تاج العيد الكبير

السلام عليكم

دا يا جماعة تاج من الاخت رفقة جزاها الله خيرا عيدية العيد بقي
-------------------------------------------------------
ماهى سورتك فى القران(اى احب سوره اليك تقرأها فى فرحك وفى حزنك)؟

كل سور القران محببة الي قلبي ولكني هناك سور احس ان الله قد زينها كما فضل بعض الايات علي بعض مثل سورة آل عمران وسورة الاعراف وسورة إبراهيم وسورة يوسف....من الاخر ال 114 سورة

ماهى احب ايه اليك الايه التى دائما تتمناها؟

قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ

ماهى اكثر ايه تخاف منها وتدعو الله الا تكون من اصحابها؟

قُلْ هَلْ نُنَبِّئُكُمْ بِالأَخْسَرِينَ أَعْمَالا * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا

ماهى الايه التى تشعر انها تتكلم عنك؟

وَآخَرُونَ اعْتَرَفُوا بِذُنُوبِهِمْ خَلَطُوا عَمَلا صَالِحًا وَآخَرَ سَيِّئًا عَسَى اللَّهُ أَنْ يَتُوبَ عَلَيْهِمْ إِنَّ اللَّهَ غَفُورٌ رَحِيمٌ

من احب صحابى واحب صحابيه ؟

احب الصحابة بترتيب مكانتهم

ابو بكر الصديق

عمر الفاروق

عثمان ذو النورين

علي الامام كرم الله وجهه

واحب كل من يحبهم الرسول صلي الله عليه وسلم

ولكن إذا كان هناك شخص اتمني ان اكون في مثل شخصيته فسيكون سيدنا عمر رضي الله عنه حتي اني رأيته يوماً في منامي وانا أسقيه لبن....
أحب صحابيه كلهن...وإن كانت اسماء بنت ابي بكر و نسيبة

من احب نبى اليك بعد الحبيب صلى الله عليه وسلم؟

اولي العزم من الرسل

كل نبي ورسول له مكانة في قلبي

اللهم اجمعني والمسلمين بهم في الجنة

اذا كنت على عهد رسول الله صلى الله صلى الله عليه وسلم فمن كنت تحب ان تكون ولماذا؟

عمر بن الخطاب رضي الله عن لأن يوم إسلامه كان يوم الجهر بالاسلام وبداية ظهوره

ماهو منتداك وموقعك المفضل؟

مليش حاجة ثابتة

ماهى احب الاسماء التى تحب ان تنادى بها؟

ابو صابر

من هو كاتبك المفضل؟

اي كاتب غير مأجور او من ذوي الاقلام القذرة

مدون له فضل عليك واستفدت منه؟

اي مدون محترم بيجبرني إني اداوم علي دخول مدونته

من هو قارئ القران المفضل لك؟

الشيخ عبد الباسط والحصري...والشيخان عبد الرحمن السديس وسعود الشريم

ماهو منشدك المفضل؟

مشاري في اناشيد معينة

ماهو نشيدك المفضل؟

ليس الغريب

اذا كان لك دعوه تتدعوه وستتحق باذن الله فبماذا تتدعو؟

احشرني والمسلمين في زمرة نبيك محمد صلي الله عليه وسلم وأدخلنا الجنة بلا حساب أو عتاب

ماهو الداعيه المفضل لديك او شيخك المفضل؟

فضيلة الشيخ محمد حسين يعقوب وفضيلة الشيخ محمد حسان وفضيلة الشيخ مسعد انور وفضيلة الشيخ محمود المصري جزاهم الله خيرا عني وعن المسلمين

ماهى اكثر عبادة تشعرك انك قريب جدا من الله؟

اي عبادة لها وسيلة معينة في القرب من الله عز وجل فلو استشعرنا عظمة الوقوف بين يدي الله عز وجل في الصلاة لما شبعنا منها ...ولو استشعرنا عظمة القران لما قرأنا غيره ولو استشعرنا حلاوة القرب والمناجاة في الدعاء لما جف لسانك من الدعاء ولو علم كل من في الارض ما هي عظمة الاستغفار لما وجدتم احد علي وجه الارض يتركه قط

من احب افراد عائلتك اليك؟

كلهم

ماهو املك فى الحياه؟

إن يقبضني الله عز وجل اليه وهو راضٍ عني

----------------------------------------

واخيراً بمرر التاج لكل اللي عاوزه

تهنئة

السلام عليكم

الله اكبر الله اكبر الله اكبر....لا اله الا الله والله اكبر...الله اكبر ولله الحمد

تهنئة طيبة عطرة لجميع المدونين خاصة...وللمسلمين عامة

وإن شاء الله السنة اللي جاية تكونوا كلكم علي عرفات وتدعولي ان ربنا ييسرلي زيارة بيته الحرام

تقبل الله منّا ومنكم صالح الاعمال إن شاء الله

.

.

.

وسبوني بقي عشان الفتة واللحمة الضاني بتناديني

كلمات من ذهب -1

السلام عليكم ورحمة الله وبركاته

كيف حالكم اخواني واخواتي الكرام

بعتزر للجميع مرة تانية عن غيابي الطويل وبشكر كل الناس الي سألوا عليا سواء في المدونة أو علي الميل

جزاكم الله خيرا جميعاً

نرجع تاني زي زمان (هو مش زمان اوي يعني) وندردش مع بعض

والله وحشتني الدردشة معاكم

من فترة كان في ندوة عندنا في كلية ضباط الاحتياط مع أحد أبطال حرب اكتوبر والبطل دا قال جملة علقت معايا أوي

الراحة لا تصنع القادة

وعاوز أقول حاجة بسيطة بس لازم نزكرها مدام جبنا سيرة اكتوبر وبعدين نرجع نكمل كلمنا عن الجملة اللي سبب فتح هذا الموضوع

في إتجاه ظهر في السنين الاخيرة وفي هذه الايام لتهميش حرب اكتوبر

أو بمعني أصح لتشويه التاريخ

زي ما بيحصل ديماً معانا

نقرأ التاريخ من كتب الأعداء ونصدقه.....وننسي التاريخ بتعنا

أقلام قذرة مأجورة بتحاول إنها تشوه الحرب اللي كسرت أنف اليهود وأمريكا وكل دولة معادية

الحرب اللي راح فيها حجات كتيرة غالية عشان حجات أغلي ترجع

مش شعارات ولا خطب رنانة

لما تقعد مع أحد القادة اللي كانوا في وسط الحرب ديه وتسمع كلامهم وتعرف حكيات زي الخيال هتحب الناس دي أوي...وهتحب الحرب ديه أوي

ومش هتبطل تتكلم عنها

سيبك من الافلام والمسلسلات والحوارات ديه

أقعد مع ناس شافت بعنيها معجزات من الله عز وجل في حرب كانت بتترج فيها الأرض بكلمة الله اكبر

لا والله...أبدا لم تكن حرب اكتوبر كذبة كما قال أحد الكتاب الماجورين

حرب أكتوبر أكتر حاجة حقيقية في حيتنا....ليك إنك تعتز بيها أوي وتفخر بيها طول حياتك وتعلنها لأولادك وولاد ولادك

في الدراسة الأكادمية عندنا في الكلية مفيش محاضر يدخل في أي مادة غير لازم يتكلم إحنا في اكتوبر عملنا ايه

وازي كان التمهيد للحرب...وازاي قدرنا نقنع كل العالم بحاجة ونعمل عكسها...وإزاي استخدمنا اقل الامكانيات المتاحة في مواجهة اكبر واحدث الامكانيات

وفوق كل دا رحمة وكرم الله عز وجل بينا ثم رجولة الناس اللي كانت شايلة السلاح...اللي كانت بتتسابق علي الشهادة....لغاية ما رفعوا راسنا لفوق اوي.....

