Translate

الجمعة، 1 فبراير 2008

اهو كلام والسلام

السلام عليكم


كيف حالكم يا إخواني وأخواتي في الله؟؟

والله والواحد نفسه مسدودة من اللي بقي بيحصل وقرفان من كل حاجة

الآف الأسر والأطفال مشردين في عز البرد في غزة....إختراق المعبر...نقص المواد الغذائية وإستغلال الناس والجشع بتاع التجار

ومن الجانب الأخر ترويج دولارات مزيفة من قبل بعض الفلسطنيين من ذوي النفوس الضعيفة اللي دخلوا في وسط الناس وفي الزحمة

محدش بقي عارف حاجة....

ليس بأيدينا إلا الدعاء لأخواننا ....شعب كتب عليه التشرد من سنة 48...حسبنا الله ونعم الوكيل


دخلت اكثر من مدونة ولقيت الموضوع متناول من قبل إخوة كتير بوجهات نظر كتيرة أوي منها ما أتحفظ عليه ومنها ما أوافقه....يعني كلامي مش هيودي ولا هيجيب....أصل الكلام بقي كتير أوي .....والمواضيع بقت علي قفا من يشيل.....

اللهم إنا نسألك نصر من عندك تشفي به صدور قوم مؤمنين


---------------------------

كلمة ورد غطاها


النت قاطع.....

ماشي...وايه يعني

الحياة تصاب بالشلل...

ينهار ابيض...ما الناس حلويين اهم وكويسين أبويا قاعد بيشرب شاي وبيتفرج علي الماتش وأمي بتحل الكلمات المتقاطعة....مفيش جديد يعني

البحث عن حلول سريعة لإستعادة جزء من السرعة.....

فيهم الخير والله....الناس ديه بتتعب أوي

إستعادة كفائة النت بنسبة تتجاوز ال 80%.........

علي يددددددددددددي

بعض الشركات تستخدم الطرق القديمة و التقليدية لحل مشكلة إنقطاع النت....

من فات قديمه تااااااااه

تعويض مستخدمي الانترنت عن شهر بسبب الاعطال.....

لما نشوف


سبحان الله.....ومن العلم ما قتل

-----------------------------------------


الفراغ بقي واللي بيجري فيه


فتحي ومحمد ويوسف ووائل وايهاب.....قاعدين بيحكوا مع بعض عشان مش وراهم حاجة في كلية الضباط الاحتياط

أصل الجو برد والرايح والأمطار والعواصف جت فايدة وراحة وأنتخة للناس

الكلام كان عن الخطوبة والجواز

فتحي شاب محترم يملك من العمر 28 سنة من مدينة( المنزلة) اللي تبع محافظة الدقهلية خريج هندسة

إتقدم لبنت ناس طيبين ومحترمين وكتب كتابه ومستني الدخلة

طيب وبعد الجيش يا باشمهندس فتحي هتعمل ايه؟؟

رد بحيرة وقال مش عارف....بس ربنا ييسر إن شاء الله والاقي شغل

وائل (اللي من حلوان) سأله بواقعية طيب لو ملقتش شغل هتعمل ايه؟؟

يرد فتحي ويقول والله الناس محترمين ومتمسكين بيا ومعايا للأخر ودا اللي مشيلني الهم ومحسسني بالمسؤلية

يوسف (اللي من طنطا) يعترض علي سؤال وائل ويقوله أهم حاجة الشخص اللي متقدم ...الراجل دا محترم والا لا...مش مهم بقي بيشتغل ايه....أهم حاجة أخلاقه ودينه وأصله الطيب

أكيد هيشتغل إن شاء الله ...

للعلم كل الناس اللي قاعدة خريجين هندسة

يرد ايهاب (اللي من اسكندرية) لالالا يا جماعة لازم الاخذ بالاسباب...الشغل مهم ...ايه اللي يضمن انه يشتغل بعد الجيش....انا من رأيي انه يلاقي شغل الاول وبعدين يتجوز....طبعاً ايهاب بيتكلم علي المبدئ مش علي فتحي....يعني كلامه بصفه عااااامة

وانت يا ابو صابر (اللي من اسماعيلية) ايه رأيك في الكلام دا...؟

يرد ابو صابر ويحكي عن موضوع حدث بالفعل معاه وفشل موضوع خطوبته لبنت كويسة بسبب ان لسا مشتغلش في شغلانة ثابته ومش عارف مصيره بعد الجيش....

