Translate

الجمعة، 15 فبراير 2008

حمرا...وكبييييييييييييرة

السلام عليكم

الفضي والاجازة عاملين شغلهم معايا...يارب دمها نعمة عليا
خلاص....كلها 24 ساعة و اروح مكان جديد...أدعولي يا جماعة
المهم بقي وانا في الانتخة ديه قررت اشتغل صحفي ومراسل ومحقق...
يعني بقي عندي مدونة ونازل الشارع اندمج مع الناس واجيب مواضيع وابقي شاطر وحلو ونشيط....
حد عارف بكره فيه ايه....يمكن الباشمهندسة مني الشاذلي تتصل بيا وتستضفني عندها في البرنامج زي غادة برايد كدا...
والبس بقي بدلة وكرافت وأغيظ الواد حسين صاحبي
المهم أخدت الموبيل أبو كاميرا بتاع أختي...لحسن حد يفتكره بتاعي ويطمع فيا....انا موبيلي عتيق وبيشتغل بالجاز...امي جبتهولي هدية عيد الابن من 4 سنين......ايوة عيد الابن...اشمعني يعني الابن اللي مش هيبقي ليه عيد
وعملت نصابية صغيرة جوا البيت طلعت منها بتمن 5 لتر بنزين وتمن كوباية الشاي اللي مبيتشربش علي القهوة الحقيرة اللي بيتجمعوا عليها صحابي...وانا مبحبش اقعد عليها...
لازوم الصحافة بقي القعدة علي القهوة يا جماعة شغل علي مية بيضا
البداية إن العربية مدرتش و اخدتها شعلقة في المواصلات
لالالالا....محدش يقولي عشان فلوس البنزين حرام....كل مرة كانت بتدور ...وبنفس البنزين
هو بس كل حاجة ليها سبب علمي.....
وصلت للمقر او المكنة زي ما بنسميها
واستعديت إني التقط بعض الصور لمحلات الهدايا ...أو للهدايا اللي كانت ماشية علي رجليها في الشوارع
صورة...اتنين..الموبيل فصل شحن....سبب علمي...الشحن خلص...فيها حاجة ديه
وطبعا مفيش صورة طلعت واضحة
لا يا جماعة محدش يروح لبيعد ويقول إن ابو صابر نازل يصور الحبيبة اللي ماشيين مع بعض في الشوارع
مش اخلاقي ولا طبعي ولله الحمد ....وبعدين هصورهم ليه....هما موجودين في كل حتة وبغزارة
لدرجة إنك ممكن تلاقيهم في مدخل بيتك وانت راجع بالليل
اقسم بالله ليست دعابة وحدثت بالفعل مع احد اصدقائي ...لقاههم في مدخل بيته
المهم مش هو دا موضوعنا
موضوعنا هينقسم ل3 اجزاء
الجزء الاول حمرا وكبيرة
الجزء الثاني حمرا...وكتـــــــــــــــــــــــــــيرة
الجزء التالت حمرا...وفظـــــــيعة
.
.
.
نبدأ بحمرا وكبيرة...
هي ايه يا ابو حميد اللي حمرا وكبيرة
دي هدايا عيد الحب.....امال انتوا كنتوا فاكرين ايه؟؟؟
لالالا...هي هدايا عيد الحب
تلاقي بسم الله ماشاء الله عيل طوله 20 سم شايل هدية مش مبينه معالمه بالمرة
وتلاقي بنوتة لذيذة امورة شبه عروسة المولد شايلة برضو حاجة حمرا وكبيرة
والورود بقي...مش هقولكم.....اللون الاحمر بغزارة....وكلها حجات حمرا وكبيرة
طيب هي العلب والوفافات الحمرا ديه جواها ايه؟؟؟؟
علامة إستفهام
طيب هي العيال ديه بتجيب الفلوس ديه منين؟؟؟
الله اعلم
لدرجة اني فكرت اعمل مشروع كويس اوي
افتح محل لونه احمر والبس بدلة حمرا ونظارة حمرا وابيع حجات حمرا وكبيرة
اكيد هكسب دهب...من اللي شفته امبارح
ادينا عرفنا ايه هي الحاجة الحمرا الكبييييييرة
ندخل علي اللي بعده
حاجة حمرا وكتــــــــــــــــــيرة
