Translate

الجمعة، 13 يونيو 2008

احلام دنيا......

السلام عليكم

في نص الاسبوع الوحدة والملل قتلوني قلت انزل اتمشي شوية في شوارع المحروسة

وبما إني في مكان في وسط أحياء القاهرة الراقية الفسحة بيبقي ليها شكل تاني

بتبقي فلسفية شوية

يمكن عشان انا من سكان الأقاليم (اسمعلاوي) معندناش فوارق إجتماعية واسعة أوي زي اللي موجودة في العاصمة

بلدنا هادية وجميلة ونظيفة وأهلها ناس بسيطة....بتيجي الساعة 8 في الشتا الشوارع بتبقي فاضية

أيوة... في الصيف بنسهر شوية لغاية الساعة 12....بس عشان احنا مصيف صغير علي أدنا

إنما حياتنا كلها مش مبهرة ....ودا اللي مخلينا بنحب بلدنا أوي ومتمسكين بيها...حتي في تشجيع الكورة.....ومحدش هيعرف دا غير ولاد بلدنا أو اللي عاش عندنا...

نزلت في وسط الأسبوع أتمشي في أحد الميادين الراقية....واتفرج علي السيارات الفارهة وأصحابها من ذوي الحلاّت وأربطة العنق الشيك
وتتأبطهم زوجاتهم بملابس لا مجال الأن لزكر تفاصيلها....ربنا يرزقنا غض البصر...وتسبقهم أطفالهم بملابسهم الزاهية ولا تخلوا أيديهم من العاب عجيبة ومتقدمة مواكبة للعصر

مفيش مشكلة...ناس خارجين ...ملناش دعوة

وبجوار أحد فروع سلسلة المطاعم الشهيرة في هذا الميدان تجد منظر يجذبك

الواجهة الزجاجية الشفافة التي تكشف رواد المطعم وأمامهم أشهي المأكولات

وشاشات عرض تلفزيونية ضخمة تعرض أكثر من قناة أوروبية أغلبها يعرض بطولة أمم أوروبا اللي خصخصوها

أخوكم وقف من بعيد عشان يشوف حتة من الماتش اللي شغال عشان يحكي لصحابه ويفشر عليهم قال يعني مشترك في الجزيرة بلس وبيشوف بطولة أمم أوروبا...ويحبذا بقي لو وسعت معاه وراح قلهم إنه شاف الماتش الفلاني في المطعم الفلاني في الحتة الفلانية

ويحلف علي كدا ....

بس اللي شدني بقي واللي خلاني أوجع دماغ حضراتكم منظر مؤلم

طفلة لا يتعدي عمرها ال5 سنوات.....مستلقية علي جانبها الايمن بجوار سور المطعم وغارقة في النوم

طفلة من أطفال الشوارع اللي كانوا شايلين همهم الفترة اللي فاتت ومرة واحدة الموضوع نام

مأساة بكل ما تحتويه الكلمة من معاني

بنت نحيلة الجسد....حافية القدمين....متسخة الملابس الرقيقة التي لم تتبدل من علي جسدها الضعيف منذ شهور

طبعا أكيد انتوا متخيلين منظرها وشفتوه كتير

بس محدش شافها وهي نايمة ...وكمشانة في نفسها زي العصفورة

اي حد لو بص في وشها الجميل اللي الدنيا اخدت منه وردية الطفولة وسابتله سواد الشارع

بس لسا الجمال سايب اثره....جمال طبيعي من عند ربنا.....جمال البرائة

شعرها لونه بني وسايح ونازل علي عنيها وجبينها....

وقفت أتأملها وانا نفسي اصحيها وأسألها سؤال واحد بس

نفسك في ايه؟؟؟

تتخيلوا معايا الأجابة هتكون ايه من دنيا؟؟

انا سميتها دنيا

هل هتقولي انا نفسي انام شبعانة ولو ليلة واحدة؟؟

والا هتقولي انا نفسي انام في بيت بين أب وأم...او علي الأقل حد يهتم بيا من غير ما يكون في أحداث أو ملجأ

يا تري نفسها تلبس زي ولاد الناس اللي في المطعم اللي جنبنا....وتمسك لعبة زيهم....ممكن تكون تجرأت وفكرت انها تحلم تاكل من الأكل اللي بينه وبينها سور ولوح زجاجي شفاف

