Translate

الأربعاء، 26 مارس 2008

انت فكرني هندي؟؟

السلام عليكم


ازيكم وحشتوني....معلش يا جماعة أنا بغيب كتير بس والله مش بأيدي

وعارف إني مقصر معاكم...بس أنتم عارفين الظروف بقي

إن شاء الله هنتظم معاكم في المواضيع الفترة اللي جاية

يعني يوم الثلاثاء هيبقي لعائلة الفسافيس

...ويوم الخميس هيبقي للمدونة الاصلية كفاية موضوعين في الاسبوع عشان نعرف نركز مع الناس التانية



المهم بقي وانا راجع اسماعيلية أمبارح حصل موقف في البولمان عاوز اتكلم معاكم فيه

ونشوف أد ايه أحنا بنتقدم علي شعوب العالم....

انا بركب من موقف الماظة في القاهرة...بركب أتوبيس شرق الدلتا

الشركة المحترمة المنضبطة اللي ماشية زي الساعة

أوم أيه بقي اللي حصل

كنت حاجز علي معاد الساعة 4....طبعا الأتوبيس جه في المعاد بالضبط...جه الساعة 4 ونص

ودا يعتبر إنجاز غير مسبوق إن الاتوبيس يتأخر نص ساعة بس عن معاده

معلش أصله بيطلع من الترجمان ويعدي علي التجنيد ..المشاور طويل ومحدش عارف ظروف الطريق جوا مصر المحروسة بتبقي عاملة أزاي

طلعت الاتوبيس وقعدت علي الكرسي بتاعي اللي عليه رقمي والحمد لله لقيته فاضي

ماشي...إيه الغريب بقي اللي حصل ومخليك راكب فوق ودنا وعمال ترغي يا أبو صابر...

الناس مش فاضية

أستنوا بس..أنا جيلكم أهوه....لقيت واحد ملامحه هندية واقف محتاس في ممر الاتوبيس وعمال يروح ويجي زي السنجاب اللي محبوس في قفص مصدي

مركزتش معاه وانشغلت بنفسي

الهندي طلع أدام وماسك التزكرة في أيده ومن غير أي كلمه مد أيده بالتزكرة للسواق

السواق أخد التزكرة و بص فيها وبكل ثقافة وأدب قاله

your seat number is 25

الهندي أخد التزكرة وقعد يبص علي الأرقام اللي كانت مكتوبة بالعربي علي الكراسي زي التزكرة بالضبط....وبمساعدة الركاب وصل للكرسي بتاعه

والمفجأة بقي (هي بالنسبة لينا في مصر مش مفجأة) كان الكرسي مشغول...عليه راجل محترم هو وزوجته

الهندي رجع احتاس تاني وراح للسواق يشاورله زي بتوع الصم والبكم

السواق قام معاه لاقي الكرسي بتاع الهندي عليه اتنين ركاب (صاحب السواق وزوجته) السواق قاله

i am so sorry this is my friend and his wife....

i can find another place for you,, come with me

الهندي راح معاه وهو مغلوب علي أمره ومن غير أي كلمه

السواق بص يمين وشمال ملقاش كرسي فاضي غير الكرسي اللي جنبه

كرسي الكمسري أو المضيف وقاله

this is a very nice place

قال هندي بقي ومش فاهم...أضحك عليه

بس الهندي مطلعش أهبل وقعد...رفض ونزل يشتكي

السواق طلعه ...وصمم أنه يقعد في مكانه اللي حجز عليه

ومهتمش بمجاملة السواق لصاحبه اللي ركّبوا وقّعدوا هو وزوجته في مكان مش بتاعهم ومعاد مش بتاعهم اساساً

بس شهامة الشعب المصري الجميل لعبت دورها وقام متطوع من الركاب بإخلاء مقعده وجلس بجوار السواق علي الكرسي الذي رفضه الهندي

وقعد الراجل اللي راكب بدون وجه حق هو وزوجته علي كرسي هذا الشاب الشهم


شوفوا بقي المواقف اللي طلعت من الموضوع دا عشان نعرف إن المنظومة منحلة من الاساس
ازاي واحد يطلع يركب في مكان مش مكانه مع إن الاتوبيس كامل العدد

إزاي تجبر واحد حاجز ودافع فلوس (مهما كانت جنسيته) يقعد في مكان مش مكانه ومكان غير لائق

إزاي تشتم فيه وتقول عليه نطع وجلف عشان اتمسك بحقه (هو نطع وجلف اي نعم بس لسبب تاني)

إزاي تخلي الهندي...يقول علينا متخلفين.....

