Translate

الجمعة، 27 يوليو 2007

كيف السبيل الي البر؟؟

السلام عليكم ورحمة الله وبركاته
ازيكم يا شباب...انا عارف والله إن الحر عامل عاميله
والناس كلها زهقانة ومحدش ليه نفس يعمل اي حاجة
بس بجد بالنسبة للي انا بشوفه الحر دا ولا حاجة
ومستغرب جدا من الناس اللي بتقول انهم هيموتوا من الحر
مع إنهم تحت مراوح وتكييفات وبيشربوا مية ساقعة وكل شوية يخدوا شاور
عشان كدا لازم نبص للي من هو في وضع اسوء من الوضع اللي احنا فيه عشان نعرف نقول الحمد لله
اصل احنا مبقناش بنقول الحمد لله كتير
ولو قلناها بنقولها من غير ما نحسها
معلش كانت مقدمة صغيرة عشان نفتكر جزء صغير من نعمة ربنا علينا وإن الحر اللي احنا فيه زي منبه صغير ينبهنا للنعيم اللي احنا عايشين فيه ومش حاسيين ولابنشكر ربنا
وعشان نفتكر كمان حر جهنم....يقول الله عز وجل في كتابه الكريم
يارب لك الحمد كما ينبغي لجلال وجهك وعظيم سلطانك
نيجي بقي لموضوعنا
وهو هيكون عن آية في كتاب الله عز وجل هنحاول إنننا نطبقها
يقول الله عز وجل في كتابه الكريم
لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ وَمَا تُنْفِقُوا مِنْ شَيْءٍ فَإِنَّ اللَّهَ بِهِ عَلِيم
لما ربنا يكرمك كدا وتنوي ان تخرج صدقة لفقير هل بتفكر انك تروح تشتري مثلا تفاح او مانجو او اي فاكهة محترمة كدا من اللي احنا بنحبها؟؟؟
ايوة سعات والله بفكر اني اعمل كدا
طيب لو هتعملعا هل بتروح تجيب الفاكهة ديه من احسن المحلات وباغلي الاسعار؟؟
اممممممممم
طبعا محدش هيجاوب....الا من رحم ربي
يعني ممكن في ناس تكون بتعمل كدا بالفعل
بس تعالوا نتكلم بقي بموضوعية اكتر وبصراحة....احنا مش بنعمل كدا ولا عمرنا فكرنا في الموضوع دا
الفقير ملوش غير انه ياكل عيش بطعم المسامير وعدس وفول واي حاجة تسد الجوع وخلاص
وبكدا يبقي احنا عملنا اللي علينا
احنا هنقطع نفسنا يعني
هو كيلوا رز علي نص كيلوا عدس علي كيلو فول وشوية بقوليات وحطهم في كيس كبير وارميها لأهله
هو طايل
دا كمان هيجري وراك يبوس ايدك وانت تقوله استغفر الله استغفر الله وتعمل نفسك تقي وراجل خير وتركب عربيتك والسبحة في ايدك وتمشي
وسعتها بقي تحس انك دخلت الجنة واتربعت فيها...دا انت بتتصدق علي الفقراء وبتعمل خير
ماشي يا عم...والله دا شئ جميل جدا...وياريت كلنا نعمل الكلام دا
بس تعالوا نزود حاجة بسيطة في الكيس اللي مليان طعام اولي
يعني نزود حاجة كدا الراجل دا مكنش يتوقعها ولا عمره يفكر فيها
هات معاك مثلا دستة جاتوه ....كيلوا تفاح امريكاني...كيلوا مكسرات....
هات ياعم ايس كريم كدا وحجات ساقعة
يا جماعة والله دي حاجة جميلة اوي
الراجل دا هو وأسرته وأولاده نفسهم فعلا يتعرفوا علي الحجات ديه
هو كل الفلوس اللي في ايده بيشتري بيها ما يكفي لسد احتياجاته الاولية
بس اولاده ميعرفوش كدا
تخيل كدا مدي فرحة اولاده وانت جايبلهم تفاح او جاتوه
الم تعلم ان من احب الاعمال الي الله هو إدخال سرور علي مسلم؟؟
أو كما قال صلي الله عليه وسلم
بذمتك مش دا إدخال سرور علي مسلم؟؟
يا جماعة بلاش نختار الحاجة اللي احنا مش بنحبها وننفقها او نرميها للفقير
يقول الله عز وجل في كتابه الكريم
الموضوع دا مش هيتغير غير لما تغير نظرتك للفقير وتعرف انه احسن منك
مش قصدي طبعا الناس اللي بيلفوا في الشوارع ويمتهنوا مهنة التسول
لا...انا قصدي علي الناس اللي مقفول عليهم ابواب ولا يعلم ما بداخلها الا الله
يحسبهم الجاهل اغنياء من التعفف
يقول الله عز وجل
تيجوا نتفق يا جماعة علي إننا هنعمل الموضوع دا؟؟؟
هننزل نشتري اي حاجة من اللي احنا بنحبها ونروح ندور علي فقير يستحق ونهديه هذه الحاجة؟؟
صعبة ...والا الفلوس معانا مقصرة؟؟
معلش تعالوا ندوس علي نفسنا ونعمل الموضوع دا....ونستمتع بفرحة وبسمة علي وجه ابتلي بالفقر
كما ابتليت انت بالغني
اللهم اجعل عملنا خالصاً لوجهك ولا تجعل لأحد فيه نصيبا
وجزاكم الله خيرا

