Translate

الأحد، 10 فبراير 2008

تدوينة خاااااااصة جداً


السلام عليكم

زي ما قلتلكم يا جماعة إن الموضوع دا هيبقي جزء بسيط أوي من رد الجميل لكل إخواني وأخواتي في عالم التدوين
ويمكن لتقارب فترة دخولنا عالم التدوين ممكن نقول إن كلنا بدأنا مع بعض ..
في ناس بدأت قبلنا بشهور قليلة وناس بدأت تدوين بعدنا برضو بشهور قليلة
بس في الغالب هنلاقي إن عمرنا التدويني متقارب
حلوة عمرنا التدويني ديه
تصدقوا بقي طلع ليها معني كبير أوي وانا بفكر فيها دلوقتي؟؟
تخيلوا إن ممكن واحد يعتبر حياته وتدويناته عمر تاني خالص وحياة تانية خالص
أصدقاء وأخوات وبرضو أعداء موجودين معاك في عالم التدوين
دا حتي الشوااااااااااذ بقي ليهم حتة من الكعكة زي ما بيقولوا.....بس حتة حمضانة وريحتها وحشة
نرررررررررجع تااااااااااااني لموضوعنا...علي رأي الشاعرة الجميلة ايمان بكري
فاكرين يوم 22/4/ 2007
اللي يفتكر التاريخ دا أول ناس عرفتهم عن طريق التدوين
انا خايف انسي حد فيهم عشان كدا مش هقولهم
بس دا اليوم اللي كنات رايح فيه كلية الضباط الاحتياط تفاصيله كلها موجودة في موضوع اتكتب بنفس تاريخ اليوم....المهم
لقيت إحساس جميل أوي من ناس جميلة أوي
كأن اخوهم هو اللي ماشي وسايبهم
ومخبيش عليكم انا قلت في نفسي لما ارجع مش هلاقي حد فاكرني...بالمنطق كدا شهر ونص قافل المدونة ...الناس هتزهق وهتمشي
بس لما رجعت لقيت المفجأة الجميلة...
لقيت ناس مدونة يوميتها عندي في الردود وبيحسبولي هرجع امته
تخيلوا بقي في ناس ممكون تقابلوهم اجمل من كدا؟؟
والناس ديه فضلت معايا طول الفترة اللي فاتت كلها بالسؤال والتشجيع والشد من أزري
لدرجة إني كنت بنزل الأجازة اللي كانت غالية أوي...أول حاجة كنت بعملها إني أفتح البلوجر....
ويمكن بيكون شغلي الشاغل أول ما أرجع من الأجازة هو البلوجر
عاوز اقول للناس كلها اللي بتشرفني وتعطيني قدر اكبر مما استحقه بدخولها مدونتي كلمة شكر وعرفان
كل اخ او اخت انا مدين ليه بحجات كتيرة اوي
سعات كتيرة مبعرفش ادخل كل المدونات اللي اعرفها لضيق وقتي وربنا اللي يعلم
وسعات أقرأ ومبعلقش علي المواضيع....انا عاوز اقول للناس ديه انا متأسف والامر دا بيبقي خارج عن إرادتي

يا جماعة انا بتشرف اني ادخل مدوناتكم واتصفحها...انتم كلكم ناس جميلة اوي والله...

وربنا اللي يعلم قدركم عندي اد ايه

مهما قلت ومهما عملت لن اوفي جزء صغير مما تستحقونونه

جزاكم الله خيرا...........




