانت يومياتي في معسكر الرجال

تحياتي ليك يا محمد

Esmeralda يقول...

اول زيارة لمدونتك
ربنا معاك و يوفقك بجد

meroooo يقول...

تروح وترجع بالسلامه وبعدين اول اجازه ليك تيجي وتقولنا ايه اخر الاخبار وايه اللي حصل واللي بتشوفه
وان شاء الله ترجعلنا بالسلامه يامحمد

gohayna يقول...

اليوم الثالث عشر


دايما الناس بتتشائم من رقم 13

مع اني بشوفه رقم عادي جدا

يمكن انت من موقعك
تشوف انك بقالك اسبوعين في الجيش وعايز تسرخ وتقول الحقوني

ويمكن اتعودت وبقيت مبسوط

الله يخرب بيت الجيش ياعم الي خدك عنده

اشوفك بكره

سلام

محض روح يقول...

معلش يافندم
في حاجه غريبه لحظتها بقيت بدخل كل ويوم ابص على المدونه
وشوف جهينه كتبه ايه
هههههههههه
مشاء الله عليكي شغلتيها زي مايكون صحبها هنا واحسن كمان
انتي طيوبه اوي
ودمك خفيف جدا

وبخصوصك يافندم
ربنا يفك اسراك
هانت ربنا معاك
تحياتي

gohayna يقول...

اليوم الرابع عشر

اولا ربنا يخليكي يا محض الروح

بجد انتي انسانه رائعه واخلاقك عاليه

ومبسوطه اني اعرفك بجد

وبجد انا بعمل كدا علشان محدش ينسي المدونه لغايه ما صحبها يرجع ويستلم العهده بقي لحسن تعبت من تروقها كل يوم

تسلميلي يا قمر


نرجع لمحمد


النهارده السبت يا معلم وكان معادي في المعامل المركزيه علشان تحليل السفر


والي ميعرفش هيا فين الماعمل دي
ربنا يبعدك عنها ورا وزاره الصحه

وما ادراك ما وراء وزاره الصحه


مصيبه والله

الطابور من اخر حته في المبني وممتد لغايه شارعين اتنين

ومصر كلها مزنوقه في الشارعين دول

والله انا خايفه علي البلد دي قربت تفضي خالص

الناس كلهم مسافرين رجاله وعمال وبنات
شكله حسني خربها وقعد علي تلها

وطبعا اتخضيت للمره التانيه
بس المره دي كان ابويا معايا وربنا يباركله يارب اتصرف
وبالواسطه مخدتش عشر دقائق


صحيح الوسطه انا مش بحبها وبحس انها ظلم للناس

بس الي كان موجود او راح وشاف المنظر قبل كدا
هيعرف ان الواسطه سعات بتكون رحمه

والحمد لله
صفوني واخدوا مني حقنه مليانه والله وكنت هموت بعدها

بس الحلو بقي اني استعبط في البيت وعملت تعبانه بعد التحليل علشان اهرب من الموعين الي كانت في انتظاري في المطبخ

وعدي اليوم علي خير الحمد لله

وبجد هقترح يغيروا اسم المكان

بدل المعامل المركزيه

نسميها المطاحن المركزيه

او المعاجن المركزيه

ربنا يهدهم

يارب تكون بخير يا محمد وسعيده في الجيش

سمعاك بتقول مجنونه دي؟

حد يبقي سعيد في الجيش

خلاص يا سيدي متزعقش كدا

نام بقي

تصبح علي خير

tearwhispers يقول...

سلام عليكم
اذيك يا محمد
انا قلت ادخل اطمن
بصراحة جهينة عامله الواجب و زيادة كل يوم بتدخل شغاله ترويق و تنضيف و هيصه
متخافش سايب وراك رجاله
اتمنى تكون بخير و ميكونش الجيش وحش قوى
ربنا معاك

gohayna يقول...

اليوم الخامس عشر


مش عارفه اقول ايه

الكلام تايه من دماغي

النهارده يا محمد كنت بسلم علي صحابي

وبجد مش عارفه اوصفلك حسيت بايه

صحيح كنت جامده
بس من جوايا كنت حسه ان قلبي بيتقطع

مش سهل انك تعمل صدقات مع ناس تستاهل صدقتك بجد

والاصعب منه

انك تحس انك هتسبهم وتبعد عنهم

بجد انا تعبانه ومليش نفس لاي حاجه

حتي مدونتي بعلق فيها بالعافيه

كويس انك مش موجودك علشان متتدايقش من كلامي

يارب تكون بالف خير يا محمد

وترجع بالسلامه

Nothing To Lose يقول...

السلام عليكم
ازيك ياحضرة الظبوطه :D:D:D
ياترى يا هل ترى ايه الاخباااااااااار
والله سيبت فراغ
مش ناوى بئا ترجع
شكلك استحليت القعدة هناك:(((

ياله على العموم فات الكتير مبقاش الا القليــــــــل
بقالك اهوا 18 يوم
هانت كلها 27 يوم وتيجى

اوعى ما تدخلش تطمنا
ياله اسيبك على خيــــــــر

سلامو عليكم:D

BinO يقول...

لعله خير ان شاء الله أخي في الله
وربنا يهونهم عليك
المشكلة اني اكتشف انك أسمعلاوي لما تمشي

šσяšαяαα يقول...

السلام عليكم ورحمة الله

ازيييييككككك يامحماااااااااااد

ايه يابنى انت عجبتك القعده هناك واللا ايييييه؟؟؟؟
انا قلت اكيد يومين وهيفتكس خطة للهروب الكبير:)))

خيبت املى فيك...اهىء اهىء

طييييييييب امشى انا بقى

مع السلامو عليكو

šσяšαяαα يقول...

دى بقى لجهينة العسوله

ربنا يخلليكى للشعب على مجهوداتك العظيمه دى.. كدا بدخل الاقى المدونة منورة ومتهوية اخر تمام

كنت خايفه اتكعبل فى بوست واللا حاجه لما ادخل المدونة
الله ينور عليكى بصراحه:)))

واوعى تزعلى ابدا معلش هى الدنيا كدا نتقابل علشان نفترق:(

وولايهمك كلنا معاكى قلبا وقالبا:))

تحياتى ليكى

gohayna يقول...

