Translate

الاثنين، 26 مارس 2007

مش نافع خاااااااالص

ملحوظة...جميع الاسماء التي في الموضوع رمزية وغير صحيحة ولا ترمز لأي شخص بعينه.... واي إدعاء من اي شخص بوجود اسمه في الموضوع هيبقي عليا وعلي اعدائي وهجيب عليها واطيها
الحوار دا دار بين امي الحبيبة وانا...مسمي نفسي فيه مش نافع....عشان بجد مش نافع
تعالوا اسمعوا وقولولي ايه رأيكم واعمل ايه في الحكاية العويصة ديه؟؟؟
امي الحبيبة : مش ناوي يا ابني تريح قلبي؟؟؟
مش هينفع :ازي يعني يا حجة؟؟....هو انا تاعب قلبك لا سمح الله....قوليلي يمكن اكون عامل حاجة غلط ومش واخد بالي؟؟
امي الحبيبة : مش عاوز تسمع كلامي في الموضوع اللي كلمتك فيه
مش نافع : موضوع ايه....انا مش فاكر؟
امي الحبيبة: لا...انت فاكر وبتستهبل ...بطل تبحلق في المخروب (الكمبيوتر) اللي ادامك دا وركز معايا
مش نافع: هرشت في قفايا شوية وقلتلها....طيب لمحيلي كدا من بعيد وانا افهم...اصل انتي عارفة اليومين دوله
متلخبط ومش مركز في حاجة خالص
امي الحبيبة : قلتلي موضوع الخطوبة.....مش ناوي تريحني بقي وتخطب
مش نافع : اتعدلت في قعدتي وقلتلها بكل حكمة وعقل ورزانة
يا امي انا مش لاقي اكل...دا سكر لما بيشوفني بيبقي عاوز يحدفلي حتة عضمة من اللي شايلهم للزمن (سكر دا كلب رذل قاعد جنب العمارة علي طول).....هروح ادخل بيوت الناس ليه....ومين العبيط دا اللي هيرضي يجوز بنته لواحد زي حلاتي؟
امي الحبيبة : اتغير وشها مرة واحدة وقالت بصوت عالي...امشي....دا انت الف بنت تتمني تراب رجليك....بس انت شاور
مش نافع : دولة جزم و مش عارفين مصلحتهم.......احم.....قصدي يعني دولة طيبين وعلي نيتهم.....بس انا بنقلكم الصورة كما هي....معلش بقي استحملوني.....دا لو كان فعلا فيه نص واحدة اتهطلت وفكرت فيا...بس انتم عارفين قلب الام
امي الحبيبة : قلتلي طب دا طنط جولفدان اللي معايا في الشغل قلتلي انها نفسها تجوز بنتها لواحد زيك...يعني قصدها ايه بكدا؟؟؟
مش نافع : ايوة يا ماما بتجاملك...بترفع من روحك المعدنية امال هتقولك ايه...؟؟ مش لازم تفرحك بأبنك مش كل يوم بتروحي الشغل تعملي عني اعلانات....اكيد طبعا الناس هتحاول انها تنافق عشان يفضلوا صحاب
امي الحبيبة : طيب بلاش طنط جولفدان....هي فعلا بتاعت كلام
طيب ايه رأيك في لولو بنت طنت عنيات....بنت متربية ومن عيلة محترمة.....وعمر محد سمعلها صوت
مش نافع : بس طنط عنيات عاوزة تجوز بنتها لواحد مليونير.....وانتي عارفة انها حاطة منخيرها في السما....هترضي بيا وانا لسا حتي مش عارف احصل علي لقب عاطل
امي الحبيبة :طيب بلاها لولو بنت طنط عنيات.... اظن بقي ان سوزي بنت طنط فكيهة مفيش فيها اي عيب.....ملكش حجة خالص
ومرة مامتها سألتني عنك وقلتلي هو اخبار ايه دلوقتي
مش نافع : يا ماما الناس كلها بتسال عن بعضها.....ام وائل بتاعت الشاي كانت برضو كل ما بتشوفني تسألني عامل ايه يا باشمهندس
معني كدا انها شيفالي عروسة؟؟
امي الحبيبة : بس...تاهت ولاقينها......ازاي دي راحت عن بالي؟
مش نافع : قلبي دب جوا القفص الصدري وكان عاوز يكسر قضبانه ويطلع يستخبي تحت السرير من الخوف وانتظار المفجأة
امي الحبيبة :هزت رسها بثقة ونظرة ثاقبة خرجت من عيناها وقالت...صافيناز بنت طنط دوللي جارت خالتك.....دي زي ما تكون متفصلة علي مقاسك بالضبط
مش نافع : مقاسي؟؟؟؟
هو انا رايح اشتري ل.......احم......منطلون ....؟؟؟
وبعدين بقي صافيناز بنت متدلعة وبصراحة انا مش بحب الدلع الماسخ بتاع بنات اليومين دولة
ترضي مراة ابنك تكون راكبة عربية موديل 2007 وابنك راكب عربية موديل 83 بتاعت ابوه وكل يوم يتخانق هو وابوه عليها وابوه يكدره ويقوله خدها والبنزين عليك يا خفيف...ويسيبوا متشحطط؟؟؟
في واحد هيروح يتجوز وهو مش معاه تمن 10 لتر بنزين....دا حتي البنزين غلي.....ايه رأيك ما نتكلم علي البنزين والاستفتاء بتاع الدستور...انا عارف انك بتحبي السياسة....والدستور نجح وجاب مجموع عالي قومي افقعي زغرودة يا حجة من اجل الديمقراطية
بدأت لغة الحوار تتغير ووش ماما بدأ يحمر...وصوتها علي اوي وبدأت ابعد اي كوبيات ومعالق واي اسلحة خفيفة من ادامها....انا مش ناقص عاهة ....
والله نفسي ابقي زي الشباب في السن دا واروح اتقدم لبنت واخطبها .....يبقي كذاب اللي يقول غير كدا
بس مينفعش ....مينفعش خالص....حطوا نفسكم مكاني يا جماعة وقولولي ايه رأيكم....ينفع والا لا؟؟؟؟