تخيل بقي لما يكون واحد بيعبد بقره او عمود نور او كوتش عربية يقول علينا احنا متخلفين..

هو اكيد قالها في سره طبعاً


بس في بقي حاجة تاني ممكن نلاقيها في الموضوع دا

حاجة موجودة في الشعب المصري ومش موجودة عند غيره

الشهامة والجدعنة ممكن نكون ركبنا الغلط من فوقنا لتحتنا...ونتيجة الغلط دا بنقع في مواقف صعبة كتيرة اوي...بس بطبعنا المواقف ديه بتتحل

سبحان الله

تركيبة عجيبة من الصفات

وعلي فكرة...احنا مش هنتغير أبدا....لا في الحلو....ولا في الوحش

اتعودنا خلاص
طيب انت مصدعنا ليه.....؟؟؟اهو كلام والسلام...حبيت ارغي


وعلي رأي المثل

اكفي القدرة علي فمها...يحتار عدوك فيك


-------------------------------



دبوس الناهرده


طبعا كلنا عرفنا اسعار الذهب وصلت لأيه دلوقتي

الدبوس دا للأخوات المقبلات علي الزواج

ياريت تبقوا كويسين كدا وترحموا الشباب اللي كل ذنبه انه عاوز يتجوز ويعف نفسه

بلاش الطمع والعنطظة الفارغة....

لما تطلبي شبكة ب20 وب 30 وب 50 الف جنيه دا عيب

ميصحش...في الاخر انتي اللي خسرانة عشان مش هتلاقي حد معاه الكلام دا....اه..في ناس معاهم

بس السواد الاعظم بيكح تراب

قولي لبابا ولماما ارحموا الناس شوية....محدش هياكل وشكم عشان بنتكم مجلهاش شبكة ب 50 الف جنيه

الناس مش هتقول دوله باعوا بنتهم....بلاش ادوس اكتر من كدا في الكلام عشان هيبقي فيه تجريح والحوار هيبقي شديد اللهجة
بس عاوزكم تدخلوا عند مهند وتشوفوا الموضوع دا






انا عارف إن في معارضة من الناس لهذا الامر....وبيقولوا إن بناتهم مش رخيصة عشان (يترموا) ببلاش

معاهم حق طبعاً..

بس ياريت بعد كدا متجوش تعيطوا وتقولوا بنتنا فاتهم سن الجواز...وترضوا بأي حد..وبأي حاجة...وبنتكم تتبهدل
ربنا يهدي

هناك 32 تعليقًا:

د/اجدع بنوته يقول...

اول كومينت يااااااااارب

د/اجدع بنوته يقول...

هههههههههههههههههههه

سواق الاتوبيس بتكلم انجلش

دى ف حد ذاتها انجاز ياابو صابر

انت بتكلم ف ايه

ده احنا عديناااااااا ياجدعان

مصر بتتكلم عربى اصدى انجليزى

بس والله هندى جامد اخر حاجه

السواق فكره رابط الفيل ف ديل الاتوبيس

بس طلع دماااااااغ

تعليقا ع الدبوس بقى

انا اعرف بنات كتيييير مش عايزه شبكه وانا م ضمنهم

بس ف اكترررر دماغهم فيها صراصير

دوروا بقى ع اللى رشوا فيليت م زمان

وبقوا خاليين م الصراصير

غير معرف يقول...

محدش يلوم بقى السلطات العليا والكوسة اذا كان السواق ذات نفسه بيكوس يبقى ناقص ان الشحات هوا كمان يكوس وكلها متوالية فى بعضها وكما تدين تدان

نسيبنا من التكويس وندخل فى التجويز كلمة اخويا قالها مره ممكن واحد يجيب الشبكة اللى العروسة عايزاها ويصبح تانى يوم الفرح ويضرب كرسى فى الكلوب ويبيع الشبكة ومحدش ليه عنده حاجة وساعتها لا ابوها ولا اهلها كلهم هيقدروا يعملوا حاجة ويستهلوا لانهم بيبصوا تحت رجليهم وان كانوا بيقولولك منرخصش بنتنا واللى بيروح رخيص بيضيع وحاجات كتيره هما كده عملوها سلعة مش رخصوها

بنت الصالحين يقول...