هناك 41 تعليقًا:

رينـــــــــــا يقول...

السلام عليكم
بجد يا محمد جزاك الله خيرا كثيرا على فكرت دى
من فترة كدا تقريبا سنتين كان فى جمعيه خيريه اعرفها كانت المتطوعين اللى فيها مقسمين الاسبوع يوزعه فيه اكل على الفقراء
واتفقوا بدل ما يودوا للناس فول وكشرى وهما زهقانين ياعينى منهم يودوا همبورجر وجاتوه وحاجات هما مش بيكلوه
وان كنت شايفه ان الموضوع دا سلاح ذو حدين
يعنى اى نعم هما هيتبسطوا اوى وادخال سرور
بس فى نفس الوقت لما يدوقوا الحاجات دى ممكن جدا لو انسان نفسه ضعيفه واشتاق لها تانى وهو غير قادر على شرائها انه يسرق لقدر الله
ممكن اكون انا بكبر المواضيع
بس سبحان الله الحرمان بيعمل اكتر من كدا
بس طبعا الفكرة جميله جدا وانا لو مكانهم اكيد هتمنى لو مرة ادوق حاجة مش عارفاها وبشوفها بس

وانا شايفه ان جميل لو الواحد حط نفسه مكانهم ويشوف كان نفسه يتعامل ازاى لو كان هو الانسان الفقير دا

الرحمه بيهم والمعامله الكويسه واننا مش نحسسهم انهم اقل مننا وعدم احراجهم واحنا بنديهم الحاجاه ونحاول نزوق الموقف بكل الاشكال الممكنه بالدنيا وما فيها اكيد

جزيت خيرا وترجع با الف سلامه وان شاء الله كل الامور تعدى على خير
سيبها على الله لعله خير :D

مستنيه المرة الجايه اعرف قصتها لانى للاسف مش عارفاها :(
فى حفظ الله دايما

رفقة عمر يقول...

فعلا كلامك صحيح
والحمد لله ليا اخوات فى الله ليسوا تبع جمعيه ولا غيره بيخرجوا كل شهر شنكه شهريه بها افخر انواع السمن وافخر
انواع الزيت وسكر وارز وفول وعدس
دى الشنطه الشهريه وكل اتنين وخميس يعملون اطعام يوم الاتنين وجبات جاهزة تشمل لحوم وطيور وسلطات واحيان رز بالخلطه او مكرونه
يوم الخميس بيكون اطعام برضه بسب بيكون لحم نى وطيور نيه
الحمد لله وعلى فكرة بنخرج بنفسنا ونلف على هذه البيوت
حتى ناخذ ايضا ثواب الزياره والحب فى الله
الحمد لله فيه بعض الناس بدأيهتم بالمحتاجين
ربنا يزيد منهم يارب العالمين
جزاك الله خيرا على موضوعك الجميل

همسات دافئه يقول...

سلام عليكم
ازيك يامحمد؟
موضوعك بجد جميل قوى ده السيده عائشه رضى الله عنها كانت كانت بتعطر النقود قبل ما تتصدق بيها مش بتدور على الحاجه الى عايزه ترميها وتديهالهم
جزيت خيرا بجد وان شاء الله هانفذ
يارب تلحق تعلق عندى قبل ما تمشى
سلام ياغالى:)

رفقة عمر يقول...

فعلا كلامك صحيح
والحمد لله ليا اخوات فى الله ليسوا تبع جمعيه ولا غيره بيخرجوا كل شهر شنكه شهريه بها افخر انواع السمن وافخر
انواع الزيت وسكر وارز وفول وعدس
دى الشنطه الشهريه وكل اتنين وخميس يعملون اطعام يوم الاتنين وجبات جاهزة تشمل لحوم وطيور وسلطات واحيان رز بالخلطه او مكرونه
يوم الخميس بيكون اطعام برضه بسب بيكون لحم نى وطيور نيه
الحمد لله وعلى فكرة بنخرج بنفسنا ونلف على هذه البيوت
حتى ناخذ ايضا ثواب الزياره والحب فى الله
الحمد لله فيه بعض الناس بدأيهتم بالمحتاجين
ربنا يزيد منهم يارب العالمين
جزاك الله خيرا على موضوعك الجميل

Doba يقول...

