Translate

الاثنين، 2 أبريل 2007

هو كدا_1

السلام عليكم
ازيكم يا شباب....بعد النقاش الجامد بتاع اخر حلقات ضد التيار والصوت العالي والناس اللي قطعت شعر بعض هناخد هدنة وهنوقف الحلقات شوية...يعني الحلقة الرابعة هنصبر عليها شوية لغاية ما الناس تنسي شوية...ونبدا في سلسلة جديدة
ياااااادي النيلة....سلسلة تانية....اه سلسلة تاية بالعند فيكم...
..بس المرة ديه مش هيبقي فيها خبط راس في الحيطة ولا شرب من البحر والترعة
المرة ديه هنتكلم بكل بساطة ونعمل دراسة وتصنيف....برضو تصنيف تااااااااااااااااااااااااني
اسمعوني بس ...المرة ديه هيبقي تصنيف للشعب المصري الجميل...اللي انا وانت منه....مش هيبقي بغرض الانتقاص ولا حاجة وحشة ...اعزكم الله...بس فعلا الشخصية المصرية غريبة جدا ولو فضلت تدرس فيها طول عمرك هتشوف البدع...ممكن انا وانت نبقي من التصنيفات ديه...او فينا الطبع دا....لا دا مش ممكن دا اكيد احنا كدا وبنعمل الكلام دا
عشان مطولش عليكوا نبدأ اول حلقة من هو كدا
طيب هو انا سميتها هو كدا ليه....والله معرفش...اللي جه علي دماغي بقي وانا مبحبش اغير حاجة كتبتها
.
.
.
.
اول طبع فينا كمصريين هنتكلم عنه هو اننا شعب خالف تعرف
يعني تقوله شرّق يغرّب...تقوله شمال يروح يمين
حاجة كدا زي العند ....وتلاقيه عارف ان اللي بيعمله دا غلط وهيوصله لسكة مش حلوة
بس هو كدا بقي....ميتكيفش ولا باله يرتاح ولا عنيه تغمض الا لما يخالف الاوامر والتعليمات
تكون ماشي علي طريق سريع ومكتوب النقل الثقيل يلزم اليمين...تلاقيه متنح وماشي علي الشمال
يافطة تانية مكتوب فيها احذر السرعة مراقبة بالردار...تلاقيه داس بنزين وجاب 200 وعربيته اخرها 120
تلاقي يافطة تالتة مكتوب احذر امامك مدرسة...تلاقي السواق بيجري ور العيال الصغيرة عشان يخبطهم...ولو معرفش ممكن يستناهم تاني يوم جنب بيتهم عشان لما يطلعوا يخبطهم
شئ غريب...وعجيب
موظف في الحكومة بيته لازق في الشغل...يعني ممكن يغسل وشه في البوفيه...تلاقيه يجي الشغل اخر واحد ومتاخر ويمشي اول واحد
التاني المدير بتاعه يطلب منه شغل معين ..تلاقيه يتفنن في انه ميعملهوش او يعطله....بيحس بمتعة غريبة وهو بيعكنن علي المدير...حتي لو هياخد جزا...بس هو كدا
طالب متفوق ومحترم وملتزم ايام الكلية....يستني اول ما الدكتور يدخل المحاضرة يدخل بعده عشان عارف ان الكلام دا بيعصب الدكتور....ويا سلام لو دكتور لسانة طويل...تلاقي صحبنا دا مستمتع بالتهزئ....وطبعا في الاخر كل دا بيجي علي دماغ الغلابة اللي الدكتور
المفتري بيفش غله فيهم...ليه يا محترم مبتدخلش قبله وتريحه عشان مخه صغير...يقولك هو كدا بقي
طالب ثانوي جميل ومؤدب ومزرر رزار القميص اللي فوق ولابس كرافت جميلة وجزمته سودا ومتلمعة وتلاقيه داخل وخارج المدرسة ناطط من فوق السور....مع ان الباب بيكون مفتوح...
بس هو بقي مش بيحس بذاته الا لما يعيش ايام الدراسة ناطط من فوق السور ذهابا وايابا....والشخص الغريب هو اللي كان بيدخل من باب المدرسة....الكلام دا انا كنت عايش فيه بس مكنتش بلبس كارفات ومكنتش بزرر زرار القميص اللي فوق اذا كنت لبست قميص اساس...كنا بنروح بلبس مخالف من باب العند برضو...طب ليه يا ابني...هو كدا
الست المتجوزة الكبيرة العاقلة.....متعرفش تعدي ساعة من غير ما تعمل عكس اللي بيطلبوا منها جوزها....هو كدا...زي ما يكونوا متوصيين علي انهم يمشوا خلف خلاف
وبرضو الراجل المتزوج بيعمل كدا مع زوجته....عشان كدا بتلاقي الحياة الزوجية بتكون ممتعة وجميلة....بس هو كدا
وياسلام لو راكب مع سواق تاكسي مزاجه تمام التمام وتقوله علي يمينك لو سمحت يا ريس....تلاقيه حدفك في اخر الدنيا...مع ان كان في مكان يركن فيه وينزلك بكل راحة...يس متعرفش بقي هو بيستهبل والا عامل نفسه اطرش وتيجي تقوله يا عم حرام عليك انا بقالي ساعة بقولك علي يمينك يقولك ...هو كدا يا أستاذ ويروح شاتم في الحكومة وفي الموظفين بتوع المعشات وفي منتخب مصر ويختمها بملعون ابوها شغلانة تقرف وزباين هم
ولو انت بقي من اللي ربنا فتح عليهم من الرأس ماليين اللي معاهم عربيات وماشي في شارع زحمة....والله انهيار عصبي...تلاقي واحد كاسر عليك بكل تناحة ورذالة ...مش كدا وبس...ويشتمك كمان...ولو الجو صيف وانت فاتح الازاز بتلاقي الدنيا مطرت عليك من بق الراجل اللي بيتكلم...مع انه هو اللي مخالف....بيستمتع انه يخالف ويستمتع انه يشتمك ويمطر عليك
الامثلة كتيرة جدا علي فكرة
لو قعدنا نقول فيها مش هنخلص
بس هو كدا....احنا شعب خالف تعرف......والصورة بتتكلم
والا انتم ايه رأيكم؟؟؟؟؟؟؟؟؟؟


