مش نافع خاااااااالص

ملحوظة...جميع الاسماء التي في الموضوع رمزية وغير صحيحة ولا ترمز لأي شخص بعينه.... واي إدعاء من اي شخص بوجود اسمه في الموضوع هيبقي عليا وعلي اعدائي وهجيب عليها واطيها

الحوار دا دار بين امي الحبيبة وانا...مسمي نفسي فيه مش نافع....عشان بجد مش نافع

تعالوا اسمعوا وقولولي ايه رأيكم واعمل ايه في الحكاية العويصة ديه؟؟؟

امي الحبيبة : مش ناوي يا ابني تريح قلبي؟؟؟

مش هينفع :ازي يعني يا حجة؟؟....هو انا تاعب قلبك لا سمح الله....قوليلي يمكن اكون عامل حاجة غلط ومش واخد بالي؟؟

امي الحبيبة : مش عاوز تسمع كلامي في الموضوع اللي كلمتك فيه

مش نافع : موضوع ايه....انا مش فاكر؟

امي الحبيبة: لا...انت فاكر وبتستهبل ...بطل تبحلق في المخروب (الكمبيوتر) اللي ادامك دا وركز معايا

مش نافع: هرشت في قفايا شوية وقلتلها....طيب لمحيلي كدا من بعيد وانا افهم...اصل انتي عارفة اليومين دوله

متلخبط ومش مركز في حاجة خالص

امي الحبيبة : قلتلي موضوع الخطوبة.....مش ناوي تريحني بقي وتخطب

مش نافع : اتعدلت في قعدتي وقلتلها بكل حكمة وعقل ورزانة

يا امي انا مش لاقي اكل...دا سكر لما بيشوفني بيبقي عاوز يحدفلي حتة عضمة من اللي شايلهم للزمن (سكر دا كلب رذل قاعد جنب العمارة علي طول).....هروح ادخل بيوت الناس ليه....ومين العبيط دا اللي هيرضي يجوز بنته لواحد زي حلاتي؟

امي الحبيبة : اتغير وشها مرة واحدة وقالت بصوت عالي...امشي....دا انت الف بنت تتمني تراب رجليك....بس انت شاور

مش نافع : دولة جزم و مش عارفين مصلحتهم.......احم.....قصدي يعني دولة طيبين وعلي نيتهم.....بس انا بنقلكم الصورة كما هي....معلش بقي استحملوني.....دا لو كان فعلا فيه نص واحدة اتهطلت وفكرت فيا...بس انتم عارفين قلب الام

امي الحبيبة : قلتلي طب دا طنط جولفدان اللي معايا في الشغل قلتلي انها نفسها تجوز بنتها لواحد زيك...يعني قصدها ايه بكدا؟؟؟

مش نافع : ايوة يا ماما بتجاملك...بترفع من روحك المعدنية امال هتقولك ايه...؟؟ مش لازم تفرحك بأبنك مش كل يوم بتروحي الشغل تعملي عني اعلانات....اكيد طبعا الناس هتحاول انها تنافق عشان يفضلوا صحاب

امي الحبيبة : طيب بلاش طنط جولفدان....هي فعلا بتاعت كلام

طيب ايه رأيك في لولو بنت طنت عنيات....بنت متربية ومن عيلة محترمة.....وعمر محد سمعلها صوت

مش نافع : بس طنط عنيات عاوزة تجوز بنتها لواحد مليونير.....وانتي عارفة انها حاطة منخيرها في السما....هترضي بيا وانا لسا حتي مش عارف احصل علي لقب عاطل

امي الحبيبة :طيب بلاها لولو بنت طنط عنيات.... اظن بقي ان سوزي بنت طنط فكيهة مفيش فيها اي عيب.....ملكش حجة خالص

ومرة مامتها سألتني عنك وقلتلي هو اخبار ايه دلوقتي

مش نافع : يا ماما الناس كلها بتسال عن بعضها.....ام وائل بتاعت الشاي كانت برضو كل ما بتشوفني تسألني عامل ايه يا باشمهندس

