Translate

الخميس، 5 أبريل 2007

يوم اليتيم

دمعة بنت يتيمة
شوفت في يوم اليتيم بنوتة حلوة أحولها شتدني

من الف طفل وطفلة دمعة عينها خطفتني

وبسرعة رحت عليها بعد ما لهفتي ليها أخدتني

سألتها: ليه الزعل يا جميل...بصت عليا وبدمعة حزن جوبتني


قلتلي مليش ماما من شرور الدنيا تخبيني

وقبل ما أنام وأنعس للحدودة تحكيلي

وفي ليل وبرد الشتا رمش عينها يدفيني

وفين بابا لما أغيب عن عينه يناديني

أنا عايشة وحيدة....ودمع اليتم علي خدودي بيكوني


قلتلها كل الناس الناهرده لفرحتك جايين

ليكي الف بابا وماما كل يوم زايرين

للهدايا وللعب أهم كمان جيبين

تعالي أفرحي وغني مع اخواتك الحلوين


قلتلي كنوز الدنيا ما تعوضني حضن حنان

ولا هدايا ولعب تعرف تجبلي أمان

انا نفسي اعيش بكرامة...وعزة الانسان

مش عاوزة عطف وشفقة ومعاملة الحيوان


نزل كلمها علي ضهري كرابج بيجلدني

ومنظر دمع عيونها في الليالي معذبني

وهانت في عيني الدنيا وجه ضميري يحاسبني

صرختها رنة في ودني....انت ليه بعيد وسايبني

انت ليه بعيد وسيابني


كتبت الكلام دا من 4 سنين...يعني من اول يوم يتيم....القصة تقريباً حصلت بنفس التفاصيل معايا بس من غير الحوار...كنت لأول مرة أعرف سكة زيارة الملاجئ....وقعت عنيا علي مشرفة شايلة طفلة عنيها مليانة دموع..سرحت معاها...ورجعت كتبت الكلام دا...يعني تخيلت الحوار اللي لو البنت هتعرف تتلكم مش هتقول غيره...بس يمكن دمعة في عين طفلة يتيمة ممكن تقول كلام كتير جدا مش لازم يتكتب في شعر او زجل او قصيدة عشان الناس تفهمه

احنا فعلا مقصرين في الاحسان الي اليتيم....ممكن ميكنش محتاج منك تبرع وفلوس....محتاجك تحط ايدك علي رأسه وتمسح عليها....

دا الحيوان يا جماعة بيحس بالحنان...فما بالك بإرق مخلوق في الدنيا....بطفل...وطفل ضعيف جدا....طفل يتيم

مش هقدر اوصفلكم....لازم تروحوا وتشوفوا وتحسوا....وتعرفوا تمسكوا دموعكم....لو هتعرفوا


صلي الله علي سيدنا محمد صلي الله عليه وسلم الرحمة المهداه....فقد ذاق مرارة اليتم....لذلك اوصي بالاحسان الي اليتيم ....بل ورغب في كفالة اليتيم حين قال صلي الله عليه وسلم

أنا وكافل اليتيم فى الجنة هكذا ... وأشار بإصبعيه السبابة والوسطى





هناك 19 تعليقًا:

يعقــــوب .... يقول...

كلمات جميلة و معبرة...وربنا يكتبلك اعمالك في ميزان حسناتك..وفعلا احساس الطفل اليتيم لما بيلاقي ناس جايا تسأل عنه و تقوله كلمة تخفف عنة اساس لا يوصف وبيمدهم بأمل في الحياة

BinO يقول...

