Translate

الثلاثاء، 10 أبريل 2007

يوميات نصاب-2

السلام عليكم
ازيكم يا حلوين
معايا الناهرده فكرة هتظبط بيها امورك وتطلع منها بلقمة عيش حلوة تكفيك اليومين اللي جايين
انتم عارفين الحكاية بقت صعبة اوي بعد
انفلونزا الطيور...(قال يعني احنا بنكلها)......والحصبة الالمانية (اخدتها وانا صغير)....والمشاوير اللي مش جايبة همها
ندخل في الموضوع عشان انتم عارفين ان وقتي ضيق اوي ومصالحي كتير
فكرة الناهرده مقسومة نصين...نص إن دور...ونص اوت دور
بالنسبة للإن دور
انت محتاج 500 جنيه راس مال
ولا مؤخذه500 جنيه؟؟؟.....كتير اوي
.....معلش انا قلتلك اني مش هسيبك وهظبتك...بال 500 جنيه دوله هيبقي معاك حوالي 1000 جنيه....
لا يا خفيف مش هنولد الفلوس ولا حاجة
الفلوس بتجيب فلوس
بس هتتصرف ازاي في راس المال........؟؟
الست والدتك معاها حتتين صيغة عيناهم لغدر الدنيا......طبعا انت أولي من الدنيا بيهم....
لالالا مترحش بعيد ...مش هتسرقهم ولا حاجة
أنت هتروح لوالدت في ساعة عصاري وهي بتشرب الشاي
بس المهم والد حضرتك ميكنش موجود .....
وهتقعد جنبها وهتحط أيدك علي خدك وترسم العكننة علي وشك
....مش هيليق عليها الكلام دا وهتطنش....
متيأسش...أدخل عليها بكل الطرق لغاية ما هي تسألك وتقولك مالك يا واد ايه اللي قالب وشك كدا
...قلها مفيش وخش اوضتك واقفل عليك الباب.....
طبعا انتم عارفين طبع الامهات....مش هتصبر وهتخبط عليك.....
هتتقل انت....بس مش اوي عشان متمشيش وتسيبك...
المهم بعد ما تسألك وتلح عليك وعاطفة الحنان الاموية تصحي تاني بعد ما ماتت بعد ما حضرتك اتخرجت من الكلية ومش لاقي شغل ....
هتقولها انك زهقت وحاسس بالفشل وانك مكسوف من نفسك...
فلان وفلان ابوهم اشترلهم عقد وسفرهم بره ...وفلان ابوه شغله في مصنع من بتوعه ....
وفلان خاله شغله في شركة من شركاته.....
وصوتك يعلي وتقول انا فاشل وتبدأ في الانهيار( طبعا دي عاوزه مجهود منك بقي في طريقة الانهيار...انا عارف ان حضرتك معندكش دم وتنح بس لازم تدرب نفسك عشان اكل العيش)....ودمعتين وانت بتخبي وشك بين اديك
وتبص في عنيها وانت عينك حمرا ومليانه دموع وتفجر بقي القنبله
قلها انا هسيب البيت وهمشي ومش هرجع ابدا ومش هتشوفوا وشي تاني
رد فعل والدتك في الحالة ديه هيبقي حاجة من الاتنين
الاول: المركب اللي تودي......ومتبقاش تقطع الجوبات.....( احتمال متستبعدش.....بس وقتها خليك علي جنب وابقي ابعتلي عشان حالتك مستعصية وعاوزة ترتيب تاني).....
الرد التاني: يا ضناياي يا أبني.......وهتنفجر في العياط ....
هو دا طلبنا... وبكدا انت بدات اول خطوة في المشروع بتعنا
هتخدك في حضنها وهتعيط....قلها 500 جنيه بس
.....هيخرجوني من ورطتي....هتسكت شوية وتزق راسك بعيد عن حضنها
وهتسألك في شك وفي فزع....500 جنيه....هتعمل بيهم ايه إن شاء الله....
بطريقة عرض شيقه قلها انك هتعمل مشروع مع واحد صاحبك ابوه غني اوي وهو هيدفع الفلوس كلها بس مش ناقص علي المشروع غير 500 جنيه...
مشروع ايه دا... هتسألك بشك برضو...
قلها اي حاجة بقي ...اللي يجي علي بالك وقتها بس يكون مشروع منطقي يعني
المهم هتقوم وهتسيبك وهتقولك وهي رايحة علي باب الاوضه وانا اجبلك المبلغ دا منين.....وهتسيبك وتخرج...
انت هتسكت خالص ومش هتفتح بقك......انت كدا عملت اللي عليك بس ناقص حاجة صغيرة اوي......
هتقفل علي نفسك اوضتك اليومين اللي جايين ومش هترد لما ينادو عليك ساعة الاكل( طبعا دا اصعب شئ في الموضوع عشان حضرتك طفس )....بس استحمل وابقي قوم كل بالليل ومحدش اخد باله....
الست الوالدة قلبها هيتقطع عليك....(دا ان كان قلبها لسا فيه شوية حنية من ناحيتك).....وهتدخل عليك الاوضة وهي بتقولك عيب يا ابني متوجعش قلبي معاك......
انت متغطي ومش بترد.....
هتقولك طيب انا اتصرفت من خالتك في خمسين جنيه....
تخدهم وتدبر بيهم امورك لغاية ما ربنا يفرجها( انت عارف ان الست الوالدة نايمة علي خميرة حلوة ومعاها فلوس ومش محتاجة لخالتك).....مش هترد وهتبدا في العياط....
هتبدأ تساومك وتفاصل معاك فترة وممكن ايام بس في الاخر هتديك الفلوس..............
معلش مشوار الفلوس كبير اوي وحكايته طويلة
بس عشان دا راس مال والمشروع بتاعنا المرة ديه كبير شوية ومحتاج الفلوس ديه
خلاص جبت ال500 جنيه وبقي في جيبك.....خلص مشوار الإن دور
استعد بقي للشغل
-----------------------------
