Translate

الأربعاء، 6 يونيو 2007

راجع لفوطي وبشكيري...هنام في اوضتي علي سريري

السلام عليكم ورحمة الله وبركاته
من 7 سعات تقريبا عدت الي المنزل سالما ولله الحمد
قبل اي شئ مش عارف اقول اي كلمة شكر لكم الردود والناس اللي دخلت في فترة غيابي
من غير ما اغفل اي حد فيهم وطبعا اختي جهينة اكرمها الله ليها عندي رد خاص عشان اللي كانت بتعملوا في المدونة
علي فكرة يا جماعة انا اخدت حقن تطعيم ضد التيتنوس والتيفؤد والدكاترة عارفين الحقن ديه بتعمل ايه
بس فرحة رجوعي سالما الي البيب بعد 46 يوم بالتمام والكمال كبيرة
46 يوم اتعلمت فيهم اكتر من اللي اتعلمتوا في سنين عمري كلها
طبعا مش هقدر احكي تفاصيل لسببين
الاول سبب امني بحت.....ويعتبر تسريب معلومات عن نظام كلية عسكرية فيها محاكمة عسكرية واعدام
والتاني لأني لو حكيت اللي حصلي محدش هيصدقني...لأني لو كان حد حكاهولي قبل ما ادخل مكنتش هصدق طبعا
المهم انا انا رجعت اجازة قصيرة مدتها 72 ساعة خلص منها 24 ساعة...مع اني راجع من 7 سعات
ازي بقي....معرفش

انا مقرأتش كل الردود اللي اتبعتت...دي ليها قاعدة كبيرة اوي ...عشان كدا قررت اني هقلب صحابي ومش خارج معاهم وهقعد معاكم...بس افوق من الدوخة اللي انا فيها واعرف اقف علي رجلي تاني

امي عمالة تزغط فيها من ساعة ما جيت وانا مش عاوز انام عشان مضيعش فرصة الاكل الملكي

بجد بجد بجد اقسملكم بالله انا كنت مشتاقلكم جدا هناك وكنت بفتكركم اول ما كانوا بيسمحولنا اننا نفكر

انا بعتزر للجميع اني مش هقدر ادخل مدوناتهم كلها لضيق الوقت جدا
والله نفسي بس الوقت قليل اوي وغالي اوي
انتم متعرفوش الدقيقة في الملكية بعيد عن الميري عاملة ازي
اعزروني يا شباب
عاوز اطمن عليكم كلكم

هسيبكم دلوقتي وهرجعلكم تاني إن شاء الله

هناك 21 تعليقًا:

gohayna يقول...

يااااااااااااااااااااااااااااااه
انا مش مصدقه

والله بجد

الف حمدلله علي السلامه

حمدلله علي السلامه يا محمد
نورت الدنيا والمدونه وكل حاجه

ايه الغيبه دي

والله كان ليك واحشه بجد

انا مصدقتش نفسي لما لاقيت اسمك عندي

ربنا يخليك وتفضل منور الدنيا كلها

انا تمام الحمد لله

انت الي عامل ايه يا ابني؟
مستنايه اخبارك بفارغ الصبر

الف مليون

ترليون

الي ما لا نهايه

حمد لله علي السلامه

هدخلك تاني يا حضرت الظابط

ياااااااااااااااه
يا محمد

gohayna يقول...

تاني مره

حمدلله علي السلامه

بجد انا مبسوطه بوجودك

صحيح اجازه صغيره

بس الحمد لله انك بخير وبصح

ربنا يخليك لاهلك وصحابك وكل الي بيحبوك

ربنا يكرمك يا محمد

ازغرط يا ناس
؟؟؟؟؟؟؟؟

حمدلله علي السلامه

الراقـــص مع الذئـــــاب يقول...

السلام عليكم
ديما جدا يا جهينة اول الناس
بجد ربنا يكرمك ويجازيكي خير علي اللي بتعمليه
مع اني مكنتش ناوي اكتب حاجة خالص عشان مش شايف ادامي
بس لازم اوفي ولو جزي بسيط جدااااااااا من اللي بتعمليه وعملتيه
ربنا يكرمك يارب ويهون عليكي غربتك

رينـــــــــــا يقول...

