Translate

الخميس، 13 مارس 2008

السعادة


السلام عليكم

كيف الحال يا شباب....يارب تكونوا ديماً في خير وسعادة



حبيت ادردش معاكم كدا في موضوع احنا محتاجينه كلنا
موضوع السعادة.....بقت صعبة اوي اليومين دوله.....
معاكم حق والله....هو بقي في ايه يفرح في حيتنا
المسلمين اللي بيتقطعوا في غزة وفي كل حتة في العالم
والا رغيف العيش اللي بقي الحصول عليه اصعب من الحصول علي الفيل الاحمر اللي بيطير تحت المية
والا ارتفاع تمن الزيت والسكر والسمنة والحديد.....طن الحديد بقي مش عارف بكام؟؟ اسهل اننا نزرع سبانخ ونعصرها ونطلع منها الحديد
والا مشكلة الحضري وفضيحة الاهلي اللي بقت علي كل لسان (علي رأي ابو منص)
يعني مشاكل كتيرة لو قعدنا نعدها مش هتخلص

بقت الدنيا دمها تقيل اوي....والناس مفتقدة حتة السعادة
عارفين ليه الناس مش لاقية السعادة؟؟
عشان هما بيدوروا عليها في مكان غلط
ايه الفوازير ديه يا عم انت؟؟؟
ايوة محدش هيلاقي السعادة لو دور عليها بالطريقة التقاليدية بتعتنا
هوضحلكم اكتر
ايه هو احسن وأأمن مكان المجرم ممكن يستخبي فيه من الشرطة؟؟؟
ايوة صح...قسم الشرطة نفسه
يبقي الشرطة هتموت نفسها وهي بدور علي فلان ده وهو مستخبي عندها ومش هيخطر ببالها ابدا انها تدور جواها

السعادة يا اخواني جوانا احنا...((((كمسلمين))))....ربنا رزقنا بالسعادة وزرعها جوانا...بس للأسف احنا بندور عليها في حتت تانية


بندور عليها في ماتش كورة...في فيلم...في خروج وفسح....في فلوس ...في سفر ...في تغيير عربية موديل السنة...في موبيل تمنه 3000 جنيه

طيب هو لو انا عندي الحجات ديه كلها وبعمل الكلام دا كله هبقي سعيد؟؟؟

لا طبعاً...والدليل علي كدا الناس بتاعت سويسرا اللي بينتحروا إنتحار جماعي

ادينا قربنا شوية...خلينا نقرب كمان ونقول حاجة جميلة اوي

هنقول إن السعادة زي الجمال
والجمال نسبي....يعني مفيش حاجة اسمها فلان جميل ومفيش حاجة اسمها فلان وحش - بنتكلم علي الشكل
تلاقي واحدة لا مؤخذه شبه الصندل و في شباب مموتين نفسهم عليها وبيعيطوا من حبهم ليها
اللي بيحبها دا شايفها جميلة في نظره....مع ان في ناس تانية شايفين إنها مش حلوة

اهو السعادة زي كدا بالضبط....ممكن تكون سعيد بحجات ناس تانية غيرك يستغربوا انك سعيد بالحجات ديه ازاي
وهما عندهم كل اساليب السعادة (الدنيوية) مش حاسين بيها
والسؤال ..... امتة بتكون سعيد او تحس بالسعادة
الاجابة كلمة واحدة بس......

عارفين ايه هي الكلمة ديه؟؟؟

الرضي..... السعادة في الرضي
نشرح ونوضح
احنا ليه ديما بنحب الرسول صلي الله عليه وسلم شفوي؟؟
ايوة بنحبه شفوي...يعني بنقول إننا بنحب النبي صلي الله عليه وسلم بللسان وليس بالفعل
ولما حد يقولنا حاجة من سنة النبي .....نقول اصل مش لازم نعملها عشان هي سنة
وكأن السنة ديه حاجة مكتوبة في الكتب بس و من حقنا إننا منعملهاش
وتيجي تكلم واحد في امر من اوامر الله عز وجل ورسوله تلاقيه اتنحنح كدا وعدل نفسه ويقول اصل الموضوع دا سنة مش فرض
اهو الرسول اللي بتدعي حبه حط في ايدك مفتاح السعادة الابدية
يقول الرسول صلي الله عليه وسلم
ارضي بما قسمه الله لك تكن اغني الناس
والله الذي رفع السموات بغير عمد السعادة والغني في الرضي بما قسمه الله لعبده
طيب والرضي دا هيجي منينن؟؟
الرضي دا هيجي لما تغتنم من الكنوز التي لا تعد ولا تحصي....وسعتها هتحس بالسعادة