دي بقي جماهير مصر العظيمة الوفية الجميلة اللي كانت مالية الشوارع يوم الاحد اللي فات
ولاد وبنات ورجالة واطفال كلهم برضو لابسين احمر وطراطير حمرا
مشاء الله
انا بشجع كورة برضو وبحبها اوي ....بس مش كدا
عشان سببين...الاول اني اسمعلاوي وبكره اللون الاحمر (طبعاً فاهمين) والسبب التاني ان الحال موصلش بيا إني البس احمر وانزل الشارع ارقص وابقي اهطل وبريالة
اه فرحت واتنطط لما مصر كسبت...بس خلاص ...المولد انفض
ومبروك لمصر وعملوها الرجالة
.
.
عرفنا ايه هي الحاجة الحمرا الكتـــــــــــــيرة
.
.
.
.
.
نيجي للحاجة الحمرا الفظيعة
لون الدم
دم الناس اللي في غزة...يااااااااه يا ابو صابر....انت هتقلبها غمّ ليه
طول عمرهم في دم وحروب...خلينا نفرح ببلدنا شوية
بلاش دم اهل فلسطين ....تعالوا جوا بلدنا...نفرح ببلدنا
دم الناس الغلابة
امبارح واحد صاحبي في وسط الهيصة والمسخرة بيقولي شايف حال البلد عامل ازاي
الناس مفرفشة وهايصة وعايشين..قلتله ما هو بيان اهوه
قالي امبارح واحد قتل التاني في فرن عيش عشان كانوا بيتخنقوا علي الادوار
الناس بتصحي الفجر تروح تقف علي افران العيش عشان يجيبوا عيش......
مش لحمة....لا...عيش
طبعا واحد فيهم اخد مكان التاني....مستعجل عشان يأكل عياله
عيالة جعانة....التاني مسك فيه...برضو عيالة جعانة...واحد فيهم قتل التاني
قتله عشان يأكل عياله عيش
يرضي مين دا يا مسلمين
يرضي مين شباب وبنات البلد بيحتفلوا بعيد ميلاد قسيس والناس بتموت بعض علي رغيف العيش
يرضي مين يا مسلمين الناس ترقص في الشوارع عشان المنتخب كسب وناس مش لاقية تمن الدوا
يرضي مين يا مسلمين قولولي يرضي مين
يرضي مين كلاب الخليج يعملوا حفلات تكريم للمنتخب ويلموا مطربين الوطن العربي ويدفعوا ملايين
والناس بتاكل في بعض
يرضي مين اب يعمل نفسه انه مش بيحب البيض ويجيبه لعيالة بعددهم ويحرم نفسه منه....وهو نفسه فيه
عشان يوفر تمن بيضة....بيوفر تمن بيضة
دي قصة واقعية اتحكت ادامي
البلد كافئة لاعيبة المنتخب بكام
واللعيبة ديه اساساً عندها فلوس اد ايه
وكلاب الاعمال ...قصدي رجال الاعمال اتبرعوا بهدايا اد ايه عشان خاطر لاعيبة المنتخب
لالالا...مش فلوس رجال الاعمال جبوها منين
عز الحرامي جاب فلوسه منين
من دم الناس الغلابة
ربع الفلوس ديه كانت تنيم ناس كتيرة جدا شبعانة
دا حقهم مش هيتجبوا عليهم
إذا كان الوضع هيبقي بالشكل دا...يحرق المنتخب بجاز وسخ
هي ديه مصر؟؟؟
مصر بقي لونها أحمر خلاص
مزيج بشع من الاوان الحمرا بكل درجتها
لو رسمنها صورة هتبقي بالشكل دا
بركة دم كبيرة اوي مليا الارض...عليها ناس بترقص ورافعين علم مصر....وناس تانية بتمارس الفاحشة وملفوفين برضو بعلم مصر...بحيبوا بعض في عيد الحب
ودم الغلابة اللي في الارض مغرقهم ....
زي كدا افلام آكلي لحوم البشر
لا حول ولا قوة الا بالله
معلش ....انا كتبت الموضوع وانا حاسس بكلامة لأني امبارح كنت راجع ما يعلم بيا غير ربنا
محدش يزعل لو ضايقه لفظ او جملة اويزعل من عصبيتي في الحوار
بس ملقتش مكان افضفض فيه واصرخ زي هنا
يمكن النار اللي جوايا تبرد شوية
جزاكم الله خيرا