ولما حاولت تاكل بواقي الأكل اللي بيترمي في الزبالة يا تري عمال المطعم عملوا معاها ايه؟؟؟

مسألتش نفسها في يوم انا ذنبي ايه في اللي انا فيه دا؟؟

مخفتش من المجهول؟؟؟

دنيا بنت.....عارفين يعني ايه بنت.....كمان 10 سنين و يمكن اقل الوضع هيبقي رهيب

دنيا هتبدأ تدخل في سكك كلها شوك....ومش هتسلم منها

وممكن تبقي السبب في إستنساخ اكتر من دنيا

مفيش مفر...دي بنت

مفيش حدود دنيا هتلتزم بيها......دنيا اتحكم عليها بمصير وسكة واحدة
في الف ناب وظافر مستنيين عشان ينهشوا لحمها

رحماك يا الله

وايه تاني يا دنيا؟؟

اكيد لسا الحلم أو الكابوس دا مجاش علي بالك....
خلينا في احلام سنك....احنا شايفينه 5 سنين....بس يا تري الخمس سنين بتوعك زي الناس العادية....والا كل يوم بيعدي عليكي بياخد منك حجات وببيدلها بحجات تانية
بياخد منك البرائة والجمال....وبيبدلها بقسوة وغل
بوحشية وخوف من كل اللي حوليها....لازم تخربشي اللي يقرب منك....
لازم تعيشي....الناس ديه مش هترحمك....
هما السبب في اللي انتي فيه
فكرتي انك تخدي لعبة ابنهم وتجري
ايوة فكرتي ...بس افتكرتي بسرعة ان العسكري هيمسكك...وهيضربك ....ومحدش هيحوش عنك
وضرب العسكري بيوجع اوي....وممكن يخدك علي الأحداث....ويحصلك زي ما بيحصل لصحابك اللي راحوا هناك....واللي هرب منهم جه يحكي علي اللي شافه ويخوفك منه....
الشارع احسن من الاحداث والملجأ
دنيا متعرفش ....بس بتسمع وتتخيل....لازم هتخاف....وهتهرب...
حتي ولو هناك جنة
دنيا بتحلم وتتمني
دنيا لسا نايمة ...وانا واقف جنبها...وخلاص
حلمتلها شوية وأكيد مشيت....
ومغيرتش حاجة ....
يا رتني ما كنت نزلت ولا خرجت.....
وربنا يحفظ دنيا وأخواتها من اللي جاي
ويجعل ليهم مخرج من اللي هما فيه
الدبوووووووووووووس
الموقف دا بيحصل كتير في افراحنا يا جماعة
تعالوا نشوفه كدا مع بعض
محسن: شايف صلاح صاحبنا زي العسل ازاي وهو عريس
احمد : ايوة...ماشاء الله عليه ربنا يبارك له
محسن : وعروسته كمان زي القمر
أحمد : وانت مالك بعروسته....انت جاي تتفرج عليها والا ايه؟؟
محسن : ايه يا عم الكلام دا....دا صاحبي ودي عروسته انت بتفكر ازاي بس
(مش قصدي إن محسن نيته وحشة....بس مينفعش يقول كدا)
ومسك الموبيل وعاوز يصورهم هما الاتنين
أحمد: لا.....مينفعش...تحط صورة زوجة صاحبك علي تلفونك ليه؟؟
محسن : ايه يا عم اللي انت بتقوله دا ...انا بصور صلاح وعروسته
أحمد : هو انت بقي إن شاء الله احد محارمها عشان تحط صورة صلاح وزوجته
عاوز تصوره صوره لوحده يا عم....
ومن علوم الفوتوغرافيا إن المرأة بتخطف النظر الصورة...
محسن : انت هتتفزلك وهتفتي كمان....ايه التخريف دا بقي
أحمد : مش تخريف ولا حاجة يا محسن بص يا سيدي انت لو مسكت اي صورة فيها مجموعة من الناس وكمان من الحيونات الأليفة
هتلاقي انجذاب النظر بالترتيب الي الحيونات الاليفة ثم الاطفال ثم النساء ثم الرجال
لو عريس وعروسة متصورين هتلاقي نفسك مركز علي العروسة مش العريس
يعني حضرتك هتبقي عامل إعلان لزوجة صاحبك علي تلفونك
لأن اي حد هيمسك تلفونك هيركز اوي علي زوجة صاحبك ويتفرج عليها وعلي جمالها ...أظن دا شئ ميرضيش الرجالة طبعاً....الرجالة يا جماعة ...واخدين بالكم انتوا
ياريت يا صلاح تحافظ علي زوجتك....ومتفرجش عليها الناس....مش حاجة تشرفك لما تلاقي صورها معروضة في الاستديواهات والناس بتتأمل في جمال عينيها وشفتيها وانفها الصغير
عيب كدا...
احنا مسلمين...والغيرة علي نسائنا لازم تبقي موجودة...لو مش موجودة دي يبقي اسمها حاجة تانية
انا مش رجعي ولا متخلف ولا محبكها
بس دي سلبيات وموضوع الافراح دا لازم يبقي في اكتر من وقفة .....ولازم نننتاقش بصوت عالي عشان الناس تبدء
تسمع
وربنا يهدي