بص ياابو صابر بقي

الموضوع ده اللي همني فيه الشاب الشهم

انا كنت هكتب تدوينه عن دي قريبا باذن الله


بس الهندي عجبني في انه اتمسك بحقه
عقبالنا يارب



اما بقي بخصوص الدبوس


بص ياابو صابر
صدقني مش دايما البنات بتبقي السبب
وعلي فمكره الاهالي هي الللي بتتنطط

والله البنات غلابه



وللاسف البنت مش بتقعد تتفق علشان تتكلم

وفي الاخر بتبقي مغلوب علي امرها

تعرف فعلا مشكله العنوسه مش ان البنت مش كويسه او الشاب مش كويس
المسكله بقت جشع وطمه اهالي

ممكن يكون نسبه البنات الطماعه لا تتعدي الواحد من ميه في الميه

لكن الاساسي هو طمع الاهالي

وربنا يهدي

البنت الشلبية يقول...

الله عليك

اهو الشعب المصرى كده
خليط من حلو على وحش ومنتاش عارف انهى يغلب!!!!

حلو الدبوس بتاع النهاردة ويكفى انى اقولك ان بابايا قالهالى مرة بنفسه
اختارى انتى العريس الى يريحك ووافقى عليه وميهمكيش اى تفاصيل

فى اهالى اهم حاجة عندهم راحة بنتهم مش مجرد مظاهر

سلام يا كابتشن

خمسة فضفضة يقول...

السلام عليكم ورحمةو الله وبركاته

اللي عملي الراجل ده هو الطبيعي اللي المفروض اي حد عاقل يعمله ، انه اتمسك بحقه اللي مش طبيعي بقي انه كان يوافق علي ضياع حقه عشان خاطر عيون السواق واصحابه


فكرتني بجمله قريتها علي توكتك :
" الهنود اشتغلونا ولا ايه ؟؟"

تفتكر انهم اشتغلونا ؟؟


------------

الدبوس
ربنا ييسر علي الجميع يارب

ايه 30 و50 دي ،شبكتي كانت ب 3 آلاف جنيه بس ...عاااااااااا
، لازم اطالب بتعويض مش كده
:-)

رفقة عمر يقول...

كل حاجه اساسا فى مصر ملخبطه احنا ماشين بالبركه والفهلوهه مافيش حاجه منظمه خالص
وعندك حق بخصوص الدبوس عارف ساعات بسال ازاى الشبكه تكون هديه العريس لعوسته تبير عن جديته واهل البنت يتشرطوا فى تمنها بصراحه حاجه غريبه وعادات ليست من الاسلام ربناقال ولينفق ذوسعته من سعته
يعنى دى هديه رمزيه وقيمته تكون من حق العريس بس من غير تتدخل الاهل
احنا نستاهل انتشار العنوسه فى بنات امسلمين لاننا بنشدد على انفسنا فشدد الله علينا

حنان شلبي يقول...

مرحبااااااااااااااااا

مع احترامي للشعب المصري ****حبيبي****

بس الهنود كمان حبابين بغض النظر انهم بيعبدو بقرة ولا فردة كوتش بس الانسانية ممكن انقيسها من خلال التعامل وهمة الحق ينقال في منهم انذال بس في منهم ناس راقية وبتفهم ومو رابطين الفيل برة الباب


وبالنسبة للحج سواق الباص بقلو يا مان يبتاع الواجب بالله بس اطلع معك شي يوم بالباص احجزلي مكان عالشباك مو بركي طلعنا قرايب ههههههههههههههه والله الواسطة حلوة لشو الحكي


وتحياتي

Empress appy يقول...

لاااااااااا انا معترض والله لو انا ما كنت سبته يعمل كده فى الراجل ايه ده لا طبعا الاتنين التانين ينزلوا يا محمد ليه يفضلوا مجامله ايه ونيله ايه والله لو الاتوبيس اتأخر ساعه انت متعرفش الناس بره بتتعامل ازاى مع الاجانب وبعدين كان المفروض الناس تقوله لا نزل دول مش حجزين او يجاملهم فى باص تانى وانت ازاى تسكت طيب ماشى انا زعلانه بجد

وعموما برضه موقف كويس من الراجل بلمصرى بس صلح الغلط بغلط واتنازل عن حقه وانت عارف انى عندى حساسيه من التنازل عن الحق
ومتتأخرش علينا يا ابو صابر
موضوع الدبوس انا كنت كاتبه عنه باستفاضه من قبل كده فى موضوع اسمه عاوزة اتجوز ميكانيكى هههههههههههههههه ولو قريته هو ده رأى فى الموضوع
سلام بقى علشان متقولش عليا بلعه راديو

منى يقول...

