السلام عليكم
تعالوا نبتكر شخصية نصاب ونشوف النصاب دا ممكن يفكر في ايه عشان يجيب فلوس
انا قصدي من وراها اننا نطلع بعبرة او نصيحة....بس عشان احنا مش بنتقبل النصيحة زي الناس لازم نخدها بشكل مختلف (زي ما اخونا خالد قال بالهجايص) وهو دا بقي الجديد ...عشان مطولش عليكم هو عبارة عن شخصية بتفكر تحل مشاكل الشباب بأساليب مختلفة شوية....ومن اهمها مشكلة البطالة اللي هنتكلم عليها في معظم المواضيع
ونتوكل علي الله ونبدأ
ونتوكل علي الله ونبدأ
لو حضرتك محتاج فلوس ايه هي الطرق اللي ممكن تستخدمها عشان تاخد الفلوس اللي أنت محتجها
طبعا لازم حضرتك تفتح مخك شوية وتركز...
تعالي معايا كدا نتكلم بصوت واطي عشان محدش يسمع
اولا نفترض إن المبلغ اللي إنت عاوزه هو 100 جنيه...
وانت مفيش في جيبك غير 20 جنيه
لو ليك اخت في كلية أو بتشتغل هتروح تقولها إن في واحد صحبك بيروح يجيب حجات من ليبيا
بس هو معندهوش راس مال فبياخد فلوس من الناس وبيرجعهلها الطاق طاقين..
يعني لو دفعتي 10 جنيه تخديها 20اختك مبتثقش فيك
...لازم تدخل عليها الدخلة الصح
يعني قولها الراجل دا بيجيب بضاعة رخيصة أوي من ليبيا وبيبعهاهنا غالية
وكل الناس بتستناها عشان تخدها منه...
لو سألتك عن نوع البضاعة اوعي تقولها حاجة من اللي البنات والستات بيحتجوها
..يعني مكيجات أو حلل طبيخ أو أكسسوارات حريمي ..
قولها مثلا بيستورد تفتزانيا وسلكوكو...وأبقي فهمها إنها اعشاب طبيعية...أو أخترع اي حاجة...
بس خد بالك عشان متقولكش هاتلي منها...
و اتفق مع كام واحد من صحابك يتصلوا بيك في البيت ويكلموك علي صاحبك دا اللي بيروح ليبيا وعلي صوتك اوي وانت بتتكلم معاهم
المهم عرفت تاخد منها اي مبلغ بس خليها عشرة جنيه....
وبعد اسبوع رجعلها المبلغ دا عشرين جنيه
طبعا اختك هتطير من الفرحة وهتروح تقول لزميلها وصحبتها كلهم...
أنت عارفين طبع البنات...هتجيلك صاحبتها الانتيم وتقولك أنا عاوزة ادخل بنفر أنا كمان...
خد منها عشرة جنيه ورجعلها عشرين بعد اسبوع..
خلي بالك أنت كان معاك عشرين جنيه في الاول خالص....
كدا انت بقيت علي الحديدة..
بس كسبت ثقة اختك وأصحبها اللي مبيتبلش في بقهم فولة
هيجيلك بعد 3 ايام صحابها كلهم ...حاول حضرتك إنك تجمع منهم 200 جنيه ..
هتسألني ليه الطمع؟؟
هقولك بعدين انا خليتك ليه تجمع 200 جنيه
كدا انت معاك المبلغ اللي أنت عاوزة هتقضي بي مصلحتك ...وهيفضل معاك 100 جنيه..خليهم علي جنب دلوقتي وهقولك هتعمل بيهم ايه..
طيب والناس اللي أنا اخدت فلوسهم هيسكوتوا؟؟؟انت بقي هتكون اختفيت شهر لغاية ما هما يستوي...وتقولهم إن كنت في اسكندرية بتعزي في صاحبك بتاع ليبيا...اصل عمل حدثة وهو جاي من ليبيا ومات
وهو اساسا من اسكندرية وترسم كلي وشك الحزن
طيب وفلوسنا ؟؟؟؟؟ دي الصرخة اللي هتطلع منهم كلهم....