معني كدا انها شيفالي عروسة؟؟

امي الحبيبة : بس...تاهت ولاقينها......ازاي دي راحت عن بالي؟

مش نافع : قلبي دب جوا القفص الصدري وكان عاوز يكسر قضبانه ويطلع يستخبي تحت السرير من الخوف وانتظار المفجأة

امي الحبيبة :هزت رسها بثقة ونظرة ثاقبة خرجت من عيناها وقالت...صافيناز بنت طنط دوللي جارت خالتك.....دي زي ما تكون متفصلة علي مقاسك بالضبط

مش نافع : مقاسي؟؟؟؟

هو انا رايح اشتري ل.......احم......منطلون ....؟؟؟

وبعدين بقي صافيناز بنت متدلعة وبصراحة انا مش بحب الدلع الماسخ بتاع بنات اليومين دولة

ترضي مراة ابنك تكون راكبة عربية موديل 2007 وابنك راكب عربية موديل 83 بتاعت ابوه وكل يوم يتخانق هو وابوه عليها وابوه يكدره ويقوله خدها والبنزين عليك يا خفيف...ويسيبوا متشحطط؟؟؟

في واحد هيروح يتجوز وهو مش معاه تمن 10 لتر بنزين....دا حتي البنزين غلي.....ايه رأيك ما نتكلم علي البنزين والاستفتاء بتاع الدستور...انا عارف انك بتحبي السياسة....والدستور نجح وجاب مجموع عالي قومي افقعي زغرودة يا حجة من اجل الديمقراطية

بدأت لغة الحوار تتغير ووش ماما بدأ يحمر...وصوتها علي اوي وبدأت ابعد اي كوبيات ومعالق واي اسلحة خفيفة من ادامها....انا مش ناقص عاهة ....

والله نفسي ابقي زي الشباب في السن دا واروح اتقدم لبنت واخطبها .....يبقي كذاب اللي يقول غير كدا

بس مينفعش ....مينفعش خالص....حطوا نفسكم مكاني يا جماعة وقولولي ايه رأيكم....ينفع والا لا؟؟؟؟

الابتسامة

السلام عليكم

وسط ضرب النار والصوت العالي والزعيق والعصبية اللي الواحد فيها

والخنقة من الحياة واللي فيها سمعت جملة شدتني شوية وغيرت المود بتاعي من فترة كبيرة

جملة اتقالت بصوت عالي جهوري...يزلزل الارض تحت رجليك

وكأن الزمن وقف عند سماعها

خرجت هذه الجملة علي شكل بيت شعر بليغ لا يخرج إلا من فحول الشعراء في العصور الثرية باللغة العربية والبلاغة والادب

علي الرغم من أنها خرجت من حنجرة شخص بسيط عادي....بائع متجول

قال هذا البائع بصوته الذي يرتعد له البدن

((مش كل حتة لحمة بيضا تبقي وزة....ولا كل بت لبست كت تبقي مزة))

وأول مرة منذ زمن بعيد أوي أعرف طريق الابتسامة

لقيتها جميلة أوي....والله جميلة أوي الابتسامة

قررت اني هأجل موضوع الجزء التالت من ضد التيار وهكتب لأول مرة عن الابتسامة

الابتسامة التي لا تفرق بين شاب وعجوز....هي كما هي...لا تجد أحد مهما كان سنه لا يستطيع الابتسامة.....سهلة...بسيطة...مش متعبة....مش محتاج لدوا السكر والضغط.....مش لازم بعدها أجري اخد حبوب مهدئه....ولا أدهن مرهم روماتيزم....ممكن يكون عندك 114 سنة ولسا بتعرف تبتسم.....يبقي أعرف من دلوقتي الابتسامة هي الحاجة الوحيدة اللي هتفضل معاك لغياة ما تستريح وتريحنا وتمشي من الدنيا.....الله أعلم بعدها هتبتسم تاني والا لا....