نحسبهم علي خيرا جميعا إذا كانوا احياء وشهداء إذا توفاهم الله عز وجل

معلش.....والله كنت عاوز اكتب كتير اوي عن اللي سمعتو من القادة الابطال واحكلكم علي حجات جميلة اوي هما حكوها ...بس عشان مطولش عليكم هندخل في الموضوع

الراحة لا تصنع القادة

خرجت هذه الكلمات زي ما قلتلكم من قائد بطل

بس تعالوا نشوف معانيها ونطبقها علي حيتنا كلها....مش لازم تكون جملة في العسكرية

مفيش إنسان في حيتنا معندوش مشاكل

اقعد مع أي حد في الدنيا هتلاقيه بيشتكي....وبعد ما يشتكي يقول الحمد لله انا صابر وراضي باللي كتبه ربنا

يعني يقعد ينوح ويعيط ومش ناقص غير إنه ينام ويرفص في الارض ويصرخ وفي الاخر يقول إنه صابر علي اللي هو فيه وجامد أوي ومش بيهمه اي حاجة.....طبعاً عدم مصداقية وقول غير الفعل

وتلاقي مثلاً مشكلته انه مش عارف يغير عربيته...أو الموبيل بتاعه بيسقط شبكه...مشكلة هايفة كدا من المشاكل اللي تجبلك الحصبة أو شلل الاطفال من الغيظ وانت بتسمعها

تلاقي معظم الشباب اللي عندنا بينعي حظه ويفضل يشتم في البلد وفي الحكومة وفي رئيس الورزاء ويشتم كمان في السد العالي

هو السد العالي ذنبه ايه؟؟انا مش فاهم

حياته كلها سخط في سخط...مش عجابة أي حاجة...ينزل الصبح..إذا كان بيشتغل في أي مكان حلو والا وحش واياً كان مرتبه تلاقي سيناريو واحد

يرجع يقعد علي القهوة....مبسم حجر الشيشة التفاح بين شفتيه...وأي مشروب ساخن في الشتاء او مثلج في الصيف

وشغال نفس الكلام بتاع كل يوم

بالعامية كدا والبلدي بتاع العشوائيات والمناطق الشعبية بنقول عليه مأنتخ

هيعيش وهيموت كدا...هايف...مش هيمشي خطوة لأقدام

عارفين ليه؟

عشان هو مش تعبان ومش عاوز يتعب

مش عاوز يفكر انه يرتقي بنفسه ووقته اللي بيضيعه دا في حجات كتيرة ممكن يعملها ترفع من قدره في المجتمع

ممكن يفشل مرة واتنين وعشرة...بس الفشل دا من وجهة نظرنا الضيقة بنعتبره فشل

مع ان أي فشل بيمر به الانسان بيبقي جواه نجاه مستتر...نجاح خفي هو مش واخد باله منه

نجاح الخبرة والتجربة

في جملة شهيرة بتردد امامنا علي طول

كلمة يكفيني شرف المحاولة

مجرد انك تحاول بس دا شرف

لو قرات في سيرة الزعماء والقادة وتعرفوا بدايتهم هتلاقوهم تعبوا أوي وفشلوا كتير عشان ينجحوا في الاخر

طيب تعالوا نرجع للأصل بتعنا ونشوف قدوتنا كلنا...رسول الله صلي الله عليه وسلم

من بداية طفولته كان بيمر بأقسي الظروف واشدها تعب ومرارة...عشان يقود خير الامم...واكبرها

وازي صبر وواجه اللي حصل لغاية ما وصل الدين لينا

اللهم صلي وسلم وبارك علي اشرف الخلق اجمعين

شوفوا قدوتكم اتعلم القيادة ازاي ..دي امثلة جعلها الله عز وجل في خير البشر عشان نتعلم...مش قصص في كتب السيرة

تعالوا شوفوا الصحابة كلهم حياتهم كانت ازاي

عشان كدا هما عرفوا يكونوا قادة امم من بعد ما كانوا رعاة غنم في خلال عقود قليلة من الزمن

كان ينقصهم الاسلام اللي يرتب التجهيزات اللي طبيعتهم وبيئتهم جهزتهم بيها

احنا جلنا الاسلام علي طبق من ذهب...وصلنا علي اجساد هؤلاء الرجال...

متعبناش عشانه ابدا

تلاقي الناس مستخسرة إنها تصوم النهار أو تقوم الليل في ايام العمل الصالح أحب اللي الله فيها

تلاقي كسل وتخاذل وسلبية غريبة ....وكلام من غير فعل

يا جماعة الراحة لا تصنع القادة ابدا

لازم تندمج في الحياة وصعوبتها...ومتزعلش من أي موقف صعب تتعرضله مهما كان

في ناس ممكن تكون بتمر بأزمات ومشاكل صعبة بجد...بس أقسملكم بالله بيخرجوا منها أقوي من الأول

عضمهم بسنشف وبيتخربشوا .....بيبقوا ناس يُعتمد عليها بمعني الكلمة

أوعي تزعل أو تسخط من أي صعوبة في حياتك

الناصح اللي يعرف يطلع منها الفايدة ليه.....ويتعلم من أي موقف هو فيه

ويمكن دي من الفوايد اللي اتعلمنها في الجيش..حياة قاسية بكل ما تحتويه الكلمة من معاني...قد لا يتحملها بشر

الكلام دا كان في البداية...دلوقتي ولله الحمد بقت نفس الظروف القاسية بتمر علينا بكل بساطة ومن غير أي مشاكل....في فترة قليلة جدا اتعلمنا ازاي نواجه ونعدي...وازي منرجعش لورا

مش في الجيش بس الكلام دا

لو ليك زميل او صديق او حد تعرفه مر بأي فترة صعبة في حياته وقدر يتحملها من غير انهزامية أو ضعف هتعرف معني الكلام دا

بجد مش عارف أوضح معني الجملة اكتر من كدا

بس لو قعدنا نفكر فيها هنخرج بحجات كتيرة أوي وتتغير نظرتنا للحياة تماماً

ياريت الجملة ديه تأثر فيكم زي ما أثرت فيا

وإن شاء الله دي هتبقي سلسلة مواضيع جديدة تحت هذا العنوان

كلمات من ذهب

اعتزر للجميع عن طول الموضوع وكل عام وانتم بخير ورزقكم الله العمل الصالح في هذه الايام المباركة

الله اكبر الله اكبر الله اكبر....لا اله الا الله والله اكبر...الله اكبر ولله الحمد

شكر وإعتزار

السلام عليكم ورحنة الله وبركاته

اخواني وأخواتي الكرام

اعتزر لكم جميعا عن طول فترة إنقطاعي عن مدونتي وزيارة مدوناتكم لأنشغالي ببعض الامور الهامة وقصر فترة أجازاتي

واشكر جميع الاخوة والاخوات علي سؤالهم الدائم عني في المدونة

وإذا شاء الله عز وجل لنا البقاء سوف اعاود التواصل معكم من خلال مواضيع جديدة

دمتم في خير وجزاكم الله خيرا

هكذا الدنيا

السلام عليكم

كيف حالكم يا إخواني وأخواتي الكرام

مرت الأيام وانقضي رمضان وأيام العيد

وهكذا حال الدنيا

دوام الحال فيها من المحال

وهذا هو موضوعي اليكم اليوم

ولكني سوف أُقلص هذا الأمر المتسع الي موضوع محدود

وهو دوام الصـــــــــــــــداقـــــــــــــــــــــة

وأسألكم سؤال

هل بالفعل دوام الصديق شئ مستحيل؟

وأن المستحيلات الثلاثة التي ثالثها الخلّ الوفي شئ مصدق به؟

عندما يبكي صديق من أجل الآمك وكأنه يشعر به معك ويتألم معك

وعندما تكون أنت صاحب المصاب وتهدئ من روع صديقك الذي يُحزنه أمرك

بالله عليكم.....هل رأيتم صديق صدوق بهذا الاخلاص

وكأني بالامام الشافعي رضي الله عنه عندما أنشد في صديقه قائلاً

مرض الحبيب فعُدته فمرضت من حزني عليه... جاء الحبيب يزورني فبرئت من نظري إليه

ما أجمل أن تفوز بمثل هذا الصديق الذي قد يستحيل وجوده

ولكن العجب كل العجب...أن تمر الأيام وتطوي ويبتعد هذا الصديق عنك وتبتعد أنت أيضاً رويدا رويدا

حتي يصبح سؤاله عنك وسؤالك عنه مجرد مجاملة أو قضاء واجب....أو من باب (أنا عملت اللي عليه وأتصلت بيه)..