هناك 32 تعليقًا:

عاشقه الفردوس يقول...

الله يكرمك مواضيعك رااااااااائعه
انا كنت لسه معلقه ع الموضوع اللي فات

معلش هو متاخر بس انا اصل بعيده عن التدوين الايام دي

عاشقه الفردوس يقول...

بالنسبه لموضوع دنيا

بجد بجد انا نفسي اعمل حاجه

اكيد في حل
اكيييييييييد

استحمل تعليقي لانه هيبقي طويل شويه


اما الفتره اللي فاتت دي بعدت عن التدويين بصراحه دماغي مكنتش فيه

كانت في حاجه هم منه

بس احيانا كنت بفتكر دار الايتام اللي بروحه علي طول وان ازاي بقالي فتره مروحتوش والبنات بتزعل مني اما بتاخر عليها

ده غير اني اصلا مقدرش استغني عنهم

انا لفيت دوووور ايتام كتيييييييييير

خاصه وحكوميه


ومقولكش مستوي ردئ بمعني الكلمه

الا في الدار اللي بروحها

ش اقصد بس الماديات ولا المستوي المادي
بالعكس
اصلا اللي عامل الدار ده ظابط واما مات مراته هي اللي بتديره
والبنات اللي فيها مش بتفع اي حاجه
يعني فيه ناس بتعمل خير

لا والاحلي الدين والاخلاق

بيعلموهم الدين وبيربوهم ع الاخلاق


انا بتعلم منهم حاجات كتييييير بجد
علي فكره مش كلهم ايتام
نزلت سالت الادراه قالولي مش كلهم ايتام

يعني منهم بنات شوارع - زي مابيقولو- بس فيه مكان نضيف اهو لمهم وبيعلمهم في المدارس ومنهم بنات بعد الاعداديه راحت تشتغل واتجوزت وجوزها خطبها من امها - زي ماهي بتقول اللي هي مديره الدار


يعني علاقه انسان بانسان لو احنا فكرنا بالمنطق ده حاجات كتيير هتنحل

انت خلتني افكر بموضوع بس همخمخله كده واكتبه باذن الله
بس قبل مااكتبه هعرضه عليك لو عجبك هتبقي سيادتك المسؤل عنه (شكلي بدبسك):))


بالنسبه للدبوس


فمش هتكلم عنه

لان ربنا يكرمك في كل دبوساتك بس احنا خلاص هنبقي عاهه مستديمه

في ميزان حسناتك باذن الله

šσяšαяαα يقول...