ما علينا

الابتسامة لا تعرف فقير من غني.....ولكن هناك نظرة فلسفية قد تنبهت اليها وأنا افكر في الابتسامة.....الغني يدفع الكثير ليبتسم....(يدخل سنيما يدخل مسرح ) أي نيله علي دماغة المهم يضحك ويفرفش.....اما الفقير فيبتسم وهو يأخد مال اقل بقليل من الذي يدفعه الغني لكي يبتسم

....يعني لو عملنا تعاون مشترك بين الفقير والغني الاتنين هيبتسموا

الغني هيدفع ملاليم للفقير.....هو مش الغني بيدفع عشان يبتسم...والفقير بيبتسم لما ياخد

يبقي الاتنين هيبتسموا

ومش هيبقي فيه حقد علي الاغنياء اللي الفلوس عندهم اكوام اكوام

وسعتها المسارح والسنيمات هيتقفلوا والممثلين مش هيلاقوا سبب يقلعوا فيه هدومهم ويطلعوا عريانين ويمكن يتوبوا ويبطلوا فساد

وممكن ينتحروا عشان مبقاش حد بيتفرج عليهم وهما عريانين

والله بدعيلهم....يا ربنا يهديهم يا يهدهم ويخدهم

شوفوا الابتسامة عملت ايه؟؟؟

الابتسامة ليس لها جنسية معينة...ليس لها بلد ولا لون معين

يستطيع كل من علي وجه الارض ان يبتسم.....دون أي تعب

دون الحصول علي إذن من الامم المتحدة ومجلس الامن

عندما تبتسم ليس هناك شخص يدعي البرادعي يأتي لتفتيش منزلك ظنا منه بوجود اسلحة نووية تحت السرير

ليس هناك اقمار صناعية تراقبك وتعرف لون ملابسك الداخلية ظنا منهم ان لونها له علاقة بالابتسامة

لن تكون اراهبي ومتطرف وتتهم بأحداث 11 سبتمر

لن يزج بك في المعتقلات ولن تذهب الي جونتناموا

لن تخرج لك هذه المرأة الشريرة التي تاتي فقط في الكوابيس...التي تدعي كوندليزا رايس...(أخ لو يحكموني علي سيخ محمي ويشوفوني هعمل في كونداليزا ايه)....كونداليزا التي لا تبتسم....كونداليزا التي تظهر اسنانها القبيحة وقد يظن الكثير انها تبتسم...

فليس هناك اي قانون دولي يمنع الابتسام

نعم سوف أبتسم وليذهب بوش وتوني بلير وعم سيد بتاع الكشك الي الجحيم

أما اجمل وأرق ابتسامة فهي التي تخرج من البراءة بكامل معانيها

الطفولة....والجمال....النعومة والبساطة والشفافية....هذه هي الابتسامة النقية....لا يشوبها نفاق ولا رياء ولا مداهنة

أجمل أنواع الابتسامات وأعذبها

يطير قلبك لرؤيتها

ما أجمل الابتسامة

وانتم.....لماذا لا تبتسموا......جربوا الابتسامة واجعلوها دوما في وجهكم

تحياتي لكم بوجه باسم

ضد التيار _الجزء الثاني

السلام عليكم
كنت وعدتكم بعد ما اخلص الجزء الأول من ضد التيار اني هعمل جزء تاني
ومكدبتش خبر
اول نقض كان في الجزء الاول كان علي اللت والعجن والرغي والاسهاب اللي كان في الجزء اللاول
سمعنا الكلام
وهندخل في الموضوع علي طول
ايه بقي...هنتكلم في ايه عن الجزء التاني؟؟؟
هقول انا...هنتكلم عن انواع المدونات والردود عليي الموضوعات اللي فيها من خلال الجولة التدوينية في مدونات الغير

الاخت كلبوزة اللي شرفتني بالرد علي الجزء الاول قالت اننا لا يجب ان ننقد الغير
فكلنا عيبوب
نعم كلنا عيوب...بس انا مش هقول اسماء مدونات او اشخاص بعينهم
هتكلم علي تصنيفات وفئات معينة
مؤقتا يعني لو الامرو مشيت علي ما يرام يبقي مفيش مشكلة.....