حتي إذا قابلته (صدفة) أقسم له بأغلظ الأيمان أني قد حاولت مكالمته

وهو أيضا يفعل كذلك

أين هذا الخلل الذي وصل الأمر اللي هذا الوضع

أين هذا الخلل الذي يجعل أصدقاء تربطهم علاقة الأخوة لا يفكر أحدهم بتهنئة أخيه في أيام العيد

ويمر الأمر مر الكرام

في صلاة العيد هذ العام شاء الله أن نجتمع أنا ومجموعة من أصداقائي..... لم نجتمع سوياً منذ 6 أشهر تقريبا

حتي أننا كنا في غاية السعادة (المصطنعة) لوجود هذا الجمع من الاصدقاء في وقت واحد وفي مكان واحد

وكنا نفتقد الكثير منا وبدأت اسأل عن أخبار الغائبين بحسن نية

والغريب أني كلما أسأل عن أخبار فلان ولماذا لم يأتي ترتسم ابتسامة سخرية علي وجوه البعض ويقهقه الأخرون وكأني أروي نكتة سخيفة أو دعابة سمجة

حتي حوارنا مع بعضنا البعض أصبح مغلف بالدبلوماسية الباردة والمجاملات المحفوظة وكأني أعرفهم لأول مرة

ومرت الدقائق علينا كأنها سنين ومن قبل كانت تمر الايام وكانها لحظات

وبدأ العقد ينفرط ويتحجج كل واحد بأنه مشغول ويستأذن في الأنصراف ...ويودعه الأخرون بكل برود وكأن اجتماعنا أصبح حمل علي أكتافهم

لم نكن كذلك من فترة ليست بالطويلة

ومازال سؤالي إليكم...أين الخلل؟؟

بحكم وجودي في كلية عسكرية ومرافقتي لأصدقاء قد فرضتهم عليّ الظروف أصبح بيننا رباط قوي جدًا

علي الرغم من قصر فترة تواجدنا معا

ولكن صعوبة الحياة ومشقتها في هذا المكان جعلت بيننا روح جميلة وصداقة وحب وإخلاص يجعلني اشعر بالخوف علي ضياعه

نعم سوف يضيع وسوف يسقط برج الصداقة الذي هو مثل الابراج التي تبني بالرمال علي الشواطئ...ويتبقي منه أراقم تلفونات وعبارات دبلوماسية مفتعلة ومجاملات باردة

وسوف يظهر أصدقاء اخرون في مجال العمل أوي في مجال السفر أو اي مجال اخر

وتستمر هذه القاعدة في إثبات نفسها وفي التكرار اكثر من مرة وهي قاعدة دوام الحال من المحال

وسأظل أستبدل أرقام تلفوانات أصدقاء قداما بأصدقاء جدد علي حافظة هاتفي الخلوي

نعم أنا طرف في هذه الأمر ولا أنكر هذا...وأتحمل نصف الخطأ....وهو خطأ ضياع معني كلمة صداقة

ولكن الغريب أني لا أشعر بتأنيب الضمير أو الندم...ولا حتي بالأشتياق والحنين الي أيام قد تكون من أجمل أيام حياتي

حتي لا اشعر بأي نوع من أنواع العتاب تجاه أي صديق (او من كان يسمي بالصديق)....وهذا هو ما دعاني لأفتح هذه الصفحة وأبوح لكم بهذا الامر

هل هذا الامر طبيعي وهل هذه حقاً حال الدنيا

أم هل هناك خلل وأن المثالية والاخلاص والصداقة كلمات مستمرة وتدوم وليست وقتيه وتنتقل من شخص الي اخر

بل ما أريد معرفته حقاً

هل كلمة صديق كلمة حقيقية في هذا الزمن....وإن كانت كذلك فماذا تعني؟؟؟

وهل نحن أيضاً في مجتمع التدوين وما نعرفه من (أصدقاء) سوف يأتي علينا زمن يستبدل بعضنا البعص بأصدقاء جدد وننسي من كان لا ينقطع يوما عن زيارة مدوناتنا؟؟

لا أستبعد هذا الامر

وإن كان حدث بالفعل

انتطر ردودكم التي أعلمها من قبل كتابتها

دمتم في خير أخواني وأخواتي

وصايا للمدونين في رمضان

السلام عليكم ورحمة الله وبركاته

كيف حالكم يا شباب

كل عام وانتم بخير

اللهم بلغنا رمضان

أقبل الشهر الكريم من بعيد وقد بدأت نفحات الخير في الظهور

هل من مشمر لفيض النعم والرحمات؟؟؟

أحبتي في الله من اصحاب المدونات

علي مدي بضعة شهور قد اندمجت مع إخوان وأخوات في عالم التدوين...وقد قرأت مواضيع وتصفحت مدونات بأعداد هائلة...وفي بعض الأوقات كنت أضحي بالتنزه والراحة من أجل متابعة أو قراءة المواضيع المتنوعة في المدونات

لذا فقد حدث بيني وبين عالم التدوين رباط قوي يزداد صلابة من الزمن والتأصل والخبرة التي تزاد يوما بعد يوم

والأهم من هذا وذاك..هو الصحبة الصالحة والاخوة والمحبة في الله

ولذها قررت فتح هذا الموضوع لأني أحبكم في الله...وما أوده واحبه لنفسي أحبه لكم



لي عندكم عشر وصايا بخصوص التدوين في رمضان...أعلم أن كثيرا منكم لن يعجبه ولن يوافقني علي ما سوف اسرده الأن

ولكني أسأل الله ان يجعل عملنا خالصاً لوجه وان ينفعنا بما نقول



لنبدأ معا الوصايا العشر للمدونين في رمضان



الوصية الاولي



الأقلال من النت قدر الأماكن...وإن امكن التوقف عن دخول النت (الا لسبب علمي أو بحثي أو شئ ضروري ) فكل ساعة أولي بجني ثمارها...وتعالي معي أخي الكريم نحسب الوقت إذا دخلت مدونتك يوميا في رمضان



بالبلدي كدا...

لو أنت هتقضي في المدونة قراءة وكتابة وتعليقات وتصفح مدونات الغير والتعليق عندهم والنقاش مش هتقل عن 2 سعات في اليوم

يعني في الشهر يا سيدي 60 ساعة

شوف كان ممكن تختم القرآن كام مرة في ال 60 ساعة دوله

كان ممكن تصلي كام ركعة قيام ليل...كان ممكن تستغفر كام مرة ...أو تصلي علي النبي صلي الله عليه وسلم كام مرة

صحيح...هو أنتم بطلتوا تصلوا علي النبي صلي الله عليه وسلم؟؟

يبقي المدونة بتاعتك خسرتك في الشهر اد ايه؟؟؟؟

حلو الكلام؟؟



ماشي نروح علي الوصية التانية





الوصية الثانية

إن كان ولا بد من دخولك النت يومياً احسب وقت يساوي وقت مكوثك فيه وخصصه لقضاء عبادة وطاعة زيادة علي ما تفعله



يعني أنت راجل مش قادر تستغني عن النت...ولازم هتدخل تتصفح وتتفسح فيه

تمام يا عم الريس....شوف بقي هتقضي فيه كام ساعة واخصمهم من ساعات نومك أو راحتك أو خد أجازة من الشغل وأقرأ في السعات ديه ورد قران أو قيم الليل بجزء غير وردك الاصلي أو ورد المسجد (التراويح) يعني زود طاعة غير اللي انت كنت بتعمله



كلام سليم يا شباب...؟؟

أنتوا لسا صاحيين والا نمتوا؟؟



اللي لسا صاحي يسمع معانا الوصية الثالثة



الوصية الثالثة

حذف أي صورة تخدش الحياءأو تشير الي ما هو حرام...كصور الممثلين وغيرها

أخ....جينا في المواضيع الحساسة...وهي التعدي علي حرية الغير

الناس بتقول إن المدونة حرية شخصية ودي حاجة بتعتي أعمل فيها اللي أنا عاوزه واللي مش عاجبه ميدخلش

ماشي أنا مش هدخل عندك يا سيدي...وحط اللي نفسك فيه من صور وكل حاجة

بس شوف بقي كام واحد بيفتح المدونة وأنت بتشيل وزره وهو بيبص علي صورة ممثلة أو صورة اتنين بيقبلوا بعض أو غيرها من الصور اللي فعلا تخدش الحياء بكل معاني الكلمة