هناك 28 تعليقًا:

عالمى ازرق يقول...

هو انا حاسه انك بتبالغ ولا انا عايشه فى موريتانيا؟
يعنى انا متفقه معاك فى موضوع طلبه ثانوى واللبس المخالف والعند مع المدرسين بس علشان طبيعه المرحله اللى بيمروا بيها والتمرد على كافه فئات المجتمع واهمها المدرسه
و الموظف اللى شغله جنب البيت ده مش خالف تعرف قد ما هو بارد بصراحه ولو خدله خصم هيظبط مواعيده
بس هو انت بتتكلم عن مشاكل المرور ومخالفتها هى كمان فى مصر ولا فى القاهره علشان مرور القاهره ده هيتظلم لو اتقال عليه مرور اساسا

gohayna يقول...

ايه الصوره السوده دي يا محمد
بلدنا حلو يا راجل وناسها احسن ناس

صحيح الواحد ممكن يكون في اشاره وتفتح وفي منتهي البلاه يعدي واحد قدامك
تقعد تزمره في كلاكسات وهوا كانه بيتمشي علي الكورنيش مع الجو

كله كومه والحته الي انت كاتب فيها عن اصحاب العربيات الي بيعدو قدام المدارس علشان يدوسو العيال

فقر والله انت

اما الي انت بتتكلم عليهم من موظفين في دي حال الدنيا
زي ما فيه الحلو فيه الوحش

زي ما في واحد بيرخم علي الدكتور فيه ناس تانيه بتحترم روحها

زي ما فيه موظف بارد
فيه موظف عنده ضمير وبيراعي ضميره وان كانوا قله صحيح

زي ما فيه ناس بتعمل زي الصوره فيه ناس برضه محترمه
بتستخدم الجناين وبجانب العربيات مش في العراء وقاد الناس كدا

لسه عندهم حياء برضه

انا طبعا بتريق وانت عارف

المهم كويسه الهدنه الي انت اخدتها لحسن كنت هتتاخد في الرجلين يا باشا
انا جتلي بلاغات كتير ضدك
وناس جت تسألني عنك

بس انا انكرت

وراك رجاله

انا قريت السبق الي في مدونتي

ورديت عليه
ابقي نفذ الي قلتلك عليه


هروح اكل بقي وارجعلك تكون الردود ذادت شويه

سلام مؤقتا

mohandat يقول...

السلام عليكم
فعلا في حاجات كده بس بصراحه دا زياده عن اللي بشوفو
مش معقوله للدرجه دي يا راجل
عموما انت قولت ان ده تصنييف يعني دول جزء من الناس
ودا طبيعي
منتظر اعرف باقي التصنيفات
مهند المصري
الباحث عن الحقيقة

Nothing To Lose يقول...