مشوار الاوت دور والشغل التقيل بقي
سمير صاحبك خالته عندها شقه في مكان نظيف اوي...
اصلها ماشاء الله مسافرة هي وجوزها الكويت وبتيجي في شهرين الصيف......
سمير معاه المفتاح بتاع الشقة وبيروح هناك عشان يتفرج علي الدوري الاوروبي في الدش....الدوري الاوروبي بس هتتفق مع سمير انكم تستغلوا شقة خالتوا وتعملوها زي مكتب ...
طبعا بعد ما سمير هياخد منك 100 جنيه عربون وتوعده بقرشين بعد ما الحكاية تخلص
هتظبتوا الشقة وتهيئوها علي انها مكتب
مع الاخذ في الاعتبار انكم هترجعوا كل حاجة مكنها بعد ما المشروع يخلص
باقي معاك 400 جنيه...هتروح اي مطبعة تطبع فيها 500 استمارة( ابليكشن) بعد ما تكون كتبتها علي الكمبيوتر....
يعني هتكتب فيها شوية بينات زي الاستمارات بتاعت التقديم علي وظيفة خالية
المشوار دا هيكلفك حوالي 100 جنيه....كدا اتبقي معاك حوالي 300 جنيه خلي بالك من الحساب
هتطلع علي جريدة الجمهورية وتعمل اعلان عن احتياج احد شركات القطاع الخاص لشباب حديثي التخرج من الجنسين
مؤهل عالي او متوسط او يستطيع القراءة والكتابة
ولا يشترط التقدير
ويشترط إجادة اللغة العربية حتي ولو كانت مكسرة....
والاولوية لسرعة التقدم....
المترتبات حد ادني 500 جنيه......وتوفر الشركة سكن مناسب للمغتربين عن المحافظة
وتوفر الشركة اربع وجبات اكل يوميا
وتكتب عنوان شقة خالة سمير ورقم التلفون بتاعها
وتسمي الشركة اي اسم....
سميها مثلا (المنجلاوي)..حلو المنجلاوي
المشاور بتاع الاعلان دا هيكلفك حوالي 200 جنيه.....كدا اتبقي معاك 100 جنيه.......هتروح لسيد ابن عمتك
اللي مش لاقي شغل ومتخرج بقاله 8 سنين وقاعد علي القهوة
وهتقولوا انك عاوزه في مشوار لمدة اسبوع وهتيدله فيه 50 جنيه....والشاي والقهوة عليك
طبعا هيرفض
انت بعد شوية محاولات هتقنعه انه ياخد 80 جنيه ويجي يعمل اللي هتفهمه عليه
وابقي اوعده انك بعد اسبوع هتيدلوا زيهم.....
سيد هيجي يلببس الطقم الكلاسيك وهيكون طبعا مستحمي ومسرح شعره
...هيجي يقعد علي المكتب اللي في الشقة اللي احنا سمينها شركة المنجلاوي من الساعة 8 الصبح
طبعا جموع الشباب المتقدمين علي العمل هتبدا في التدفق
....سيد ..هيرحب بيهم بكل ود واحترام وهيقلهم اتفضلوا املوا الاستمارة....
بس الاستمارة تمنها 3 جنيه...طبعا سعرها رخيص والناس هتدفع من غير تعب
....سيد هياخد منهم الاستمارة (الابليكيشن)بنفس الابتسامة
وهيقلهم علي معاد المقبلة الشخصية( الانتر فيو) اللي هيكون في الاسبوع اللي بعده
لغاية ما ال500 استمارة يخلصوا
خلينا متشائمين ونقول ان الاستمارات هتخلص علي اخر الاسبوع .....
اول ما اخراستمار تتباع هتروح تلم الحصلية بعد ما تراضي سيد اللي عينه هتزوغ علي الفلوس
ويبدا يساومك ويعلي صوته ...انت هتفهمه ان الفكرة كلها بتاعت سمير
وان الشقة بتاعته وانك مطلعتش منها غير بحاجة بسيطه وتمشيه
...سمير هو كان هيطمع...هتفهمه ان الفكرة كلها بتاعت سيد
وان سيد عمل كل حاجة وهتيدله قرشين وتمشيه
بعد ما تقفلوا الشقة وترجعوها زي ما كانت وتنظفوها
كدا هيبقي مع حضرتك بعد ما تقفل بق اللي حوليك حوالي 1250 جنيه......هتروح للست والدتك وانت راسم الذل والكسوف علي وشك وهتقولها ان المشروع خسر وانك مطلتش من فلوسك غير 150 جنيه
....طبعا هتدب بالصوت وهتلم عليك الجيران.....
تخرج انت كل يوم وتتأخر وتيجي بلليل وشعرك منعكش وهدومك مبهدلة وتديها 100 جنيه بعد اسبوع وتعمل نفسك انك تعبان وداخل تنام وتقولها علي اخر الشهر اكون جمعتلك فلوسك كلها .....
ست الحبايب هتحس انك انت رحت تشتغل شغلانة مش ولا بد عشان تجمعلها فلوسها.
هتصعب عليها وتستعوض ربنا في بقيت فلوسها............
وتخدك في حضنها وهتعيط
انت مشاورك كله خلص ومعاك صافي ارباح الف جنيه...............مبروك عليه يا
اكسلنس.....عيش حياتك بقي ولما يخلصوا ابقي تعالي قلي
-------------------------------------------------
-------------
ايه رأيكم في الواقع المرير اللي احنا عايشينه....شايفين البطالة ممكن تعمل ايه......والله حكاية الاستمارات ديه بتحصل بس علي كبير......سرقة مصرح بيها....يروح الشاب الغلبان وبيدفع تمن الاستمارة اللي بتكون غالية وهو متاكد انه مش هيشتغل....بس اهو امل يتعلق فيه
معلش يا جماعة انا عارف ان الافكار كلها فاسدة.....قصدي اننا بنعرض المصايب اللي بتحصل عندنا بس بأسلوب مختلف شوية