يــــــا اللـــه

انا المشهد دا مابيعديش يوم اكون فيه فى القاهرة غير وبشوفه المشهد دا وبجد مش ببقى عارفه اعملهم ايه
لو فى مالاولاد دول بيطلبو فلوس مثلا تلاقيهم يااما علشان يجموعها ويدوها للعصابة اللى بتشغلهم زى الافلام بس افتكر ان دا حقيقى
يااما عشان يشربوا بيها سجاير والله اعلم ايه تانى
يااما زى حال البنت دى متكومة جنب الحيطة لاعارفين عايشة واللا بين الموت والحياة
وزى مابتقول فعلا دى كارثة ومحدش هيسأل عليها لان الموضوع زى اى مواضيع بتطرح على الساحة
يتعملها شوية دعاية كدا وقال ايه كدا الناس قلبها رق وخلاص الظاهرة دى هتختفى وكل طفل هيلاقى مكان يعيش فيه
طبعا يطلع النهار كل الكلام دا يسيح

لو الواحد بس قادر انه يجمعهم فمكان ويعلمهم ويراعيهم بس مالبيد حيلة

بالنسبة للدبووووس
فى الافراح اساسا دلوقت مابقتش تشوف لا العريس ولا العروسة من كتير الكاميرات والموبايلات اللى حواليهم
نفسى اعرف الناس دى هتستفاد ايه من شغل المصوراتيه اللى بيعملوه دا

ربنا يصلح الحال

šσяšαяαα يقول...

انا وقفت فى مرورى السابق لمدونتك عند البوست اللى كنت قافل فيه التعليقات
قلت دلوقت اشوف باقى التدوينات اللى فاتتنى
ووجدت عدة مفاجأت
ايه ياسيدى الحاجات الجامدة دى
الف مليون وخمستلافة مبرووووووووووووك عالخطوبة( طبعا محرجة منك جدا بس اعذرنى انا كمان كنت فحالة بيات صيفى)
ومبروكاية كمان عالترقية ياحضرة الباش ظابط:)

ربنا يوفقك دايما ويتمملك مشروع الزواج على خير
وطبعا من غير ماتحلف انا عارفه انى معزومة:P

appy يقول...

يا اهلا وسهلا يا ح الظابط
بص بقى احنا بنقابل اللى زيها كتير وبنعمل حمله دلوقتى انا ومجموعه مدونين علشان كده وكنا سمعنا ان استاذ عمرو خالد هى دى حملته الجايه
وبعتنا له مع واحد زميلنا
وان شاء الله بنرتب الخطوات ليها لان عاوزين نشوف اماكن وبيوت ليهم
بس عاوزة اقول وده حوار دار بينى وبين بنت علىالبورصه وولد عنده تلات سنين البنت بقولها ماما فين قالت بتشحت وبابا بيسرق يعنى الاهل اساسا دى شغلانتهم فمش كلهم يا ح الظابط مظلومين فى الحياة لان الكارثه انك هتلاقى حالات مش هتقدر تصلحها ولا تعمل لها حاجه خالص لان اهلها اللى بيعملوا كده وفيه ناس خلاص بقت د ى حياتهم بس ربنا يقدرنا على عمل شئ كويس ليهم

الدبوس اللى انا هعلق عليه موضوع التصوير على الموبيل
واللى بقول عليه من التكنولوبيا ما قتل مش على قد الافراح ولا العروسه طيب واللى غاويين يصوروا البنات والمعازيم فى الشارع

آفاق الحرية يقول...

السلام عليكم
دنيا مش وحدها
للاسف فيه الاف غير دنيا
ويمكن دنيا لسه صغيرة زي ما انت تفضلت ولسه مدخلتس المعترك من اوسع ابوابه
ربنا يسترها معاها
بالنسبة بقي للدبوس فالموضوع ده بقي ظاهرة ومنتشرة كتير جدا
وكمان مش صور ده بقي فيديو للاسف

shaimaa samir يقول...

بداية معذرة لعدم المتابعةالجيدةلظروف الامتحانات
دعواتكم
ثانيا
موضوعين كل موضوع فيهم حالة
طريقةسردك فى الموضوع وحلمك ادمعت عينى
عجبنى تعليق ابى ان فى خطوةايجابية فى حاجةزى كدة
ياريت الواحد يعرف يشارك
دنياجواها دنى كتيييرةاوى
واحنا عايشين جواهم
زى ماهما عايشين جوانا
بساحناواخدين مساحةاكبر لرؤيتنا
دايما شايفنا
دايمابيقارنوا
دايما بيقولوا اشمعنى
لكن احنا معيشنهم جوانا لفترة وجيزة
وزى ماقلت الموضوع بينااااااام

اماعن الموضوع التانى
ياه الدنيا لسه بخير والله
يعنى جزاكم الله خيرا للفت الانتباه لمن يعتبرون ان هذا الامر عااااااادى
وما اكثر الامورالعادية اليوم

kochia يقول...