السلام عليكم
يعنى السواق عمل اللى هو عايزه
وصاحبه قعد مطرح ما هو عايز
والهندى صمد لحد ما اخد حقه
والمواطن العادى اللى مالوش واسطه فى الانوبيس هو اللى ضحى واحيانا قد يتم التضحيه بيه
هى دى مصر

اما بالنسبه للدبوس الذهب ده
انا اعرف ناس مش بتطلب شبكه اصلا
بس المهم ان يكون العريس بيقدر ده
مش بس اهالى العروسه هما اللى بيقولوا اللى بيجى بالساهل يروح بالساهل
ساعات اهل العريس لما يلاقوا اهل العروسه متساهلين يطمعوا فيهم
المهم فى الموضوع انهم يكونوا ناس محترمين شارين بعض وساعتها مش هتفرق اى حاجه لاذهب ولاغيره
تحياتى

mohand يقول...

السلام عليكم

مش كل الهنود بيبعبدوا البقر

وعموما دا عيب عندنا

وتبص تلاقي السواق يذات نفسه يجي يقولك المحسوبية والكوسه

وميبصش علي نفسه

تحياتي يا ابو صابر

آفاق الحرية يقول...

والله مش عارف بس هي برده تندرج تحت معني كلمة الفهلوة
وهي كلمة مصرية خالصة ليست موجودة الا في المعاجم المصرية
يعني هو حتي الميعاد مش ميعادك ومش كرسيك وبرده قاعد
والله ده حاجة تغم
وكمان هتلاقيه قعد يزعق كانه صاحب حق

yamen يقول...

اكفي القدرة علي فمها...يحتار عدوك فيك

حلو اوي المثل ده
:)

صديقي الراقص مع الذئاب

والله زمان

بقالي فترة طويلة مقصر معاك ومش باجي عندك
معلش سامحني بس الشغل وانت عارف
وانت اهه لسه عمال تتكلم عن الشباب اللي بيكح تراب
يعني هاتقدر البهدلة اللي الواحد فيها

بالنسبة لموضوع الراجل الهندي
انت عندك حق
لاننا احنا بسلبيتنا اللي بنرجع لورا
والحقيقة ان النطع بجد هو الراجل صاحب السواق اللي قاعد زي ال(---) علي الكرسي وهو عارف انه مش كرسيه ومتحامي في صاحبه السواق
انا نفسي اشوف عيال الراجل ده هيطلعوا عاملين ازاي
:)

تحيايي يا صديقي
اشوفك بخير

مجداوية يقول...

السواق اكيد كان عارف ان المكان ده لواحد هندى وقالك هو حيربط الفيل فى الموقف وحيطلع يقعد فى اى حته وهوساكت
بس بصراحة احنا اللى هندى الراجل الشهم الطيب اللى ساب مكانه للهندى اكتر واحد غلطان ليه بقى ؟؟لأنه حل مشكلة للسواق المفروض السواق كان هو اللى يحلها بدون ما أى حد يسيب مكانه بس اكيد الاتوبيس اتحول لسوق الجمعة وكل واحد بكلمة والراجل الهندى بيبرطم بيردى نمنم عشان كده الراجل قام من مكانه وحل المشكلة ,,بص احنا معندناش أبدا أى مشكلة بعون الله المصرى يفوت فى الحديد احنا اتعودنا نلبس طاقية ده لده عشان تمشى.. بس ليه السواق مخلاش صاحبه يقعد جنبه ونقل مرات صاحبه جنب أى حد وجاب ال أى حد جنب الهندى ونقلك انت هناك وجاب اللى هناك هنااااااااااااااا ؟؟مش كده كان أحسن هههههههههههههه والله حكاية تموت من الضحك
الدبوس كالعادة مشكوك صح وفى الجون بس معلومة بقى اللى بتطلب شبكتها ب 20 أو 50 ألف جنيه بتكون عادة ألماس او زى ما بيقولوا سوليتر لزوم العوجان لأن الدهب يااااى بلدى أوى وبيئة

عاشــــــ النقاب ـقــــة"نونو" يقول...