وقتها بقي لازم تعمل اللي هقولك عليه
قولهم يا جماعة فلوسكم عندي ...
أنا كان معايا قرشين كنت محوشهم عشان اعمل بيهم عملية البواسير (عشان تبقي مؤثرة)..ممكن لو انت بتتكسف تقول عملية الغضروف...بس التعاطف معاك هيكون اكبر في الحالة الاولي...
بس حقكم لازم يوصلكم
وهات ال100 جنيه التانية اللي انت سألتني عليها وتوزعها عليهم...
هيهدو حبة...ديما وجه كلامك لأوحش بنت قاعدة من الضحايا..حاول انك تكلمها هية وتبصلها هية...
عينك علي طول عليها
حسس البنت ديه إنها البنت الوحيدة اللي قاعدة....
ويا ريت لو تعرف تكلمها في التلفون وتقولها ان انت كنت خايف لصورتك تتلوث ادمها....
وتكون مشغل جنبك أغنية عبد الحليم بتاعت تخونوه وعمرو ما خنكم......
وديما كلم اختك عليها هية....البنت يا عيني ممكن تسلفك الفلوس وتسد اصحبها...وفي اسوء الحالات هتتكسف إنها تطالبك بفلوسها....وهتلاقيها نطة في البيت عندكم كل يوم....كل يوم كلمتين حلويين لغاية ما تنسي خالص
ويا سلام لو كانوا اتنين او تلاتة وحشين..يبقي كدا انت والدتك دعايالك..........
والباقي هينسي مع الزمن او اختك تسدهم عشان الفضايح
وهقولك المرة اللي جاية علي فكرة تانية لو دي منفعتش
-------------------------------
ايه رأيكم في التخطيط وكيفية سد الثغرات اللي ممكن يواجها بطل القصة
علي فكرة اللي خلاني افكر اني انقل المواضوع دا من مدونتي القديمة موضوع( بيفكر بالصيني )في مدونة صرصارة
ايوة هي المدونة اسمها صرصارة انا مليش دعوة
بس ملخصة هو الغزو الصناعي الصيني لمصر وليه احنا منبقاش زيهم مع اننا بنفكر احسن منهم
بس كتير مننا بيفكروا غلط
لكم تحايتي
هناك 31 تعليقًا:
هههههههههههههه
بس ده نصاب على قد حاله قوى
ياراجل انا قولت هتقولنا مبالغ من 3 اصفار بقي
وكمان انت مش حطيت فى اعتبارك الناس اللى معندهاش اخوات بنات
وكمان البنات شخصيا فين ؟؟؟
وكمان الطريقه مش هتنفع كتير يعنى البنت دى ولو كانت غبيه جدا مع الوقت هتبقي عرفت اساليبه
تقبل تحياتى
عزيزى الراقص مع الذئاب
طب أنا معنديش إخوات بنات أنصب إزاى بقى
دمت بخير أخى العزيز
يابنى انا بقول بيفكر بالصييينى
مش بيفكر بالابو زعبلى
ههههههههههههههههههه
فكرتنى ببرنامج اللى فات سات وفقرة المستثمر الصغير.. ههههههههههه
الله يمسيهم بالخير
بس المفروض فى الاخر كنت تحط سارينة البوليس زى ماكان فى البرنامج كمؤثر صوتى:)
وربنا يكفيك شر سوبر ريد وراجون والعسكرى الاخضر:)
ونحن فى انتظار الحلكه الكادمه
طيب الكلام دا لصغار النصابين
انا عايزه حاجه تقيله تنفع علشان الواحد يعمل العمله ويسافر علي اوربا كام سنه كدا لغايه ما الامور تهدي والجو يروق
انت كنت فين من زمان يا محمد بأفكار الفظيعه دي
ياراجل انا من تلات سنين كنت مزنوقه في 2 حنيه ولو كنت اعرفك كنت نفذت فكرتك دي
