Translate

الأربعاء، 2 يناير 2008

معادن الناس

السلام عليكم ورحمة الله وبركاته

عام جديد علي عملنا شهيد...أسأل الله ان يرزقنا الي الخير في كل يوم وحين

ازيكم يا شباب....يارب تكونوا كلكم في خير حال



بيقولوا عندنا في المثل
تعرف فلان؟؟

ايوة أعرفه...

طب عاشرته؟؟
لا معاشرتهوش

تبقي متعرفهوش


المثل دا في كثير من الصح يا شباب

ويقصد عدم الحكم علي أي شخص بدون معرفته أو التعامل معاه
كتير أوي تلاقينا بنكره فلان عشان الظاهر منه انه وحش

بس الوحش دا ممكن يكون حلو


زي مثلا واحد في حاله ومش بيكلم حد
تلاقي الناس تقول عليه دا رزل ورخم وتنك


وهو ممكن يكون خجول ومهذب ولو اتعاملت معاه تلاقيه شخصية جميلة جداً

وقيس علي كدا امثلة كتيرة اوي

وهحكلكم عن شخص عندنا في الكلية كان سبب كلامي في الموضوع دا

هو رئيس الاركان برتبة عقيد
اشتهر بين الطلبة في الكلية بأسامي كتيرة اوي زي الغول وهولاكو

كان شديد جداً معانا ومكنش بيسيب أو يفوت حاجة لحد

والجزا كان عنده سهل لدرجة لا توصف

يعني من الاخر كان اللي يشوفه ماشي في حتة يحاول يختفي من ادامه بأي طريقة-بدون مبالغة-لأنه مش هيرحمه لو مسكه

دا الجانب السئ أو الوحش اللي كنا بنشوفوه من الراجل دا
طبعا أي حد هيكرهه وهيشتم فيه

مع مرور الزمن في الكلية بدانا نشوف حجات تانية في شخصيته

شفنا فيه القائد الناجح بمعني الكلمة

ايوة هو كان شديد وصارم وصوته يزلزل أجمد واحد فينا


بس كان معاه ترمومتر بيقيس بيه معنويتنا

حاجة غريبة جداً..يكون شادد علينا ومبهدلنا ويعرف يطلع مننا الشغل اللي هو عاوزه في التدريب

اي حد تاني لو مسك مكانه عمره ما بيعرف يعمل زيه


ووصل في نهاية الامر إنه كسب احترام الجميع...


كان اخر يوم ليه في الكلية امبارح للأسف....وفي نهاية التدريب والاستعداد لنزول الاجازة وإنصراف القادة كلهم نزل الراجل دا من علي المنصة ورايح الأستراحة بتاعته لوحده


والله يا جماعة المنظر كان لازم يتسجل

واحد خلص مهمته ورسالته وعمل اللي عليه وماشي بشموخ الجبل معتز بنفسه وراضي عن شغله وتعبه

زي كدا نهاية الافلام لما تلاقي البطل ماشي لوحده رافع راسه

توجهت ليه عشان اسلم عليه واودعه...عملتها تلقائياً وحسيت ان الراجل دا كان صح

بعد عبارات السلام والتحية

قالي يا إبني انا كنت بشتغل لوجه الله.....وكنت بشد عليكم وببقي قاسي....بس مكنتش منافق في شغلي...لأن دا شغلي...

عشان كدا ربنا كان بيبارك في فلوسي ومبارك في عيالي...


مش مهم انال رضي القادة بتوعي بإني اعمل الغلط...المهم اني اعمل الصح
كان ممكن ابقي زي قادة كتير مريحين دماغهم ...بس انا راضي عن شغلي وعملي مدام صح

لما رجعت حكيت لصحابي قلولي انهم كان فعلا نفسهم يودعوه قبل ما يمشي لأنهم اكتشفوا إن الراجل دا صعب اننا نصادفه تاني....علمنا يعني ايه كلمة قائد...ولما نخرج بره في الحياة العملية في الجيش أو في المدنية نعرف ازاي ننجح المنظومة اللي هتبقي تحت ادينا
رسم لوحة عجيبة اوي ممزوجة بالقسوة والشدة والود والحب وعزة النفس