أول ما سمعت صوت الشيخ يعقوب
ماعرفتش أقرأ الموضوع
وقعدت أصلي علي النبي صلي الله عليه و سلم
اللهم صلي علي سيدنا محمد وعلي أله و صحبه وسلم
جزاك الله خيراً

أما بالنسبة لموضوع اليتيم ويومه فأنا ليا اعتراض علي الأيام

فِي الدُّنْيَا وَالآخِرَةِ وَيَسْأَلُونَكَ عَنِ الْيَتَامَى قُلْ إِصْلاَحٌ لَّهُمْ خَيْرٌ وَإِنْ تُخَالِطُوهُمْ فَإِخْوَانُكُمْ وَاللّهُ يَعْلَمُ الْمُفْسِدَ مِنَ الْمُصْلِحِ وَلَوْ شَاء اللّهُ لأعْنَتَكُمْ إِنَّ اللّهَ عَزِيزٌ حَكِيمٌ (220)
سورة البقرة

بحس أن اليوم ده بيديهم أحساس هما مش عايزينه
مخالطتهم أفضل لهم نفسياً بدلاً من معاملتهم معاملة خاصة
فاهمني أخي في الله
ولكن جزاك الله خيراً
واعانك علي مواصلة ما نعجز عنه
وهدانا الله وأياكم الي الخير

Nothing To Lose يقول...

:( كلمات توجع اوى..تحسسك بنعمه الواحد فعلا مش مقدرها
الحمد لله على نعمه الاب والام
والحمد لله على نعمه الدفء بين الاهل والاسرة
سبحان الله
انا فعلا لما بروح دار الايتام
بحس ان فرحتهم مش فى الحاجات الى جيالهم
لكن فرحتهم انك معاهم وبتتكلم معاهم
فعلا احساس صعب اوى ..ربنا بجد يبعد اليتم عن ابناء السلمين
طيب دا احساس الايتام الى فى دور ايتام
لكن ايه احساس ايتام الشهداء!!
وهما عارفين ان ابوهم او امهم اغتالتهم ايدى نجسه ملوثه بالدماء
بجد انا دلواقتى حاسه احساسهم اوووى
حاسه بمرارة وحزن
جزاك الله خيرا اخى الراقص

عالمى ازرق يقول...

انا برضو من رأى بينو فى تخصيص يوم معين لليتيم ده قمه الشفقه والعطف طيب ماطول السنه متاحه للجميع اننا نزورهم فيها
وكمان المغالاه فى التعامل معاهم بتحسسهم ان فيهم نقص ما يعنى اليتيم مش بيدرك وضعه الا فى سن معين 9 او 10 سنين قبل كده بيكون فاكر ان كل الناس والاطفال عايشين زيهم فى مكان مع بعض ولهم بابا وماما كتير
الموضوع فاجئنى ببعد اخر فى كتاباتك ( بتكتب شعر يا مرسي ومخبي عنا ) تقبل تحياتى

محض روح يقول...

بوست حلو جدا
فعلا في ناس كتير مابيفتكروش الايتام غير فى يوم اليتيم
وبجد لو تشوف منظر الاطفال فى اي دار مخضوضين ازاى من زحمه الناس
مش متعودين يشوفو الكم ده من البشر

مره طفل فى دار قالى كلمه غريبه
قالى انا مبحسش اني يتيم بالدرجه ديه غير فى اليوم ده
منظر الناس الى جين يحتفلو
بيه كايتيم وكل واحد فرحان انه جي يحتفل
ومش مدرك احاسي انه جي يفرح بيتمي مش جي يفرحنى

ده شعو اطفال كتير فى اليوم ده

الي عايز يروح الاطفال دول يروح طول السنه
مش يوم فى السنه
يروح يغني معه ويمشي ويسيبه ويجيله السنه الى بعديها

تحياتي يافندم

Shreef يقول...

الله اد ايه الكلمات ديه جميلة اوي اوي..يكفي فعلا تلك الكلمات المعبرة عن حال اليتمى فعلا..و كلامك انت هو اللي كرابيج على ضهرنا..تحياتي ليك ولمدونتك الجميلة..سلام

الراقـــص مع الذئـــــاب يقول...