عشان في اي لحظة الذئب

اللي

جوايا هيطلع ويقلب التربيزة علي الكل...انا في الدماغ وقلتلكم اني بحب الرومانسية اوي بس لما الاقي حاجة تقرفني مش بشوف ادامي.....

نبدأ التصنيف من الاول خالص

مدونات قذرة موضوعاتها تخاطب الغرائز الجنسية.....وديه عليها اقبال شديد جدا من الجماهير

امم...ضرب نار عشان الضيف يقول تعليقه...لدرجة ان اصحبها بيفلتروا الردود والتعليقات
يا تري بيفلتروها ليه؟؟؟
مش مهم...المهم والأفظع من كدا ان أصحبها بيكونوا سيدات متزوجات
لا حول ولا قوة الا بالله
مش مدونة واحدة....لا كتير...ومشهورين جدا...احنا اتفقنا اننا مش هنقول اسماء
بس يعني هي صاحبة المدونة ديه او صاحبها عاوز يقول ايه؟؟؟
ايه اللي جواه عاوز يتكلم عنه....المفروض هي او هو عدوا مرحلة المراهقة

انا في رأيي انهم عاوزين جلسات طب نفسي.....
في الفاظ وكلام وتلميحات والله مفيش حد عنده ذرة حياء يقدر يسمعها
شطارة ...؟؟؟
والا جراءة...؟؟
والا ايه بالضبط
اولادك او اولادك لما يشوفوا امهم او ابوهم بيعملوا كدا...احاسسهم هيكون عامل ازاي
انا بتكلم علي ظاهرة واضحة....مش مراهق فتح مدونة وحط فيها صورتين....لا دي مدونات من الوزن التقيل.....اصحابها ناس كبيرة ...بس مش محترمة.....وضيوفها برضو ناس كبيرة وبرضو مش محترمين

دي اول فئة من الفئات التدوينية
ودوله هيخدوا رمز الشبشب
يعني لما نجيب سيرتهم في الكلام هنقول عليهم الشباشب
مع الاعتذار للشباشب



حرية شخصية بقي....اقول اللي انا عاوزة

مش هطول عليكم.....في إنتظار التكملة
يتبع......................

ضد التيار _الجزء الاول

السلام عليكم
قررت الخروج في جولة في مدونات الاخرين لعلي استشف ما يدور بداخل اصحاب الاقلام الاخري

ايه؟؟...كلامي صعب....بلاش نتكلم بالعربي....ماشي
نهيس ونتكلم باللغة اللي الناس بتحبها
مهلا يا رفاقي.....هل سأغير اسلوبي وما احبه بسبب رغبات الاخرين
هل انت تكتب لمجرد ان تكتب...أم انت تكتب لتجتذب الاخرين؟؟؟؟
هل تكتب لنفسك ولتخرج ما في داخلك....ام تتبع اهواء ضيوفك
لا عليكم....انه مجرد شئ انتبهت له وانا اعزم تغيير اسلوبي

نتكلم زي ما الناس تحب....اديني في التهييس
كنا بنقول ايه؟؟
اه.....كنت ببرشط علي مدونات الناس التنيين....بشمشم يعني وبشوف ايه الحوار والكلام علي مين
واللي كان بيعجبني كنت بقف في طبور الردود....واللي مكنش بيعجبني كنت بكرمش مدونته واخليها لوقت عوزة...سعات المناديل بتخلص والوحد بيكون متزكم ومكسل ينزل يشتري مناديل
اهو برضو مدوناتهم بيكون ليها فايدة.....في واحد خفيف بيقول خدها معاك الحمام....
ماشي يا عسل...مش هزعلك

المهم لقيت حجات كتير جدا استفزتني وحرقت دمي.....قبل اي شلوت او كعب عالي يترفع علي دماغي اسمعوني للأخر
انا عارف انكم هتقولوا ان التدوين دا حرية شخصية
وان المدون بيكتب اللي هو عاوزة

لا....التدوين مش حرية شخصية
لو حرية شخصية يبقي تقفل باب الردود واللي كتبته يكون لنفسك بس
مدام فاتح الباب للناس انها تدخل عندك يبقي لازم تلتزم بحدود معينة
اقلها التقاليد والحياء....