هتحس بالسعادة وانت ماشي في الشارع ورايح تصلي الفجر في جماعة وغيرك نايمين ومش حاسين - الصلاة علي وقتها
هتحس بالسعادة لما شفيافك تتقطع من العطش وانت صايم نافلة في يوم حر وتيجي ساعة المغرب تفطر علي ما رزقك الله - الصيام
هتحس بالسعادة لما تقف بين يدي الله عز وجل تصلي بالليل والناس برضو نايمة ومش حاسين بحاجة - قيام الليل

هتحس بالسعادة وانت بتقسم فلوسك وعامل حساب الفقير والسائل والمحروم فيها - الصدقة

هتحس بالسعادة لما تجيب هدية صغيرة لأبوك وأمك وتشوف الفرحة في عنيهم بالهدية حتي ولو كانت صغيرة - بر الوالدين

هتحس بالسعادة لما ترفع سماعة التلفون وتتصل بحد قريبك بعيد عليك وتقوله كلمتين حلوين - صلة الرحم

هتحس بالسعادة لما تمشي في الشارع تقارن حالك بحال من اهم اقل منك...ولا تبالي بمن هم اغني منك - التفكر والحكمة
هتحس بالسعادة وانت بتتعامل مع الناس بوجه طلق...سعيد مبتسم وكانك اغني واحد في الدنيا - حسن المعاملة
ياااااااااااااه ولسا كتير اوي
انا مش عاوز اقولكم جربوا يا جماعة....عشان لازم تعمل الحجات ديه بيقين مش علي سبيل التجربة
وقتها الدنيا كلها هتتصلح....

منين حال البلد هينصلح والمساجد تشتكي هجر المصلين??

مش بالمظاهرات والكلام الفارغ دا بتاع الاحزاب والحركات العبيطة اللي فاكرين نفسهم حاجة وهما ولا حاجة...جتهم نيلة...واللي هيكلم معنديش غير ابو صابع....
منين كلاب الغرب هيبطلوا الاساءة للأسلام ولرسول الله صلي الله عليه وسلم??
مش بالصور وحملات المقاطعة والتوقيعات يا جماعة
مقاطعة ايه اللي هتوقف الناس ديه
احنا ناس غلابة....لا بناكل زبدة ولا جبنة ولا البان مستوردة.....يعني احنا مقاطعين من الاساس
دا انا لما بشرب كوفي ميكس برمي الكيس علي باب الشقة عشان الجيران يعرفوا اني بشرب كوفي ميكس.....خلو بالكم كوفي ميكس غير كوفي عنان
مقاطعة مين ...وحدوا الله وصلوا علي النبي

بقي ملخص الكلام دا كله إن السعادة جوانا احنا وموجودة عندنا....ومفتحها برضو في ادينابالله عليكم استخدموا المفتاح ...وكفاية بقي اللي ضاع من عمرنا ولحنا في نكد وهمّ وغم ّ ومحصلناش اي حاجة غير الخسارةلسا في وقت للمكسب إن شاء الله
اللهم ارزقنا والمسلمين الرضي والسعادة في رضوانك وحب رسولك محمد صلي الله عليه وسلم
---------------------
دبوس

بناء علي إقتراح الاخت مجداوية هنعمل في نهاية كل موضوع دبوس صغيرودبوس المرة ديه هيبقي للأخوة المدخنين
مش هنتكلم علي اضرار السجاير لأن كلنا الحمد لله مثقفين وعارفينها....دا حتي شركة السجاير رسمتهلكم علي العلبة بطريقة بشعة اوي

معلش الصورة مش واضحة بس اللي عليها صورة رئة محروقة ومكتوب فوقيها :

احترس التدخين يدمر الصحة ويسبب الوفاة

واللي مكتوب تحت الصورة....سرطان الرئة بسبب التدخين

----------------


هنتكلم بس عن حقوقنا كأشخاص غلابة عاوزين يتنفسوا شوية هوا نظاف شوية

يا سيدي من حقك تشرب سجاير ....بس محبكتش بقي تنفخ في وشي دخان الزفت دا

علي فكرة أنا كنت مدخن بس ربنا تاب عليا ولله الحمد وبدعي لكل مدخن إن ربنا يتوب عليه
ياريت الجماعة اللي بيدخنوا يخدوا بالهم من الموضوع دا



ربنا يهدي




هناك 16 تعليقًا:

د/اجدع بنوته يقول...

