Translate

الجمعة، 20 أبريل 2007

الفلطعيس

السلام عليكم ورحمة الله وبركاته
يا جماعة انا قعدت فترة كبيرة اوي افكر في عمل شئ يخدم مصر بلدنا
فكرت في اختراع جميل جدا هيريح الناس كلها
والسبب في تفكيري واللي ساعدني علي كدا كلام وقرارت وزيري الاوقاف والثقافة
ايوة الاتنين اصحاب الافكار الفذة الفظيعة
الاتنين اللي مصر كسبتهم ويعتبروا نبراس مضئ يضئ حياتنا
ولكن للأسف...هناك بعض الناس يظنون فيهم الظنون
ويتهمنوهم بإتهمات بشعة
بس هما زي النخل...راسهم مرفوعة لفوق...يتحدفوا بالجزم يوقعوا بلح
المهم لو قعدنا كتير نثني عليهم ونشكر فيهم مش هنوفيهم حقهم
بس فكرة الاختراع بتاعي جتلي من الاختراع الجميل بتاع وزير الاوقاف بعمل اذان موحد لمدينة القاهرة
ومحاولة تعميم الفكرة علي محافظات مصر كلها
وانا اضم صوتي لصوت وزير الاوقاف واطالب بضرب جميع المؤذنين بالنار في ميدان عام
عشان بيأذنوا وهما حافيين وصوتهم وحش اوي...ياي ...نشاز
بس وزير الاوقاف بقي كان كريم اوي وقال ان هو مش هيضربهم بالنار...وبرضو انا بعيب عليه انه حصر التقدم في الاذان بس
احنا المفروض نطبق الكلام دا علي كل حيتنا ...احنا متقدمين...بلاش تخلف بقي
وهو دا بقي موضوع الاختراع بتاعي
الاختراع بتاعي يا جماعة اسمه الفلطعيس
هو ايه بقي الفلطعيس دا؟؟؟
الفلطعيس يا شباب عشان نجيبه هنضحي بالغالي والرخيص
الفلطعيس هيغنيك عن شك الابر والداببيس
الفلطعيس غيره مفيس
الفلطعيس هيعمل كل حاجة في حيتنا
هنبرمجه انه يؤذن ويبقي امام ويصلي بالناس
وكمان هيخطب الجمعة والعيد
وكمان ممكن الناس متجيش تصلي وهو يصلي بدلهم......دا التقدم يا شوية متخلفين يا رعاع
ايتها الاخت المسلمة...اخلعني نقابك والخيمة اللي انتي لابساها...وحتة القماشة اللي اسمها حجاب
وفري الفلوس وامشي بالبكيني....الفلطعيس هيتحجب بدل منك وكمان هيلبس النقاب والحجاب والاسدال
الفلطعيس ايها الشاب يغنيك عن تعب الصحيان عشان تصلي الفجر....وهطلق لحيته بدل منك
وانت ياراجل يا عجوز....مش هتتعب وانت رايح المسجد كل يوم عشان الفلطعيس هيروح مكانك
الفلطعيس هيصوم رمضان وهيصلي التراويح
وهنبعته يحج كمان....عشان برضة نخفف الضغط علي السعودية والناس اللي بتموت في الزحام
هيرمي الجمارات وهيطوف السبع اشواط في دقيقة وهتلاقيه اول واحد واقف علي عرفة
وكمان ممكن نصدر الفلطعيس للدول الصديقة لو حبوا يشتروه
ودا يعتبر مصدر كبير للدخل القومي
علي فكرة يا جماعة...مصر كلها ممكن يكفيها فلطعيس واحد