اليوم السادس عشر

يا محمد والله فيه ناس كتير بيحبوك
وحاسبين زي تمام الايام من يوم ما مشيت

علشان تعرف بس ياسيدي

وكلهم ناس بجد محترمه وتدل علي ان لسه الدنيا بخير

ولسه فيه ناس كويسه

والله الواحد ميفقدش الامل ابدا

ياصرصوره
والله انتي اساسا بنت حلال واخلاق والله

واكيد طول ما انتم موجودين الدنيا هتفضل بخير بجد
علشان انتم مثال للصداقه المنزه عن اي اغراض والله

ربنا يخليكوم كلكم


يامحمد اعمل خطه هلروب زي ما صورصوره بتقول

امال بس الراقص مع الذئاب
وخلف التلال

وكلام كبير

امال زنقينك في الجيش كل دا ليه

ربنا معاك يارب

سلام

همسات دافئه يقول...

ما أنا مش هافضل كل شويه أدخل ألعب فى المدونه لحد ما أزهق وأمشى وانا ساكته يارب يامحمد تكون بخير وكله تمام يالا فات الكتير وما باقى غير ال ..... كتير برده:(
معلش كله بيعدى
سلام يا غالى:))

ihapoof يقول...

إزيك يا محمد

ربنا يهوّنها عليك يا أبنى ويصبرك على الكام يوم دول
معلش .. بكره هتتعود

الحمد لله على كل شئ

أنا (130) إحمم (;

عالمى ازرق يقول...

السلام عليكم

ايه الاخبار؟؟
الامن مستتب اكيد وكل شيء تمام
وبتاكل فراخ ولحمه كل يوم
والصول النوبتشي بيطمن عليكوا انكوا بخير قبل ماتناموا
يابختك ياعم بقي فى الجيش

الفاصل اللى فات ده كان عن وضع الراقص مع الذئاب اللى فى الجيش بتاع المدينه الفاضله
ياترى الوضع عندكوا فى كوكب الارض ايه؟

gohayna يقول...

اليوم السابع عشر

الي هو كان امبارح

والله ماقدرت ادخل يا محمد
كنت بجيب التأشيره من بق السفاره


عارف انت لو مفيش واسطه

كان زماني هستني تلات اسابيع

ربنا يخلي الكوسه يارب بس مش في كل حاجه

هجيلك دلوقتي تاني

gohayna يقول...

اليوم التامن عشر

هانت يا معلم خلاص فات الكتير مبقاش غير الكتير

قصدي القليل

ربنا معاك

انا خلاص بحضر شنتطي ومسافره يوم الجمعه

وبجد انا نفسيتي تعبانه وبدأت افقد شجاعتي

انا خايفه علي اخر يوم انهار

ربنا يستر

تصبح علي خير

رينـــــــــــا يقول...

الووووووووووووو
الوووووووووووووو
الوووووووووووووووو

عايزين فايد مدتين لو سمحت
ايوة ايوة
الظابط محمد

ايه نايم
مبيحضرش التدريب
كمان مضرب عن الطعام
ايه محبوس كان عايز يهرب يروح يزور المدونه بتاعته
اوبس لحقتوه ومسكتوه
منكم لله روحوا
كنتوا سيبتواه
عااااااااااااااااااااااااا

دى كانت تكلمه لرغبه صورصارة فى الهروب:P
ازيك :D
انا جيت بس اسلم يا فندم واقولك ان شاء الله هااااااااااانت
خد بالك من نفسك
سلام

رينـــــــــــا يقول...

السلاموووو عليكم
بما ان طبعا اكيد جهينه مشغوله
فا انا قلت اجى كدا اكتب بوست انهاردة:D
بتاع كل يوم بتاعها

ها عامل ايه طمنى
يارب تكون بخييييييييييير

اخبار الظبابيط ايه والطوابير
يارب تعدى على خير
والله يابنى الله يكون فى عونك
بس اكيد ان شاء الله زمانك اتعودت

ياله خيـــــــــر
ربنا معاك
اه على فكرة انت اكيد بتقول انا مين
انا حد تعرفه بس لما ترجع بئا
ياله سلام

gohayna يقول...

اليوم التاسع عشر

والاخير في مصر

صدقني لو قلتلك اني مش شايفه الحروف من كتر ما دموعي بتنزل

مخنوقه خنقه ما يعلم بيها الاربنا

ونفسي بكره دا يعدي علي خير واخلص من لحظات الوداع الرهيبه دي

انا حسه ان قلبي بيقف ونفسي بيضيق بالبطيء

حاسه كأني بتخنق
والله هموت

انا حتي مش عارفه ارد علي الناس الي بتعلقلي
جيت هنا اتكلم براحتي من غير ما اخاف من ان حد يشوف دموعي او يقولي معلش

بكره الكلمه دي
وبكره الي خلاني ابعد عن هنا
وبكره كل شيء وحش عكنن عليا حياتي وحرمني من لحظات كان ممكن اعيشها هنا وسط اهلي
بكره الكوسه والمحسوبيه الي اهدرتلي حقي وخلت معنديش مكان هنا في مصر
بكره كل شيء يا محمد باعدني عن اهلي

وبكره الغربه الي واخده ابويا ومعاه انا

تصدق انا نفسي في ايه دلوقتي

نفسي اتلم انا وهما في مكان واحد من غير عقد ومن غير ارف
من غير مشاكل

نعيش زي اي اسره عايشه مع بعضها
بجد احساس قاتل الفرقه دي

انا بكره يمكن معرفش ادخل علشان هكون في بلد تانيه

بس يوم السبت اكيد هدخل
لو كنت موجود كنت هونت عليا كتير يا محمد
بجد محتاجه كلامك دلوقتي

سلام علشان مش قادره خلاص

محض روح يقول...

تعرفي ياجهينه انا اتخنقت من كتر العياط عندك رغم اني معرفكيش
بس احترمت بجد كل حاجه فيكي
انتي تستهلي كل خير

ربنا معاكي
وانتي مش عارفه الخير فين
خلي بالك تاني من نفسك

رينـــــــــــا يقول...