هناك 34 تعليقًا:

عصفور المدينة يقول...

انت رائع وفكرتك مبتكرة جدا لو كانوا يعقلون
تدوينتي المختارة

رفقة عمر يقول...

بجد قد ما ضحكتنى فى اول البوست قد ما احبطنى فى اخره بجد ربنا فعلا اسمه الصبور
لانه صابر على حالنا اللى المفروض كان اهلكنا بسببه كما اهلك الامم اللى قبلنا
لانه وعد نبيه سيدنا محمد صلى الله عليه وسلم انه لن يهلك امته
ربنا يسلم ويرحمنا من عنده اللهم امين يارب العالمين

Desert cat يقول...

انا ماليش فى الاحمر خالص يا احمد
انا اخرى الاسود
اه والله بموت فى اللون الاسود يمكن علشان مبقتش شايفة حاجه تستاهل الاحمر مش اللى هو الدم اللى هو القلب الكبيييييير اللى كل الحبيبة كانوا شايلينه امبارح
انا مش جبته طول عمرى ولا حد جابه لى بصراحة علشان كدا متغااااااظة
ولو شوفت العيال دى فى مدخل بيتنا هفجرهم اشمعنا هما وانا لاء
اعاااااااااااااااااااا

ToOoKa يقول...

السلام عليكم ورحمة الله وبركاته

اولا ربنا يوفقك ويسعدك فى اى مكان تروحو

ثانيا بقه
لو احنا عاوزين نحتفل بعيد حب
فيكون حب الله ورسولة
حب الأبوين
حب المتزوجين
حب الأخوات فى الله

ودا مفروض نحتفل بيه كل يوم بس مش انو احنا نشترى حاجه حمرا كبيره
احتفالنا حيكون فى شكر ربنا على نعمو
حيكون فى بوس ايد ابويا وامى
حيكون فى نظرة حب ما بين زوجين
حيكون فى واقفة جدعنه ما بين اصحاب

انا مع انو نحتفل بالحب كل يوم لانو بدونو ربنا كان اهلك الدنيا كلها

ربنا صابر علينا لانو بيحبنا احنا عبيدو
ولانو وعد حبيبو رسول الله

ناس يمكن بلغت فى فرحهم بنصر المنتخب
بس صدقنى يا محمد هما لقو حاجه يهربو بيها من همهم الكبير فرحو نفسهم يومين وهما عارفين انهم حايرجعو للحزن

انا حزينه من احوالنا كلها
واكتر حاجه ديقتنى النهرده وانا بتفرج على الجزيره عرفت انو الصحف الدينماركية رجعت ونشرت صور تانى عن الرسول
ودا لو دل حيدل انو احنا ما حدش محترمنا فى العالم ولا فارقه معاهم انو نزعل او ننجرح

عارف يا محمد
احنا اللى عاملين فى نفسنا كده

ادعى معايا
يارب تنصر الاسلام والمسلمين احنا مالناش غيرك يارب

واهدى بنات وشباب المسلمين لما تحب وترضى

واستخدمنا لنصرة دينك ولا تستبدلنا يارب العالمين

اسفه لو طولت بس اصلك جيت على جرحى العمييييييق

أختك توكا

الساحرة يقول...

عندك حق حاجه تجنن ناس هيصه وناس لايصه
بوست رائع تحياتي

Unknown يقول...

ربنا يبارك فيك ويجزيك خير
تدوينة رائعة والله
على فكرة انا زرت مدونتك كتير لكن اول مرة اعلق
تحياتي

عالمى ازرق يقول...

ربنا يرحمنا ويهدى الجميع

جميله تقسيمه الموضوع خاصه وان الجزء التالى بيكون غير متوقع

خمسة فضفضة يقول...

السلام عليكم ورحمة الله وبركاته

ماشاء الله عليك يا محمد ، ىدا الفضا دا شكله بيعمل عمايل جامده اوي
:-)

عداك العيب في كل الكلام اللي انت قلته ، ياريت النس تبقي بصه للامور بنفس الطريقه ، المنتخب كسب وفرحنا وخلاص ، مش هانفضل طول عمرنا بقي فرحانين علي حاجه مافيش منها نفع
نرجع بقي نبص علي مشاكلنا ونحاول نلاقيلها حل ،
اما حكاية عيد الحب دي بقي اصلا اللي خلاها تنتشر كده هي المصالح والمكاسب اللي بتيجي من وراها بسبب الحاجات الحمرا الكبييييييييييييره اللي انت كنت شايفها امبارح في الشوارع دي
لو ماكانش فيه حد بيستفيد ماكانش ده هايحصل
وحسبنا الله ونعم الوكيل علي الظالم والمفتري وابن الحرام

Empress appy يقول...