هناك 33 تعليقًا:

Nothing To Lose يقول...

هههههههههههههههههههه
ههههههههههههههههههه
بجد فطستنى من الضحك
دمك خفيف اوى هههههههههههه
بس والله فعلا سبحان الله
انت بتنقل واقع جداااااااااا
انا مرة اتلسعت من موضوع تشغيل الشباب دا
بس ياريته كان استماره
كنت لسه فى الكليه
وعامله فيها البت المكافحه الشريفه
والى عايزة تشتغل بئا وتصرف على نفسها
ووقعت الحمد لله يعنى فى شركه نصابين
كانوا بيخلونا نبيع حاجات لقريبنا واصحابنا وبتاع
كورسات انجليش كدا على شرايط كاست
على امل بئا انهم ينزلونا المعرض
وانا قلت مش مهم بئا اهو شغل وعملت فيها ست الموظفه
وطلع عينى
واتبهدلت
عاااااااااااااااااااااا
وفى الاخر لا اخدت فلوس ولا اشتغلت شغله عدله
وكمان اخدت درس حلو اوى علمنى الادب
وان الست مكانها بيتها
وقرن فى بيوتكن
الله المستعاااااان
جزاك الله خيرا
ومعذرة على الاطاله بئا
انت الى كلامك حلو وعايز رد اطول من كدا بكتير

دمتم بخير

عالمى ازرق يقول...

هههههههههههه
ضحكنى قوى الاداء التمثيلى
تنفع مخرج
الموضوع اللى كتبت عنه منتشر قوى بس الابلكيشن بعشره جنيه
وغالبا مش بيكون طالب مؤهلات بالاضافه لمرتب خيالى
كل دى مؤشرات انه فيه فى الامر شيء
وكمان كفايه اسم المنجلاوى
تقبل تحياتى

barbie girl يقول...

يااااااااااااااااااه

دا انت دمااااااغ

خمسة فضفضة يقول...

السلام عليكم ورحمة الله وبركاته

بسبب ظروف التعب ، انا بصيت بصه كده
والله مش بطال وان شاء الله ليك مستقبل هايل في النصب
ان شاء الله هارجع اقرأ تاني بتأني واحط تعليق كمان

همسات دافئه يقول...