اول كومينت

هيييييييييه

راجعه فورن

د/اجدع بنوته يقول...

الله عليييييييييييييييك

لا فض فوك فعلا

السعاده جوانا احنا شخصيا

ونستمدها م حجات ترفعنا

ومهما حصل فعلا اللى عايز يبقى سعيد هيبقى

بوست سلام نفسى محصلش

اما عن التدخين

حسبنا الله ونعم الوكيللللل

لا عارفين نخليهم يبطلوها

ولا عارفين نخليهم يمنعوا تضنيعها

والحال ع ماهو عليه

mohand يقول...

جيت احجز مكان واعلق بكره

فظيع والله ياابو صابر

هههههههههههههههه

عصفور المدينة يقول...

يقول بن القيم رحمه الله

غنيت بلا مال عن الناس كلهم
فإن الغنى العالي عن الشيء لا به

خمسة فضفضة يقول...

السلام عليكم ورحمة الله وبركاته

ربنا يسعد ايامك يا محمد

بس عارف حلوه اوي حكاية الفيل الاحمر اللي بيطير تحت الميه دي جبته منين ده



من خحوالي ساعه حاولت ادخل هنا ماعرفتش ياتري ايه السبب ؟؟؟

بنت الصالحين يقول...

تدوينه هايله وفي وقتها مظبوط



الرضي والله هي طريقنا للسعاده

بس برده انا شايفه ان جه الوقت نقاطع المنتجات
مش اقصد الدنماركيه لاننا ماعندنا ش ولا بنستخدم اي منتج دنماركي
انا بتكلم علي كل المنتجات الامريكيه والاوربيه
جه الوقت بقي ان احنا نتنج
مهما شوفنا ظروق ومهما قابلتنا مشاكل


انا عارفه ان ممكن تقول اني خياليه
او اي حد هيقول اني خياليه
بس واله احنا نقدر نعتمد علي نفسنا
بالشباب
والله اشعر فيهم بالامل
والله المستعان


ربنا يباركلك

Empress appy يقول...

اولا ازيك ايه الغيبه دى يا رب تكون بخير
ثانيا اقولك على سر بقى فى موضوع الرضا بس متقولش لحد ومتشردش ليه
انا كنت اول واحده ناقمه على حياتها بكل شئ على الرغم من انى متوفر ليه كل حاجه فى الدنيا
بس حياتى تحولت من اكتر من ارع سنين لما سمعت عمرو خالد فى الشريط بتاع الرضا بجد حياتى اتغيرت حتى لما حصل كده وبقيت من جوايا باقتناع بحمد ربنا وراضيه بقيت طول الوقت سعيده جدا وربنا كمان ادانى كل حاجه عاوزاها الحمد لله

ربنا يبارك فيك بجد
اما الدبوس فشك جامد بس انا مش مدخنين سجاير عاااااااااااااا انا شيشه بس الحمد لله بدأت ابطل فعلا صحتى بقت زفت ميرسى ليك على كلامك

مجداوية يقول...

ايه الجمال ده ,,والله فى منتهى الجمال ,وخصوصا ذكرك اسم مجداوية بتقترح دى ,,,أنا بأهزر والله ,وانا لما اقترحت عليك كده لأنى وجدتك بتشك الدبوس بمهارة شديدة فالهدف كان الاستفادةفقط والله على ما أقول شهيد ودبوس هذه المرأة هايل بس كان عايز شوية صور واضحة عشان الناس اللى بتدخن تخاف على نفسها رغم انهم عارفين أضرار التدخين سبحان الله كأنهم بيتعمدوا ايذاء أنفسهم ودفاعهم ان العمر واحد ولو مش حيموتوا من السجاير حيموتوا من غيرها ولكن نسيوا انها اهدار للمال والصحة واللى ربنا حيحاسبهم عليهم لأنهم أمانة ضيعوها والحمد لله ان ربنا تاب عليك أخى الكريم ,,, أما عن السعادة فهى فى مفهومى هى الاستغناء فالاستغناء يعطى احساسا بالحرية وعدم الخوف والأمان لأن الملجأ والمعين والرازق هو الله فالاستغناء عن ما عند الناس والاستعانة بالله هى السعادة مع كل ما ذكرته أنت من أفعال المسلم الحق تكن أغنى الناس وأسعدهم ,,اسعدك الله وجزاك عنا كل خير

Unknown يقول...