يمكن هو دا اللي خلاني اكتب موضوعي باللغة الدارجة وابعد شوية عن استعمال اللغة العربية....مؤقتا

حاجة تانية برضو لفتت نظري جدا
هو ان كل الناس بتتكلم في السياسة بنفس الكلام والاسلوب
نفس الفكر....مواضيع مكررة
واللي شاغل الناس كلها تعديلات الدستور...الانتخابات....الاحزاب السياسية

طيب وحضرتك يعني متأخذنيش في اللفظ...انت مالك بتعديل الدستور...وهو لو اتعدل زي ما انت عاوز ايه الجديد او المفيد؟؟؟

انت فاكر انك هتغير حاجة....هأو أو....بتضحك علي نفسك والله.....مبدأ الحكومة عندنا هنا جملة شهيرة جدا
وهي الكلاب تعوي والقافلة تسير

هتقولي لازم المواطن يبقي ليه مشاركة ايجابية
هقولك برضو ولا مؤخذة ايجابية ازي يعني حضرتك مش فاهم...اخرج في مظارهة وامسك ميكروفون واقول سعد سعد يحي سعد؟؟
والا اقول كفاية حرام ...والا اقول لا للتوريث
دي بقي الايجابية.....؟؟؟

معلش خلونا نتناقش بموضوعية شوية
قبل ما النقاش يحمي ...إن كان في حد دخل وقرا اساسا اللي المكتوب عاوز اقولكم اني مش جديد اوي في عالم التدوين ولا حاجة
انا بقالي تقريبا سنة بكتب وبقرأ وبدخل مدونات وبتفرج علي عجب العجاب

وقبل ان يتهمي بعض النصحاء والاذكياء واللي امهم مش مربياهم بالخيانة والجاسوسية واني عميل للحكومة وجاسوس لأمن الدولة ولازم المدونون يتكاتفوا لمواجهتي اقولهم اتلهوا علي عينكم واتنيلوا اسكتوا
متفتكروش نفسكم حاجة....


بكل صراحة وبكل موضوعية معظم الناس معجبيين بشخصية غريبة اوي اسمها علاء
ومسمينه شيخ المدونين

وكل الناس بتسير علي نهجه....حتي هو صدق نفسه ...ومع البريق الاعلامي والشهرة اللي اخدها سي علاء والست الغندورة مراته بقي بطل قومي في نظر المدونين

وخصوصا بعد ما اعتقلوه .....عارفين انا لو اعرف مين اللي اعتقل علاء دا انا اضربه بالجزمة ولا مؤخذه...مش حبا في سي علاء....لا عشان عمل منه بطل

دخلت مدونة سي علاء اشوف ايه الحكاية...اصل انا لما بسمع انهم بيوزعوا حاجة بروح اجري اقف في طوابير علي طول

وما اقذر ما قرات
والله لا ابالغ
ما وجدت اقبح ولا اقذر مما قرأت....الكلام دا كان من سنة تقريبا
في بداية معرفتي طريق التدوين


وخرج علي الساحة اتجاه غريب اوي اسمه حركات المدونين ...تظارهات المدونين...انتفاضة المدونين....واللي يموت من الضحك تلاقي ان في كمان افراح وجواز للمدونين

ايه الكلام دا يا جماعة.....

معقولة معظم تفكير الشباب كدا؟؟؟
مصيبة

ايوة اننا نفتح موضوع للنقاش زي الرد علي موضوع قتل الاسري اللي اتذاع في قناة اسرائيل (روح شكيد)....وفتح مواضيع عن الانتفاضة والمسجد الاقصي والكلام عن ترسيخ القيم الاصيلة فينا كعرب
مننساش اننا عرب

مش واحد مسقط منطلونه لغاية ركبته ومربي شعره لغاية كتافه وماسك سجارة في ايده وبيطالب بالاصلاح ؟؟؟
لما يبقي راجل الاول....يبقي يطالب بالاصلاح ويقف يتكلم....اما بقي لو ماشي ولا مؤخذه (الاندر وير ) بتاعه مشجر وملون وماشي في الشارع يبقي دا مش عاوز اصلاح
دا عاوز حاجات تانية مفيش مجال اننا نحكي عنها هنا

لسا الموضوع متقفلش......