موضوع مميز
ولفت نظري جدا موضوع دنيا !!!
قبل ما نهاجمهم ونتهمهم المفروض نشوف لهم حل
كان في عز الشتا ولد عمره اقل من 10 اعوام فضي برميل الزبالة عشان ينام داخله.. واحنا البطاطين والالحفة مش مكفيانا
ويمكن نلومه بعد كدة انه وسخ الشارع

الامر لله
تحياتي

خمسة فضفضة يقول...

السلام عليكم ورحمة الله وبركاته

للاسف اطفال الشوارع دول منتشرين بطريقه عاليعه جدا وخصوصا في المدن الكبيره زي القاهره
وياعيني علي العيال مش بيلاقوا اللي يمد لهم ايد حنينه وكل العالم نازل فيهم تلطيش
فاتلاقي العيال طالعين عندهم كمية حقد وغل علي الناس والمجتمع وبيحاولوا يخربوا كل اللي يوصل لاديهم
نفسي الظاهره دي تختفي من بلدنا بس اعتقد انه صعب اوي في الفتره الحاليه


بالنسبه للدبوس : مش هاقول اكتر من ان الفاكهه المكشوفه دايما الدبان بيقف عليها
انما ياسلام بقي لو متغطيه تقدر دبانه تهوب
:)

سلام

خمسة فضفضة يقول...

ايه دا كله يا محمد
بعد ما علقت خرجت خدت جوله في المدونه لقيتني بسم الله ماشاء الله فايتني كتير اوي
اصلنا زيك كده بقالي فتره مش متابعه بانتظام بسبب الشغل والضغط الرهيب اللي فيه

الف مبروك علي الترقيه والخطوبه وربنا يتملك علي خير

سلام

nonoymm يقول...

مش شايفة مش شايفة من العياط والله
تخيلتها مريم بنتي
مش عارفة اقول ايه نفسي اعمل حاجة بايدي والله
لو انا وقافة مكان حضرتك ممكن كنت صحيتها واخدتها في حضني اوي ووديتها لحد يكفلها من معارفنا هنا
اقل حاجة كنت اعملها
تعرف صاحب شركة زوجي كان بيعمل دار للولاد دول لكنه للاسف تراجع بسبب تعقيد الاجراءات ومش بس كدة دة كمان كان هيدخل في مساءلات قانونية كتيرة وللاسف اضطر يقفلها لاجل مسمى
حسبنا الله وعم الوكيل
حسبي الله ونعم الوكيل
موضوع الافراح اما افوق الاول من دنيا ابقى اجي تاني اعلق
ربنا يبارك لك

مـــــــــــــي يقول...

أولا السلام عليكم

ثانيا بلاش كلمة أقاليم دي حكم أختك متعقدة قوي منها..


دنيا و أخواتها و أخوانها ف ذنب (انت عارف مين)...واحنا كمان هنتحاسب عليهم.. وربنا معاهم و يتولاهم برحمته...


بالنسبة للفرح و الصور أنا متفقة جزئيا معاك..

Ma 3lina يقول...

كلنا عارفين ايه اللى هيحصل لدنيا

بس محدش هيعمل حاجة هنقف نتفرج بس

قطــــوفها دانيــــــة يقول...

السلام عليكم...
سبحان الله يمكن الموقف ده لوحصل مع واحد من المناطق اللى بتحكى عليها باصحاب الملابس الفاخرة والعربيات الفارهة لو شاف نفس المشهد كان اشمئذ
الا من رحم ربى طبعا
مع ان هما اكتر ناس المفروض يحسوا بالطبقة دى لانهم فعلا يقدروا يعملوا كتير لو واحد منهم تكفل بطفل او طفلة هيحل مشكلة وهيؤجر على ده لكن التفكير فى ايه؟؟؟
لبس احدث موضة تحديث العربية على اخر طراز تقضية الاجازات فى بلد اوروبية
وما خفى كان اعظم وانا لله وانا اليه راجعون ماتت قلوب المسلمين
فى صباح اليوم كنت راكبة مع بابا العربية شفت طفل شارع ماسك قطة ميتة وبص للسائق اللى هو بابا بخبث عشان ما يخدش باله منه وراح رامى القطة الصغيرة الميتة تحت عجلات العربية
تفتكروا ده لو طفل اى واحد من الناس دى اكيد كانوا هيودوه لميت دكتور نفسى بسبب اللى عمله
محدش فكر ليه طفل الشارع ده عمل كده يا ترى؟؟؟
جزاك الله خيرا وتقبل مرورى

ToOoKa يقول...

