Translate

الخميس، 22 مارس 2007

الابتسامة

السلام عليكم
وسط ضرب النار والصوت العالي والزعيق والعصبية اللي الواحد فيها
والخنقة من الحياة واللي فيها سمعت جملة شدتني شوية وغيرت المود بتاعي من فترة كبيرة
جملة اتقالت بصوت عالي جهوري...يزلزل الارض تحت رجليك
وكأن الزمن وقف عند سماعها
خرجت هذه الجملة علي شكل بيت شعر بليغ لا يخرج إلا من فحول الشعراء في العصور الثرية باللغة العربية والبلاغة والادب
علي الرغم من أنها خرجت من حنجرة شخص بسيط عادي....بائع متجول
قال هذا البائع بصوته الذي يرتعد له البدن
((مش كل حتة لحمة بيضا تبقي وزة....ولا كل بت لبست كت تبقي مزة))
وأول مرة منذ زمن بعيد أوي أعرف طريق الابتسامة
لقيتها جميلة أوي....والله جميلة أوي الابتسامة
قررت اني هأجل موضوع الجزء التالت من ضد التيار وهكتب لأول مرة عن الابتسامة
الابتسامة التي لا تفرق بين شاب وعجوز....هي كما هي...لا تجد أحد مهما كان سنه لا يستطيع الابتسامة.....سهلة...بسيطة...مش متعبة....مش محتاج لدوا السكر والضغط.....مش لازم بعدها أجري اخد حبوب مهدئه....ولا أدهن مرهم روماتيزم....ممكن يكون عندك 114 سنة ولسا بتعرف تبتسم.....يبقي أعرف من دلوقتي الابتسامة هي الحاجة الوحيدة اللي هتفضل معاك لغياة ما تستريح وتريحنا وتمشي من الدنيا.....الله أعلم بعدها هتبتسم تاني والا لا....
ما علينا




الابتسامة لا تعرف فقير من غني.....ولكن هناك نظرة فلسفية قد تنبهت اليها وأنا افكر في الابتسامة.....الغني يدفع الكثير ليبتسم....(يدخل سنيما يدخل مسرح ) أي نيله علي دماغة المهم يضحك ويفرفش.....اما الفقير فيبتسم وهو يأخد مال اقل بقليل من الذي يدفعه الغني لكي يبتسم
....يعني لو عملنا تعاون مشترك بين الفقير والغني الاتنين هيبتسموا
الغني هيدفع ملاليم للفقير.....هو مش الغني بيدفع عشان يبتسم...والفقير بيبتسم لما ياخد
يبقي الاتنين هيبتسموا
ومش هيبقي فيه حقد علي الاغنياء اللي الفلوس عندهم اكوام اكوام
وسعتها المسارح والسنيمات هيتقفلوا والممثلين مش هيلاقوا سبب يقلعوا فيه هدومهم ويطلعوا عريانين ويمكن يتوبوا ويبطلوا فساد
وممكن ينتحروا عشان مبقاش حد بيتفرج عليهم وهما عريانين
والله بدعيلهم....يا ربنا يهديهم يا يهدهم ويخدهم
شوفوا الابتسامة عملت ايه؟؟؟



الابتسامة ليس لها جنسية معينة...ليس لها بلد ولا لون معين
يستطيع كل من علي وجه الارض ان يبتسم.....دون أي تعب
دون الحصول علي إذن من الامم المتحدة ومجلس الامن
عندما تبتسم ليس هناك شخص يدعي البرادعي يأتي لتفتيش منزلك ظنا منه بوجود اسلحة نووية تحت السرير
ليس هناك اقمار صناعية تراقبك وتعرف لون ملابسك الداخلية ظنا منهم ان لونها له علاقة بالابتسامة
لن تكون اراهبي ومتطرف وتتهم بأحداث 11 سبتمر
لن يزج بك في المعتقلات ولن تذهب الي جونتناموا
لن تخرج لك هذه المرأة الشريرة التي تاتي فقط في الكوابيس...التي تدعي كوندليزا رايس...(أخ لو يحكموني علي سيخ محمي ويشوفوني هعمل في كونداليزا ايه)....كونداليزا التي لا تبتسم....كونداليزا التي تظهر اسنانها القبيحة وقد يظن الكثير انها تبتسم...
فليس هناك اي قانون دولي يمنع الابتسام
نعم سوف أبتسم وليذهب بوش وتوني بلير وعم سيد بتاع الكشك الي الجحيم