كل مواطن مسلم يروح يدخل بيناته والرقم القومي في الفلطعيس العمومي او اي مركز فرعي للفلطعيس و حسب المحافظة هنعمل شبكة متصلة بالفلطعيس الاساسي ومن مراكز التجميع ندخل عليه بينات المواطنين ويخدوا شهادة تفيد بتعهد وزارة الاوقاف والثقافة علي انهم سجلوا في الفلطعيس ورفع من عليهم التكليف ومش هيمرسوا اي نوع من انواع العبادة
وانا اهدي هذا الاختراع بكل تواضع الي وزيري الثقافة والاوقاف
لأني عارف ان قلبهم رهيف ومش بيطيقوا يشوفوا النقاب ولا يسمعوا الاذان
وبقترح اننا نستغل المساجد في تنشيط السياحة ونعملها معارض للوح الفنية بتاعت وزير الثقافة او مخزن لعلب الجيل بتاعت وزير الاوقاف اللي ديما بيحطه علي شعره
اصل يا جماعة خلاص
الفلطعيس هيعمل كل حاجة
احنا في زمن التقدم.....والتين بيقول حجات حلوة ...وهتخشوا الجنة هتخشوها
امال مين يعني اللي هيخشها؟؟؟
بصوا يا جماعة اللي هيخش النار ابو جهل وابو لهب والكفار بتوع فيلم فجر الاسلام
الباقي هيخشوا الجنة....متسمعوش كلام الناس اللي بتعقدكم
معا من اجل تقدم بلدنا....سارع بتسجيل اسمك في اوائل المشتركين في الفلطعيس حتي تفوز ب2 مليون حسنة مجانا هدية لأوائل المشتركين
وسوف يقدم الفلطعيس مفاجأت اخري في رمضان وفي مواسم الحج
---------------------------
هو دا اللي ناقص....ليه لا؟؟؟
انتم بتضحكوا ومستغربين؟؟؟
عاوزين يخلوا الاذان الكتروني؟؟؟
ويحرم المؤذن من اجر الاذان
حسبي الله ونعم الوكيل....تخيلوا ان في ناس ممكن تموت لو حاجة زي كدا حصلت
تخيلوا مؤذن الحرم المكي وهو بيتحرم من الاذان
تخيلوا مؤذن اي زاوية صغيرة وهو بيتحرم من الاذان
لو حد جرب الاذان وحس بمتعته وحلاوته وهو بيعمل كدا إبتغاء مرضات الله هيحس بالحسرة ديه
قبل كدا قالوا علي النقاب انه تخلف ورجعية وهاجموه ....ياريتهم يهاجموا البيكيني بنفس شراسة مهاجمتهم للنقاب
ولكن صبرا يا اختنا...صبرا تلوذ ببحره كل الصعب
فوالله انت عزيزة وغالية عند اخوانك...فدويسي بقدميك الطاهرة علي رقابهم النجسة ولا تستمعي لنعيق الحاسدين من الكلاب
انا مش لاقي كلام اقوله غير بيتين شعر للناس ديه
أسألك بربك يا خيبان..هل تجرأ يوما ان تهزء بلباس الكهنة والرهبان
أسلك بربك يا خيبان.. هل تجرأ يوماً ات تخرس اجراس كنيسة مهجورة يسكنها الجرذان
أحبتي في الله.....الاسلام يحارب من الداخل والخارج
وأنتم جنود الاسلام
دافعوا عن دينكم والله معكم
وحسبنا الله ونعم الوكيل