المرة دى انا مش معاك خالص يا راقص اسمحلى
احنا مش كلنا سلبيات بالشكل البشع دا وان كان موجود فدا موجود فى كل الدنيا لكن انا شايفه ان الشعب المصرى يختلف عن كدا تماما شعب ذكى ولماح ووالله بتاع شغل بس الطبيعى لما حضرتك تشتغل مع بشر بتتفنن انها ططلع عينك لانك شغال عندها لازم يكون رد الفعل الطبيعى انه يزهق ويكره الشغل والى بيشتغله معاهم.. هو مش لاقى الفرصه الى تخليهيكون شخص منتج قولى انت بالله عليك فى ظل الظروف المقرفه الى بنعيشها مين حيكون رايق انه يكون اى حاجه مهمه كل واحد عايز ياكل ويأكل ولاده ودمتم على كدا وانا شايفه ان زى ما فى سلبيات ففى كمان ايجابيات كتير والله والدليل صناع الحياه لما الشباب لقت الى ياخد باأيديها اشتغلت وحبت الحياه وماشاء الله انتجوا لانهم حابين الناس الى شغالين معاهم وحابين قائدهم وقدر ياخد باأيدهم...بالنسبه بئا لسواقين التاكسى والميكروباصات انا شايفه انهم غلابه والله وطفحين الكوته ومش نافع

خلاصه رغى دا كله ان الظروف المحيطه بينا هى الى موديانا فى داهيه ولو تلاحظ يعنى ان كل ما حد يحاول يكون ايجابى يجيبوا بوزوه الارض علشان عايزينا كدا نفضل كدا علشان يقدروا ينهبوا براحتهم

ملحوظه سريعه والله الزوجه المصريه احسن زوجه فى الدنيا بدليل اننا طالعين كدا الحمد لله وامثله كتير جدا

معذرة على الاطاله وجزاك الله خيرا على سعه صدرك

يعقــــوب .... يقول...

أول حاجة عاوز اقول للناس بعد اذنك يا راقص,,انه في الاول قال و قصد بعض الناس مش كلهم طبعا..بس انا شايف ان الاغلبية من الشعب عندها الطبع ده ..بس مش لازم يكون في نفس الصور و الامثلة الوضحها راقص هنا...في امثلة و حاجات تانية كتيييير...و عموما خالف تعرف ده موجوده عند كل الناس و كل الشعوب في مختلف الازمنة بس البيختلف هو الكم و الكيف و حسب نظم و قوانين البلد..يعني مثلا لو القانون كان بيطبق بعدل و حكمة و يطبق فعلا على المخطءين هتلاقى العادة ده قليلة اما لو في بلد زي بلد المحبوب مصر فهتلاقى العادة ده تطيق اكتر من تطبيق القانون..وانا شايف ان الحاجات الذكرها الراقص ده مع احترامي لكل القراء ده نقطة من بحر...و ربنا يهدينا و يهدي بلدنا يا رب

الراقص مع الذئاب يقول...

عالمي ازرق
انا فعلا ببالغ في ذدر الامثلة...طبعا استحالة الكلام دا هيحصل بالضبط...[س احنا بنتعرض لحالات فينا...مش هننكرها....مرة تانية هي مش فينا بالشكل دا ...بس خالف تعرف كتير والله
------------------------------
gohayna

طبعا بلدنا حلوة وناسها احسن ناس...وكمان انامقلتش ان كل الموظفين كدا والا كل الطلبة وكل الناس كدا
بدليل اني قلت كمان في ناس بتدخل من الباب وناس بتدخل قبل الدكتور وناس بتيجي في معاد الشغل

وفي ناس بتعمل اللي في الصورة في الاماكن الرسمية المخصصة لذلك

بس بلاغات ايه وأسئلة ايه اللي اتسئلتيها...
اوعي تقولي لحد حاجة....احنا لازم نبقي ايد واحدة....ومش هيقدروا يخدوا مننا المصصات والشبسي ...
وبعدين هو انتي كل ما تيجي عندي يا تروحي تشربي يا تروحي تكلي؟؟؟
طيب ما في ناس هنا مش لاقين...ابقي راعي شعورهم يعني...وابقي افتكري اخوكي يعني كدا واحدفيلوا حاجة...
تحياتي لك....
----------------------------
مهند باشا
طبعا يا عم زيادة عن اللزوم
بس بنركز علي الموضوع دا لأن مش هننكر انه مش موجود
يمكن الامثلة فيها اللي مش منطقي...بس من باب لفت النظر والتركيز
واول الموضوع انا قلت دي حجات ممكن تكون فينا...وفيها حجات اكيد فينا