أما اجمل وأرق ابتسامة فهي التي تخرج من البراءة بكامل معانيها
الطفولة....والجمال....النعومة والبساطة والشفافية....هذه هي الابتسامة النقية....لا يشوبها نفاق ولا رياء ولا مداهنة
أجمل أنواع الابتسامات وأعذبها
يطير قلبك لرؤيتها
ما أجمل الابتسامة
وانتم.....لماذا لا تبتسموا......جربوا الابتسامة واجعلوها دوما في وجهكم
تحياتي لكم بوجه باسم

هناك 39 تعليقًا:

ert3ashat يقول...

gameel awy...awyy...ad eh momken la7za w7da baseta elwa7ed yebtsem feha ebtsama men el 2alb tefre2 fe mode beta3o l e draga deh....begad falsaftak 7elwa awyyy

الراقص مع الذئاب يقول...

اسعدني وجودك جداااااا يا دكتور
واسعدني اعجابك بالبوست
اتمني تواجدك الدائم عندي ودوام التواصل
مع اني زعلان منك من شوية حجات كدا

تحياتي لك

حوريه يقول...

و الله عندك حق
نسينا الابتسامه و هى اللى ناسيانا ؟

الراقص مع الذئاب يقول...

نعم يا حورية
نسينا الابتسامة
او بمعني تاني...اتسرقت مننا الابتسامة
بس صدقيني
دوري عليها هتلاقيها
انا لقيتها بالصدفة زي ما قرأتي في الموضوع
ولو دورت من بدري كنت هلاقيها
عاوزك تدوري عليها ...والله هتلاقيها من غير ما تتعبي
سعتها حجات كتيرة هتتغير

تحياتي لك ولتواجدك الجميل
فأنتي صاحب او تعليق في مدونتي....لهذا لكي قدرا خاص وماكنة خاصة فيها

Sampateek يقول...

:)
الصور تحفة
كلهم عايزين طقم سنان
:))
اضحك الله سنك

الحصان الأسود يقول...

طيب ياسيدي حانحمي لك سيخ عالبوتاجاز طول الليل

وحتة سيخ انما اية.... من افخر الانواع..... ستانسلتيل 18 على 10 ولو عايزة كرستوفل كمان من عنينا بس عليك انت بقى بكوندي لما نشوف حاتعمل بالسيخ اية

هههههههه

الا صحيح اية اخبار "الواقفة على قبضة يديها" بقالي كتير ماسمعتش عنها

تعرف زمان كان عندي مديرة في الشغل مسمينها "الواقفة على قبضة يديها" من يوم ماشفت الفيلم بتاعك مع كيفن كوستنر لانها بعيد عنك كانت مديرة مجنونة ومهبوشة في دماغها وطول النهار تجعجع وتتعفرت وتشاكل طوب الارض فتحسسك انها واقفه على قبضة يديها مستعده للخناق والزعيق والنرفزة في كل الاوقات

ههههههه

الله يحرقها بقى مطرح ماراحت

تحياتي

الراقص مع الذئاب يقول...

جزاكي الله خيرا يا سمبتيك
كويس انك لاحظتي الشئ المشترك ما بين الصور غير انهم كلهم مبتسمين
اسعدتني زيارتك الجميلة
لكي تحياتي

الراقص مع الذئاب يقول...

عزيزي الحصان الاسود
اديني بس السيخ وحميه واربطلي الجزمة ديه في اي شجرة وسبني انا اتصرف

انا برضو مبحبش الناس اللي بتزعق وتتعفرت عليا
مع اني رايح الجيش كمان شهر...يعني هتربي هناك هتادب الادب الشرعي 9 شهور

بس رجاء من حضرتك بلاش ندعي علي حد ونقول ربنا يحرقه....خلينا نقول ربنا يهديها ويهدينا


اسعدني جدا مرورك واتمني تواجدك المستمر في مدونتي الفقيرة...

كراكيب عادل يقول...

