وطاش الحذاء

السلام عليكم ورحمة الله وبركاته

اكتب اليكم موضوعي اليوم بلون الدم القاني....فهواللون (الموضة للمسلمين) للسنة الجديد

ما أبشع ان تبدأ يومك بمشاهدة أشلاء اخوانك المسلمين في غزة

نعم قد ألفنا مشاهدة الاشلاء والدماء ...فقط لأجساد المسلمين في اي بقعة من بقاع الأرض

أنت مسلم...إذن فدمك وعرضك مستباح لأي كلب

وما أكثر الكلاب....ولكن أبشع ما في الأمر ان يكون هذا الكلب من بنو جنسك....كلب عربي ...بالأسم فقط

والأبشع من هذه وذاك ان يكون هذا الكلب هو ولي أمرك....القائم علي شئونك والأمين علي مالك وأهلك وعرضك

هل يعترض البعض علي اسلوبي الهمجي والفاظي التي تزعج أذانهم....أظنها اخف وطئاً من قذائف المقاتلات ودانات المدافع والدببات ...

عذراً أخواني...فاني مريض بالغيرة علي من هم ينطقون بالوحدانية

ولقد تحاشيت وتجنبت الكتابة في مواضيع الصراعات والمواجهات ونداء الجهادلأني احس اني أصرخ ولا يسمع صوتي غيري.....

وقد قال احدهم : قد أسمعت إذ ناديت حياً....ولكن لا حياة لمن تنادي

لا حياة لمن ننادي فيهم بالجهاد ولا يحركون ساكناً

لا يا اخواني انتم لستم ببعيد عن مخالب الشيطان.....إنه مخطط....

ودورنا آت لا محال ولكن لن نستطيع المواجهة ولا الصمود...

أن الطين الذي أعتلي رؤوسنا والخزي الذي اعتدناه قد احني ظهورنا

قد حققنا نجاح منقطع النظير في الجبن والاستكانة والوهن والضعف وحققنا ارقام قياسية في التنديد والشجب والاستنكار

فما المعني بأن نشدوا بمجداً ماضياً حينا؟؟؟

وما المعني بأن نجتر نصر اكتوبر وحطين؟؟

نشدو ونغني ونهلل.....وقد فزنا في جولة واحدة فقط.....والحرب لم تنتهي

اخرجنا الكلاب (معذرة لأصحاب المشاعر الرقيقة) من أرضنا في حرب مجيدة كريمة نصرنا الله فيهاوكأننا انتهينا ....

الحرب لم تنتهي بعد....نحن عرب مسلمون...

جسد واحد...

اصيب جزء منه بسرطان....إذن في الجسد كله عليل ومريض وفي إنتظار الموت

إني أعرف اني اكتب كلاماً ولا أحرك ساكناً مثلي مثل الاخرين....

وأعرف اني جزء من منظومة عربية فاشلة تتعدي حدودها من المحيط الي الخليج

كل اسلحتها طائشة لا تصيب أهدافها...

حتي الحذاء....

لم يصيب وجه بوش الكلب

الي متي يا أمة الاسلام.....الي متي ستسيقظين علي مشاهد أشلاء أخوانك....؟؟

هل جفت ينابيع الهدي وأجدبت فينا......؟؟

هل حقاً أصاب القحط وادينا.....؟؟

وآسفاه علي أمة كغثاء السيل

لم يتبقي إلا بضعة أيام علي احتفالات رأس السنة الميلادية .....

ها قد اصطبغت الأرض العربية وارتوت بدماء أخوانكم وأشلاءهم.....

هل ستتراقصون علي أشلائهم ودمائهم ابتهاجاً بالعام الجديد مثل كل عام....

أم ستغلي الدماء في عروققم وتهبوا لنصرة دينكم....

لا أستطيع ان أحسن الظن بكم.....فالنستعد جميعاً لرقصة السنة الجديدة......

الرقص علي اشلاء اخواننا...علي اغاني بقصائد من الشجب والاستنكار...وموسيقي قذائف الدبابات والمدافع...وترديد متناغم بصراخ من حناجر المسلمين في غزة

كل عام وانت بلا مبالاة وبرود

شخصيات قذرة - 1

السلام عليكم ورحمة الله وبركاته

في الموضوع اللي قبل اللي فات وعدتكم اني هعمل سلسلة وهسميها شخصيات قذرة

طبعاً في إخوة وأخوات اعترضوا علي الجزء دا من الموضوع و انا بحترم وجهة نظرهم جدا يا جماعة

بس للأسف الفئة اللي انا هتكلم عنها مينفعش تتقابل برد فعل غير اللي انا هقوله او هتكلم فيه
يعني دي ناس زي ما شبهتم بانهم إذا ضرب النعال وجوههم صرخ النعال بأي ذنب اضرب

معلش اللي بيستاء ويمضعض من كلامي وتشبيهاتي يستحملني شوية...ويكمل الموضوع للأخر...

هنبدأ رحلتنا في التعرف علي اول ضيوفنا من الشخصيات القذرة الناهرده

وبقدملكم بكل مفخرة السيد وزير الاوقاف كأول ضيف في صالون الشخصيات القذرة الناهدره ....نرجوا من سيادتكم ارتداء كمامات الأنف... وتحضير كيس بلاستيك (لزوم الترجيع) وأي برشام لعلاج الأسهال...عشان مع ضيفنا العزيز حجات كتيرة اوي هتحصل

فاكرين الفلطعيس بتاع زمان...ايوة الله ينور عليكم...الناس القديمة اللي معدتش بتيجي عندي وخاصمتني كانت عارفة الفلطعيس دا ايه....اتكلمنا فيه عن فكرة وزير الاوقاف الهمام في حرمان المؤذنين من رفع الاذان واستبدالهم بتسجيلات صوتية عن طريق ما يسمي بتوحيد الاذان

دا إن دل علي شئ يدل علي جهل هذا الرجل بأبسط امور الدين...وهو الاذان ...والحكمة من رفع الاذان

انتم عارفين يا جماعة ان الأذان لا ينقطع من علي وجه الارض في كل دقيقة....زير الاوقاف بقي عاوز يحافظ علي المظهر الحضاري

دي كانت احدي افكاره الفذة

تعالوا بقي نتكلم في اخر نوادر شخصيتنا النهارده الا وهو:

إصدار كتاب جديد بعنوان: "النقاب عادة وليس عبادة"

مش بس كدا ....لا....دا اعتبر النقاب "حاجزا عن التواصل بين الناس" ، وقال: إن "ذلك الحاجز أصبح ينتشر وبسرعة بين النساء... (مصيبة...مش كدا؟؟)

ورفض في الكتاب محاولات تفسير النقاب على أنه علامة على التدين ، وقال: إن ذلك "أمر مغلوط لا بد من توعية الناس به" ، وشدد على أن النقاب لا صلة له بالحرية الشخصية وإنما هو "ضد الطبيعة البشرية وضد مصلحة الوطن ، بل إنه إساءة بالغة للدين وتشويه لتعاليمه" (يعني اللي هتلبس النقاب بتخون الوطن...وبتشوه الدين)