على فكرة - انا كل لما بقرا ليك بوست جديد بيزداد احترامى وتقديرى ليك - ماشاء الله عليك - ربنا يخليك لوالديك ويباركلك فيهم ويجازيهم خير على تربيتهم ليك ويارب يقدرنى واربى ابنى كويس بحيث يطلع شخص الكل يفتخر بيه ويقدر الفقير واى محتاج من حواليه قبل نفسه

بالنسبة للبوست بتاعك - لا يكلف الله نفسا إلا وسعها - والواحد على قد مبيقدر فعلا بيجاهد مع نفسه فى مواجهة الشيطان لعمل الخير علشان ربنا يرضى عننا

تحياتى يا محمد على بوست هايل حقيقى
هبة

Bossy يقول...

السلام عليكم

بجد فكره حلوه

جزاء الله عنا كل خير

اسلوبك في تناول الايه الكريمة
جميل جدا
ربنا يباركلك يا بشمهندس

ما علينا يقول...

السلام عليكم ورحمة الله وبركاته

بارك الله فيك يا اخ محمد
وربنا يجازيك خير على اثارتك للموضوع دا
واتمنى الناس تتفاعل مع فكرتك فعلا

ويبقى عندهم يقين
انهم مجرد معبر
لوصول الاشياء دي لاصحابها

فالمال مال الله

والي لديه المال
انما هو امانة
سيحاسب على كيفية تصرفه فيها

جزيت خيرا اخي الكريم

شمعة أمـــــل يقول...

السلام عليكم ورحمه الله وبركاته
جزاك الله خيرا على الفكره دى واتمنى انا نبدا فعلا فى تنفيذها لان الفقراء دول من حقهم يعيشوا زينا
تحياتى

محض روح يقول...

جميل اوي الفكره
اكيد نفسهم في حجات كتير بعيده عن ايدهم

بس ليه تعليق عن شنطه الرز والمكرونه

يمكن المشكله بتكون في العدد عايز تدي لاكبر عدد ممكن
فعلشان كده محتويتها كتير بتكون بسيطه
ويمكن البسيط عندنا كبير اوي عندهم

بس في المجمل
معاك جدا في الصدقه المغلفه
بحترام

ربنا معاك
وحمدالله على السلامه

خمسة فضفضة يقول...

السلام عليكم ورحمة الله وبركاته

لا فض فوك يا باشمهندس

جزاك الله خير


تحياتي لافكارك المبدعه

mohand يقول...

السلام عليكم

اللهم اجعل عملنا خالصاً لوجهك ولا تجعل لأحد فيه نصيبا
اللهم اجعل عملنا خالصاً لوجهك ولا تجعل لأحد فيه نصيبا
اللهم اجعل عملنا خالصاً لوجهك ولا تجعل لأحد فيه نصيبا
اللهم اجعل عملنا خالصاً لوجهك ولا تجعل لأحد فيه نصيبا

حلو قوي الدعاء

ان شاء الله هعمل

Hannoda يقول...

بجد
أنا حاسة بإمتنان كبير جدا لتوجيه نظري للمكان ده

يمكن إنت من غير ما تقصد حطّيتلي خطة أمشي بيها في أجازتي السنة ده.. وخصوصا إنها جاية مع دخول رمضان

تصدق أنا مكسوفة من ربنا قوي
قوي

بجد شكرا

BinO يقول...

السلام عليكم ورحمة الله وبركاته
بجد كلامك قطعني
صح بنسبة كبيرة
والمعادلة صعبة جداً جداً
مابين الأنفاق من طيبات الرزق
ونفع أكبر عدد من المستفيدين
معادلة صعبة أطعام الجوعي أيام اللي مش لاقين فعلاً لقمة
ولا أسعادهم يوم واحد بحاجة جديدة
معادلة صعبة
بس الدعوة محمودة
جزامك الله خيراً
وأثابكم

Seren يقول...

السلام عليكم

ازيك يا محمد؟ عامل ايه
اتمنى تكون بخير

الموضوع اللى انت طرحته حلو اوى وتذكره كويسة "فى غير رمضان" بما انه الشهر الوحيد اللى بتكتر فيه الخيرات

بالنسبة لنوعية الاكل كنت فى جمعيه من الجمعيات الخيرية وكنا بنوزع شنط اكل للمحتاجين وكانت الشنط بجد بتتملى بافخر انواع الاكل وبكل ما تتوقع لحد الشاى كان موجود وبجد لو شفت نشاط وهمة المجموعة اللى كانت موجودة كنت قلت "الخير فى امتى الى يوم القيامة" زى ما قال سيد الخلق اجمعين

يمكن المشكلة زى ما قلت من شوية ان ده كله والخير والتنوع ده بيكون فى رمضان يعنى شهر واحد فى السنه وبردوا بيكون الحماس والرغبة فى المشاركة بردوا فى الشهر ده بس

دعوتك حلوة اوى واتمنى الكل ينفذها وانا اولهم

اللهم اكفنا بحلالك عن حرامك واغننى بفضلك عمن سواك

تحياتى
Seren

تائهة فى أرض الأحلام يقول...