يتبع.............................................

تجربة جديدة

لم يتبقي سوي الشهر تقريبا علي التحاقي بكلية الضباط الاحتياط

يري البعض ان المصاب عظيماً...وأن مستقبلي قد إنتهي

فقد تخرجت من كلية الهندسة قسم الاتصالات والالكترونيات....وكلي أملي أن أجد فرصة العمل في مجالي الذي اخترته وأحبه جدًا

ولكن تأتي الرياح بما لا تشتهي السفن كما يقولوا

عندما تقدمت للتجنيد في مطلع هذا العام لمعرفة هل سيتم طلبي أم سأفوز بالتأجيل وأكون محظوظاً كما رفع الجميع أكف الضراعة داعيين الله ان يرزقني بهذا

ولله الحمد علي كل ما يختاره...فهو العليم العالم

تم طلب دفعتنا من خريجي هندسة الاتصالات الي التجنيد كضباط احتياط

لا أخفي عليكم....جاءني شعور غريب...هل أنا حزين ...أم أنا سعيد لخوض التجربة.....والتمرين الحقيقي علي حياة الذئاب

لا أعرف...ولكن حدث ما حدث....وحاولت جاهداً أن يتم رفضي كضابط احتياط وقبولي كجندي

ولكن هيهات...الامر صعب جداً....وما زاده صعوبة إكتمال لياقتي الصحية والبدنية ومروري من كشف الهيئة وإجتيازي له

نعم الجندي أحسن حال من الضابط.....

فالجندي فترة تجنيده 12 شهر

اما الضابط 27 شهلا...منهم 9 شهور في كلية الضباط الاحتياط يعيش ويعامل كجندي في كل شئ حتي في راتبه الشهري

لذلك كانت الأعين تبكي حسرة علي عدم الاستطاعة علي الفوز بالجندية.....ولله الحمد رب السموات

ما يريده الله يكون...فأمره ماضِ ولا مغير لحكمه

ولتكن هذه الفترة هي فترة جديدة وتجربة مهمة في حياتي.....نعم إنها كذلك

سوف أنظر الي نصف الكوب الممتلئ.....وسوف أدون كل ما تعلمته في حياتي الجديدة

وسوف ينتظرني اصدقائي الذئاب.....وانا لن انساهم

شكرا لأخي صاحب مدونة

frozen love

http://m-rashed.blogspot.com/

علي موضوع القوات المسلحة المصرية

نظرة عكسية

ماذا لو نظر الذئب هذه النظرة التي ينظرها اليه البشر
هل سيمقتهم كما سيمقتونه؟؟؟
انهم مقيتون
تعالوا احكي لكم قليل من نتائج هذه النظرة العكسية

في مجتمع الذئاب هناك زعيم وقائد....يتقدم المجموعة...يكون اكبرهم سنا...وأقواهم واشرسهم...واكثرهم خبرة
دوما يضع نفسه في المواجهة...ويخرج لملاقاة اي خطر
وهذا لا ينتقص من قدرات بقية القطيع الذي يقف خلف قائده طائعا له...يستعد للمواجه وغطاء ظهره
إذن فهو مجتمع منظم....
ايضا قد يعيش الذئب وحيدا....يسمونه قاطع طريق.....لا بأس يا صديقي الذئب...دعهم يقولوا ما يحبون
فلنا عالمنا الخاص
اما في عالمهم...لا تجد الا النفاق....والمداهنة....الكبير يقف خلف الصفوف دوما
يأمر وينهي ولا يواجه
بل المواجهة للصغير....الضعيف
وإذا شاخ زعيمهم...نبذوه....وحقروه....ويجلس ينتظر الموت
هم لا يفهمون مجتمعنا...يقولون دوما ان شريعة الغاب فيها البقاء للأقوي
اغبياء هؤلاء البشر....فهم ينقضون مجتمع الغاب...ويأتون بالقبيح في عالمهم ودنياهم القذرة
ما ابشعهم
إنهم يصفون الذئاب بالغدر والخيانة
كذبوا
فالغدر والخيانة من اختراعهم
لا يغدر ذئب بذئب ابدا
اتذكر قول شاعرهم حين قال