هيييييييييييييييييييييييييييييييه
هييييييييييييييييييييييييييييييييييه
هيييييييييييييييييييييييييييييييييييه
هيييييييييييييييييييييييييييييييييييه
انا فرحااااااااااااااااااااانه
حمد الله على السلااااااااااااااااااامه
يااااااااااااااااااااااا
والله حاسه ان اخويا رجع بعد غييييييييييييييييييييييييييييييييبه

ايموشن اللى بيزمر دا كتييييييييييييييير

بس 72 ساعه بس
عاااااااااااااااااااااااااااااااااا

الف حمد الله على السلامـــــــــــه
المدونه نوررررررررررررررررررت

والله انا فرحانه اوى

عايزة اعرف كل حاجة بالتفصيـــــــــــــــــــــــــــل
مستنيه البوست اللى جاى
بفاااااااااااااارغ الصبر

عالمى ازرق يقول...

حمدلله على السلامه
نورت مدونتك والنت كله
عامل ايه بعد ايام الشقاء؟
واتبسطنا برجوعك جدا والله
حمدلله على سلامتك ويارب تكون بخير

mohand يقول...

السلام عليكم
احلي سلام علي طوال السلام للجندي مجند ظابط الاحتياطي محمد باشا ابو الذئاب
يعني الاسمعلاوي
يعني تجار المياه المالحه
يعني مش عايزين وشوش كالحه


اضرب عيارين وسمعني سلامين


حبيبي وصل
اخويا جه



-------------
دا بداية الفرح اللي هعملهولك اطبر انت بس

اللي قولي هتحكيلي علي اللي حصل في الماسنجر ولا برضه اسرار عسكريه
عموما انا عارف الحاجات دي

تلاقيك نزلت النص وبقيت رفيييييييييييييييييييييييييييييييع
واسمريييييييييييييييت قوي

بس اهم حاجه
كنت حاسس بالانشكاح هناك
حياة جديده وكده
ولا حاسس انك جوا معتقل

مش هتقدر تدخل ماسنجر يا عم ولا ايه
منتظرك
بس يا رب مش تتاخر
علشان عندي شغل الصبح


تحياتي ليك

علي فكره عملنا مدونة للنادي الاهلي
اعملنا واحده للاسماعيلي لما ترجع بقي

BinO يقول...

llألف حمد علي السلامة يا باشا أكيد أسماعيلية منورة كان بودي أكون هناك عشان أشوف النور
أتمني أن تكون بخير

Bossy يقول...

السلام عليكم

ايوه كده نورت المدونه من تاني
حمدلله علي السلامه
بس يعني ايه الاجازه القصيره دي
قصيره جدا
يلا يا بشمهندس اجدعن كدا وربنا يوفقك كل ما كنت بدخل هنا كنت بدعيلك حمد علي السلامه وسلام بقي علشان عندي امتحان بكره
ونورت المدونه من تاني

هترجع تاني امتي ان شاء الله
وبعدين تعمل حسابك علي اجازه طويله مش استراحه

خمسة فضفضة يقول...

السلام عليكم ورحمة الله وبركاته

الف مليون حمد الله علي السلامة، المودنات والنت والاسماعيليه ومصر كلها نورت


علي فكره كنت باجي واقرأ كلام د/ جيهان الجميل بس ماكنتش بسيب تعليق

فرحت اوي لما لقيتك سايب كومنت في الشات بوكس ، ماصدقتش انهم كانوا بس 45 يوم يوم ، متهيالي انهم كانوا اكتر من كده


هما مالهم بخلا كده ليه ...72 ساعه بس ، وال يعني حسبينهم بالساعه علشان يبانوا كتير وهما 3 ايام لا راحوا ولا جم ..هههههه
ان شاء الله ربنا يكرمك ويوزعوك علي مكان كويس واجازاته كتير

ربنا يطمنا عليك ان شاء الله


تحياتي

Ma 3lina يقول...

اهلاااااااا بيك

حمد لله على السلامة

اول مشفت اسمك منور فى الشات بوكس بتاع بينو جريت هنا على طوووووووول

بجد بقالك 47 يوم بس؟؟

انا حسيتهم شهرين معرفش ليه

بجد قدامك 72 ساعة بس ؟؟؟

اكيد مش هتنام فيهم هيبقى كلهم زيارات باه و خروجاااات

المجتمع المدونى كله نور

وحمد لله على السلامة مرة اخرى

ma 3lina يقول...