هناك 17 تعليقًا:

محض روح يقول...

مش عارفه اقولك ايه
المشكله انهم مش حسين ان ده غلط او حرام
وفيه اهدار لروحانيه الاذان
ولحق المؤذن
فى الثواب
وبعدين هما تناسو قول الرسول ان المؤذنين هم أطول الناس أعناقاً يوم القيامة ويشهد للمؤذن كل من سمعها

وزير الاوقاف ليه سنه عمال ينادي بالاذان المسجل كانوع من تحسين الشكل العام للمؤذنين
طيب ادام فيه مؤذنين صوتهم مش بالمستوى المطلوب ليه
مانخترش غيرهم لو ديه مشكلتهم زي مابيقولو

هنعمل ايه اول امبارح نفذو الفكره بشكل تجريبي
واكيد هتتعمم
ربنا يرحمنا برحمته
تحياتي يافندم

šσяšαяαα يقول...

ايه اللى عملته دا..
انت كدا بتظلم الفلطعيس معاك ياشيخ
هو هيعمل ايه واللا ايه بس
وبعدين لسا فى ناس معملوش الرقم القومى.. لو كدا بقى ينفع يسجلو بكارت ميناتل؟

طيب شويه جد بقى
بمناسبه المؤذنين دى قصه كانت مبعوتالى عن خاتمه مؤذن وبتوضح اد ايه الاذان بالنسبالهم حياتهم كلها:
رجل عاش أربعين سنة يؤذن للصلاة لا يبتغى إلا وجه الله ، وقبل الموت مرض مرضاً شديداً فأقعده فى الفراش ، وأفقده النطق فعجز عن الذهاب إلى المسجد ، فلما اشتد عليه المرض بكى ورأى المحيطون به على وجهه أمارات الضيق وكأنه يخاطب نفسه قائلاً يارب أؤذن لك أربعين سنة وأنت تعلم أني ما ابتغيت الأجر إلا منك، وأحرم من الأذان فى آخر لحظات حياتي. ثم تتغير ملامح هذا الوجه إلى البشر والسرور ويقسم أبناؤه أنه لما حان وقت الآذان وقف على فراشه واتجه للقبلة ورفع الآذان فى غرفته وما إن وصل إلى آخر كلمات الآذان لا إله إلا الله خر ساقطاً على الفراش فأسرع إليه بنوه فوجدوا روحه قد فاضت إلى مولاها .

واحب اختم بحديث الرسول اللى فيما معناه انه المتمسك بدينه فى الزمن دا كالقابض على جمر من النار

ربنا يثبتنا على مايحب ويرضاه ويورينا آياته فكل اللى بيحاربو الاسلام واللى بيساعدهم عل كدا.

بعتذر على الاطاله ودمت بألف خير

عالمى ازرق يقول...

بجد متستبعدش ان لو الوزير دخل و شاف البوست ده انه ياخد بالاختراع بتاعك
وانت بقي تاخد براءه اختراع وتتشهر

هما بياخدوها خطوه خطوه التجربه الاول وبعد كده يسلاااااااام ده التجربه نجحت هيلاقوا معارضات لفتره وبعد كده يعمموها
ده غير نشر ثقافه الفساد - القصص التعليميه اللى منزلاها امريكا - اللى بالفعل بدأت فى مدارس القاهره
وهيتم تعميمها على باقى محافظات مصر
بجد ربنا يستر علينا و على الاجيال اللى جايه بالاخص
بس سؤال كده
هو ليه اسمه الفلطعيس؟

mohand يقول...

السلام عليكم
لا يسعني الا ان اقول لك
حسبي الله ونعم الوكيل فيهم
اختيار الناس دي للدنيا ونسيانهم للاخره
شئ جميل بالنسبه لهم
لكن يوم لا ينفع فيه مال ولا ولد ولا سلطة ولا جاه ولا ولا ولا
هنشوف هيحصلهم ايه
ربنا المنتقم
ربنا المنتقم

Nothing To Lose يقول...

تصدق انا مش عارفه اضحك و لا أبكى
الكلام تهريج جدا
ومؤلم جدا فى نفس الوقت
مش عارفين يعملوا ايه علشان يخرسونا
ويجيبولنا حسرة وجلطه وكل امراض الدنيا
بصراحه موضوع الاذان دا ..انا مكنتش فكرت فيه كدا
انا فكرت فيه انه هيظبط النواعيد
والهرجله الى بتحصل وقت الاذان لما يكون فى مساجد كتير جنب بعض
وكل صوت أذان بصوت شيخ مختلف
فقلت دا حاجة كويسه

بس انت فعلا لفت نظرى للناس دى
اكيد فعلا هبتغبوا نفسيا
دا الواحد لما بيداوم على فعل طاعه وبتتقطع عنه
بيبقى هيموت بحسرته

بس بجد الفلطعيس دا
موتنى من الضحك

دمت بخير أخى الكريم

šσяšαяαα يقول...

محمد صحيح انا عملت بوست عصرت فيه دماغى عشان اكتبه بالعربى وطلع بالشكل اللى هتشوفوه دا..
يااااارب يعجبكم وانا ضايفه معاه هديه صغنونه خدها منى ليك
ماهو مفيش حد ذئب هنا غيرك:)

همسات دافئه يقول...

أولا انت تنفع بتاع اعلانات هايل جدا ياأخى دانا كنت خلاص هاقتنع:)))
ثانيا انا بصراحه كنت مؤيده سمعت انه مش هايبقه مؤذن واحد وهاينتشر بالميكرفونات ويخلصنا من الخمسين مؤذن الى محدش فيهم ماشى مع التانى
بس مفكرتش فى احساس المؤذن
هوه أكيد هايبقى صعب عليه فعلن

فليقولوا عن حجابى انه يفنى جمالى
وليغالوا فى عتابى ان للدين انتسابى
أى معنا للجمال ان غدا سهل المنال
لا وربى لن ابالى

Bossy يقول...