السلام عليكم
بص هلكتني من الضحك كالعادة
وبرضه لازم الفوائد والعبر الله يبارك فيك
طيب اولا انا كنت من كام شهر من راكبي هذا الاتوبيس ذهابا الى مدينة العاشر من رمضان العريقة
مش عارفة احنا هنحط وشنا في وش الهنود ازاي بعد الموقف دة والموقف نفسه بتاع الاتوبيس اللي تحت الارض وايه موقف حكاية ورواية والاتوبيس عاوز الرمي والعجن ما علينا ربنا كدة ينفخ في صورتنا يارب ونبطل الخيبة االقوية دي
اما عن الشاب الشهم الجددع دة للاسف بقى عملة نادرة جدااااا
اذكر اني كنت في اواخر حملي قبل الولادة بيومين وراكبة المترو وطبعا لو كنت ولدت في المترو ما حدش كان هيقوم اصلا عاددي جدا
بالنسبة للشبكة المفرروض استبدالها باي حاجة تانية في بيت الزوجية والغائهها خالص
والله انا مش فاهمة معقول فيه حد لسة بيشتري دهب دلوقتي بالنسبة لي انا مش هجيب شبكات للعيال انا عندي بنات وعندي ولاد واللي ما ارضاهوش على ابني ما ارضاهوش على ولاد الناس
واااااااافر تحياتي لحضرتك

موناليزا يقول...

يعنى الهندى جاى من بلده يعلمنا الادب يعنى مش كان الاحسن ان السواق يعتذر لصديقه ولزوجته بدل مايبقى شكلنا وحش كده
بالنسبة للدبوس بقى معدتش مشكلة حكاية الدهب دى لان عندنا العروسة هى اللى بتجيب كل حاجة

ToOoKa يقول...

السلام عليكم ورحمة الله وبركاته
أزيك يا أبو صابر وايه اخبار صابر؟ يارب يكون بخير

ياسيدى انا الاسبوع اللى فات رحت القاهره وكنت اول مره اروح القاهره لوحدى بالرغم انو واحده تعتبر قاربتى كانت مستنيانى بس دا فى حد ذاتو أنجاز من اهلى
وبغض النظر عن اللى حصلى هناك ومحفظتى اللى ضاعت واستلفت فلوس علشان اروح بس بردو كنت سعيده انى اعتمدت على نفسى
وانا راجعه حصل نفس الموقف مع واحده بنت واستقر الموضوع انها كانت حتقعد على السلم فى الارض بس بردو فى ولد محترم قام وخلاها تقعد مكانو وهو اللى قعد على الأرض


يعنى انا مش فاهمه ما دام الكرسى اتحجز يقعدو واحد تانى عليه ليه؟


اما بقه بالنسبة للدبوس فانا معاك جدا
بعدين يعنى الواحده لما حتتجوز اللى حيبقالها جوزها المحترم الكويس مش الدهب وهى بقه وحده وحده وبشطارتها حتحوش فلوس وسعتها تبقى تجيب دهب تحافظ بيه على فلوس جوزها علشان لو احتاج فلوس تبعهم

وانا بقه مش معاك انو البنت حترخص لو ما جبش دهب بالعكس الواحد لو فكر انو بنتو لازم يدفع فيها أكتر سعتها حيكون فعلا بيبعها

الرسول صلى الله عليه وسلم قال انو بارك الله فى الزواج اللى مهورو قليلة

ودا فعلا حصل مع ابويا وامى الحمد لله

المهم الشخص اللى حعيش معاه طول عمرو وحيكون ابو ولادى

وبعدين الناس كده كده بتتكلم سيبك من كلامهم

ربنا يسعدك ويبعتلك نصك التانى اللى يستهلك

بس يارب صابر يوافق

اتمنالك كل خير وسعاده فى الدنيا والأخره
أختك توكا

فتوح أبو المفاتيح يقول...

السادس من ابريل انتفاضة الشعب المصري
الناس دي كلها معانا
على مدونة عصياااان
http://3syan.blogspot.com/

محض روح يقول...