لاء بجد حقيقى فعلن اسمحلى ارفع القبعه وانحنيلك فكره جامده موت بصراحه تستاهل أكتر من ألف جنيه بكتير
تصدق بالله أنا لما بقرأأفكار الشباب العدوانيه دى وفن ترتيب الجريمه الدقيق ده(سورى يعنى) بطمئن على مصر أصل بجد احنا اذكيا وجامدين أوى بس لو حد يستغلنا صح أو حتى يدينا الفرصه واحنا هنستغل نفسنا
براحه على الست الوالده هى برضه كان غرضها تجيب للدنيا عيال تشرف:))))))

šσяšαяαα يقول...

قال أبو صاحبه الغنى اوى اوى صارف على المشروع من أوله لاخره بس اتعذر ياعين مامته فـ500 جنيه وهو بقى البطل اللى هينقذه.. هههههههههههه

دى مفقوسه شويه الحمدلله انه الماما مش اخدت بالها وكانت ملخومه فى الاداء التمثيلى التراجيدى اللى عمله:)

وبعدين لازم يعنى ناخد شقق الناس اللى مسافرة الكويت؟؟
ماينفعش سريلانكا:)

على فكرة انا كتبت دعوه فى البوست عندى لعمل حفله صغنتوته علشانك
اتمنى الاقتراح دا يعجب الكل

تحياتى

R.R يقول...

:)
:)

ايه ده ده الموضوع جامد جدا
ان دوور وا
اووت دوور

بس تصدق طريقه حلوه
انا مامتى طيبه وممكن تيجى باول دمعتين

:)

هنقول ايه كلامك كله واقعى
حسبى الله ونعم الوكيل

تحياتى

tearwhispers يقول...

هههههههههههههههههههه
بجد انت مش معقول
تصدق خليتنى اضحك و انا اصلا كنت داخله مكتئبة بصورة صعبة
و للاسف هو ده حال معظم الشباب دلوقتى
باى حال دلوقتى الدنيا مبقاش فيها حاجة صح
و كله بيمثل على كله و الطيب بيضيع فى النص

خمسة فضفضة يقول...

السلام عليكم ورحمة الله وبركاته

رجعت تاني اهه زي ما وعدتك يا باشمهندس

قريت القصه بتاني وتمعن كده ، حسيت ان الوضع الحالي اللي كل الشباب عايشين فيه مش بس ممكن يطلع نصابين زي النموذج ده
لا كمان يطلع سفاحين وقتالين قتلا

وياما سمعنا عن ناس اتقتلت علشان 200 او 300 جنيه ويمكن اقل ( مره واحد علشان 12 جنيه )
ربنا يستر علي الشباب من البلاوي اللي بتعملها البطاله ، ويحلها بقي من عنده

يلا منهم لله اللي كانوا السبب

وشكرا علي لنصايح البناءه
بس برضو دي نصايح رجالي ياتري تنفع للبنات ....؟؟؟؟؟

ولو ماتنفعش اطالب بوضع حلقه خاصه للبنات وشكرا ....هههههه

SomeOne يقول...

هههههههههههههه
هههههههههههههههههه
هههههههههههههه
هههههههههههههههههه
هههههههههههههههه
هههههههههههه


يخرب بيتك

فطستني من الضحك والله

انا ح عمل كده ولو اتمسكت حقول دي فكرتك

:))))

gohayna يقول...

والله حرام عليك هتشحتف الست معاك مش بعيد يحصلها حاجه


بس بعيد عن الضحك ودمك الخفيف واسلوبك الي زي العسل
بجد دا بيحصل فعلا وناس كتير بتعاني من المشكلات دي والنصب دا فعلا شغال اليومين دول


وبعيد عن كل المواضيع دي
بجد هتقطع بيا يا محمد لما تدخل الجيش الله يسامحك

انا خلاص اتعودت عليك وعلي مدونتك

الله يسامحك انت والجيش

تحياتي

sara يقول...

علي فكرة بقي بعيدا عن الفكرة ..الاداء التمثيلي والاخراج المسرحي يجنن

هي عموما فكرة حلوة مبدئيا ..ممكن
لو واحد معاه مبلغ اكبر شويه ينفذ نفس الفكرة دي علي كبير ..ويكسب دهب


بس مش عارفه ليه كدا حاسه خير اللهم ما اجعله خير ..ان اداءك يا محمد واقعي اكتر من اللازم..
قولتلي الاخ هندسه قسم ايه :P

mohand يقول...

السلام عليكم
كركركركركركركركرك
امسك حرامي
امسك حرامي
سمير هوه اللي هيروح فيها
مش الشقه تبعه
نسيت الراجل في زحمه النصبه
--------------
ثانيا انت سارق الموضوع مني

مش واخد فكرته مني :pمفروض كنت تنوه طيب
عموما حصل خير
-------------
انا بقي اتنصب عليا كده زي ما انت قولت بالظبط
بس احنا كنا 12 شاب وشابه
وقعدنا شغالين اربع اشهر
ومخدناش فلوس
علشان قالو ال ايه
ان الثلاث اشهر الاولي اختبار
والرابع نقبض
اخوك كان صرف اللي وراه واللي قدامه واللي تحته واللي فوقية واللي جنبه كمان
المهم بقيت تحت الحديده
حصل خير صحيح
موضوع جميل
وتحياتي للمستثمر الصغير
مهند المصري
الباحث عن الحقيقة

الراقـــص مع الذئـــــاب يقول...