دا مزاح طبعا اوع تزعل
المهم الله يخليك حطني في خطتك الي جايه
عايزه اسافر اوربا بقي
هستني افكارك الي هتوديني ورا الشمس ان شاء الله
واكيد هخدك معايا
سلام يا محمد
نسيت اقولك
ان جدتي وجدي من الشرقيه
عايشين هناك يعني
اما انا عايشه في مصر الجديده
وكليتي كانت في جامعه القاهره
بس انت شايل من الشرقيه كدا ليه
حسيتك اتخضيت لما قولتلك اني جذوري منها
انت عليك فلوس لحد هناك ولا ايه
قولي احنا اخوات
ومتخفش وراك رجاله يعني
سلام يا ملك المانجو
السلام عليكم ورحمة الله وبركاته
ايه ده يا باشمهندس هو انت ناوي تروح ابو زعبل بدل ما تروح الجيش ...........ههههههههههههههه
ياتري البنات ممكن تعمل الفصل ده في اخواتهم الولاد ...ها تدخل عليهم يعني ولا لأ
السلام عليكم
ههههههههههههههههههههههههههههههههههههههههههههههههههههههه
موضوع جامد جدا
انا شخصيا مزنوق في 1000 جنيه
ايه رأيك اعمل ايه ؟
واخواتي البنات متجوزين ومش بيشتغلوا
يا تري ممكن اتصرف ازاي يا باشا
بس بجد بوست جامد
والله الموضوع مقنع قوي
تحياتي
مهند المصري
هههههههههههههههههههههههه
هو بالنسبه للسناريو بتاع النصبايه ميه ميه
بس عاوزين الارقام تكبر شويه احسن الكلام ده مش هيأكلنا عيش :)
بوست فكاهي رائع
تحياتي لك ولقلمك خفيف الظل
عالمي ازرق
دا نصاب شعبي ...علي اد حالة يعني
راجل من الشعب وللشعب
يعني مش هتلاقي مبالغ كبيرة خالص في حلقتها
اكترها 1000 جنيه مثلا
اما بقي الطريقة ديه لو منفعتش في طرق كتير جاية في السكة
مستعجليش
تحياتي لك
kaed
لو مفيش عندك اخوات بنات يبقي تنتظر الحلقة اللي جاية
مش هتعتمد فيها علي اخواتك خالص
هتعتمد علي احد الوالدين والاقارب والاصدقاء
ولو مفيش عندك حد شغال من دولة يبقي تنتظر الي بعدها
اكيد هتنفع معاك
كلامي ثقة والله
بس انت خليك معانا
اسعدني جدا زيارتك الكريمة
دمت في خير
صرصارة
فعلا الفكرة نفس فكرة المستثمر الصغير
بس انا بقي افاكاري اجمد بكتير
شوفي انتي الحلقات اللي جاية وهتعرفي
اما بقي بخصوص سوبر ريد وراجون والعسكري الاخضر فمبقاش فيه حاجة تحوق زي زمان
مش هينفع غير الطريقة اليدوية التقليدية...واخدة بالك انتي؟؟؟
تحياتي لك
للأسف يا دكتورة جهينة
كلمنا كله لصغار النصابين
ملناش في التقيل خالص
يعني اخر الفلوس اللي هنجبها هتوديكي السنبلاوين مش اوروبا
الافكار جاية كتير
وإن شاء الله طول ما انا وراكم هوديكم اي حتة...ورا الشمس ورا القمر ...بس انت خليكوا واثقين فيا
اما بقي بخصوص الشرقية فزي ما قلتلك انا جنت في جامعة الزقازيق وعشت هناك اسوء ايام حياتي
عشان كدا كل ما سيرتها بتيجي بيحصلي كدا زي صرع وتشنجات
الحمد لله ربنا تاب علينا منها بعد خساير فادحة