في حد لسا موجود وهيكمل معانا؟؟؟

طيب مش مشكلة لو في واحد والا اتنين يكملوا معايا الوصية الرابعة



الوصية الرابعة



إستبدال الخلفيات الغنائية ومقاطع الموسيقي بتلاوة قرآنية أو بدعاء أو نشيد (نشيد بدون موسيقي) أو تركها بدون أي خلفية موسيقية افضل



دي بقي بتعملي أنا شخصيا مصايب يا شباب

تكون مشغل مثلا أي
تلاوة قرأنية عندك علي الجهاز ومستمتع بقرأءة الشيخ اللي انت بتحبه...ومرة واحدة كدا لا بيك ولا عليك تلاقي تكملة الآية اغنية لفيروز

سبحان الله

تبقي هتتجنن فعلا...انتم طبعا عارفين برنامج الريل بلير بيعمل توقف مؤقت للتشغيل الحالي إذا قابل تشغيل جديد من نفس البرنامج

وممكن بقي تسمع ريمكس عجيب ما بين القرأن وأي موسيقي او اغنية

اكيد طبعا الكلام دا في رمضان او في غير رمضان بيبقي غلط يا شباب وبتبقي حاجة وحشة بجد انك تكون سبب في حاجة زي كدا



الناس كلها طفشت وسبتني

هكمل مع نفسي واقول الوصية الخامسة



الوصية الخامسة

إن حاولت إضافة موضوع جديد في مدونتك حاول ان يكون موضوع دعوي او اخلاقي يناسب الشهر الكريم وابتعد عن اي موضوع حواري يزج بك وبغيرك الي مناقشات قد ترتكب فيها ما يغضب الله عز وجل ويذل لسانك أو تخط يدك كلمة سوء فيها



طبعا اي موضوع من المواضيع الساخنة الي بتخلي الناس تدخل تضرب نار وتتكلم ويزداد اللغط...وتعبي شوال سيئات كل يوم

لا...ابعد عن المواضيع ديه....حاول انك متستفزش الناس او تخرجها عن حالة الهدوء والركود اللي هي فيها...حتي لو كان الموضوع مهم وهادف...معلش اجله شوية لبعد رمضان....احنا مش فاضيين لأي جدال او نقاش او ضياع اي ساعة بعيد عن طاعة أو عبادة في رمضان





في السريع نخش علي السادسة



الوصية السادسة



عدم التجول وإستكشاف مدونات جديدة والاكتفاء بمعرفة من تثق بهم ومعتاد علي ارتياد مدوناتهم



طبعاً...اصلك هتتفسح وتروح تزور الناس التانية مش هتخلص...وهتطلعلك بقي في رمضان مدونات جميلة ودمها خفيف زي الرز...مكنتش بتشوفها قبل رمضان

وهتنغمس فيها غمسة سودا وهتحب صاحبها اوي وانتوا الاتنين هتضيعوا بعض وهتفوق علي بعد رمضان وانت مطلتش منه غير بضع سويعات لا تغني ولا تسمن من جوع

معلش خلي رحلات الاستكشاف للمدونات الجديدة بعد رمضان...المدونات مش هتطير...بس رمضان هو اللي هيطير منك يا اكسلنس



الوصية السابعة

اختلي بنفسك وحاسبها علي ما فعلته في هذا الشئ المسمي بالمدونة...هل هو حجة لك ام عليك

يعني اقعد كدا وشوف انت كنت بتكتب في ايه قبل رمضان

نيتك ايه من اللي كنت بتكتبه

من الاخر شوف مدونتك ديه مفتاح شر عليك والا مفتاح خير...ولو ربنا سألك علي اللي كنت بتكتبوا فيها هتقول ايه ؟؟؟

متستهونوش بالكلام دا

ما يلفظ من قول الا لديه رقيب عتيد

الوصية الاخيرة

لا تنساني من صالح دعائك اخي الكريم

وادعو لي ان ييسر الله لي الطاعة في رمضان...

لو تعرفوا انتم في نعمة اد ايه وحرية انكم تقدروا تستغلوا ليل رمضان وانت بين يدي الله عز وجل من غير اي مشاكل هتلتهموا الساعات في العبادة

في الاخر بقولكم جزاكم الله خيرا ...واتمني بعد رمضان ارجع الاقيكم في أحسن الاحول إن شاء الله

اللهم سلمنا الي رمضان

وسلم الينا رمضان

وتسلم منا رمضان مقبول بإذن الله

رسالة للست عبير

السلام عليكم

ازيكم يا شباب...كل سنة وانتم طيبين...كلها ايام قليلة ويقبل علينا شهر الرحمات

اللهم بلغنا رمضان وبارك لنا في شعبان

رجاء من الاخوة والاخوات شحن بطارايات الهمم والاستعداد الجيد لأستقبال الشهر الكريم....وياريت كلنا نبعد عن النت بحلوه وبمره ونكرس الوقت ونسخره للطاعة بعيدا عن اي شئ قد يؤثر علي الاستفادة بكل دقيقة من دقائق هذا الشهر الكريم

أسأل الله الكريم أن يرزقنا النية الصالحة والعمل المقبول إن شاء الله

نبدأ بقي موضوعنا

الناهرده الصبح طبعاً الواحد قايم مفتح عينه براحته...أجازة بقي

والحاجة بتصحي فيا بقالها ساعة....يا ابني قوم تعبتني...وطبعا أنا مكسل ومش عاوز أفتح عنيا...بس أول ما جابت سيرة الفطار

تسللت هذه الكلمة الي اذني ومنها الي تلافيف المخ باحثة عن مكان مفتاح الحواس الخمسة وبسرعة البرق ضغطت كلمة الافطار علي المفتاح وبدأت شاشات العرض في العمل...

وأضاءت شاشاة عرض البصر صورة للأكل اللذيذ وبعدها شاشاة حاسة الشم تعرض الروائح الذكية...ثم السمع ثم التذوق ثم اللمس و انطلق جرس الانذار ليوقظ كل خلية من خلايا جسدي الكسول

وانتفضت من علي سريري مسرعاً الي الحمام ابغي دشا سريعا

وانا أمني نفسي بما لذ وطاب من أصناف الطعام الجميل (هشوفه فين تاني )...وبدأت في تناول الافطار

وبجانبي كوباً ساخنا من الشاي واخر بارداً من اللبن (شوفوا العز)...ولكني شعرت بأن هناك شيئاً ينقصني...(شايفين الطمع)...ولم أدري ما هذا الشئ الا مع صوت بائع الجرائد وهو يصيح بأعلي صوته معلناً عن جرائده الطازجة في الصباح وكأنه علم اني محتاج للجريدة بجانب الشاي والافطار حتي تكتمل صورة الانتخة

وجبت الجرنان اللي مبفحتهوش غير عشان اخبار الرياضة اللي بتحرق دمي عشان كلها بتبقي متحيزة للأهلي...عشان كدا بطلت اقرأ اي حاجة في الجرنان ...بس إحساس انه يكون جنبي هو دا المطلوب

المهم لفت نظري في الجريدة خبر بيقول:

عبير صبري تتخلي عن حجابها من أجل أكل العيش

اللي ملفت في الخبر انه مكتوب بالخط العريض كدا وكأن اللي كتبه شمتان أو فرحان أو عاوز يقول ان مصر كسبت يا رجالة

يعني علي ما أعتقد اننا لو كسبنا المغرب اللي معقدانا الخبر مش هيتكتب بالطريقة ديه

من قبلها كنت سمعت من حوارات الناس انهم زعلانين عشان عبير صبري شالت حتة القماشة اللي كانت ربطاها علي رسها

طيب تعالوا كدا نرجع لفترة قليلة من الزمن وهي بداية إتجاه عبير صبري للحجاب..

كان في حوار مع محاور رزل اوي شبه ابو جلمبوا ديما بيحب يعمل حوارات مع الممثلات والمطربات اللي بيقلعوا هدومهم عشان يفرح بيهم...وبرضو بيجيب الناس اللي لبسوا الحجاب عشان يضحك الناس عليهم...طبعاً الغلط بيبقي من اللي بيستجيب لدعوة الفسل دا ويجي يعمل معاه حوار

حكوا لي إن عبير صبري قد وصفت الحجاب الشرعي لهذا الارجوز وحوارته بثقة وعزيمة وإيمانيات عالية..