السلام عليكم ورحمة الله وبركاته
بجد والله مش لاقيه كلام اقولو
مش عارفه البلد دى حيوصل بيها الحال لحد فين

اساسا البلد كلها بقت شحاته كفايه انو احنا بنمد ايدينا علشان ناخد اكلنا ودوانا من البلاد التانيه

الناس دلوقتى بتفكر تعدى يومها ازاى وماعدتش فارقه معاها اى مشاكل تانيه

الواحد بيكون حزين اوى وبيتقطع لما يكون شايف مشكله ومش عارف يعمل اى حاجه ويمشى وسيبها

بس المشكله بقه انو فى ناس بقت بتمثل فالواحد ما يعرفش الكويس من الوحش

ياريتنا بقه نسيبنا من الحكومه ونحاول نعمل حجات اهلية
وربنا يعينا

اما بالنسبة للافراح فالصراحه كلها دبابيس

Vague يقول...

ياعم انت محسسني ان احنا ماعندناش هنا في اسماعلية حتى اسمها سوق الجمعة

ولا موقف التلاتيني

النوعية دي موجودة في كل مكان

بس انا حاسس انك بتتكلم عن واحدة تانية
طيبة غير اللي بنشوفهم


الله يرحمك يا سيدنا عمر عندما قال انه يخشى ان يشرد بعير في اخر البلاد ان يسأل عنه

كاشف الاوهام يقول...

واخيرا عرفت المجهووووول
هو مفيش غير
العصفور
عاوز تتاكد عاوزة تتاكدى
خشى على اللنك دا
واقروا اواخر الكومنتات
http://scandal--blogger.blogspot.com/
--------------
u deleted my comment delete it or not your are now known
ya se3edy
-------------
يلا خش واعرف الحقيقة والحق
http://scandal--blogger.blogspot.com

كاتب مصري يقول...

تحيتي
الصراحة لم أقرأ البوست لأني الآن على عجل ولكنني سأعود حتما لأقرأه وأضع تعليقي
هذه المرة الأولى لي هنا وأحب أن أدعوك بدعوة مصحوبة بالفل والياسمين لزيارة مدونتي آملا أن لا أرد دون إجابة الدعوة ..
أنتظر زيارتك وتعليقك قريبا..أظنها ستروق لك
تحيتي
مدونتي هناhttp://kanyatklam.blogspot.com/

منى يقول...

احنا هنفضل لحد امتى نتفرج على دنياواللى زيها ومش نعمل حاجه
حاسه ان كلنا شركاء فى ذنبهم
اسعدنى اوى تعليق ابى
يارب فعلا حد يعمل حاجه وهحاول اعرف التفاصيل
ياريت الكل يشارك

بالنسبه للدبوس بقى
اللى بيحصل والله
حاجه تغييييييييييظ
تحياتى

la3lahakhier يقول...

السلام عليكم ورحمة الله وبركاته
من فريق حبا فى رسول الله نأسف لعدم الاستئذان ولكن وجب التنوين فبعد اذن صاحب المدونة نرجو التوجه لمدونة la3lahakhier_2 للمشاركة فى التطبيقات العلمية للحملة
جزاكم الله عن نبيكم كل الخير
مع دعائنا وشكرنا لصاحب المدونة
فريق حبا فى رسول الله

عًٍمًرٌٍوٍ آلنْوٍبٌَِى يقول...

تانى اطفال الشوارع وتانى كلام بيوجع القلب ويعيشنا فى حزن
انا فى كل بوست بقراه وبلاقى كلامو بيدور عن اولاد الشوار بسأل سؤال واحد

ايـة اخرت الكلام ... ياترى فى حاجه بتتغير .. ياترى بنقدر نوفرلهم حاجه من احتياجتهم .. ياترى وياترى ...الخ ؟؟؟
كلو كلام وبـــس
انا عارف ان الكلام مش قليل ولية مردود ولية صداه الى بيتسمع بس فين الحلول .. الناس دى مش هتاكل كلام مش هتنام على كلام .. لازم يكون لنا وقفة بجد فى الموضوع ده

سامحنى على الاطاله بس بجد انا محروق دمى .. وجوايا غل كبير والله

تحياتى ليك

t3ban يقول...