دي قشور من اللي قاله ضليع عصره وأوانه زقزوق افندي بلّ الندي طرطوره في إحدي زقزوقياته المستفزة

بصوا يا جماعة....النقاب فرض او سنة دي بتاعت العلماء المسلمين....علماء السلمين.....تالت مرة علماء المسلمين

زقزوق مش من العلماء طبعاً....دا واحد موظف في الحكومة مزحلق شعره بالجيل

تعالوا نسأله شوية أسئله كدا بخصوص الكتاب اللي عمله دا

انت ايه اللي مزعل اهلك من النقاب؟؟

ليه وصفته بانه تخلف ورجعية ؟؟

علي اي اساس قلت انه عادة ومش عبادة؟؟

طيب ممكن توضح اكتر ازاي المنتقبة بتخون بلدها؟؟ دا حتي النقاب لونه اسود ودا لون من الوان علم مصر الثالثة

ايه هي الادلة الشرعية لصدق قولك...وهل انت مفوض للفتوي ؟؟

هل انت اغزر علم من ابن باز وابن العثيمين رحمهما الله؟؟

هل تجرأت في مرة انك تنتقد يسرا وعادل أمام؟؟

هل تجرأت في مرة انك تكتب كتاب تحارب فيه التبرج والسفور؟؟

ما هي مكانة المايوه البكيني وقدره في تقدم ورقي الأمم؟؟

هل يجوز للمرأة المسلمة لبس المايوه البكيني علي الشواطئ وفي القري السياحية (فقط) ؟؟

هل النقاب يسبب الأذي لأحد؟؟...هل بيساعد علي تعاطي المخدرات؟؟؟ هل يساعد علي انتشار الرذيلة وإثارة الشباب وظهور ظاهرة التحرش؟؟

ســــــــــــــــــؤال اخير....هو انت عاوز تشوف وشهم ليه.....؟؟

انت المفروض انك راجل....والرجال (الرجالة وخدلي بالك انت ) مأمورون بغض البصر ...والنساء كمان

قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ * وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاء بُعُولَتِهِنَّ أَوْ أَبْنَائِهِنَّ أَوْ أَبْنَاء بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُوْلِي الْإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاء وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِن زِينَتِهِنَّ وَتُوبُوا إِلَى اللَّهِ جَمِيعًا أَيُّهَا الْمُؤْمِنُونَ لَعَلَّكُمْ تُفْلِحُونَ

دا كلام ربنا يا زقزوق....وخدلي بالك انت ...كلام ربنا...انا بتكلم عن غض البصر ومش هتكلم عن تفسير الآية عشان دا شئ خلص من زمان وأهل العلم حسموا هذا الأمر وخلاص....يعني احنا مش منتظرين شيخ الأسلام حمدي زقزوق يجي بقي يخترع دين جديد

دين مودرن كدا نقصقص ونلزق فيه زي ما احنا عاوزين....نأيفه يعني

حسبنا الله ونعم الوكيل

وأنتي يا اختي المنتقبة....(المنتقبة بجد مش زي اللي اتكلمنا عليهم في دبوس من الدبابيس) لا تبالي بكلامهم...حتي لو اصابكي الأذي اصبري واحتسبي.....

ارجو اني مكنش جرحت شعور بعض الاخوة والأخوات اللي كانوا رافضين فكرة الموضوع

بس للأسف لازم نواجه الموضوع بالطريقة ديه....دي حرب علي الاسلام

جــــــــــزاكم الله خيـــرا

الدبووووووووووووس

دا لينا احنا كشباب مصري الشهامة بتجري في دمه

مش عيب خالص انك تكون راكب احد المواصلات وتقوم وتقعد حد أكبر منك أو حد تعبان أو حتي بنت....بتبقي حاجة وحشة اوي لما نشوف واحد كبير راكب في اي مواصلة وشباب زي الورد قاعدين وشايفين الراجل متبهدل او الست متبهدلة وهما مش في دماغهم حاجة

وصلت لدرجة ان في واحد كبير قال لشاب لو سمحت يا ابني قوم وقعدني مكانك عشان انا مش قادر اقف

لا يا جماعة....متوصلش لكدا...قبل ما يفكر يقولها أكون انا قمت وقعدته

وفيها أيه لما شاب يقوم ويقعد بنت (لوجه الله مش عشان يجر معاها كلام) انتوا عارفين الزحمة بتبقي عاملة ازي وميصحش ابدا نسيب اختنا تقف في وسط زحمة ومكان ضيق ...في ناس مش بتتقي ربنا وبتستغل المواقف ديه استغلال سيئ....سيب يا سيدي اللي يتكلم يتكلم ...واللي يقول عليك بترسم او بتمثل الشهامة...خلي أجرك عند ربك مش عند الناس...

ياريت الشهامة اللي بجد ترجع تاني في المواقف ديه يا جماعة عشان الوضع بقي سيئ اوي ....ومان كان المصري مشهور بالشهامة والجدعنة...والا دي كمان انقرضت وبقت صفة مذمومة؟؟

ودمتم في خير

عيش لطخ تموت مستور

السلام عليكم ورحمة الله وبركاته

كيف الحال يا اخواني واخواتي الكرام

يا تري لسا فاكرني......يا تري لسا موجودين

هكذا حال الدنيا في تغيير مستمر...مش مهم...انا برضو مقصر مع اخواني هنا ومش بدخل علي المدونات كتير

المهم بقي انا جاي اقولكم اني توصلت لشئ جميل اوي وعاوزكم كلكم تستفيدوا منه زي ما انا استفدت كدا

هو مبدئ ازاي نعيش في مصر في الايام اللي جاية

الا وهو...

عيش لطخ تموت مستور

هضربلكم مثل كدا عن اللي بيحصل في البلد اليومين دوله وهثبتلكم ان تفكيري ونظريتي صحيحة 100%

سمعت خير اللهم اجعله خير ان البلد هتتقسم علينا كلنا....

كل واحد وصل سنه 21 سنة هيهبر هبره من البلد

حتي لو انت صاحب اعلي شهادات....أو من سائقي المكروباصات ..أو من مسلكي لا مؤخذه البلعات

هتاخد حصتك ونصيبك من بلدك (مش عارف ليه جه علي بالي دلوقتي المثل اللي بيقول البقرة لما بتقع بتكتر ساكاكينها)

طبعاً انا من اصحاب الامية الأقتصادية ولا فخر....

يعني معلوماتي عن الأسهم والبورصة والأزمات الاقتصادية زي معلومات اي واحد من حضراتكم عن انواع البكتريا اللي بتعيش في أمعاء طائر الرخ الاسطوري.....

ومش عاوز حد يفهمني ايه اللي هيحصل بالضبط والحكومة الواعية بتفكر في ايه...خليني كدا مع الزحمة ...مش لازم ابقي ضيف من ضيوف الفضائيات ويبقي عندي وعي اقتصادي

بس بلا ادني شك انه خزوق محترم هيطلع من نفوخنا...