يمكن دي اقل كلمة شكر اقدر اقدمها ليه في نهاية فترة خدمته ونهاية تدريبي وإعدادي العسكري

تحية للعقيد احمد صايم
يمكن يكون كلامي عن شخص محدش يعرفه ميهمش ناس كتير...بس انا بتكلم عن نموذج ممكن نقابله كتير اوي في حيتنا
ممكن يكون النموذج دا هو مدرسك في المدرسة...دكتور عندك في الكلية...ممكن يكون ابوك
سعات كتيرة بنسخط وبنزعل من تصرفات الناس اللي ليها حق علينا
بس يمكن لما الواحد بيكبر شوية ويسترجع مواقف حصلت في الفترات ديه الصورة بتختلف تماماً عن الوقت اللي كان فيه في الفترة اللي فاتت


وللأسف العكس برضو بيحصل كتير

تلاقي اشخاص معادنها رخيصة ...بس تختفي وراء كلمات معسولة..أو مظهر براق

وبننخدع فيها وبنعطيها قدر ومكانة غير جديرة بيها
ودا عشان مبقاش عندنا حكمة في الحكم علي الناس
ونشيل علي رقبتنا ونمجد احقر الناس....وناس كتير اوي تستاهل التكريم بننساها

تموت الأسد في الغابات جوعا......ولحم الضأن تأكله الكلاب


وعبد قد ينام علي حرير......وذو نسب مفارشه التراب


-----------------------------------------



ولله الحمد من بداية 1/1/2008 تم التصديق علي ترقية دفعتنا ...الدفعة 132 احتياط لرتبة ملازم مجند تحت الاختبار

وفي إنتظار حفلة التخرج في النصف الثاني من هذا الشهر






ببارك لكل صحابي اللي كانوا معايا واللي شفنا مع بعض أيام صعبة كتيرة اوي وحياة قاسية

طبعاً اغلبنا مكنش حاطط في الحسبان الوضع اللي احنا فيه وناس كتيرة انا منهم كنا نتمني إننا نكمل حيتنا بره ومندخلش الجيش....بس شاء الله عز وجل إننا نخوض التجربة ديه ونطلع منها بمكاسب مكناش نتوقعها
ويكفي روح الحب والإخاء اللي نشأت ما بينا في فترة صغيرة

ناس من كل حتة في مصر....عشنا مع بعض كأننا شخص واحد

بتمنالهم التوفيق في أماكنهم الجديدة واتمني إن علاقتنا متنقطعش بعد الكلية
وجزاكم الله خيرا

هناك 39 تعليقًا:

محمد عبد الغفار يقول...

كان الله فى العون وجدد النيه دائماً

خمسة فضفضة يقول...

السلام عليكم ورحمة الله وبركاته

كل سنة وانت طيب يا حظابط

والف مبروك الترقيه وعقبال التخرج

النوعيات اللي ذكرتها واللي زي العقيد صايم فيها منها كتير وبجد تستحق مننا كامل الاحترام والتبجيل

ربنا يكتر من امثاله لو في كل موقع عمل منه اتنين اكيد حال البلد هايتغير

تحياتي

šσяšαяαα يقول...

السلاااااااام عليكممم

الف مبرووووك النجوم الجامدة دى

دهب دا واللا قشرة:P

موضوعك دا على فكرة انا كنت هكتب عنه البوست الجاى بعنوان ليس كل مايلمع ذهباً

اكتب عنه ايه انا بقى دلوقت
مليش دعوة انا عاوزة تعويض شوكولاتى او ايس كريمى

بس والحق يقال انا مافتكرش كان هيبقى افضل ماللى كتبته لانك قلت مثال حى وتجربة مريت بيها ودا انا بحسه افضل من الكلام بشكل عام بس

وربنا يجزي القائد العظيم دا كل خير عنكم واتمنى الكل يراعى ضميره فى شغله وحياته

وربنا يوفقك انت كمان وتبقى سيادة لوز قد الدنيااا:))

هو بعد كدا ايه اللى هايحصل
هتتوزعوا على مناطق شغل بقى واللا ايه اصل انا لامؤاخذة جاهلة عسكرية:)

وسلاااااااام

šσяšαяαα يقول...