بجد فكرتك حلوة واحساس جميل يدل على التكافل
بس أنا عايزة أقولك على حاجة
انا فى مرة لاقيت واحد غلبان صعب عليا وانا كنت داخلة أشترى لحمة من عند الجزار
فطلعت فى دماغى اشترى له لحمة وفعلا عملت كدة واديتها له
فراح قالى أنا مش محتاج لحمة انا محتاج علاج لمراتى العيانة ومش عارف اجيب لها الدواء

بالنسبة للجاتوه والحاجات ديه بالنسبة لهم رفاهية شديدة لو انت جبتها لهم وهما مثلا مش عارفين يدفعوا ايجار البيت او مصاريف مدرسة أكيد ضميرك هايوجعك وهاتندم انك مابصتش للأولويات

بالنسبة بقى للأغنياء من التعفف بجد الواحد نفسه يلاقيهم لانهم تاهوا وسط مجموعة من المتسولين وماحدش عارف يوصلهم بالذات لان حصل فجوة كبيرة مابين الاغنياء والفقراء فى السكن
فهناك مناطق كاملة للاغنياء غير مناطق الفقراء
فمثلا ماحدش بقى يلاقى جيران محتاجين فالبواب عندنا فى مصر الجديدة أغنى منا
تحياتى لك

gohayna يقول...

عارف اني بجد زعلت من نفسي جدا

انا الحمد لله بحاول اعمل حاجه عشان مش بس اسعدهم بيها لا دي بتكون سسعاده ليا انا شخصيا

بحس براحه كبيره بشكل ما تتخيلوش

لما كنت في مصر كان فيه جمعيه رساله الخيريه

وكانت لبها نشاطات كتير جدا

وكنت دايما اشترك فيهم

صدقني مهما صرفت ومهما جيبت ومهما عملت كل دا ميوازيش ضحه ونظره امتنان من عين الي قدامك

وخجلك وهروبك منهم عشان تبقي عايز العمل كله خالصلوجه الله
وخوفك ان يكون فيه جزء عشان الناس تشوفك

دايما بتكون الحرب بالشكل دا يا محمد

بجد تسلم ايدك والله
وربنا يجعله في ميزان حسناتك كلها

طبعا انا فاتني كتير جدا من المواضيع الشخنه الي تحت

بس انا شوفتهم كلهم وعلقت عليهم كمان

صحيح متاخر بس معلش اعذزرني والله غصب عني يا محمد


يارب متكون زعلان مني

لما ترجع طمني عليك يا محمد

ترجع بالف سلامه ان شاء الله

تحياتي

الراقـــص مع الذئـــــاب يقول...

السلام عليكم
جزا الله خيرا كل الاخوة وجعل الله اعمالهم في ميزان حسناتهم
واعتزر للجميع عن عدم التعليق والمناقشة في الموضوع الان
أسألكم الدعاء بأن يفرج الله همي وكربي
فأنا في وقت احتاج فيها لدعاء اخوة احبهم في الله

جزاكم الله خيرا

Doba يقول...

عندى تاج تعالو جاوبو عليه - يلا بسرعة قبل مأى حد يسبقكم

مستنياكم
هبة

رينـــــــــــا يقول...

السلام عليكم
محمد مالك يابنى لعلك بخير ان شاء الله
انا داخله والله اشوفك رجعت والا لا
الاقى انك كاتب مضايق
لالالالا يا بشمهندس
ضيق ايه وكرب ايه ان شاء الله لعله خير
شكلك عايز تهرب انك تحكيلى قصه لعله خير؟؟
لا مفيش الكلام دا
وبعدين انا اتعودت منك انك قوى ومفيش حاجة بضايقك بسهوله
وبعدين كدا تيجى ولا حس ولا خبر
ونعرف قدرا انك هنا اجازة
محمد انا عايزة ادخل البلوج كمان شويه
الاقيك مطمنا
وانك تمام وزى الفل ومفيش حاجة تزعل حضرة الظابط البشمهندس الكبير اوى

انا هعمل ريفريش واشوف بوست جديد او على الاقل حتى ترد علينا

وبعدين دا انا مستنيه انك تواسينى اجى الاقيك زعلان
لا ياعم مينفعش الكلام دا خالص

يارب يفرج كربك ويقف جنبك

اختك رينا

حقوق الضباط الإحتياط يقول...