تحياتي لك وسعدني جدا مرورك وتواجد الجميل

-----------------------------

Nothing To Lose

والله انا مش بكتب هجوم علي الشعب المصري ولا حاجة....ولا بنعدد طباعة الوحشة
هوانتم عشان الموضوع طويل بتسنوا اول الكلام اللي فيه بيان كدا

دي سلبيات مش ديما موجودة...يعني مننكرش انها بتحصل في كتير جدا...في اوضاع مستفزة ومخالفات يمكن افظع من اللي انا كتبه
بنقول عليها استهبال...بجد والله اصل انا عشت حجات كتير جدا
طيب انتي عارفة معظم النصايح اللي انا اخدها لما اخش الجيش ايه هية؟؟؟
اني استهبل وميبقاش عندي ضمير في اي حاجة اتكلف بيها
شفتي بقي .....
ماشي مش كل الوضع اسود بالطريقة اللي في الموضوع...بس علي الاقل في خالف تعرف عندنا

علي فكرة عجبني جدا التماسك الاعذار للناس ..فعلا معظم الناس بيكونوا تحت ضغط وممكن يطلع منهم حجات غصب عنهم....

ويا ستي الزوجة المصري ديه اجمل حاجة في الدنيا...ويكفي ان امي واحدة منهم...وربنا يرزقكم كلكم وتبقي احسن مثال للزوجة المصرية...[س انا كمان عشان الحيادية قلت الزوج برضو بيبقي سعات خالف تعرف...عشان محدش يزعل

جزاكي الله خيرا علي ردك الجميل...وانتي تطولي براحتك يا ستي
المدونة بتاعتكم كلكم يا شباب وشرف ليا ان امثالكم يكون زائر في مدونتي

تحياتي لكي

----------------------------------
يعقــــوب

ربنا يكرمك ويجازيك خير
قلت كل اللي انا عاوز اقوله ولخصته في ردك الجميل

بس هو بالفعل انا كنت ببالغ في الموضوع ...وكنت قاصد دا فعلا
وفي سلبيات ومخالفات تانية كتير...بس اظن برضو ان كتير منها مش بيبقي مقصود
...والقليل منها بيبقي مقصود

مرة تانية جزاك الله خيرا واسعدني وشرفني جدا تواجدك اخي الجميل يعقوب
دمت في خير

تحياتي لك

أميرة البلطجية يقول...

هههههه
هو خالف تعرف طبع في كتير فينا فعلا ..وإلا مكنش المثل طلع من عندنا اساسا..بس اظن ان فيه فروق فردية والتعميم مش مفيد هنا.زالى جانب بقي ان اسباب الافعال اللي انت اتكلمت عليها ممكن ميكوش سببها هو حب المخالفة وبس..ممكن الكسل (زى الموظف اللي مغلب مديره) ممكن تراكمات سلبية في العلاقة (زي الزوجة اياها) ..يعني..بس عموما هي نقطة موجودة في كتير من الناس
:)

david santos يقول...

Hello!
This work is very good. thank you
have a good day

None يقول...

أخي الراقص
بجد انت اخدت الموضع دا من علي لساني ..يعني انا كنت لسه والله بفكر اعمل بوست عن سلبيات الشعب المصري ..بس انت بقي دايما سباق بالخير

انا معاك جدا في كل كلمه قولتها في موضوع خالف تعرف دا .. وفي كمان سلبيات كتير ممكن بردو يكون اشهرها .. اني بحس ان كل واحد بيحب يعمل نفسه ابو العريف ..يعني مرة مثلا كنت مع اصحابي في وسط البلد المفروض اني رايحه اسحب فلوس من البنك واشتري حاجه معينه من مكان معين واروح البيت .. الطبيعي ان مشوار زي دا حتي لو وقفنا مثلا أكلنا ايس كريم او شربنامشروب ..عمرة ماياخد اكتر من ساعتين بالكتير ..المشكله بقي اني مش كنت عارفه طريق ماكنة سحب الفلوس ..سألت زي ما اي حد بيسأل وبصراحه كنت اقف اسأل حد الاقي اتنين وتلاته اتبرعو انهم يوصفولي فين الطريق..ويوصفوا الطريق ..وأروح لحد هناك مالقتش حاجه..سألت تاني وصفولي طريق تاني مخالف تماما للطريق الاولاني .. رحت لحد هناك بردو مالقتش حاجه ..وفضلنا بجد من غير مبالغه اكتر من ساعتين بنلف بس علي طريق ماكنة سحب الفلوس ..ودا ليه لأن كل واحد فعلا بيحب يعمل نفسه ابو العريف كأنه عيب او حرام مثلا انه يقول انا مش عارف