حمد لله ع السلامة

فكرتني بأيام الجيش .. بس أنا الحمد لله كنت عسكور ..

الأغنية بتاعة راجع لفوطي وبشكيري دي كنا بنغنيها في أخر أيام الجيش .. كنا نطلع الخدمة ونزعق بأعلى صوتنا في الصحرا ... 10 أيام ياااجبل .. 9 أياااام يا جبل .. لغاية آخر يوم كنا نقول سواد الليل يا جبل ..

ما كناش مصدقين ابدا إن إحنا حنقول الأيام دي كانت أيام حلوة .. بس بجد دلوقتي بضحك لما افتكرها وافتكر اللي شفته فيها واللي مش حقدر أحكي برضه بس مش لأسباب أمنية .. لأ .. مش ححكيه حفاظاً على سمعة الجيش المصري ..

بس بجد دلوقتي بقول زي الشيخ وجدي غنيم : أيام حلوة الله لا يعيدها

الراقـــص مع الذئـــــاب يقول...

رينا

جزاكي الله خيرا علي كلامك الجميل وفرحتم وتهنئتك ليا بالرجوع
إن شاء الله البسوت اللي جاي هكتب موضوع عن رحلتي العجيبة
بس بدون تفاصيل طبعاً عشان بجد الموضوع في حظر شوية

مرة تانية جزاكي الله خيرا علي كلامك الجميل

---------------------------------
عالمي ازرق
الله يسلمك ويبارك فيكي
جزاكي الله خيرا علي كلامك الجميل
وانما فرحتي برجوعي ليكم تاني ربنا وحده هو اللي يعلمها
الحمد لله انا بخير وكويس مدام ما انتم كلكم بخير
---------------------------------

حبيب قلبي مهند

الله يسلكم يا هندودة ويبارك فيك
بس بلاش ضرب نار الله يكرمك ...مش عاوز اسمع اي حاجة ليها علاقة بالجيش

غن شاء الله اكلمك الناهرده علي الماسنجر..امبارح كنت مقتول تعب ومقتدرش اسهر خالص
بس الناهرده الحمد لله استردت جزء من عافيتي وجاهز للكلام معاكم كلكم عشان عاوز انا كمان اعرف اخباركم

انا بقي مش اسمريت...انا بقيت صومالي اصيل
امي في اول زيارة معرفتنيش....
والله يا مهند اخدت من امي صورة ليا في الزيارة عشان منساش شكلي قبل الجيش
وصحابي لما شفوها مصدقوش اني انا اللي في الصورة

اما بقي الاحساس جوا الكلية يا مهند فهو لا يتحكي ولا يتقال
ولن اجد اي كلمات تستطيع التعبير عنه

----------------------------------
بينو
الله يسلمك ويبارك فيك
اسماعيلية تنور بوجودك انت والناس الحلوين كلهم اللي هنا
الحمد لله انا بخير طول ما انتم بخير إن شاء الله
-----------------------------------

بوسي

الله يسلمك
المدونة منورة بيكم وبردودكم الجميلة وشعوركم الجميل
فعلا الاجازة قصيرة جدا...بس الحمد لله علي كل شئ
ربنا يكرمك إن شاء الله في الامتحنات
شدي حيلك عاوزين تقدير جامد السنادي

اما بقي هرجع تاني امتة ديه ملهاش مقياس
يعني ممكن انزل كمان اسبوعين وممكن انزل كمان شهر
بس كل حاجة هتتظبط بعد حفلة التخرج بتاعت الدفع اللي قبلنا اللي هتكون كمان شهر تقريبا
وبعدها ممكن انزل اجازة 5 ايام إن شاء الله
دعواتك معايا
------------------------------
دكتورتنا خمسة فضفضة
الله يسلمك ويبارك فيكي

المدونات منورة بيكم كلكم يا جماعة
جزاكي الله خيرا علي مرورك في غيابي
ومش عارف اقول للدكتورة جشهان ايه علي اللي كانت بتعمله في غيابي
بس بجد يعني المدونة بقت غالية عليا اوي بعد لما رجعت وشفت اللي فيها ومكنتش اتوقع انه يوصل لكدا
وخصوصا من الدكتورة جيهان
ربنا يرجعها لينا بالسلامة ويوفقها في شغلها وفي غربتها
علي رواقة كدا هدخل اشوف اليوميات اللي كتبتها والردود بتاعتكم كلها في غيابي