محمد اولا زعلانه منك علشان تقول ان ده راى عيب علىك يا راجل دا احنا بنعمل حاجه كبيرة كده هقولك عليها بعدين مش هينفع علىالهوا علشان الموضوع ده بالذات بتاع المتنيلين وادعى لنا بس مش عارفه افهمه لك ازاى هنا ما علينا هيجى وقتها
ثانيا بقى علىالبوست حلو ان الانسان يحب وساعات احنا بنكون عاوزين نطلع من همومنا يعنى انت لما روحت وقعدت على الكورنيش طول الليل كنت عاوز تخرج من همومك او تنساها لحظات الناس عاوزة كده بس عارف ايه الصعوبه اننا نسيب نفسنا للغيبوبه دى اللى احنا فيها والله انا بقت عنيا تدمع من اللى بشوفه فىالبلد وخاصة سلبيتنا

أم أحمد المصرية يقول...

بقدر ما ابتسمت في اول الموضوع و اعتبرته من المواضيع التي تسخر من حالنا بابتسامة بقدر ما اوجعني لون الدم في التلت الاخير للموضوع حسبنا الله و نعم الوكيل

حمامة يقول...

فعلاً شىء محزن اوى
بس بجد اسلوبك حلو جداً
تسلم ايدك :)

BinO يقول...

ايه يا واد الكلام ده
تدوينة حلوة
وهي الحال اللي يضحك بجد
تعرف انا بضحك من أول ما قرأت
وحتي لما جيت أعلق لقيت بيت الشعر اللي متشعلق فوق ده
ضحكت
عموماً
رغم ما قلت لسه فيه أمل
وزي ما انا قلت عند ماعلينا
ان القربة مش مقطوعة
هيا عايزة صبر
عشان تتنفخ
وتظهر معالمها
بس والله مش مقطوعة
الناس لسه بتسجد لرب العالمين
هو بس الهايفيين هما اللي ظاهرين

Vague يقول...

السلام عليكم يابو صابر يا جاااامد
موضوع الحمرى الكبيرة:
انا اعتقد اني فعلت الثح اليوم ده .. وهو اني صمت _وبالمرة كان يوم خميس- لان "عبادة في الهرج كهجرة الي"

الحمرة الكتيرة:
انت فيه ايه ياعم .. متسيب الناس تفرح.. دول بيتلككوا عشان يفرحوا

الحمرة الفظيعة:
وهو المنتخب ذنبه ايه عشان تشتمه
الذنب يبقى على البهايم اللي بيدلهنم الفلوس الفظيعة دي
وانا متتطمن شويه لان الفلوس دي اكيد اللاعيبة هتتبرع بجزء كبير منها ... لانهم مؤمنسن بالله وقريبين منه... وكلهم كانوا من الناس اللي بتجيب عيش
وحاسيين بالناس دي

اومال فين الصور ياعم الحج

Unknown يقول...

السلام عليكم ورحمة الله وبركاته أخي في الله
أعجبتني بعض الموضوعات في المدونة الخاصة بحضرتك برغم عدم قراءتي لها جميعاً .. واستفدت من بعض الأراء .. وقد فتحت هذه المدونة الآن لأول مرة قدراً أثناء بحثي على (النت) عن موضوع معين بخصوص كلية ضباط الاحتياط
وما دفعني لكتابة هذا الرد الآن .. هو أني لمست من كلمات حضرتك أنك أخ في الله وملتزم .. أحسبك كذلك ولا أزكيك على الله
ولكن لي تعليق على طريقة الحوار في بعض الردود .. سواء من جهة حضرتك .. أو من بعض الأخوات التي نحسبهن أيضاً على خير .. فمهما كانت العلاقة التي تربط الجميع هنا ومهما بلغت من قوة لتصل إلى حد الشعور بالأخوة الحقيقية فهي ما زالت لا تكسر حدود تعامل الأجانب مع بعضهم البعض حتى ولو بمجرد الكلمات
فهذا لا يتيح لنا قول ما نريده ونختمه في النهاية بلفظة أخي أو العكس
أرجو أن يتم فهم الكلام من الأخوة والأخوات على معناه المقصود .. دون أن أكون قد ضايقت أحداً :) .. والله من وراء القصد
وللعلم .. زوجي كان أيضاً بدفعة ضباط الاحتياط 132 .. أسأل الله أن يبارك لكم جميعاً وأن ييسر لكم من أمركم كل خير
ولا أعلم من الصول مصطفى .. ولكن أسألك أن تتذكره بالخير .. فإن لم تستطع .. فلا تذكره بالشر خشية أن تكون غيبة أخي في الله
ولتعفُ ولتصفح .. ألا تحب أن يغفر الله لك؟
جزاكم الله خير الجزاء
السلام عليكم ورحمة الله وبركاته
سبحانك اللهم وبحمدك ، أشهد ألا إله إلا أنت ، أستغفرك وأتوب إليك

صوت من مصر يقول...

