Translate

الخميس، 28 فبراير 2008

دبابيس

السلام عليكم
شوية دبابيس كدا علي الماشي
الدبوس الاول
الحجاب
مش حتة قماش تغطي الشعر وبس....لا ....الحجاب هو ستر جسد المراءة بالكامل وعدم إظهار مافتنها
إنما اغطي شعري واكشف مش عارف ايه يبقي مسموش حجاب
اسمه مسخرة
والنقاب برضو....مش معناه إني اغطي وشي وادلع....عشان الدلع مع النقاب مينفش....
الاخوات الفضليات اللي بيلبسوا نقاب ويدلعوا ياريت يعملوا حاجة من الاتنين
يبطلوا دلع ويحترموا النقاب...او يخلعوا النقاب ويدلعوا براحتهم...وبرضوا هيبقوا بيحترموا النقاب
عاوزين تعرفوا الدلع دا عامل إزاي؟؟؟
بلاش....مش لازم نوضح...اكيد كلنا عارفين
ياريت ناخد بالنا من الحجات ديه عشان بقت كتير اوي وواضحة اليومين دوله
ربنا يهدي
الدبوس التاني
الدي جي أو ال dj
افرحوا براحتكم وأرقصوا وهيسوا زي ما انتم عاوزين
بس في الاماكن المخصصة لذلك زي النوادي وقاعات الافراح
إنما بقي في الشوارع دي عاوزة وقفة
الناس من حقها تفرح...وانا من حقي انام واستريح
جزار فاتح جديد ...جايب دي جي
طهور سيد ابن ام علي....جابت دي جي
فرح الجيران اللي جنبنا...جايبين دي جي
عم مغوري الله يرحمه توفي....اهله جايبين دي جي
بقي شئ فظيع اوي ولا يطاق....ربنا يهدي
الدبوس التالت
رنات الموبيلات
حقك تحط اغنية وتخليها رنة لموبيلك...حرية شخصية....انت اللي هتتحاسب مش انا
حقك تحط فيلم ولا مسلسل والا اي عفريت ازرق وتخليها رنة لموبيلك
بس اللي مش من حقط بقي إنك تدخل بيه المسجد و (تنسي ) تقفله
والله يا جماعة المنظر كان وحش اوي لما كنّا في وسط الصلاة والسيدة صباح طلعت من موبيل احد المحترمين تغني قائلة بصوتها الجهوري : علشااااااانه أدوب انا
طيب انا هتدبر ازاي في تلاوة الامام وهجيب خشوع منين وصباح بتدوب في حب اسمه ايه دا؟؟
الامام نفسه هيقرأ ازاي ....
لو انت راجل بتنسي تقفل تليفونك قبل الصلاة يبقي يا ريت تغير رنة التلفون
بلاش تخليها تلاوة قرآنية عشان فيها كلام
خليها رنة عادية خالص...زي رنة تلفون البيت....محدش هيقول عليك جاهل او رجعي او متخلف
بالعكس...دا انت هتبقي راجل محترم ومهذب
ولو نسيت تقفل تلفونك في اي وقت مش هتبقي محرج من الرنة بتاعته
وربنا يهدي
الدبوس الرابع
الكوسة
اللي هي الواسطة يعني والمحسوبية
بجد حاجة مقرفة اوي ...وبتحتقر اللي بيعملها او اللي بيسعي اليها
وخلوا بالكم....الرشوة تبع الكوسة برضو
في رشوة بالفلوس...وفي رشوة بالهدايا
وفي رشوة بإسطوانات افلام إباحية...
وحدثت بالفعل
مش هقول التفصيل عشان مش مهم تعرفوها
بس إجمالا الرشوة او الواسطة حاجة حقيرة ومقززة
ياريت كلنا نبعد عنها ونتوكل علي الله في جميع امورنا
واكيد الراجل(القائد) بتاع الرشوة بالافلام الاباحية هيعيش طول عمره حقير
ربنا يهدي

هناك 28 تعليقًا:

عصفور المدينة يقول...

دي مش دبابيس دي غصص وخناجر في حلوقنا جميعا

Vague يقول...

100%

كلاك كله في الجون... مع ان اخر دبوس ده مش واصللي ... مش فاهم بتلمح على مين؟؟؟
اكيد مش احمد السيد

رفقة عمر يقول...

بجد هاتخلينى اخد بالى من حجابى ومن كلامى
ربنا يهدينا لما يحبه ويرضاه اللهم امين يارب العالمين
دبابيس فى الصميم
جزاك الله خيرا

عاشقه الفردوس يقول...