صحيح انت هتكمل السلسلة اللى بدأتها دى واللا ايه

لما تفضى ان شاء الله ابقى كملها ياريت

محمود الدوح يقول...

الف مليون مبروك
وعقبال حفلة التخرج ياسيدى
وفعلا لازم نحكم على الناس من خلال تجربة والا منحكمش
وعلى فكرة مش شرط التجربة دى تكون معايا
انا شايف ان لو فى واحد ثقة ممكن اسمع كلامة
ودا حصل معايا وعاندت وقلت لما اجرب شخصيتة وفى الاول الساب دا طلع محترم ومهذب جدا
وفى الاخر اكتشفت انة نصاب

mohand يقول...

السلام عليكم

مبروك يا ملازم
الف مبروك وعقبال التخرج

كلامك صحيح
عمر المظهر ما يكون حكم عادل علي الاشخاص

تحياتي
وكل سنه وانت طيب

محمد الجرايحى يقول...

أخى الفاضل
السلام عليكم ورحمة الله وبركاته
كل عام وأنت بخير ومن نجاح إلى نجاح بمشيئة الرحمن

ومبارك عليك الترقية
واعلم أنك الآن فى أشرف مهمة
مهمة الدفاع عن الوطن

وأحييك على الطرح القيم والرائع
تقبل تقديرى واحترامى

أخوك
محمد

ToOoKa يقول...

السلام عليكم ورحمة الله وبركاته

اولا
مبرووووووووووووووووووووووووك

اما بقه بالنسبه للموضوع
ففعلا فى ناس بتأثر فى حياتك ويمكن ما بتحسش بكده غير بعد ما بيمشو بس صدقنى عمر ما اللى اتعلمتو منهم ما بيتنسى

اعتقد انك اكيد تسمع عن مستر وليد اللى بيدرس بيولوجى فى مدرسة 24 اكتوبر

هذا هو معلمى اللى اثر فيا كتير اوى وهو كان سبب انى ادخل كلية العلوم
من اسبوع تقريبا رحت ازورو انا ووالدتى واخدت هديه بسيطه تعبيرا بسيطا عن مدى تقديرى واحترامى ليه
ووالله والله مع انى ما اتكلمتش خالص وماما قامت بالواجب كلو الا انى كنت سعيده جدا جدا
ودايما بفتكرو وادعيلو ولما سمعت انو والدته توفت عملتلها عمره

قصدى يعنى انو اللى بيعمل حاجه بضمير ولوجه الله يمكن ربنا بيكرمو حتى لو حاجه هو نفسو مش شايفها او حاسسها

ثانيا
عندى رجاء انو تتقى الله فى مجالك دا اصل الصراحه اكتر الناس اللى بتمسك سلطه بتغتر بيها
ماتفهمنيش غلط انا مش قصدى حاجه وحشه عنك كل الحكايه انو دلوقتى اللى فى الشرطه او الجيش بقه سمعتهم وحشه من تعذيب واستغلال لنفوذهم وسلطتهم اكيد سمعت القواضى والبلاوى اللى بتتزاع فى الاخبار وبرنامج العاشره مساءا
فخلى بالك من نفسك وحاول تكون مثل جيد وانا ان شاء الله متوقعالك مستقبل سعيد لانك بتتقى الله (احسبك عن الله كذلك )

اسفه طولت عليكم
ارجو انك ما تزعلش منى انا اختك الصغيره اللى ممكن تغلط

ToOoKa

رفقة عمر يقول...

الف مبروك وعقبال التخرج ويارب تكون زى معلمك اللى اتكلمت عنه فى البوست وتكون شخصيه مرموقه زيه واحسن منه كمان
ماشاء الله تجربه العسكريه علمتك وعلمتنا معاك حاجات جميله قوى
ربنا يكرمك يارب ويزيدك من فضله اللهم امين يارب العالمين

عصفور المدينة يقول...

