كيف السبيل الي البر؟؟

السلام عليكم ورحمة الله وبركاته

ازيكم يا شباب...انا عارف والله إن الحر عامل عاميله

والناس كلها زهقانة ومحدش ليه نفس يعمل اي حاجة

بس بجد بالنسبة للي انا بشوفه الحر دا ولا حاجة

ومستغرب جدا من الناس اللي بتقول انهم هيموتوا من الحر

مع إنهم تحت مراوح وتكييفات وبيشربوا مية ساقعة وكل شوية يخدوا شاور

عشان كدا لازم نبص للي من هو في وضع اسوء من الوضع اللي احنا فيه عشان نعرف نقول الحمد لله

اصل احنا مبقناش بنقول الحمد لله كتير

ولو قلناها بنقولها من غير ما نحسها

معلش كانت مقدمة صغيرة عشان نفتكر جزء صغير من نعمة ربنا علينا وإن الحر اللي احنا فيه زي منبه صغير ينبهنا للنعيم اللي احنا عايشين فيه ومش حاسيين ولابنشكر ربنا

وعشان نفتكر كمان حر جهنم....يقول الله عز وجل في كتابه الكريم

فَرِحَ الْمُخَلَّفُونَ بِمَقْعَدِهِمْ خِلافَ رَسُولِ اللَّهِ وَكَرِهُوا أَنْ يُجَاهِدُوا بِأَمْوَالِهِمْ وَأَنْفُسِهِمْ فِي سَبِيلِ اللَّهِ وَقَالُوا لا تَنْفِرُوا فِي الْحَرِّ قُلْ نَارُ جَهَنَّمَ أَشَدُّ حَرًّا لَوْ كَانُوا يَفْقَهُونَ

يارب لك الحمد كما ينبغي لجلال وجهك وعظيم سلطانك

نيجي بقي لموضوعنا

وهو هيكون عن آية في كتاب الله عز وجل هنحاول إنننا نطبقها

يقول الله عز وجل في كتابه الكريم

لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ وَمَا تُنْفِقُوا مِنْ شَيْءٍ فَإِنَّ اللَّهَ بِهِ عَلِيم

لما ربنا يكرمك كدا وتنوي ان تخرج صدقة لفقير هل بتفكر انك تروح تشتري مثلا تفاح او مانجو او اي فاكهة محترمة كدا من اللي احنا بنحبها؟؟؟

ايوة سعات والله بفكر اني اعمل كدا

طيب لو هتعملعا هل بتروح تجيب الفاكهة ديه من احسن المحلات وباغلي الاسعار؟؟

اممممممممم

طبعا محدش هيجاوب....الا من رحم ربي

يعني ممكن في ناس تكون بتعمل كدا بالفعل

بس تعالوا نتكلم بقي بموضوعية اكتر وبصراحة....احنا مش بنعمل كدا ولا عمرنا فكرنا في الموضوع دا

الفقير ملوش غير انه ياكل عيش بطعم المسامير وعدس وفول واي حاجة تسد الجوع وخلاص

وبكدا يبقي احنا عملنا اللي علينا

احنا هنقطع نفسنا يعني

هو كيلوا رز علي نص كيلوا عدس علي كيلو فول وشوية بقوليات وحطهم في كيس كبير وارميها لأهله

هو طايل

دا كمان هيجري وراك يبوس ايدك وانت تقوله استغفر الله استغفر الله وتعمل نفسك تقي وراجل خير وتركب عربيتك والسبحة في ايدك وتمشي

وسعتها بقي تحس انك دخلت الجنة واتربعت فيها...دا انت بتتصدق علي الفقراء وبتعمل خير

ماشي يا عم...والله دا شئ جميل جدا...وياريت كلنا نعمل الكلام دا

بس تعالوا نزود حاجة بسيطة في الكيس اللي مليان طعام اولي

يعني نزود حاجة كدا الراجل دا مكنش يتوقعها ولا عمره يفكر فيها

هات معاك مثلا دستة جاتوه ....كيلوا تفاح امريكاني...كيلوا مكسرات....

هات ياعم ايس كريم كدا وحجات ساقعة

يا جماعة والله دي حاجة جميلة اوي

الراجل دا هو وأسرته وأولاده نفسهم فعلا يتعرفوا علي الحجات ديه

هو كل الفلوس اللي في ايده بيشتري بيها ما يكفي لسد احتياجاته الاولية

بس اولاده ميعرفوش كدا

تخيل كدا مدي فرحة اولاده وانت جايبلهم تفاح او جاتوه

الم تعلم ان من احب الاعمال الي الله هو إدخال سرور علي مسلم؟؟

أو كما قال صلي الله عليه وسلم

بذمتك مش دا إدخال سرور علي مسلم؟؟

يا جماعة بلاش نختار الحاجة اللي احنا مش بنحبها وننفقها او نرميها للفقير

يقول الله عز وجل في كتابه الكريم

يَا أَيُّهَا الَّذِينَ آمَنُوا أَنْفِقُوا مِنْ طَيِّبَاتِ مَا كَسَبْتُمْ وَمِمَّا أَخْرَجْنَا لَكُمْ مِنَ الأَرْضِ وَلا تَيَمَّمُوا الْخَبِيثَ مِنْهُ تُنْفِقُونَ وَلَسْتُمْ بِآخِذِيهِ إِلا أَنْ تُغْمِضُوا فِيهِ وَاعْلَمُوا أَنَّ اللَّهَ غَنِيٌّ حَمِيدٌ

الموضوع دا مش هيتغير غير لما تغير نظرتك للفقير وتعرف انه احسن منك

مش قصدي طبعا الناس اللي بيلفوا في الشوارع ويمتهنوا مهنة التسول

لا...انا قصدي علي الناس اللي مقفول عليهم ابواب ولا يعلم ما بداخلها الا الله

يحسبهم الجاهل اغنياء من التعفف

يقول الله عز وجل

لِلْفُقَرَاءِ الَّذِينَ أُحْصِرُوا فِي سَبِيلِ اللَّهِ لا يَسْتَطِيعُونَ ضَرْبًا فِي الأَرْضِ يَحْسَبُهُمُ الْجَاهِلُ أَغْنِيَاءَ مِنَ التَّعَفُّفِ تَعْرِفُهُمْ بِسِيمَاهُمْ لا يَسْأَلُونَ النَّاسَ إِلْحَافًا وَمَا تُنْفِقُوا مِنْ خَيْرٍ فَإِنَّ اللَّهَ بِهِ عَلِيمٌ

تيجوا نتفق يا جماعة علي إننا هنعمل الموضوع دا؟؟؟

هننزل نشتري اي حاجة من اللي احنا بنحبها ونروح ندور علي فقير يستحق ونهديه هذه الحاجة؟؟

صعبة ...والا الفلوس معانا مقصرة؟؟

معلش تعالوا ندوس علي نفسنا ونعمل الموضوع دا....ونستمتع بفرحة وبسمة علي وجه ابتلي بالفقر

كما ابتليت انت بالغني

اللهم اجعل عملنا خالصاً لوجهك ولا تجعل لأحد فيه نصيبا

وجزاكم الله خيرا