راحت عليكي يا رجولة
دي اقل كلمة تتقال

lalapuny يقول...

walahy ana 7aba elmawdoo3 2awy we momken netsharek fe ra2yena
ana lalapuny sa7ebet lalapuny world
elblog ely enta da7'alt 3aleeh we sebt ta3le2ak ely ana bashkorak 3aleeh 2awyyyyyyyyy
we 3la fekra ana magnonet isma3ely zayak tamaaaaaaaaam

رفقة عمر يقول...

بجد اثر فيا قوى موضوع دنيا
وفيه كتير قوى زى دنيا
مش عارفه بجد هانفضل نشوفه ونسكت لغايه امتى
لو فيه دوله اسلاميه بحق وحكم شرعى مش هانلاقى حد زى دنيا دى ابدا
ربنا يرحمنا من عنده
جميل قوى الدبوس
فيه ناس مش بتاخد بالها من الامور دى
جزاك الله خيرا

بيكيا للبيع يقول...

انت بتختفى ليه بقى العروسه والشغل ولا ايه

الراقص مع الذئاب يقول...

السلام عليكم

عاشقة الفردوس
جزاكي الله خيرا علي كلامك الجميل
وربنا يجازي اصحاب الدار اللي اشرتي اليه خيرا
وانا يا ستي إن شاء الله جاهز لأي اقتراح إذا كان في مقدرتي إني اعمله
معلش ردي متأخر لأنشغالي بالعمل اللي ملوش لزمة اللي انا فيه

-----------------------
سارة باشا
كلنا بنحس نفس الاحساس ونفسنا نعمل حاجة
بس ياريت منقف فعلا عند الكلام بس
جزاكي الله خيرا علي مرورك الكريم وربنا يبارك فيكي يا سارة


-----------------------
آبي
خطوة جميلة وربنا يتمها علي خير
بس يا آبي حتي اللي ابوه وامه بيسرقوا مظلومين
محدش بيختار ابوه وأمه
وأدينا علي الاقل بنتكلم
مش يمكن
جزاكي الله خيرا علي مرورك الكريم

الراقص مع الذئاب يقول...

آفقا الحرية
وعليكم السلام ورحمة الله وبركاته
فعلا دنيا مش لوحدها
وديه المصيبة والطامة الكبري
ربنا يسترها

--------------------
شيماء سمير
ربنا يكون في عونك ويوفقك وتكون الامتحانات عدت علي خير إن شاء الله
تعليقك جميل يا شيماء ربنا يبارك فيكي
فعلا هما ضيوف جوانا..والموضوع هينام
ربنا يسترها
جزاك الله خيرا علي مرورك ومشاركتك الجميلة

--------------
kochia
لازم فعلا يا kochia نشوف حل ونقف مع نفسنا في الموضوع دا
وعشان كدا انا كتبته وسبته فترة للناس
عجبني جدا تعليقك الاخير

"كان في عز الشتا ولد عمره اقل من 10 اعوام فضي برميل الزبالة عشان ينام داخله.. واحنا البطاطين والالحفة مش مكفيانا
ويمكن نلومه بعد كدة انه وسخ الشارع"


جزاك الله خيرا علي مرورك الكريم

الراقص مع الذئاب يقول...