باذن الله اللى انت فيه ده هيعدى وهيبقى حاجة بسيييييطة قوى من اللى بنشوفها فى حياتنا, وخاصه واحد زيك, وبعدين يا اخى مش هييجى جنب اللى صيام بيعملوا حاجة, صح ولا غلط؟؟
ان شاء الله خير يا دانسر بيك روق كده ومستنيك تكلمنى

همسات دافئه يقول...

محمد
سهرت أعين ونامت عيون
فى أمور تكون أو لا تكون
فدع الأمر مع استطعت
فحملانك الهموم جنون
ان ربا كفاك ما كان بالأمس
سيكفيك فى غد ما سيكون

ربنا يفك كربك يارب بس بجد هازعل قوى لو مشيت من غير ما تسبلنا بوست وتطمنا عليك
سلام ياغالى

ابن رشد يقول...

جعلت نفسي تعنفني

šσяšαяαα يقول...

السلام عليكم ورحمة الله

ايه ياباشمهندس مالك... والله قلقتنى بجد..ربنا يفك كربك ويطمنا عليك

هو انا حظى كدا دايما.. دانا حتى فرحانة انى رجعت لمدونتى تانى وقلت بقى ادخل اسلم عليكم..حتى بعتلك ايميل رغيت فيه اد كدا بدل مااخلصلك صفحه التعليقات..معرفش والله انه فى حاجة مضايقاك..لا ياسيدى احنا مش واخدين على كدا..ياللا ارجع تانى زى الاول وطمنا عليك

بالنسبة بقى لموضوعك دا

على فكرة سبحان الله انا فدماغى كام موضوع عاوزة اتكلم عنهم ومنهم موضوع التسول دا..بس الجانب التانى اللى بنشوفه فى الشوارع.. مش الناس اللى تحس فعلا انهم اغنياء من التعفف

ربنا يجزيك كل خير ويقدرك على فعل كل اللى يحبه ويرضيه

انا مش عارفه اكتب بجد لانك زعلتنى..هستناك تطمنا عليك

دمت بألف خير اخى الكريم

ما علينا يقول...

السلام عليكم ورحمة الله وبركاته

استعن بالله اخي فهو خير معين
وايا كان ما فيك فان ضيقك و اختناقك لن يغيروا شيئا
فتوجه لمفرج الكربات
وميسر كل عسير

ان شاء الله ربنا يزيل همك ويفرج كربك اخ محمد

ان شاء الله يكون تكون عسرة بعدها كل يسير

ربنا يخفف عنك ويسدد خطاك ان شاء الله

غير معرف يقول...

عجبتنى اوى الفكرة،لكن بصراحة ضحكتنى بتفسيرك لاية لن تنالو البر حتى تنفقوا مما تحبون، تفاح امريكانىههههههه
جزاك الله خيرا يهندسة

Bossy يقول...

السلام عليكم

حمد علي السلامه يا بشمهندس

ان شاء الله تكون بخير

ربنا يفرح يمحمد

تعرف انا اما ببقي متضايقه بفضل ابص علي الحاجات الحلوه اللي في حياتي وبحمد ربنا عليها ساعتها بحس ان الدنيا ابسط من كده ومش مستهله انك تزعل نفسك علي اي شئ


ضاقت ولما استحكمت حلقاتها فرجت وكنت اظنها لا تفرج
ان شاء الله تبقي كويس
وتنزل موضوع جامد من موضوعاتك الجميله

Doba يقول...

اين انت يا محمد
لعل المانع خير ان شاء الله

طمننا عليك
تحياتى ومنتظرينك وربنا يفك كربك بإذنه - إلى لقاء قريب

هبة

ما علينا يقول...

ازيك يا اخ محمد
اتمنى تكون بخير
وتكون كربتك قد فرجت
ربنا يعينك ان شاء الله

واتمنى عندما تستقر بك الامور
ان تتكرم بالمرور عندي
لك تاج عندي
منتظرك

مؤمنه يقول...