Nothing To Lose
الموضوع فعلا واقعي جدا ....عارفة ان الكلام دا بيتعمل من وزرات وجهات مسؤلة كبيرة
ينزلوا اعلان عن طلب موظفين في وزارة الكهرباء مثلا....ويورحوا الناس يسحبوا استمارات...وتكون كل الوظايف المعلن عنها محجوزة قبلها بسنة...بس كل دا عشان يجمعوا فلوس
حسبنا الله ونعم الوكيل

اما بقي بخصوص شغلك ومكافحتك فانا اتلسعت من دا كتير اوي
بس الحمد لله اتعلمت ....ولو كنت دفعت فلوس مكنتش هتعلم اللي انا اتعلمته من التجارب ديه

واخر حاجة بقي النصيحة الجميلة اللي في اخر كلام
وهي التي في قول الله عز وجل
وقرن في بيوتكن
بجد يعني اكرمك الله علي كلامك

وانتي يا ستي تطولي زي ما انتي عاوزة
دا انتوا صحاب بيت

دمتي في خير
----------------------------
عالمى ازرق

يا بنتي انا موهبة فذة
اما تمن الابليكيشن فلازم يبقي رخيص عشان يشد الناس وفي نفس الوقت الناس متعملش مشاكل بعد ما الموضوع يتفركش

اما بقي المنجلاوي فدي هتبقي الشركة بتعتنا علي طول في مواضيع يوميات نصاب لو ربنا ادانا عمر يعني

جزاكي الله خيرا علي مرورك الكريم
ولكي تحياتي
-------------------------------
barbie girl
دماغ؟؟؟
مرة واحدة كدا؟؟؟
شرفتني زيارتك الكريمة ويارب ديما تسعدينا بوجودك

الراقـــص مع الذئـــــاب يقول...

دكتورتنا خمسة فضفضة
اولا الف سلامة عليكي من التعب
فعلا الوضع اللي احنا فيه يطلع اكتر من كدا
بس الهدف والنية من الموضوع هو عرض مشكلة ومناقشته
مش عرض فكرة نصب
يمكن الناس ديما بتكسل تقرأ مؤخرة الموضوع
مع ان هو دا الموضوع من الاساس
بس لجذب الانتباه حطيته في صورة قصة سخيفة
انا علي فكرة بتضايق جدا من الاسلوب دا ومش محبه...بس للأسف الناس مش هتفتح باب نقاش او تندمج في موضوع جد غير بالطريقة ديه ...عن خبرة يعني
وتجارب كتير

ربنا يصلح شباب المسلمين ويبعد عنهم كل سوء وشر

ممكن يا دكتورة الفكرة تبقي بناتي
اصلي للأسف انا بكتب القصة بنفسي فبكون انا البطل
عشان كدا مش هعرف اخلي البطل مؤنث ابدا...هتبقي بيخها ومفهاش احساس...
بس نجرب نعملها مؤنثة المرة اللي جاية

اسعدني مرورك يا دكتورة ودمتي في خير
بس انتي برضو لسا معرفتيش صورة مين ديه؟؟؟

---------------------------------

واحدة من الناس

لو قراتي الموضوع الاول هتعرفي البداية كان اساسها ايه
ملخصها ان الشباب عندنا تفكيرهم جميل بس مبيتعبوش نفسهم في العمل وترجمة الافكار
اما الست الوالدة ربنا يكرمها يارب ويبارك فيها
احنا من غير امهتنا منعرفش نعيش في الدنيا
يكفي حنية قلبهم ودعائهم المستجاب
اللهم اغفر لأمي وابي وامهات واباء المسلمين يارب العالمين
جزاك الله خيرا علي المرور اختي الكريمة

الراقـــص مع الذئـــــاب يقول...