السلاموووووو عليكم
جهينه سافرت :(
وانت كنت مسافر :(
طيب ليه كدا
يعنى الناس اللى نحبهم الغربه تاخدهم مننا
واللى مش طايقنهم قاعدين على قلوبنا :(
الحمد لله على كل شىء
ربنا يرجعكم بالسلامه انتوا الاتنين

فات دلواقتى 22 يوم بالتمام والكمال
يعنى نص المدة
باقى النص التانى
مستنينك:)

همسات دافئه يقول...

ذئبى الغائب
أنا قلت أسلم عليك قبل ما ابتدى مرحله الإعتكاف عشان الإمتحانات يارب تعدى على خير ولما أخلص ألاقيك جيت وبترود علينا بدل ما احنا عمالين نكلم نفسنا كده
سلام:)

رينـــــــــــا يقول...

السلاموووووووو عليكم
ازيك يافندم
اخبارك واهراماتك
اوعى تكون حولت وبقيت تبع الحكومه:P

على فكرة انا زعلانه منك
الانشاد اللى انت حطه دا
انا اول مرة احس بيه كدا
او افهمه بالمعنى دا
وزعلانه منك بئا لانى كل ما ادخل والله يخلى عينى تدمع

بقولك ايه ما تاخد لاب توب معاك يابنى سرقه كدا
خلينا نطمن عليك
ايـــــــــــــــــــــه دنيا

ترجع بالسلااااااااااامه
انتى وجهينه :(

كانت كل يوم تدخل تكتب كلام والله يتسحق يتعمل بوست :D

ياله بئا تصبح على خير يا حضرة الظااااابط

gohayna يقول...

اليوم العشرين

ودا كان يوم السفر

مقدرتش ادخل ابدا يا محمد

بجد كانت حالتي صعبه جدا

اول ما وصلت المطار من اول ما اتنفست بجد مش هزار حسيت اني مش طايقه الهوا داخل صدري

مش عايزاه

كل الوشوش مختلفه يا محمد

الناس مختلفه
كنت بدور فيهم علي ملامحنا
ملقتهاش
تعبت زياده اوي

كان يوم قاسي جدا عليا وتعبت فيه وسلمت امري لله ولما روحت صليت وطلبت منه انا يقوييني



اليوم الواجد وعشرين

عارف لنا تطلع عليك الشمس وتحس انك لاول مره مستغرب المكان

اكيد انت مريت بكدا لما روحت الجيش

اكيد كنت مستغرب كل شي

كل حاجه
سريرك والمخده والميه الي بتغسل بيها وشك

طعم الاكل في بقك
كل شيء مختلف تماما

وبرضه كنت بجد تعبانه
ومقدرتش ادخل سامحني


اليوم الثاني والعشرين

الاحد

انا دلوقتي بقيت احسن

شويه ويه ابتديت اتاقلم

يعني الحمد لله
انا عارفه اني هقدر اقاوم احساسي بالغربه

بس محتاجه وقت

ربنا يرجعك لاهلك ولينا بالسلامه

ومتتحرمش منهم ابدا ابدا

معلش يا محض الروح انا عارفه ان كلامي كان صعب

انا والله مش قصدي

بس انتي بجد بنت حلال والله وسعيده اني اعرفك

وبجد شخصيه جديره بالاحترام

تحياتي ليكي يا محض الروح


رينا والله حليتي مكاني

ربنا يخليكي وتسدي علي طول
والف شكر علي سؤالك


محمد ارجع بقي
خلصنا يا اخي

انت هترجع علي اول سته

ما تهرب وتخلصنا بقي

ربنا يفك جيشك بسرعه

امين يا رب

تصبح علي خير

رينـــــــــــا يقول...

جهيـــــــــــنه
انا مبسووووطه انك دخلتى
ربنا يارب يعينك ويقويكى ولا تتعبى ابدا
مبسوطه انى اطمنت عليكى ياقمر
وربنا يكرمك على دعائك

على فكرة انا كمان شويه وهسافر انا كمان هسيب بلدى
شكله فيرس فى الجو
عااااااااااااااااااااااااااا
:'(

محمد ازيك معلش مسلمتش عليك اول ما دخلت اصل كنت قلقانه على جهينه
يارب تكون بخير:)

محمد مصطفى يقول...

أنتم السابقون

R.R يقول...

لا حول ولا قوة الا بالله
انا تقريبا اتاخرت فى قراية البوست ده بس
معلش انا عارفه شعورك
لان اخويا لسه كان مخلص الجيش
بس ورغم انه كان بينزل مبيت الا انه كان مخنوق اوى
ربنا يعينك
انت قدها وقدود
مصر فر رقابتك
واحنا مستنينك اما تخرج بعد الاربعيين
تحياتى
ايها الجندى

gohayna يقول...

اليوم التالت والعشرين


الحمد لله

انا رحت الشغل النهارده ودا كان اول يوم عمل ليا
وقابلت واحده مصريه بس تحفه
نستني الدنيا والله بجد

ضحكت معاه من قلبي والله

الحمد لله


رينا
يا صاحبه الاسم الجميل

ربنا يخليكي ياقمر علي اهتمامك وذوقك العالي

ربنا يخليكي يارب

محمد

انا عارفه انك هتقتلني لما ترجع علي الي انا عملاه عندك هنا


بس والله لازم تبقي فهم صح

انا عايزه الرجل تفضل في المدونه

عموما لو زعلت

هقولك طظ فيك

وبعدين جايز

ممكن

احتمال مش اكيد


اني


اقولك طظ فيك تاني

تصبح علي خير

رينـــــــــــا يقول...

السلامو عليكم
ازيك يا ايها الجندى الشجاع
ايه الاخبار
والجو الجميل دا والشمس والطوابير والبهدله
ها كله تمام
رافع راسنا :D

جهينتى احنا بقينا اصحاب خلاص
هاتى بوسه الاول والله كنت قلقانه عليكى موت
وانتى الاجمل اصلا
على فكرة انتى مرة تقريبا سألتينى على معنى الاسم
معناه يا ستى ملكه بالاسبانى
بس اوعى تطمعى فيه انا هسميه لبنتى ان شاء الله:D
سلام يا جميله
سلام يا محمد

رينـــــــــــا يقول...