انا اعترف جدا ان الشعب المصري عموما بيمتاز بالطيبه _رغم ان الموضوع دا بردو مبقاش زي زمان نتيجة الظروف الاقتصاديه والسياسيه والاجتماعيه في البلد اللي بتخلي كل واحد يقول ياللا نفسي _وبيمتاز بردو بخفة الدم ..ودي بقي الحاجه الوحيدة اللي عمرها ما هتتغير

احييك بجد علي حسن اختيار مواضيعك
ـــــــــــــــــــــــــ
nothing to lose

اختلف معاكي جدا في كونك بتقولي علي الشعب المصري شعب بتاع شغل .. طبعا انا مش قاصدة اعمم الكلام ..بس الغالبيه العظمي منه ..يعني انا مقدرش اقول ان الشعب المصري بيحب العمل مثلا زي اليابانيين اللي بيعتبروا العمل في حد ذاته غايه .. واللي قدرو من خلال دا انهم ينهضوا ببلدهم اللي كانت مدمرة بعد الحرب في وقت قياسي ..انتي مثلا بتستشهدي بموضوع صناع الحياه .. قعد قد ايه موضوع صناع الحياه وبعدين اتمنع واتهاجم ..بغض النظر عن الاسباب اللي هاجموه بسببها واللي لو اتناقشنا فيها مش هانخلص ... بتقولي ان الانسان مش بيلاقي الظروف اللي بتخليه يكون انسان منتج ..في الصين والهند كل بيت بيكون في مشروع لأنتاج اي شئ بداية من الملابس ومرورا بالتحف والانتيكات اللي بيبقي مكتوب عليها made in chine
وانتهائا بالبرمجيات اللي اشتهرت بيها الهند رغم فقرها ورغم ان اغلب سكانها تحت خط الفقر... يعني اللي عايز ينتج بينتج بغض النظر عن الظروف .. ومهما كانت ظروفنا عمرها ما هاتبقي زي ظروف اليابانيين اللي اتضربو بقنبله ورغم كدا عرفوا يعملو نهضه لبلادهم ..

وانا بردو مش بعمم القاعده عشان ماحدش يجي ويقولي في ناس بتشتغل وبتنتج ..أكيد انا عارفه دا ..انا بتكلم علي الغالبيه العظمي من الشعب المصري واللي زي ما محمد قال بيبقي ساكن قريب من الشغل ورغم كدا تلاقيه بيوصل اخر واحد ويمشي اول واحد

انتي بس والله اللي طيبه وبنت حلال وشايفه الناس كلها ملايكه بجنحات ومش بترضي تبصي للسلبيات ... هاتي بوسه
:)

الراقص مع الذئاب يقول...

باشمهندسة اميرة البلطجية

فعلا التعميم مكانه مش هنا ودي حالات فردية
بس للأسف موجودة وملاحظة...وهو دا اللي قلته في بداية الموضوع
قلت ممكن تبقي ....
جزاكي الله خيرا علي مرورك الكريم

----------------------------------
david santos
thank you for your visit

have agood day too
-------------------------------
None
حرااااااااااام عليكي حرقتي الحلقتين اللي جايين
ههههههههههههههههههههههههه
اعمل ايه بس.....رصيدي خلص دلوفتي
يعني الحلقة اللي جاية كانت ابو العريف واللي بعديها الدم الخفيف....
بتخلصي تارك يعني عشان اخدت الموضوع من علي لسانك؟؟
ماشي يا ستي.........
بس انا ممكن استغل الموقف بتاع مكنة الكرديت في موضوع ابو العريف
بس بجد ومن غير كذب انا فرحت ان في حد عنده نفس التفكير وفي دماغة نفس المواضيع....بالتفصيل
علي كدا بقي انا لما امشي انتي تكملي بدالي

وجهة نظر جميلة وتحليل جميل.....

احييكي بشدة علي حسن تواجدك

gohayna يقول...

معلش فاتت عليا دي
المره الي جايه هجيب السندوتشات تكفينا كلنا
اوشكلي هتطلب تيك اوي من اي حته
تعجبك
بس الله يخليك بلاش الشيرتون
علشان خراب بيوت موت

yamen يقول...

هو كده يا عم..عندك مانع؟

بهزر..بهزر..