صرصاااااااارة
اه يا ناصحة يا فقساني
علي فكرة انا اخد بالي منها....وعندي الرد والتصرف...وعلي فكرة انا سبت الامر مفتوح لما قلت ( قلهااللي يجي علي بالك وقتها بس يكون مشروع منطقي....) وتعالي بقي اقولك التصرف هيكون ازاي لو الحاجة زنقتني:
يا حجة ابو صاحبي هيساعدنا في المكان بتاع المشروع ومش هياخد مننا إيجار...وصحبي اتصرف وخلص ديكورات المحل علي حسابه...ومش باقي غير عدة المشروع...وانا عاوز يبقي عندي دم وادخل معاه شريك وخلاص...ترضي ابنك يشتغل عند صاحبه
وتقوم تضرب دماغك في الحيطة ادمها وتعمل نفسك ان كرمتك وجعتك اوي....ولو سألتك العدة ديه ايه ..قلها دي ادوات عمل الكريب الفرنساوي..حجات بسيطة وتمنها الف جنيه بس انا هشتريها مستعملة ب 500 جنيه
طبعا الست الوالدة متعرفش يعني ايه كريب فرنساوي...وانت نفس النظام متعرفش يعني ايه كريب غير من واحد صاحبك حكالك مرة عليه...وتقولها انا لوجبت العدة ديه هبقي شريك بالنص...)) بس يا ستي....ايه رأيك في التصرف؟؟

الدماغ مليانة وفيها مخرج لكل موقف ...[س انتوا اعتمدوا عليا وحطوا ثقتكم فيا

اما بخصوص دعوتك بقي فردي عليها هيكون في بوست مخصوصخزاكي الله خيرا علي اللفنة الجميلة ديه

الراقـــص مع الذئـــــاب يقول...

دكتورة رانياr.r

جزاكي الله خيرا علي مجاملتك الجميلة
ربنا يبارك في مامتك يارب ويرزقك برها
فعلا الموضوع واقعي للأسف...وحسبنا الله ونعم الوكيل

وتحياتي لك

-------------------------------
tearwhispers

الحمد لله ان القصة كان ليها فايدة وفرجت شوية عن نفسك
ربنا يعافيكي
بصي اول ما تحسي بأنك متضيقة تعالي المدونة عندي واتفسحي فيها
احنا عندنا محدش بيشيل هم
ونصحيتي ليكي قابلي اي مشكلة بخفة دم وضحك...هتلاقيها اتقلبت لحاجة كوميدية
اما بقي لو عكننتي علي نفسك مش هتكسبي حاجة غير الزعل

روقي كدا وربنا يخفف عنك

علي فكرة الطيب عمره ما هيضيع في النص ابدا

ممكن يخسر كل حاجة ...بس مش هيخسر انه طيب

ودي في حد ذاته اجمل حاجة
اللهم اجعلنا منهم

تحياتي لك واسعدني جدا اني كنت سبب رسم الابتسامة علي وجهك الحزين

دمتي في خير
---------------------------------
شادي فايد

لو عملت اللي بقولك عليه هتوصل لحاجة من اتنين
يا اما وزير
يا اما عضو مجلس شعب

بس ابقي افتكرني بقي

الراقـــص مع الذئـــــاب يقول...

دكتورة جهينة

فعلا يا جهينة الكلام دا بيحصل
يا جماعة الموضوع اللي انا عاوز اكتبه مش هو القصة ...الموضوع الكلام اللي بعد القصة

ربنا يعافينا يارب ويهدي كل عاصي

وبعدين انتي لازم تفكريني بالجيش يعني
هتخليني اعيط

وصيتك يا جهينة المدونة ابقي ادخلي كل يوم اسقي الورد ورشي مية وافتحي الشبابيك....

جزاكي الله خيرا علي مشاركتك الدائمة ومشاطرتي احزاني

------------------------------
None
يعني انفع مخرج؟؟؟
امال بقي لو سمعتيني وانا بحكيها بالكلام والمؤثرت الصوتية هتعملي ايه

دي موهبة يا بنتي..النصب دا مزاج وموهبة
ربنا يعافينا يارب

انا هندسة إتصالات والكترونيات
علي فكرة انا كنت كاتب يوميات طالب في كلية هندسة ايام الكلية وكانت هتوديني في داهية عشان كان في حلقة منهم عن رئيس القسم فرقعت الكلية...وكان مستقبلي هيضيع فيها وهبقي نصاب بجد....بس ربنا ستر والموضوع نام وبطلت اكتب خالص اي حاجة عن الكلية اللي بوظت اخلاقي

اسعدني مرورك ولكي تحياتي
----------------------------------

اخص عليك يا مهند.....كدا برضو تقول اني سارق الموضوع منك؟؟؟

الناس كدا هتظن فيا ظن سئ علي فكرة


فعلا موضوع التقدم للشغل بتاع مندوب الادوية هي لعبت في دماغي في حكاية النصباية الجديدة...

بس موضوع بعيد اوي عن اللي موجود هنا

انت متاكد ان قرات الموضوع ؟؟؟

العلاقة بينه وبين النصباية اللي هنا زي العلاقة ما بين شنب العمدة وكوكب اورانوس



علي فكرة موضوعك بتاع الشغل حصل معيا وحد شبهة بالضبط...وشاتغلنا انا وصحابي فترة من غير اي مقابل...وقالولنا برضو ان احنا في فترة اختبار...
وفعلا صرفنا من جبنا علي الموضوع
كانا بنسوق لشركة الكترونيات...وفي الاخر اخدنا بوبمة كبيييييييييرة اوي

جزاك الله خيرا علي مرورك
وخد بالك المرة اللي جاية ابقي خد 3 شهور مقدم في اي شغل تشتغله
تحياتي لك اخي الكريم

-_- يقول...