بجد كل حاجه حمره وكبيره وةكتيره لدرجه انى فى اليوم ده لبست فانله الاهلى

البنت الشلبية يقول...

ازيك اخى الكريم عامل ايه
انا اسفة انى مبجيش كتير
كويس انك خرجت على الاقل فى اليوم ده اديك فكيت عن نفسك
لكن انا واحدة من الناس لا عمرى احتفلت بيه وشكلى كده مش هحتفل بيه
بص انا ليا وجهة نظر
زى ما حصل فى الكورة
الناس اما بتصدق تلاقى حاجة تنسى بيها همها
هوا غلط ان الناس تحتفل بيه عشان زكرى قسيس
لكن هوا دعوة للحب ولو انى شايفة انه مش عملى اوى بين الازواج
لكن الى بيفرحوا بيه هما الكتاكيت الصغيرة المخطوبين لسه او المرتبطين
بينى وبينك
نفسى مرة تجيلى ولو وردة فى يوم سواء يوم عيد الحب او غيره
سلام

همسات دافئه يقول...

محمد أسفه على تأخيرى الشديد
فكره البوست والربط أكتر من روعه
فعلا المقارنات بين فئات الشعب بقت حاجه بتتعب جدا
وبقت حاجه ملهاش اى حلول لما الاقى ان فى بلدى كل الفلوس ده وبتروح للى مش محتاجنها:((
بس الله يخليك بلاش بركه دم حمرا ده ان شاء الله الحال هايكون أحسن

t3ban يقول...

مفيش فايدة

t3ban يقول...

بعيدا عن رايي في الموضوع ده لأته شكله حيزعلك
انت عملت حاجة كويسة اوي فية
انت غيرت وجهت نظري خالص عن الجيش
كنت بتمني اني مخشش الجيش
مش هروب منه بس لأني كنت فاكر ممنوش فايدة و ابتدي حياتي بدري شوية
لكن بعد كلامك اكتشفت انه ممكن يكون استثمار بقوي ويسرع من الأخرsupportللحياة الجاية
بجد اشكرك انت كنت شايل هم اليوم ده

مؤمنه يقول...

السلام عليكم ورحمة الله وبركاته
انامعاك فى ان موضوع المنتخب أخد أكتر من حقه وبزياده والمبالغات الى حصلت فى الاعلام والتبرعات والامدادات فلى حين حاجات تانيه كتير أولى باللامدادات دى
جزاك اللهه كل خير على هذا الموضوع
وفضفض حضرتك طالما الفضفضه هتوصل لللتماس وقائع جديره بالتعليق
وحمرا وكبيره يعنى ايه المشكله ويارب السنه كلها تبقى حمرا وكبيرا فى عنينا
اما حمرا وكتيره دى اعترض عليها بشده نفرح فى بيتنا وبلاش عشان نفرح ننزل الشارع نكسر فى العربيات ونعطل المرور
دى مش فرح دى لو كان حصل احتلال بيتهيألى ما كناش عملنا كده
واخيرا اعتذر عن التأخير ظروف نت
والسلام عليكم ورحمة الله وبركاته

د/اجدع بنوته يقول...

اخص على كددده ياحظااابط

يعنى بادئها بفانتازى وهزار وحمرا وكبيره

وف الاخر تقلبها سودا ومريبه وكورسى ف الكلوب

جبتلى حالة تقلب مزاجيه بسرعة 120 سى سى

مش ف ادينا غير ندعيلهم ربنا يفك كربهم

الاتنين

الحبيبه والفلسطينين

واحنا كمان تحياتى

والله يسهلوووووو ع الفراغ ده

M A K I يقول...