السلام عليكم
ازيك يا محمد
يارب تكون بخير
لو تعرف اد ايه دلواقتى انا حاسه بيك
وحاسه اد ايه انت اتعذبت وانت ماشى وسايب بيتك

انا كمان بعيط وانا بكتب الكومنت دا
انا كمان هسيب اهلى واصحابى وناسى
هسيب امى اللى هى كل حياتى
هسيبها واسافر بلد تانيه خالص

حاسه انى كل ما افكر اتقطع ميه الف حته
مش قادرة اتصورنى بعيد عن مصر
مش قادرة اتصورنى بعيد عن امى واصحابى

محمد انا مكتئبه :((((

šσяšαяαα يقول...

السلاااااااام عليكممم

يادى النور يادى الهنا ايه الجو الجميل دا.. طقس معتدل مائل للانتعاش:)))

انتى عملتى ايه ياجهينتى.. نقلتى المدونة جنب البحر واللا ايه.. ياللا اهو كله بثوابه:)))

بعدين هربانة مننا ومش عاوزة تردى علينا.. وراكى وراكى ياماما مش هنسيبك.. المهم بس تكونى بخير دايما

واستاذنا بقى اللى ماسمعش الكلام ولا شفناه هرب ولاحاجه
انا جاية ارمى التماسى احسن تقولو ان انا نااااسى..ترم ترررم

وكماااااان اقلك ان نتائج اول مسابقه ظهرتتت اخيرا وااادى الرابط بتاع البوست عشان لما ترجعلنا بالسلامة تييجى تشوف المواضيع اللى فازت

http://best-post.blogspot.com/2007/05/blog-post_15.html

ياللا ياعم ادينا مش حارميناك من حاجه خالص اهه

وسلاااااااام يابطل
سلااااااااام جهينتى

gohayna يقول...

اليوم الرابع والعشرين

الخامس والعشرين


ايه دا

عامل عليا خصم
من المرتب

ليه بقي؟

كل دا علشان مدخلتش امبارح؟
نهارك ملحوس بالاوامر العسكريه

ليه كدا
حرام دا اانت في الجيش متبقاش مفتري


يارب يهديك ومتعملش خصم عليا



رينا

الله يهديكي ماشيه فين

هيا شوطه وجت في البلد؟

طمنيني عليكي



صورصاره

والله انا مستغناش عنك ابد والله

وهجيلك قريب

وبعدين فين اجيار الشمسيه
تخديها كدا من البحر من غير فلوس

اما اشوفك

تسلمي علي سؤالك ربنا يخليكي ليا


سلام يا محمد

BinO يقول...

أستاذ محمد انا جيت اشوفك رجعت ولا عرفت تطلع لقيتك لسه هناك
ربنا يهون الأيام عليك
وكل محصل بعضه
الفرق في الأماكن لا غير

أستاذة جهينة
أعتقد لو حد عايز يقولك حاجة ممكن يقولهالك هنا
بس أنت نعم الصحبة وربنا يكرمك ويحفظك في غربتك
أنا كتبت تعليق في مدونتك رجاء الرد علي ما فيه
وأستمري في كتابة اليوميات

:)

gohayna يقول...

اليوم السادس والعشريين

انا نفسيا احسن النهارده

فيه حجات كتير الحمد لله ربنا بيوفقني فيها

يمكن علشان دعوات امي والناس الي بيحبوني

الحمد لله

حاجه تانيه مخلياني مبسوطه

عاارف لما تتواصل مع ناس وتبقيو اصحاب من غيراي مصلحه

عارف لما تغيب شويه
وتلاقي حد بيسال عليك
بجد انا محرجه منناس كتير اوي

لسه فيه ناس كويسه ومحترمه والله يامحمد

هتطلع وتشوف بنفسك


بينو

ربنا يخليك علي كل كلامك وسؤالك عليا
وانا رديت عليك

وتاني بقولهالك انت وجودك بجد بنورني حتي لو معلقتش
والله
بحترمك وربنا الي يعلم

تحياتي ليك

وتحياتي ةسلامي ليك يا محمد

Nothing To Lose يقول...

السلامو عليكم
ازيك يا فندم
ايه الاخبااااااااااار
الجو حر طبعا
والشمس جميله
وحضره الظابط رافع راسنا فى الحر دا:D

انا انهاردة احسن شويه الحمد لله
يراب انت كمان تكون بخير
هـــــــــــــانت ان شاء الله
فات الكتير مش باقى الا القلبل
_______________________________
جهينه انا مبسوطه اوى انى بطمن عليكى
يارب يارب ييسعدك ويوفقك اكتر واكتر

الامضاء ناثنج تو لوز
او
'
'
'
'
'
'
'
'
'
'
رينا:D

gohayna يقول...

مساء الياسمين يا كبتن

قصدي يا حضرت الظابط

اليوم السابع والعشرين

ارجع بقي يا عم وخلصنا

انا كدا بقالي مقبضتش من يوم الحد الي انت مشيت فيه

كان يوم مطلعتلوش شمس

الجو هنا رائع جدا والتراب في كل حته

يسلام علي الرومانسيه

تصدق لما تبقي ماشي الصبح الي هو المفروض انه يكون منور وتلاقي نفسك مش شايف العربيات من كتر التراب

يسلام احساس رائع

تقريبا الجو بيرحب بيا

انا عرفه

وشي حلو علي البلد

ما علينا خلصنا وارجع بقي

عايزه اتكلم معاك بجد والله مفتقداك بشده

عايزه حد اتخانق ومعاه وانكشه زيك

ربنا يرجعك بالسلامه يا اخويا العزيز

تحياتي

رينـــــــــــا يقول...

السلام عليكم
ازيك يا بشمهندس
الجوا انهاردة حر اووووووى
الله يكون فى عونك بجد
انا تعبنالك
ياله ربنا يعينك يارب

هــــــــــــــــــــانت
فاضل شوه يا مسهل الله يقويك

جهينتى هاتى بوسه

šσяšαяαα يقول...

السلااااااام عليكم

مساء السلق والشوى والتحمير

انا هولععععع خلاااااااص مالحر دا وقلت اجى هنا اهو طراوة وبحرى

انما احنا سمعنا اوشاعات مغرضة بتقول انك زوغت نص يوم

عاوزين تقرير مفصل عن الواقعة دى

ويااللا سلام قبل مالكيبورد تسيح

سلام جهينتى

وعلى فكرة بقى رينا.. انا بس اللى اقول جهينتى:P

BinO يقول...