لأن الحكومة عندنا العدو الأول والأخير ليها هو المواطن المصري.....

طيب هتفرق حاجة انك تفهم المخطط اللي بيتعمل ضدك...انت اكيد عارف انه ضدك...بس هتقدر تغيير حاجة؟؟

اه هنقدر طبعاً نغير...هنعمل مدونة نندد ونشجب وندين ونقول لا لتقسيم مصر

وممكن كمان نلم شوية مدونين حلوين ونشتري 10 متر قماش من مصروفنا أو نوفر ونجيب ملابسنا الداخلية القديمة ونعمل لافتات ونكتب عليها لا لبيع مصر......

ونجمع شباب روشين علي الفيس بوك ونعمل جروب كول اوي عشان خاطر مصر بلدنا متروحش من ادينا...

قشطة علينا يا رجالة

انا مش بهمش من دور المدونات وحركات الشباب اللي علي الانترنت

إطلاقاً...لأنهم ملهمش لزمة من الأساس

التهميش دا لحد ليه دور بسيط او كلمة وصوت مش مسموع

انما شباب الانترنت لا ليه كلمة ولا صوت...فلا يستحق كلمة التهميش لأني شايفها كبيرة عليه وممكن تخلي ليه قيمة

أمال انت فاتح المدونة ديه ليه ؟؟

(سبق وقلت قبل كدا اني فاتحها غلاسة ومحدش ليه دعوة بقي....ام عبدو بتاعت السمك عندها إميل ادرس وويب سايت وهتفتح مدونة....اشمعنا انا يعني....وبعدين انا سمعت ان الحكومة هتعمل مدونة لكل مواطن مع مشروع رغيف الخبز )

طيب ايه رأيك بقي في الاحزاب والحركات السياسية والتيارات والمسميات

اكيد ليها دور في إصلاح البلد....

أه هو فين الدور دا؟؟؟

عشان بس اعرفكم ان نظريتي هي اللي صح في الاخر

عشان متنسوهاش (عيش لطخ تموت مستور)

الحكومة المصرية عندنا يا جماعة بسم الله ماشاء الله عليهم

شوية عربجية...والله مع الاعتزار للعربجية عشان اتحطوا في تشبيه قذر

من أول رئيس الوزراء طويل الساقين لغاية وزير الزراعة اللي بيسعي جاهداً لزيادة محصول المكرونة ومعجون الاسنان علي حساب القمح والأرز والذرة

انت كمواطن كان ليك أي دور في اختيار شوية الحناطير ديه؟؟؟

طيب في نواب مجلس الشعب من الناس ديه.....الكراسي اللي قاعدين عليها ديه بأصوات الغلابة (الحمد الله انا مش غلبان ومش بصوت لحد) بيعملوا علي الكراسي ديه ايه لما بيروحوا المجلس؟؟

ايه التغييرات اللي بتحصل بسببهم وبقراراتهم

ولا حاجة.....القافلة ما زالت تسير....خليني مؤدب ومش هقول الكلاب تعوي

يبقي لما تعيش لطخ بمزاجك احسن والا لما هما اللي يستلطخوك؟؟؟

اكيد لما تعيش لطخ بمزاجك دا احسن بكتير اوي

واتحدي اي حد من أصحاب الشعارات الحماسية انه يطلع يقولي ان محدش مستلطخه

---------------------------------------------------------

ملحوظة

الموضوع السابق ليس دعوة لليأس أو الأحباط أو الاستسلام إنما هو نظرة تهكمية علي حالنا الذي يسوء يوماً بعد يوماً

إن الله لا يغير ما بقوماً حتي يغيروا ما بانفسهم

يعني إبدأ بنفسك

وإلا كيف يستقيم الظل والعود أعوج؟؟

الدبوووووووووووووووووووس

مفيش دبوس الناهرده .....ومن غير ليه

تناتيــــــــــــــــــــش

السلام عليكم

كل سنة وانتم طيبين....والسنة اللي جاية كل مسلم علي وجه الارض يكون في احسن الأحوال قولوا آمين

قبل ما نرجع للتدوين والمواضيع التقيلة هنسخن كدا بشوية تناتيش صوغيورة

التنتوشة الأولي :

هو ايه بقي حكاية (مهند ونور)ديه.....وبالذات اللي اسمه مهند دا.....أدخل موقع او منتدي أو مدونة الاقي صورة البيه محطوطة في البروفيل بتاع الناس...حتي أي واحدة حامل عاوزة تسمي ابنها مهند (يا بختك يا مهند يا باحث عن الحقيقة)

لالالالا...محدش يفهم غلط....انا مش بحقد عليه ولا متغاظ منه عشان هو وسيم وزي القمر والبنات كلها بتموت فيه...

انا بس يعني عاوز اقولكم ان في نسبة وتناسب يعني....ان كان في مهند في تركيا ففي حجات كتيرة في لبنان....

من الاخر كدا احنا لايقين علي بعض....مش كدا برضو؟؟

انتم عارفين ...مشوار صغير للبنان ايه اللي ممكن يحصل...المقررات هناك سهلة اوي...والشاب المصري الاسمر ابو دم خفيف عملة نادرة اوي هناك....يعني بلاش مهند عشان انتوا اللي هتخسروا....مهند مش هينفعكم

طبعاً ديننا الجميل أمرنا رجال ونساء بغض البصر ولم يقصر غض البصر علي الرجال فقط يا جماعة.....لو حبيت يا أخي الكريم تضع مواصفات لفتاة أحلامك خليها كخير نساء العالمين.....تمناها زي مريم ابنت عمران الطاهرة....آسيا إمرأة فرعون التي باعت ملك الدنيا ببيت في الجنة.....خليها زي ام من أمهات المؤمين.....كصحابية جليلة حملت علي كتفيها الأسلام كالرجال

وانتي يا اختي الكريمة....خلي فتي احلامك يكون زي ابو بكر الصديق في رقته وقوته....مثل عمر في ورعه وصلابته....مثل عثمان في حيائه ....مثل علي في حكمته.....تخيلي رفيق عمرك من هو يتخذ رسول الله صلي الله عليه وسلم نبراسه وقدوته

التنتوشة التانية:

الشاعر بيقول ...قوماً إذا ضرب النعال وجوههم صرخ النعال بأي ذنب أُضربُ

يعني ولا مؤخذه بالبلدي كدا لو ضربت فلان او فلانة بالشبشب علي وشه الشبشب هيشتكي ويصرخ انت ضربتني ليه

مفهوم صح؟؟؟

طيب قصدك علي مين

دي بقي هتبقي سلسلة مواضيع بجهز فيها وإن شاء الله قريب اوي هنزلها بأسم شخصيات قذرة

زي وزير الثقافة كدا ووزير الأوقاف وسعاد صالح وخالد يوسف وعاهرات السنيما المصرية اللي حاطين رسنا في الطين جوا وبره...وزي الخنزير مفيد فوزي وغيره من عباد الصليب اللي بقي ليهم صوت