عمار يا مصر
الفلطعيس فكررة برده اكيد صناعة صيني برده
بس ياتري يوم القيامة ايه نظامة معانا وابقي شوفلنا الموضوع داسؤال اخير الفلطعيس شحن ولا بطارية تفرق معانا كتير
حاجة تبكي
ديــــــن قـوي وانصار ضعفاء
لحد امتي هنسكت كده طيب ماشي حقوقنا بنسكت عليها ونعتبر دا كرم اخلاق ممنا
اما دنيا اذاي
كام واحد هينصر الاسلام
يترا ممكن يبقوا قد اللي بيصوتوا للبرنامج الفاشل استار اكاديمي اقسم بالله ما بتفرج عليه
هيبقوا قد الشباب اللي خرج في مظاهرات علشان خاطر فنان الجيل الله تامر حسني
يترا لو اتجمعوا في مكان هيبقوا قد الناس اللي موجوده في حفلة مثلا لكاظم الساهر
انا اسفه علي المقارنه لان محبة ربنا ونصرة دينا اعظم بكتير من اشياء زي دي
حسبي الله ونعم الوكيل

Rehab Saber يقول...

اللهم انصر الاسلام واعز المسلمين

الراقـــص مع الذئـــــاب يقول...

محض روح

هي الحكاية مش فارقة معاهم حرام من حلال...في قلوبهم مرض فزادهم الله مرضا
بس المصيبة ان الناس ساكتة ومش فاهمة الموضوع ايه

وطبعا فضائل المؤذنين وفضل الاذان مش شاغل بالهم ....
حسبنا الله ونعم الوكيل
انا عن نفسي وكل المنطقة اللي انا فيها مش هنسيب المسجد بتعنا لحاجة زي كدا...والله لو فيها قطع رقبة الاذان هيترفع غصب عن عينهم
جزاكي الله خيرا علي مرورك الكريم
-----------------------------------
سارة

قصة المؤذن انا سمعتها قبل كدا...ولو عاوزة تشوفي قصص عملية تعالي عندنا المسجد وهتشوفي العجب...
عندا الاذان متقسم علي اهل المسجد ...يعني مثلا الفجر فلان او فلان والظهر فلان او فلان
وهكذا....عشان كان فيه تسابق وتسارع علي الاذان وحب ليه من الناس كلها
حتي ولو صوته مش حلو كان برضو بيتسابق عليه

والله انا في الم وحسرة لا يعلمها الا الله

وكما قال رسول الله صلي الله عليه وسلم القابض علي دينه كالقابض علي جمرة من النار

وحسبنا الله ونعم الوكيل

---------------------------------
عالمي ازرق

طيب انتي بتقولي فيها...هفكرك ان خطبة الجمعة مثلا هتبقي متسجلة وموحدة وهتتزاع عبر شاشات عرض كبيرة في كل المساجد...واللي هيخطبها شيخ الازهر طنطاوي قبحه الله....ولو ربنا احيانا هتيجوا تقولوا محمد قال الكلام دا

اما بخصوص الفلطعيس وسبب تسميته فدا شئ يعتبر سر من اسرار الاختراع

كل فلطعيس وانتي طيبة
اكرمك الله وجزاكي الله خيرا علي المرور

الراقـــص مع الذئـــــاب يقول...

اخي مهند
وعليكم السلام ورحمة الله وبركاته

فعلا حسبنا الله ونعم الوكيل

فعلا دي ناس طلاب دنيا وليسوا طلاب اخرة
واحد بيعتبر صوت الاذان نشاز....هتقول عليه ايه
ربنا ينتقم منهم جميعا وينجينا منهم

جزاك الله خيرا علي مرورك الكريم
----------------------------------
Nothing To Lose
متضحكيش يا ناثينج...ابكي ولو هتعرفي تبكي دم....

عارف موضوع الهرجلة اللي انتي شيافاه وهما اقنعوا الناس بيه دا ليه حكمة وليه حاجة في الدين هقولهالك عشان يمكن صعب شوية علي الاخوات انهم يكتشفوا الامر دا ...يمكن اي اخ هيحس بالكلام اللي انا هقوله دا عن طريق التجربة اللي هقولكم عليها واللي هتكون صعبة علي الاخوات