جهينة
الأحترام متبادل يا فندم
جزاكم الله خيراً
ويحفظكم في الغربة

أستاذ محمد
الأسماعيلي كسب أول امبارح الوداد 2-0 وصعد لدوري المجموعات
طبعاً كأسماعلاوية زي بعض
بقولك الكلام ده
بس عادي يعني
:)
ربنا يهون

عالمى ازرق يقول...

انا بدأت ارتاب واشك فيك
ان العاصفه الترابيه اللى عندنا دى جايلنا من حداكم
ولا دى نتيجه التدريبات اللى عندكوا
عموما هانت
وكل شيء هينكشف ويبان

Nothing To Lose يقول...

السلام عليكم
ازيك يا محمد
يارب يهون عليك والله
احنا فى بيوتنا والحر هيفطسنا
امال انتوا بئا
يالله هــــــــانت
فات 28 يوم
باقى تقريبا 17 يوم

ربنا يرجعك بالسلامه لاهلك ولمدونتك
فى امان الله

gohayna يقول...

اليوم التامن والعشرين

والتاسع والعشرين

ايوه بتلصق

اصلي في الشغل ولو اتقفشت هيكون منظري وحش اوي


بقولك ايه

كيلو اللحمه بكام عندكو
اصلي ناويه اعمل مشروع هنا

اللحمه المصري هنا زي البودره

سعرها عالي

بفكر اعتزل المهنه واتاجر


صورصاره ورينا

العبوا مع بعض متتخنقوش

انا جهينتكم كلكم

بجد انا مبسوطه بيكم جدا والله
اخواتي وحبايب قلبي

يلا هاتو بوسه

محمد

محمد

حمحممممممممممممممممممممممممممممممد

انت مش بترد ليه

واضح انك نمت ياما بتخطط تخلص مننا ازاي علشان الي احنا عاملينه

نعلش بقي

لما ترجع هنتحاسب

تحياتي

gohayna يقول...

اليوم التاسع والعشرين

الله ما انا دخلت قبل كدا

ياسيدي انت مالك

ادخل براحتي

مدونتك
دي بقي؟

دي خلاص بقيت مدونت الشعب

احنا اممناها

وعوضك علي ربنا بقي
اما ترجع ابقي اديك تعويض

وحشتني مشاكستك يا سيدي والله

انا هنام علشان شغلي بدري

يارب لما ترجع تبقي زي ما انت متغيرتش

بجد هتصدم لو لقيتك واحد تاني غير الي اعرفه

ربنا يوفقك

تحياتي

Dr.khaled يقول...

ايه يا بني
كل ده في دهشور؟؟
انته لسه اكيد في مركز التدريب

ليك على الاقل كمان عشر تيام

انا معلوماتي بتقول لي ان الواحد بيقعد في دهشور 40 يوم

ربنا يرجعك بالسلامة يا كبير

Nothing To Lose يقول...

الوووووووووووو
الوووووووووووووو
الوووووووووووووو
فايد مدتين بس الله يكرمك
الووووووووووووووووووو
الووووووووووووووو
الوووووووووووووووووو

ايه ايه
الخط مقطوع
عاااااااااااااااااااااااا

ياله الحمد لله
مش تشد حيلك بئا وتعمل اى مشاكسه يمكن تطرد وتيجى:D:D:D:D

gohayna يقول...

اليوم التالتين

والواحد والتالتين

خلصنا يا سيدي

العداد بيعد

هانت كلها كام يوم وتطلع

يعني انت كدا المفروض لو مفيش عقلب او حرمان من الاجازه ىتيجي علي علي خمسه سته

يالا خلصنا

وهاتلي معاك سوفونير من هناك

اوع تيجي وايدك فاضيه

سلام يا حج

gohayna يقول...

اليوم الاتنين والتالتين


ينهار الوان دا انت قربت تطلع يا محمد

هيوحشني الكتابه عندك والله

عارفاك اول ما تطلع هتقولي مش عايز اشوف وشك هنا ابدا

ايه الي انتي عملاه دا

وقليل لو ما بعتليش فرقه تغتالني في الكويت

ما انت بقيت واصل خلاص يا سيدي

مين قدك

هقولك علي حاجه

الظباط الكويته هنا
والله العظيم لو جم مصر
كفايه عليهم انهم يتعملوا لبيسه قلم جاف

وكتير كمان

والنعمه انا ارجل منهم

حاجه تكسف والله

بيبقي هاين عليا اطبطب عليهم

توتي اوي
وظغننين كدا

والمهم فاكرين نفسهم اسياد الكون

الله يخرب بيت الفلوس الي عملت لاشباه الرجال منظر

ما علينا انت مين معايا حضرتك

انا معرفكش

والله هوا الي قالي اقول كدا يا ظابط

عن اذنك علشان جايين يخدوني دلوقتي

سلام بقي

gohayna يقول...

اليوم التالت والتلتين


شايف الانتظام والادب

بكره عندي مقابله مع نائب تحرير جرنال كبير هنا في الكويت

ولو اقتنع بالي بكتبه

والله
يامحمد
والله كمان مره


مش عارفه هعمل ايه

تقريبا هيغمي عليا

ولو مقتنعش وقال وحش

نهاره هيكون اسود

وهتسمع خبر وفاته في السي ان ان قبل الجزيره

هيا لعبه؟

قال ميقتنعش قال؟

شوفت التواضع


المهم ربنا يرجعك بالسلامه يا محمد

ولو خرجت بدري ابقي طمني عليك لو سمحت

تحياتي يا اخي العزيز الي غايب بقاله فتره وبجد ليك وحشه كبيره جدا

قد جنينه المانجو الي عندكو

سلام يا سيدي

šσяšαяαα يقول...