هناك 16 تعليقًا:

خمسة فضفضة يقول...

السلام عليكم ورحمة اله وبركاته

ينفع ما ينفعش ليه اه ياخويا ينفع هايقول لأ يعني ( علي راي الدكتور شديد بتاع ساعه لقلبك )
هو صحيح الاحوال اليومين دول مش ولا بد والشباب اللي زي الورد قاعدين من غير شغل ، بس برضو ماهي البنات كمان مش لاقين جواز واكيد اكيد في وسط دول ممكن تلاقي واحد كويسه وبنت حلال ترضي بيك وبظروفك ، ويكون ابوها راجل كويس وما يغاليش في مطالبه
ياكده يا خلي بنته قاعده جنبه احسن

وبعدين ما ربنا يبارك لك في الحاج ممكن يساعدك حبتين ويخلي عليه شويه من تمن البنزين في مشوار الخطوبه والجواز ده .....

اقولك انا عندي ليك عروسه لقطه ...ايه رايك في ميمي بنت طنط بخاطرها .......ههههه

عالمى ازرق يقول...

الواحد ممكن بيتجوز فى حالتين ( ده بالنسبه للشباب يعنى)اما انه امكانياته متوفوه ومستعد للجواز
او فيه حد معين فى حياته بيمثل له حافز انه يسرع فى تكوين الامكانيات البسيطه اللى تخليه يتقدم
بس بجد مامتك لها الجنه ان شاء الله
ههههههههههههههه
بهزر اكيد

albida يقول...

لا ينفع طبعا.. لو هتتقدم لنادية بنت طنط زيزى
هههههههههههههه

حوارك مع ماماتك ده حسسنى أنكم بتتكلموا على الجواز كأنه رحلة لدريم بارك مثلا
:)
وثانيا ماماتك مستعجلة على ايه؟! يعنى هما اللى اتجوزوا مبسوطين؟ دى مسئولية ووجع دماغ مايعلم بيه الا ربنا... متستعجلش على قدرك يا بنى
ههههههه

عارف, انا لو منك أفكر فى لولا بنت طنط مكارم
:) :)


manal

الراقـــص مع الذئـــــاب يقول...