سلام عليكم أولا الموضوع كويس جدا ونفع الله بك الامه فعلا الاسلام محتاج لادينا يا جماعه ومادومنا مسلمين لازم نحس ببعض دى ايحنا اخوات فى الاسلام ورسولنا واحد خير خلق الله لازم نعتز ببعض
الصحابه كانوا لا يرضون ان يتمتعوا فى نعمه وهم يعلمون ان اخواتهم محرومين منها وفيها أيه فى القرأن بتقول (محمد والذين أمنوا معه أشداء على الكفار رحماء بينهم )لازم نحس ببض ونساعد بعض ان ما حسناش ببعض مين هيحس بينا ونحمد ربنا جميعا على نعمة الاسلام الى ربنا منحهالنا ونحافظ عليه
وعايزه اول فى الاخر _ما نقص مال من صدقه ) بالعكس ربنا بيتناولها بيده اليمين وكل يد الله يمين وينميها لنا ويزودهالنا
فأنا كنت عايزه أقترح اقتراح ايحنا كمدونين بحس ان ايحنا أسره فيها ايه لما نعمل جميعيه خيريه نجمع فيها تبرعاتنا لاخواتنا المسلمين وفيه ايه بتقول (للفقراء اللذين أحصروا فى سبيل الله لا يستطيعون ضربا فى الارض يحبهم الجاهل أغنياء من التعفف تعرفهم بسيماهم لا يسألون الناس الحافا وما تنفقوا من خير فان الله به عليم ) سورة البقره الجزء الثالث
وجزاكم الله خير ونفع بكم الامه

الراقـــص مع الذئـــــاب يقول...

السلام عليكم ورحمة الله وبركاته
بداية اعتزر للأخوة الكرام علي عدم إستطاعتي ومقدرتي علي مناقشة الموضوع في الاجازة السابقة لبعض الظروف
واشكر الجميع علي سؤالهم عني واهتمامهم بي
حقا قدر رزقني الله باخوة اتشرف بمعرفتهم واتشرف بدخولهم مدونتي وبتركهم بصمة جميلة ما هي الا وسام علي صدري
اعزكم الله احبتي في الله
ولنبدأ معاً

الراقـــص مع الذئـــــاب يقول...

الاخت رينا
وعليكم السلام ورحمة الله وبركاته
جزانا الله واياكي خيرا يا رينا
وفكرة الجمعية اللي انتي كنتي فيها جميلة وهي فعلا صل الموضوع
لما بقي موضوع ان نفس اي واحد تبقي ضعيفة وانه يتجه اتجاه غلط ليشبع رغبته من الحاجة ديه فدي انا مش معاكي فيها
وممكن لو في احتمال ان حاجة زي كدا تحصل فالعيب هيكون مننا احنا
عشان احنا لازم نستمر في الموضوع دا ...مش مجرد اننا نعمله مرة واحدة وخلاص

جزاكي الله خيرا للسؤال عني يا اختي الكريمة
وقصة لعله خير هاجي اقولهالك في ردي علي اخر موضوع ليكي

سلام يا رينا
---------------------------
السلام عليكم
الاخت رفقة
فكرة الشنطة جميلة جدا وجزاكم الله خير عليها
وبالفعل الناس ماشاء الله مهتمة بالموضوع دا بشكل جميل اوي
وفكرة ان يوم الخميس او اي يوم في الاسبوع يكون متحدد باللحوم والطيور دي برضو فكرة جميلة
جعلها الله في ميزان حسناتك
جزانا الله واياك خيرا واسعدني جدا مروروك واشتراكك في الموضوع يا رفقة

----------------------------------
شيماء - واحدة من الناس
وعليكم السلام
جزاكي الله خيرا علي تزكيرك لينا بالسيدة عائشة رضي الله عنها في تحسين وتزيين الصدقة
وإن شاء الله اجي والحق اعلق علي كل اللي فاتني عندك
دمتي في خير اختي الكريمة

الراقـــص مع الذئـــــاب يقول...

هبة- doba
كلامك في حقي يخجلني ويعطيني قدر اكبر من قدري يا اختي الكريمة
واجمل شئ في كلامك وما يسعدني حقا هو دعاءك لأحب شخصين ليا وهما ابويا وامي
جزاكي الله خيرا ورزقك حسن البلاء في تربية يوسف

وإن شاء الله ربنا يعز به الاسلام ويجعله معصوم كنبي الله يوسف عليه السلام

اللهم اجعلني احسن مما يظنون واغفر لي ما لا يعلمون

اما بالنسبة لموضوع البوست فكانت الفكرة نسبية
ممكن كيس شبسي في ايد طفل فقير تقضي الغرض

جزاكي الله خيرا مرة تانية يا ام يوسف علي كلامك الجميل
---------------------------------
بوسي
وعليكم السلام ورحمة الله وبركاته
جزانا الله واياكم خيرا يا اختي الكريمة
ربنا ينفعنا بما نقول ويجعلنا من الذين يامرون الناس بالبر ويأمرون انفسهم
ولا يجعلنا من الذين يأمرون الناس بالبر وينسون انفسهم
----------------------------------
الاخت ماعلينا
وعليكم السلام ورحمة الله وبركاته
جزانا الله واياكي خيرا
وانا كمان بتمني ان كل الناس تحس بإن القير انسان قد ابتلاه الله بالفقر كما ابتلي غيره بالمال
والمال مال الله وصاحبه مأتمن عليه
اسعدني جدا مرورك الكريم وسؤالك عني
وإن شاء الله اجي اخد التاج

الراقـــص مع الذئـــــاب يقول...