محماااااااااااد ايييه دا انا مش مصدقة نفسى

حد يقرصنى ياجماعه اكيد انا بحلم

حمدلله عالسلاااااامة ياراااجل ايه الغيبة دى كلهااااا

اخيرااا اخدت افراج من المستنقع العسكرى.. فرق يابندق شربات للمدونين كلهم على حسابى

وها ايه الاخبار كدا طمنا واحكيلنا كلللل اللى حصلللل بند بند:))

ايييييه يامسهل الحال يارب
.
.
.
.
هو محدش بيرد عليا لييييه

طراااخ.. ايه فى ايه.. اوبس
شكلى كدا كنت نايمة وبحلم انك رجعت

شفت ياسيدى ادى اخرت كلامنا مع نفسنا عندك

بس لما تييجى يامحمد

والغى الشربات ياواد يابندق
السكر غالى اليومين دول

šσяšαяαα يقول...

جهينتييييييييي

شفتى اللى جرالى ياختى.. قعدت اتكلم وفكراه رجع طلع حلم..اهىء اهىء

ضرس العقل نقح عليا من الغيظ.. عندكيش حاجه حرشة.. قصدى حاجه تخمده شويه:D

هستنى الروشتة

محض روح يقول...

جيت اسلم
ربنا يجيبك بالسلامه يافندم
هانت
خلاص
ان شاء الله ترجع زي ماروحت
واحسن

وربنا يوفقك ياجهينه
وان شاء الله تبهري رئيس التحرير
يابنتي انتي مش قليله
في البلد
:)

Nothing To Lose يقول...

السلااااااااااام عليكم
ازيك يا حضرة الظابط
ازيك يا جهينتى
مهو بئا بيتكم انتوا الاتنين
عاملين ايه

انا والله اليومين اللى فاتوا كنت مشغوله على اخرررررررررى
كنت بتجوز عقبالكم:D:D:D:D:D:D

الحمد لله عقد قرانى
علشان كدا مش جيت اسلم
اعذرونى بئا
هانت يامحمد
ياله سلااااااااااام

gohayna يقول...

اليوم الرابع والتالتين

واليوم الخامس والتالتين

عارفه هتقول بتلصق

معلش بقي انا بحاول مدخلش كل يوم حاكم انا ادمنت مدونتك ومش عارفه لما ترجع وتطردني هعمل ايه

هروح لمين واكتب عنده

تصدق هزعل

انا اصلي بقيت بحس انها بقيت بيتي التاني

يلا اهي ديي الدنيا مفيش حاجه دايمه

يارب يقفشوك متلبس بالهروب ويدولك شهر كمان
علشان افضل اكتب

بعد الشر والله بهزر

ربنا يجيبك بالسلامه يا محمد

ابقي طمني لو طلعت بدري تحياتي

mohand يقول...

السلام عليكم
من العجيب ان اكون اخر واحد يفكر في التعليق هنا
ولكن
انا يا محمد كنت كل ما بكتبلك تعليق في يوم بدخل تاني يوم اشوف الرد
واتابع وكده
بس لو انت مش هتكتب الرد
هحس انك غبت فعلا
انا كنت بدخل مدونتك واتفرج كأني بشوفك كل يوم

سؤال تاني
ليه كتبت دلوقتي
لانك فاضلك كام يوم وتخلص وتاخد اول اجازه
ومعني ده انك هترد وهتكتب
صح ؟
ترجع بالف سلامه

gohayna يقول...

اليوم السادس والتالتين

كدا بالظبط حضرتك هتيجي ان شاء الله علي يوم 6
6 2007

يوم اربعاء لو مش غلطانه

تعرف بقي لو جيت اليوم دا وملقتش تعليق ليك عندي تقولي انك رجعت

تعرف هعمل ايه

وقعتك هتكون ملهاش لون

ملهاش ملامح

نهارك هيكون ابيض بس غير اللون الي انت متعود عليه

جرب كدا وهتشوف ايه الي هيحصلك

انا مش بهددك لا سمح الله

انا بس بنبهك

والمرتب يجي كامل علشان اسلمك العهده يا سيدي

هانت كلها الاربع الي جاي وتطلع

ربنا يجيبك علي خير

اموت واعرف احساسك ايع دلوقتي وانت عارف انك هتخرج الاسبوع الي جاي بعد 45 يوم في الجيش بعيد عن اهللك وصحابك

بجد هموت واعرف

سلام يا محمد

رينـــــــــــا يقول...

السلاااااااااااااااام علييييييييييكم

ازيك يا بشمهندس
ازيك يا جهينتى

عاااااملين ايه فى الغربه انتوا الاتنين
هانت يا محمد شد حيلك بئا

وزى ما قالت جهينتى عاااااارف لو مش جيت يوميها وعلقت هيجرى ليك ايييييييييه
انا بئا بهدد :D:D:D

اصلك يابنى غبت كتير اووووووى
وكلنا مشتاقين لكتاباتك

هااااااااااااااااااااانت يابو الظبابيط :D:D:D

BinO يقول...

ربنا يهون الأيام الباقية
الاسماعيلي كسب المصري 3-1
وصعد لدور الثمانية

المفتي يقر قانون بتجريم الختان
وليبيا تبرأ الممرضات اللغاريات

أخر الأخبار
:)

gohayna يقول...

اليوم السابع والتالتين


وحانت اللحظه

وجاءت ساعه الصفر
يوم الاربع الي جاي هيكون معاكم

علي الهوا مباشره من ملعب الجيش

الظايط الاستاذ الدكتور

ياسيدي ركز
ما انا مركز اهه

هيكون معاكو الاستاذ العميد الاخ العقيد

بخربيت سنينك ركز واقرء عدل بقي

حاضر حاضر

هيكون معاكم ان شاء الله الاخ محمممممممممممممممممممد

تصفيق حاد يرج المدونه والبوستات كلها بتحي النجم العائد من المعتقل

قصدي من الحفل الي كان في بلاد جوه
قصدي بلاد بره

النجم محمد

الحفل برعايه كازوزا
وشبسي البطل

برجاء قطع تذاكر الحفل في قسم شرطه

قصدي دشومه

لا قصدي في اي منفذ لبيع الكلينكس

دمت ايها الساده

زالحضور للاطفال فقط

كان معكم من مستشفي الحميات

د جيهان نجم

حلو سيناريوا الحفل كدا ولا تحب اعدلك

انت تأإمر

اصلي مش ورايا غيرك انا بقي

سلام قبل ما اضرب

Nothing To Lose يقول...