وناس كتيرة اوي هنتسلي عليهم واحد واحد

التنتوشة الثالثة :

كمان 5 أيام ذكري نصر حرب اكتوبر....الحرب ديه غالية اوي علي المسلمين وعلي العرب وعلي مصر يا جماعة

في اصوات بدأت تظهر من فترة قريبة بتحاول انها تبخس او تشوه صورة الحرب ديه

لدرجة ان في بعض الأقلام القذرة قالت ان مصر انهزمت في 73 ......اقلام مأجورة لتهميش نصر ربنا كرمنا بيه

لما سمعنا حكايات عن الحرب من القادة والمحاربين القدامي ايام فترة الكلية العسكرية السنة اللي فاتت عرفنا حجات كتيرة اوي مكناش عرفينها قبل الجيش

الناس حكت كلام ومشاهد في الحرب يمكن لو حكيتهالكم هتقولوا انهم مجانين ....بس احنا عارفين الناس دي كانت ايه ووضعها كان ايه في الجيش وقت الحرب

ومش ممكن يكذبوا أبداً.......عشان كدا أنا هحتفظ بكلامهم ومواقفهم اللي خلتنا نبكي في المحاضرت اللي كانوا بيلقوها علينا ايام الكلية

والله حسيت بشرف وفخر اني مكتوب في بطاقتي مصري واني فرد مقاتل في الجيش المصري .....اللي هيفضل خير جنود الارض كما اخبرنا صلي الله عليه وسلم

الجيش بتعنا جيش قوي ومحترم....والفرد المقاتل يتم إعداده علي اعلي مستوي وفي اشراف واهتمام بكفائته القتالية من كل القادة

ممكن يكون في ناس دخلت الجيش هنا وخدمت في اماكن مش حيوية اوي وشافت فساد او خمول او اهمال

بس لو في حد اشترك في مناورة او حظه جه في مشروع او تفتيش حرب اكيد هيقول كلام غير كدا

اتمني اني اعرف اوصلكم الحقيقة اللي اختفت وظهر مكانها اليأس وعدم الثقة في القوات المسلحة

التنتوشة الأخيرة بقي :

هيبقي سؤال.......الناس هتسألهولي وانا هسأله لنفسي

يعني ايه تناتيش؟؟؟

وهل ليها علاقة بالدبابيس؟؟؟

اولا انا مش عارف يعني ايه تناتيش...اسم كدا جه علي بالي

وليس له اي علاقة قريبة او بعيدة بالدبابيس.....الدبابيس بنشك نفسنا بيها

اما التناتيش فدردشة في اكتر من موضوع....وبس

وكل عام وانتم بخير

شهر رمضان ترفق

السلام عليكم ورحمة الله وبركاته

يا شهر رمضان ترفق

دموع المحبين تُدفق

قلوبهم من ألم الفراق تشقق

عسى وقفة للوداع أن تطفئ من نار الشوق ما أحرق

عسى ساعة توبة وإقلاع أن ترفو من الصيام ما تخرق

عسى منقطع عن ركب المقبولين أن يلحق

عسى أسير الأوزار أن يطلق

عسى من استوجب النار أن يعتق

عسى رحمة المولى لها العاصي يوفق

اخواني واخواتي واحبابي في الله

ها قد مضي شهر الرحمات والخيرات تودعه عبرات المحبين

ولولا رحمة الله علينا بفرحة العيد لأخذنا التعازي علي مضي نفحات الخير

اللهم اغفر لنا تقصيرنا في رمضان

اللهم بلغنا رمضان أعواماً عديدة ...وأزمنة مديدة

سلاماً سلاماً شهر الصيام والقيام والخير كله

فاز فيك من فاز...وخسر من خسر

اللهم اجعلنا من الفائزين وتقبل منا بضاعتنا المزجاة وأوف لنا الكيل وتصدق علينا يا عزيز الشكور

كل عام وانتم بخير اخواني في الله....اعاد الله عليكم هذه الايام المباركة بالخير والبركات إن شاء الله

فليفرح المسلمون والصائمون بالعيد الذي هو هدية الطائعين من الله عز وجل

---------------

الموضوع مُحدث التاريخ من العام الماضي

وكل عام وانتم بخير

إمتحان

السلام عليكم

بعتزر للمرة الألف عن الغيبة والأنقطاع والتقصير في زيارة الاخوة والأخوات الكرام

بس ربنا اللي يعلم ظروف الشغل عاملة ازاي.....والاجازات بقت شئ نادر أوي....القادة بيحز في نفسهم انهم يوافقوا علي الاجازة....زي ما يكونوا بيقطعوها من لحمهم

المهم المواضيع كتيرة اوي ومش عارف اتكلم في ايه والا ايه

بس مع التعريج السريع علي المدونات الصديقة لقيت ماشاء الله الناس مغطيين الاحداث الجارية بمواضيع محترمة

وهحاول اندمج معاهم شوية بفكرة قديمة.....الموضوع الناهرده هيبقي علي شكل إمتحان....أسئلة وإجابتها

يارب الفكرة توصلكم انا عاو اقول ايه....نبدأ علي بركة الله

السؤال الأول :


بم تفسر (علي الا تزيد الاجابة عن سطرين فقط عشان الناس متزهأش) :


1-خروج ممدوح إسماعيل من قضية العبارة زي الشعرة من العجينة ؟

عشان احنا رجالة ووقفنا وقفة رجالة - زي الوقفة اللي وقفناها مع وزير الزراعة الأسبق يوسف والي كدا في قضية المبيدات المسرطنة....انا مش شايف اي غرابة في اللي حصل..ِشئ طبيعي ومتوقع..في حد كان نفسه في حاجة تانية؟




2- صحة المقولة اللي بتقول عدوك عدو دينك (يعني النصاري) عشان محدش يستهبل ويقول اليهود والمجوس والهندوس ويطنشهم ؟

والله دي عن تجربة شخصية بقي ....عاوز تتفرج علي كرههم ليك ولدينك إظهرشعائر دينك...يعني اتكلم في الدين ديماً وهما موجودين

(موضوع اختنا الفاضلة مجداوية ثري جداً....ياريت تتفضلوا وتقرأوه هنـــــــــــــــــــــــــــــــــــا )

3- إنتشار الأفلام القذرة التي تظهر المجتمع المصري وكأنه ملهي ليلي كبير (كباريه يعني)


وهذا لإستجلاب السائحين الخليجين (الغنم بتوع البترول) عشان لما يتفرجوا علينا واحنا عريانين يجوا عندنا يفرفشوا وعن طريقها نشجع (السياحة) وتزود الدخل القومي ونسد العجز اللي ظهر نتيجة زيادة الملاليم اللي زادت علي المرتبات - فكر إقتصادي بحت


السؤال الثاني:

في ضوء قانون المرور الجديد وما تفعله الحكومة المصرية دائماً في محاولة لقصقصة ريش الشعب المصري...وبالرغم من هذا استفادت فئة كبيرة جدا (من معدومي الدخل) من قانون المرور الجديد وطلعت سبوبة حلوة ......اشرح بالتفصيل مغزي (حلوة مغزي ديه) الجملة السابقة ؟