شمعة امل
وعليكم السلام ورحمة الله وبركاته
اولا اسعدني جدا زيارتك الجميل يا صاحبة الاسم الجميل
وجزانا الله واياكي خير الجزاء
دمتي في خير واتمني دوام زيارتك الكريمة
----------------------------------
محض روح

كيف حالك يا اختي الكريمة
لعلك بخير
اما بقي شنطة الرز والمكرونة فدي شئ اساسي علينا وغجباري كمان
ولازم نعملها علي قدر الامكان وفعلا نستغل اكبر عدد ممكن
اما موضوعنا الفرعي فهو شئ بجانب هذه الشنطة ومش لازم يبقي كل مرة
بس المهم يبقي موجود وخلاص
وزي ما قلت قبل كدا لو شوكلاته او ايس كريم او اي حاجة تسعد بيها طفل الفقير

جزاكي الله خيرا علي مرورك الكريم
---------------------------------
دكتورتنا الكبيرة (بس مش في السن) خمسة فضفضة
وعليكم السلام ورحمة الله وبركاته
جزاكي الله خيرا علي مرورك الكريم
وتحياتي لكي

الراقـــص مع الذئـــــاب يقول...

مهند حبيب قلبي
وعليكم السلام ورحمة الله وبركاته

اللهم اجعل عملنا خالصاً لوجهك ولا تجعل لأحد فيه نصيبا

فعلا يا مهند....مجرد شعرة تفصل ما بين الاخلاص والنفاق
الللهم نجنا ونقي عملنا من الشرك

جزاك الله خيرا علي المرور اخي الكريم

-----------------------------------
Hannoda
انا اللي ليا الشرف انك بتدخلي مدونتي يا هنودة
وربنا يبلغنا رمضان ويتقبل منا صالح الاعمال إن شاء الله
----------------------------------
بينو
وعليكم السلام ورحمة الله وبركاته
المعادلة صعبة صح يا بينو
بس بتوفيق الله عز وجل تقدر تحلها
وبدل ما نقلل عدد المستفدين...نزود في الانفاق بقدر يسير ونضيف حاجة تسعد الفقير
ما قل مال من صدقة

جزانا الله واياك خيرا اخي الكريم

الراقـــص مع الذئـــــاب يقول...

سيرين
وعليكم السلام ورحمة الله وبركاته
الحمد لله يا سيرين انا في خير حال
فعلا الفكرة لازم تتعمم علي طول ايام السنة وليس في رمضان فقط
ربنا يعينك ويجعل عملك في ميزان حسناتك

اللهم اكفنا بحلالك عن حرامك واغننى بفضلك عمن سواك

جزاكي الله خيرا علي مرورك الكريم

--------------------------------
تائهة في ارض الاحلام

جزاكي الله خيرا علي كلامك الجميل
اما بقي بالسبة للموضوع
انا قلت اننا نجيب الحاجة ديه بجانب الحجات الاساسية
فعلا مش معقول اني اجيب جاتوه وهو مش عارف يدفع ايجار البيت
الحجات ديه ثانوية
يعني مش هتبقي شئ اساسي
بس اللي احنا عاوزينه انها تبقي موجودة وخلاص
مش لازم يتفرج عليها من بعيد عشان هو مش عارف يدفع ايجار البيت

اما بالنسبة للأغنياء بالتعفف فهتلاقيهم لو بذلتي مجهود صغير اوي
او لو عملتي شئ اسمه تحري خروج الصدقة
يعني تتاكدي من وصول صدقتك لمن يستحقها
وسعتها هتبقي حاجة جميلة اوي
الفقير مش بواب او جنيني
ولا الراجل اللي قاعد في الشارع ماسك روشتات
ممكن فعلا يكون فيهم فقراء
بس لو حاولتي تروحي مثلا معهد الاورام او اي وحدة غسيل فشل كلوي هتلاقي الفقير المتعفف يا اختي الكريمة
بس شوية مجهود صغيرين
وجزاكي الله خيرا علي مرورك الكريم وتحياتي لكي
--------------------------------
دكتورة جهينة

والله زمان يا دكتورة
دا انا قلت انك نسيتي السكة وتهتي عن المدونة
لازم يا جهينة نزعل كلنا من نفسنا
عشان مهما عملنا برضو مقصرين
المهم بس اننا نرجع ونعمل تاني اكتر من اللي كنا بنعمله
واتمني انك ترجعي مصر بالسلامة ويجعل ايامك في الغربة كلها خير
وانا يا ستي مش زعلان منك ولا حاجة ولا ممكن ازعل ابدا
انتي ناسية انك انتي صاحبة المدونة ومن غيرك كانت اتقفلت ومتفتحتش تاني
وفضل الزرع اللي فيها لسا اخضر والورد مدبلش

جزاكي الله خيرا واسعدني جدا رجوعك الي مدونتك
دمتي في خير اختي الكريمة

الراقـــص مع الذئـــــاب يقول...