يعقوب

جزاك الله خيرا اخي الكريم...وجعل الله عملنا خالصا لوجه ومتقبل إن شاء الله
وجعلنا ممن يحافظون علي إكرام اليتيم إن شاء الله
اسعدني مرورك الكريم جدا كما واحزنني انقطاعك عن الكتابة ارجو ان تعود الينا سريعا فإني مشتاق لموضوعك الجديد

دمت في خير
------------------------

اللهم صلي وسلم وبارك علي سيدنا محمد صلي الله عليه وسلم
جزا الله شيخنا خير الجزاء لحرصه دوما علي التزكير بفضل الصلاة علي النبي صلي الله عليه وسلم...وهذا ما يغفل عنه الكثيرون
والله لو علم الناس فضل الصلاة علي سيدنا محمد صلي الله عليه وسلم وما بها من بركة.. إستعانوا بها علي كل امورهم وما انقطعوا عنها ابدا
جزانا الله واياك خيرا

فعلا اليتيم اخي الكريم ليس له يوم واحد في السنة
ولكن اتمني ان يكون له يوما واحدا فقط في حياة الكثيرون
نحن نعترض علي يوم واحد....ونقول ان اليتيم يستحق كل يوم
ولكن دعني اقولها صراحة لك...من منا يبر اليتيم مرة كل يوم؟؟
بل مرة كل اسبوع؟؟؟
هل نبره مرة كل شهر؟؟؟
لا اعتقد ان الكثيرون يفعلون ذلك
انا اتكلم عن معظم الناس وليس عن الفئة الصالحة الذين اكرمهم الله بهذا العمل
إذن فأجعل لنفسك وردا لبر اليتيم ولو مرة في السنة...ولا نخصص لها يوما معين
ولكني اري انها لو مرة في السنة سوف تكون افضل من لا شئ.....
ما اكثر الكلام في قول ( المفروض نفعل كذا)...وما اقل الفعل...
اللهم ارزقنا الاخلاص في القول والعمل

وكما قلت....لا نخصص يوما معين..فلنجعلها زيارة في الايام العادية ولو مرة في السنة

وجزاك الله خيرا علي تعليقك الجميل وشرفت مدونتي واتمني دوام تواجدك معي
دمت اخي الكريم في خير

تحياتي لك

---------------------------------

Nothing To Lose


نعم الحمد لله علي نعمة الوالدين...
اختي الكريمة...الاحسان الي اليتيم والتواجد بجواره هو بغيتنا وهو ما ندعوا الله عز وجل ان يرزقنا به
واحساس اليتم لا يختلف بين هذا او ذاك في الطفولة
هم فقدوا أباءهم وانقطع عنهم حنان الوالدين...كانوا شهداء ام غير ذلك
....وهذا ايضا من واجبنا نحو اخواننا في العراق وفي فلسطين وفي كل بلد يراق فيها دماء المسلمين وتيتم ابناءهم وترمل نساءهم
حسبنا الله ونعم الوكيل

جزاك الله خيرا علي مرورك الكريم

دمتي في خير

الراقـــص مع الذئـــــاب يقول...

عالمي ازرق
اختي الكريمة اغلب ردي عليكي كتبته ردا علي اخي الكريم BinO
اما موضوع المغالاة في التعامل معهم فقد اصبتي فيها وجزاك الله خيرا
نعم يجب ان تكون زيارتنا لهم طبيعية ودون مبالغة ولا تكلف ....ولكن صدقيني...هم يحتاجون الحنان من كل الناس...ولا اجد ضيرا في إظهار الحنان لهم...وخاصة إذا خرج هذا الامر دون إدعاء...فهو شعور صادق....وهذا هو عدم التكلف والمغالاة والتي اظنك تقصديها في ردك
اللهم ارزقنا الاخلاص في القول والعمل