بسم الله ماشاء الله....يهدي من يشاء الي صراط مستقيم

والله حاجة جميلة...والناس فرحت أوي بالموضوع...ماشي حاجة جميلة وشئ مفرح

جت الست عبير صبري رويدا رويدا وبدأت التنازل عن الحجاب الشرعي حتة حتة....استربتيس يعني

والله يا جماعة انا لا بتابع تلفزيون ولا برامج حوارية ولا أي حاجة...الكلام دا بسمعه من الناس ..يعني انا مشفتش بعنيا بصراحة أي حاجة

اللي سمعتوا انها بدأت في العودة الي الميك أب...ثم نزعت الطرحة الطويلة واستبدلتها بربطة الخدامين وفي النهاية قررت أن الدين في القلب وليس في الظاهر

العلم في الراس مش في الكراس يعني

وكل هذا من أجل أكل العيش...وإن محدش ليه دعوة بحياتها الشخصية تعمل اللي هي تعمله

ماشي...محدش فعلا ليه دعوة بحياتك يا ست عبير

بس عاوز أقولك حاجة

أكل العيش هو اللي رجعك فعلا للكلام دا؟؟

طيب إنتي لما ربنا أراد بيكي الخير ورحتي مجالس العلم معرفتيش أن فلوس الفن والتمثيل دي حرام؟؟

ومسمعتيش قول الله عز وجل في كتابه الكريم( ومن يتق الله يجعل له مخرجاً ويرزقه من حيث لا يحتسب )

وهل أكل العيش مش موجود غير في التمثيل بس يا أستاذة عبير

يا ست عبير

هل كل الناس اللي تحجبت واحتشمت ماتت من الجوع؟؟

جاوبي علي أسألتي بالله عليكي

طبعاً حجة ضعيفة أوي يا جماعة وأكيد معندهاش أي إجابة لأي سؤال من الأسئلة ديه

بس تعالوا بقي نشوف إيه اللي حصل للست عبير وبوجه عام نطبقه علي نفسنا

هنتخيل إن في قلب كل إنسان مسلم قنديل للأيمان...هذا القنديل يتوهج بنور الايمان عند إضاءته وشحن بطارياته بالطاعة وزكر الله

أضاء هذا القنديل بقوة في قلب عبير صبري عند بداية التزامها وإتجاهها الي الله عز وجل

ولكن خبأ نور القنديل في البعد عن الله رويدا رويدا...وبدأت تتنازل وتضعف مع ضعف هذا النور...حتي إنطفأ المصباح وعادت كما كانت

الكلام دا محصلش للإنسانة ديه وبس..

لا دا حصل لناس كتيرة جدا سواء مشاهير او غيره

تلاقي شاب التزم مرة واحدة وإتجه الي الله عز وجل ...وبعد فترة يبدأ في التخاذل والتراجع

تلاقي فلانة لبست الحجاب أو النقاب..وبعد فترة برضو تبدأ في التراجع مرة تانية

لهذا كانت دعوة رسول الله صلي الله عليه وسلم

اللهم يا مقلب القلوب ثبت قلبي علي دينك

أنا مش بهاجم عبير صبري أو غيرها...إحنا عاوزين نعرف ايه اللي حصل والغلط فين؟؟

معقولة بعد مذاق حلاوة الايمان نرجع تاني لمرارة الخذلان

معقولة بعد العفة والطهر أرجع تاني للرذيلة والفواحش

انرد علي اعقابنا بعد إذ هدانا الله

لازم يا جماعة نجدد الايمان ديماً في قلوبنا ونتابع ضوء القنديل

إذا بدأ في الضعف نلحقه ونشحنه....الكلام دا في وقت خطير اوي ووقت مهم اوي

رمضان مقبل علي الابواب

بالله عليكم محدش يضيع فيه دقيقة ونستعد من دلوقتي

لازم نستعد عشان منجيش اول يومين تلاتة حلوين اوي وبعد كدا نقعد جنب الفوازير والمسلسلات

اما بخصوص الست عبير فعاوز اقولكم حاجة

إن شاء الله هترجع تاني للحجاب....ولو اراد الله وقدر لنا البقاء هفكركم بكدا

اللهم يا مقلب القلوب ثبت قلبي علي دينك

كوكتيل

السلام عليكم ورحمة الله وبركاته

مدرستي

من أجمل ايام حياتي كانت فترة الثانوية العامة...عديت جنب المدرسة الناهرده وافتكرت الايام ديه...وضحكت علي مواقف جميلة...

يا ريت الزمن كان وقف عندها وممشيش

هبقي مؤدب

اوعدكم المرة اللي جاية إن لو حد شتمني هروح أتأسفله وهبوس ايدي شعر ودقن اني اتشتمت

عشان ابقي مؤدب ومبقاش همجي ..وهبطل ردح

مفروس

امبارح كملت 4 شهور بالتمام والكمال في الجيش واترقيت ومرتبي زاد 3 جنيه...يعني واد كسيب والفلوس بتجري في ايده...وممكن دلوقتي افكر اني اتجوز وأفتح بيت...أو افتح علبة سلمون

خبر سعيد

الصول مصطفي اتنقل وراح سرية تاينة (الله يكون في عونهم)....يا بركة دعاء الوالدين

مفيش احساس

واحد صاحبي قرفان ومخنوق اوي وعاوز يسيب البلد ويمشي عشان خدمة شبكات الموبيل بقت زي الزفت

امال لو دخل الجيش و اتحرم من ابسط حقوقه الضرورية كإنسان ومدخلش الحمام لمدة يومين هيعمل ايه؟؟

معلش بكره اكيد احسن

طيب هو بكره دا هيجي امته؟؟؟

----------------------------------------------------

حوار

فلان خطب الاسبوع اللي فات

بجد والله....ربنا يباركله يارب

والله شئ جميل لما الواحد يحس ان صحابه عقلوا كدا وفكروا في الاستقرار

اه طبعاً....

طيب واحنا ...مش المفروض نعمل كدا؟

نعمل ايه يعني؟؟

نبدا بقي نفكر في الخطوبة والزواج...وكدا يعني

طيب فكر هو حد ماسكك

طيب ما انا بفكر اهوه...وانت فكرت؟؟

انت شكل عندك فراغ عاطفي ومخك بدء يفوت

وانت شكلك عديم العاطفة والشمس لحست دماغك

الصول يصرخ بأعلي صوته

اقف ثاااااابت يا طالب يا منحل انت وهو وبطل كلام يا عديم الانضباط

الاتنين بأعلي صوتهم

تماااااااااام يا فندم

صفة غريبة اوي وجديدة...(عديم العاطفة)...مش مشكلة مش هتفرق معايا كتير

----------------------------------------

صورة

وكمان صورة

------------------------------------------------

النهاية

أري الدنيا لمن هي في يديه ...عذابً كل ما كثرت لديه

تهين المكرمين لها بصغر... وتكرم كل من هانت عليه

جميلة اوي...تحب تسمعها؟؟

هنــــــــــــــــــــــــــــــــــا

----------------------------------------------

تاجات...مش تاج واحد

السلام عليكم

طبعا التاجات بسم الله ماشاء الله شغالة زي الفل

وكان عليا تاجين من زمان لمهند ورينا

قلنا نجمع كله وننزله مرة واحدة عشان نبقي خلصنا اللي علينا

نبدا بالتاج المشترك بين مهند ورينا

--------------------------------------------------------------------

إنسان مستعد تضحي بحياتك – ركز فى كلمة حياتك – عشانه؟

اي عربي مسلم معتدي عليه من قبل اي حد غير مسلم
______________________

ما هو اسم اجمل كتاب كتبه بشر قراته ومحتفظ به حتي الان؟

لطائف المعارف....وهذا الحبيب يا محب...الرحيق المختوم...صفة الصفوة
_______________________
اسم كتاب كتبه بشر برضة- انت متعلق بيه وبتقرأه كل فترة؟

هذا الحبيب يا محب لفضيلة الشيخ ابو بكر الجزائري
____________________________
اهم جهاز منزلى انت متعلق بيه او بتستخدمه كتير؟

مكنة تحميص التوس مع انها مش عندنا ولا عمري شفتها غير في افلام الكرتون بس ...ولا عمري اكلت توست اساسا هو اسمه توست صحيح كدا والا انا غلطان؟
_____________________________
مكان تحس بالراحة عندما تدخله؟