انزل من بيتك قبل الفجر بحوالي 10 دقليق وروح صلي في ابعد مسجد تقدر تروحه....يعني حاول انك تمشي اكبر فترة ممكنة في الشارع قبل الاذان ووقت الاذان وبعد الاذان
واسمع بقي الخليط العجيب ما بين اصوات المؤذنين والاذان في الوقت الصامت اللي مفيش فيه حد
هتلاقي مسجد قريب طالع منه صوت الله اكبر
...مسجد ابعد شوية هتسمع فيه اشهد ان لا اله الا الله...التالت هتسمع منه اشهد ان محمد رسول الله...الرابع بيقول حي الصلاة....هتسمع واحد بعيد شوية لسا بيبدأ اذان...واحد تاني بيقول الصلاة خير من النوم....واسمع الاصوات ديه كله مع بعض وتخيل هذه الخليط من الاصوات ومدي جماله علي الرغم من عدم إنتظامه....وتخيل كل الاصوات ديه طالعة للسماء تحفها الملائكة
لو عنيك مبكتش وجسدك اقشعر يبقي ليك الحق يا عم
يا جماعة انا بقولكم اعملوا التجربة ديه وشوفوا الاحساس عامل ازاي

هيقع في قلبك شئ رهيب....حاجة مش هقدر اوصفهالكم....هتحس بعزة وخشوع وعظمة الخالق عز وجل
ودي حكمة فروق التوقيت...ان الاذان يرفع في جميع انحاء الارض في كل لحظة...دلوقتي العصر في مصر ...والظهر في المغرب ...والمغرب في عمان والفجر في استرليا...لا ينقطع الاذان وزكر الله ابدا في كل لحظة....ودا اللي قاله عالم الفضاء اللي كان في زيارة لمصر واستغرب واتعجب لما سمع الاذان وقالهم احنا كنا بنسمع صوت غريب مش عارفين تفسير ليه بيوصلنا واحنا في الفضاء والصوت دا هو اللي خارج من مكبرات الصوت اللي في المساجد بتاعتكم

يا سبحان الله
عرفتم يا جماعة احنا ليه المفروض نبكي علي هذا الموضوع

جزاكي الله خيرا يا ناثينج علي مرورك الكريم وكلامك الجميل ودمتي في خير

الراقـــص مع الذئـــــاب يقول...

جزاكي الله خيرا يا سارة علي البوست الجميل وعلي الصورة الجيلة
دمتي في خير اختي الكريمة

------------------------------
واحدة من الناس

طب كويس اني لقيت حاجة اعرف اشتغل فيها بعد الجهادية
وبالنسبة لتأيدك لحكاية توحيد الاذان شوفي ردي علي اختنا ناثينج وهتعرفي انا كتبت الموضوع ليه

جزاكي الله خيرا علي المرور الكريم وعلي ابيات الشعر الجميلة التي اتمني ان تتجسد في كل اخت مسلمة
-----------------------------
Bossy

لا يا بوسي
الفلطعيس مصري 100%
شفتي بقي احنا شاطرين في ايه؟؟؟
والفلطعيس شحنه ذاتي
يعني مع الزمن قوته بتزيد وشحنه بيبقي اقوي من الاول

حسبنا الله ونعم الوكيل
امثلتك جميلة ونبهتنا لحجات كتيرة
موضوع التهميش والهيافة اللي الشباب فيها
اللهم اهدي شباب المسلمين يارب العالمين
اللهم انصر الاسلام واعز المسلمين
جزاكي الله خيرا علي مرورك الكريم يا اختنا الكريمة
-----------------------------

Arabian GiRl

اللهم انصر الاسلام واعز المسلمين

جزاكي الله خيرا علي مرورك الكريم

gohayna يقول...