اية موضوع الصور دة هو لازم الي يضحك يكون اسنانة مبهدلة كدة علشان يبقي معبر ههههههههههه

والله ضحكتني فعلا صور غريبة تضحك اصلا كل واحد لة طريقة في الابتسامة

بس صدقني لو هترقص مع الذئاب هتنسي الابتسامة يخوفوا يا عم

تحياتي

سمسم يقول...

عندما تفترس الذئاب

ممكن

عندما تعوي الذئاب

يجوز

عندما تهجم الذئاب

شيء عادي

لكن عندما تبتسم الذئاب

هنا نحتاج وقفة !!!

تحياتي

hesterua يقول...

بس ممكن نحاول نجيب الأبتسامة
من بكره
او امبارح
او من نفسنا

Nothing To Lose يقول...

ياترى احنا فى دنيا تدعونا الى الابتسامه؟؟؟؟
سؤال طرق فى بالى
ولكنى تذكرت ان التبسم فى وجه اخيك صدقه
وانت اخدت صدقه لانى كنت مبتسمه وانا بقرأ البوست
:)
جزاك الله خيرا

smraa alnil يقول...

ههههههههههه الصور تحفة بجد
ربنا يسعدك ويارب ما تتمحي الابتسامة من اي حد خالص يارب
ويجعل ايام الجيش عليك سعادة
ههههههههههه

الراقص مع الذئاب يقول...

كراكيب عادل
جميل ان اري ضحكتك ...والاجمل تواجدك في مدونتي...اصدقائي الذئاب احسن بكتير
من كتير من اصدقائي البني ادمين
اكي تحياتي

Ma-3lina يقول...

lol 3la gomlet el ba23 ana kont fakraha kobleh min o3'nia gedida asl b2ait atwke3 minhom y2olo ay 7aga

el ebtesama asb7et nadra now , ymken 3lshan keda el nas betdfe3 flos fel cinema 3lshan teshof aflam komidia 3lshan ted7ek

el de7ak el 7aga el wa7eda el m3lihash darayeb

makal gamil awii we el sewar to7fa

الراقص مع الذئاب يقول...

سمسم
انت لاتري الذئاب الا مفترسة
ولا تتخيلها الا وهو تهاجم
ولم تجربها وهي تبتسم
لأنك لم تدخل عالمها الساحر خلف التلال

تحياتي لك

الراقص مع الذئاب يقول...

hesterua
الابتسامة سهلة كدا
مش محتاجة اي محاولة
سبها واستناها وهي هتيجي
بس اوعي تقفل الباب لو جت
لأنها لو راحت صعب اوي ترجع

صعب والله

اسعدني وجودك
اتمني دوام التواصل

الراقص مع الذئاب يقول...

Nothing To Lose
عارفة اجمل ابتسامة تلاقيها فين؟؟
تلاقيها بين البسطاء
اللي مش شاغل دماغة باي حاجة
اتمني ان تتواجد الابتسامة علي وجهك دوما....
جزاكي الله خيرا علي دعائك وتزكيرك بقول الرسول الكريم صلي الله عليه وسلم

يقول الرسول صلي الله عليه سلم : لا تحقرن من المعروف شيئا...ولو أن تلق اخاك بوجه طليق

صلي الله علي محمد وعلي اله وصحبه وسلم

تحياتي لكي واسعدني مرورك

الراقص مع الذئاب يقول...

سمراء النيل
جزاكي الله خيرا علي كلامك الجميل ودعاء للجميع

ودعائك بمرور ايام الجيش بالسعادة
ايوة انا عاوز شوية دعاوي زي ديه كدا

شرفتني زيارتك الجميلة

الراقص مع الذئاب يقول...

Ma-3lina
انا معرفش هي اغنية والا لا...بس علي حسب ما سمعت ان الاغاني وصلت لحد اسفل من كدا
الحمد لله الذي نجانا منها ونقي اذاننا بسماع كلامه وهو خير وابقي

اسعدتني ضحكتك وتواجدك وتعليقك علي المقال

mesh2dra يقول...