لأن لو حضراتكم وقفتوا في اي إشارة هتلاقوا شباب زي الورد بيبيعوا المثلث بتاع التنبيه....شوفوا بقي مصانع البلاستيك اللي تحت السلم فكرت تستفيد ازاي من عمل المثلث دا بتكلفة رخيصة...وشغلت مناديب لتسويق المثلث دا في الاشارات والمواقف بأسعار رمزية....شوفتوا بقي قانون المرور الجديد فتح كام بيت وشغل كام شاب...ولسا بقي لما شنطة الأسعافات الأولية تنزل بمواصفتها....العقول المصرية هتعمل ايه ....واهو كل اللي راكبين عربيات ناس اغنية ومعاهم فلوس.......فيها ايه لما ينفعوا الغلابة اللي مش معاهم عربيات....واهو بدل الموضة بتاعت بيع الفل في الأشارات.....نغيرها ونخليها مثلثلت وشنطة الأسعافات الاولية .....إن قانون المرور الجديد ينطبق عليه مقولة : مصائب قوم عند قوم فوائد




السؤال الثالث


في الأوانة اخيرة ارتبط ظهور اي خراب علي الشعب المصري باسم المدعو أحمدعز بتاع الحديد....في رأيك الشخصي وبعد ظهور قانون المرور الجديد ....هل انت شامم ريحة الراجل دا فيه؟؟


طبعاً....هو مش فيه قانون نزل بينص علي إعدام السيارات اللي قبل سنة معينة وإستبدالها بسيارات جديدة (خاص بالأجرة)...أهو عز بقي هياخد السيارات القديمة ديه كصفقات حديد خرده....وانتم عارفين الباقي


السؤال الرابع......ذو صلة وثيقة بالسؤال الثالث

تفتكر في حد ورا عز ...يعني في أيد بتحركه .....والا هو الراجل دا طيب وغلبان وربنا سترها معاه والتراب بيتحول في ايده

مش هجاوب علي السؤال ده ......عشان في تلميح سخيف انا مش هقبله ......يا ساتر عليكم....مش سايبين حد في

شعب شقي اوي






السؤال الخامس (يستحسن يكون معاك منديل عشان تجاوب علي السؤال دا وانت بتبكي من الحسرة والذل والإهانة)


ما المقصود بكلاً من :


الشعب المصري


هو شعب مغلوب علي امره اقصي أمانيه السفر للعمل في الخليج او الهجرة الي اوروبا (للعمل أيضاً) وليس

وفي كلا الأحوال بيموت غرقان ....غرق بطريقة شرعية (مع ممدوح إسماعيل) وغرق بطريقة غير شرعية (عن طريق الهجرة الغير شرعية)


الشعب العربي


شعب يجترمجداً ماضياً حينا...يتغني بمجد صلاح الدين ومحمد الفاتح وعبد الرحمن الداخل وطارق بين زياد....ينظم أبيات الشعر الحماسية....وينتج الحلم العربي والضمير العربي ..... ثم يسافر البعض منهم لقضاء عطلته في اي بلد اوروبي ....يشرب الخمر ويجالس العاهرات ويقامر بأمواله





العالم الأسلامي


تحققت فيه نبؤة الرسول صلي الله عليه وسلم ....فهم غثاء كغثاء السيل.....لا يحركون ساكنا

لم تنتهي الأسئلة,,,,,,,,ما دام حالنا كما هو....سننتقل من إمتحان الي إمتحان

إمتحان لا يكرم فيه المرء....بل يذل ويهان.....ويهان

الدبوووووووووووووووووووووس

لايتبقي الا القليل علي الشهر الكريم

الدبوس دا بشك بيه نفسي قبل ما اشك بيه اي حد

لو مجهزناش نفسنا من دلوقتي لأستقبال الشهر الكريم هنضيع منننا الكتير

ياريت نقلل من الخروج ومن النت ومن اي حاجة تلهوا عن زكر الله

نحط لنفسنا كدا جدول نمشي عليها نظبط بيه نفسنا.....محدش يقول هبدأ علي رمضان

إستحالة هتعرف تستمر....متستناش رمضان عشان تبدأ تلتزم......ادخل رمضان وانت مسخن من قبلها

حتي لا تصاب بشد عضلي......ويندرج تحت جملة شد عضلي بقي المسلسلات والافلام والكاميرا الخفية والبرامج الجميلة بتاعت التلفزيون المصري الرائع اللي بيتفنن انه يضيع رمضان علي المسلمين

عاوزين كمان نشك بالدبوس دا الناس الجميلة رواد الخيب (الخيم ) الرمضانية ورمضان منها برئ

ورحلات السحور الجماعي...رحلات الفسوق الجماعي طبعاً.....مهازل وانحلال لا يرضاه الله عز وجل في خير الايام

معلش الدبوس متأخر وكان لازم يبقي من شهر فات ...بس ممكن نلحق نفسنا دلوقتي

نزود ورد القرآن الكريم ....ورد قيام الليل....نزود من ايام الصيام....نزود من الصدقة

نبطل بقي بعد عن ربنا ونرجع تاني....

اللهم بلغنا رمضان

الله بارك لنا في شعبان وبلغنا رمضان

اللهم بلغنا رمضان ووفقنا لصيام نهاره ولقيام ليله وتقبل منها ولا تجعلنا فيه ممن خاب وخسر

لو لم يقدر لنا الله اللقاء قبل رمضان استودعكم الله الي ما بعد رمضان إن قدر الله لنا البقاء

إقرأوا هذا الموضوع كتبته بخصوص التدوين في رمضان عسي الله ان ينتفع به الأخوة والأخوات الكرام

هنـــــــــــــــــــــــــــــــــــــــا

الأسماعيلية

السلام عليكم

كيف حالكم يا شباب....وحشتوني والله
بس ظروف الشغل والبعد عن المعشوقة الجميلة

بلدي

مع حر الصيف والخنقة اللي احنا فيها موضوعنا الناهرده هيبقي خفيف خفيف يعني

ومن غير دبابيس.....خلينا ناخد أجازة صوغيورة ونروح اسماعيلية مع بعض

أيوة انا عازمكم في موضوع الناهرده علي زيارة حببتي الجميلة...اسماعيلية

اتقضلوا معانا.......

-------------------------------

أحب في البداية طبعاً إني أبدأ الموضوع بصورة المسجد دا ..مسجد أبو بكر الصديق....من أكبر المساجد اللي في منطقة القناة...إنشاء شركة المقاولون العرب....المهندس الكبير عثمان أحمد عثمان رحمه الله...ودا كان آخر عمل ليه قبل وفاته....هو طبعاً زي ما انتم عارفين اسمعلاوي الأصل...وشيعت جنازته من هذا المسجد رحم الله المعلم وجزاه خير الجزاء علي كل ما قدمه لمحافظته وحبه الشديد لها

-------------

هنبتدي الحكاية من زمان اوي....من غير زهق وكتر كلام تعالوا نرجع لأكتر من 140 سنة....