يعنى طلع اسمك محمد
.... تشرفنا
البوست حلو كتير كتير
أنا اسمعلاوية برده بس حبيت الأحمر عشان مصر
و بصراحة مصر حبها خلانى أحب أبو تريكة والحضرة ومتعب جدا
بالنسبة لعيد الحب فأنا بصراحة نو كومنت
أما غزة فالغصة اللى ف زورى مانعانى من الصراخ
هو ده الزمن اللى الرسول قال عليه تتداعى علينا سائر الأمم, والله لا يغير ما بقوم حتى يغيروا ما بأنفسهم
سللللللللللللللللاااااااااااامممممم

بنت الصالحين يقول...

استاذنا الراقص
تدوينه روعه ومن اجمل مارايت وقرات والله
نفسي نلاقي الناس بتصحي كده وبتعمل الشكل اللي عملته ده لما يطالبو بحقوقهم مش علشان لعبه

ربنا يصلح حالنا جميعا
جزاك الله خيرا ورفع قدركواعزك واعز الدين بك

عاشــــــ النقاب ـقــــة"نونو" يقول...

ليتهم يعلمون
اديهم فرحوا وفرحت انهم فرحوا المفروض خلصنا بقى نشوف المهم والله حاسة ان موضوع الفوز دة توه موضوع غزة وادينا اخدنا العقاب اعادة الرسوم فينكوا بقى يا بني ادميييييييييين
لو بس يبقى فيه توازن يبقى الموضوع يمشي لكن لما تيجي تقول الحجاب يقولك بلاش الهيافة دي هو دة اللي هيطلعنا الفضا ما تشوفوا فلسطين والعراق
لكن لما يهللوا علشان شوية لعب وهيافة فعلا يقولك خلي الناس تفرح
جزيت بكل الخير واسمحلي اخد التدوينة واحطها في موضوعات انفجاريةعندي

الراقـــص مع الذئـــــاب يقول...

السلام عليكم

استاذي الكبير عصفور المدينة
جزاك الله خيرا علي مرورك الجميل وكلماته الجميلة

--------------------

رفقة عمر

إن الله هو العزيز ذو الانقام
ربنا ينجينا مما نحن فيه

جزاكي الله خيرا علي مرورك الكريم يا رفقة

---------------------
Desert cat

ربنا ييسرلك الخير ويبعد عنك اي اللون الاحمر اللي احنا بنتكلم فيه...عشان كله وحش

دمتي في خير وجزاك الله خيرا علي المرور الكريم

الراقـــص مع الذئـــــاب يقول...

توكا

وعليكم السلام ورحمة الله وبركاته

جزاك الله خيرا يا توكا
فعلا حب الرسول هو الاسمي والاعظم واجمل حب
وبعده يجي اي حب تاني في غير معصية لله عز وجل

اما في فرحة المتخب مقدرش اقول غير إنها هيافة يا توكا
وضياع لحجات كتيرة اوي

اللهم أنصر الاسلام والمسلمين
واهدي شباب وبنات المسلمين
اللهم استعملنا ولا تستبدلنا يارب العالمين

جزاكي الله خيرا اختي الكريمة والمدونة بتعتك تطولي فيها براحتك

-----------------------

الساحرة

جزاكي الله خيرا علي مرورك الكريم يا اختي الكريمة
وشرفتي مدونتي الصغيرة

----------------------------
مناجاة
ربنا يجازيكي خير
وشرف ليا تعليقك عندي يا استاذتي الفاضلة

وتحياتي لك

الراقـــص مع الذئـــــاب يقول...

عالمي ازرق

اللهم ارحمنا واهدي شباب وبنات المسلمين
جزاكي الله خيرا علي مرورك الكريم يا اختي الفاضلة

----------------------

دكتورة خمسة فضفضة
وعليكم السلام ورحمة الله وبركاته

جزاكي الله خيرا يا دكتورة
وفعلا المصالح بتتحكم في حجات كتيرة اوي

بتوصل للعقائد كمان
لا حول ولا قوة الا بالله

اسعدني مرورك الكريم

ودمتي في خير

----------------------
آبي

يارب تكونوا عرفتوا تعملوا حاجة يا ابي
الموضوع بقي بيستفحل لدرجة قذرة اوي
انا دلوقتي مقيم في القاهرة...وبشوف حجات غريبة اوي
ربنا يسترها بقي

اما بقي فضفضة الهموم في الكلام الفاضي دا والرقص في الشوارع والهيصة وكمية الطاقة الغريبة اللي طلعت عندنا كان ممكن نطلعها في حاجة افيد واحسن
حاجة ترضي ربنا

ربنا يسترها معانا

جزاكي الله خيرا علي مرورك الكريم

الراقـــص مع الذئـــــاب يقول...