ربنا يكرمك يا حض ظابط ولا يعرف الفضل لأهل الفضل إلا أهل الفضل

ولله الحمد كثيرا ما أقسو على من يعملون معي ولكني أجدهم يحبونني أكثر من غيري رغم أنهم قد يتضايقون من قسوتي أحيانا إلا أنني اكتشفت أنهم يفهمون جيدا لماذا أفعل ما افعل أنت بكلامك هذا شجعتني على مزيد من الحزم
:)
يارب بس ما حدش منهم ييجي هنا

بنت الصالحين يقول...

مبروك ياحضره الظابط
عقبال التخرج
جزيت الجنه وبوركت بذكرك لهذا النموذج الرائع الذى قلما نجد مثله هذه الايام الشخص الذى يقوم بعمله على اكلم وجه لايريد ولا يبتغى غير وجه الله سبحانه وتعالى جل شانه

اللهم اجعله من الصالحين المصلحين
ويبارك له فى زوجته وعياله

وربنا يبارك فى حضرتك ويزيدك من نعمه وفضله اللهم امين

حقوق الضباط الإحتياط يقول...

انتباه يا ح الظابط :D
ازيك يا ابو حميد يا ندل انت,, وبشتم علنى اهو علشان ترفع عليا قضيه وقابلنى اذا كسبتها ( اصل كلام القديم مصدق يا جديد)
انت مش معبر بلاقك شهور ولما قابلتك اون لاين بالصدفه ملحقتش اكلمك, انت هنا فى اجازة اهو الحق كلمنى انهاردة بقى قبل ما تمشى علشان الحق ابارك لك, شفت الايام بتجرى ازاى؟؟؟ هوااااا والله
ومبروك التصديق اللى اكيد اتعلن على المنصه يوم التلات وحرق دم ناس كده
بالنسبه بقى للعقيد احمد فدا راجل زى الفل ربنا يبارك له يارب, كان ينقصه بس تحرى الدقه فى الجزاءات ويشوف نتائجها ايه على الطالب وكمان يتأكد بنفسه من ان الطالب اخطأ ولا لأ,, بص كلنا عيوب ومحدش كامل بس عامة الراجل دا فعلا كويس
وانا فى مكان مع عقيد بيتقى ربنا فى شغله بجد وحابب المكان اللى هو فيه ومع ذلك ناس بتحاربه وبتتريق عليه لان برضه كل حته فيها الحلو والوحش
يالا اراك على خير يا افندم

ma 3lina يقول...

وعليكم السلام ورحمة الله وبركاته

والله يا هندسة بترجعني لأيام الجيش .. بصراحة شفت نموذج العقيد أحمد وكان فعلا ناجح ومحبوب وبيقدر يخرج شغل كويس

لكن برضه في النفس شيء من القسوة اللي بيتعاملوا بيها .. هل معنى استخدام القسوة والشدة اشارة إننا مش بنمشي غير بالكرباج وإن الطيبة مش بتنفع معانا ؟؟ مش عايز امثل لللقيادات بكا كان عليه النبي صلى الله عليه وسلم أو الصحابة لأن احنا مش صحابة ولا تابعين ..

عموما ألف مبارك الترقية وعقبال النسر ياااارب .. تعلقه كده قبل ما تخلص التلات سنين

:D
وطبعا طبعا كل سنة وانت طيب

Unknown يقول...

ما شاء الله

الف مبروووووووووك وبغبطك بجد انك دخلت الجيش .. مش عارفة ليه كان نفسى اطلع ولد عشان ادخل الجيش - ممكن كلامى يكون غريب - بس فعلا بحس ان الجيش ده هو مصنع الرجال الحقيقى .. بيخرج منه تشكيلة مممزوجة بالرجولة وتحمل المسؤلية والشدة والقوة والحزم والحق والواجب ومع ده كله العطف والحب

بجد الف مبروك والف مبروك لكل اللى معاك ويارب تفضلوا فى نجاح كدة طول عمركوا ياااااااارب

اللهم آمين

الراقـــص مع الذئـــــاب يقول...