------------



ملحوظة
هذا الجزء وثائقي يحتوي علي بعض الصور...وسوف يتم تحديثة يومياً إن شاء الله حسب وصول الصور من المصادر المختلفة
\\\\\\\\\\\\\\\\\\\\\\\\\\\\\\\\\\\\\\\\

امبارح كانت حفلة التخرج بتعتنا
عدي تقريباً 9 شهور ونص وانا هناك...
مش هقدر اقول عليها إنها كانت ايام وحشة...ولا ايام حلوة
المهم إنها عدت وخلاص
وكان آخر ما فيها هي الدموع
عارفين دموع ايه يا جماعة؟؟؟
لالالا...مش دموع الفرحة.....دموع الفراق

الموضوع طلع صعب أوي وأصعب مما كنا نتخيل
ناس من كل حتة في مصر بيشاركوك كل حاجة في نفس الوقت
كانت عنينا بتغمض في نفس الوقت...وبنصحي في نفس الوقت...بنرفع المعلقة وناكل في نفس الوقت
هناك كل حاجة بتبقي في وقت معين ...
يعني النوم والصحيان بيبقوا بوقت...والاكل برضو بوقت
والله يا جماعة حتي الحمام كان بالوقت لو مش هتصدقون
ييعني بناكل ونشرب وننام ون......في وقت واحد
ولصعوبة الفترة اللي أحنا دخلنا فيها....فترة الصيف والحر....حصل بينا حاجة جميلة اوي
زي ما يكون حر الصيف دوبنا كلنا وطلع مننا شخص واحد فيه كل الصفات الحلوة
كان اللي يقع مننا او يتعب كلنا بنحس بيه ونتعب معاه
مش لاقي اي كلمة أوصف بيها اللي كان هناك
انا كتبت موضوع اسمه هكذا الدنيا

كنت زعلان فيه من جفاء الاصدقاء وعدم السؤال والاهتمام ببعض

لا ياجماعة....في صداقة وفيه أخوة في الله جميلة أوي
الموضوع دا انا بعتزر عنه وبقول ان في حجات كتيرة أوي مش مظبوطة
ـــــــــــــــــــــــــــــــــــــــــــــــــ

دي بعض الصور ليا وللناس الجميلة اللي عشت معاهم اجمل ايام حياتي بلا مبالغة

يمكن اول مرة حد يشوف صوري علي البلوجر ....بس الموضوع دا مش للبلوجرية فقط....دا لأصحابي وأخواتي في الكلية


______________________

قبل ما ادخل الجيش بشهر كنت عامل كدا


--------------------


بعد الجيش بشهر ايام الزيارات ....كنت عامل كدا...تاني واحد من اليمين



شايفين الشمس بتعمل ايه



----------------


يوم الحفلة بقي





من اقصي اليمين


محمد عواد - فتحي الوكيل(الانتوخ)- مدحت -ابو صابر-ايمن-احمد الشاعر



وفي الاسفل ايهاب (الفتي الاسواني اللذيذ) من اقرب الشخصيات الي قلبي

---------------




برضو من اقصي اليمين


عاطف (المهذب)-ابو صابر-احمد عمار-ايهاب

احمد الشاذلي-محمود ابو الفتوح (رقيب اول السرية) اخف دم وقوات جوية زيي
-------------------
محمد حنفي (انسان يندر تواجده في هذا الزمان)-مدحت-سيد (احبه في الله)-ابو صابر-ايهاب
ايمن
-------------------




انا مع من بكت عينايا بحق وأنا أودعه....فكان له معزة خاصة في قلبي

الفتي احمد عمار....بكلوريوس هندسة قسم سيارات....من محافظة بني سويف

--------------

من اقصي اليمين هنااااك

عبد الله -محمد النحاس (صديقي الانتيخ )-احمد عبد الرحيم (كركر)-حازم (المؤدب)-سامي (الاساوني)- تامر (اللي كنت زعلان معاه)- ابو صابر- ابو زيد

من تحت

وائل(الواد الجدع)-ايمن-محمد فرح (كتكوت ضعيف الجناح) وبس

--------------------

مع قائد السرية النقيب بيومي وجيه الدين

قائد خفيف الدم ...هو ضخم اوي بس جدع اوي

وشاطر اوي....كان الاول علي دفعته في الكلية الحربية الدفعة 94

واللي واقف معانا دا انا معرفهوش

----------------

مع الطالب عصام (المحترم والمهذب جدا جدا جدا ) من الدفعة المستجدة اللي بتستلم مننا الكلية ...الدفعة 133

ربنا يكرمهم ويوفقهم إن شاء الله ويخلصوا علي خير

وفي إنتظار وصول صور جديدة

هناك 23 تعليقًا:

Desert cat يقول...