لا بجد..
طبعا التعميم ذلل..انما انا معاك تماما..

يمكن عشان احنا شعب طول عمره مقهور وعمره ما قال لا..
ولاننا عمرنا ما ثرنا علي حاكم او علي اي وضع مش عاجبنا( وطبعا مفهوم ان ثورة يوليو كانت انقلاب عسكري مش ثورة بالمعني اللي انا اقصده)..و عشان احنا برضه بني ادمين وبنحس..فبنعمل الحاجات دي من باب التنفيث والتعبير عن النفس عشان مانطقش من جنابنا..يمكن

تحياتي

shermen يقول...

انت متشائم كده ليه
انت أكيد ف مصر
نظام خاف تكش
وخالف تعرف
عادي يعني
ايه الجديد

الوافي يقول...

الامثلة السيئة والجيدة في كل العالم ... وما دام فيه ناس بتعرف تحط ايدها على الجرح وتنتقد كل السلبيات وتقول عن الوحش وحش .... فالبلد بخير وان شاء الله بمجهود الشباب العترة اللي زيك وزي غيرك نسلط الضوء على السلبيات علشان نحاربها ونقلل منها بقدر الامكان ولا اقول القضاء عليها .... فلم ولن يكون هناك المدينة الفاضلة في الدنيا


وما فيش مانع يا عم محمد بين الوقت والثاني نسلط الضوء على الايجابيات برضوا ونبص لنصف الكوب المليان .. بس علشان ما نزيدش الصورة سواداً ونعطي شوية امل وتشجيع

احسنت مرة اخرى
الى اللقاء في موضوع جديد ... عاوزين خناقة

خمسة فضفضة يقول...

السلام عليكم ورحمة الله وبركاته

موضوع هايل يا باشمهندس محمد

وانا معاك في كل اللي انت قلته ( كل مره كده اكتب بقي حاجه اكون بخالفك فيها ...ههههه )

ومش هاقولك انت بتفتري علي مخاليق ربنا ولا انت مزودها حبتين ولا كلام من ده
لاننا لازم ما نكونش زي النعامه ندفن روسنا في الارض( الله يمسيك بالخير يا باشمهندس ماعلينا )
لازم نواجه عيوبنا علشان نعرف نصلحها ، ايوه فعلا في شريحه كبيره جدا من الشعب المصري عايشه حياتها كده واخده الدنيا بالدراع ولو جيت تسأل علي السبب يقولك ....هوه كده
حاسين انهم لو خالفوا الناس التانيه او خالفوا القوانين يبقي كده ما فيش حد زيهم ولا حد يقدر عليهم
وناس بتلاقي سعادتها في انهم يبقي مخالفين لكل حاجه مهما كان رد الفعل من الناس التانين
انا مش بقول ان كل الشعب كده ، لأ بردو فيه حبه صغننين كده علي جنب مش تبع حزب خليفه خلف خلاف المحامي ، ودل بقي من وجهة نظر بتوع خالف تعرف مش مفتحين ولا فكيكين كفايه ومضيعين حقهم في الدنيا، او بمعني تاني هبل وعبط وسهل ينضحك عليهم

في ناس بتلاقي سعادتها انها تضايق غيرها بافعالها دي ، مثلا تلاقي واحد دهن الجدار بتاع بيته و علق عليه يفطه بالبنط العريض ( ممنوع لصق الاعلانات)
تاني يوم الصبح الجدار يتملي اعلانات او اي شخبطه وخلاص المهم يعكننوا علي صاحب البيت
وخد من ده بقي كتير

احييك علي الموضوع ، وفي انتظار باقي الحلقات

الوردة السوداء يقول...

يعنى انا متفقة معاك

بس انت محبكها شويتين
بس ارجع واقولك اللى بيحصل ده اساسا لان اننا فينا عرق عنتظة لازم نخالف اللى ادامنا

وعلى فكرة
انا فيا الطبع ده

smraa alnil يقول...

والنبي يا ابني ما جصرت

هو دة الشعب المصري
هههههههههههه
بس تصدق الصورة معبرة اوي عن حالنا
فكرتني في منطقتنا في مدرسة حكومية مكتوب علي الحيطة بتاعت السور بتاعها ممنوع القاء القمامة
والله وبدون مبالغه المكان دة بالذات بقي مقلب زباله
والعجيب ان شركة الزباله نفسها احينا بتيجي ترمي فيها شوية
ههههههههههههه
عادي يعني

الراقص مع الذئاب يقول...

gohayna

لو سندوتشات فول وطعمية من عند سيد تسمم او فوزي تسلخات انا موافق...بس اي حاجة والسلام
احنا برضو بتوع الشيرتون...