علي فكرة انا لسا راجع من عند دكتور سنان الناهرده...هو دكتور صاحبي...بس بجد افتكرتك وهو بينخور في ضرسي بالشنيور ويفسحني ويمرجحني بالكرسي الجميل ابو 200 الف جنيه
ربنا يكون في عنكم
سلام يا دكتورة
ســــــردية
لو دخلت تاني يبقي تقبل تحياتي
خمسة فضفضة
وعليكم السلام ورحمة الله وبركاته
ابو زعبل الجيش الصومال ...كله لونه اسود من جوا
بصي يا دكتورة بعون الله الافكار اللي انا جايبها معايا تنفع الشباب من الجنسين
التأثير بقي والمهارة والامكانيات والفروق الفردية دي بتختلف من شخص لشخص
بس اعتقد ان الولاد امهر بكتير من البنات
والحلقة اللي جاية اظن الولاد اشطر فيها من البنات
معلش بقي انا بتكلم من دماغي انا كولد معرفش انتم بيبقي في دماغكم ايه
واستني الحلقة الجاية
ولكي تحياتي
مهند
وعليكم السلام ورحمة الله وبركاته
1000 جنيه يبقي عليك والحلقة اللي جاية
بس يبقي بالك طويل اوي معايا وتنفذ اللي فيها بالحرف
إن شاء الله كل كلامنا مقنع ومفهوش اي ثغرات
بجد يا جماعة انا سادد كل الثغرت اللي في الموضوع واي حد هيلاقي ثغرة هتبقي منه هو
لك تحياتي يا مهند
3lool
للأسف يا علول
الارقام مش هتكبر
دا نصاب شعبي....لو الارقام كبرت يبقي دخلنا في السياسة وانا مبحبش السياسة
ولو عاوز امثلة للأرقام الكبيرة عندك اعضاء مجلس الشعب تصفح سير حياتهم هتلاقي حلقات كتيرة اوي
او الوزراء السابقين
ناس كتير اوي
اما الغلبان اللي علي قده احنا برضو لازم نقف معاه شوية
مش كدا برضو؟؟؟
شرفني تواجدك في مدونتي
دمت في خير
صاحب البوابة
اسعدتني جدا مجاملتك الرقيقة ومن قبلها مرورك الكريم
اتمني دوام تواجدك عندي
دمت في خير
ههههههه
حضرتك معانا ولا معاهم؟؟؟
تصدق بقي فكره حلوه... بس المشكله بقي واحده زي حالاتي ملهاش اخوات خاااالص تتصرف ازاي...
عموما ممكن ابقي اعملها في صحابي..الموضوع يستحق التجربه.. شوفلنا الله يكرمك كام فكرة تانيه عشان الواحد عايز يعمل بزنس علي كبير..ونبقي ندخلك معانا شريك عشان بتوع حقوق الملكيه الفكريه مايزعلوش
اللا قولي ..انت كنت بتشتغل ايه زمااان
دكتور خالد
شرفتي يا باشا
انا معاكم طبعا...بس اوعوا تطلعوا انتم هما
اسعدني جدا تواجدك في مدونتي
دمت في خير
None
معندكيش اخوات خاااااااالص؟؟؟
امال مين اللي بيعكنن علكي
مين اللي هيدخلك الجيش :(
مين اللي بيشغل التلفون بالسعات :(
مين اللي بيدخل اوضتك وياخد حجاتك يبهدلهالك :(
مين اللي بياخد موبيلك ويتكلم منه ويخلص رصيدك من وراكي :(
مين اللي بياخد مفاتيح العربية وينزل ويسيبك تتشالي وتتهبدي :(
لالالا...دا انتي حالتك صعبة اوي....الله يكون في عونك
وتلاقيكي يا عيني متدلعة بقي كدا ومرفهة ...وبتصحي الصبح تفطري وبتتعشي قبل ما تنامي...ولما تجيبي عصير او حاجة حلوة تحطيها في التلاجة وتصحي تاني يوم تلاقيها زي ما هي....