الف مبروك
انا عرفت انك اتخرجت من مدونة فنان فقير
بالتوفيق دايما ان شاء الله

عصفور المدينة يقول...

مش عارف يا هندسة أنا دايما متعود أدعي للي في الجيش ربنا يعافيه بس حاسس إنك مبسوط فمش عارف ادعي لك بإيه
على كل أدعو لك بالتوفيق لخير الدنيا والآخرة

الراقص مع الذئاب يقول...

Desert cat
الله يبارك فيكي
جزاكي الله خيرا علي المرور الكريم

----------------------------

استاذي الكريم عصفور المدينة
انا عندي 26 سنة
يمكن مفيش حفرة عديت عليها غير ووقعت فيها
خريج هندسة قسم إتصالات
ربنا اراد وتم دخول تخصصي الجيش
مع كثرة المحاولات المضنية لمحاولة الابتعاد عن التجنيد

ولله الحمد تقبلت الامر بصدر رحب ومعملتش زي صحابي اللي منهم من لطم خديه حزناً

سلكت كل السبل للدخل جندي لقضاء سنة واحدة فقط والخروج للبحث عن عمل

وقدر الله ان تبوء كل المحاولات بالفشل بعد الوعود الكثيرة من رتب لها قدرها في الجيش

وقدر الله ان تختار منطقة التجنيد حوالي 80 شخص من بين حوالي 2000 شخص للتجنيد كضابط والباقي يكرمه الله ويستكمل فترة تجنيده كجندي

إذا تركت نفسي للتفكير ولهواجس الشيطان اري نفسي إنسان تعيس وسئ الحظ لدرجة لا توصف...وقد اكره الدنيا وما فيها واتمني الموت
فمداخل الشيطان كثيرة
منها النظر الي بقية زملائي الذين اكرمهم الله بالعمل في شركات كبري ...ومنهم من منّ الله عليه بالسفر الي الخارج ولله الحمد رب السموات ارتقوا جميعهم مناصب عليا في اعمالهم
اللهم زدهم من فضلك وبارك لهم في رزقهم

عندما تقدمت لخطبة احدهن قوبلت بالرفض لأني لا املك عمل

منذ 10 شهور يا استاذ عصفور وراتبي لا يتعدي 120 جنيه
وسيظل كذلك لمدة 7 اشهر اخري قبل ارتفاعه الي مرتب يكفيني اكل وشرب ومواصلات بدل تكفل والدي بي


ومع ذلك انا سعيد بما انا فيه يا استاذ عصفور

ولله الحمد قد عاهدت نفسي ان ارضي بما قسمه الله لي مهما كان...


قد تكون سعادتي بإنتهاء فترة صعبة في حياتي قد لا يصدق احدا ما فيها من عذاب

إذا دققت في الصورتين الاولي والثانية قد تجد وصفاً بدون كلام لما مررت به انا وزملائي

نعم...انا سعيد بما انا فيه يا استاذ عصفور

قل لي يا استاذي الفاضل؟
هل تخيلت ما الذي سوف يحدث لي بعد إنتهاء فترة تجنيدي والخروج للحياة الملكية وانا امتلك من العمر 28 عاما تقريباً

اي عمل سوف اقوم به..؟؟
اي شركة توافق علي قبول مهندس بدون خبرة عمره 28 سنة

هل ما زلت تراني مبسوط وسعيد؟؟
والله الذي لا اله الا هو انا سعيد بما انا فيه يا استاذ عصفور




هل عرفت الان حقيقة الامر؟؟؟


إني حاولت أو أحاول ان اجد في كل هذا الظلام نورا.....وان اخرج من كل هذه الامور وانا اقوي...فالضربة التي لم تقسم ظهري تقويه