السلام عليكم

اولا مدونة حضرتك هى اللي فعلا جميلة..
وهى برضة اللي عاوزة قاعدة:)

ثانيا بقى يا سيدى
مبدأي في الحياة
((سممايل للحياة تسمايلك
وبعدين أنا عايشة على أمل أن الإنسان بيكون له نصيب من اسمه

وبصراحة الصور اللي حضرتك حاططها
تخلي الواحد يسمايل علي طول

سلاماتي
:)

الراقص مع الذئاب يقول...

mesh2dra
جزاك الله خيرا علي وصف مدونتي بالجميلة
مش هنسي الوصف دا ابدا
شرفتيني بزيارتك الجميلة
واتمني دوام تواجدك عندي
سلام

________________________________

يمكن صح لو ابتسمنا للحياة تبتسملنا
سبحان الله
جملة اسمعها بالصدفة تخليني اغير افكار كتيرة....بس برضو انا مصر علي موقفي من اصحاب المدونات القذرة (الشباشب)....

بجد الواحد لما يشوف الناس مبسوطة من حاجة هو كمان بيبقي مبسوط
يبقي مع شوية تفكير هنلاقي ان الحصول علي السعادة مش هيحصل الا بإسعاد الاخرين
يا واد يا جااااااااااامد



يعني لو يا جماعة دخلتم الموضوع اللي قبل دا هتلاقوا ان الوضع كان علي وشك الانفجار
وكان هينفجر بجد مع نزول الموضوع اللي كان المفروض ينزل مكان موضوع الابتسامة
بس الحمد لله
اتأجل لأجل غير مسمي
دا انا حتي نسيت صحابي الديابة اللي كنت مربيهم في درج المكتب
بس هرجعلهم إن شاء الله...انا مقدرش استغني عن الذئاب

Sharm يقول...

لك منى اكبر ابتسامة

اشكرك على الموضوع الممتع

رفقه عمر يقول...

الضحك والبكاء من الادله على قدرة الله الله يقول وهو اضحك وابكى يعنى لا يوجد سخص بيضحك ضحك غير التانى لا تجد امريكى يضحك ضحك امريكى ولا عربى بيضحك ضحك عربى وتوحد الضحك والبكاء دليل على وجود خالق واحد لهذا الكون
الصور بصراحه يعنى ولا اجمل
ادى الابتسامات ولا بلاش
جزاك الله خيرا لتعزيتى والدعاء لوالدى ربنا يبارك فيك اللهم امين يارب العالمين

albida يقول...

ربنا يديم الابتسامة على وشك ويجعل حياتك كلها سعادة فى سعادة
:)

نفسى الأنسان يفهم بجد أن السعادة مش هدف فى حد ذاتها أنما السعادة هى دلوقتى وحالا كمان- مهما كانت الظروف. النسان لو حط السعادة قدامه كهدف عمره ماهيوصلها

على فكرة موضوع المذة والكت ده ضحكنى جدااااااا
:) :)


manal

Memo يقول...

انا فتحت البلوج و خير اللهم اجعله خير

يا ساتر سا رب

الراقص مع الذئاب يقول...

Sharm
ولك مني ايضا ابتسامة خاصة
جزاك الله خيرا علي إطراءك

_________________________________

رفقه عمر
اسعدني جدا عودتك ومواجهة احزانك....واسعدتني ابتسامتك

الراقص مع الذئاب يقول...

albida
جزاكي الله خيرا وربنا ما يحرمك ابدا من الابتسامة
كلامك جميل وصح وهي ديه الفلسفة اللي غيرت حجات كتيرة جدا عندي...بسبب جملة واحدة ضحكتني

اسعدني وجودك وزيارتك
_________________________________

Memo

خير اللهم اجعله خير؟؟؟
في ايه...؟؟
دي ناس بتبتسم...ملهم فيهم حاجة غلط

اسعدني مرورك وتعليقك

يعقــــوب .... يقول...

جميل الموضوع ده .من زمان محدش اتكلم علو الايتسام..بس عموما انا محبش التكشير و مبتسم حتى و انا زعلان..

خمسة فضفضة يقول...

السلام عليكم
اول مره ليا هنا بجد جميله اوي المدونه
الجيران سمعوا صوتي من كتر الضحك علي الصور الروعه دي
انصحك تبعتهم لدكتور اسنان ...والحساب عندي ..ههههههه

الدبور يقول...