الاستاذ محمد
جزاك الله خيرا علي تواجدك الجميل

-----------------------------
دكتورتنا الكبيرة
وعليكم السلام ورحمة الله وبركاته
وانتي طيبة يا دكتورة والله يبارك فيكي

جزاكي الله خيرا علي مشاركتك الجميلة

-------------------------------
سارة باشا
وعليكم السلام ورحمة الله وبركاته

الله يبارك فيكي يا سارة ...
ويا ستي خدي التعويض اللي تحبيه
شوكلاته ايس كريم شوربة خضار
معلش بقي انا ما بصدق انزل اكتب موضوع...انتم قاعدين ليل ونهار وشايفين الدنيا
من نفسي بقي
بعد الكلية وحفل التخرج بروح معهد السلاح بتاعي...اللي هو معهد القوات الجوية في الماظة ادرس فيه لمدة 3 شهور...بعدها اتوزع علي اي مطار حربي إن شاء الله

دعواتك بقي يا ست سارة وبخصوص السلسلة هتكمل إن شاء الله وانا محضر موضوع جديد قريب هنزله

سلام

الراقـــص مع الذئـــــاب يقول...

محمود الدوح
الله يبارك فيك
جزاك الله خيرا علي مرورك الكريم
وفعلا الواحد لازم يتحري الدقة في كل معاملاته
وخد بالك من النصابين

---------------------------------
مهند باشا
وعليكم السلام ورحمة الله وبركاته
الله يبارك فيك يا هنود
كل سنة وانت طيب

---------------------------------
استاذي الكريم محمد الجرايحي
وعليكم السلام ورحمة الله وبركاته

جزاك الله خيرا يا استاذي الكريم
الله يبارك فيك وربنا يقدرنا علي فعل الخير والهدف الاسمي هو الاعداد للجهاد للزود عن الاسلام

وتقبل احترامي
اسعدني جدا تواجدك الكريم

الراقـــص مع الذئـــــاب يقول...

توكا
وعليكم السلام ورحمة الله وبركاته

الله يبارك فيكي يا اختي الكريمة

فعلا في ناس كتيرة بتسيب بصمة جميلة في حياتنا
للأسف انا معرفش مستر وليد بس كان عندكم مدرس انجليش اسمه مستر محمد متولي...كان إنسان محترم جدا...كانت باخد عنده كورس في سنة تانية
علي فكرة انا كنت في مدرسة اسماعيلية الثانوية
حاجة جميلة جدا انك تفتكري جميله عليكي وتروحي تزوريه

اما بقي بخصوص رجائك فدي نصيحة جميلة
متخفيش يا اختي الكريمة...انا في الاساسا مهندس ولست ضابط...والوضع دا وضع مؤقت لحين إنتهاء فترة التجنيد وبعدها هرجع تاني عملي الاصلي ...بس دا حق بلدي عليا...
في ناس كتيرة فعلا بتستغل الامر دا استغلال سئ جدا...ودي بتبقي نفوس ضعيفة
سواء في الشرطة او في الجيش
بس الحمد لله كل الناس اللي معانا اغلبهم بيتقي ربنا في الناس اللي تحت قيادتهم
حتي لو شدوا عليهم بيبقي في اساس تدريبي مش افترا

وبعدين زعل ايه بس اللي يبتكلمي عليه
انتي كلامك جميل جدا...جزاك الله خيرا عليه

دعاواتك لينا يا توكا
وشدي حيلك في الامتحنات
-------------------------------
رفقة عمر
الله يبارك فيكي يا اختي الفاضلة
فعلا تجربة علمتني كتير اوي
الحمد لله علي نعمه وعلي منحه
ربنا يجازيكي خير علي مشاركتك الجميلة

------------------------------
عصفور المدينة

ربنا يكرمك يا أستاذ عصفور فانت اهل الفضل حقاً

القسوة او الشدة في العمل إن كانت في صالح الناس وفي صالح العمل عمرها ما تخلي المرؤوس يكره الرئيس ابدا
والي المزيد من التقدم والنجاح وحب الناس يا استاذي الكريم

الراقـــص مع الذئـــــاب يقول...