ربنا يبارك فيك
والله لسه كنت بااتفرج علي درس وكان الشيخ يتكلم عن الامن العقائدي في نفس المسلم وكيف ان لو المسلم تمسك بدينه وعقيدته اطمئنت وهدئت نفسه بفضل الله وكان يضرب مثل بالغرب وحالات الانتحار هناك
السعاده في توحيد الله وطاعته فقط والا فلا
----------------
اما عن موضوع الدانمارك
اختلف معك
اسوء شيء في الدنيا ان تسكت وتصمت علي الاهانه واي اهانه اهانة النبي
صلي الله عليه وسلم
ماطرحته انت صحيح ,ولكن ايضا المظاهرات والمقاطعه امر صحيح ولاننكر علي من يفعل ذلك ,المقاطعه تهزهم فعلا وتحدث لهم تخبط علي فكره انا لاباكل زبده والالبان بتاعتهم دي ولا الحجات دي بس دي كيانات اقتصاديه لما تقاطعهم يهتزوا ويتزلزلوا
ولو كل واحد بدا بنفسه المشكله هتتحل
ثم ان الحجات دي اقل القليل في العمل يعني مينفعش نعتمد عليها فقط
وعلي فكره النبي صلي الله عليه وسلم قام بالمقاطعه
فقد قاطع اليهود في المدينه وامر المسلمين ان لايشتروا منهم
وجاء بحر ووضعه ومشي حتي وضع حجر اخر ليحدد مكان السوق وقال من كان يؤمن بالله واليوم الاخر فليشتري وليبتاع من هنا,
وان كانت لرؤيتك كل الاحترام
---------------
موضوع الدبوس
لقد اسمعت لو ناديت حيا...ولكن لاحياة لمن تنادي
ربنا يتوب علي جميع عصاة المسلمين
وجزاكم الله كل خير

المـــفـــــــقــــــــوعـــــة مــرارتـهــا يقول...

ربنا يسعدك ويسعدنا معاك

اما عن الدبوس
انا نفسي اعرف بطلت تدخين اذاي جايز تقدر تفيد حد بتجربتك مش قادر يبطل وماعندوش ارادة نفسي البلد تنضف من السجاير كلها .. انا مش باحب اشم ريحيتها

البنت الشلبية يقول...

الله عليك
جزاك الله كل خير
انا عارفة الكلام الى انت بتقوله لكن محتاجة انى اقراه او اسمعه عشان احس بيه اكتر
السعادة هيا الرضا عن نفسك وده بعمل الخير والصح لان النفس البشرية مهما كانت ديانتها عمرها ما هترضى عن نفسها وهيا بتعمل شر
وبرضاك عن نفسك اكيد هيبقى عندك امل ان ربنا يرضى عنك

كلامك واسلوبك جميل جدا بارك الله فيك

منى يقول...

احنا ليه حارمين نفسنا من السعاده

ده كان اول بوست كتبته فى حياتى فى اول مدونه عملتها فى حياتى برضه ومفيهاش غيره لانى نسيت الحساب والايميل بتاعها
بس كمان كنت بتكلم ان ازاى تخلى غيرك سعيد معاك
هى فعلا الرضا
زى ما بيقولوا
لقد اصبت كبد الحقيقه
الموضوع ده فكرنى بحاجات جميله
وفعلا فى حاجات بعملها وحاجات مش دايما
بس انا مش هحرم نفسى من السعاده تانى
وان شاء الله يبقى ليك نصيب من الاجر معايا
جزت خيرا

الراقـــص مع الذئـــــاب يقول...

السلام عليكم
د/ اجدع بنوته

السعادة بالفعل جوانا

جزاكي الله خيرا علي المرور ورزقك الله السعادة

-----------

مهند باشا


جزاك الله خيرا علي المرور وكل سنة وانت طيب

--------------

استاذنا الكبير عصفور المدينة

غنيت بلا مال عن الناس كلهم
فإن الغنى العالي عن الشيء لا به


رحم الله الامام ابن القيم

الراقـــص مع الذئـــــاب يقول...