واتعلم من الدنيا ما فيها

استاذي الكريم ما اكتبه في مدونتي ليس عبثاً ولا لهو حديث

في موضوع كلمات من ذهب تجدني هناك
تجدني في جملة ((الراحة لا تصنع القادة))...فقد وضعتني الظروف في امر انا لم اطلبه....والله غالب علي امره

لهذا احاول أن ابتعد عن هواجس الشيطان وارضي بما قسمه الله ليه وانتظر الجزاء من الله علي الصبر

هذه هي حقيقة الامر يا استاذ عصفور

اما ردك هذا فقد اسعدني....
اتدري لماذا يا استاذي الجميل؟؟
لأني قد نجحت في أن اظهر غير ساخط
بل اني وما زلت اقسم بالله علي الرغم من كل ما سردته لك من الهموم فإني اشعر إني اسعد الناس

والسر في حديث الرسول صلي الله عليه وسلم
ارض بما قسمه الله لك تكن اغني الناس


جزاك الله خيرا يا استاذي الجميل علي ردك الذي جعلني ازداد سعادة واطرد هواجس الشيطان

بالله عليك...لا تنساني من دعائك

fanan fa2eer يقول...

الحمد لله ألف مليون مبروك

مش قولتلك ماعرفتش أخويا وسطيكو؟

كلكو كنتو لبس واحد ولون واحد وخطوة واحدة سبحان الله ماكنتش بافرق فرق الطول بينكو من كتر ماكنتو متشابهين

ان شاء الله تحافظو علي الصداقة دي طول العمر وتفضلو تسألو علي بعض وتشوفو بعض باستمرار

كان دايما بابا يقول لأخويا قبل مايدخل الجيش انت هتعرف ناس عمرك ماهتنساهم

أنا دلوقتي حسيت بان كلامه كان مظبوط فعلا

عصفور المدينة يقول...

أيوووووووة فعلا انخداعي وعلى مدار عدة تدوينات وتحيري في هذا الأمر يثبت نجاحك فعلا في التغلب على هذه الهواجس وهذا من القوة النفسية حفظها الله عليك وايدك ونفع بك

أحبك الله الذي أحببتني فيه والله يعلم كم أحب من آتاهم الله الحكمة وأحسبك منهم والله حسيب كل مسلم

عمل معي حتى الآن 4 مهندسين ممن كانوا ضباطا أحسست فيهم بسمت خاص فعلا ولكنهم تجاوزوه بعد فترة - وبقليل من الضغط مني :)-
وإن شاء الله ربنا ييسر لك شيئا تكتسب فيه خبرة في هذه الفترة
وربما صحت الأجسام بالعلل

طبعا الصور واضح الفرق
لقد مررت بما يشه ذلك قابلت أخي الصغير وكان في السنة السادسة بعد دخولي الجيش ب 15 يوم وسلمت عليه فسلم ثم انصرف فناديته قلت مين اللي سلم عليك؟ قال لي مش عارف فبكيت في الشارع
ولكنها مرت الأيام وكنت أدعو اللهم فك أسري

عصفور المدينة يقول...

تعلمت كثيرا من تعليقك ويشهد الله أنها ليست مجاملة

د/اجدع بنوته يقول...