خمسة فضفضة
وعليكم السلام ورحمة الله وبركاته
ربنا يبارك فيكي علي التهنئة الجميلة

بخصوص دنيا
فعلا كل العالم نازل فيهم تلطيش
ودا بيولد رد فعل عجيب منهم...وممكن يكون غير متوقع كمان
هي مش ظاهرة يا دكتورة
ديه مأساه
ابطالها ناس كتيرة اوي احنا نفسنا من الناس دوله
ربنا يسترها ونعرف نلاقي حل غير الكلام

جزاكي الله خيراً علي المرور الكريم يا دكتورة
-----------------
عاشقة النقاب
ربنا يحفظ مريم وكل اللي زيها من كا سوء ويبارك فيهم
وياريت فعلا نتخيل دنيا زي مريم
سعتها هنحس بيها اكتر
حسبنا الله ونعم الوكيل

----------------------

مي
وعليكم السلام ورحمة الله وبركاته
اما بخصوص الاقاليم فدي بقت خلاص في لسان كل قاهري
حتي لما بيتكلموا علي الاسماعيلي بيقولي نادي اقالليم
ودا مش عيب
اقاليم اقليم
المهم نشوف لدنيا حل
جزاكي الله خيرا علي مرورك الكريم يا مي

الراقص مع الذئاب يقول...

دكتورة مرام
كلنا عارفين
وفعلا وقفنا نتفرج
لها الله

----------------
قطوفها دانية
وعليكم السلام ورحمة الله وبركاته
اصحاب اربطة العنق الانيقة لا يبالون بمن يفترش التراب
يدفعوا فلوسهم في اي شئ الا مساعدة محتاج
الا من رحم ربي
اما ردود افعال اطفال الشوراع فدا شئ طبيعي ....شوفتي حياتهم عاملة ازاي
اكيد رد فعلهم هيبقي بالشكل دا
ربنا يتوالهم برحمته
جزاكي الله خيرا علي المرور الجميل

----------------------------

توكا
وعليكم السلام ورحمة الله وبركاته
هي ديه المشكلة
اننا مش عرفين نعمل حاجة يا توكا
وحتي اللي بيمثل...ايه اللي وصلو لكدا
جزاكي الله خيرا علي مرورك الكريم ودمتي في خير يا اختي الكريمة

الراقص مع الذئاب يقول...

آدم
لو قرأت الموضوع وفهمته مش هتقول اللي انت قلته
انا بتكلم عن الازدواجية اللي في المجتمع
من الطبيعي انك لما تشوف طفل شارع في سوق الجمعة انك هتنفضله ومش هتهتم...البيئة بتغلب علي المظهر
انما لما تشوفه في مركيور او في اي مكان براق هتعرف حجات تانية كتير

هتبتدي تاخد بالك يا آدم

وهو دا اللي خلاني اكتب الموضوع

دمت في خير

----------------------
مني

هنفضل طول عمرنا نتفرج عليهم يا مني
مدام مش حليتنا غير الكلام
طبعا كلنا شركاء في ذنبهم
ربنا يجازي آبي خير وتقدر تعمل حاجة
واحنا معاها
----------------------
لعله خير
وعليكم السلام ورحمة الله وبركاته
جزاكي الله خيراً علي التنوية

--------------
عمرو النوبي
فعلا يا عمرو
كلامك صح
ادينا بنتكلم
بس خلينا نتكلم...مش يمكن نقدر نعمل حاجة
اصل السكات مش هيعمل اي حاجة
يمكن الكلام يعمل حاجة بسيطة
بس اسمها حاجة

جزاك الله خيرا علي مرورك الجميل
واحساسك اللي كلنا حاسين بيه فعلا

الراقص مع الذئاب يقول...

تعبان
يمكن تكون راحت عليها من زمان
بس اكيد لسا في ناس مرحتش عليها
ربنا يسترها


----------------
lalapuny
اهلا بيكي كأسمعلاوية في مدونة اسمعلاوية صميمة
واتمني دوام ترددك يا lalapuny
دمتي في خير يا اختنا الكريمة

------------------------
رفقة عمر
حمد الله علي سلامتك يا رفقة
ربنا يتولاهم برحمته ويسترها معانا ومعاهم
جزاكي الله خيرا علي مرورك الجميل يا رفقة

الراقص مع الذئاب يقول...

آبي بتاعت التحف والانتيكات
الشغل والله يا آبي
اما العروسة فمعدتش بشوفها ولا بكلمها
دواعي امنية
مفيش اي حاجة تحصل غير بعد كتب الكتاب
ادعيلي ان ابوها يليلن دماغه شوية واكتب علي اخر الصيف دا
عشان معصلج وراسه والف سنجه انه يكتب بعد سنة
تخيلي بقي مكلمهاش ولا أشوفها لمدة سنة