دي كانت حفلة إفتتاح القنا ة فى 16/11/1869 و بدأ العمل في شقها فى 25/4/1859 ....يعني أكتر من 10 سنين ذل وسخرة.....كان اسمها قرية التمساح ...ودا عشان هي بتطل علي بحيرة هادية اسمها بحيرة التمساح....ومحدش يقولي عشان فيها تماسيح....هي البحيرة اسمها كدا وخلاص....الناس اللي كانت بتشتغل في حفر القناة كان أغلبهم من الصعيد......عشان كدا معظم السكان الأصليين للبلد صعيدة في الاصل....وانا واحد منهم طبعاً...

بالنسبة للصورة بقي.....

عبارة عن 3 منصات خضراء مكسوة بالحرير خصصت الكبرى للملوك و الأمراء و الثانية لليمين لرجال الدين الإسلامى و منهم الشيخ مصطفى العروسى و الشيخ إبراهيم السقا و الثالثة للناس التانية و جلس بالمنصة الكبرى الخديوى إسماعيل و مسيو دى لسبس و الإمبراطورة أوجينى إمبراطورة فرنسا وفرنسو جوزيف إمبراطور النمسا و ملك المجر و ولى عهد بروسيا وضيوف كتير تانية

مش هنحكي في تفاصيل الحفلة كتير عشان الملل

وبعدها تم إطلاق اسم اسماعيلية علي المحافظة نسبة للخديوي إسماعيل

-------------------

اللي بعده....

تبع الحفلة برضو ...يعني القناة أيام زماااااااااان

------------------------------

اللي بعده....

صور أبيض وأسود مش ألوان....وهسبها بدون تعليق....معلش كان لازم أحطها....لأن دا جزء مهم أوي في حياة البلد ديه وأهلها....عشان الناس تعرف أحنا بنحبها أوي كدا ليه....هي بتاعت مصر كلها.....بس يمكن أهل القناة يحسوا بيها أوي عشان التهجير والبعد عن الموطن والشحططة في مصر كلها

البد فاضية وكئيبة...والحزن مغطيها

--------------------------------------------

ودي برضو صور ابيض وأسود.....بس علي النقيض طبعاً

فرحة مصر كلها....وفرحة خاصة بينا احنا

-----------------------------

اللي بعده..

دي صور لبعد معالم إسماعيلية

مبني الأرشاد...ويعتبر العقل المدير لقناة السويس...وهو بيطل علي بحيرة التمساح اللي بتخترقها قناة السويس

---------------

اللي بعده...

صور لبعض المنازل اللي متصممه علي الطراز الفرنسي واليوناني القديم...ودي في الأحياء القديمة في اسماعيلية...زي حي الافرنج كدا

--------------------

اللي بعده......

دا أسمه تمثال النصر

التمثال دا حكايته غريبة أوي

اللي صممه فنان ومهندس ديكور أسمعلاوي أسمه عبده هاشم...عارفين صمممه بأيه؟؟

صمممه بشظايا دانات المدافع والدببات...وكمان الطائرات اللي كانت بتقع ايام 73..كانت الحجات ديه في الشوراع زي الطوب من كترها

الراجل دا جمعها ولحمها مع بعضها وطلع تمثالين غاية في الروعة

وفي تمثال تاني متصمم بشظايا حرب 67 أسمه الصمود ومتصمم بنفس الفكرة بس وضع التمثال مختلف

-----------------

اللي بعده...

صورة لأحد معدات هيئة قناة السويس والمسؤلة عن تطهير وخدمة القناة والاشراف علي مرور السفن

------------------

اللي بعده....

كورنيش الاسماعيلية
------------------------

اللي بعده...

و أهم ما يميز الاسماعيلية الجميلة

اللون الاخضر

-----------------

اللي بعده..

في ناس تعرف عننا إننا بحب الكورة اوي

وبنحب فريقنا اوي

لالالا...هما غلطانين...احنا بش بنحب الكورة وبس

احنا مجااااااااااااااانيييييييييين كووووووووووووووورة

ومجانييييييييييييييييييييين بحب الدراويش...اجمل واحسن فريق

وكمان بنحب ولدنا اوي ....ومش هنسبهم بالساهل.....رغم أنف الاعداء (.؟؟؟؟؟؟؟.)

(تم حذف كلمة الأهلي من بين القوسين ووضع مكانها علامات الاستفهام حتي لا تحدث بغضاء ومشاحنات)

ابن الاسماعيلية البار احسن لاعب في افريقيا...حسني عبد ربه

----------------------------

معلش يا جماعة طولت عليكم....ومعرفتش اجيب صور اكتر من كدا....بس هي أجمل من الصور بكتير أوي....ويارب كلكم تيجوا عشان تشوفوا بنفسكم

---------------------------------------------------------

الصور معظمها متجمعة من اكتر من موقع من مواقع الاسماعيلية ...والحقوق محفوظة ليهم طبعاً

http://www.ismailyonline.com/

http://www.elismaily.com/

http://www.alismailia.com/

احلام دنيا......

السلام عليكم

في نص الاسبوع الوحدة والملل قتلوني قلت انزل اتمشي شوية في شوارع المحروسة

وبما إني في مكان في وسط أحياء القاهرة الراقية الفسحة بيبقي ليها شكل تاني

بتبقي فلسفية شوية

يمكن عشان انا من سكان الأقاليم (اسمعلاوي) معندناش فوارق إجتماعية واسعة أوي زي اللي موجودة في العاصمة

بلدنا هادية وجميلة ونظيفة وأهلها ناس بسيطة....بتيجي الساعة 8 في الشتا الشوارع بتبقي فاضية

أيوة... في الصيف بنسهر شوية لغاية الساعة 12....بس عشان احنا مصيف صغير علي أدنا

إنما حياتنا كلها مش مبهرة ....ودا اللي مخلينا بنحب بلدنا أوي ومتمسكين بيها...حتي في تشجيع الكورة.....ومحدش هيعرف دا غير ولاد بلدنا أو اللي عاش عندنا...

نزلت في وسط الأسبوع أتمشي في أحد الميادين الراقية....واتفرج علي السيارات الفارهة وأصحابها من ذوي الحلاّت وأربطة العنق الشيك

وتتأبطهم زوجاتهم بملابس لا مجال الأن لزكر تفاصيلها....ربنا يرزقنا غض البصر...وتسبقهم أطفالهم بملابسهم الزاهية ولا تخلوا أيديهم من العاب عجيبة ومتقدمة مواكبة للعصر

مفيش مشكلة...ناس خارجين ...ملناش دعوة

وبجوار أحد فروع سلسلة المطاعم الشهيرة في هذا الميدان تجد منظر يجذبك

الواجهة الزجاجية الشفافة التي تكشف رواد المطعم وأمامهم أشهي المأكولات

وشاشات عرض تلفزيونية ضخمة تعرض أكثر من قناة أوروبية أغلبها يعرض بطولة أمم أوروبا اللي خصخصوها

أخوكم وقف من بعيد عشان يشوف حتة من الماتش اللي شغال عشان يحكي لصحابه ويفشر عليهم قال يعني مشترك في الجزيرة بلس وبيشوف بطولة أمم أوروبا...ويحبذا بقي لو وسعت معاه وراح قلهم إنه شاف الماتش الفلاني في المطعم الفلاني في الحتة الفلانية

ويحلف علي كدا ....