خمسة فضفضة
وعليكم السلام ورحمة الله وبركاته

كدا برضو...[قي انا جايبك عشان تقفي من صفي وانتي تقوليلي ينفع...طب وطي صوتك بقي عشان الحاجة لو سمعت هتفتكر وهتقلب الدنيا

اي بنت في الدنيا ليها مطالب...ولو هتكون مطالب اولية....بس من حقها انها تطلبها...وابويا الحج ربنا يكرمه عمل اللي عليها وجبلي شقة برحة وواسعة ومحترمة حط فيها اللي وراها واللي ادامه واللي جنبه كمان....كفياة عليه بقي كدا....الراجل لسا في رقبته عيال تانية عاوزين يكلوا

بلاش ميمي بنت طنط بخاطرها ...اخر عريس كان عندها زعلاها اكلت دراعه
شوفيلنا واحدة تانية الله يكرمك

اسعدني جدا مرورك يا دكتورة
_________________________________
عالمى ازرق
شايفين الكلام المنطقي
هو دا الكلام اللي تحت الحزام
انا بقي لا عندي امكانيات ولا عندي حافز ولله الحمد
يبقي افضي دماغي وانام وانا مستريح وكل حاجة تبقي تيجي علي مهلها

صباح الروقان يا عالمى ازرق....كلامك عشش في النفوخ

________________________________

albida منال
هو ايه الحكاية ...كل واحد هيقرأ الموضوع هيجبلي عروسة
بس انتي طلعتي حكيمة بجد (مش دكتورة)...يعني بتقولي كلام حكيم

اهو انا بقي عاوز جوازة من غير وجع دماغ
من الاخر بتلكك عشان اشيل الفكرة ديه من دماغ الحاجة امي

اموت واعرف مين اللي سخن الفكرة ديه في دماغها وعمل فيا كدا

ربنا يخلي ابويا هو اللي بينقذني ....طبعا هو فرحان اني مش عاوز اتجوز....هو ناقص وجع دماغ هو كمان
شرفتيني يا صاحبة المراية اللي اتكسرت

محض روح يقول...
أزال المؤلف هذا التعليق.
mohand يقول...

السلام عليكم ورحمة الله وبركاته
هههههههههههههههههههههههههههههههههههههههههههههههههه
انا هقولك حاجه واحده
بلاها سوسو خد ناديه

علي رأي الدكتور رأفت
ايه يا عم هو الجواز كده بالساهل
الراجل مش بس بكلمتو الراجل برعايتو لبيتو واسرتو
وعلي رأي احمد ماهر اللي خرم الطبله بتاعت اذني


اتكل علي الله الجواز عفه برضو يا راجل

اخوك مهند المصري
الباحث عن الحقيقة
اشكرك لاضافة مدونتي عندك

محض روح يقول...

والله مش عرفه اقولك ايه
بس ديه مشكله عامه وحلها عند ربنا
لا يسعنى إلا الدعاء اكتر من كده يبقى واهمين

ربنا معى الجميع

بيتنا القديم يقول...

انت زعلان ليه

هو انت ما سمعتش اللي حصل في الشقة

اللي تحتكو

الابن: بابا انا عايز اتجوز..خلاص مش قادر قربت ( اهنج).

الاب: يابني مانت عارف ان الموضوع ( بلانك ) علي الاخر.

الابن: معايش يابابا ربنا (Repair) الحال.

الاب: افهم من كدا ان انت لاقيت الانسانه اللي هاتملي ال ( free space ) اللي في حياتك.

الابن: طبعا..دي حته انسانه (Pentium IIII ) انما ايه ( original ) .

الاب: بانتيوم فور مره واحده..لا يابني دي اكيد هاتعمل معاك (conflicted ).

الابن: لا يابا اعتقد ان ربنا قادر يعمل(Scan ) لي اي (Error ) في حياتنا.