دكتورة خمسة فضفضة

وعليكم السلام ورحمة الله وبركاته
وربنا يسعدك يا دكتورة

اما بخصوص الفيل الاحمر فأنتي روحي اي فرن عيش...وهنلاقي واحد واقف بيهم بره عشان اللي يعرف يجيب عشرين رغيف ياخد معاه فيل


بس ايه حكاية انتي معرفتيش تدخلي ديه؟؟

هو حد يقدر يمنعك؟؟

تلاقي بس حاجة في الموقع مش تمام

اسعدني جدا مرورك يا دكتورة

-----------------------------

عاشقة الفردوس
ايوة احنا نقاطع مقلتلش حاجة يا اختي الكريمة

بس مش هو دا الحل النهائي...او احنا بكدا عملنا اللي علينا

في حجات تانية انفع بخلاف المقاعة
ربنا ينصرنا


---------------------

آبي

متخفيش...مش هقول لحد علي السر

فعلا ديما الواحد محتاج يعرف طريق خجات كتيرة في حيانه

وربنا يسعد ايامك يا آبس

اما بخصوص الدبوس فدا زعلني شوية منك يا آبي
ويارب اسمع منك حاجة تفرحني بخصوص الموضوع دا
عشان الوضع بالنسبالك مش هيبقي زي الولاد لنا نقولهم بطلوا تدخين

وربنا يجعلني سبب فدا...زي كا انتي بموضوعك بتاع الرشوة بتاع الموظف خلتيني انصح بيه الناس وأقولهم إن بنت رفضت الغلط
واصرت علي موقفها في موضوع كان اي حد فينا ممكن يقع فيه

وضربت ليهم مثل علي اللي انتي عملتيه
والله ناس اتكسفت من نفسها


شفتي بقي ان ممكن موقف صغير تعمليه وتتكلمي عنه بإخلاص ممكن يعمل ايه؟؟

ربنا يهدينا

الراقـــص مع الذئـــــاب يقول...

مجداوية
طبعا لازم اسمك هيتقال وخصوصا انتي صاحبة الفكرة
ربنا يجعلها نافعة ديماً

نعم اختي الكريمة
السعادة في الاستغناء
اللهم اغنني بفضلك عمن سواك

جزاكي الله خيرا علي المرور الجميل

-------------------------
الفاتخ الجعفري
بارك الله فيك علي كلامك الجميل
انا مقلتش غننا منقطعهمش
اللي قلتوا الحل مش بالمقاطعة
ممكن تكون سبب انا معاك...[س هيبقي سبب لسيط جدا وفي اعتقادي غير فعال
والتجربة تثبت ذلك
مش حثل وعملناها قبل كدا؟؟؟
اظن مفيش حاجة اتغيرت
اما في عهد الرسول صلي الله عليه وسلم كان المسلمين قوة واليهود او الكفار ضعاف....مش زي دلوقتي...
اما بخصوص المظاهرات فدي انا مش معاها قلباً وقالباً
واللي نوهت عليه في الموضوع حركات واحزاب زي كفاية وما شابهها...يعني المظاهرات السياسية من الاخر...
وبرضو احترم وجهة نظر حضرتك في هذا الامر

وربنا يتوب علينا وعلي عصاة المسلمين

الراقـــص مع الذئـــــاب يقول...

المفقوعى مرارتها
وربنا يسعد ايامك ويهدي لك حماتك

اما بخصوص منة ربنا عليا بترك التدخين بعد ما عرفت انه خرام
وربنا حطمي في اختبار ومحنة يطول شرخها
قررت من بعدها تغيير حياتي
والحمد لله نفعتني بالكثير ولله الحمد


ربنا يهدي الناس ويهدينا
جزاكي الله خيرا علي مرورك الجميل

------------
البنت الشلبية

انتي فيييين من زمان

كلامك جميل يا بنت يا شلبية

اللهم ارزقنا الرضي

-------------
مني

فعلا احنا اللي حارمين نفسنا من السعادة
معلش...البوست مضعش ولا حاجة
مدام انتي كتبتيه وانتي عيشاه
ديما لما الواحد بيكتب موضوع من جواه بيوصل للناس بحق