اما بخصوص الاجازة فهي المفروض تبقي اسبوع اوي علي الاقل 5 ايام...بس
لجيش مفهوش ليه
اللي بيحنوا علينا بيه نخدوا ونبوس ادينا شعر ودقن

احنا معندناش توزيع يا دكتورة
احنا بيتعمل توزيع قوات داخل الكلية
ولله الحمد رب السموات ربنا منّ عليا ودخلت قوات جوية
ودي نسبة بسيطة جدا
يعني احنا 68 واحد من 1650 اللي دخلوا جوية
هتخرج إن شاء الله بعد 9 شهور ملازم
وهدخل معهد القوات الجوية في الماظة وبعد 3 شهور اعلق ملازم اول واتوزع علي اي مطار حربي
يعني حاجة كويسة ومريحة ولله الحمد
كل دا بتوفيق ربنا وبدعاء الناس اللي حوليا

----------------------------
دكتورة ماعلينا
جزاكي الله خيرا علي سؤالك وتواجدك في غيابي يا دكتورة

الله يسلمك ويبارك فيكي
الحمد لله هما بالعدد 46 يوم بالتمام والكمال والحمد لله مزدوش...عشان كان ممكن يوصلوا ل 60 يوم بس الحمد لله ربنا عالم بالحال

فعلا اجازتي قصيرة اوي وهرجع يوم الجمعة الساعة 9 باليل
الحمد لله اني شفتكم بخير

للأسف مش هلحق ااخرج ولا ازور حد
في حجات لازم اعملها هتمنعني من الخروج...بس الوقت الفاضي هقضيه معاكم إن شاء الله

جزاكي الله خيرا علي مرورك الجميل ودمتي في خير

---------------------------------
الله ياسلمك يا باشمهندس ماعلينا
انت كنت بتعد الايام ...انا بقي كنت بعد السعات
والله كنت بعد السعات بعد ما عرفت معاد الاجازة

اكيد طبعا اي فترة بتعدي عليك في حياتك مهما كانت صعبة بيبقي فيها حجات حلوة الواحد بيفتكرها كتير
وهو دا اللي هيبيب الموضوع اللي هكتبه قبل ما امشي إن شاء الله
دمت في خير اخي الكريم وجزاك الله خيرا علي المرور

šσяšαяαα يقول...

وأخييييرااااااااا وصلت بالسلامة ياسيادتة اللوز..

انا لسا داخله حااالا وقلت قبل مافتح بلاعتى اعدى واشوف ايه الاخبار

قلبى هايقفز مالفرحة والله..انا حتى عاملة حسابى ومعايا انبوبة اكسجين احتياطى

بجد حاسة انى فوقت تانى..ايوة كدا فرحنى شويه ينوبك ثواب اصل بعيد عنك كنت بودع اليومين اللى فاتو بس الحمدلله بقيت احسن

نورت يامحمد.. نورك غطى عالكهربا وعمل كونتاكت:D

وانا لسا عند كلمتى.. الشربات يتفرق عالمدونات ياواد يابندق

المرادى بقى سيادتة اللوز رجع بجد ومش تهيؤات

والليله الكبيرة ياعمى والعالم كتيرة
جايين يهنوا الراقص بالزغاريط والبنااااادق

وانا مش منقولة من هنا لحد ماينزل البوست الجديد
اعمل حسابك عالغدا:D

تحياتى وألف مليون تمناشر حمدلله عالسلااااامة

šσяšαяαα يقول...

انا جيت تااااانى

فتحت بلاعتى ولقيتك منورنى فى الشات بوكس

ايوة كدا شطور وبتسمع الكلام وباين عليك عديت علينا ناااافر ناااافر زى ماقلنالك

انا جيت بس اشكرك على هذه اللفتة الكريمة من سيادتكم

ودمت بألف خير

gohayna يقول...