نعيب زماننا والعيب فينا...وما لزماننا عيب سوانا
ونشكو الدهر من غير ذنب...ولو نطق الزمان بنا هجانا
يأبي الذئب يأكل لحم ذئبا...ويأكل بعضنا بعضا عيانا

نعم الذئاب لا تأكل بعضها البعض ابدا....ولا يخونون بعضهم البعض

ذكر الذئب له وليفة وحيدة....

هي دنياه وحبه...ولا ينظر لغيرها ابدا....وهي ترعي صغاره وتورثهم مل يحتاجونه لدنياهم
اول ما تورثه لهم.....كره اعدائهم....والحذر من غدر اعدائهم

في مجتمع الذئاب حب لا يوجد في مجتمع بنو البشر
نعم انها هذه الكلمة التي تشوهت كثيرا في عالمكم بنو البشر


اما عند الذئاب...فالحب مازال وسوف يدوم

غدا سيكتمل القمر....وستبدأ حفلتنا

خلف التلال

لماذا الذئب؟؟؟
كلهم يكرهونه؟؟؟
يخافون مجرد ذكر اسمه
لماذا يُظلم كثيرا......من قديم الازل وهذا الذئب يقع فريسة للظلم
قد ظلمه إخوة يوسف عليه السلام ونسبوا اليه قتل النبي...وهو برئ منه...
الذئب لا يقتحم البيوت....لا يخطف أطفالكم
لا يغتصب نسائكم
لا يسكب ماءكم....لا يلقي الرمال في آنية طعامكم
لماذ تكرهونه؟؟؟
لأنه يأكل أغنامكم؟؟
هي تذهب بأرجلها وتقصوا عن إخواتها
هي تستحق ذلك صدقوني
هي مدللة...تسمونها بأحسن الاسماء....تهتمون بها....تغذونها وتسهرون علي راحتها
ولا أحد يهتم بالذئب....تنهروه إذا اقترب
وتشهروا في وجهه هذه الالة المقيتة المسماه بالبندقية
التي يخرج من أعينها نارا تخترق قلب الذئب المسكين
فإذا به يعتصر الما ولا يجد من يُسعفه
مسكيناً يا صديقي...يا ليتني كنت هناك....أفتدي هذه النيران وأحطم هذه الالة اللعينة
ما زلتم تفترون عليه......
اني أراه صديقي ....في هذا المكان خلف التلال
هناك الكثيرون منهم
عند إكتمال القمر.....نجتمع جميعاَ.....ونبدأ حفلتنا الصغيرة
لا يعكر صفوها شئ.....
أما في دنياكم......فلا أمان....ولا حب.....حتي القمر
لا تشعرون بوجوده
...بسلاحكم الرهيب المسمي بالتقدمأفسدتم كل شئ ....وحاربتم كل شئ
حتي الذئاب....حاربتوهم وطاردتوهم....إختبأوا منكم خلف التلال
ليس هناك وحوش آدمية خلف التلال
فقط.....انا والذئاب
اليلُ مؤنسنا....يُغطينا بستارهِ الاسود.....ويُضئ اعلاه القمر في تمامه كالقنديل
كل شئ هناك صديقنا....الشجر...والنخيل...جداول الماء
سيمفونية الطبيعة تعزف أرق الالحان
لا يخطأ عازف فيها
جداول الماء يخرج منها خريراً يُذيب القلوب
وتتمايل الاشجار وتصفق أوراقها بحفيف في تناسق عجيب يسلب الالباب
وتداعب الرايح كثبان الثري وعيدان القصب حتي يكتمل العزف
أما طير الليل فيشدوا مغنياً......ويقف كل شئ هناك يشاهدني أنا وذئابي ونحن نرقص....
اتركوني مع ذئابي
فقد مملت دنياكم