المسجد اللي تحت البيت اللي فتحت عيني عليه من 21 سنة
______________________________

شىء تحس بالراحة النفسية عندما تنظر اليه؟
الصول مصطفي الساعة 5,30 الصبح علي الريق كدا قبل ما اغسل وشي
______________________________

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

منطقة انتهاء ترعة الاسماعيلية والتقائها بقناة السويس الصورة الاولي اللي في الموضوع بتاع الرحيل

بحب المكان دا اوي وليا فيه زكريات كتيرة منها المر ومنها الحلو

________________________________
اجمل مدينة زرتها داخل مصر ؟

رفح المصرية
_________________________________
أجمل مكان طبيعي رأيته داخل مصر ؟

برضو مزارع الفاكهة الطبيعية اللي في رفح المصرية واد ايه المكان دا جميل وتحس فيه براحة غريبة وحب مع انها كانت اول زيارة ليا فيه
__________________________________
شخصية كارتونية بتحبها
القذافي
__________________________________
نوع هاتفك المحمول؟
سامسنوج n620
__________________________________
سرعة بروسيسور جهازك؟

1200
___________________________________
تقريباحجم ذاكرة –هارد- جهازك
80

___________________________________

المساحة التى تشغلها المواد الاسلاميةعلى جهازك؟

تقريبا معرفش....بس ممكن توصل لنص المساحة
___________________________________
أهم هدف انت واضعه لحياتك الآن؟

مش عارف
___________________________________
صفات فتاة الأحلام بالنسبة لك؟

هي فين الاحلام اساسا...كلها كوبيس يا معلمين
____________________________________

صف ما يأتى
شعورك لما بتسمع كلمة مصر ؟

بنت جميلة صغيرة شعرها نازل علي عنيها لبسا فستات اخضر قاعدة جنب حط اديها علي خدها دمعيتها في عنيها نفسي اجري عليها واخدها بالحض وامسح دمعيتها
_____________________________________
شعورك لما بتسمع كلام عن اليهود؟
بشم ريحة وحشة
_____________________________________
شعورك لما بتشوف ظابط شرطة؟
المحترم فيهم بيؤدي عمله...ربنا يكرمه ويكون في عونه واللي مش محترم ياخد بالجزمة طبعاً
_____________________________________
شعورك لما بتشوف الكناس العجوز فى الطريق؟

فعلا ببقي عاوز اخد منه المكنسة واكنس بداله واريحه....وبسأل الله ان يرزقني التواضع ويوسع له في رزقه ويبارك له فيه
______________________________________
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

اتمني له الخير والاخلاص في القول والعمل واتمني ان تطوي الايام حتي اعود الي لحيتي وجلبابي مرة اخري
______________________________________
احساس يراودك فى اشارة مرور مغلقة بسبب مسئول كبير؟

لو الوقت هيطول هنزل اشتري حاجة ساقعة وايس كريم
------------------------------
بمرر التاااااااج دا لمين لمين
مش لحد خالص
------------------------------------------------
التاج بتاع مهند بقي

---------------------

انت ليه اخترت الاسم الغريب ده؟
هتلاقي الاجابة في التاج اللي بعده

------------------------------------------------

لو تقدر ترجع الزمن مره واحده,تعمل لموقف ماundo ,ايه الموقف اللي حتختار تشطبه من حياتك؟
ولا حاجة طبعاً....ما أخطأك ما كان ليصيبك وما اصابك ما كان ليخطأك

ـــــــــــــــــــــــــــــــــــــــــــــــــــــــــــــــــ

لو معاك طاقيه الاخفا,حتعمل بيها ايه؟

هغسلها

ــــــــــــــــــــــــــــــــــــــــــــــــــــــــــــــــــ

لو تقدر ترجع بالزمن ليوم واحد بس,لاي وقت او يوم,ترجع لامتي و فين؟

لا مبرجعش ابدا

ـــــــــــــــــــــــــــــــــــــــــــــــــــــــــــــــــــ

لو معاك مصباح علاء الدين,ايه التلات طلبات اللي حتطلبها من الجني؟

1- لما اخلص يسفرني اشتغل في ليبيا

2- هشتري رونالدو

3- اجيب عقد عمل في درفور للصول مصطفي

ـــــــــــــــــــــــــــــــــــــــــــــــــــــــــــــــــــــــــ

لو تقدر تعيش في شخصيه تانيه ليوم واحد,او حتى علي طول,تحب تعيش بدل مين؟

عمر بن الخطاب رضي الله عنه

ــــــــــــــــــــــــــــــــــــــــــــــــــــــــــــــــــــــــــ

سؤال شبه الاولاني,نفس قدره ترجيع الزمن,حاجه حتعملها و انت مش قادر تعملها و خايف من النتيجه بتاعتها,معاك القدره دي,فتقدر تعمل الحاجه دي و لو فشلت ببساطه تعمل ليهاundoو يا دار ما دخلك شر,ايه هي الحاجه دي؟

احط للصول مصطفي ملح انجليزي في الاكل ...بكمية كبيرة اوي................اوي

ــــــــــــــــــــــــــــــــــــــــــــــــــــــــــــــــــــــــــ

خمس حاجات محدش يعرفها عنك

1- عصبي

2- بحب ابقي لوحدي كتير اوي

3- بكتب اشعار وخواطر وبقطعها بعد ما بتخلص

4- بكره الصول مصطفي اوي

5- نفسي اشتري قرد صغير واحطه في البلكونة
بس خلاص...وكل عام وانتم بخير

----------------------------------

----------------------------------

ودا كان تاج من الاخت ما علينا

ما اسم مدونتك؟

الراقص مع الذئاب

ـــــــــــــــــــــــــــــــــــــــــــــــــــــــــــــــــ

لماذا اخترته.. وماهى نيتك من وراء اختياره ؟

دا اسم قصة جميلة اوي واتعملت فيلم ...بس مخترتش الاسم عشان الفيلم طبعاً....والنية من وراء اختياره هو اعجابي الشديد بالذئاب وحبي لهم
ــــــــــــــــــــــــــــــــــــــــــــــــــــــــــــــــــ
صورتك فى المدونه رمزيته

صورة ذئب....واضح اوي يعني...والاستاذة نادية طه اطلقت عليه اسم سيزر

ـــــــــــــــــــــــــــــــــــــــــــــــــــــــــــــــــ
هل فكرت فى اغلاق مدونتك والسبب؟

انا مودي متغير ديما يعني ممكن اقرر بكره اني اجيب عاليها واطيها واقفلها...انا فكرت مرة واحدة اني اتوقف عن الكتابة ...والحمد لله مطولتش ورجعت تاني

ــــــــــــــــــــــــــــــــــــــــــــــــــــــــــــــــــــ
حد قل ادبه فى التعليق .. ايه رد فعلك؟

كتيييييييييير....اصلي في معظم الاحوال بناقش امور شائكة وبيكون اسلوبي فيها هجومي فرد الفعل لازم هيبقي كدا وببقي متوقعه...ومش بتفرق معايا مدام اني عارف اني بتكلم صح

ـــــــــــــــــــــــــــــــــــــــــــــــــــــــــــــــ
اسوأ مدونه؟
ارجعوا للأرشيف وشوفوا مواضيع ضد التيار هتلاقوا ملخص للمدونات السيئة كلها..بس انا مش قايل اسامي مدونات...وبرضو موضوع مدونون مثليون

ـــــــــــــــــــــــــــــــــــــــــــــــــــــــــــــــ
هايحصل ايه للأيميل لما تموت؟
سؤال غريب اوي...مش هبقي فاضي افكر في الاميل

وبعدين انا ممتش قبل كدا عشان اعرف

ــــــــــــــــــــــــــــــــــــــــــــــــــــــــــــــــــ
اديت الباسبورد لحد قبل كده؟
استحالة

_____________________
اسمك ؟

محمد صابر

ــــــــــــــــــــــــــــــــــــــــــــــــــــــــــــــــــــــ
عمرك ؟
انا شاب لكن عمري الف عام....بس في الحكومة عندي 25 سنة و8 شهور وشوية ايام من تاريخ كتابة هذا البوست