بس اللي شدني بقي واللي خلاني أوجع دماغ حضراتكم منظر مؤلم

طفلة لا يتعدي عمرها ال5 سنوات.....مستلقية علي جانبها الايمن بجوار سور المطعم وغارقة في النوم

طفلة من أطفال الشوارع اللي كانوا شايلين همهم الفترة اللي فاتت ومرة واحدة الموضوع نام

مأساة بكل ما تحتويه الكلمة من معاني

بنت نحيلة الجسد....حافية القدمين....متسخة الملابس الرقيقة التي لم تتبدل من علي جسدها الضعيف منذ شهور

طبعا أكيد انتوا متخيلين منظرها وشفتوه كتير

بس محدش شافها وهي نايمة ...وكمشانة في نفسها زي العصفورة

اي حد لو بص في وشها الجميل اللي الدنيا اخدت منه وردية الطفولة وسابتله سواد الشارع

بس لسا الجمال سايب اثره....جمال طبيعي من عند ربنا.....جمال البرائة

شعرها لونه بني وسايح ونازل علي عنيها وجبينها....

وقفت أتأملها وانا نفسي اصحيها وأسألها سؤال واحد بس

نفسك في ايه؟؟؟

تتخيلوا معايا الأجابة هتكون ايه من دنيا؟؟

انا سميتها دنيا

هل هتقولي انا نفسي انام شبعانة ولو ليلة واحدة؟؟

والا هتقولي انا نفسي انام في بيت بين أب وأم...او علي الأقل حد يهتم بيا من غير ما يكون في أحداث أو ملجأ

يا تري نفسها تلبس زي ولاد الناس اللي في المطعم اللي جنبنا....وتمسك لعبة زيهم....ممكن تكون تجرأت وفكرت انها تحلم تاكل من الأكل اللي بينه وبينها سور ولوح زجاجي شفاف

ولما حاولت تاكل بواقي الأكل اللي بيترمي في الزبالة يا تري عمال المطعم عملوا معاها ايه؟؟؟

مسألتش نفسها في يوم انا ذنبي ايه في اللي انا فيه دا؟؟

مخفتش من المجهول؟؟؟

دنيا بنت.....عارفين يعني ايه بنت.....كمان 10 سنين و يمكن اقل الوضع هيبقي رهيب

دنيا هتبدأ تدخل في سكك كلها شوك....ومش هتسلم منها

وممكن تبقي السبب في إستنساخ اكتر من دنيا

مفيش مفر...دي بنت

مفيش حدود دنيا هتلتزم بيها......دنيا اتحكم عليها بمصير وسكة واحدة

في الف ناب وظافر مستنيين عشان ينهشوا لحمها

رحماك يا الله

وايه تاني يا دنيا؟؟

اكيد لسا الحلم أو الكابوس دا مجاش علي بالك....

خلينا في احلام سنك....احنا شايفينه 5 سنين....بس يا تري الخمس سنين بتوعك زي الناس العادية....والا كل يوم بيعدي عليكي بياخد منك حجات وببيدلها بحجات تانية

بياخد منك البرائة والجمال....وبيبدلها بقسوة وغل

بوحشية وخوف من كل اللي حوليها....لازم تخربشي اللي يقرب منك....

لازم تعيشي....الناس ديه مش هترحمك....

هما السبب في اللي انتي فيه

فكرتي انك تخدي لعبة ابنهم وتجري

ايوة فكرتي ...بس افتكرتي بسرعة ان العسكري هيمسكك...وهيضربك ....ومحدش هيحوش عنك

وضرب العسكري بيوجع اوي....وممكن يخدك علي الأحداث....ويحصلك زي ما بيحصل لصحابك اللي راحوا هناك....واللي هرب منهم جه يحكي علي اللي شافه ويخوفك منه....

الشارع احسن من الاحداث والملجأ

دنيا متعرفش ....بس بتسمع وتتخيل....لازم هتخاف....وهتهرب...

حتي ولو هناك جنة

دنيا بتحلم وتتمني

دنيا لسا نايمة ...وانا واقف جنبها...وخلاص

حلمتلها شوية وأكيد مشيت....

ومغيرتش حاجة ....

يا رتني ما كنت نزلت ولا خرجت.....

وربنا يحفظ دنيا وأخواتها من اللي جاي

ويجعل ليهم مخرج من اللي هما فيه

الدبوووووووووووووس

الموقف دا بيحصل كتير في افراحنا يا جماعة

تعالوا نشوفه كدا مع بعض

محسن: شايف صلاح صاحبنا زي العسل ازاي وهو عريس

احمد : ايوة...ماشاء الله عليه ربنا يبارك له

محسن : وعروسته كمان زي القمر

أحمد : وانت مالك بعروسته....انت جاي تتفرج عليها والا ايه؟؟

محسن : ايه يا عم الكلام دا....دا صاحبي ودي عروسته انت بتفكر ازاي بس

(مش قصدي إن محسن نيته وحشة....بس مينفعش يقول كدا)

ومسك الموبيل وعاوز يصورهم هما الاتنين

أحمد: لا.....مينفعش...تحط صورة زوجة صاحبك علي تلفونك ليه؟؟

محسن : ايه يا عم اللي انت بتقوله دا ...انا بصور صلاح وعروسته

أحمد : هو انت بقي إن شاء الله احد محارمها عشان تحط صورة صلاح وزوجته

عاوز تصوره صوره لوحده يا عم....

ومن علوم الفوتوغرافيا إن المرأة بتخطف النظر الصورة...

محسن : انت هتتفزلك وهتفتي كمان....ايه التخريف دا بقي

أحمد : مش تخريف ولا حاجة يا محسن بص يا سيدي انت لو مسكت اي صورة فيها مجموعة من الناس وكمان من الحيونات الأليفة

هتلاقي انجذاب النظر بالترتيب الي الحيونات الاليفة ثم الاطفال ثم النساء ثم الرجال

لو عريس وعروسة متصورين هتلاقي نفسك مركز علي العروسة مش العريس

يعني حضرتك هتبقي عامل إعلان لزوجة صاحبك علي تلفونك

لأن اي حد هيمسك تلفونك هيركز اوي علي زوجة صاحبك ويتفرج عليها وعلي جمالها ...أظن دا شئ ميرضيش الرجالة طبعاً....الرجالة يا جماعة ...واخدين بالكم انتوا

ياريت يا صلاح تحافظ علي زوجتك....ومتفرجش عليها الناس....مش حاجة تشرفك لما تلاقي صورها معروضة في الاستديواهات والناس بتتأمل في جمال عينيها وشفتيها وانفها الصغير

عيب كدا...