اما بخصوص الشعر فأنا احبه واكتب كثيرا...ولكن للأسف لا مجال هنا لإضافة شئ منه حيث ان معظم مواضيعنا (خنقات)....وعندما وجدت مناسبة استرقت بعض الكلمات وضفتها....
جزاكي الله خيرا وبارك الله لكي

دمتي في خير
---------------------------------
محض روح
فعلا اختي الكريمة
وهذا من سلبيات اختراع هذا اليوم
نعم إن له ايجابيات كثيرة وهي تنبيه الناس لمعرفة ان هناك يتيم وهناك دور وملاجئ ....فأنا عن نفسي قد عرفت طريق الدار من هذا اليوم
اما سلبياته فقد تفضلتي وزكرتيها ....وانا ضد حفلات الدي جي والاغاني الصاخبة التي تفسد ولا تصلح
ونكرر ...
اجعل لليتيم ولو يوم واحد في السنة ولا تخصص هذا اليوم الذي يحتفلون به
فيوم في السنة خير من لا شئ

دمتي في خير وجزاك الله خيرا علي تفصيلك للأمر

اسعدني جدا مرورك الكريم
لك تحياتي

--------------------------------
shreef
اولا تشرفت جدا بوجودك في مدونتي وثناءك عليها وكلماتك الجميلة

ثانيا المقصد من الكلمات هو تنبيه الناس وانا أولكم الي الاحسان الي اليتيم والاهتمام به في كل يوم

مرة اخري اسعدني جدا تواجدك وزيارتك اخي الكريم

دمت في خير

gohayna يقول...

كل كلامك صح والله يا محمد
انا لما بكون في زياره لملجئ او تصادف ترتيب حفله من الحفلات الي بيكون الاطفال فيها هما الطرف الاساسي

صحيح بحس انهم مبسوطين وهما معانا لكن اول ما تغيب عنهم وترجع تبصلهم تلاقي نظلره حزن من كل شيء من الزمن والدنيا والناس
الدقائق القليله الي بنعد فيها معاهم عمرها ما تشيل عذاب سنين وحرمان ايام عاشوها من غير اب ولا ام

جزاك الله الف خير يا محمد
واسفه علي تأخري في التعليق بس الكمبيوتر بتاعي بعافيه شويه ادعيلو ربنا يخليك

تحياتي

الراقـــص مع الذئـــــاب يقول...

اهلا دكتورة جهينة
وانا برضو بقول جهينة بنت الحج نجم بقلها اسبوعين مبتبنش هي مخصمانا والا ايه (مقطع من اعلان البلهارسيا بتاع زمان ايام محمد رضا الله يرحمه لو انتي فاكرة) بس الحمد لله طلع الجهاز هو اللي تعبان....ربنا ياخد بأيده ويوقومه بالاسلامة

جزاكي الله خيرايا دكتورة علي مرورك وكلامك الجميل

الكلام نوعان :كلام فارغ وكلام مليان كلام فارغ يقول...

بجد كلام حلو اوى ونزلت المدعه من عيني
فعلا كلمات معبره جدا وفعلا كلنا لازم نراعي اليتيم لانه هو اللى هايدخلنا الجنه بفرحه صغيره منه من اى شيء صغير هانعمله
مدونه رائعه

الراقـــص مع الذئـــــاب يقول...

الكلام نوعان :كلام فارغ وكلام مليان كلام فارغ

جزاك الله خيرا علي مرورك وتعلقيك
وكلماتك الرقيقة
دمتي في خير

خمسة فضفضة يقول...

السلام عليكم ورحمة الله وبركاته

كلام هايل بيرسم بجد حالة الاطفال دول في يوم اليتيم اللي كل الناس رايحين علشان يشاركوهم فيه وهما في الحقيقه رايحيين يفكروهم بيتمهم
ليه ما يكونش لليتيم كذا يوم في السنه وليه نفضل ناسينه طول السنه ما نفتكروش الا في يوم اليتيم ، دا ربنا ورسولنا الكريم وصونا بيه اشد توصيه

شكرا يا باشمهندس محمد علي الشعر الجميل ده واللي بيبين موهبه عاليه واحساس مرهف

khaled يقول...