هيه ديه مصر
:)

None يقول...

عاشت مصر كول مستقله

هيا دى جدعنه الشعب المصرى

Vague يقول...

السلام عليكم
مش عاوز ارد في موضوع الهندي ده عشان بقرف منهم..اه بقرف
---------
ياريت تقول للشابات فعلا..
كلام كله في الجون
انت نويت تتجوز ولا ايه؟

عالمى ازرق يقول...

حمدلله على سلامتك
الغريب انه لو واحد مصرى كان ريح نفسه وقعد على اى حاجه وخلاص

Bosssssy يقول...

ماشاء الله مدونتك بجد جميلة اوى.

اوعدك انى هقرأ كل بوستاتك.

وميرسي جدا على زيارتك لمدونتى.

بالنسبه بقى للهندى انا بعتبره محظوظ لان فى حد خاف على شكلنا ادامه واتنازله عن كرسيه . لكن لو واحد مصرى فى الموقف ده والله ماكان فى حد عبره نوهائى.


اما بالنسبه للدبوس بقى, فهى فعلا مشكله صعبه جدا ومصدرها ان كل الناس بتبص لبعضها.وللاسف مفيش قناعه بين الناس.

قيل للسعادة اين تسكنين قالت فى قلوب القانعين.

Pusssssy

الراقـــص مع الذئـــــاب يقول...

السلام عليكم

-----------

اجدع بنوتة
ازيك يا دكتورة
مش إنجاز إن سواق الاتوبيس يتكلم انجلش
علي الاقل هو اكيد متعلم ومعاه شهادة
الغريب انه فاكر انه علي حق والهندي علي باطل

جزاك الله خيرا علي المرور الكريم

-----------
hend...hanady

فعلا يا هنادي
المنظومة بايظة من تحت خالص
عشان كدا فوق لازم هتبقي بايظة برضو
كيف يستقيم الظل والعود اعوج

جزاك الله خيرا علي المرور

------------
عاشقة الفردوس

اي إنسان في الدنيا بيتمسك بحقه يا اختي الكريمة
الا المصري
ودا اللي لاحظته فعلا
عشان عندنا المجاملة والجدعنة والذوق
مش عارف بقي الجدعنة والذوق والا الحق

جزاك الله خيرا علي المرور

الراقـــص مع الذئـــــاب يقول...

البنت الشلبية

فعلا يا شلبية....محدش عارف ايه هي الصفة اللي غالبة
سبحان الله...فعلا احنا شعب عجيب جدا

اسعدني جدا مرورك الكريم
ومتبقيش تغيبي علينا

-------------------
الدكتورة الكبيرة خمسة فضفضة

الهنود بالفعل إشتغلونا يا دكتورة
المنطقة الصناعية عندنا في اسماعيلية اغلب مديري المصانع فيها هنود
ومش مسلمين
تخيلي لما مهندسين ومؤهلات عليا يرحوا يعملوا انتر فيو ادام هندي
والله شئ مؤلم وفظيع
الهندي (اللي مش مسلم) يعتبر سلعة رخيصة في اي دولة غير مصر
هنا بقي مدير وبيتحكم فينا
الهندو إشتغلونا يا دكتورة

دمتي في خير

---------------------
رفقة عمر

البركة والفهلوة
تصدقي فعلا هي دي سياسة مصر
اي حاجة ماشية عندنا بالبركة والفهلوة
من اول سواقين الميكروباص لغاية هيئة الطيران المدني

ربنا يهدي

جزاك الله خيرا علي المرور الكريم يا رفقة

الراقـــص مع الذئـــــاب يقول...

حنان
احنا مقلناش نظلم او نتعدي علي حقوق حد
انا بعرض ازاي احنا اللي احسن منهم بنظهر بصورة سيئة ادامهم
مع إنننا الاحسن
طبعا انتي رزعتي كام كلمة بالشامي انا مفهمتش منهم غير الواسطة حلوة