شكلكككككم يفرح بسم الله ماشاء الله

يارب تكون فاحة خير عليكم جميعااااا

وربنا يجعلها دنيا جديده دنيا سعيده

تحققوا فيها كل احلامكم وكل اهدافكم يااارب

وتفضلوا دايما متواصلين مع بعض

بالتوفيييييييييييق

وباذن الله تلاقى شغلللللل

وعروسه وبيت وعربيه وكل اللى تتمناه

وبعدين 28 ايه .. انا شايفه شاب ذو

واحد وعشرين ربيعا

بيبى فيس يعنى هههههههههه

شد حيلك انت بس وابدا خطط لحياتك

وربنا هيقويك يارب

وبعدين مااحنا بنتخرج ع 23 ونقعد نزاكر

لحد منتخصص ع 30 ونفتح عياده ع 40 ونتجوز ع 50

متاخدش ف بالك يعنى

نححن اصحاب معاناه واحده

هههههههههههههههههههههه

شوف انت ولد بقى هتروح تتقدم وتجوز

لكن احنا كتاكيت مين هيتجوزنا بقى

اهىءءءءءءءءءءءءءءءءءءءءءءءءءءء

فكرتنى بمأساتى ياشيخ .. وسع كده بقى

وهات السندوتش اللى ف ايدك ده

هاكله انا .. نيكالا بالكئابه الاخرانيه اللى دخلتنا فيها دى

تحياتى حظاااااااابط محمد

Doba يقول...

ماشاء الله
الفرحة باينة من كل حتة فى المدونة
من الفرحة بمصر والمنتخب
والفرحة بانتهاء فترة خدمتك

الحمد لله على سلامتك
وبالتوفيق دائما فى حياتك المستقبلية

لك كل تحياتى
=====

ثم هما اكلتين تلاتة من اكل البيت المعتبر هترجع تانى زى الصورة اللى فوووووووووق

سلامى
هبة

Doba يقول...

بعد قراية كلامك وتعليقك على كلام عصفور المدينة والله ادمعتم كلاكما عيونى لانى سعيدة والله ان فيه ناس محترمة للدرجة دى فى بلدنا

انا تفكيرك من بداية المدونة وانا مستغرباه لسنك ولطريقتك وتمسكك بالقيم والمبادىء بغض النظر عن اى شىء

وزى مانت قلت كل واحد عمل مستقبله - متعرفشى ربك شايلك الخير فين والضربة اللى مبتموتش فعلا بتقوى وبتخلى الواحد اصلب ويتحمل فى اوقات كتير

لك منى كل امنياتى بالتوفيق يا اخى الصغير - مش عارفة ليه بس ده احساسى بيك

ma_3alina يقول...

بسم الله

كنت حكتب تعليق ابارك فيه على التخرج وادعو لك بالتوفيق في حياتك القادمة ..

لكن لقيت موضوع رائع في تعليقك على الباشمهندس عصفور المدينة

ردك على التعليق مضيء جدا ورائع جدا جدا .. أحييك عليه ألف مرة واسأل الله عز وجل أن يثيبك خيرا .. ولو ترفعه في يوم من الأيام ليكون تدوينة منفصلة يكون خيرا ..

وبرضه الف مبارك التخرج وجعلك الله في الجيش ممن يغير من حوله ولا يتغير بمن حوله

k_abo3mro يقول...

ألف مبروك يا بشمهندس على التخرج .. و لا أقول لك يا حضرة الضابط ؟

أنا لقيت المدونة و أنا بعمل سيرش

أنا كنت من الدفعة 133 المستجدين بتوعكم

لكن قبل الحفلة نزلت إلى جندي

و أنا لسة في الكلية في انتظار مندوب السلاح لترحيلنا

أنا بقيت سلاح دفاع جوي

و يمكن تكون انت ضابط في وحدتي لما تخلص معهدك

عموما أنا سعيد بما قرأته في مدونتك

و أتمنى إني أتعرف عليك أكتر

eng_khella@yahoo.com

david santos يقول...

CONGRATULATIONS EGYPTO!!!!!!!!!!

ورقة لكل عصر يقول...

يااااااااااااه يا دانسر
الف مليون مبروك يا افندم
بص لو اتكلمت هقول كتير قوى بس مش هبوظ الفرحه بالرغى بتاعى
بس لو اقدر اتكلم هقولك كلمة واحده ومظنش هتقدر تقول غيرها
ياااااااااااااااااااااااااااه كبيرة قوى
فاكر لما اجى اسال عليك اول مرة فى اول شهر تقريبا ليكوا فى الكلية؟لو افتكرت اليوم دا وتمشيتنا مع بعض, وفكرت فى حالك انهاردة وانت بتقرا كلامى دا هتقول يااااااااااااااااه كبيرة قوى ومصحوبة بالحمد لله اكبر منها
الف مبروك يا ابو حميد دانسر

dr.Roufy يقول...

