Translate

الثلاثاء، 20 مارس 2007

ضد التيار _الجزء الاول

السلام عليكم
قررت الخروج في جولة في مدونات الاخرين لعلي استشف ما يدور بداخل اصحاب الاقلام الاخري

ايه؟؟...كلامي صعب....بلاش نتكلم بالعربي....ماشي
نهيس ونتكلم باللغة اللي الناس بتحبها
مهلا يا رفاقي.....هل سأغير اسلوبي وما احبه بسبب رغبات الاخرين
هل انت تكتب لمجرد ان تكتب...أم انت تكتب لتجتذب الاخرين؟؟؟؟
هل تكتب لنفسك ولتخرج ما في داخلك....ام تتبع اهواء ضيوفك
لا عليكم....انه مجرد شئ انتبهت له وانا اعزم تغيير اسلوبي

نتكلم زي ما الناس تحب....اديني في التهييس
كنا بنقول ايه؟؟
اه.....كنت ببرشط علي مدونات الناس التنيين....بشمشم يعني وبشوف ايه الحوار والكلام علي مين
واللي كان بيعجبني كنت بقف في طبور الردود....واللي مكنش بيعجبني كنت بكرمش مدونته واخليها لوقت عوزة...سعات المناديل بتخلص والوحد بيكون متزكم ومكسل ينزل يشتري مناديل
اهو برضو مدوناتهم بيكون ليها فايدة.....في واحد خفيف بيقول خدها معاك الحمام....
ماشي يا عسل...مش هزعلك

المهم لقيت حجات كتير جدا استفزتني وحرقت دمي.....قبل اي شلوت او كعب عالي يترفع علي دماغي اسمعوني للأخر
انا عارف انكم هتقولوا ان التدوين دا حرية شخصية
وان المدون بيكتب اللي هو عاوزة

لا....التدوين مش حرية شخصية
لو حرية شخصية يبقي تقفل باب الردود واللي كتبته يكون لنفسك بس
مدام فاتح الباب للناس انها تدخل عندك يبقي لازم تلتزم بحدود معينة
اقلها التقاليد والحياء....

يمكن هو دا اللي خلاني اكتب موضوعي باللغة الدارجة وابعد شوية عن استعمال اللغة العربية....مؤقتا

حاجة تانية برضو لفتت نظري جدا
هو ان كل الناس بتتكلم في السياسة بنفس الكلام والاسلوب
نفس الفكر....مواضيع مكررة
واللي شاغل الناس كلها تعديلات الدستور...الانتخابات....الاحزاب السياسية

طيب وحضرتك يعني متأخذنيش في اللفظ...انت مالك بتعديل الدستور...وهو لو اتعدل زي ما انت عاوز ايه الجديد او المفيد؟؟؟

انت فاكر انك هتغير حاجة....هأو أو....بتضحك علي نفسك والله.....مبدأ الحكومة عندنا هنا جملة شهيرة جدا
وهي الكلاب تعوي والقافلة تسير

هتقولي لازم المواطن يبقي ليه مشاركة ايجابية
هقولك برضو ولا مؤخذة ايجابية ازي يعني حضرتك مش فاهم...اخرج في مظارهة وامسك ميكروفون واقول سعد سعد يحي سعد؟؟
والا اقول كفاية حرام ...والا اقول لا للتوريث
دي بقي الايجابية.....؟؟؟

معلش خلونا نتناقش بموضوعية شوية
قبل ما النقاش يحمي ...إن كان في حد دخل وقرا اساسا اللي المكتوب عاوز اقولكم اني مش جديد اوي في عالم التدوين ولا حاجة
انا بقالي تقريبا سنة بكتب وبقرأ وبدخل مدونات وبتفرج علي عجب العجاب

وقبل ان يتهمي بعض النصحاء والاذكياء واللي امهم مش مربياهم بالخيانة والجاسوسية واني عميل للحكومة وجاسوس لأمن الدولة ولازم المدونون يتكاتفوا لمواجهتي اقولهم اتلهوا علي عينكم واتنيلوا اسكتوا
متفتكروش نفسكم حاجة....


بكل صراحة وبكل موضوعية معظم الناس معجبيين بشخصية غريبة اوي اسمها علاء
ومسمينه شيخ المدونين

وكل الناس بتسير علي نهجه....حتي هو صدق نفسه ...ومع البريق الاعلامي والشهرة اللي اخدها سي علاء والست الغندورة مراته بقي بطل قومي في نظر المدونين

وخصوصا بعد ما اعتقلوه .....عارفين انا لو اعرف مين اللي اعتقل علاء دا انا اضربه بالجزمة ولا مؤخذه...مش حبا في سي علاء....لا عشان عمل منه بطل

دخلت مدونة سي علاء اشوف ايه الحكاية...اصل انا لما بسمع انهم بيوزعوا حاجة بروح اجري اقف في طوابير علي طول

وما اقذر ما قرات
والله لا ابالغ
ما وجدت اقبح ولا اقذر مما قرأت....الكلام دا كان من سنة تقريبا
في بداية معرفتي طريق التدوين


وخرج علي الساحة اتجاه غريب اوي اسمه حركات المدونين ...تظارهات المدونين...انتفاضة المدونين....واللي يموت من الضحك تلاقي ان في كمان افراح وجواز للمدونين

ايه الكلام دا يا جماعة.....