عاشقة الفردوس

جزاكي الله خيرا علي مرورك الكريم يا اختي الفاضلة...
دعاوتك جميلة اللهم تقبل منا ومنكي

ربنا يجزايكي خير ويصلح لكي دنياك وآخرتك إن شاء الله

------------------------------
ح الظابط ايهاب ملازم اول احتايط مستدعي سلاح حرب الكترونية
انت اللي فين يا عم انت عارف الاجازة بتبقي عاملة ازاي

طبعا العقيد احمد كان بيبالغ في الجزا في حجات كتير...بس صدقني لو كان في حد محتاج ينزل وراح للراجل دا وكلمه بجد كان بيكون رد فعله جميل اوي..ودا حصل ادامي في اكتر من مرة
ربنا يوفقك في
حياتك يا بش ملازم اول ايهاب

دمت في خير اخي الكريم

------------------------------
باشمهندس ماعلينا
وعليكم السلام ورحمة الله وبركاته

النماذج الكويسة كتير والله يا باشمهندس
اما بقي سياسة استخدام القسوة انا شايف غنها ناجحة...عشان ادام عنيا في نفوس ضعيفة بتضيع تعبنا بإهاملهم وتكبير دماغهم... بيجي علي دمغنا احنا بدون اي ذنب
عشان كدا لما اللي معندوش ضمير يلاقي ان في جزاء رادع هيعمل الحاجة غصب عنه وناس كتير اوي مش هتنضر

الله يبارك فيك يا باشمهندس...[س انا طموحي اكبر من النسر في الجيش
انا طموحي في المقص وبرضو في خلال ال3 سنين
:D

كل سنة وانت طيب وجزاك الله خيرا علي مشاركتك الجميلة

-------------------------------
إنسانة
الله يبارك فيكي
انتي ممكن تدخلي الجيش برضو
بس الجيش بتاعكم اسهل شوية
وهو انك تشوفي عملك علي اكمل وجه وتحاولي انك تنجحي في اي مكان وميكنش للهزيمة اي مكان في حياتك
دا ببساطة جدا ممكن يبقي جيش

الله يبارك فيكي وربنا يجازيكي خير

مؤمنه يقول...

السلام عليكم ورحمة الله وبركاته
أولا أفلف مبروك على الترقيه وعقبال التخرج وان شاء الله الى الامام دوما
الناس منها الحلو ومنها الوحش والناس معادن زى ما حضرتك قولت
ولما بنقابل معدن نضيف نحس ان الدنيا كلها نضيفه ولما نقابل عكس كده نحس ان الدنيا كلها عكس كده ومش عارفين نتعايش معاها عشان كده النماذج الكويسه مستحيل الواحد بينساها مهاما فات من الدهر تظل فى الذاكره لا يقوى شئ على نسياننا اياها
وكنت سمعت من احد الشيوخ ان الانسان ذو المعدن الطيب تون سرائره افضل من ظواهره بكثير
لهذا ظل قول سيدنا عمر بن الخطاب يرن فى رتاسى (لنا الظاهر واللهولى السرائر)
ومن وجهة نظرى ان اردت ان تكشف عن معدن احد اغضبه وكل نفس تبوح بما بها وقت الغضب
موضوع اضاف لنا الكثير
والى القادم ان شاء الله
والسلام عليكم ورحمة الله وبركاته

ما علينا يقول...

السلام عليكم ورحمة الله وبركاته

ازيك يا اخ محمد

ترقية مباركة ان شاء الله
ودائما الى الامام بفضل المولى عز وجل

والنموذج اللي انت تحدثت عنه
موجود كتير بينا
وزي انت وزمايلك كدا ما حصل معاكم
ممكن بنتخنق في البداية
لكن مع الوقت مش بتقدر غير انك تكن للانسان دا غير كل احترام

طالما انك بتجد شدته وقسوته مبعثها الحرص على الاخرين
وحقوقهم

الشخصيات التى تجمع بين الحزم والعدل
لا تستحق الا ان نتحترمها ونجلها

ربنا يبارك له ويعزه

ويبارك فيك

كل عام وانت بالف خير

نقطة مية يقول...