ألف مبرووووووووك التخرج..وربنا يوفقك دايما يارب
:)
سعيدة ان اول زيارة ليا آجي ألاقي حفلة كدا
:)

appy يقول...

مبروك ودى اول مرة ليه هنا بس انا فرحت قوى لما عرفت انك من الاسماعيليه دى من المدن اللى بموت فيها بصراحه لدرجه رحتها مرتين اروح الصبح وارجع بالليل بما انها قريبه من القاهرة وكمان عملت بوست عنها ونزلت صورها عندى

الراقص مع الذئاب يقول...

السلام عليكم

fanan fa2eer

طبعا يا دكتورة لازم كله يبقي شبه بعض
والنظام دا نتيجة تدريب شاق جداً ...بالذات العرض العسكري لازم يبقي دقيق ومفهوش اي غلطة لأنه مقياس للتدريب في اي كلية عسكرية

والحمد لله إنه عجبك

إن شاء الله نقدر نحافظ علي الصداقة بينا وبين بعض
جزاكي الله خيرا


-------------------
الاستاذ محمد _ عصفور المدينة

جزاك الله خيرا علي كلامك الجميل ومجاملاتك الرقيقة

ولا تنساني من الدعاء

-------------------

د/اجده بنوتة

ربنا يجازيكي خير يا دوك

بس ايه حكاية بيبي فيس ديه
قصدك يعني شخصيتي قوية
اه ...طبعاً...انا كدا

بس انتي قعدي تحسبي السنين دي كلها ليه...انتم بسم الله ماشاء الله بتتخرجوا تشتغلوا
مسمعناش عن دكتور بيدور علي شغل
يا ساااااتر عليكوا...
انا مش بحسدكم ولا حاجة
انا بس بنق عليكم

جزاكي الله خيرا علي زيارتك الجميلة يا دوك

MerMaid يقول...

الف مبروك التخرج يا كابتن
:)
نحياتي ليك ونورتني و براحتك انا مبزعلش من النقد

الراقص مع الذئاب يقول...

دوبا او ام يوسف كما تحبين

الله يسلمك ويبارك فيكي
الحمد لله علي كل شئ...الفرحة جميلة اوي...ربنا يجعلها دائمة بلا إنقطاع

بس تفتكري هرجع تاني زي ما كنت بعد العملية يا دوبا؟؟
قصدي بعد الجيش؟

خلينا متفائلية ونقول نسترد جزء من اللي فات..انا مش طماع...انا عاوز بس شوية الشعر اللي راحو

ربنا يكرمك ويجازيكي خير .....كلامك اسعدني جدا مع اني مش كويس للدرجة اللي انتي فكراها
وبعدين انا فرق بيني وبينك سنة او اتنين....متكبريش نفسك ...
بس خليكي اختي الكبيرة زي ما تحبي
ودا فعلا إحساسي بيكي يا ام يوسف

جزاكي الله خيرا وربنا يكرمك يارب ويبارك لكي في يوسف وأخوته في المستقبل إن شاء الله

----------------------------------

المهندس الجميل ما علينا

ربنا يكرمك ويجازيك خير علي كاماتك الجميلة
ومتنسنيش من الدعاء يا هندسة

ربنا يبارك فيك يارب

دمت في خير

--------------------------
k_abo3mro

ربنا يبارك فيكي ويجازيك خير
والف مبروك علي نزولك جندي وربنا يوفقك في حياتك إن شاء الله
انت دخلت دفاع جوي يبقي انت اكيد مهندس

متخفش سلاح كويس وأجزاته كويسة

وبعدين انا قوات جوية مش دفاع جوي
بس ليا صحاب كتير دخلوا دفاع جوي
انت لو رحت اي وحدة هتلاقي فيها احتياط كتير من 130 و131 و132 إن شاء الله

متشلش هم وسبها لله...وكل ما وجودك يطول في الكلية كل ما هيبقي احسن...