الاب: معاك يابني بس انتي الاول لازم تعمل (defragmenter ) لي حياتك.

الابن: مش هاينفع علشان حياتي مليانه (Bad sector ) .

الاب: يانهار ابيض عندك بادسيكتور وعايز تتجوز و تخلف انتي عايز الواد يطلع (demo).

الابن: ماتخافش يابابا منا الاول هاعمل(f.disk ) وربنا يقدم اللي فيه الخير.

الاب: طيب يابني ماتاخد واحده (Pentium III ) ولما ربنا (open) عليك تبقي تعملها (up grate) .

الابن: مش هاينفع يابابا علشان العروسه اللي في دماغي (build in) .

الاب: طيب يابني بدل تعب الدماغ اللي انتي فيه ده ماتشوفلك واحده(used ) وخلص

تحياتي للحاجة مامتك

ويجعلو عااااااااااااااااااااامر

الراقـــص مع الذئـــــاب يقول...

mohandat
وعليكم السلام ورحمة الله وبركاته
ايه يا عم مهند....وانت المفروض اللي تقف جنبي يا راجل
جواز ايه بس....
هو في احسن من انك تتقلب علي السرير لوحدك وتخرج وتطلع زي ما انت عاوز ومحدش يعكنن عليك...اهو اشتغل ما اشتغلتش دخلت الجيش عملت ايه حاجة برضو دماغك فاضية وبتعتك ومش شايل هم حاجة...
مفيش احسن من كدا
جزاك الله خيرا علي مرورك الكريم
تحياتي لك

_______________________________

محض روح
شرفتيني في اول زيارة ليكي عندي
بس انتي زعلانة ليه....حاسس كدا انك مضيقة وانتي بتتكلمي..وبرضو مدونتك المح فيها نظرة الحزن الدفين (كلمتين جامدين معرفش اقولهم تاني )..انا لقيت ان اي موضوع يعكنن لو اتقلب ضحك بيكون لذيذ اوي...تحياتي لك وجزاكي الله خيرا علي شعورك الجميل وزيارتك الجميلة....اتمني تواجدك الدائم عندي
______________________________
سمسم
ايه يا عم الشقاوة ديه
خلاص الكمبيوتر بوظ دمغنا
هنروح نخطب واحدة بالمواصفات القياسية
متهيألي ان بقي اهم شرط من شروط الجواز دلوقتي ان العريس يكون عنده اميل وجهاز كمبيوتر محترم

موضوعك لذيذ وجميل
تحياتي لك ولمرورك الكريم

أميرة البلطجية يقول...

والله يا ابني انا ما عارفة الازمة اللي ف البلد دي اخرتها ايه؟
انهاردة قريت يجي اربعة بوستات من بنات عايزة تتجوز مبتجوزشش..ويجلي ولدين تلاته عايزين يتجوزوا ومش لاقين ياكلوا اساسا..وبستايتين من ناس متجوزة ومش طايقة عيشتها اصلا
يا خبر ابيااااااااض
ايه اخرة الوضع ده
ربنا يطلعنا من البله بلا بلى (الاخرانية دي يعني بلاء)
مش يمكن طانط مدكنالك حاجة وانت مش عارف؟ اصلها يعني حتقولك كده ليه الا اذا كانت عارفة ان فيه حاجة تحت البلاطة؟
وربنا يوسع الرزق
سلام يا كابتشن

šσяšαяαα يقول...

إحم..هو الموضوع عن ايه بالظبط
اصل انا بعيد عنكو نسيت كام كلمه كدا من عمايل الزمن فيا ومنهم اللى بتكلم عنه دا.. الاستاذ جواز والكابتن شغل والست ديموقراطيه وبنت خالتها حرية والاخ امان..ياللا اهى كلها مسألة وقت وتييجى تجرى على ماما وتترجاها تجوزك هنيه بنت المعلم دعبس:)

-_- يقول...

هو تقريبا الحوار ده حصل لكل الشباب في العصر الحالى

ربنا يعينا

الراقـــص مع الذئـــــاب يقول...