جزاك الله خيرا اخى الكريم
انا باسأل نفسى هو احنا هانعمل يوم واحد لليتيم و ننساه بقية الايام؟
زى ما عملنا مع عيد الام؟
صلى الله على سيدنا محمد و على اله و صحبه و سلم

khaled يقول...

وفقت

موش اليتيم بس
اولاد الشوارع كمان
شىء محزن

ربنا معاهم

albida يقول...

عندك حق والله!! مهما الناس عطفت عليهم ده مش هيعوضهم عن حنان ودفء الأسرة اللى مش ممكن يعملوا زيه فى أحسن دار أيتام

ربنا يكون معاهم ويصبرهم ويرزقهم بأهل الخير دايما ويعوضهم فى حياتهم


manal

Rehab Saber يقول...

جزاكم الله خيرا

فى انتظار الجديد

حوريه يقول...

جزاك الله خيرا اخى الكريم و صلى الله على سيدنا محمد و على اله و صحبه و سلم
اللى يقدر يعمل حاجه يعملها و تبسمك فى وجه اخيك صدقة .. المهم نشعرهم بالعطف و الحنان كل يوم و ليس يوم واحد فى السنة و ايضا اطفال الشوارع المكافحين ليس لهم اباء و لا اقارب و لا يشعرون بدفء الاسرة بل يرفضهم الجميع و يخافون منهم و من ايديهم الملوثة من العمل .. ياريت نهتم بيهم و نساعد فى حل مشاكلهم
شكرا لك ايها الراقص مع الذئاب
سيزر فى الجزء الثانى يرسل لك دعوة لقراءته
حوريه

الراقـــص مع الذئـــــاب يقول...

خمسة فضفضة
وعليكم السلام ورحمة الله وبركاته

فعلا يا دكتورة احنا بنفضل ناسيين الامر دا طول السنة
ومنجيش نفتكر غير في يوم

جزاك الله خيرا علي كلامك الجميل ومجاملتك الرقيقة

دمتي في خير
--------------------------------
khaled
جزانا الله واياك خيرا
نفس الكلام يا خالد...وفعلا هنعمل زي عيد الام
وهو دا اللي بنتكلم عنه كلنا
لازم نجتهد في الامر ونعين انفسنا علي هذا الطاعة الجميلة
وهي الاحسان الي اليتيم
اللهم صلي وسلم وبارك علي سيدنا محمد صلي الله عليه وسلم

جزاك الله خيرا علي مرورك الكريم

-------------------------------

نعم اخي خالد....ينضم الي الايتام ايضا اطفال الشوراع
جزاك الله خيرا علي تزكيرنا بهذا الامر الجد

دمت في خير اخي الكريم

-----------------------------

منال البيداء

جزاك الله خيرا علي مرورك الكريم
اللهم اجعلنا ممن يحافظوا علي هذا الامر والاحسان الي اليتيم

دمتي في خي اختي الكريمة
--------------------------------
Arabian GiRl
جزاك الله خيرا علي مرورك
اسعدتني زيارتك الجميلة
ارج دوام تواجدك معنا

دمتي في خير
--------------------------------

حورية

جزانا الله واياك خيرا
وصلي الله وسلم وبارك علي سيدنا محمد صلي الله عليه وسلم

هذا هو مقصد الموضوع اختنا الكريمة
واكرمك الله علي تزكيرك لنا بأطفال الشوارع هذا الامر الذي غفلنا عنه ولكنه بدء يطفوا علي الساحة في الايام القلائل الماضية
ارجو نشر دعوتك في هذا الامر

اسعدني جدا مرورك الكريم
وستجدينني دوما هناك مع سيزر خلف التلال
دمتي في خير