معقولة معظم تفكير الشباب كدا؟؟؟
مصيبة

ايوة اننا نفتح موضوع للنقاش زي الرد علي موضوع قتل الاسري اللي اتذاع في قناة اسرائيل (روح شكيد)....وفتح مواضيع عن الانتفاضة والمسجد الاقصي والكلام عن ترسيخ القيم الاصيلة فينا كعرب
مننساش اننا عرب

مش واحد مسقط منطلونه لغاية ركبته ومربي شعره لغاية كتافه وماسك سجارة في ايده وبيطالب بالاصلاح ؟؟؟
لما يبقي راجل الاول....يبقي يطالب بالاصلاح ويقف يتكلم....اما بقي لو ماشي ولا مؤخذه (الاندر وير ) بتاعه مشجر وملون وماشي في الشارع يبقي دا مش عاوز اصلاح
دا عاوز حاجات تانية مفيش مجال اننا نحكي عنها هنا

لسا الموضوع متقفلش......

يتبع.............................................



هناك 10 تعليقات:

أبو أمل يقول...

إيه ده يا بنى
انت راسك مقطوعة
راسك مقطوعة يعنى بتتكلم كتير
على مهلك واوجز
وبلا الإسهاب
ولا تزعل نفسك
تعالى عندى
وانت هترتاح
ولا سياسة ولا يحزنون

Sampateek يقول...

انا مبحبش انتقد تصرفات الناس و افكارهم
لاني ببساطة مليانة عيوب ممكن اتشغل بتصليحها عن اني ارصد عيوب غيري

طبيعي الناس تختلف في ارائها
و الا بارت السلع

فرصة سعيدة

الراقص مع الذئاب يقول...

هو انا لسا قلت حاجة
دا لسا الموضوع طويل اوي يا اخ ابو امل
اسعدني تواجدك

الاخت سمبتيك
مدام سمحتي للناس انهم يقراوا مدونتك ويعلقوا عليها يبقي لازم يتحرموا تصرفاتهم

انا لو في عيب هتحمل اللي يقولي عليه

اسعدني مرورك

خمسة فضفضة يقول...

السلام عليكم

اشاركك الرأي نفسه
ياريت تقرا تعليقي علي البوست اللي فات

وشكرا علي جرأتك في طرح الموضوع

خمسة فضفضة يقول...
أزال المؤلف هذا التعليق.
mohandat يقول...

السلام عليكم
والله يا اخي انا صوتي اتنبح اني اقول للناس ان مش كل المدونين كويسين وهدفهم الاصلاح في ناس اوسخ من الحكومه ولو مسكو البلد فعلا هيخلوها بزراميط ان جاز التعبير
ربنا يهدي
اخوك مهند المصري
الباحث عن الحقيقة

NoHeal يقول...

ايه اللي خلاه ضد التيار ياعم
ده هو ده التيار الرئيسي وما عداه كلاب تعوي

حوريه يقول...

المسلم مرآة المسلم
ان لم يقل لى أخى عن عيوبى بقصد اصلاحها فلا أعتبره أخا لى ..
بالفعل فيه مدونات و مناقشات على مواقع محترمة تحتاج الى اعادة نظر
جزاك الله خيرا ايها الراقص مع الذئاب
استمر فكرتك كويسه و ستكون مثمرة انشاء الله
شكرا على زيارتك الجميلة لمدونتى ارجو تكرارها
حوريه

الراقص مع الذئاب يقول...

mohandat
هو دا اللي احنا عمالين نغني فيه يا مهند....بس مين يسمع
....سعات كتير بحس ان المدونات ضررها اكبر بكتير اوي من نفعها
جزاك الله خيرا علي المرور وتشريفك ليا

NoHeal
الله يكرمك جبرت بخطري
من زمان مسمعتش حد بيقتنع بالللي انا بقوله
تحياتي لك واتمني دوام تواجدك معي

حوريه

جزاك الله خيرا علي مرورك الكريم وحرصك علي فتح كل الموضاعي يا استاذة نادية
وشكرا علي مساندتك الجميلة
اسعدني جدا مرورك...ويسعدني تعليقك بما انك اول الزائرين لمدونتي....

Bossy يقول...

انا قلت ابتدي من الاول بما اني اول مره ادخل هنا بس بجد هايل ون شاء الله اما اخلص قراه الموضوع دا هقول راي