ايه الكلام ده
ربنا يباركلك يااستاذنا والله

عندك حق


اما يت البس الخمار قولت لنفسي هتلبسيه يبقي لازم تاخدي بالك من كلامك وتصرفاتك

بعدها لبست النقاب قولت نفس الكلام هتلبسيه يبقي تاخدي بالك اكتر

والله كلامك صح وحقيقي

بتنرفز اما بلاقي منتقبه وحاطه كحل او مزينه عنيها طيب لازمته ايه ده

الرشاوي والمحسوبيه من امراض امتنا وده باب من ابواب ظلم الناس لبعضها

الرنه دي بقي حاجه بجد خنقه

كنا في التهجد في رمضان وفجاه واحنا كلنا خشوع لقينا طلعتلنا مره واحده نانسي عجرم علشان تخلينا كلنا مش قادرين ناخد بالنا من صلاتنا حتي الشيخ غلط والمشكله ان صاحب الموبايل سابه كده ولا حتي مد ايه في جيبه يقفله

ربنا يرحمنا
الله المستعان



جزاكم الله خيرا والله

nonoymm يقول...

زي ما قالت عاشقة الفردوس وازيد اني احنا المفروض ننبه بعض وبما اننا احنا المنتقبات كلاامنا بيبقى تقيل على قلب الاخوات وبتبقى الواحدة من دول الكبر واخدها
للاسف بضطر كتير اني اقول على نفسي كنت بلبس كدة وبعمل كدة ولقيت انه بيتعارض مع نقابي يعني الوحدة عاملة كله هتيجي على البسيطة دي وربنا بقىيرزقنا الصدق ي القول والعمل
والله شوية خناجر في الصميم
بوركت اخي

د/اجدع بنوته يقول...

دبابيس جامده اخر حاجه

ورشقت ف عقولنا كلنا م زمان

بس بجد اوووووف مش عارفين نخرجها

اجدع جراح ولا هيعرف يعمل فيها حاجه

غير انه يمسك شاكوش

ويدقدقها لجوا اكتر

تحياتى

خمسة فضفضة يقول...

السلام عليكم ورحمة الله وبركاته

الله يسامحك يا باشمهندس ، هرتنا شكشكه


هو صحيح فعلا في ناس بنتجيب دي جي في العزا ، طب بيعملوا بيه ايه بيقرا قرآن ولاّ حاجه تانيه؟؟؟؟؟ صراحه اول مره اسمع كده ، اعرف الناس اللي مش بتقدر تجيب شيخ بيشغلوا كاسيت انما دي جي غريبه شويه !!!!!!!!!

appy يقول...

الله يكرمك بجد عارف تحت النقاب او بعض المنقبات ايه عيون مرسومه بلميك اب والله شوفتها بنفسى وبعدين غيبه طويله كده وتجيلنا بكلاشينكوف هههههههههههه بس يا ريت حد يعمل باكلام ده

Vague يقول...

معلش يابو صابر

تعليق كمان
لو لابسة نقاب وبتدلع احسن من انها متكونش لابسه حاجة وتتدلع

ودي مش هتكون اساءة للنقاب... بل اساءة ليها هي

منى يقول...

عجبنى اسلوبك
قلت كل حاجه بصراحه ووضوح
من غير كلمه جارحه ولا خارجه
ربنا يكرمك ويهدينا جميعا

anwer يقول...

علي فكرة و بصيت حتلاقي كل واحد فينا حيشكه دبوس من دول
بس مين الي حيعرف يغير من نفسه

مجداوية يقول...

اللى بيتعارض بجد مع النقاب والحجاب المحترم هو الضحك بميوعة وبصوت عال يا ريت نحاول كلنا كمسلمات نكتم صوت ضحكتنا نخليها سايلنت وكل دبابيسك عندك حق تشكها خصوصا مسألة الدى جى انا فى الشارع عندى باسمع الأغانى رغما عن أنفى ولازم اسمع يعنى اسمع ,, مفيش حتة أستخبى فيها حاسمع يعنى حاسمع ولو مش عاجبنى اخد حنطور وأتحنطر بعيد عن الافتتاح ,,ناس معندهاش دم مش عايزة الناس تفرح ده طبعا انا

محمد عبد الغفار يقول...

تصدق انا كنت فاكر غير كده خالص

Salwa يقول...