أميرة البلطجية

هي طنط نايمة علي خميرة حلوة وكل حاجة...بس حرام عليا لما استغل الظروف...دا بدل ما اخليها مش عاوزة حاجة اروح اخد منها تحويشة العمر اللي هتحج بيهم...هو لو في امل يبقي في الحج...ربنا كرمه وحج ايام الرخص واللي باقي حلال انه يتصرف في الجواز

بس انتي مش فاهة الحكاية...انا مش عااااااوز اتجوز دلوقتي...انا عاوز اعيش في سلام ...انا بحب مصر وبحب كفر الشيخ وطلخا وكل حاجة...والجواز هيجي هيجي...هنروح منه فين...بس في وقته..

اسعدني مرورك وتعليقك يا اميرة البلطجية...اسمك يخوف اوي


--------------------------------
SoRsaRaa

اولا اهلا بيكي في اول زيارة لمدونتي ويارب ديما الاقكي عندي
انتي ايه بس اللي صحاكي من النوم
الوقت دا بالذات النوم والنسيان فيه شئ جميل
بس انتي عرفتي حكاية هنية بنت المعلم دعبس منين؟؟؟
دا سر ميعرفوش غير 45 واحد بس؟؟؟؟؟؟؟؟؟؟؟؟؟؟
-------------------------------
شارم
الحوار دا بيتكرر كل يوم....ممكن يكون بالعكس
يعني ممكن في صورة :
ماما انا عاوز اتجوز
والتاني
يا ابني انا عاوزة اجوزك

في كلا الحالتين مفيش فايدة

تحياتي لك ولزيارتك الكريمة

khaled يقول...

ما ينفعش
ماينفعش
ما ينفعش
انا ما باقولهاش ليك انا باقولها لنفسى لانك وصفت اللى جوايا
:)

gohayna يقول...

خلف التلال
نظره عكسيه
تجربه جديده
ضد التيار1
ضد التيار 2
الابتسامه
مش نافع خالص
انا مش بالعاده اني لما ادخل مدونه جديده او علي رايك ابرشط علي مدونات تانيه اني اقرء كل المواضيع
بس العكس حصل عندك هنا
انا قريت المدونه كلها ولو فيه تاني كنت قريته برضه ومزهقتش ولا حسيت بملل
خلف التلال فيها نظره مختلف للذئاب غير الي كلنا متعودين عليها
فيها حاجه مختلفه
نظره عكسيه وتجربه جديده الاتنين برضه حلوين اوي
ضد التيار 1 حلوه برضه اما 2 فدي تحفه انا هلكت علي نفسي من الضحك علي مصطلح الشباشب
فعلا تحفه وكمل صحيح كل واحد حر في الي بيكتبه بس الحريه دي ضمن مبادئ وقيم اتربينا عليها مش همجيه وسايبه هيا الحكايه اكتب وانا وراك يا ريس
الابتسامه برضه تحفه والي لفت نظري الصور الي انت حاطتها بما ان تخصصي قريب اساسا الفم والاسنان بحكم عملي كدكتوره اسنان
فأنا عيزاك تديني عنواين الناس دي علشان اقتلها
قصدي اعالجها
اصل بصراحه الامل معدوم في شفئهم قصدي الامل في ربنا كبير
انا عماله الخبط في الكلام
اخر موضوع هوا الي بجد تحفه علشان انا شيفاه اكتر من مره مع كذا حد ونفس الكلام بيتقال من الام ونفس الردود بتكون من الولد
ربنا يرزقك بعروسه تسعد وتحلي ايامك قول امين
طولت عليك انا عارفه بس بجد انا هتابع كتابتك من هنا ورايح واسمحلي اضيفك عندي
وهستني ضد التيار الجزء 3 بفارغ الصبر متتأخرش لو سمحت
تحياتي ليك

يعقــــوب .... يقول...

يا عم ينفع مينفعش ليه..لو كل واحد زيك كده قال مش هينفع التكاثر بتاع المصريين هيوقف