اسعدني جدا مرورك واتمني دوام تكرار الزيارة الكريمة

--------------------------

آبي
طبعا ...ما انا عارفك هتعملي ايه
بس انا وقتها مينفعش ادخل بأي كلمة او فعل أو اعتراض
لسببين...لني كنت قرفان ومش طايق نفسي وعاوز اروح وخلاص
والسبب التاين اني كنت لابس ميري ...يعني مش ناقص مشاكل
أنما لو في حالة ووضع غير كدا يا آبي انا بصراحة بقي ...مكنتش برضو هتدخل
كل واحد عارف حقه كويس ويقدر يجيبه...اصدر نفسي ليه
دا لو حقي انا هخده بأيدي...
اما الشاب المصري اللي اتصرف التصرف الشهم فدا عشان يخلي الراجل ومراته يقعدوا جنب بعض
يعني كان تصرف سليم
مش عشان خاطر عيون الهندي

---------------------------
مني
وعليكم السلام ورحمة الله وبركاته

فعلا يا مني
الخسران الوحيد هو المواطن العادي اللي ملوش اي ذنب
بس خسر بمزاجه
ويمكن ديه صورة مكررة لأوضاع كتيرة اوي عندنا في مصر
تعليق جميل ووجهة نظر جميلة يا مني
جزاك الله خيرا علي المرور الكريم

الراقـــص مع الذئـــــاب يقول...

مهند
وعليكم السلام ورحمة الله وبركاته
ماشي مش كل الهنود بيعبدوا البقر
وفيهم مسلمين
بس للأسف اللي بيجوا عندنا اغلبهم بتوع البقر

جزاك الله خيرا علي المرور الكريم يا هنود


---------------------

آفاق الحرية

هي فعلا فهلوة يا اخي الكريم
وفعلا برضو الكلمة ديه اختراع مصري صميم

بس الحق يتقال الراجل مكنش بيزعق ولا حاجة...وكان متفهم موقفه جدا


جزاك الله خيرا علي مرورك الجميل اخي الكريم

---------------------
يامن
انت فين يا عم
معقولة الغيبة الطويلة ديه
ليك وحشة والله يا صاحبي
ربنا يعينك يارب في شغلك

جزاك الله خيرا علي مرورك الجميل
ومتبقاش تغيب علينا

الراقـــص مع الذئـــــاب يقول...

مجداوية

للأسف السواق مكنش يعرف ان مكان الهندي يسكنه صاحبه وزوجته
حظه وحش بقي
ويمكن يكون حظه حلو غنه موقعش في واحد مصري فهلوي زيه كدا

ويمكن الشاب المصري الشهم عمل كدا لما لقي الراجل معاه زوجته وهتتبهدل معاه
الهندي ميهموش...إنما المصري ابن بلد وراجل وميخلصهوش ان الرجال وحرمه يتبهدلوا

جزاك الله خيرا علي مرورك الكريم

------------------------
عاشقة النقاب
وعليكم السلام ورحمة الله وبركاته
ربنا يخلصنا من اللي البهدلة ديه

وبرضو لاحظت الحتة ديه في القاهرة ومواصلاتها
ان مفيش حد بيحترم الكبير ولا بيقوم ويقعده
ولله الحمد يعني الموقف اتكرر ادامي كتير وكنت بقوم
مش مرجلة وحب ظهور....لا دا الطبيعي خالص
ممكن بقي يقولوا عليا اهبل ....او برسم ادام الناس
بجد ممكن دا اللي يكون بيتقال مدام محدش عملها وقام قعد الراجل العجوز او الست العجوزة او الاخت الحامل او الاستاذ اللي تعبان
ربنا يسترها معانا
جزاكي الله خيراً علي مرورك الكريم

-------------------------
monaliza

شوفتي بقي...الهندي بيعلمنا الادب والانضباط
وهو المفروض السواق كان من الاول مركبش صاحبه
عشان المشاكل والموضوع اللي اتكتب دا

جزاكي الله خيرا علي المرور الكريم

الراقـــص مع الذئـــــاب يقول...

توكا
وعليكم السلام ورحمة الله وبركاته

الحمد لله انا تمام وفي احسن الاحوال بفضل الله يا اختي الكريمة
يارب تكوني انتي بخير إن شاء الله

خلي بالك يا توكا....السفر لوحدك في حد ذاته متعب...
اما بخصوص حجز الكراسي والبهدلة اللي بتحصل فدا تقصير من الشركة الغير محترمة اللي بتسمح بالمهازل ديه

ربنا يهدي

جزاكي الله خيرا علي مرورك الجميل

-------------------------------------
محض روح

للأسف...هي ديه مصر

اسعدني جدا مرورك يا محض
ومتبقيش تغيبي علينا كتير


--------------------------------------
fnan_geology

عاشت مصر كول مستقلة
الشعب المصري حد كويس وجدع اخر حاجة

اسعدني مرورك الكول جدا

الراقـــص مع الذئـــــاب يقول...