ام احمد المصرية

هكذا حالنا يا استاذتي الكريمة

شر البلية ما يضحك...وهكذا حال الشعب المصري

بس مع لون الدم مكنش ينفع نبتسم خالص

اسعدني مرورك

جزاكي الله خيرا

-----------------------------
ملامح بريئة
شئ مؤسف ومحزن
جزاك الله خيرا اخي الكريم علي زيارتك الغالية ومجاملتك الرقيقة

ودمت في خير

------------------------------

بينو
اخي الجميل الغائب الحاضر

فعلا القربة مش مخرومة
وفي خير
بس الطاغي هو السئ يا اخي الكريم

وهو دا اللي بيعكنن الواحد
ربنا يهدينا ويهدي شباب المسلمين

ومتبقاش تغيب كدا كتير

دمت في خير يا اخي الجميل

--------------------------

آدم الاسمعلاوي

ربنا يجازيك خير ويتقبل منك عبادة في يوم الهرج

اما بخصوص الكورة....احنا مقلناش إننا منفرحش
بس مش بالطريقة الزايدة عن اللزوم
واكيد يا آدم في علاقة بين اللي بيحصل مع المنتخب واللي بيحصل بين الناس العادية

اكيد في علاقة

جزاك الله خيرا علي مرورك الكريم يا باشا

الراقـــص مع الذئـــــاب يقول...

Enas
وعليكم السلام ورحمة الله وبركاته اختي الكريمة

جزاكي الله خيرا علي تشريفك مدونتي وقولك فيا ما لا استحقه

جزاكي الله خيرا علي نصحيتك الغالية
ويعلم الله ما في النية
ولا اخفي عليكي ان ملاحظتك هذا احزنتني جدا....فمعني انك لاحظت امرا كهذا انه موجود بالفعل...
واني سمّاع للنصائح يا اختي الكريمة

وفقكي الله ووفقك زوجك (زميلي ) الي الخير دوماً

ازكر صديق لي في الكلية كان متزوج حديثاً ورزقه الله بطفلة اسمها فيروز قبل دخوله الكلية بأيام قليلة..وكان دائم الحديث عنها حتي اننا تعلقنا بها جميعاً مثله...وكنا ندعوا الله ان يفك الكرب ويجمع شمل اسرته الكريمة
كنا نشفق علي إخواننا المتزوجون جدا
كان الله في عونه وعون المسلمين

اما بخصوص الصول مصطفي فقد اكون بالفعل اخطات في زكره بالسوء
وقد انتهي امره بغير رجعه
وأسأل الله ان لا يجمعني به في هذا الوقت حتي لا انتقم لنفسي منه....فقد ابتلاني الله في هذه الفترة بالسلاح الذي كان يشهره في وجهنا....وانا شخص لا ينسي ثأره ابداً...ولو قدر الله لي ان اجتمع معه لرأي مني ما لا يتوقعه احد
واخاف ان اعصي الله فيه
اللهم لا تجمعني به في الدنيا
واغفر لي وللمسلمين

جزاكي الله خيرا اختي الكريمة علي زيارتك الجميلة ونصائحك الجميلة...واتمني تواجدك الدائم اتوجيهي وتزكيري
فزكر فإن الزكري تنفع المؤمنين

الراقـــص مع الذئـــــاب يقول...

صوت من مصر

بلاش الاهلي...مش بحبه خالص

اسعدني مرورك اخي الكريم


---------------------------
البنت الشلبية

ايه بس الغيبة الطويلة ديه
عودا حميدا
انا مخرجتش بهدف اني افك عن نفسي والله
بالعكس
انا رجعت متعكنن ويارتني ما خرجت
اما بقي فضفضة الناس في موضوع المنتخب ديه مش مقبولة خالص يا اختي الكريمة زي ما قلنا كان ممكن يخركوا كبتهم في حاجة ترضي ربنا عز وجل

جزاكي الله خيرا علي مرورك الكريم

دمتي في خير

--------------------------

همسات دافئة
المقارنات مبقتش بين فئات الشعب يا شيماء
دي بقت بين احوال الشعب وتصرفاته
ربنا يصلح الاحوال وينجي مصرنا الحبيبة وامتنا المسلمة من كل سوء

جزاكي الله خيرا علي المرور الكريم

الراقـــص مع الذئـــــاب يقول...