السلاام عليكم
احنا جينا نرمى التماسى
ازيك يا محمد
ازيك يا جهينتى
عامليييييييين ايه

محمد
خلاص انت قربت
انا حاسه ان بقالك سنين يابنى
ايه دا

يا مسهل

gohayna يقول...

اليوم التامن والتالتين

والتاسع والتالتين

طبعا انت عارف انا مدخلتش امبارح ليه

بصراحه خفت اضرب بعد الحفله الي عملتهالك فقلت اخرج بكرمتي احسن


بس واضح انها عجبتك علشان السكوت علامه الرضي

يعني انا هبتدي في تنفذها حالا من عنيا

انا مش راضيه انزل البوست الجديد مع انه جاهز غير اول الشهر

علشان تلحق تعلق عليه لما تيجي

اخلص بقي الناس بتستعجلني

محمد ربنا معاك ويجيبك بالسلامه

تحياتي ليك كتير اوي

رينـــــــــــا يقول...

يلهوى
بكرة
محمد جى بكرة يا جدعاااااااااااااااااااااااااااااااان
ايااااااااااااااااااااك متدخلش المدونه اول حاجة
هبعتلك اتنين عساكر يقبضوا عليييييييييييييك
لما نشووووووووووووووووف

اخيرا خلصوا الاربعين يوووووووووووم
كانوا كتير اوى

توصل بالسلامه ان شاء الله

šσяšαяαα يقول...

ايها السادة المستمعون وبدأ العد التنازلى لوصول معالى سيادة رئيس المدونة

ياللا خلصنا بقى هنتسنى كتير

واللا عشان مانت الريس بقى تلطعنا ادام المدونة لحد دماغنا ماساحت مالشمس

هما الكام يوم اللى فايتين

ياتييجى وتخلصنا ياتجيب لكل واحد تكييف وكاريير لو سمحت

Nothing To Lose يقول...

بم
بم
بم
بم
ان ان ان ان ااااااااااااان
انهاردة يوم 1/6/2007
ومحمد مشى يوم 22/4/2007
اطرح من دا على دا هتلالالالالالالالالاقى ان الاربعين يوووووووووووووووووم خلصوووووووووووووووووووووووووووا

هيييييييييييييييييييييييييييييييه
وسع السلاااااااااااااااااام الجمهووووووووووووورى يشتغل
بلاددددددددى بلادددددى بلادددددى
لكى حبى وفؤااااادى

بما انك ظابط وبتاع
انا فاتحه المدونه ومستنيه اول بوست
هنقول انك روحت الفجر
ونمت شويه
واكي دهتصلى الجمعه وتيجى علينا:D:D:D

لما نشووووووووووف
يا مسهل
يارب
يا كريم

انا حاسه انى بشحت:D
ياله انا مستنيه يا بشمهندس:D

gohayna يقول...

اليوم الاربعين


يا جماعه يالي فوقيا

انتوا لغبطوني

مين قالكم انه جاي النهارده


هو خمسه واربعين يوم

مش اربعين يوم

يعني لسه هيجي يوم الاربع

دا لو انا مش غلطانه

ما ترد علينا بقي يا محمد
وقلنا

يوم الاربع ولا النهارده
انا سأت بابا
لما يكون واحد زنقوه في الجيش
بيطلعوا بعد قد ايه

قالي لو فيه لسه نفس

هيطلع بعد خمسه واربعين يوم

بعني الاربع يا جماعه مش الجمعه

واكيد عبال ما يفتكر انه ليه مدونه هيكون عدي يومين

ونهارك هيكون الوان لو حصل كدا

احنا عمالين نحرق في دمنا علشانك وانت تدخل بعد يمومين من مجيك

طيب اعملها كدا يمحمد وشوف الي هيجرالك

انا صوتي واطي والله اهه

ربنا يجيبك بالسلامه

وامانه عليك او ما تدخل وترجع بيتك بالسلامه تقولي

تحياتي يا اخويا اعزيز

Bossy يقول...

السلام عليكم

ازيك يا دكتوره جيهان
ازيك يا بشمهندس
الناس هنا متلخبطه مش عارفه هترجع امتي
ترجع بالسلامه ان شاء الله
وتنور المدونه
والله المدونه فيها شغل جامد جدا
اعتقد يا دكتوره جيهان انه هيقضي اول يومين هيقضيهم هنا يقرا التعليقات
وبعدين يفكر في الانتقام
قصدي الرد
علي العموم توصل بالسلامه

mohand يقول...

السلام عليكم
ازيك يا محمد
اللي كنت عامل حسابه حصل
ومش رديت علي تعليقي
عموما اخر اخباري اللي هتخليني مقل في دخولي النت
اني اشتغلت في موقع حكومي كده
المهم لما ترجع ابقي طمني عليك
ابعتلي علي الشات بوكس
ان شاء الله تكون افضل لما ترجع من الجيش وتكون بخير
تحياتي

gohayna يقول...

اليوم الواحد والاربعين

بدءنا

خلاص كدا اي يوم من دلوقتي هيكون ذكري ليا علشان مش هدخله تناي

يعني السبت انت تكون موجود واستلمت مني المفتاح
واكيد هتغير الكالون

وقليل لو مدفنتش المدونه

وعلي رأي بوسي

ازيك يا بوسي

هتفكر في الانتقام

والله انا كانت نيتي خير والله

حتي ارجع كدا للتعليقات القديمه وانت تشوف

بس علشان محدش ينسي المدونه

واوع تكون هتزعل والله بجد
دا قصدي

عموما لما ترجع نعرف نتفاهم

خلاص فاضلك الحد والاتنين والاتلات

والاربع تيجي بالسلامه ان شاء الله

تحياتي يا محمد

رينـــــــــــا يقول...

عااااااااااااااااااااا
عاااااااااااااااااااااع
عااااااااااااااااااااااا
طلعت موهومه
عااااااااااااااااااااا
طيب كنتوا اضحكوا عليا وقولولى رجع بس لسه بيرتاح
يــــــــاله
مـــــــــا علينا
جهينتى عامله ايه يا قمر
يارب يارب يخليكى كدا وحسك فى المدونه
يغير كلون ايه يابنتى
احنا هنضحك عليه ونغيره احنا ومندخلوش::D:D:D:D:D
خليه بس كدا يتأخر
هيجى يفتح المفتاح مش هيفتح معاه:D

ايييييييييييييييه
ادينا مستنين
ومتزعلوش بئا من اللغبطه دى
حقكم عليا
سلام

gohayna يقول...