مبروك يا بطل

الجيش للرجالة بس

gohayna يقول...

فكرتني بعادل امام وهو بيقول

ابقي خلي بالك من العيال يا باتعه


ياسيدي متخفش هدخل وارش ميه علي الورد

وربنا يخليك وتفضل منور مكانك علي طول

هو احنا هنسيبك

وراك وراك حتي لو هتعد في الجيش 100 سنه

مستنينك يا سيدي


ربنا معاك يا احلي اخ في الدنيا

اختك بالعافيه
جيهان

mohand يقول...

السلام عليكم
اخويا وحبيبي الباشمهندس محمد
والله كنت بهرج معاك
معلش اخوك في حاله متبهدله
اعذرني
يمكن مش عارف افرق بين الهزار العادي والهزار اللي يزعل
ارجو انك متكنش زعلان مني
وربنا يوفقك في الجيش
وكلنا وراك يا ريس
اخوك علي الدوام
مهند المصري الهمام
ومتنساش طابور التمام

šσяšαяαα يقول...

اولا انا بجد زعلااااااانه ماللى عملته دا
اييه ياراااجل دا كله.. ورد وشكر وتقدير
انا عملت ايييه لدا كله يعنى
انا مش مستنياك تشكرنى لانى بعتبركو كلكو اخوات ليا
انتو دلوقت بقيتو عيلتى الالكترونيه.. ومظنش يعنى انك هتشكر اخوك على اللفته دى
اكيد كنت هتقولله:ياعم اييه الكلام دا بس انت ناوى تكلفنا وخلاص
دانا حتى رايح الجيش..ابقى خللي الحفلات دى لما اروح موزنبيق واللا حاجه:)
واللا لما اروح احج كدا بإذن الله(اكتبها لينا كلنا يااااارب)

وياللا ياسيدى قدامنا حفله ومش فاضيين دلوقت
وابقى عدى عليا عشان فى تعليقات جديده
مهند مقترح فكرة جميييييله اوى

وبالنسبه بقى للموضوع المفقوس:)
لا عرفت تخرج منها زى الشعره مالعجينه
بعد كدا هنحط رصيد ثقه وبالدولار كمان فى البنك عندك:)

بس قوللى صحيح..مين الاخ كريب دا:)
حاكم اختك من العيلة الجاهله:)

الراقـــص مع الذئـــــاب يقول...

شارم
الله يبارك فيك يا شارم وعقبالك كدا لما نباركلك وتفرحنا وتخش الجيش
الصيادلة رايحين رايحين يا معلم...خد بالك انت بس واستعد بقي

-----------------------
اختي بالعافية جيهان
ربنا يكرمك ويارب ويجازيكي خير علي كلامك الجميل

مع إنك دكتورة سنان....
انتي عرفتي ان الحشو وقع وضرسي بينأح عليا...؟؟
والله مع انه كان جميل جدا ومكنش واجعني....بس اداي اللي يسلم نفسه لدكتور سنان....هروح الناهرده اطربق العيادة علي دماغه واكسرله آلة الزمن اللي بيقول عليها كرسي واقطعله البالطو بتاعه وافرج عليه امة لا اله الا الله

يضحك عليا ويقولي الحشو بيقعد 10 سنين....

هو انا مش متأكد انه وقع بس كل ما اشرب مية ساقعة او امضمض بيوجعني اوي
تفتكري إن دا فعلا الالم بتاع عصب الضرس لما الواحد ياكل حاجة ساقعة زي عبد الوهاب؟؟؟
مش مشكلة ...عشان ابطل اكل قلقاس واجيب في سيرة الناس

اخوكي بالعافية
محمد
سلام

الراقـــص مع الذئـــــاب يقول...

اخي الحبيب مهند
انت عارف اني مش ممكن هزعل منك
وانا مقدر جدا ظروفك وكان الله في عونك
واحنا كلنا جنبك يا مهند
وجزاك الله خيرا علي ردك الجميل

الراقـــص مع الذئـــــاب يقول...