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم

Unknown يقول...

السلام عليكم

طبعا أنا عارفة انتو قد ايه تعبتوا
ربنا يجازيكو خير عن تعبكو ده

ويفرحنا بيكو آمين

مبروك عليكو وعلينا الدبورة يا حضرة الظابط

تحياتي

klmat يقول...

الموضوع جميل وبيبين نبل اخلاقك
والعقيد صيام واللى زيه ربنا يبارك
لهم الناس دى جواها حب واخلاص فى العمل
وجميل منك انك سلمت عليه ممكن حد يشوف
ان ده تصرف عادى بس حايكون عنده كبير
وياريت كلنا فى المواقف اللى زى دى نبين حبنا وعرفانابالجميل
مبروك الترقيه الف مبروك وربنا دايما يوفقك
والمثل اللى ذكرته صحيح 100 فى 100
العشره هى اللى بتبين ناس كتير كلامها
معسول بيكون قناع لنفسيه مش تمام
من اجمل مافرأت
بارك الله فيك وكل سنه وانت طيب
وكل اسرتك وحبايبك بخير
تحياتى

رينـــــــــــا يقول...

السلام عليكم
كل سنه وانت طيب يا محمد
والف مبروك يا حضرة الظابط
اكاد اجزم نهائيا ان الانسان فى مظهره مختلف اختلافا كليا عن باطنه
جزاك الله خيرا

رحــــيـل يقول...

السلام عليكم

مبروك على الترقيه انت وزملائك

الموضوع فعلا واقعى جدا
لان احنا بننخدع فى الناس كتير من المظهر وناس تانيه لمجرد انها تبان جد يكون الانطباع عنها سئ
الشخص ده فعلا لازم الواحد يحترمه جدا ويتعلم منه
انا مر عليه موقف مشابه بس كان مع مديره فى شغل وكان الكل بيعملها الف حساب وكانت شديده جدا ورغم ذلك كانت فى قمه التواضع
ورغم انى مكنش ليه اى حوار معاها اخر يوم ليه فى الشغل روحت وقولتها انى لو فى يوم بقيت مديره اتمنى انى اكون زيها
واكيد الكلام ده بيسيب اثر طيب فى نفس الناس دى واعتقد ان ده ممكن يكون اقل واجب ناحيتهم

وربنا يوفقك
تحياتى وتقديرى

د/اجدع بنوته يقول...

مبروك ياباشاااااااا

بقالنا ضهر ف الحكومه يامدونييين

بس ايه ده ياباشا .. ايه الهيبه دى ..

تحياتى للقائد احمد صيام فعلا وانا بامانه مقدره كلامك ده

لاان فعلا انا ف حياتى كلها مقابلتش غير شخصيتين بنفس الوصف ده

الناس دى لو ف منها كتير وربنا كنا بقينا حاجه تانيه فعلا .

لا تانيه كنا بقينا حاجه اولى ..وفيرست كلاس كمان

الف مبروك تانى وربنا يجازيك خير مسبقا عن كل باذن الله اللى هتبذله م مجهود ف سبيل الحفاظ ع شرف الكلمه اللى انت شايلها

يااخوفى ياحظابط لا بعد حفلة التخرج

توقفنا هنا ف المدونه صفا وانتباه وتركب رادار ع باب المدونه ..

لو كده يبقى اعمل حسابى واطلع البطاقه م الكيس النايلون واخليها معايا ع طول تحسبا للظروف

والف مليون مبروك للمره المليون ليك ولكل دفعتك نفر .. لا ظابط ظابط بقى

šσяšαяαα يقول...

كل سنة وانت طيب ياباشمهندس ظابط:)

وعام هجرى سعيد عليك وعلى الاهل وعلى الاصدقاء والمجتمع والناس:)

ربنا يوفقك ونسمع عنك كل خير دايما

ومستنية البوست الجديد

على فكرة الشهر قرب يخلص اهو زى مانت شايف:) مش ناوى تقول برضو عيد ميلادك امتى

قول بس وانا مش هقول لحد.. اكتبه بالحبر السرى:))

وكل سنة وانت طيب مقدما

تصبح على خير

منى يقول...