مع العلم بتوافر الامكانيات المادية ووجود شقة محترمة بفضل الله

يرد يوسف بسرعة:

عشان انت اخترت غلط...ودخلت البيت الغلط

ايهاب يعلي صوته ويقول:

لا....هو مدخلش البيت الغلط....من حق أي أسرة إنهم يخافوا علي مستقبل بنتهم ....ودا يا جماعة أسمه الاخذ بالأسباب

وتفرق الموضوع ما بين معارض للأرتباط الرسمي في هذه الفترة وما بين الموافق


ودي مشكلة ناس كتيرة أوي وشباب كتير.....المانع ممكن يكون الجيش...او إنه بيشتغل في شغلانة مش ثابته ممكن يسبها في أي وقت

طيب الحل ايه؟؟؟

نقعد ونستني لغاية لما نلاقي شغلانة ترضي الناس.....؟؟

والا في ناس ممكن تجوز بناتها لشخص محدود الامكانيات المادية لمجرد إنه علي خلق ومحترم

وهل لو أهل البنت عندهم خيار بين واحد جهاز ماديا ومعندهمش ثقة في أخلاقة وما بين واحد مش جاهز ماديا بس واثقين في اخلاقه

يا تري هيختاروا مين؟؟


يقول رسول الله صلي الله عليه وسلم

( إذا أتاكم من ترضون دينه وخلقه فأنكحوه )


بس بيني وبينكم....الحياة من غير مسؤلية جميلة ....



----------------------------------------------


انتظروني الاسبوع اللي جاي يوم السبت 9/2/2008

حفل التخرج

اخيييييييييييييراً

وبما انكم كنتم معايا لحظة بلحظة من يوم 22/4/2007

من يوم الرحيل

هيكون موضوع شكر ليكم كلكم


ادعولي بقي إن اليوم يعدي علي خير .....اشوفكم بعد يوم 9/2



هناك 17 تعليقًا:

ToOoKa يقول...

السلام عليكم ورحمة الله وبركاتة
هيييييييييييييه
التعليق الاول

والله أفتقدناك ثوانى بقة حرجع اقرأ الموضوع واجاى طوالى

ToOoKa يقول...

السلام عليكم
انا جيــــــــــــت
سؤال بس محيرنى مادام النت قاطع فى مصر انت دخلت ازاى؟

المهم
طبعا البوست اتكلم على حاجات كتير واكتر حاجة بجد دايقتى استغلال التجار للفلسطينيين

اما بقة الموضوع الاساسى فكان تقريبا عن الجواز
امممممم
والله انا مش عارفة لانو انا البنت الاولى والاخيره وعمرى ماشوفت حد بيتجوز ادامى وايه على العريس وايه على العروسة

بس انا مقتنعة انو اهم حاجة فى الانسان اللى ارتبط بيه دينو واخلاقو وانو المستوى التعليمى والاجتماعى يكون متقارب
اما حكاية المديات دى اخر حاجة
يعنى ممكن اتجوز واحد بيشتغل شغلانه كويسه وثابته وبعد الجواز تحصل مشاكل ويستغنو عنو

انا قصدى انو ربنا هو الضامن لا فلوس ولا الصحة مضمونة

يعنى الاساسى الدين والاخلاق لانو دا اللى مش ممكن يتغير مهما تغيرت الظروف

معرفش دا رأيى

على العموم ياااااااااااارب يرزقك بالزوجة الصالحة والشغل اللى يرضى ربنا انت وكل صحابك

ومبروك يا بشمهندس
افرااااااااااااااااااج
أختك توكا

david santos يقول...

Thanks for posting. Is very good.
Have a good weekend

Vague يقول...

السلام عليكم

انا كمان مخنوق زيك
لان في مؤمرة بتحصل بيحكي عنها بالتفصيل د.حماس

بس انا شايف ان مصر مش مقصرة وده حقها

..
النت رجع حلو اهو ياعم ولا تزعل
بس حكاية شهر ببلاش دي مسمعتهاش غير منك
بس احب اقوللك انسى..ولا الدموع

الف مبروك على التخرج.. هتبقى ايه كده بقةى؟؟

بنت الصالحين يقول...

الله اكبر

ماشاء الله
مستنيين حفل التخرج
وربنا يكرمك وتبقي اجمل حفله تخرج

::::::::::::::::::::::::::::::

بالنسبه للفلسطينيين واللي بيحصل في الوقت ده
فمش هقول غير حسبنا الله ونعم الوكيل


:::::::::::::::::::::::::::::::::::


موضوع الجواز

مممممممممممممممممم


اعقدك
انت ذكرت حديث رسولنا وحبيبنا محمد بن عبد الله
جميل جدا

بس ايه رايك بقي
في واحدجاهز وعنده شقه وشغل ثابت وقبل كل ده اخلاق ودين وعلم

وبرده مبهدلينه يبقي ده اسمه ايه


علي فكره دي فزورة :((

وربنا يرحمنا

خمسة فضفضة يقول...

السلام عليكم ورحمة الله وبركاته

ازيك يا باشمهندس ، وحشتنا


مش مصدقه ان فات عشر شهور من يوم الحفله الجميله اللي ودعناك بيها
يااااااااااااااااه دي الايام بتجري جري

ربنا يوفقك ان شاء الله ويعدي حفلة تخرجك علي خير وان شاءالله تتوزع في حته كويسه

د/اجدع بنوته يقول...