صرصارة
دا مش رد جميل ولا شكر ولا حاجة
دي لفتة لازم تتعمل وشكر ليكي ولكل الناس اللي موجودين
طبعا كلنا بقينا اخوات وعيلة واحدة
وربنا يكتبلنا حجة وعمرة إن شاء الله

انتي ومهند ربنا يكرمكم اخدين الموضوع جد وتاعبين نفسكم
بجد ربنا يكرمكم ويجازيكم خير

اما بخصوص الكريب فدي اكلة....وملهاش اي علاقة بالفيديو كريب...قصدي كليب

سمعت عنها وتأكدت ان الحاجة مش عارفها ولا هتعرفها ولو سمعت اسمها مرة هتنساه ومش هتركز

واشكرك علي الثقة الغالية

دمتي في خير اختي الكريمة

gohayna يقول...

شفت الي حصلك

تستاهل ما انا كنت موجوده

ادي اخرت الي ميسمعش كلام جيهان

اه الحشو وقع

والله صحبك دا شكله اكيد

اكيد


اكيد
بيحبك اوي

ويسلام لو الموضوع دخل في العصب

هيروقك احلي ترويق

يسلام

انا مش فرحانه فيك ولا حاجه ولا بقول احسن ولا اي شيئ

افهمني صح

سلام يا اخويا ومش بالعافيه

sara يقول...

هو انت خلاااص رحت الجهاديه يا محمد ...


عااااااااااااااااااااااااااا

هاتوحشنا والله.. طب هو مش بيبقي في اجازات ..

عااااااااااااااااااااااااا

الراقـــص مع الذئـــــاب يقول...

ماشي يا جهينة
فرحانة فيا؟؟؟؟
ماااااااااشي
بس عموما بقي الحشو لسا موجود وظلمنا الواد....دا هي بس فترة بسيطة حوالي خمس سنين لغاية ما النسيج ياخد علي الحشو عشان دي اول مرة احشي فيها ورق عنب..قصدي احشي ضرس
بس توبة....بجد بجد بجد...توبة اروح لدكتور من غير ما تكون في حاجة وجعاني....
خلاص انا فقدت الثقة في كل بالطوا ابيض

---------------------------------

خلاص يا none

هعمل الكارنيه يوم الاربع اللي جاي
وهسلم نفسي يوم 23 بالكتير اوي

اول شهر ونص مفيش فيهم اجازات...اسمهم فترة مستجدين 45 يوم..بعد كدا بنزل اجازة نص الاربع والخميس ونص الجمعة كل اسبوع.....بس طبعا في اسابيع هتعلق فيها ومش هنزل اجازات...يعني ممكن كل اسبوعين او 3 اسابيع
ربنا يسهل

الكلام دا لمدة 9 شهور في كلية الضباط الاحتياط...زي الكلية الحربية ونفس المواد واسلوب الدراسة
بعد كدا بعلق بقي رتبة ملازم لمدة 3 شهور...بعدها ملازم اول لمدة سنة ونص
في فترة الملازم والملازم الاول باخد حريتي بقي وبعمل اللي انا عاوزه ...يعني مفيش ذل ولا افتري وبعيش حياتي

ادعولي انتم بس إن ربنا يهون الفترة ديه علي خير

انا قاااااااااعد علي قلبكم لغاية يوم الاحد اللي جاي

سلام

šσяšαяαα يقول...

السلام عليكم
معلش بقى يامحمد اسفين على الازعاج دا
كل شويه بصدع دماغك

انت كلمت مهند النهاردة؟

لو مش كدا ابقى ادخل شوف كاتب عندى ايه وبالمرة تشوف الجماهير الغفيرة

اييه ياسيدى الشعبيه الجاااامده دى كلها

ربنا يخلليك للغلابه اللى زينا:)

سلااااااام

gohayna يقول...

انا داخله غتاته بقي

جايه امسي عليك وهمشي تاني

سلام

mohand يقول...

السلام عليكم
ايوه يا صرصوره
اتكلمنا واتفقنا علي الميعاد
بس للاسف في مشكله بسيطه عندي
هحاول احلها
الموقع مش عايز يقبل جيست يتكلمو
بيسيبهم يتفرجو بس
هينفع اعملو ريجستر

الموضوع بسيط جدا علي فكره
بس لما اشوف في مواقع تاني شغاله ولا لا
مهند المصري

الراقـــص مع الذئـــــاب يقول...

صرصارة...جزاكي الله خيرا علي تعبك
ربنا يكرمك واردهالك في الافراح إن شاء الله

-----------------------------------
جهينة
بيتك ومطرحك تيجي في كل وقت
بس متبقيش تقطعي لما ابقي امشي
----------------------------------
مهند
جزاك الله خيرا
انا مقدر والله تعبك جدا
ولو الموضوع منفعش يكفي مجرد المحاولة تكفي يا اخي الكريم

جزاك الله خيرا يا مهند

mohand يقول...

السلام عليكم
نفع يا محمد والله نفع
انا قعدت ادور في المواقع اللي بتقبل جيست لحد ما ربنا هداني لواحد
وان شاء الله هنعمل الروم
وهنحتفل بيك
وهتبقي ليله زي الفل ان شاء الله