كل سنه وانت طيب
والف مبروك على الترقيه
يا رب بعد كام سنه كده نلاقى مدون من اللى انت بتراسهم كاتب عنك كلام جميل زى ده
ربنا يبارك فيك وفى القائد المحترم
تحياتى

سلوى يقول...

أولا كل سنه وإنت طيب

ومبروك

البوست فعلا حلو

أنا أذكر مدرس علوم في الإعدادي
كان فعلا بيشتغل بضمير

وكمان في الجامعه
كان في دكاترة مكبرة
ودكاترة لسه أفتكرهم بالإسم
لأنهم كانوا بيشتغلوا بضمير

والذكرى دي هي التى تتبقى من الإنسان
ياااه
لو كانت القاعده هي العمل بضمير
والإستثناء هو تكبير الدماغ

كانت كل الأوضاع هتختلف

تحيااااااااتي

بيتنا القديم يقول...

اولاً الف مبروك يا صديقي..!!

واكيد الراجل ده احنا كمان بندعيلو معاك وبنقف تحية اجلال وشموخ ليه..وارجو وده اكيد انك تحذو حذوه
وتكمل مشوار بدأه هذا الرجل في تكوين شخصيات جميلة زيك انت وزميلك..!!
(:
"..مش مهم انال رضي القادة بتوعي بإني اعمل الغلط...المهم اني اعمل الصح..."
القطعة دي عجبتني لأنها خارجة من قلبه!!
دمت بخير

Doba يقول...

بسم الله ماشاء الله
ربنا يباركله ويرزقه بمقدار عمله الطيب تجاهكم

ويارب يوفقكم كلكم انت واصدقاءك
شكلكو بيبقى بيفرح لما تكونو لابسين كده وعاملين حاجات حلوة

بالتوفيق دايما يارب
تحياتى
هبة

واحدة مفروسة يقول...

ألف مبروك يا باشا وعقبال التخرج

شخصية زى العقيد أحمد صايم تستاهل يترفع لها القبعة أحتراما
ودايما الباطن أفضل من الظاهر
كل سنة وانت طيب
تحياتى

همسات دافئه يقول...

محمد
مبروك:)))الأيام عدت بسرعه
وطبعا عندك حق فى كلامك ناس كتير بتعرف تتكلم انا دايما بابا بيعلمنا حاجه
الى بيقول مبيعملش والى بيعمل مبيقلش
وانا عن نفسى مش بصدق الكلمات اد مبصدق الأفعال عشان كده مش بتصدم فى الناس كتير
منتظراك اصلى جبت سرتك تانى:)
تحياتى
شيماء:)

غير معرف يقول...

ربنا يكتر من امثاله وبجد اللى قال المثل ده احكم رجل فى العالم

د/اجدع بنوته يقول...

ايه ياحظابط انت فيين

لا اسكت الله لك حسسسا

safa7_karmooz يقول...

ربنا معاك...

والناس دى مش بتتعوض خالص ...حتى لو بكنوز الدنيا

بقالى كتير معدتش عليك..

قلت ااجى اسلم..:)

مؤمنه يقول...

السلام عليكم ورحمة الله وبركاته
عل المانع خير
والسلام عليكم ورحمة الله وبركاته

ToOoKa يقول...

السلام عليكم ورحمة الله وبركاته

انت مستخبى مننا فين بس
ولا يمكن مستخبى من الجو البرد دا
انا سامعه انو الجو فى الاسماعيليه دلوقتى برد اوى
سبحان الله الجو هنا حر(فى السعودية)

اه انا سافرت من 5 ايام كده وان شاء الله كلها اسبوعين والاسماعيليه حتنور تانى

ياريت بس تطمنا على حضرتك

سلام

جسر الى الحياة يقول...

مبروك اولا وربنا يوفقك ثانياوثالثا واخيرا ان ذوو المعادن الطيبة من يتركون بصماتهم فى نفوس البشر