انا جيت امسي واسلم
واصبح واقولك تصبح علي خير

كله في وقت واحد
اصل الاجازه صغيره بقي

ععايزه اعرف انت عاملت ايه يا محمد

خليك حلو وضفني عندك لو ليك ايميل في الماسنجر

وان شاء الله اشرب قهوه واسهر

واشوفك عملت ايه

خد بالك من نفسك
يا معلم

قصدي يا حضرت الظابط


تحياتي يا سيدي

رفقة عمر يقول...

حمد الله على السلامه عارف مش كنت بحب ادخل مدونتك وانت مش موجود لانى مش بحب الفراق ابدا اكتر شئ باكره مع انه مكتوب علينا لازم نفارق كنت حزينه ان مدونتك مهجورة ليس فيها صاحبها مع ان جهينه كانت بتعمل اللى عليها وزيادة بس برضه كلامها كان بيحزنى سعيدة برجوعك وحزينه انها اجازة صغيرة بس الحمد لله انك بخير ربنا يهون عليك بقيه ايام الجيش اللهم امين يارب العالمين

رينـــــــــــا يقول...

السلااااااام عليكم
الظاهر انى اتعودت اكتب هنا كتير
معلش بئا استحملنى
رغم ان المرة دى فرق انك الحمد لله موجود
ويارب دايما

انا مستينه البوست علشان على الاقل نعرف انت كنت عامل ايه ونطمن عليك
اكتب كتير اوى بئا
كتاباتك افتقدناها والله

تحياتى يا اخى العزيز

šσяšαяαα يقول...

ايييييه يامسهل الحال يااااارب

انت بتطبخ البوست دا واللا ايه

مش مهم بقى ناقص ملح واللا نسيت تحط عليه مرقة فاين فودز

ياعم هاتو وخلاص احنا راضيين بيه كدا

انا هخلى المدونة مفتوحه وكل شويه هعمل ريفريش ولما نشوف اخرتها

لو نمت عالكيبور ابقى خبط عالشاشة وصحينى

الراقـــص مع الذئـــــاب يقول...

صرصارة
الله يسلمك ويبارك فيكي
كلامك جميل ومجاملاتك دمها خفيف بجد
وطبعا كان لازم ابلغ الناس اني رجعت تاني واني لسا قاعد علي قلبهم لطالون
بس للأسف معرفتش ابلغ الناس كلها عشان النوم كبس عليا زي ما هو كابس دلوقتي
دمتي في خير اختي الكريمة والبوست الجديد اللي قاعد اكتب فيه من العصر
والله من العصر لسن نازل اهو علي الساعة 12 بليل

-----------------------
جهينة يا منوراني ومشغلة المدونة
والله يا جهينة انا مش مشغل ولا اميل من ساعة ما جيت حتي كنت عاوز اكلم مهند ومش عارف افتح اي ماسنجر
انا فعلا عاوز اقعد معاكم كلكم للصبح ونعمل كلنا اجتماع في الروم زي ما عملناه قبل كدا
بس الفترة متسمحش....اقسم بالله انا مشفت حد من صحابي المقربين ليا من ساعة ما نزلت اجازة...مجرد تلفونات وبس
عشان في حجات كتيرة اوي لازم تتعمل في وقت قليل جدا
بس وعد غن شاء الله في الاجازة اللي جاية هكون ظبط نفسي شوية وربنا يسهل ويحنوا علينا بيوم زيادة
--------------------------------
الاخت الجميلة رفقة
الله يسلمك ويبارك فيكي
اسعدني جدا جدا تهنئتك ليا علي الرجوع
واسعدني ترددك علي مدونتي في غيابي
وربنا يكرم جهينة كانت مشغلها وفاتحة ديما الشبابيك

--------------------------------
عروسة المدونات رينا
انا الحمد لله تمام والبوست نزل بس استحملوا بقي الرغي اللي فيه
وبعدين انتي تدخلي في اي وقت وتكتبي اللي انتي عاوزاه
بس دا في مقابل العزومة علي الفرح

بارك الله لكي وجعله زواج مبارك في طاعة الله ورزقك الله الزرية الصالحة

Dr.khaled يقول...

حمدا لله ع السلامة يا حا الظابط
معلش تاخرة اسبوع
اعذرني

د/اجدع بنوته يقول...

اه حقن التيتانوس والتيفود دول فظاع ياعينى

انا شدنى اوى عنوان الموضوع

ههههههههههههه