كن جميلا تري الوجود جميلا
بس الصور مش جميلا خالص يا ريس

وسمعني سلام ذئاب الجبل ديب ورا ديب
اعوووووووووو

تحياتي
الدبور

الراقص مع الذئاب يقول...

يعقوب
اسعدني مرورك الكريم
ربنا يجعلك دوما باسما وبشوش
اتمني دوام التواصل

كاستر يقول...

السلام عليكم
أولا انا أسف انى هخرج عن الموضوع لان
ووأحب أدعوك الى ان تنضم معنا الى رابطة عملناها للعزاب
أنا عارف ان الوقت مش مناسب
والرابطة دى عملنا لها مدونة تسمى
( عاوز اتجوز )
ونأمل ان تشارك معنا بمواضيعك
وحاول مشكورا ان تنشرها بين اصدقاءك والفكرة هتعجبك ان شاء الله
وجزاكم الله خيرا

الراقص مع الذئاب يقول...

خمسة فضفضة
وعليكم السلام ورحمة الله وبركاته

يارب متكنش اخر مرة وديما تبقي موجودة في المدونة

اسعدني جدا اني كنت سبب في سماع الجيران لضحكاتك
اما بخصوص اطقم الاسنان فميش حاجة هتحوق معاهم....هوبلس كيس

تحياتي لك

الراقص مع الذئاب يقول...

الدبور
تصدق انا اول مرة اعرف ان الصور وحشة
انت فجأتني
انا اتصدمت
الناس كلها بتقول عليها حلوة
عندي احباط يا دبور من تعليقك
هو دا واجب الاسماعلوية مع بعض


شرفتني يا دبووووووووور

ابسط يا عم...عملتلك لينك في المدونة عندي....انا مصدقت لقيت واحد اسمعلاوي

سلام

_____________________

كاستر
انا مش عاوز اتجوز عشان انا مش لاقي اكل...عشان كدا بصوم...

((.....ومن لم يستطع فعليه بالصوم فإنه له وجاء))

كما قال الصادق المصدوق صلي الله عليه وسلم

شرفتني واتمني دخولك لقرءة المواضيع في المرة القادمة

Om@r™ يقول...

تصدق الجملة دى سمعتها قبل كدة فى اغنية
تقريبا اغنية شعبية pop

بس الموضوع جميل جدا

و اجمد حاجة الصور معبرة جدا و تحسسك بالسعادة كدة من غير حاجة

None يقول...

دي اول مرة ادخل البوست بتاعك واكتب كومنت ..قلبت فيه شويه لقيته جامد بجد حلوة فكرة انك سبت دنيا البشر وقررت انك تعيش مع الذئاب
وفكرة اختلاط الشراسة مع الرومانسيه كنت بحسب انا بس اللي عارفاها وحساها وبحبها
عجبتني الابتسامات اللي انت حاططها معبرة جدا بجد والله مش تريقة

وفعلا الابتسامه بقت عملة نادرة جدا وحتي لو كان الاغنيا بيدفعو فلوسهم عشان يدخلو المسارح والسنيمات عشان يضحكو صدقني حتي دول بردو بيكون الضحك من القلب فيهم مش بسهولة

الكومنت اللي كتبته في البلوج بتاعنا انت اتلخبطت فيه بيني وبين
Nothing To Lose

الراقص مع الذئاب يقول...

Om@r™
جزاك الله خيرا اخي الكريم
فعلا الصور تبعث البهجة في النفوس
ابتسامات بجد من غير اي تكلف
مش عارف الناس مش عجباها الابتسامات ليه
اسعدني جداااا مرورك

الراقص مع الذئاب يقول...

None
ويارب متكنش اخر مرة واشوفك ديما عندي
..اسعدني جدا حبك لنظرية الشراسة مع الرومانسية
والتي تتجسد في مجتمع الذئاب الذي افضله جدا واحب دوما الانضمام اليه

اما بخصوص اللخبطة بقي في البلوج بتعكم ...انا اساس معرفش نظام الاشتراك لأكتر من واحد في البلوج
عشان كدا ماخدش بالي من كاتب الموضوع...المهم ان انتم الاتنين زي العسل والبلوج بتاعكم جميل...
وانا سعيد جدا بنضمامي للبلوج بتعكم وتواجدكم في البلوج بتاعي

لكي تحياتي واتمني دوام التواصل