شئ فظيع ..فظيع ...فظيع
كل ما اتخيلك قلبي بيتقطع
عموما الفكرة اللي جاية محتاجة احد الابوين واحد الاقارب واحد الاصدقاء
والنص بالنص...انا مش هفكر واتعب وانتم تحصحصوا علي الجهاز
انا ورايا كوم لحم
اما بقي بخصوص شغلي قبل كدا فأنا كنت طالب في كلية هندسة...ودي في حتة ذاتها تعلم اي حاجة في الدنيا
دمتي في خير واسعدني جدااااا مرورك
نهارك مش طالعله شموسه ابدا
رحت لدكتور اسنان من ورايا
وجالك قلب تقولها كدا في وشي
انا حاسه ان الضغط علي عليا
روح يا محمد
ربنا يسامحك
قلبي وربي والعده والكرسي ابو 200 الف
زعلانين منك من هنا لحد يوم الجمعه
ابقي انا موجوده وتسيب حد غيري ينخور في درسك
ماشي مسير الايام تاخدلي حقي
ومن غير سلام
يااااااااااه
إنت مفلس للدرجة دي
لدرجة انت بتهلوس إذاي تجيب 200 جنيه
ياعيني
طيب خدهم سلف بس هاتهم 400
خد بالك أنا وحشة وشرانية ومابيأثرش فيا عبد الحليم حافظ ولا هاجي البيت أزوركم
هتلاقي البلويس جاي يخبط
ولا اقولك هات ال 220 جنية اللي أنت أخدتهم
ألحقوني أنا أتنصب عليا
جهينة
بقولك صاحبي..صااااااااااحبي
يعني مش دافع حاجة
هو انا اتجننت عشان اروح ادفع فلوس في حشو ضرس...والا حتي خلعه
والحكاية كلها كانت تهريج
داخل اتفسح في العيادة بيقولي اقعد فرجني علي صفين اللولي اللي في بقك
فتحت بقي زي الاستاذ سيد قشطة لقيت...صاحبي لونه اتخطف مرة واحدة وقالي يااااااااه...انت ازاي ساكت علي نفسك الحمد لله انك وقعت في ايدي....طبعا انا فاهم انه عاوز يشتغل وخلاص وقلته سيب الوضع علي ما هو عليه....انا بحب نفسي كدا
قعد بقي يسألني وقلي لما بتاكل بسبوسة بتحس ان في حاجة مسكرة في بقك
قلتله ايوة
قلي ولما بتشرب شاي بتحس انه سخن
قلتله ايوة
طيب لما حد بينادي عليك بتبص عليه
قلتله مظبوط
لما لقيت الاعراض ديه كلها عندي بدأت اقلق بجد....
قلي حط ثقتك فيا
انت عندك( الابر ريت سفن) لازم يتحشي
وبس يا ستي....انضحك عليا يعني
لدرجة ان حقنة البنج مكنتش مأثرة عشان نفسيا مكنتش مهيئ اني اكشف
بس النظام والتعقيم وشكل الكرسي كانوا يشجعوا بصراحة
الا هو انتم ممكن تطلعوا تمن الكرسي في اد ايه...بيكسبوا بقي دكاترة السنان دوله
متزعليش...المرة اللي جاية
ههتم بأسناني ومش هروح لدكتور سنان خالص
سلام يا دكتورة
shermen
انتي بتستهوني ب 200 جنيه
دولة بالنسبة ليا ثروة
وبعدين ليه الطمع بقي؟؟؟؟
وعاوز يا جماعة انبهكم لحاجة مهمة جدا
الفلوس القليلة صاحبها بيفقد فيها الامل بسرعة ومبيتعبش نفسه في البحث...وفي الغالب هيروح يبلغ عنكم
يعني 200 جنيه يا shermen موزعين علي عدد كبير هيخلوا الاضرار اقل بكتير
اسمعوا بس انتم الكلام....