ماشاء الله .. ثرى ان واان

ايه الافكار دى كلها ..

انت شكل العسكريه ظبطتك فعلا

تعليقى ع موضوع غزه .. ياااارب

تعليقى ع النت .. كله ف الاول وعود

تعليقى ع حفلة التخرج .. يارب بالتوفيق

تعليقى ع حوار الارتباط

بتهيالى الفيصل ف الموضوع ده الطموح

اى بنت تتجوز ولد طموح ومعندوش شغل ثابت .. لانه باذن الله هيوصل

عن انها تتجوز واحد شغال حكومى حتى وميكنش عنده طموح

والله اعلى واعلم

مستنيين حفلة التخرج

عايزينك تصور كل شبطه تحصل فيها

تحياتى

همسات دافئه يقول...

محمد
مستنيه الحفله بكل التفاصيل:)
بالنسبه للإرتباط طبعا لازم يكون بيشتغل أى شغلانه حتى لو مش ثابته ولازم الزوج هو الى يصرف على مراته مش حماها ولا حمتها
عارف يامحمد المصيبه دلوقتى انى بلاقى اسر كتييييير يجوزوا الولد وهو صغير ويدوله مصروفه ومصروف البيت هو ومراته أهو بقى الدين والأخلاق دول لو عنده فعلا مش هيسمح بكده
وبعدين فى حديث تانى انت مذكرتوش

يا معشر الشباب من استطاع منكم الباءة فليتزوج فإنه أغض للبصر وأحصن للفرج ومن لم يستطع فعليه بالصوم فإنه له وجاء

*********
وبالنسبه للنت فى حاجات كتير اوى اتحكمت فينا لدرجه ان هى الى بقت تحركنا مش احنا رغم انها من صنعنا ...للأسف
ومبروج مقدما على التخرج:):)

mohand يقول...

السلام عليكم

هو انا معلقتش

طيب مش تقول يا راجل


طيب الحفلة عليا



وانت عارفني لما بوعد

ToOoKa يقول...

السلام عليكم ورحمة الله وبركاته

بدأ العد التنازلى


فاضل 6 اياااااام

ToOoKa يقول...

السلام عليكم ورحمة الله وبركاته

باقى من الزمن 5 ايام

د/اجدع بنوته يقول...

سمحت لنفسى .. انى اقدملك تاجين هديه

هتقبلهم ..

النبى قبل الهديه ؟؟

ع العموم هما عندى .. شرفنى وخدهم

ToOoKa يقول...

السلام عليكم ورحمة الله وبركاتة
مين الشاطر اللى بيحسب معايا

فاضل 3 ايااااااااام

هانت خلاص

ToOoKa يقول...

السلام عليكم ورحمة الله وبركاتة
النهرده 7 فى الشهر

فاضل بكره وبعدو اليوووووووووووم المنتظر

Doba يقول...

تخجر سعيد بإذن الله وربنا ينجح مقاصدك يا محمد ويوفقك لما يحب ويرضى

موضوع الجواز بقى فده بيرجع للأسرة يعنى انا ممكن فعلا اخد واحد اون واثق انه هيصون بنتى واصبر وانتظر عليه لغاية مربنا يوفقه وفيه ناس تانيين بيبقو حابين انهم يتطمنو على بنتهم سواء بقى ماديا او معنويا او ما الى ذلك فبيفرق الموضوع جدا فى اسا تربية الاسر دى واهتمامتهم وفكرهم

ومتقدرشى تحط مبدأ واحد يتطبق عليهم
والنقطة الاساسية فى الشخص هى مقدرته على تحمل المسئولية لان كتير من الشباب ممكن يرتبط ويأنتخ مش يتحمل المسؤولية ويتنيه مستنى وظيفة الوزير اللى تليق عليه

تحياتى وامنياتى بيوم تخرج جميل
وبالتوفيق دائما

هبة

ToOoKa يقول...

السلام عليكم ورحمة الله وبركاتة
النهرده 8

هيييييييييييييييييييييه
مبروووووووووووووووووووووك
علشان بس اكون اول واحده تقولهالك
لانو ان شاء الله النهرده الفجر مسافرة المدينة
ومش حكون موجوده علشان اقولهالك

يلا بقة بس ما تنساش تجيبلى حتت جاتوه وحطو تحت عتبة باب المطار والسبت اللى جاى ان شاء الله حتسحب كده بشويش وأخدها

احلا سلام
أختك توكا

د/اجدع بنوته يقول...

انا جيت بس اشاركك اللحظه

باقى ع التخرج 12 ساعه اهو

اتمنى ليك يوم جميل جدا

وبدايه موفقه لحياه جديده

بالتوفييييييييييييييييييييق