دبابيس قويه جدا

وعندك حق في كلامك
كلام واضح ومحدد

تحياااااااتي

ToOoKa يقول...

السلام عليكم ورحمة الله وبركاته
اولا كده انا اسفه جدا جدا انى ما جاوبتش على التاج اللى انت اهديتو للاسماعلوية بس ربنا يعلم انى مشغولة ومرهقه جدا

اما بالنسبه للموضوع
فانا بتنرفز جدا جدا من اللى لابسين من غير هدوم و لابسين طرحه وبيقولو انهم محاجبين انتو اتحسبتو علينا وخلاص
انا مش قصدى حاجه مهو انا بردو عندى عيوب
بس الحجاب مش طرحه الحجاب لبس واسع ومش شفاف ولا ديق ولا لونو يزغلل العين

وحكاية الDJ فدى حاجه تنرفز انا فاكره انو كان ورانا خطوبة وكان انا عندى امتحان ايام الثانوية العامه واعدت اعيط لانى مش عارفه اركز دا انت كده بتزعج الاخريين وبردو لما بيزفو عروسه الساعه 2 الفجر والكلاكسات تشتغل وانا نومى خفيف ومش من السهل انى اروح فى النوم تانى

الكوسة
والله احنا ظالمين الكوسة معانا لانو الكوسه دى كلها حاجات مقيده
من الحاجات اللى للاسف منتشره جدا مش فى مصر بس تؤتؤتؤ دا فى الدنيا كلها

اما بقه حكاية الأغانى فى التليفون فاحتراما للمسجد وللصلاه مفروض يتقفل الصوت

تسلم ايدك على الموضوع واسفه لو أتأخرت
أختك توكا

Desert cat يقول...

دبابيس بتشكشك فى محلها تمام
تحياتى

عالمى ازرق يقول...

سبحان الله
الفساد من سيء لاسوأ وبالاخر نتسائل
ايه سبب اللى بيحصل فى غزه؟؟
و الرسوم المسيئه للرسول عليه افضل الصلاه والسلام .. وتصريحات وزير الداخليه الالمانى ؟
ماهو حاجه طبيعيه اوى للى بنعمله

رينـــــــــــا يقول...

انت مش سيبت حاجة لينا
وكمان اللى علقوا قالوا بما فيه الكفايه
بس موضوع مهم جدا
تسلم ايدك


ازيك كدا؟

حمامة يقول...

هى فعلاً اقل ما يقال عنها انها دبابيس

بالنسبة للدبوس الأول
انا اهو بنت وبكره عمايل بنات اليومين دول مفيش احترام نهائى لحرمة الحجاب مفكرين انهم لما يلبسوا طرحة يبقى خلاص هيخشوا الجنة ولا النقاب وتبقى صوتها وضحكتها مسمعة لأخر الشارع انا رأيي اللى تلبس حاجة او تعمل حاجة يا تعملها صح يا بلاش منها لأنها اكيد هتبقى قدوة او مثال لغيرها وبكده هتبقى قدوة زى الزفت

الدبوس التانى

هى حاجة بجد تخنق انا مبكرهش ف حياتى قد الدى جى ده صحيح انا الحمد لله مبسمعش اغانى الحمد لله بس هما حتى لما بيعملوا دى جى مش بيستنضفوا الاغانى اللى بيشغلوها تلاقى اللى بينشز ويقولك المولد والسمك والعنب والمانجا تحس انك واقف ف سوق مش ف فرح

الدبوس التالت :

دى بقى لسه حاصله معايا من كام يوم كنت بصلى ف الجامعه وف وبعد ما خلصت لقيت تليفون هاتف داعى :

انا حبيييييييييته خلالالالاص يا ليالي
بجد كان هاين عليا امد ايدى ف جيب صاحبته واقفله ولا ارميه حتى

الدبوس الرابع :

بكره يندموا على اللى بيعملوه ده اشد الندم وكل جسد نبت من مال حرام ف النار اولى به

بجد سعيدة بالمرور هنا مدونة واقعية ولذيذة تقبل مرورى :)

ToOoKa يقول...

السلام عليكم ورحمة الله وبركاته
لقيتنى معادية على مدونتك
قولت اسبلك سلاااااام كبير اوى
كده على الماشى

يارب تكون بخير
أتمنالك كل خير
أختك توكا

مجداوية يقول...

ايه رأيك تكمل الدبابيس وتخليها ثابته فى مدونتك يعنى مع كل بوست دبوس وأكيد حياتنا مليانه دبابيس يعنى موضوع اندلس لا نهاية له ,,مش فكرة برضه مع اسلوبك المميز ده حيشك وننتبه كلنا

hend...hanady يقول...