ـــــــــــــــــــــــــــــــــــــــــــــــــــــــــــــــــــــــــــ
برجك ؟
مبعترفش بالحجات ديه بس لو مصممين يبقي الجدي

ــــــــــــــــــــــــــــــــــــــــــــــــــــــــــــــــــــــــ
مجال دراستك ؟
والله انا كنت من شهور مهندس اتصالات...وبعد شهور إن شاء الله هبقي ضابط في القوات الجوية...ودلوقتي طالب في كلية عسكرية....وبعد سنين مش عارف...يعني حكاية ملخبطة وانا تعبت من التفكير فيها

ــــــــــــــــــــــــــــــــــــــــــــــــــــــــــــــــــــــــ
السفر بالنسبه لك؟
تجديد وتهذيب وتعليم وإصلاح

ـــــــــــــــــــــــــــــــــــــــــــــــــــــــــــــــــــــــــ
المود بتاعك ؟
متقلب لدرجة لا توصف

ــــــــــــــــــــــــــــــــــــــــــــــــــــــــــــــــــــــــــ
وقت فراغك بتعمل فيه ايه ؟
بنام

ـــــــــــــــــــــــــــــــــــــــــــــــــــــــــــــــــــــــــ
الاكله المفضله؟
الجيش علمني احمد ربنا علي كل حاجة

ــــــــــــــــــــــــــــــــــــــــــــــــــــــــــــــــــــــــ
الصفات اللى اخذتها من ابي ؟
الحكمة وبعد النظر

ـــــــــــــــــــــــــــــــــــــــــــــــــــــــــــــــــــــــ
الصفات اللى اخذتها من ماما؟
الاندفاع وطيبة القلب

ـــــــــــــــــــــــــــــــــــــــــــــــــــــــــــــــــــــــــ
اكتر ست حاجات بكرهها ؟
النادي الاهلي
الصول مصطفي
النفاق
التناحة والبرود
البرص - اللي بيمشي علي الحيطه
الاغاني

ـــــــــــــــــــــــــــــــــــــــــــــــــــــــــــــــــــــــــــــــ
لماذا دخلت عالم التدوين من الأساس ؟
اهو غلاسة

ــــــــــــــــــــــــــــــــــــــــــــــــــــــــــــــــــــــــــــــــ
أحلى جملة قيلت في وصف مدونتك؟

اي كلمة حلوة بدون نفاق او مجاملة

_________________________
التعليقات .. بالنسبه لك اهميتها؟
في موضوع كتبته كان اسمه الرحيل...كان قبل ما اروح الجيش بدقايق...وكنت هغيب 45 يوم...كنت مشتاق اوي اشوف التعليقات فيه ايه لما رجعت...وفرحت جدا بإن الناس منستنيش وفضلت تدخل المدونة في غيابي
بس بوجه عام التعليقات في بعض المواضيع بتبقي مهمة اوي عشان معرفة رد فعل الناس هيكون ايه...وعشان فتح باب للنقاش

ـــــــــــــــــــــــــــــــــــــــــــــــــــــــــــــــــــــــــــــــــــ
احلى بوست كتبتيه؟
الابتسامة...انا بحب البوست دا اوي عشان غير حجات كتيرة ادام عنيا

ـــــــــــــــــــــــــــــــــــــــــــــــــــــــــــــــــــــــــــــــــــــ
افضل مدونه قرأتها ؟
اي مدونة كتبت فيهر رد وشكرت صاحبها

ـــــــــــــــــــــــــــــــــــــــــــــــــــــــــــــــــــــــــــــــــــــ
افضل بوست قرأته ؟
كتير جدا

ـــــــــــــــــــــــــــــــــــــــــــــــــــــــــــــــــــــــــــــــــــ
الشغل بالنسبه لك ؟
بحبه اوي

ـــــــــــــــــــــــــــــــــــــــــــــــــــــــــــــــــــــــــــــــــــــ
الانترنت بالنسبه لك ؟
متنفس لحجات كتيرة اوي...وبرضو اختلاط بالناس وثقافتهم المختلفة....بالاضافة ان تقريبا بقي عندي شئ اساسي في حجات كتيرة زي معرفة الاخبار والابحاث

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

في النهاية بقول لكل الناس اللي بعتتلي تاجات حراااااااااام عليكم

دا انا غلبان

وانا مش هبعت التاج دا لأي حد...بس اللي عاوز اي تاج من عندي يتفضل ويخده

كيف السبيل الي البر؟؟

السلام عليكم ورحمة الله وبركاته

ازيكم يا شباب...انا عارف والله إن الحر عامل عاميله

والناس كلها زهقانة ومحدش ليه نفس يعمل اي حاجة

بس بجد بالنسبة للي انا بشوفه الحر دا ولا حاجة

ومستغرب جدا من الناس اللي بتقول انهم هيموتوا من الحر

مع إنهم تحت مراوح وتكييفات وبيشربوا مية ساقعة وكل شوية يخدوا شاور

عشان كدا لازم نبص للي من هو في وضع اسوء من الوضع اللي احنا فيه عشان نعرف نقول الحمد لله

اصل احنا مبقناش بنقول الحمد لله كتير

ولو قلناها بنقولها من غير ما نحسها

معلش كانت مقدمة صغيرة عشان نفتكر جزء صغير من نعمة ربنا علينا وإن الحر اللي احنا فيه زي منبه صغير ينبهنا للنعيم اللي احنا عايشين فيه ومش حاسيين ولابنشكر ربنا

وعشان نفتكر كمان حر جهنم....يقول الله عز وجل في كتابه الكريم

فَرِحَ الْمُخَلَّفُونَ بِمَقْعَدِهِمْ خِلافَ رَسُولِ اللَّهِ وَكَرِهُوا أَنْ يُجَاهِدُوا بِأَمْوَالِهِمْ وَأَنْفُسِهِمْ فِي سَبِيلِ اللَّهِ وَقَالُوا لا تَنْفِرُوا فِي الْحَرِّ قُلْ نَارُ جَهَنَّمَ أَشَدُّ حَرًّا لَوْ كَانُوا يَفْقَهُونَ

يارب لك الحمد كما ينبغي لجلال وجهك وعظيم سلطانك

نيجي بقي لموضوعنا

وهو هيكون عن آية في كتاب الله عز وجل هنحاول إنننا نطبقها

يقول الله عز وجل في كتابه الكريم

لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ وَمَا تُنْفِقُوا مِنْ شَيْءٍ فَإِنَّ اللَّهَ بِهِ عَلِيم

لما ربنا يكرمك كدا وتنوي ان تخرج صدقة لفقير هل بتفكر انك تروح تشتري مثلا تفاح او مانجو او اي فاكهة محترمة كدا من اللي احنا بنحبها؟؟؟

ايوة سعات والله بفكر اني اعمل كدا

طيب لو هتعملعا هل بتروح تجيب الفاكهة ديه من احسن المحلات وباغلي الاسعار؟؟

اممممممممم

طبعا محدش هيجاوب....الا من رحم ربي

يعني ممكن في ناس تكون بتعمل كدا بالفعل

بس تعالوا نتكلم بقي بموضوعية اكتر وبصراحة....احنا مش بنعمل كدا ولا عمرنا فكرنا في الموضوع دا

الفقير ملوش غير انه ياكل عيش بطعم المسامير وعدس وفول واي حاجة تسد الجوع وخلاص

وبكدا يبقي احنا عملنا اللي علينا

احنا هنقطع نفسنا يعني

هو كيلوا رز علي نص كيلوا عدس علي كيلو فول وشوية بقوليات وحطهم في كيس كبير وارميها لأهله

هو طايل

دا كمان هيجري وراك يبوس ايدك وانت تقوله استغفر الله استغفر الله وتعمل نفسك تقي وراجل خير وتركب عربيتك والسبحة في ايدك وتمشي

وسعتها بقي تحس انك دخلت الجنة واتربعت فيها...دا انت بتتصدق علي الفقراء وبتعمل خير

ماشي يا عم...والله دا شئ جميل جدا...وياريت كلنا نعمل الكلام دا

بس تعالوا نزود حاجة بسيطة في الكيس اللي مليان طعام اولي

يعني نزود حاجة كدا الراجل دا مكنش يتوقعها ولا عمره يفكر فيها

هات معاك مثلا دستة جاتوه ....كيلوا تفاح امريكاني...كيلوا مكسرات....