تحياتي لك ولمرورك الكريم
دمتي في خير
انا بردو حسيت ان الابر ريت سفن بتاعك بعافيه شويه
وبعدين شكلك بتحسد يا محمد
والله انا لغايه دلوقتي مش عارفه افتح عياده
وخلاص هسافر اخر الشهر دا علشان اشتغل بره
اصل جوه في مصر مش نافع
ويكون في معلومك لما ابقي دكتوره كبيره ومشهور وتيجي كدا زي الباشا علشان توريني سنانك
هفكرك بالي انت عملته وساعتها هفكر اشتغلك ولا لا؟
سلام يا معلم
بقولك ايه هوا انت رايح الجيش خلاص ولا ايه؟
ممممممممممممممم
انا حاسه كدا بتلميحات شبشبيه مضربيه
هعمل نفسى مشفتش حاجه بمزاااااجى
لولا غلاوتك عندى كان هيبقالى تصرف تانى خااااالص
ياللا انا قلبى ابيض وهعديها المرادى
لكن المرة الجايه لاممكن تنزل الارض ابداااااا
لان المرة الجايه مش انا اللى هتصرف
خالو هو اللى هيتصرف لانه
.
.
دكتور سنااااان...نياهاااااااا
بس تعرف انا اخيرا فهمت انت ليه عامل حلقات للمستثمر الصغير..
شكلك كدا ناوى على تأبيده علشان تلاقى حجه ماتروحش بيها الجيش
هو كدا ابو زعبل ارحم بصراحه
قاللا انت صحيح رايح الجيش خلاااااااص
ناوى تعزل من الحارة واللا اييييه
دانا كنت ناويه انقل بلاعتى جنبكو خلاص وكنت فى تشطيبات النقل الاخيرة.
طيب اصدع مين واغلس على مين وارغى وابعبع فين تانى انا بس ياربى.
وااااااااااااااااااااااء
شوفلى علبة مناديل فلورا عندك
ومعاها صنية فته وشوارما وحتتين بفتيك وكيلو بسبوسه لزوم التحليه.
لابجد نفسى مسدودة من بعد الخير دا
واااااااااااااااااااااااااء
لازم تقوللنا متى الرحيل الى ارض العدو
علشان نعملك حفلة جوود باى صغنونه
ولانقول وداعا ولكن نقول:
الجيش علينا حق
واااااااااااااااااااااااااااء
جهينة
احسد ايه بس...هو انتم بيحوق فيكم حاجة
انتم اللي بيتقال عليكم بتكلوا اللقمة بخلع الضرس
انتي اخر الشهر هتسفري بره تشتغلي وانا اخر الشهر هروح الجيش...امال مين اللي هيفضل في البلد؟؟
وطبعا لما انتي ربنا يكرمك كدا وتبقي دكتورة كبيرة اد الدنيا ومشهورة والناس بترمي نفسها علي باب العيادة عندك اكيد هتفتكريني يعني....مش كدا برضو؟؟
دا القطة كلت عيلها يا جدعان
ادعيلي بقي عشان بلم شنطتي ....كمان اسبوعين كدا واخلع علي كلية الضباط الاحتياط
عاوز حفلة توديع تليق بيا
تحياتي لكي يا دكتورة...وربنا يوفقك إن شاء الله في سفرك
صرصارة
شفتي انتي رحتي لبعيد بقي وظلمتيني
حد دلوقتي جاب سيرة ابو صابع؟؟
انا قصدي ان الكيماويات معدتش بتنفع...قصدي الحجات الطبيعية واليدوية افيد واصح للمعدة
انا رايح الجيش علي اخر الشهر...بلم شنتطي اهو وعمال اعيط
بس برضو مش هنساكم وانا هناك
وبلعتك في عنيا من جوا
انتي تعالي حطيها جنبنا وملكيش دعوة انتي بس
ومش عاوزك تزعلي وتعيطي ...كله عشان خاطر مصر وبابا حسني وماما سوزان وابيه علاء وجمال
واوعي نفسك تتسد...انتي بالذات لازم نفسك متتسدش ابدا
الشوارع مش ناقصة.....اول امبارح ماسورة مية اتسدت عطلت الدنيا
وموضوع الحفلة دا بقي هتعملوه يعني هتعملوه
جمعوا من بعضكم كدا وابعتولي الفلوس اجيب اللي نفسي فيه
انا قنوع جدا علي فكرة
وسلام بقي عشان الحق انزل الحلقة الجديدة
إرسال تعليق