اليوم الاتنين والاربعين

هانت زمانك بتغسل هدومك
وبتحضر نفسك علشان تنزل بقي
وتلقيك عامل نيو لوك اوعه
رهيب
ما دهيه لتكون حالق علي الزيروا
او شعرك اتخض وما طلعش

هتبقي عيب اوي في الاوساط الراقيه الي هتحضر الحفله

ايوه الحفله انت مش قريت البرنامج ومعترضتش

يبقي موافق ضمنيا

وقلنا السكوت علامه الرضا

يالهوي يعني زي النهارده مش هعرف ادخل تاني؟

ما تخليك في الجيش شويه كمان
قد ساعه كدا زياده

والله بهزر ربنا يجيبك بالسلامه يا محمد

تحياتي

gohayna يقول...

اليوم التالت والاربعين

خلاص فاضلك يومين وتطلع براءه خالاص

والله ليك وحشه بجد يا محمد


ربنا يجيبك بالف مليون سلامه

تحياتي

رينـــــــــــا يقول...

السلاموووووو عليييكم
ازيييييييييك
باقى من الزمن يومين

بس انا بئا مستنياك بتدبيسه انما ايه
تــــــــــــــــاج

شايف انا بعزك اد ايه:D:D:D:D

انا قلت بردوا يعنى محمد يؤجع من غير ما اجيبله هديه

تقبلها بئا منى واببلعها ماشى :D:D:D

gohayna يقول...

محمد

من غير هزار المره دي

طبعا انت ان شاء الله بكره راجع

بكره تكمل خمسه واربعين يوم

يعني ان شاء الله تنزل

علي خير يا رب

ترجع بالف سلامه

عايزه اقولك اننا بجد كلنا افتقدناك
وبجد سيبت فرغ كبير اوي
دخولي عندك ماكنش مجرد لاني اكتب كلمتين اهزر فيهم

انا تقريبا كنت بهرب عندك

عارف لنا تحب تتكلم وتعمل ان ماحدش واخد باله من كلامك

تعلي صوتك وانت مش خايف تتسمع

مدونتك ساعدتني كتير اوي
خصوصا الايام الاولي لسفري وغربتي هنا

وقبل ما اسافر كمان

كل كلمه فيها بتمثل ذكري حلوه ليا

كل رد من حبيايب قلبي وسؤالهم عليا عندك

كنت بكون مبسوطه بيه جدا
كل ضحكه وبسمه او حتي دمعه وصرخه وصوت عالي كلهم ذكريات حلو وجميله بعتز بيها جداا

ارجو اني مكنتش ضيفه تقيله علي مدونتك

او اني اكون زودتها شويه


ارجو انك تسامحني لو فيه كلمه كاتبتها دايقتك
انت اخ وعزيز وغالي عليا
ربنا يديم العروف

عايزه انهي اليوميات بتاعتي عندك

هيا كانت في غياب الراقص مع الذئاب

دلوقتي صاحبها هيحضر

وتستلم مدونتك مني
كامله يا سيدي

بجد بشرك يا محمد علي كل شيء
ربنا يخليك وترجع بصح وبالف سلامه

انا كدا انهيت مهمتي
وهسيبلك المفتاح
علشان لما ترجع بالسلامه تفتح مدونتك وتنورها بوجودك

هستناك تخبط عليا علشان اجيلك واقولك حمدلله علي السلامه

انا مش هدخل تاني غير لما تيجي
اوع تطنش ولا تنسي

انا هستناك تقولي انك جيت

المفتاح عندك وكلو تمام
هسلم عهدتي
وهقولك ترجع بالف سلامه يا اخي العزيز

تحياتي من كل قلبي لكل حته في مدونتك

وتحياتي ليكي من اعماق قلبي

يا اخي العزيز

šσяšαяαα يقول...

ما هذا الذى أرى

هل حان موعد الوصول ياترى

أم لايزال باقى من الزمن بضعة ساعات على انتهاء المهلة المحددة لاطلاق الرهينة ألا وهى 45 يوم عدا ونقدا

بقالى اسبوع عمالة اقول كلها يومين كلها يومين

كل يوم خس وجزر كل يوم خس وجزر
مفيش نص كيلو سبانخ واللا حاجه

على العموم هانت خلاص لحظة الوصول

بس معاها لحظة وداع برضو لجهينة اللى كانت منورة المدونة وعاملة لها حس

جهينتى بجد كانت ايام عسولة خالص بحلوها ومرها زى ماقلتى

واكيد محمد هيكون مبسوط بالهيصة دى كلها..داحنا كنا عاملين مهرجان:D

وفطار وغدا وعشا وحاجه ساقعه بيبس:D

محمد انت قلتلنا كلها 45 يوم وراجع لما نشوف بقى

ممكن نديلك سماح ليوم الخميس.. احسن ممكن مايهنش عليهم يوم الخميس ماتقضوهوش فى الجيش لايزعل واللا حاجه

عموما اول ماتوصل بالسلامة الى أرض الوطن تعدى علينا ناااافر ناااافر
وتطمنا

وإلى لقااااء قريييب بإذن الله

وسلامااات سلامااات ياواحشنا يابلديات

Unknown يقول...

ايه ده انت في فايد؟
أنا كمان أخويا في كلية الضباط الاحتياط في فايد
ومستجد برده ونزل الأربع اللي فات لحد الجمعة بس
:(
انت في سرية كام بأه؟
أنا أخويا في واحد
ربنا يهونها عليكوا ويحفظك أنت وأخويا وكل اللي معاكوا
والحر طبعا هناك مش هاتكلم عليه علي رأي أخويا كوكب فايد العجيب
ربنا معاكووووو :((
ويجيبكوا بالسلامة ويارب تنزلو قريب أجازة كبييييييييييييييرة
عشان أخويا واحشني قوي
ربنا يحفظكوا ويصبركوا