----------------------------------
yamen
لا يا سيدي معنديش مانع
انت تأمرنا يا باشا
فعلا معظم الناس رجعت الكلام دا للكبت
بس بالسبة للثورة أو الانقلاب دي خطوة جميلة بصرف النظر عن المسميات....هو دلوقتي الوضع مشابه وكل حاجة....بس يمكن وقتها كان في ايجابيت كتيرة
ربنا يسترها معانا

اسعدني جدا تواجدك اخي الكريم
دمت في خير
-------------------------------
shermen
خاف تكش؟؟؟
تصدقي فكرة جميلة لحلقة تانية
عموما احنا بنعرض سلبية مش موجودة بالشكل الفظيع اللي في الموضوع
بس يعني من باب اننا نصلح من نفسنا

اسعدني جدا مرورك الكريم
------------------------------
الوافي

في البداية احب اني ارحب بيك اخ جديد ومحترم في مدونتي
واتمني تواجدك دوما
وجزاك الله خيرا علي كلامك الجميل في حقي اللي انا مستحقهوش

وفعلا جزاك الله خيرا انك لفت نظرنا لموضوع النظر لنصف الكوب الممتلئ
وهو دا الهدف الاساسي من الموضوع
عرض السلبيات بنية اجتنابها وعلاجها

لك تحياتي ودمت في خير

الراقص مع الذئاب يقول...

خمسة فضفضة
الدكتورة الكبير بتاعتنا...(كبيرة في المقام وليست كبيرة في السن عشان متفهميش غلط)...ربنا يبارك فيكي يارب

ربنا ما يجيب خلاف إن شاء الله...بس فعلا انا زودتها في الموضوع ...[س انا كنت عاوز ابالغ في عرضه...يعني كان مقصود كدا فعلا...

للأسف نظرة ناس كتير للمحترم اللي بيجي علي نفسه انه اهبل وعبيط...لازم يبقي سافل وقليل الادب وايده طرشة عشان الناس تخاف منه ويبقي في نظرهم بطل ومحدش يقدر ياخد حقه

ودي بقي فلسفة التعامل مع الناس والنقاش اللي كان فاتحة احد الاخوة في انك امتة تبقي ذيل اسد وامته تبقي رأس قطة

وموضوع لصق الاعلانات دا بالفعل كتير جدا...وتقريبا ماشبه للي في الصورة اللي في الموضوع...
ودا السؤال
هو انتم بتعملوا كدا ليه؟؟؟
والاجابة طبعا بتكون.
.
.
.
.
هو كدا


جزاكي الله خيرا واسعدني مرورك الكريم وتعليقك

دمتي في خير

--------------------------------
الوردة السوداء
اولا تشرفت بأول زيارة ليكي في مدونتي ايتها الوردة السودا
مع ان الاسم في تفائل شوية
يعني كان ممكن تسميها مثلا وردة مخنوقة...ميتة...مدبوحة....مضروبة بالرصاص
مش مشكلة....

ايوة انا فعلا محبكة وببالغ في الموضوع
ودا من باب عرض الموضوع بقوة ولفت نظر الناس
يعني كدا زي الافلام الكوميديا اللي بيبقي فيها مبالغة كبيرة وبيدعوا انهم بيعالجوا مشاكل الناس
احنا بنعرض مشكلة وبناقشها مع بعض هنا...والحمد لله كل مرة بتخلص بخناقة بين الناس ونجيب المطافي والنجدة...واخرها كان الموضوع اللي فات

جزاكي الله خيرا واسعدني جدا تواجدك وارجوا دوام الزيارة
دمتي في خير
-------------------------------
smraa alnil
الصورة هي صلب الموضوع....يمكن مش هتصدقي لو قلتلك ان الصورة اوحت ليا بالموضوع من البداية خالص
اللي في الصورة هو نفس نظام ممنوع لصف الاعلانات هو نفسه ممنوع القاء القمامة
نفس الفكرة ونفس دماغ
هنقول ايه بس
اسعدني جدا مرورك وتواجدك يا سمراء النيل
وارجو دوام الزيارة

دمتي في خير

R.R يقول...