الف مبروك مرة تانية وانا في خدمتك لو في ايدي اي حاجة مش هتأخر

دمت في خير اخي الكريم

الراقص مع الذئاب يقول...

ايهاااااااااااب البوب
ملازم اول ايهاب....
ازيك يا باشا
كدا برضو متجيش الحفلة؟؟
دا ماجد انس والناس بتاعت 128 جت يا عم
وانت متجيش ولسا زمايلك في الكلية
اخص عليك يا بوب

فاكر والله يابوب كل الكلام دا كأنه امبارح
الحمد لله
الله يبارك فيك يا بوب يا ملازم اول زي العسل

ويارب تكون عرفت اللي حصل في الكلية...وتعرف إننا الدفعة الوحيدة اللي اتكسر وراها قلة من الكلية....وان معدش صف الظباط اللي بيستخبوا يوم الحفلة
دلوقتي حازم جعفر كمان بقي بيستخبي وخايف من الضرب يوم الحفلة
وأسأل علي اللي حصل لتوتوا عضلات ليلة الحفلة في عنابر الكتيبة الخامسة وكان رد فعل بقية الظباط ايه.....

وأسأل عن الدفعة اللي ركبت الكلية

عرفت بقي إن العقيد احمد صيام كان قائد....

حبيبي يا بوب
ربنا يخلصنا من الجيش كله علي خير

وليا قاعدة طويييييييييييلة معاك إن شاء الله

الراقص مع الذئاب يقول...

dr.Roufy

الله يبارك فيكي يا دكتورة

يارب متكنش بس اخر زيارة وتشرفينا ديماً إن شاء الله
سعدت جدا بتواجدك الجميل

-------------------
appy

الله يبارك فيكي....اول مرة بس اكيد مش هتبقي آخر مرة
مش كدا برضو؟؟

اما بقي بخصوص حبك لأسماعيلية فدا كبير عندي اوي اوي اوي

انتي متعرفيش احنا بنحب بلدنا اد ايه
واللي بيحب بلدنا غالي علينا اد ايه

ويارب تبقي زائرة دائمة لأسماعيلية وتقيمي فيها كمان

وانا دلوقتي هجري بسرعة علي البوست اللي فيه صور حببتي اسماعيلية

سلام
------------------------

MerMaid

الله يابرك فيكي يا اختي الكريمة
الحمد لله انك مزعلتيش من ردي
دا يدل علي إنك إنسانة محترمة

بس كوندليزا؟؟؟؟؟؟؟؟؟
كوندلييييييييزااااااا؟؟؟؟؟؟؟

انا هتجنن يا MerMaid

همسات دافئه يقول...

محمد مبرووووووووووووووووووك
ألف مبروك عقبال ما تستقر فى شغل بقى وتتجوز وتحصلك كل حاجه كويسه ان شاء الله:):)

monaliza يقول...

ما اجمل هذة الذكريات والاجمل ان تجد من يشاركك فيها
مبروك للتخرج وحافظ على الصور دى لانها بعد كام سنة كمان هتبقى اغلى عندك من كده بكتييير

mohamed يقول...

اليلام عليكم انا كنت الدفعه 128 مه ماجد انس فى نفس السريه 11 ودلوقتى بعد ما سافرت بيروت ودبى انا فى السعوديه وحجيت وعمرت والدنيا تمام الحمد لله انا دكتور محمد خالد شغال فى الجامعه والحمد لله خلصت ماستر مناظير وبخلص زمالة جامعه لندن للباطنه ويا ريت اى حد من دفعتى يفتكرنى او من اى دفعه عايز يكلمنى دا ايميلى dr_mohamed_khalid@yahoo.com
والسلام عليكم