احنا مسلمين...والغيرة علي نسائنا لازم تبقي موجودة...لو مش موجودة دي يبقي اسمها حاجة تانية

انا مش رجعي ولا متخلف ولا محبكها

بس دي سلبيات وموضوع الافراح دا لازم يبقي في اكتر من وقفة .....ولازم نننتاقش بصوت عالي عشان الناس تبدء

تسمع

وربنا يهدي

(س) و (ص) و (ع) .......

السلام عليكم

ازيكم يا شباب

عارف والله إن الجو حر ومحدش طااااااايق نفسه

وكمان الأمتحانات زنقة ناس كتيرة اوي ومحدش فاضي لحد

يااااااااااااه...كانت أيام جميلة أيام الأمتحنات...الله لا يعدها تاني

أيام السهر والدح والتركيز ومعسكر المزاكرة المغلق والأعصاب وفي الأخر برضه مش بحل حاجة وكنت بسقط

بس هتعدي إن شاء الله....ربنا يوفق كل الاخوة والاخوات اللي مشغولين في الامتحنات...ويجعلها عليهم برداً وسلاماً

نيجي بقي لموضوعنا

كنا من زمان قلنا إنننا هنتعرض لبعض السلبيات اللي موجودة فينا وجيبانا ورا خلق الله كلهم

معلش يا جماعة مش هندفن رسنا في التراب ونقول إننا احسن شعب واحسن ناس ونفضل نضحك علي نفسنا

احنا فينا ميزات كتيرة وجميلة مش موجودة عند اي ناس في الدنيا

بس عندنا مصايب تانية لازم نقف ونتكلم فيها

في عندنا فئة من الشعب المصري (ليست بالقليلة) تخاف ومتختشيش

يعني ايه ممكن توضح....

ماشي..هقولهالكم في صورة مشهد تمثيلي بسيط

(س ): راجل عادي مهذب عاوز يركب تاكسي

(ص) : صوته عاالي وبتاع مشاكل وبرضو عاوز يركب تاكسي

(ع ): سواق تاكسي بيخاف بس مبيختشيش

(س) وقف (ع) عشان يركب معاه

(س) بيحاسب (ع) بكل ذزق

(ع) شاف (س) راجل محترم قال اصيع عليه

رد وقال: ايه دا يا أستاذ....هو انا بشحت منك...انت فاكرنا نايمين في بيوتنا والفلوس بتجينا علي الجاهز

ملعون ابوها دي شغلانة....شغلانة بنت (تيييييييييييييت) وزباين ولاد (تيييييييييييييت) وبلد بنت (تييييييييييييييييييت)

والناس اتلمت عشان تتفرج

(س) طلع من جيبه زيادة عشان يسد بيها البلاعة اللي اتفتحت في وشه

ومشي من سكات

(ع) اخد الفلوس ومشي وهو حاطط في دماغة إن س دا إنسان ضعيف وغلبان وانه ضحك عليه

تاني موقف

(ص) عاوز يركب تاكسي

شاور ل (ع) عشان يركب معاه

طلع الفلوس بيحاسب (ع)......(ع ) رد عليه زي ما رد علي (س)

(ص) قاله وقف العربية....ونزل جابه من رقبته ونيمه علي الكبوت وكال له من اللكمات والصفعات ما يكفي لأنعاش مريض مصاب بأزمة قلبية حادة

(ع) اخد العلقة التمام واخد الفلوس اللي رمها في وشه (ص) وعدل هدومه وركب من سكات ومشي وهو مشغل الكاسيت بتاعه علي اغنية العبد والشطان

..................

(س) دا راجل مهذب ومحترم ومش بتاع مشاكل ....عندنا في مصر بنقول عليه غلبان.....وممكن يبقي ملطشة للناس

وطبعاً زي ما احنا عارفين مصر فيها ناس كتيرة اوي زي (ع) ......

ممكن انت نفسك تكون (ع) وانت مش واخد بالك

لو انت مدير في العمل وعندك موظف زي (ص) هتخاف منه ...ولو عندك موظف زي (س) هتفتري عليه

الموقف دا حصل معايا في اول ايام إستلام عملي ...دخلت الوحدة بكل ادب وذوق مع الكبير والصغير

ناس منهم افتكروني (س)...حبوا يعملوا (ع) ....للأسف اضطريت اني ابقي (ص) وصوتي يعلي ...

ومن بعدها الناس كلها بقت بتحترمني...أو بتخاف مني

طب ايه اللي وصلنا لكدا.....ليه منبقاش كلنا (س) بالمعني الصحيح

ليه منبقاش مهذبين في تعاملتنا من غير ما حد يتهمنا بالضعف أو الجبن؟

(ص) راجل صوته عالي وبياخد حقه بأيده .....الناس بتخاف منه

كله بيعمله الف حساب ...محدش بيقدر يتعدي علي حق من حقوقه ولا يقرب منه

كدا بقت غابة....وقانونها معروف

من عز بز ...ومن غلب افترس

للأسف (س) النقي مش هينفع يا جماعة....لازم يهجن ببعض من الجينات اللي موجودة عند ص

عشان يقدر يواجه (ع) اللي بقوا كتير اوي

يعني لازم يا (س) تلبس قناع (ص) وتتقمس شخصيته في بعض الأحيان

ودي قاعدة واسعة...ممكن تدخل فيها دول العالم

في دول كتيرة اوي زي (ع).....بتفتري علي دول زي (س)....بس برضو في دول زي (ص) بتعرف تخوف اللي يخافوا وميختشوش

ولا يتبقي ل (س) الا ...التنديد والادانة والشجب والاستنكار

وهي ديه المعادلة الصعب

امته تبقي (س)...وامته تبقي (ص)

الدبوووووووووووووووووس

الجو بدء يحرر....والهودم بدأت تخف....وتشف....وتقصر....وتقل......و.....

طب هو بعد كدا في ايه؟؟

هتتنزلوا عن ايه تاني

لا يتبقي الا ورقة التوت....وهيتحججوا إن دودة القز اكلتها

ياريت اللي يعرف حد من الجماعة ديه ينصحها في الله

ويقولهم عيب كدا....مينفعش....

اقعدوا في بيوتكم وخففوا زي ما انتوا عاوزين

بلاش تظهروا للمجتمع انكم معترضين علي الحر

انا بتكلم علي تاء التأنيث طبعاً....

علي ما اعتقد إن في ولاد (تييييييييييت) شتموا في النقاب واعترضوا عليه

من حقنا احنا كمان كأرهابيين إننا نعترض علي البكيني اللي هيبقي موضة صيف 2008 في شوارع المحروسة

خلص الكلام

وربنا يهدي

بعتزر للناس الجميلة عن عدم مروري في مدوناتهم الاسبوع دا وعدم ردودي علي تعليقاتهم في الموضوع اللي فات لضيق الوقت جداااااااا

وإن شاء الله الاجازة اللي جاية امر علي كل الناس

جزاكم الله خيرا