انا مش عيزه اختلف معاك
قبل ماتمشي

انت راجل علي وش جيش
مش عايزه ازعلك


المهم الي انت قولته اكيد صح
بس من وجهه نظر واحده

هفهمك

انا حولين بيتي تقريبا اكتر من 12 او 13 مسجد

غير المسجد بتاع الجيش لانه قدام البيت

يعني المنطقه بتكوت عمرانه والحمد لله


في صلاه الفجر متتخيلش ايه الي بيحصل

والله كل واحد بيدن علي مزاجه

وكأننا داخلين سباق

غير بقي الاصوات الفظيعه الي بتتبرع بالادان

يعني تقريبا من كل المساجد دي

مفيش غير واحد بس هو الي انا ماشيه معاه وبتابع صوته
وبصلي لما بيدن

اما الباقي فبجد حرام يأذن

صحيح الصوت الحلو دا موهبه من عند الله
بس الاذان دا شيئ مقدس

مش كل واحد يطلع يقوله

علي الاقل لازم يكون بيتميز بأنه صوته مقبول

مش هقولك يكون حلو زي عبد الوهاب بس علي الاقل بحبب الناس في الاذان


دي من وحهه نظه تانيه ممكن تلاقي ان الاذان الالكتروني برضه ليه فايده

والي انت قولته برضه صح

المهم انت خدبالك من نفسك

ومتنساش تطمني عليك لما ترجع
امانه عليك

وتسلملس علي داعويك الحلوه الي بجد مش عارفه اشكرك عليها ازاي


ربنا يوفقك ويهديك ويجعلك في كل خطوه سلمه
ويوقفلك ولاد الاحلال يارب في طريقك

اشوفك علي خير يا محمد

الراقـــص مع الذئـــــاب يقول...

دكتورة جهينة

هو احنا نقدر برضو نختلف معاكي
وطبعا عمري ما هختلف معاكي وانا علي وش القفص...قصدي وش الجيش

بس لو قرأتي ردي علي اختنا ناثينج هتعرفي سبب كلامي ايه...
انا عارف ان البنات الامر بالنسبلها غريب ويمكن انتم شايفين توحيد الاذان في ايجابيات حسن الصوت والتنظيم
بس الاتنين دولة مش اساسين خالص..وإن كان حسن الصوت احسن وافضل بس لو مفيش حد صوته حلو يبقي برضو مينفعش نحط اذان متسجل
اللي يحس بالموضوع دا مش كل الناس يا جهينة
يمكن عشان مفيش نساء يرفعن الاذان فدا هو السبب

الا تعلمي ان في الاذان نية تبليغ ودعوة...الاخوة بتوع جماعات التبليغ والدعوة ليهم حاجة جميلة اوي
لما يحسوا انهم مقصرين في الدعوة والكلام مع الناس بيعتبروا الاذان نوع من الدعوة الي الله عز وجل

يا جهينة الموضوع كبير اوي اوي اوي....ولو اتكلمنا فيه سنين مش هنقدر نغطيه
اللهم لا تحرمنا من هذه النعمة وهذا الفضل

بس انتي ساكنة جنب 14 مسجد؟؟
ربنا يزيد ويبارك

انتي ساكنة في وش بوابة الاستاد الرئيسية بقي عند مسجد القوات المسلحة؟؟؟
الحتة ديه ليا فيها زكريات جميلة جدا
انا قعدت هناك فترة عشان مشروع التخرج بتاعي كان داخل مسابقة في استاد القاهرة
في مفارق عند الطريق بتاع بوابة الاستاد سعات بيقفلوها بحواجز حديد....قامت في دماغي ان اشيل الحوجز ديه عِنداً في عسكري المرور اللي شلها عشان خاطر يعدي بنت حلوة وقفلها تاني علي بقية الناس
رحت شيلتها غصب عنه وعديت الناس والشارع كله كان واقف يتفرج عليا وعلي الجنان اللي عملته...
زكريات جميلة
مبحرا في زكرياتي

جزاكي الله خيرا علي كلامك الجميل
ومتنسيش اخوكي من الدعاء
وعاوزين نطمن عليكي انتي كمان في مشاورك
ربنا ييسرلك يارب وكرمك ويرزقك من حيث لا تحتسبي



سلام بقي عشان نازل احلق حلاقة الجنود

استودعك الله اختي الكريمة

šσяšαяαα يقول...

طيب انا عندى اقتراح
ممكن زى مافى فلطعيس يكون فى فلطعيسه؟
علشان احنا بنانيت امامير مانحبش نتعامل مع المذكر السالم:)
وبالمرة مانحرمش الفلطعيس من حاجه ويلاقيله ونس.. واللا اييييييه

وحلوة اوى على فكرة حركة الصورة الاسمعلاوى دى..
ايون كدا انا عاوزة المنافسه تشتدت..
فينك بس يامهند:)))
على فكرة انا بهدى النفوس والله ياجماعه

وسلااااااااااام بقى ماتنساش تسلملى عالشويش عطيه

gohayna يقول...

تروح وترجع بالف سلامه
لا اله الا الله

محمد رسول الله

كراكيب عادل يقول...

اختراع عايز تفكير شوية دة بس انا من رأي نغير الاسم الاول

احنا علي مشارف ان نكون علمانين جداااا جات علي المؤذن طبعا كلام فاضي يخلوا الادان موحد وفية شبة الحرام