آدم
وعليكم السلام ورحمة الله وبركاته
وانا كمان بقرف منهم يا آدم
من غير المسلمين منهم طبعا

فعلا انا نويت اتجوز
هو مش انا بالضبط...هي رغبة الوالدين اللي زهقو مني

ادعيلي بقي

------------------------------------------
عالمي زرق

الله يسلمك
فعلا ....لو كان حد مصري كان ريح نفسه وقعد علي اي كرسي
بس كان يعمل بلو برضو
يعني لزوم الهمبكة بتعتنا

جزاك الله خيرا علي المرور الجميل

--------------------------------------------
بوسي

جزاك الله خيرا علي مجاملتك الرقيقة
الهندي مش محظوظ ولا حاجة
الهندي حكم رأيه واحد حقه
وعلي فكرة اي حد لو كان عمل اللي عملو الهندي كان هياخد حقه
احنا بنعترض علي الموقف من الاول وليه السواق يحط نفسه وصحبه وبلده في موقف زي كدا من الاول خالص

قيل للسعادة اين تسكنين قالت فى قلوب القانعين.
جملة جميلة جدا يا بوسي




جزاك الله خيرا علي الزيارة الجميلة التي اتمني دوام تكرارها

AD sabry يقول...

nice post
but i dont agree with u
any body can change if he try
people should improve their good things
an try to reduce their bad habits
to live better life

قطرة يقول...

ردا على الدبوس ...

كلامك يوحى بأنك تتمنى لمن يغالى وليها فى مهرها ان لا تتزوج وتتقدم بها السن وتتبهدل ..
طيب ليه متغاظ منها اوى كده وهيا تخصك فى ايه متشوف غيرها وخلاص وربنا يسهلك ويسهلها بتتمنالها الشر ليه؟

والله اعلم يمكن امنيتك دى تكون خيرا لها
وممكن اوى واحدة تكون متساهلة جدا هيا واهلها فى مهرها اللى هوا حقها ... وبردو ربنا ميكتبش لها الزواج نهائى
ده رزق من ربنا

والمهر هوا حق للمرأة .. ياترى مين بيديلها الحق ده دلوقتى فى مصر؟
هوا فى لسة بنات فى مصر ليهم قيمة وبياخدو شىء يسمى ( المهر ) ؟
على العكس دول هما اللى بيدفعو دلوقتى مهر وبيجهزو البيوت
ولو الواحدة منهم اخدت مهر بينتظر العريس تلقائيا انها تجهزله بيته بالمهر ده عن آخره
الا من رحم ربى

احنا كلنا بندعو لتيسير المهور آه ..
لكن مهور ايه اصلا يا ناس هوا فيه بنات فى مصر لسة بياخدو مهور؟

احنا من كتر ما دعينا لتيسير المهور فقدت بناتنا قيمتها ... ومفيش راجل واحد حمد ربنا بالعكس دول اخدو التيسير وكأنه حق مكتسب وبيطالبو بالزيادة وحتى الشبكة (اللى هيا الحاجة الوحيدة دلوقتى البنت بتمسكها فى ايدها ) مش عاوزين يجيبوها وبيفاصلو فيها

وده طبعا مما يتعارض مع قوله تعالى فى سورة النساء آية 4 : ( وآتو النساء صدقاتهن نحلة ) أى عطية واجبة مفروضة

قال الله تعالى فى سورة النساء آية 20 : ( وَإِنْ أَرَدْتُّمُ اسْتِبْدَالَ زَوْجٍ مَّكَانَ زَوْجٍ وَآتَيْتُمْ إِحْدَاهُنَّ قِنطَاراً فَلاَ تَأْخُذُوا مِنْهُ شَيْئاً أتَأْخُذُونَهُ بُهْتَاناً وَإِثْماً مُّبِيناً )

مما يبين اهمية حق المرأة فى المهر الذى يطيب نفسها ويسعدها ويجوز أن يكون مهرها قنطارا من ذهب كما فى الآية

وجزاكم الله خيرا والسلام عليكم ورحمة الله وبركاته