رغم ان اخبطو راسكم تشبه هو كدا
بس هنعديها
:)

عجبنى جدا البوست
ضحكنى فعلا رغم ان واقعيتوه مؤلمه
بس فعلا ضحكت

هم يضحك وهم يبكى
الى بيحصل ده بقى ليه اهو كله واحد بيحط همه فى اللى قدامه وبيطلع عليه زهقه

بس والله لسه فى ناس عندها مبادىء ومش ماشين بنظام هو كده

تحياتى

gohayna يقول...

ايه يا عم الكلام الكبير الي كاتبهولي في التعليق دا

الي يقراء ميقولش انك نفس الشخص الي عايز ياكل من عند عابده تسلخات

الله يرقفك
هقوم ارجع

سلام بقي

Bin_Zayed يقول...

بمناسبة خالف تعرف
سيبكوا بقى من دا كلو وقولولى...تفتكروا الواحد فى شم النسيم يعمل ايه.... يحضر حفلة نانسى ولا هيفاء ولا مروه ولا شيرين ولا يقعد قدام روتانا وميغمضش عنيه ولا اقضيها فى العربية ع الكورنيش اسمع الراديو مع نفسى ولا اقعد الون فى بيض...ولا اعمل silent

الراقص مع الذئاب يقول...

دكتور رنيا
الحمد لله مفيش حيطة في الموضوع دا
والحمد لله إن البوست عجبك..
فعلا شر البلية ما يضحك
وبرضو نفس الكلام ان الناس كلها بتفش غلها وكبتها عن طريق العند وخالف تعرف
جزاكي الله خيرا علي ردك الجميل
وشرفني تواجدك واسعدني تعليقك

دمتي في خير

----------------------------------
جيهان

طبعا لكل مقام مقال
اكيد مواضيعك يعني مش هتخلي اي تعليق فيه هزار
وبعدين تعالي هنا...ازي تغلطي الغلط الفظيع دا
ازي تقولي عبده تسلخات
اسمه فوزي تسلخات
اتعلموها بقي........

-----------------------------

Bin_Zayed

إقرأ جزء قران
وصلي ركعتين قيام ليل
واستغفر 100 استغفارة
وقول ازكار الصباح والمساء

علي ما اعتقد دا احسن بكتير من الاحتفال بأعياد النصاري
وحضور حفلات العاهرات والغواني والاختلاط الفاحش

اللهم ارزقنا حسن القول والعمل وحسن الخاتمة

Ma-3lina يقول...

ههههه

حلوة السلاسل دى و لا روايات مصرية للجيب و سلة الحكايات

بس و النبى متبطلش السلسلة الاولانية

المهم الشعب المصرى زى الفل دى كلها افتراءات عليه

ليه يا بنى كدا

كل اللى قلته دا صح و بيحصل يمكن يكون بيحصل فى بلاد تانية
لكن مصر ام الدنيا اكتر بلد ممكن تشوف فيها الفهلوة و الماغ العالية دى
حاجة فى دمنا

اما عن موضوع النط من السور فالطلبة يعزوا يغلسوا على النظار
قلتلى انت باه كنت بتروح المدرسة ازاى

حلوة التجميعة دى و مستنية الباقى

mohandat يقول...

السلام عليكم
مجرد تصحيح صغير بس
عيد شم النسيم فرعوني الاصل
من الحضارة القديمه قوي
مش قبطي ( وقبطي اصلا كلمه تطلق خطأ بس ما علينا )
المهم حبيت بس اصحح حاجه
السلام عليكم

khaled يقول...

حاولت اعلق فى مكان تانى غير ده ماعرفتش
شفت بما انى زى دول يبقى لازم اجى متأخر و اعلق اخر واحد
هو كده
:)

الراقص مع الذئاب يقول...

Ma-3lina
الحمد لله إن السلاسل ديه بتعجبك
ومش هنبطل السلسة الاولانية بس مستنيين حبة نهدي الجو والناس تنسي شوية والجروح تندمل
وبعدين ندخل ونرزع الجديد اللي هيقلب الدنيا

------------------------------

mohandat

فرعوني قبطي مجوسي اهو كل واحد يا مهند ولا يجوز الاحتفال بيه
احنا معندناش غير عيدين بس...ولو شم النسيم دا ينفع نحتفل بيه كان الرسول احتفل بيه لأنه كان ايام الفرعنة زي ما بتقول

جزاك الله خيرا علي مرورك الكريم

----------------------------------
يا عم خالد انت تنورنا في اي مكان ربنا يكرمك يارب ويجازيك خير

mohandat يقول...

السلام عليكم
انا بصحح معلومه بس
ومش بقول انه حلال والله
انا بس قولت اعرف الناس اصل الاحتفال دا ايه
مكنتش اقصد