رينا
ايهاب
شيماء
ماعلينا
سارة
بوسي

جزاكم الله خيرا جميعا علي الاهتمام والسؤالي عني
ولله الحمد رب السموات مرت الضائقة بسلام
او إن صح القول
اعتدت علي صعوبة الامر وكلما مر الوقت اشتدت الصلابة

لله الحمد في الاولي والاخرة
مرة تانية جزاكم الله خيرا اخواني واخواتي في الله علي الاهتمام والسؤال عني

الراقـــص مع الذئـــــاب يقول...

شمس
يجب ان تعنفنا انفسنا جميعا
اسعدني جدا اول زيارة لمدونتي واتمني تكرارها

--------------------------------
سارة
وعليكم السلام ورحمة الله وبركاته
اخييييييييييييييييرااااااااااا
اخيرا رضيتي عننا ورجعتي تكتبي تاني
دا انا في حلم والا في علم
حمد الله علي السلامة يا سارة
نورتينا تاني
ومش عاوزينها تتكرر
لحسن مش هقولك هعمل ايه

ربنا ينفعنا جميعا بالموضوع ويجعله في ميزان حسناتنا
اسعتدني وعودتك واسعدني مرورك اختي الكريمة
دمتي في خير

----------------------------------
مؤمنة
وعليكم السلام ورحمة الله وبركاته
جزاكي الله خيرا علي مرورك الكريم
وكلامك افادنا جميعا وإستشهادك بأيات الله عز وجل ...جعل الله اعمالنا في ميزان حسناتنا
اما بخصوص الفكرة بتاعتك فهي بالفعل فكرة جميلة جدا واتنمي اني اشوفها قيد التنفيذ وإن كانت هي صعبة شوية
بس انا اول واحد معاكي في اي حاجة والناس كلها هتلاقيهم معاكي ومحدش هيقصر في شئ ابدا ...ولله الحمد اخوة واخوات علي قدر من الاحترام يحسدنا الناس عليهم

جزاكي الله خيرا علي زيارتك الكريمة واتمني تكرارها

gohayna يقول...

محمد
حمدلله علي سلامتك

انت رجعت امتي يا حج؟

ويارب تكون احسن المره دي ونفسيتك كويسه وعال العال يا محمد

طمني عليك

Hadota ... حدوتة يقول...

السلام عليكم
انا عارفة ان تعليقى جاى متأخر شويه
بس البوست جميل ويستاهل كل تحية
اولا الاسلوب والطريقة والاحساس العالى اللى فى الكلام

ثانيا جزاك الله كل خير عنهم وعنا

كلامك صح وياما فكرت فيه
ازاى اننا نسعد مسلم
انت متخيل قد ايه دى حاجة حلوة انك تزرع بسمة فى قلب اخوك المسلم
الموضوى بيبتدى من اول الكلمة الحسنة والمعاملة الطيبة لغاية الاحسان والتواصل معاهم باى حاجة تسعدهم


حبيت انبه على نقطة ان فيه ايه تدعونا اننا لا نتيمم الخبيث عشان ننفق منه

يعنى ساعات واحد يقولك ادى الاكل دا لجارنا المسكين اصله هيبوظ

ولا الواحد يقولك الفلوس دى مقطعة وكده كده مش هتتصرف اديها لواحد غلبان احسن


طبعا المفروض الواحد ينفق من احسن حاجة عنده واللى بيطعم منها اهله واولاده

تحياتى ليك
وننتظر المزيد من البوستات الحلوة

غير معرف يقول...

محمد
نفسى تشترى قماش ونعمله أخمره وأنقبه
ماتتصورش الدنيا هيسودها الأيمان والدين بتاعنا هيرتفع فى سماء مصر بالنقاب والخمار يامحمد
متتصورش لما باشوف واحده بدون نقاب بادعيلها أن ربنا يرضى عليها ويوم القيامه تدخل الجنه عن طريق نقابها
أدعى ويايا وأخواتى يارب

Doba يقول...

قفشتك

لقيتك علقت عندى قلت اقفشك واقلك فينك يا استاذ انت يا غايب

كل ده مختفى من عالساحة - ايه الدنيا كحل ومش عارفيين ندخل - ولعلك لمبة ولا شمعة ولا حاجة

يااااااااه - الحق فيه عنكبوت هنا
يلا يلا هوى الشقة - اقصد المدونة بسرعة بحاجة جديدة

سلالالالالالالالاموز مستنياك
هبة