anwer
لا...في فيادة يا اخي الكريم

وبعدين انت مش عاوز تقول رأيك ليه؟؟
لازم نتناقش ونتحاور ..امال احنا بنتكلم وبندون ليه

اما بالنسبة للجيش بقي فخد ناصحيتي بصفة عامة وليست للجيش بس

حاول تخلي اي امر الظروف وضعتك فيه انه يكون لصالحك...هتطلع كسبان من اي موقف

ودا اللي اتعلمتوا من الجيش
افترة الجيش مدرسة كبيرة اوي هتتعلم فيها حجات كتيرة اوي في فترة قليلة

لو ربنا كتبهولك متزعلش


اسعدني مرورك الجميل واتمني دوام زيارتك الكريمة يا اخي الجميل

--------------------------
الاخت مؤمنة
وعليكم السلام ورحمة الله وبركاته

بخصوص حمرا وكبيرة....لا والف لا مش عاوزين نقول نحتفل...كلمة نحتفل ديه غلط
احنا حيتنا تبقي كلها حب ...[س حب صح...زي ما وضحت الاخت توكا في ردها وتعقيبها علي الموضوع

اسعدني مرورك الكريم يا مؤمنة
ولا داعي للاعتزار فأنتي من اصحاب هذه المدونة
ودمتي في خير

-----------------------------
د/ اجدع بنوتة

مش هزار يا دكتورة...دي حالة واقعية...إننا في ميزج من التقلب المزاجي
ربنا يسترها علينا
وبعدين معدش في فراغ ولا حاجة
اديني قاعد في القاهرة ومش بنزل اسماعيلية غير في اخر الاسبوع
ادعيلي

جزاكي الله خيرا علي مرورك الكريم

الراقـــص مع الذئـــــاب يقول...

مي الاسمعلاوية

الحمد لله اسمي محمد من 26 سنة والله
اللون الاحمر انا مش بحبه في اي حال من الاحوال
وبالنسبة لعيد الحب كان نفسي اعرف اللي ورا النو كومنت دا ايه؟؟؟

وربنا ينصر المسلمين في غزة وفي كل مكان

جزاكي الله خيرا علي مرورك الكريم

--------------------------
عاشقة الفردوش
جزاكي الله خيرا علي كلامك الجميل
اللهم ارزقنا الاخلاص في القول والعمل

ربنا يصلح احوال المسلمين ويجتمعوا علي الخير

ربنا يكرمك علي الدعاء الجميل

دمتي في خير وتشرفت بمرورك

------------------------------
nonoymm

فعلا يا استاذتي الفاضلة
الهوجة بتاعت المنتخب خبت وضيعت حجات كتيرة

اسعدني تعليقك الجميل
ويشرفني اهتمامك بما اكتبه يا استاذتي الفاضلة
اسئلك الدعاء

دمتي في خير

t3ban يقول...

انت الي طلبت رأيي
ححطلك كام نقطة و بعديها حبرر اتعملت اه
1 الدولارات المزيفة و اقتصادنا مشاء الله
2مدبحة الجنود و انت راحل كنت جدي مجند....
3التهديد بخطف جنود قصاد الي سجنتهم الحكومة المصرية
الرد
1 الدولرات و حنقول دول قلة قليلة من الفلسطينيون ووحشين و كخة
2مدبحة الجنود و حنقول قال الأبلكاش للمسمار فلقتني قالو منت مش شايف الدق الي علي دماغي
3 طب التهديد
انت راجل قلتلي الحقني انا بموت افتحلي بيتك
دخلت البيت و بهدلته و قلت معلش
بس اما اعاقب عيل من عيالك يا راجل قدر اني بطيب اهالي الشباب الي ماتو
تقلي دول رهاين
دنت كدة تبقي داخل تستعمر مش تاكل و تشرب
متقليش دي مكايد صهيونية ولا اوعي تنسي في يوم ان العرب اخوة
الأخ ميبهدلش اخوه و يفضحو قدام العالم الي يسوي و الي ميسواش

Doba يقول...

حلو التدرج بين الحاجات الحمرا اللى ذكرتها

حلوة حلة يعنى
بس انا نفسى فى حاجة حمرا كبيرة بس ميبقاش تبع عيد الحب
تبقى تبع اى حاجة بس المهم تيجى

يأس
إحباط

ثم انت لسانك هينيه طويل كده
ولا يلا خليها علينا
فضفض يا اخويا لتعيا ولا حاجة

تحياتى
هبة