هات ياعم ايس كريم كدا وحجات ساقعة

يا جماعة والله دي حاجة جميلة اوي

الراجل دا هو وأسرته وأولاده نفسهم فعلا يتعرفوا علي الحجات ديه

هو كل الفلوس اللي في ايده بيشتري بيها ما يكفي لسد احتياجاته الاولية

بس اولاده ميعرفوش كدا

تخيل كدا مدي فرحة اولاده وانت جايبلهم تفاح او جاتوه

الم تعلم ان من احب الاعمال الي الله هو إدخال سرور علي مسلم؟؟

أو كما قال صلي الله عليه وسلم

بذمتك مش دا إدخال سرور علي مسلم؟؟

يا جماعة بلاش نختار الحاجة اللي احنا مش بنحبها وننفقها او نرميها للفقير

يقول الله عز وجل في كتابه الكريم

يَا أَيُّهَا الَّذِينَ آمَنُوا أَنْفِقُوا مِنْ طَيِّبَاتِ مَا كَسَبْتُمْ وَمِمَّا أَخْرَجْنَا لَكُمْ مِنَ الأَرْضِ وَلا تَيَمَّمُوا الْخَبِيثَ مِنْهُ تُنْفِقُونَ وَلَسْتُمْ بِآخِذِيهِ إِلا أَنْ تُغْمِضُوا فِيهِ وَاعْلَمُوا أَنَّ اللَّهَ غَنِيٌّ حَمِيدٌ

الموضوع دا مش هيتغير غير لما تغير نظرتك للفقير وتعرف انه احسن منك

مش قصدي طبعا الناس اللي بيلفوا في الشوارع ويمتهنوا مهنة التسول

لا...انا قصدي علي الناس اللي مقفول عليهم ابواب ولا يعلم ما بداخلها الا الله

يحسبهم الجاهل اغنياء من التعفف

يقول الله عز وجل

لِلْفُقَرَاءِ الَّذِينَ أُحْصِرُوا فِي سَبِيلِ اللَّهِ لا يَسْتَطِيعُونَ ضَرْبًا فِي الأَرْضِ يَحْسَبُهُمُ الْجَاهِلُ أَغْنِيَاءَ مِنَ التَّعَفُّفِ تَعْرِفُهُمْ بِسِيمَاهُمْ لا يَسْأَلُونَ النَّاسَ إِلْحَافًا وَمَا تُنْفِقُوا مِنْ خَيْرٍ فَإِنَّ اللَّهَ بِهِ عَلِيمٌ

تيجوا نتفق يا جماعة علي إننا هنعمل الموضوع دا؟؟؟

هننزل نشتري اي حاجة من اللي احنا بنحبها ونروح ندور علي فقير يستحق ونهديه هذه الحاجة؟؟

صعبة ...والا الفلوس معانا مقصرة؟؟

معلش تعالوا ندوس علي نفسنا ونعمل الموضوع دا....ونستمتع بفرحة وبسمة علي وجه ابتلي بالفقر

كما ابتليت انت بالغني

اللهم اجعل عملنا خالصاً لوجهك ولا تجعل لأحد فيه نصيبا

وجزاكم الله خيرا

البحر

السلام عليكم

منذ فترة ولم اكتب موضوع بهدوء...من ايام خلف التلال وتحت ضوء القمر

وها انا قد قررت أن اختلي بنفسي

وجلسة علي شاطئ البحر

علي كورنيش الاسماعيلية الجديد المطل علي بحيرة التمساح الهادئة

في منتصف الليل...وكأني في ساعة ذروة

تختلط اصوات الناس في مزيج جميل مبهج...فها هو صريخ الاطفال وبكائهم

وها هو زوج يعنف زوجته علي إهمالها لترك الطفل

وينادي بائع الشاي ليلفت نظر الناس ويزكرهم بوجوده

ويضع جانبه كاسيت متهالك تخرج منه اصوات موسيقي صاخبة وكلمات غير مفهومة لا أدري إن كان صاحبها مطرب ام مطربة

ويتحرك بخفة ونشاط وابتسامة خفيفة بائع الفيشار بين جموع المواطنين علي الشاطئ

الكل سعيد ومبتهج....مستمتع بنفحات الهواء التي تمر علي استحياء مشفقة علي الناس تستأذن الحر الشديد والرطوبة في التخفيف عنهم

يجلس هذان الصديقان معا علي يميني يتهامسان ثم يقهقهان بصوت عالي بعد ان يطلق احدهما قفشة او مزحة خفيفة

ويجلس اعلي الشاطئ زوجان في سن ربيع العمر....ينظران في شرود الي البحر ثم تلتفت الزوجة من حين لآخر محدثة الزوج ببضعة كلمات..فينظر اليها ويتبادل معاها اطراف الحديث بمودة وحب قد اصلته السنين

ويأتي طفل جميل ممسكا بحجر ليلقيه في الماء معكرا صفوه ويبتسم ويقهقه لذلك...ومن الخلف تصيح امه عليه متوعده إياه بعقاب شديد بسبب التوجه دون إذن للشاطئ

واسمع خلف ظهري اقدام صغيرة خفيفة تهرول بسرعة مطلقة ضحكة خفيفة وصراخ المداعبة وإذا بطفلة تجري من والدها الذي يجري خلفها ويحمل اخوها الصغير ويهددها بعدم المجئ الي الشاطي في الغد ما دامت لا تسمع الكلام

واقصي شمال الكورنيش يتسلل شاب في مقتبل العشرينات...تبدوا علي وجهه علامات القلق وعدم الارتياح....ملتفتا يمينا ويسارا ناظرا حوله...جذبني حاله وتابعته خلسة بفضول...فإذا به ينزوي معطيا ظهره لنا ناظرا الي الصخور التي في اقصي اليسار....ثم يلتفت الينا مرة اخري وتبدو علي وجهه علامات الارتياح وهو ممسكا بحزام سرواله يشده علي وسطه ويحكم غلقه ويهندم ملابسه ويعود الي اصدقائه مرة اخري...مخلفا بقعة كبيرة من الماء كريه الرائحة علي الصخرة التي كان في مواجهتها

ولا يختلف حال من هم فوق صفحة الماء الجميل

مراكب الصيادين الصغيرة وعليها اصحابها تشتكي ايديهم تعب التجديف...وتأبي اعينهم الا ان تشارك الناس فرحتها وبهجتها

ويطغي علي تعبه فرحته برزق الله الكريم له من السمك الذي يتلاعب في الطاولات المخصصه لحفظه

ويقترب اخر من الشاطي يعرض بضاعته علي رواد الشاطي ويجملها ويتعالي صوت البيع والشراء بين الصيادين والمشتريين

وتذهب النساء لتشتري اصناف الاسماك الطازجة ويدفع الرجال المساكين دون اي مقاومة

اما تحت صفحة الماء الهادئة تقفز من حين لأخر احد الاسماك في رشاقة ودلال وكانها تنبه الجميع بان تحت الماء احتفالا اخر وبهجة اخري......وتقفز اخري وسط صراخ الاطفال الذين يفاجأهم المنظر فيصرخون منبهين بعضهم حالفين بأغلظ الايمان علي أنهم شاهدوا السمكة تقفز خارج الماء...وياتي من فاته المنظر متحسرا ناظرا الي الماء محدقا فيه لعله يفوز بهذا المنظر الذي لا يصدقه عقله الصغير

وكأن السمكة تشعر به وتأبي ان يمشي الطفل الا وقد شاهدها

فتخرج له قافزة برشاقة وبخفة ويصرخ الطفل مصفقاً علي فوزه بهذا المنظر الممتع

واجدني ابتسم معهم واضحك في نفسي...متمنيا العودة الي عالمهم والجري واللعب والقاء الاحجار في الماء....

ويمر الوقت دون اي ملل...وما زالت الحياة تدب علي الكورنيش وعلي شاطئ

ما أجمل التأمل في نعم الله عز وجل

وما أجمل البحر الذي يسلب الجالس امامه وكأنه مخلوق ذو قلب ينبض بحب من ينظر اليه

عجيب انت ايها البحر

ولكني احبك واحب الجلوس وحيدا علي شاطئك

انتهت

كلمتين وبس

الاجازة خلصت