سبحان الله لو اى حد عنده محاضرة ولا رايح يعمل مقابلة للشغل هتلاقى اول حاجة يعملها لما يصحى من النوم ان يقفل موبايله او يعمله صامت ولو داخل مسجد اخر حاجة يعملها ده لو لفتكر ان يخفض صوت موبايله او يحط نغمة دينية

حوريه يقول...

السلام عليكم و رحمة الله و بركاته
تحياتى أخى العزيز و ألف مبروك التخرج مع الاعتذار للتأخر ..
لى عتاب .. كنت عايزة أبعت لك كارت تهنئة مالقتش أيقونةالاميل بتاعك ..
عموما الف مبروك يابطل ربنا يحميك يارب و يحقق لك كل ما تتمناه يارب

الموضوع ده جااامد كالعهد بكل موضوعاتك .. دى سيوف مش دبابيس ..
سيوف الحق و الفضيلة ..
نبهتنى لحاجات ماكنتش واخدة بالى منها

على فكرة قصة سيزر و الأمواج الغاضبة .. فاكرها ؟؟؟
أنا ناقشتها فى منتدى مجلة هستيريا و حازت الاعجاب بس ما حدش عرف مين الملهم اللى يستحق الشكر ..
و نشرتها فى صفحتى فى هستيريا لغاية الجزء الثالث .. لسه هعمل عودة سيزر فى جزء جديد ان شاء الله .. هتلاقيها هنا
http://www.thkra.com/topic.php?catid=57

دى صفحتى .. مناقشة القصة فى المنتدى عند القصة القصيرة
تحياتى و احترامى و شكرا لك لخى العزيز
ناديه

nadiataha.maktoobblog.com

روح شرقيه يقول...

الله يبارك لك
بجد كل دبابيسك جايه فى مكانه
ربنا وحده هو القادر على انه يرزقنا الهدايه
يارب يارب يتقبل منا
عن جد اسلوبك كتير حلو برغم انى مقدرتش اتمالك نفسى من الضحك وانا بمر بين سطورك
ربنا يكرمك ويجازيك خييير
قول اميييين بسرعه

الفاتح الجعفري يقول...

هقولك ايه بس
دي امراض القلوب
اللي بتعاني منها الامه
ومحتاجه علاج قوي جدا
ربنا يطهر قلوبنا
هي فعلا دبابيس في القلوب
ربنا يعافينا
ربنا يبارك فيك ويحفظك
مدونتك رائعه ماشاء الله
وجزاكم الله خير

Doba يقول...

دبابيسك بتشك قوى قوى
الكل

مش انت لوحدك

تحياتى
هبة

========
عاجبانى الكلمات دى

إن النفاق لآفة فتاكــة **** إن أهملت أدت إلا الأسقام
وقضت على آمالنا في أمة **** راياتها في البحر كالأعلام

محض روح يقول...

:)
حمدالله على السلامه
صادقه دبابيسك

الراقص مع الذئاب يقول...

السلام عليكم

الاخوة الكرام:


عصفور المدينة
Vague
رفقة عمر
عاشقه الفردوس
nonoymm
د/اجدع بنوته
خمسة فضفضة
appy
منى
anwer
مجداوية
محمد عبد الغفار
Salwa
ToOoKa
Desert cat
عالمى ازرق
رينـــا
حمامة
hend...hanady
حوريه
روح شرقيه
الفاتح الجعفري
Doba
محض روح

جزاكم الله خيرا علي مروركم الكريم واعتزر عن التاخر في الرد عليكم لضيق وقلة الوقت


--------------
الاخ الكريم آدم

مينفعش نقول تلبس النقاب وتدلع واهي احسن من اللي مش لابسة حاجة
في ناس بتتصيد الاخطاء...يعني لو شاف منتقبة او ملتحي صدر منهم اي سلوك غلط ولو صغير يعملها مصيبة سودا
ويقول اتفرجوا علي اللي عاملين مشايخ...كلهم عيوب....دا من المسلمين
تخيل بقي لو واحد مش مسلم شاف كدا هيقول ايه...وانت عارف هما ما هيصدقوا يلاقوا عضمة عشان يعضعضوا فيها
عشان كدا لازم الحجات ناخد بالنا منها اوي


----------
الاخت مجداوية

علم وسوف ينفذ إن شاء الله